رواية بنات راعي البقر
الفصل الخامس5
بقلم مريم اليوسف
كل ما احتاجه هو مكان منعزل اقضي به حزني وعزلتي بعيد الضجيج والتساؤلات ... اقدر وقوفكم جنبي لكن امنحوني هذا الوقت لأنني بحاجته كثيراً لكي اجمع فيه رفات نفسي
محدا رح يحس بالشي يلي عم اكتبو الا يلي جربو ... بتوصل لمرحلة فيها بدك مكان تبكي فيه وما تلاقي مكان ...وين مارحت محاوط بالناس يلي اذا شافت دمعة على خدك بدا تعرف شبك .. او ممكن يعرفو شبك بس لما بشوف دمعتك بحاولو يمنعوك ... يواسوك ... يوقفو جنبك ... وانت بوقتها بس بدك تبكي مو اكتر
~~~~~~~~~~~~~~~•
بعد يومين .. الوقت العصر
متمددة قمر بالفرشة والباقي كل حدا ملتهي بشغلة .. دخلت عليها شمس وحكتها : شو كأنك صدقتي حالك انك مريضة وحتى لو مريضة لازم تصحي وتقومي
قمر :شمس ...
شمس :قوليلي
قمر :بترجاكي بدي ابكي
شمس :اي ابكي مين ماسكك
قمر :بدي ابكي وطلع كلشي جواتي مخنوقة كتيير وماعم اقدر لانو الكل رح يبلش يسأل
شمس :اي قومي نتدرج ونروح ع التلة وهنيك بتبكي برياحتك
قمر : ياريت بس شو بدنا نقول لأمي يمكن ماتخلني وتفكرني لساتني مريضة
شمس : انا بدبرها قومي البسي
قمر :يلا
~~~~~~~~~~~~~~•
مجتمعة عيلة ابو القاسم بحديقة البيت وعم يحكو ويضحكو والولاد عم يلعبو جنب نافورة صغيرة ... اجا فاروق وانضم الهن
امو :مين عاش وشافك
فاروق : يلي بيسمعك بقول ماعم تشوفوني بالمرة
امو :معتبر هالخمس دقايق يلي عن شوفك فيهن اخر الليل شوفة
فاروق : اي هو هاليومين مشغول شوي
ابوه : استحى قاسم يقول هالحكي ... مستلم الارض الكبيرة وكل يوم بنزل ع الارض ٢٠٠ عامل وماعم يشكي ... انت عطيناك اصغر شقفة وعم تقول مشغول
فاروق : بالارض ماعم انشغل بس مشغول بالسيارات ومع جواد مبارح فتح الورشة وكان بدو شوية مساعدة
ابوه : اذا هيك مو مشكلة ... كيفو جواد
فاروق : الله يعينو (وبعدها انتبه شو حكي )
امو :خير صاير شي معو
فاروق :لا لا قصدي ع الشي يلي صارو معو
ابوه :اي شغلة فاضية الحمد لله هيك ولا غيرو
فاروق :اي والله
زوجة قاسم : سمعت انو بدو يخطب
ام قاسم :عنجد من وين
: عحسب معلوماتي انو بيت ابو شادي جايين ع الضيعة يصيفو ببيتن يلي هون ويخطب وحدة من البنات
ابو القاسم :اي صح ابو شادي حكاني وقلي جاي بهل اليومين بس ماجاب هيك سيرة
: اي هنن مابيعرفو .. خالتي ام جواد كانت عم تخطط وحكت لامي
ام قاسم : وليش ماخبرتني انن جايين
ابو القاسم : والله نسيت
ام قاسم: لكن لازم نجهز لجيتهن
ابو القاسم :كيف لكن .. بس بالاول يجو والخير موجود
ام قاسم : وماعرفتي مين بدن يخطبو لجواد
: يمكن ميرفت
ام قاسم : وانت فاروق شو رأيك نخطبلك لونا
فاروق قام بدون مايرد او اعطى انطباع انو هالحكي مو عاجبو
امو :اي اهرب وطنش ع السالفة اخوك الاصغر منك صار عندو ولدين وانت خليك هيك
ابو :فاروووق
وقف فاروق بعد ماكان ماشي كم خطوة : اي ابي
ابوه :امك عم تحكي معك ليش ماعم ترد عليها
فاروق :ماحلكن تعرفو رأيي بهل القصة
ابو القاسم : طيب ليش
فاروق :مالقيت البنت المناسبة
ابو القاسم :طيب بكرا جاي ابو شادي شوف لونا
فاروق :لأنو انا غشيم عن لونا
ابو القاسم : حسبي الله ونعم الوكيل
فاروق : احسن الشي .. يلا سلام
راح فاروق وحكت ام قاسم : انا حكيت هيك قصد مشان شوف ردة فعلو
ابو القاسم :ردة فعلو على شو
ام قاسم :ملاحظة عليه من كم يوم مانو على بعضو قلت بركي حابب شي وحدة ولما بفتحلو سيرة الزواج بقلي عليها .. بس ما اخدت منو لا حق ولا باطل
ابو القاسم :الله يهديه والله حابب افرح فيه حاجتو
ام قاسم :انا احساسي مابخيب واكيد في حدا بحياتو والا ما اعرف
ابو قاسم :واذا عرفتي شو رح تعملي
ام قاسم :رح روح واخطبلو اياها فورا ... مانك شايف قالب على نصو ياقلبي عليه
ابو القاسم :عأساس لو في وحدة ناطرك لتحزريها
ام قاسم :بركي صاير مشاكل بيناتن .. بنصالحن
ابو قاسم :لا فاروق ماعندو هالحركات ابدا انو يحكي مع بنات
ام قاسم : طيب شبو هالولد
زوجة قاسم : مرت عمي شوفي قاسم بركي بيعرف شي
~~~~~~~~~~~~~~~~~•
وصلو ع التلة قمر وشمس
قعدت قمر وجوال شمس رن بمسج وعرفت فورا مين مرسلها وراحت قعدت ع جنب ترد وقمر بمكانها سرحت قدامها وتلقائيا بلشو ينزلو دموعها بعد ما اعطتهن حريتهن
~~~~~~~~~~~~~~~~~•
تاني يوم نزلو ع الشغل بعد عطلة دامت ٤ ايام للبنات قمر وشمس
شمس متلهفة لتروح ع الشغل فايقة متفائلة حابة الحياة بعكس قمر الدبلانة وماكانت متمنية تطلع عليها الشمس
سلمو ع البنات سمر وامل وبلشو شغل
شمس كان عيونها ع الطريق يلي اجو منو .. وكل شوي تلقي نظرة ... اشتاقت لحبيبها السري الخاص فيها ... كان بدا تشوفو وتهدي دقات قلبها يلي من الصبح ماهديت لأنها متأكدة انها رح تشوفو ....
مر كتير وقت وهية على امل انو يجي
صار وقت الغدا قعدو اكلو والمرابعي طلب منها تعمل كاسة شاي
واتذكرت انو ممكن بهل الوقت يجي قامت بحماس وراحت ع الغرفة المعتادة واول مادخلت انتبهت ع المبيدات كيف مسطرة على رفوف فوق بعضها
شمس :هدول ليش حاطينهن هون
بلشت بعمل الشاي ولمحت لوح الشوكولا بعدو هون وع الرف يلي محطوط عليه المبيدات .. حاولت تطولو .. ووصلتلو وسحبتو مع سحبتو انسحبت عبوة المبيد ووقعت ومع وقعتها وقعت على قاعدتها وع الضغط طارت الطبقة وطرش على كنزتها ... هي بتعرف خطورتو على الجلد وفوراً شلحتها بخوف وعشوائية وانشلح الشال معها وضلت بس بحمالة الصدر والبنطلون بهل اللحظة فات فاروق وشافها كيف خايفة وعم تنفض على جسمها بخوف ولبكة وشاف عبوة المبيد مفتوحة ومدلوقة ع الارض وفهم شو القصة
وهية فورا راحت لعند الحنفية فتحتها وصارت تعبي ايديها مي وتحط ع بعض الاماكن بجسمها ... للحظات سرح بجسمها وانحنائاتو ولون بشرتها الابيض ونسي حالو وهو عم يتمايزها حتى انتبه على حالو واستغفر ربو وطلع فورا ... يعني دخل وطلع وهية مو منتبهة
مسح على وجهو بأيده وهو مقهور من حالو وعم يستغفر ربو ... بدل مايطمن عليها او ينبها على وصولو واقف وعم يتأملها .. صحي على حالو مع الوضع يلي هية فيه ورجع فورا تنحنح لتنتبه لوصولو ... سمع ركضها لورا الباب وحكت :لحظة لا تفووت
فاروق :خير شو صاير
شمس :طرش علي سم الحشرات واضطريت اشلح الكنزة مشان مايجي شي ع جسمي ويحرقني
فاروق :وانت منيحة
شمس :اي منيحة بس انا مو لابسة بترجاك لا تفوت
فاروق :اطمني مارح فوت ... المهم انتي متأكدة ما اجى شي على جسمك
شمس :لا لا .. وغسلت بمي الحمد لله مافي شي
فاروق :اي الحمد لله .. اي شو اعمل انا هلق
شمس : بدي عذبك ابعتلي ورا قمر
فاروق :يلا تكرمي شوي وبندهلا
غاب شوي واجا هو وقمر
سمعهن عم يحكو جوا
قمر :كيف صار هيك
شمس :وقعت هي وطرشت علي وشلحت الكنزة بسرعة مشان مايجي شي على جسمي .. المهم هلق جيبلي شي البسو
قمر :من وين بدي جبلك
فاروق من برا : تروح قمر معي نجبلك شي تلبسبه
شمس بصوت واطي بس هو سمعو : هاد لساتو هون
ابتسم وقال : اي هون قوليلي شو اعمل
قمر : البيت صار بعيد
فاروق : لحظة
شلح قميصو وضل بفانيلا بيضة نص .. دق الباب وطلع قمر
فاروق : خليها تلبس هاد
قمر :وانت
فاروق :ليكيني لابس .. وهو انا اصلا ماني مطول جاي اخد غرض ورايح
هزت براسها ودخلت لجوا وشوي طلعو شمس وقمر ...شمس لابسة قميص فاروق بلون الرمادي جاي طويل عليها شوي واصل لعند الفخد وكنزتها يلي شلحتها بأيدها
عيونو من اول ماطلعت وانزرعو عليها ومعد شالن
شمس : شكرا الك
فاروق :على شو .. لا تهتمي
قمر :انا رح جيب الشاي شكلنا نسيناه
رجعت دخلت قمر وشمس اخدت طريق الشغل وراحت قدام عيون فاروق يلي عم تتفحص جسمها مشيتها
فاروق :شمس
وقفت والتفتت عليه
فاروق :تعي لوصلك ع البيت مو زابطة تشتغلي بهيك تياب
شمس : ليش شبن
فاروق : القميص قصير عليكي
شمس :بس معد محرزة اليوم رح يخلص
فاروق : اذا عشان الاجار بتاخدي اجارك كامل
شمس :اكيد مو مشان هيك
فاروق :انا سابقك ع السيارة خبري اختك
راح ع السيارة يلي مشتريها جديد بيك اب جبلي بين مادورها كانت هية واصلة فتحت الباب وركبت جنبو
دور السيارة ومشي والصمت سيد الموقف
وهية صارت تسترق النظر عليه ... قعدتو ورا الدركسيون نظرو الثابت ع الطريق ملامحو الرجولية الحلوة ... لحيتو المغرمة فيها
بقلبها :نيالها يلي رح تكون مرتك ... رح تقعد هون محلي وجنبك على طول ... وتشوف حالها انها مرتك ... رح تكون قريبة منك على طول وتشم هي الريحة يلي غرفت قلبي غرف ... واهم شي بتقدر تلمس دقنك هالتفكير ازعجها نوعا ما ونزلت نظرها على ايديها وصارت تلعب فيهن بتوتر
حكي فاروق وهو مركز النظر ع الطريق : شو صار مع هداك الشب
شمس :ايو شب
فاروق :حبيبك شو كان اسمو
شمس :اااه اي عماد شبو
فاروق :ما عأساس بدو يجي يخطبك
شمس :اي صح .. بس هلق مابيقدر اهلو مسافرين
فاروق :هه
شمس :كأنك مو مصدق
فاروق :لا لأنو مبين عم يتسلى وانا مابعرف ليش ماشية وراه
شمس :لا ابدا ماعم يتسلى
فاروق :طيب شو يلي بأثبتلك انو ماعم يتسلى
شمس :اااه ... اي كتير شغلات
فاروق :متل شو
شمس :مبين محترم وماعندو اي حركات برات الطريق
فاروق :وخبرتي اهلك
شمس :لا ليجو اهلو بيخبرو فرد مرة
فاروق : اسمعي شمس انت متل (كان بدو يقول متل اختي بس ماقالها ) انت بنت ضيعتي ومن حقي خاف عليكي مع انك واعية وفهمانة بس بقصص الحب الواحد بصير اعمى ومن حقي نبهك انو مبين في شي غلط بالعلاقة
شمس :بس انا مو بنت ضيعتكن
فاروق : ما خلقتي هون صرتي بنت هالضيعة
شمس :بس هي حياتي وانا حرة
فاروق بعصبية : حرة براات هي الضيعة يلي عم تتبري منها ... اما هون بدك تحافظي على سمعتها ... وانا رح قدملك ٣ خيارات وانت نقي واحد منن يا اما بتخليه يجي يخطبك حتى لو اهلو مو موجودين يجي هو ويأثبت حبو وبظن ابوكي مانو متشدد ورح يتفهم القصة
شمس :الخيار التاني ؟
فاروق : بتتركيه وبتقطعي علاقتك فيه يا اما الخيار التالت وهو انو رح خبر ابوكي وهو بيعرف يتصرف معك
شمس :هه حاسة حالي محور هالضيعة
فاروق :لا انت محور ....
شمس :محور شو
فاروق :ولا شي انا قلت يلي عندي ومستحيل شوف غلط وضل ساكت
هزت براسها وحكت بقلبها : عم اتجادل انا واياك على ولا شي ... بس مافيني قلك الحقيقة ... وسبب خوفك علي ماعم لاقيلو مبرر ... عنجد نيال يلي بدها تحظى فيك اذا انا بنت وغريبة عم تخاف علي وتنصحني كيف اقرب الناس الك
التفتت عليه وتوسعت عيونها وقالت :معقول عم يفكر فيني ؟ .... لا لا وين رحت بخيالي شكلي اعجابي وحبي الو بلش يخليني اتخيل شغلات مو موجودة ... بس لازم لاقي طريقة انهي هالقصة يلي عم تدور براسو
~~~~~~~~~~~~~~~~~•
المسا
ام قاسم عم تدق الباب على باب غرفة
ليفتح قاسم وهو عم يلبس كنزة بجامتو
امو : شو عم تعمل امي
قاسم : ولا شي عم بدل تيابي وطالع لأتعشى في شي
امو :وينا مرتك
قاسم : عم تحهز العشا
دفشتو لجوات غرفتو وسكرت الباب
قاسم : امي شغلتي بالي في شي
امو :اخوك فاروق شبو
قاسم :شبو
امو :صرلو يومين مانو على بعضو بضل سارح واكلو خافف وحركاتو كلشي بتحسو مانو بهل الدنيا
قاسم :وانا شبعرفني بركي صاير معو شي بالشغل او بالسيارات
امو : لا مابظن اخوك عشقان
قاسم : طيب منيح ما انت حابة تزوجيه عرفي مين هية وروحي اخطبيلو اياها
امو : ليش هو بيحكي ... انت بتعرف شي
قاسم : لا ابدا
امو : ولا حسيت انو معجب بشي حدا او لمحلك عشي حدا
سكت قاسم شوي وكأنو اتذكر شي (شمس عاجبتني وحابب اتزوجها )
امو : شو وين شردت
قاسم : معقول هي ؟
امو : مين هي
قاسم : اممم هلق فهمت كل القصة
امو : لك ايو قصة فهمني
قاسم :هلق هو حكي انو في بنت عاجبتو بس مابظن توافقو عليها ومشان هيك هو ماحكي بالموضوع
امو :مين هي البنت
قاسم : مو متأكد بس بظن انها بنت راعي البقر ابو بدر .... البنت الصغيرة اسمها شمس بتشتغل عنا بالارض وتحديدا بالارض عند فاروق
امو : طيب بتعرف اذا في شي بينها وبين فاروق
قاسم : لا لا مابظن بهل السرعة يصير شي حتى البنت جوال مامعها و عهوا حكي فاروق انو اعجاب وسكر ع السيرة بعدها لانو قلتلو مستحيل اهلي ياخدولك اياها ويمكن نهى الموضوع بس مابعرف اذا من جديد صاير شي
امو : طيب ماشي رح اتأكد اذا هية او في غيرها بحياتو
قاسم :امي اتركيه يعمل يلي بريحو
امو : ابني وبعرف مصلحتو خلص انت عملت يلي عليك
قاسم :امي البنت مابتعرف شي واذا كان في شي فهو من طرف ابنك ... البنات مربايين وماعندن هالحركات ابدا
امو : اي اي فهمنا
تركتو وطلعت وبعيونها فيهن اصرار وعزيمة بس على شو الله اعلم
~~~~~~~~~~~~~~•
ببيت ابو بدر
صباح قاعدةومع زوجها عم يتعشو و نجمة قاعدة قدام التلفزيون وابنها على رجليها عم تهزلو لينام
وشمس طلعت من الحمام متوضية وبدها تصلي دخلت ع غرفة نومهن وشافت قمر عم تصلي وساجدة ... قعدت تنطرها شمس لتاخد منها طقم الصلاة بس طالت بسجودها قربت شمس شوي لعندها وشافتها عم تبكي بسجودها
شمس :حسبنا الله ونعم الوكيل ... الله يريح قلبك يا اختي
~~~~~~~~~~~~~~~~•
ماشي فاروق بالسيارة ولفت انتباهو جواد بعدو فاتح الورشة غير الطريق وراح لعندو بعد ما وصل ونزل من السيارة راح وقف جنبه كان فاتح غطا سيارة وعم يصلح فيها والجبصين شايلو عن ايدو
فاروق : سلام
جواد وهو منتبه بالشي يلي عم يشتغلو :اهلين فاروق
فاروق :عجب فاتح لهل الوقت اتأخر
جواد :عند هي السيارة مضطر سلمها بكرا
فاروق :ما اقتنعت بهل الحكي
جواد :طيب طافش منيح هيك
فاروق :اي هاد الحكي فيه وجهة نظر بس من مين طافش
رما المفك من ايدو وقال من الدنيا كلها واولهن من حالي رح افقع يا زلمة عم الهي حالي بالشغل بس ماعم تظبط ماعم تطلع من راسي مابتروح صورتها من بالي ولا ثانية
فاروق : والله مابعرف شو قلك غير الله يكون بعونك
جواد : اي والله بعين الله ... ليك اعمل شاي لنشرب
فاروق : ليش وين الولد يلي بيشتغل معك
جواد : ايو ولد بدو يضل لهل الوقت
فاروق : اي صح
قام فاروق يعمل شاي واتذكر شمس واتذكر الموقف يلي صار اليوم وبعدها صار يستغفر ربو وحاول يطرد هالافكار من راسو وحكي بس بدون جواد مايسمعو : مو بس انت ماعم تروح بالك وانا كمان صايبني نفس دائك
فاروق : جواد
جواد : قلي
فاروق : هلق انتو ليش اتزوجتو
جواد :ماخليت وسيلة انو اهلي يخطبولي اياها وعبث وبصراحة الحكي بيناتنا انا ماعد قادر وصلت لمرحلة الجنون ومعد سيطر على حالي انو بدي احصل عليها و خفت اغلط معها بالحرام
فاروق : وهية شو كان موقفها بهداك الوقت
جواد :ماهو يلي وصلني لهل المرحلة هي... ممنوع نحكي مكالمة ... ممنوع نلتقى ... انا كنت قاصد شغلها مع قاسم وروح شوفها بس وقت شوفها بيناتنا ٣ امتار لك متمني امسك ايدها ماتسمحلي ... انا يزيد الضغط علي بتعرف وصلت معي لمرحلة بدي اخطفها ... بس رجعت فكرت العوقة مني هي ماذنبها ... وعرضت عليها الزواج بالسر لحتى الله يفرجها وعاندت كتير بس بالاخير وافقت ... وصار يلي صار ... بتعرف شو بفكر هلق ياريت ماتزوجتها وضلينا هيك يمكن كان الفراق اسهل
فاروق : كيف يعني
جواد : تخيل حدا جبلك صحن حلو شفتو بس ما اكلت منو ورجعو اخدوه هون انت بتنقهر بس بتقول منيح ما دقتو ولا عرفت طعمتو احسن ما اتعلق فيه
كمل فاروق الحكي وقال : ونفس الصحن حدا جبلك اياها واكلت لقمة منو واخدوه منك ماهيك
جواد :بالضبط ايو اصعب من الي دقتو ولا من يلي ما شميتو حتى
فاروق :من يلي اكلت منو لقمة وتعلقت فيه
جواد :وهاد يلي صاير فيني ... يعني يلي كان بينا زواج ... حتى لو تزوجت مافي حدا رح يعبي مكانها
فاروق :على سيرة الزواج قال بدك تخطب ميرفت
جواد :وهي تاني شغلة طافش منها هي اهلي ونقهن .
~~~~~~~~~~~~~•
الصبح بكير عم يلبسو البنات ..
شمس كانت عند تيابها عم تطويهن وتسطرهن بمكان المخصص الها لطلع معها قميص فاروق ... التفتت حواليها لقت قمر طالعة برات الغرفة ونجمة نايمة هية وابنها .. قربتو من انفها واستنشقتوا بكل استمتاع
وفورا بعدتو عنها وطوتو منيح ورفعت تيابها وحطتو اخر شي مشان محدا ينتبهلو وقامت لتروح عشغلها
~~~~~~~~~~~~~~~•
بلشو نهارهن بقطف بندورة كانت شقفة مو كبيرة يعني خلال ساعتين بخلصوها
سمر :بنات بعد البندورة شو بدنا نشتغل
شمس :هلق ابو ايوب بلاقيلنا مليون شغلة..
قمر : اي نحنا جايين نشتغل شو جايين نلعب
سمر :مو هيك قلت بركي بنشتغل نص نهار
امل :اوووف انا كل هالشغل ماعم طيقو
شمس : اي بلا ما تشتغلي
سمير يلي كان عم يسمع حديثهن صرخ بتهديد : املللل
امل :اي اي ماعم نحكي شي
قمر بهمس: انتو مجبورين على هالشغل ؟
امل :لا ابدا بس ممل
شمس بمسايرة : هو معكن حق هالشغل بملل كتيير
سمر مين هدوك الناس
اتطلعت شمس وقمر وحكت قمر :هاد قاسم اخوه لفاروق ابن صاحب الارض والمرى امو
شمس :عجب جايين لهون
قمر بلا مبالاه : مابعرف خلونا نخلص هلق بتحمى الشمس علينا
عند قاسم وامو
قاسم :ماصار الا جيتي
امو :بدي اعرف مين هالبنت يلي شاغلة عقل ابني
قاسم : يا امي ويمكن مايكون في شي
امو :وانا مارح اعمل شي بس بدي القي نظرة ... اندهلن لشوف
قاسم : اااخ منك ... يا بناااات تعو شوي
عند البنات يلي بنص الحقلة
سمر :عم ينده علينا
قمر :كلنا
سمر :قال يا بنات
شمس : اي امشو لنشوف الله يستر هلق بتكون جاي الخانم ومناخيرها واصلة للسما والله اعلم شوبدها تتمأور علينا
سمر : متل شو
شمس :لسه مابتعرفي اهل هالضيعة تعي تعي
وصلو لعندها وقاسم همس بأدن امو بدون مايسمعو
ام قاسم :يعطيكن العافية يابنات
ردو :الله يعافيكي
ام قاسم : انا سألت المرابعي عن الشغل وقال اليوم مافي زيادة وبصراحة انا بحاجة حدا يجي يساعدني بالبيت عندي شوية تعزيل
سمر وامل فورا قالو :نحنا بنجي
شمس : انا بعتذر مابشتغل بالبيوت عند حدا
ام قاسم : طيب كشفو عن وجوهكن خليني شوفكن
كشفت قمر بالاول لتعجب بجمالها وبعدها شمس يلي عيون ام قاسم ركزت عليها كمان مابتقل عن جمال اختها .. وبعدها سمر وامل كانو بنات ناعمين وحلوين بس كان تركيزها على شمس يلي جاوبتها
ام قاسم : لا تفهموني غلط بس انا جاييني ضيوف ومارح لحق عزل كل البيت قبل مايجو مشان هيك قلت بتساعدوني وبتاخدو اجاركن وحبة مسك
شمس : انا بالنسبة الي بعتذر
قمر : انا ماعندي مانع بروح
سمر : نحنا كمان ماعنا مانع تكرمي خالة
ام قاسم : بس الصبية ليش معارضة صدقيني مافيه شي الشغل
شمس : بعتذر بس انا مابشتغل بالبيوت ولا بخدم حدا
ام قاسم :ليش فهمتيها هيك اعتبريها مساعدة
شمس :اذا مساعدة تكرمي بس ماباخد اجار
ام قاسم : انا لو مابحاجتكن كلكن ماكنت اصريت عليكي بس مابصير تشتغلي بدون مقابل
شمس :قلتلك اذا مساعدة بدون اجار تكرمي غير هيك اسفة
ام قاسم : طيب ماشي متل مابدك
~~~~~~~~~~~~~~•
نزلو من سيارة قاسم قدام البيت او متل ماقلنا من قبل قصر ريفي
سمر وامل انبهرو بجمال البيت ماحكو بس عيونن بينت انبهارن اما شمس وقمر كان تصرفن طبيعي وهالشي لاحظتو ام قاسم
ام قاسم :تفضلو يا صبايا
فاتو وراها شمس وقمر ماشيين بثبات اما امل وسمر عيونهن وراسهن عم يفتل يمين وشمال وعم يتفقدو المكان بكل تفاصيلو وكأنو هالشي ضمن خطتهن وشمس ملاحظة عليهن هالشي
سمر :ماشاء الله على هالبيت يا خالة بجنن كتير
ام قاسم :تسلمي عيونك الحلوين
اما عن الباقي ضل ساكت
خلينا نبلش بغرفة الضيوف
دخلو على غرفة الضيوف وكانت كنب فخم ومبينة انها مابحاجة تنضيف
ام قاسم :هو ما من زمان عزلناها بس بدنا نعملها وجه ع السريع لانو جايينا ضيوف
سمر :لا تاكلي هم .. قوليلينا شو نعمل
ام قاسم :خلينا نطلع الكنبايات لبرا ونبلش
بلشو شغل مع انو مابحاجة حتى شطف
تركتن لحالن ام قاسم عن قصد وطلعت ع غرفة تانية بتقدر تراقبهن فيها وتسمعن بوضوح
شمس :والله كلو نضيف وما بحاجة
قمر :خلصينا شمس اشتغلي من تم ساكت
سمر :شايفين على هالبيت شو كبير وحلو نيالن
امل :اي والله يا هيك العيشة يا بلا
شمس : نحنا مابنقول نيالن .. بنقول الله يهنيهن ويباركلن فيه ويكفيهن شر الحسودييين وزورتهن لأمل وسمر
سمر :اي ماقصدي احسدهن ... قصدي انو ناس متهنية وناس متعترة
شمس : اكيد تعبو لعمرو هالبيت وصار عندن هالاملاك وما جابوها من على وجه المي .. وبعدين ربنا خلق لكل منا دورو بهل الحياة وما كل الدنيا ناس فقيرة ولا غنية كل مين بحاجة التاني متل ماهنن بحاجتنا لنشتغل عندن نحنا بحاجة مصاريهن وهيك الحياة يعني هي الحياة الواحد بدو يعيشها بالرضا والقناعة وما يكون عينو على رزق غيرو لأنو رح يتعب طول عمرو وما يحصل شي ... ومابقولو يلي رضي عاش والحمد لله انا كتير رضيانة بحياتي وبعمري ما اتطلعت عشي بأيد غيري مو هيك قمر
قمر كانت عم تشتغل وشاردة ومانها بهل الدنيا ابدا
شمس :قمرر
قمر :اي شبكن
شمس :سلامتك عم نقول يلي رضي عاش ما هيك
هزت براسها وتابعت شغل
خلصو هي الغرفة وبلشو يتنقلو من غرفة لغرفة عحسب طلب ام قاسم وكان كلو شغل خفيف لانو كلو نضيف ...
ام قاسم ندهت لشمس لتروح معها وصارت تحكي وهنن ماشيين وقالت :بعرف عم عذبكن بس جاي رفيقتي وهية كتير بتدقق ومابدي تلاقي عندي ولا غلطة لانو مابعود بخلص من لسانها
شمس : ولا يهمك اصلا مافي عذاب كلو نضيف ومرتب
وصلو لقدام غرفة وقالت بدي تساعديني بترتيب هي الغرفة هي لابني فاروق ومابحب غير انا فوت عليها ورتبلو اياها وبتعذبني كتير
ضلت ثابتة وملامحها ماتغيرت بس جواتها براكين واعاصير فتحو الباب هفت ريحة عطرو يلي تغلغلت جوات صدرها ... كانت شوي مكركبة وتياب هون وهنيك والتخت مو مرتب واكلات ومشروبات جنب التخت
ام قاسم :انا نازلة قلن يجهزو الغدا
شمس :لحظة انا مابضل لحالي بالغرفة
ام قاسم :والله مافي حدا بالدار غير انا وانتو وكنايني
شمس :مو مشان هيك بس بدي تكوني موجودة مشان مابعدين اذا نقص شي تحطوه بضهري
ام قاسم :لا اطمني مارح نحط شي بضهرك خلص رتبيها كيف ما كان وانزلي
هزت شمس براسها وراحت ام قاسم وضل شمس عم تتأمل التخت وبقلبها :مبارح ركبت جنبك واليوم بغرفتك ليش عم فوت عتفاصيل حياتك
هزت براسها لتبعد هالافكار عن راسها ورتبها بسرعة ونزلت
.....
خلصو البنات شغل وواقفين مع ام قاسم يلي عم تجادلهن مشان ياخدو اجارن بس شمس معندة وقمر كمان عندت معها على عكس سمر وامل يلي اخدو اجارن وهنن مبسوطين
ام قاسم: اعتبروها هدية
شمس : ولا اي شي نحنا قالنالك انو بنجي مساعدة لانو اذا اخدنا مصاري رح تصير شي تاني وانت بتعرفي موقفي
ام قاسم :طيب وانت يا قمر
قمر: متل ماقالت شمس يلا بالاذن
مشوا اتجاه الباب ليصادفو قاسم وجواد فايتين مع بعض وعم يحكو
جواد : انت متأكد انو عندك
قاسم : قلتك عندي وانا خبيتو بأيدي
جواد:يعني مارح تكون جيتي ع الفاضي
ليقفوا وينتبهوا للبنات ... قمر اتجاهلتن تماما ومشت وكأنو التقت بشخص عابر اول مرة بتشوفو ومابهما امرو ليوقف جواد مصدوم من تصرفها وبنفس الوقت تكركب كتير لما شافها وحس بنخزة جوا قلبو مابيعرف سببها وشي علق بحلقو
البنات ضلو عم يمشو لحتى بلشو يبعدو عن الانظار وقمر ما اعطت اي ردة فعل او التفتت
وشمس بجانبها مستغربة من حالة اختها وصلو لمفترق طرق وسمر وامل راحو اتجاه خيمن وشمس وقمر كملوا اتجاه بيتن لتاخد شمس راحتها وتسأل : قمر انت منيحة
هزت براسها وقالت : منيحة كتير
شمس :اتفاجئت ببرودك
قمر ، من وقتها لهلق عم اتعذب وابكي ... عشت الوجع بكل تفاصيلو لحتى صير اقوى
شمس ،من وين جايبة هالحكي
قمر ، هه من اقتباس كنتي حافظتيه عندي بالجوال قريتو
شمس ، مو متذكرة شو بقول
قمر ، للتجاوز الالم عيشو بكل تفاصيلو
فالألم متل الطعم او اللقاح بتاخد جرعة منو وبتتعايش معو ليصير عندك مناعة ضد الاوجاع المشابهة
شمس ،معك حق
قمر ، وبعدين خلص لازم فيق من الحلم يلي كنت عايشة فيه انا وين وهو وين
انتبهو ع اسطول سيارات جاي من بعيد عليهن
وكلها سيارات فخمة وحلوة ... ومشو من جنبن وقطعوهن ... كانو كلن هيبة بمشيتهن
شمس ، ياترى شو القصة
قمر ، الله اعلم ... مشو كمان شوي ليصادفو ولد صغير وسالتو شمس ،شو هدول السيارات يا ولد
الولد ، هدول جاهة جايين يخطبو بنت المختار
راح الولد وحكت قمر ، قلتلك نحنا وين وهنن وين ... ليكي الجاهات يلي بتجي لبناتن ونحنا ماعم بيتنازلو ويذكرو اسمنا ....هههه كتير علينا زواج بالسر
شمس ، خلص لاتحكي هيك وبعدين نحنا بنستاهل احلا جاهة
قمر ، اي طبعا ... بتعرفي شو انا فكرت فيها انا لو محلن مابخطب لأبني وحدة متلنا
شمس ، عم تواسي حالك يعني
قمر ، ههه يعني
وصلو عالبيت واستقبلتن امهن :يابنات شو هالسيارات يلي مرقت من شوي عرفت شي
شمس ،عم يقولو جاهة جاية تخطب بنت المختار
صباح ، اممم ... يعني رح يصير عنا عرس بالضيعة يلا الله يهني العالم فوتو غسلو وغيرو الاكل صار جاهز
شمس علقت براسها جملة (رح يصير عنا عرس بالضيعة ) لازم حاكي الضابط عماد ...