CMP: AIE: رواية عرض جواز الفصل الثاني2بقلم فاطمة علي عبد المنعم
أخر الاخبار

رواية عرض جواز الفصل الثاني2بقلم فاطمة علي عبد المنعم


رواية عرض جواز
 الفصل الثاني2
بقلم فاطمة علي عبد المنعم 



= ااا انت !!!
- اسمي إلياس 
قالها من تحت اسنانه بصوت واطى انا الى اسمعه وبس بعد ما جه وقف قدامي وانا ورا ضهره
• ومين بقى الاستاذ ؟
- انا الكحيان الى سيتك كنت بتتكلم عليه .. اؤمر عايز حاجه 
• اه انت ديك البرابر يعنى 
- ديك البرابر دا امثالك ياريت بقى تغور من هنا ولو شفتك بس بتبصلها بعينك مش هتكون موجوده تانى اصلا 
• انت بتهددنى انت مش عارف انا مين 
- لا ومش عايز اعرف يلا غور بقى انا مش بعيد كلامى مرتين متنحش .. وانتى اتفضلى قدامى 
= مشيت معاه معرفش ازاى ووصلنا عند عربيته 
- اركبى 
= مينفعش 
- نعم !!؟
= مينفعش اركب معاك العربيه مفيش علاقه بتربطنا ببعض احنا الاتنين علشان اركب معاك 
- انا خطيبك مش دا الى انتى مفهماه لصحابك
= ااا انا .. بص بقى انا معرفش انا عملت كدا ازاى انا اتهورت ومفكرتش ومحسبتش العواقب بتاعت كدبتى دى شكرا جدا على وقفتك معايا دلوقتى بس ركوب العربيه مش هركب عايز تنسحب من المسرحيه دى عادى مش عايز شكرا ليك هتظهر يوم الحفله وخلاص كدا كدا يعتبر انا كسبت الرهان 
- انتى بالعه راديو افصلى شويه اولا صاحبتك الى انتى متراهنه معاها مجاتش النهارده يعنى مكسبتيش الرهان ولا حاجه .. ثانيا كل حاجه هتمشى رسمى وهاجى البيت واتقدملك وهتكون خطوبه رسمى لانى بردو عايز منك خدمه = خدمة ايه !!؟
- منا قولتلك نركب وهفهمك 
= بقولك ايه متزعقليش انا بقولك اهو وركوب مش راكبه لما نتخطب رسمى ابقى اركب معاك سلام 
- يخربيت الجنان .. استنى طيب 
= نعمين 
- هو انتى لسانك دا متبرى منك كدا عالطول 
= اه انا وهو دايما فى مشاكل انجز بقى انا جعانه 
- أعوذ بالله منك .. عنوانك ايه يا تحفه 
= اه صحيح لا بص مش هينفع العنوان دا رقم بابا اهو وكلمه وحدد معاد وهو يقولك العنوان 
- ماشى 
= سلام بقى 
- سلام يا مجنونه 

مشيت وانا مبسوطه اوى شعور ان يكون ليكى راجل ضهرك وسندك وامانك يحميكى من نظرات اى حد بس مع الاسف كلها مسرحيه ياريتها حقيقه بس اكيد طبعا شاب زى الياس هيحبنى انا على ايه يعنى .. روحت البيت وبابا قالى ان فى عريس كلمه وجاى انهارده عرفت انه كلمه وجاى دخلت نمت شويه وصحيت وجهزت وجه وقعد مع بابا وبعد كدا انا خرجت غريبه هو جاى لوحده ازاى بابا قال هيسبنا مع بعض شويه لوحدنا 
- غريبه انك هاديه تتحسدى 
= لا عادى قولى انت جاى لوحدك ليه فين بباك مامتك خالك عمك ولا هى علشان مسرحيه بقى لا بقولك ايه ....
- افصلى افصلى شويه ايه دا يارب يصبرنى على رغيك ولسانك دا طول الشهر دا 
= ماله لسانى مدايقك فى ايه حاطط نقرك من نقره ليه 
- دا لسانك دا كارثه من كوارث الزمن افصلى بقى واسمعى الى عايز اقولهولك
= اتفضل المايك معاك كلى اذاناً صاغيه 
- بصى ياستى انا والدى متوفى ومعنديش غير امى ربنا يخليهالى ومعنديش اخوات انا وحيد وورثت شركة ديكور بتاعت والدى ...
= يعنى انت كدا مهندش انا قولت والله انك كدا .. زميل يعنى بلاش تتكلم معايا من طراطيف مناخيرك بقى 
- يارب ارحمني وتسكتها بدل ما ارتكب جريمة .. اه زميل ممكن اكمل كلامي 
= احم سورى اتفضل
- الحقيقه انا مش بفكر فى الجواز خالص انا كنت هعيش لامى ولمستقبلى وشركتى وبس موضوع الجواز دا مش فى دماغى خالص .. بس انا والدتى مريضة قلب وداخله تعمل عمليه فى القلب خلال اسبوعين وراسها والف سيف انها مش هتدخل العمليات الا لو لقتنى خطبت او اتجوزت وانا معنديش اهم منها فى الدنيا دى فدى الخدمه الى انا عايزها منك اننا نتخطب رسمى وتيجى وتشوفك علشان نفسيتها تكون كويسه وتوافق تعمل العمليه وهفضل معاكى لحد يوم تخرجك وتكسبى رهانك وكل واحد مننا يروح لحاله .. قولتى ايه ؟
= اولا ربنا يشفى ماما ويعافيها يارب .. ثانيا موافقه 
- ايه الهدوء دا سبحان الله 
= انت لا عاجبك كدا ولا عاجبك كدا 
- خلاص خلاص خليكى هاديه احسن 
_ ها يا ولاد نقول مبروك 
- اكيد يا عمى 
= ايه دا انا لسه مفكرتش 
- نعم والقمر عايز يفكر اد ايه 
= انت بتجز على سنانك من اولها بابا الحق دا بيبرقلي
_ ربنا يعينك عليها يابنى 
- والله ماشى يا سى بابا بكره تقول ولا يوم من ايامك يا فرحتى 
_ طبعا يا قلب ابوكى 
- عمى لو سمحت عايزين نجيب الشبكه والخطوبه تكون فى اسرع وقت علشان عملية والدتى 
_ اه يابنى طبعا 
= ممكن اقول حاجه .. ايه بتبصولى كدا ليه 
_ اصلك عقلتى اهو 
= عموما مقبوله منك يا ابو فرحه .. المهم مفيش خطوبه 
- نعم !!؟
= قصدى يعنى نجيب الشبكه ونلبسها كدا وخلاص لحد ما ممامتك تخرج بالسلامه اكيد هى حابه تحضر خطوبتك يعنى - ماشى معنديش مانع انا هضطر استاذن .. باذن الله هحدد مع حضرتك معاد نشتري فيه الشبكه .
مشيت من عندهم وانا مستغربها جدا ومشتغرب موقفها يمكن لانها مسرحيه بس كان ممكن تقولها باى شكل تانى غير انها تفكر فى مامتى .. شقيه، لمضه، لسانها اطول منها، بس دمها خفيف وطيبه وقلبها ابيض .. فوق يا الياس مش هتغلط نفس الغلطه تانى لا مستحيل 

= مشى وانا دخلت اوضتى افكر عيونه مليانه حزن مش بس على والدته فى حاجه تانيه مسببه حزنه دا واحد زيه شاب ووسيم ومهندس وعنده شركه وباين عليه اخلاق  نص بنات البلد يتمنوه ايه الى يخليه ميفكرش فى جواز الواد دا شكله متعقد من حاجه .. بصلى بصه غريبه وقت ما رفضت الخطوبه علشان والدته مفهمتش دى معناها ايه يوووووه يا فرحه خلاص بقى متوجعيش دماغك بقى .... عدا تانى يوم ومظهرش وبليل لقيت بابا داخل عليا الاوضه 
_ فرحه الياس اتصل وبيقول اننا نشترى الشبكه بكره ايه رايك ؟
= ماشى يا بابا مفيش مشكله
_ فرحه مالك يا حبيبتى انتى مش مبسوطه انا عارف ان مش دى الخطوبه الى بتتمناها اى بنت بس هو عنده ظروف والولد شكله كويس واكيد هيعوضك بفرح كبير 
= بابا انا ميفرقش معايا الكلام دا المهم انه يطمن على والدته انا بشوف فيها ماما الله يرحمها 
_ نامى يا حبيبتى 
= اسفه لو فكرتك 
_ من امتى قدرت انسى امك يا بنتى امك دى كانت ومازالت حياتى كلها يا ما نفسى اطمن عليكى زى اختك علشان ادعى ربنا واروحلها واشوفها وحشتنى اوى 
= بعد الشر عليك يا بابا ربنا يباركلى فيك .. وبعدين بقى قلبناها حزن كدا ليه دا انا خطوبتى بكره يا جدع اضحك بقى _ جدع !! ربنا يصبر الياس على لسانك
= والله دا لسانى دا زى السكر وبيقول حاجات كدا فله 
_ طب نامى يا فله 
= ماشى يا ابو فله 
نمت وصحيت والحمدلله مكنش عندى امتحان اليوم دا وجهزت ولبست فستان بينك رقيق مع طرحه بينك وحطيت كحل وملمع شفاه وبس وجه الياس وبابا ندهلى 
_ فرحه يلا يابنتى الياس جه 
= انا اهو يا بابا خلصت .. الياس فضل متنح شويه وانا اتكسفت جدا 
- ايه الي انتى حطاه دا 
= حاطه ايه ؟
- الملمع دا يتشال دلوقتى 
= نعم لا مش هشيله انا حره 
_ فرحه ميصحش كدا 
= يا بابا دا ملمع عادى يعنى 
- وانا خطيبك وبقولك شيليه ولا فرحانه بالمليون عين الى هتبص على شفايفك 
= اتصدمت من كلمته وجريت على اوضتى وفضلت اعيط مش دا كان قصدى انا بحاول افرح بس انا مش بحط مكياج اصلا لكن عايزة احس انى عروسه ورايحه اجيب شبكتى بس هو ضيعلى فرحتى انسان بارد وغبى ودبش و... معقوله بيغير عليا !!!؟

_ انا ممكن اقدر غيرتك بس انا بنتى مربيها كويس ومسمحش انك تجرحها بكلمه 
- انا اسف ياعمى انا اتعصبت وكبرت الموضوع وكمان مش من حقى فى وجود حضرتك 
_ تعرف انك بتفكرنى بنفسى لانى كنت بغير على امها كدا والى يغير على اهل بيته يبقى راجل يابنى بس اتعود بالهدوء والمسايسه تاخد عين مراتك 
- حاضر ياعمى .. ينفع ادخل اعتذرلها 
= لا شكرا وفر اعتذارك انا جاهزة 
_ اديك طلعت الشبح الى جواها تانى 
- هو اصلا امتى بينام الشبح دا مهو موجود طول الوقت 
= طب ياريت نتحرك علشان فى مشوار بعد ما نجيب الشبكه هنروحوه
- مشوار ايه !؟
= هقولك بعد ما نجيب الشبكه 
_ طب يلا يا اولاد 
نزلنا اه كنت متعصبه منه بس بصراحه اتبسطت بغيرته عليا بس يعنى دا ملمع يعنى عادى وروحنا نشترى الشبكه
= والدتك اسمها ايه ؟
- نعم !! ليه؟
= متقول وخلاص هو لازم كل حاجه تسأل فيها 
- اسمها نجوى 
= سبحان الله وانا ماما اسمها نوال حلو اوى 
- اشمعنا يعنى 
= هتعرف بعدين ... لو سمحت انا مش عايزة فى السلسله الا حرف ال N .. كفايه دول 
- اختارى حاجه تانيه دا كدا قليل اوى 
= لا هما دول حلوين اوى 
- الدبله والخاتم والسلسه دول كفايه 
= اه كفايه اوى انا مش بحب البهرجه وانا دول بس الى عاجبنى يلا حاسب بقى ولا اسلفك 
- ابلعى لسانك دا شويه بدل ما اقطعه 
= متقدرش اصلا
- ليه ان شاء الله انتى الى هتمنعينى يا شبر ونص 
= اه اقدر امنعك متستهونش بيا يا ابو طويله ماشى 
- يخربيت لسانك ياشيخه انا رايح احاسب 
= هههه اه يلا حاسب متعطلناش 
_ فرحه خفى شويه الياس رزين وهادى مش كل شويه تعصبيه كدا 
= يا بابا دا معقد ومش بيضحك سيبنى بس انا هجننهولك 
_ فرحه انا قولت ايه 
= حاضر يا بابا 
- مشوار ايه الى عايزه تروحيه 
= لا هنروح كلنا عند مامتك 
- ماما !! فى المستشفى يعنى عندها 
= اه لازم تكون معاك فى لحظه زى دى يلا بينا 
- .......
= هتفضل متنح كدا كتير متخلص ياعمنا 
- يابت انتى .. انتى بتجيبى اللماضه دى منين 
= من عند البقال هبقى اجبلك معايا المرة الجايه 
- لا شكرا كفايه انتى 
= طب يلا وبطل رغى انت رغاى كدا ليه؟
- انااا !!!!
_ ههههه ربنا يصبرك يابنى 
= ماشى يا بابا متشكرين يلا بقى 
مشينا فعلا وروحنا المستشفى وكنت حاسه بتوتر الياس اوى كأنه اخد خطوة صعبه وكمان واضح انه ممهدش لوالدته الى عمله وانه اتقدم لواحده وهيخطبها وكنت حاسه انه بيقدم رجل ويأخر رجل وانا كمان كنت قلقانه ومتوترة اوى دخلنا الاوضه وهو قرب منها وباس ايدها 
- عامله ايه يا ست الكل 
~ الحمدلله حبيبى 
- عندنا ضيوف جايين يشوفوكى 
~ مين يا حبيبى 
= اناااا 
~.......
- احم ماما دى فرحه وفرحه دى امى 
= احلى ماما فى الدنيا ازي صحتك يا حبيبتى 
~ بخير يا بنتى ... مين دى يا الياس 
_ ازيك يا هانم اخبار صحة حضرتك ايه 
~ بخير .... الياس فهمنى فى ايه 
- ماما ايه هى امنية حياتك 
~ انى افرح بيك واشوف احفادى 
- طب وهتفرحى بيا اهو اقدملك عروستى 
~ عروستك !!؟
= انا عارفه انى احلى منه كتير بس قولت اكسب ثواب فيه يعنى 
- اناااا !؟
~ ههههه دمك خفيف اسمك ايه حبيبتى معلش 
= فرحه يا ماما 
~ الله حلوة كلمة ماما منك 
= يا حبيبتى اكيد هقولهالك عالطول مع ان ما شاء الله حضرتك زى القمر دا انتى احلى من ابنك الطويل الى هناك دا 
- !!!!!
~ هههههه انتى لمضه جدا 
_ فرحه كفايه كدا ونسيب طنط ترتاح 
~ لا خليكم شويه وكمان انا لسه عايزة اتعرف على مرات ابنى هتشتروا الدهب امتى 
- الحقيقه يا ماما اااا .....
= يا ماما احنا اشترينا الدهب والياس صمم اننا نلبسه هنا قدام حضرتك لانك لازم تكونى معاه فى مناسبه زى دى 
~ الف مبروك يا حبايبى معلش يا حبيبى تعبى خلاك تعمل خطوبتك فى مستشفى 
- ايه الى بتقوليه دا بس يا امى ربنا يقومك ليا بالسلامه يا ست الكل
~ يارب يا حبيبى علشان احضر فرحكم واشيل اولادكم 
= انا والياس بصينا لبعض وسكتنا ادايقت اوى من نفسى انى دخلت الياس لعبه زى دى وانى هعشم مامته انه هيتجوز ويفرحها 
~ ايه يا فرحه ساكته ليه يا حبيبتى 
= ابدا يا ماما انا معاكوا اهو وبعدين انا مبسكتش خالص حتى اسالى بابا دايما مصدعاه 
~ تعرفى كان نفسى يكون ليا بنت 
= مهو انا بنتك اهو يا ماما 
- ايه دا بقى ياست ماما وانا روحت فين 
~ انت الخير والبركه يا حبيبى هو انا ليا غيرك 
- ربنا يخليكى ليا يا ست الكل 
_ طب يلا يا الياس لبس فرحه الشبكه علشان نمشى وولدتك ترتاح 
= قلبى كان بيدق اوى وهو بيقرب منى وماسك علبة الشبكه فى ايده عيونه تايهه وحيرانه كأنه داخل على خطوة انتحاريه قرب منى ومسك ايدى ولبسلى الخاتم والدبله وفاضل السلسه كنت مكسوفه ومستنيه بابا ينجدنى بس مامته هى الى نجدتنى 
~ الياس هات البس فرحه السلسله 
- ااا اه اتفضلى يا امى 
~ مين حرف ال N دا يا فرحه 
= دا حرف حضرتك وحرف والدتى الله يرحمها
~ يا حبيبتى ربنا يحميكى ويحفظك يافرحه 
= تسلميلى يا ماما وان شاء الله تقومى بالسلامه 
_ يلا يافرحه ونسيب ماما ترتاح 
= يلا يا بابا 
~ هتجيلى تانى يا فرحه 
= طبعا يا ماما هكون عندك كل يوم 
~ اما نشوف يا بكاشه ... وصل خطيبتك وحماك يا الياس 
- حاضر يا امى وهرجعلك تانى 
= مفيش داعى يا الياس خليك مع ماما 
- امشى يا فرحه 
= حاضر بس متبرقليش كدا 
مشينا ووصلنا فعلا لحد البيت 
_ اطلع معانا يا الياس 
- شكرا يا عمى بس انا عايز فرحه فى كلمتين ممكن 
_ مفيش مشكله اطلعى ورايا يا فرحه 
= حاضر يا بابا ... فى ايه الخطه اتقفشت 
- اتقفشت فين يا مجنونه انتى 
= امال فى ايه قلقتنى 
- ليه جبتى السلسله بحرف امى 
= هو دا السؤال !!!
- اه 
= عادى دا حرف امى انا كمان وبعدين كنت عايزة افرح مامتك شوفت فرحت ازاى ودى اهم حاجه 
- وعملتى كدا جزء من الخطه ولا شفقه 
= شفقه !!! لا دا ولا دا عملت كدا علشان افرح مامتك مش اكتر مفكرتش فى اى حاجه غير انى افرحها 
- بارعه جدا فى التمثيل فكرانى هصدق اكيد دا علشان خططك وافضل معاكى لحد معاد الرهان 
= انت بتتكلم معايا كدا ليه ها انا فعلا كنت متهورة لما عملت كدا ومعرفش عملت كدا ازاى بس انت وافقت مش كل حركه هتفكرنى انى بعملها علشان الخطه انا بتعامل بطبيعتى وانت كمان بتعمل كل دا علشان الخطه علشان تفرح والدتك لوقت معين يعنى كل واحد مننا ليه اسبابه 
- وسيتك مفكرتيش بقى لما كل دا ينتهى والخطوبه تتفسخ هيكون ايه السبب ايه الى هتقوليه لبباكى 
= وانت مفكرتش هتقول ايه لوالدتك الى نفسها تفرح بيك وتشوف احفادها ولما تقولها انا فسخت مفكرتش فى خيبة امالها الى هتسببهالها ولا انت مغلطنى انا بس وانت الملاك الطيب ولو على السلسله الى مزعلاك اهى اتفضل خدها ولو عايز بقيت الشبكه خدها وممكن نلغى كل حاجه دلوقتى 
- انزلى يا فرحه 
= نعم 
- بقوولك انزليي 
= اتفزعت من صوته العالى ورميت السلسله على الكرسى ونزلت جرى ...

يتبع ..

حقيقي شكرا جدا جدا على تفاعلكم على الرواية فرحتوني اوى اوى بجد ربنا يسعدكم ويفرح قلوبكم جميعا يارب ويارب البارت دا يحقق نجاح زي الاول واكتر حقيقي كل كومنت بيفرق وتشجيعكم بيخليني اكمل .. بحبكم في الله ♥️❤️


               الفصل الثالث من هنا

   لقراءة باقي الفصول اضغط هنا                      













تعليقات



حجم الخط
+
16
-
تباعد السطور
+
2
-