الفصل الحادي عشر 11 والاخير
بقلم لينا بسيوني
بعنوان (كاليفورنيوم)
عدى 10 أيام , كنت ساعتها واقف فى التراس , بس بدل ما ألمح طلالى على الباب , لمحت قوه من البوليس جايه على القصر وضابط بيسأل الواد منصور عن صمد الدوسرى , لقيت نفسى بهرب من القصر ماعرفش ليه !!! ومعرفتش القوه اللى جايه دى جايه تقبض عليا ليه ؟!!
بس عرفت بعدها لما عديت على قهوه ولقيتهم عارضين صورتى على التلفزيون وكاتبين
عليها
مطلوب القبض عليه بتهمة قتل " روز" ابنة الملياردير المعروف "غالى الدوسرى" !!! جريت من قدام القهوة وانا مصدوم ومش فاهم ايه اللى بيحصل .
دخلت ابحث على النت لقيت الترند..... فيديو ليا وانا بشنق روز !!!.....
ايه اللى بيحصل ده ؟!!! , مين اللى صور الفيديو ؟!!! وليه نزل دلوقتى منزلش من شهور ؟!!! ليه نزل بعد مانقلت الثروه لطلالى !!؟ دماغى هتفجر ,عصرت دماغى كويس وراجعت فى دماغى كل الى حصل من أول ما أخويا غالى مات !!!
يابن الكلب !!!!!!!!!!! عرفت أنا هبدأ منين بالظبط.
أتلثمت و خدت معايا شاكوش وأجنه صغيرة وروحت ناحية القصر وتمنيت من ربنا أنى الاقى حاجتين هما اللى هيأكدولى اللى فى دماغى .
بصيت على القصر من بعيد , لقيت عربيه واقفه قدام القصر وباين أن اللى فيه اتنين مخبرين بيرقبوا علشان لو رجعت القصر يقبضوا عليا, لفيت حوالين سور القصر , بعيد عن المخبرين وطلعت على السور , ببص من فوق السور لقيت اتنين عساكر كمان بس واقفين فى الجنينه قدام باب القصر وبيشربوا شاى !!!
وطيت راسى بسرعه , ونطيت جوه جنينة القصر , أنا مش محتاج غير أنى أوصل للأوضه اللى فيها التراس , أتسحبت وأتحركت وأنا موطى راسى ناحية التراس , نطيت فى التراس و الحمد لله لقيت أول حاجه كنت بدور عليها , ظرف تحاليل بتاع طلالى اللى كان جايبهولى بكر وحطه على ترابيزة التراس , كده فاضلى حاجه كمان أتمنى من ربنا يعطرنى فيها , مسكت بالاجنه والشاكوش وحاولت على قدر الامكان مطلعش صوت خالص لحد مانجحت أفتح باب التراس من بره , ودخلت الأوضه ومن الآوضه للحمام , والحمد لله لقيت تانى حاجه ....
بعدها بأسبوعين بالظبط كنت قدام مكتب بكر المحامى بالليل ومستنيه يخرج وفى أيدى حبل والأيد التانيه مسدس .
أنا عارف أن بكر بيقعد فى المكتب لوقت متأخر, وبيبقى آخر واحد يطلع منه , كانت حوالى الساعه واحده بالليل..
بكر المحامى خارج من مكتبه ورايح على عربيته الشروكى , فلقى مسدس منغوز فى جمبه وصوتى وهوه بيقوله :
هششششش.... لو فتحت بوقك أو صرخت هفرغ المسدس كله فى جتتك , قدامى على المكتب , عندنا كلام كتير أوى يابكر الكلب !!
مشى قدامى وهو بيترجانى معملش أى حركه غبيه وطلعنا على المكتب , دخلنا مكتبه وقعدته على كرسيه وربطته بالحبل جامد , مديت أيدى فى جيوبه وطلعت مفاتيح الخزنه بتاعته , حطيت المفاتيح فى الخزنه , ورفعت عليه المسدس تانى علشان يقولى الرقم السرى قاللى :
مش هينفع ياصمد يا خويا دى أسرار نااا..
قبل ما يكمل كلمته ناولتله فى مناخيره بقاعدة المسدس اللى معايا فأتكسرت وبقت بتسح دم
فقالى وهو بيزعق بصوت عالى :
أنت مجنون ياصمد !! أنت مش عارف أنت بتعمل أيه !!!! أنا هوديك فى داهيه!!! والله ياصم...
مكلمش الجمله تانى ولقى قاعدة المسدس بتكسر صف سنانه اللى فوق ....
صرخ من شدة ألالم
قولتله بهدوء وانا حاطط مسدسى على راسه :
هسسسسسسس , الرقم السرى ؟
فقال:
24719991
فتحت الخزنه لقيت فلوس ودفتر شيكات وعقود وحاجات مالهاش لازمه بالنسبه ليا , لحد مالقيت اللى بدور عليه , الوصيه التانيه , فتحت الظرف وزى ماتوقعت بالظبط .....
قعدت على الكرسى مذهول وترجمت تقريبا نص الحكايه والنص التانى هيحكهولى بكر , طلعت من جيبى حقنتين و حطيتهم قدامه على المكتب وقلتله :
تسمع عن سم الجوز أصلى "خريج علوم وأفهم فى السموم ".
ومسكت حقنه من اللى على المكتب وقربت منه وأنا
بقوله :
سم الجوز اللى هو " الستركنين " بيموتوا بيه الكلاب المسعوره اللى زيك , وده ياسيدى بنطلعه من بذور جوز المقئ هتلاقيها عند العطار , بس أيه يابكر كرباااااج!!! ,حاجه هتعجبك أوى ....
حاول يفك نفسه ويتنطط وهو مربوط , كان هيصر خ قولتله :
أهدى يابكر , لو صرخت هتموت وقتى!!! أنما لو أتعاونت معايا وحكتلى كل حاجه بكل صدق هديك المصل وشاورت على الحقنه التانيه اللى على المكتب ,
بطل يصرخ بس برده كان بيحاول يقاوم وهو مربوط فى الكرسى قربت منه وشكيت جلد أيده بالحقنه وأديتهاله
وقولته :
بص بقى ياسيدى معاك نص ساعه بالظبط تلخص فيهم كل اللى حصل من أول ما أخويا مات
فرد وقاللى :
قصدك من أول ماقتلته !!!
قلتله :
أها قتلته علشان أورثه ماضيعش وقتك وأحكى ياشهرزاد!!!
فقال :
الموضوع بدأ من أول ما أخوك مات ولقيتها قدامى مقشره , ثروه ضخمه وشخص واحد بس واقف قدامى,ففكرت ازاى أزيحك من قدامى وأحتال على الثروه, وجاتلى الفكره فى أنى أزور وصيه أحتال بيها عليك وأخليك تنقل الثروه بنفسك , جبت عيل مزور سوابق بس أيه عيل من الآخر!!!
وخليته يقلد خط أخوك بالظبط من العقود اللى كانت عندى بخط أيده وعملت وصيتين , الوصيه أياها بتاعة عياله ووصيه تانيه سيبتها فاضيه علشان لو الدنيا ما ظبطتش وفشلت أبقى معايا سنه أفكر فى خطه بديله ,
يوم ماجتلى هنا , شوفت فى عينك الطمع واللهفه على الورث , وشكيت أنك ممكن تكون قتلت أخوك , بصراحه لو مكانك كنت هعملها من بدرى أوى مكنتش هستنى عشر سنين !!!
صمد انت برده ياصمد!!!
فتشجعت أكتر , وأول مقابله كانت أهم مقابله يوم مجيتلى هنا واتهمتنى بأنى عايز أسرق ورثك , قلقت الصراحه وكنت خايف تطلع على البوليس وتبلغ ,ساعتها كنت هتكشف وكانت فضيحتى هتبقى بجلاجل , طبعا حبكتها عليك أكتر ومبينتش أنى خايف بالعكس أصريت على موقفى ,لقيتك بتكلمنى يوميها وبتعتذرلى !! ساعتها أتأكدت أنك ناويلى على حاجه , فجبتك بعد المكتب مافضى وحطيت كاميرا عند الاباجوره دى ...
وشاور براسه على الآباجوره اللى على المكتب وكمل كلامه
وقال:
دخلتك مكتبى وسيبتك لوحدك علشان أشوف انت هتعمل أيه ,, طبعا كنت عامل حسابى لو كنت هتهجم عليا بمسدس بس كنت مستبعدها أوى , علشان مفيش حد غبى كده !!
دخلت الحمام وفتحت موبايلى اللى متوصل بالكاميرا , وشوفتك يا بن الكلب وأنت يتبدل علبة الفوار و عايز تسمنى !!! فحذرتك بالطريقه أنى لو حصلى حاجه , هتلبس فى 150 محامى , فالقيتك أنصعت وعرفت أنك صرفت نظر عن قتلى لما قولتلى ماتشربش الفوار ...
بدأ أنفذ خططتى جبت صورة أخوك وهوه فى شبابه وروحت لريجسير سينما معرفه , وأديتله صورة أخوك وقولتله يدورلى على حد كومبارس شبهه بالضبط
بعتلى" سامر "عرفته هيعمل أيه , وعلمته أزاى يقلد أخوك فى تناكته علشان تقتنع ميه فى الميه,
قررت أنى أكسب ثقتك أكتر فكلمتك وقلتلك أن التحاليل سلبيه علشان متشكش فى نزاهتى وتفكر أن كل هدفى تنفيذ الوصيه , طبعا جالى "سامر "وقالى أنك حاولت تحطله سم فى الفياجرا!!!
فعرفت أنك ميت على الورث , أستنيت يوم متكونش فيه فى القصر , وزرعت كاميرات فى كل أوضه فى القصر حوالى 25 كاميرا صغيره ذى اللى فى الأباجوره وقررت أراقبك من جوه القصر , وجبت الواد منصور وخليته ينقلى أخبارك ,علشان أبقى مراقبك بره وجوه
بعتلك روز ووصيتها تبقى حنينه معاك , يمكن تحن وماتفكرش تقتلها , قتلتها برده !!! وشوفتك وصورتك وأنت بتشنقها , والله كان فى نيتى لو حنيت لروز كنت هخلص الموضوع على طول , كنت ساعتها هقولك باقى عيال أخوك ماتوا أو مش لاقينهم وكنت هنقل الثروه لروز !!
عرفت أنك مش هتيجى بالحنين خالص , فعملت صفقه مع قيصر ب100 مليون لو خلاك تنقل الورث , بس قسما بالله ماليا علاقه باللى عمله قيصر فيك !! بالعكس أنت اللى فركت ورحت جبتله مره البوليس وفى المره التانيه جبتله نمروسى ألد أعدائه !! ساعتها جالى قيصر هنا وكان حالف يقتلك , علشان كنت السبب فى موت ربع رجالته , حاولت أهديه وقولتله أنه لو قتلك الثروه هتضيع لأنك الوحيد اللى فى أيدك الورث والوحيد اللى فى أيدك تنقله , بس كان لسه متعصب أوى وطلب نص الثروه 500 مليون , ساعتها دبينا خناقه كبيره مع بعض , وسابنى ومشى ...
بعتله بعدها " محى " بظرف تحاليل علشان أعرفه أن لسه خيوط اللعبه فى أيدى وأنى ممكن أدخل حد تانى وأفتت الورث , فأبن الكلب جود من عنده وقتله !!!
قيصر بقى خطر عليا زى ماهو خطر عليك ومكنتش عارف أزيحه أزاى !!!
, لحد مافى يوم جالى عدنان وقالى على الكلام اللى دار مابينكم وسألنى أذا كنت هتورث لو قتل قيصر, شجعته طبعا وأكدلته المعلومه ، مش بس كده أديتله 3 مليون جنيه يديهم لرجالته الكردى والاسوانى وأبوبشله , علشان لو قيصر غلبه فى الخناقه يتدخلوا ويخلصوا عليه ...
طبعا أنت كملت الباقى وقتلت عدنان
, فأكتشفت أنك عنيد ومجرم ومش هتيجى لا بالحنيه ولا بالعنف أنت هتيجى باللى بتحبه ....الفلوس , ولعبت على طمعك بعتلك طلالى العابد وأقنعتك أنه ملياردير , ومش محتاج الفلوس , وخليته يقولك أنه هيرجعلك الثروه بعد ماتنقلهاله ...
بس والله أنا ماطولت حاجه فى الآخر , أبن الكلب" طلالى" طلع ضلالى وبعد ماأنت حولتله الورث نصب عليا أنا كمان ,و أختفى بعد ماقسم الثروه ووزعها على أكتر من حساب فى أكتر من دوله ,علشان يبقى صعب عليا أتعقبه أو أرجع الثروه!! , خوفت منك لأنى كنت عارف أنك مش هتسيبنى لما تعرف أنك طلالى نصب عليك وخد الورث , فعملت زيك ونزلت الفيديو بتاعك وانت بتشنق روز وكتبت عليه
"شاهد قبل الحذف جريمة قتل أبنه المياردير غالى الدوسرى على أيد عمها "
قولتله وأنا حاطط المسدس على رأسه وبزوق رأسه
بالمسدس بعنف :
يابن الكلب !!! يابن ال.....
وبقيت ورث أخويا يابن الكلب ال 80 % من شركاته اللى صفاهم راحوا فين ؟!!
قاللى وهو بتشنج من أثر السم :
أقسم بالله ما أعرف عنها حاجه دى الحاجه الوحيده الحقيقيه اللى قولتهالك
أديته ضهرى وخدت حقنه المصل معايا ومشيت ناحية الباب
قاللى وجسمه كله بيتشنج وضهره بيتنى من أثر السم :
أنا... قولتك... على..كل..حاجه..أدينى .. المصل
رجعت تانى وانا فى أيدى المصل وقربت من ودنه وقولتله:
سم الجوز بيعدى بمراحل كتيره تشنجات وبتحس أن عضمك يخرج بره جسمك من كتر التقلصات , بعد كده حرارتك بترتفع جدااا وتبدأ تشوف أسوأ كوابيس حياتك قبل ماتموت !!!حاجه رعب!! أنت هتعيش العذاب اللى عشته أنا فى سنه,, فى نص ساعه بس !!!! واللى فى أيدى دى حقنه ميه عاديه مش مصل ..
وفضيت الحقنه قدامه و كملت طريقى وطلعت بره المكتب
وسمعته وهو بيحاول يزعق بس يعينى صوته مكانش طالع وآخر كلمه قالها :
أنت.. غبى .. ياصمد
,تانى يوم أتنشر خبر مقتل بكر المحامى على أيد السفاح صمد الدوسرى , ده طبعا بعد مافرغوا الكاميرات وشافونى وأنا بجرجره على المكتب بالمسدس
بقيت مطلوب و فيه ترند طلع بأسمى #صمد_السفاح
فتره صغيره وأتقبض عليا فى أوضه أيجار تحت السلم بعد ماصاحبها اللى كنت مأجرها منه أتعرف عليا وبلغ عنى , وكانت أسرع قضيه فى مصر يتحكم فيها بالأعدام وأتنفذ فيا حكم الأعدام , ودى كانت نهاية قصة صمد السفاح اللى الناس كلها تعرفها !!!,
يوم الأعدام :
جرجرونى بالبدله الحمرا وأنا أعصابى ساييه , طلعونى على المشنقه ,والمفتى فضل يتكلم كلام مركزتش فيه ,وقاللى فى الآخر أقول الشهادتين , نطقت الشهادتين , وغطوا راسى بكيس قماش أسود ولفوا الحبل حوالين رقبتى وفتحوا المشنقه نزلت وفضلت أتلوى لحد مانفسى قطع .. ...هو أنا مت ؟!!!
أصلى حاسس أنى بتنفس تانى , الدنيا ضلمه , كيس القماش اللى على راسى أتشال وضوء كشاف أبيض ضارب فى وشى وصوت حد بيقولى :
حمد الله على السلامه ياصمد !!!!
فولتله :
هو أنا ميت ؟!! وأنت بتحاسبنى؟!!
ضحك بصوت عالى وقاللى :
لا ياصمد أنت لسه عايش
نور الكشاف اللى فى وشى بدأ بيخف وشوفت خيال لواحد لابس برنيطه وقاعد على كرسى قدامى وأنا على الأرض فقولتله :
أنت مين ؟!! وازاى أنا لسه عايش !!؟
قاللى 3 كلمات جاوب بيهم على السؤالين :
جهه سياديه عليا
كمل كلامه وقال :
مانفسكش تعرف أخوك صفى شركاته وودى فلوسه فين ؟!!! قبل ماتموت !!!,
تعرف الكاليفونيوم , اها صح نسيت أنك خريج علوم وبتفهم فى السموم ، بس مافيهاش حاجه برده لو راجعت معاك حبة معلومات
الكاليفورنيوم ده ياصمد تانى أغلى ماده على وجهه الأرض , الجرام منها عامل تقريبا 27 مليون دولار, بتستخدم فى الطاقه النوويه والتنقيب على المعادن النفيسه , مابيتصنعش غير فى روسيا وأمريكا بس وبيتصنع فى السنه الواحده جرامات معدوده , دول كتير ز ى أيران وكوريا وغيرهم بتسعى أنها يبقى عندها الماده دى
,أخوك بقى ياسيدى حول فلوسه كلها وعمل صفقه كبيره مشبوهه من الكاليفونيوم , تقريبا بالكيلو هات أتمسك منهم على حدود تركيا تقريبا كيلو ونص ( خبر حقيقى)
والباقى دخل فى مصر , وعرفنا من شهر بس أن أخوك اللى ورا الموضوع وأن اللى ممكن يوصلنا للماده دى أتنين
أنت وبكر المحامى , طبعا عرفنا الجيم اللى كان مابينكم
و انت الصراحه أبهرتنا ياصمد !!!
أنت سفاح بالفطره ياصمد !!!
سكت شويه وبص فى ساعته وقالى :
معاك 10 دقايق بالظبط تفكر فيهم أخوك ممكن يكون حاطط الكاليفورنيوم فين وأوعدك أطلعك من اللى انت فيه لو جاوبتنى قبل العشر دقايق ...
أتوترت ,يله ياصمد أعصر دماغك بسرعه , راجعت شريط حياتى كله أخويا ,بكر المحامى , رووز , قيصر , التراس ,عدنان , بتى فور وكوباية شاى , أخويا, كلب أخويا , الطبق ... عدت العشر دقائق فى ثانيه...
بص فى ساعته وهو بيقول :
العشر دقايق خلصوا ياصمد , أسف ياصمد هتوحشنا والله
وقام من على الكرسى
الكرسى !!! , أفتكرت منصور وهو بيقولى :
"الكرسى تقيل أوى يازميلى , ماتيجى تشيله معايا "
صرخت وقولته :
كرسى أخويا المخروم
ماردش عليا وكمل طريقه ناحية الباب
قولتله وأنا بصرخ:
أنت وعدتنى تخرجنى !!! انا أتصرفت فى الكرسى !!! ومحدش هيعرف يوصلكوا ليه غيرى !!!
وقف عند الباب وهو مدينى ضهره
وفتح الباب و خرج وقفله فى وشى !!!
تمت بحمد الله
🌹🌹🌹🌹🌹🌹🌹🌹🌹🌹🌹🌹🌹🌹🌹
💚 مرحبا بكم ضيوفنا الكرام الرواية كامله💚
ولكن يجب إن اترك 5 تعليقات لكي يفتح الفصول
في كرنفال الروايات ستجد كل ما هوا جديد حصري ورومانسى وشيق فقط ابحث من جوجل باسم
الروايه علي مدوانة كرنفال الروايات وايضاء اشتركو في قناتنا👈علي التليجرام من هنا يصلك اشعار
بكل ما هوه جديد من اللينك الظاهر امامك
🌹🌹🌹🌹 🌹🌹🌹🌹🌹🌹🌹🌹🌹🌹🌹