رواية ذئاب لا تعرف الحب الجزء الثاني2الفصل العشرون20بقلم نجمه براقه
فاطمة
قولت وانا باخد نفسي
_ خضتني ، زهقت من القعدة وطلعت اتمشي ، انت مروحتش لية
_ ده خير اني مروحتش سبحان الله كان قلبي حاسس انك هتودينا في داهيه
_ داهية إيه
_ خروجك لوحدك افرضي توهتي
_ مكنتش هبعد
_ انتي كنتي مكملة انا اللي وقفتك
_ كنت هعرف ارجع
_ وهتعرفي ازاي وانتي غريبة ، مينفعش تمشي لوحدك ، يلا ابوكي لو صحي وملقكيش هيتخض
_ من شوية خد الدوا ونام ، وانا نفسي اتمشي شوية.. انت ممكن تتمشي معايا وكدة مش هتوة
_ ماشي بس هما عشر دقايق وهنرجع
_ اوكي
مشينا مع بعض ف قولت وانا ببص لناس حولية
_ الناس هنا مبتنامش ، في نص الليل بسمع اصوات عربيات واصوات ناس بتتكلم
_ انتي بتقولي كده امال لو مكنتيش امريكية
_ المكان اللي كنت فيه كان تقريبا فاضي بيتنا بعيد عن الزحام من بعد الغروب متشوفش حد
_ مكنش ليكم جيران
_ لأ عيشنا انا وبابا لوحدنا كان اقرب جار لينا من هناك وزي العمود التالت اللي هناااااك دة
_ ياه.. طيب ولية العزلة دي مكنش في شقق ولا ايه
_ اكيد فيه بس بابا كان بيحب الهدؤ بعيد عن الدوشة
_وافتكر انه كان قاصد يبعدك عن عاداتهم وحياتهم اللي متناسبناش
_ يمكن ، بس انا اصلا كنت بدرس ف كنت بختلط بناس وبشوف كل حاجة
_ اه ، الحرية الزيادة وكدة
_ اه
_ طيب وايه خلاكي تلبسي النقاب وانتي في مجتمع زي ده.. كنتي مقتنعة بيه لما قررتي تلبسيه
_ اه جداً انا اللي طلبت من بابا اللبسه ، حسيت ان جزء من ديني وحبيت اكمله
_ ومين قالك انتي ان النقاب فرض
_ مش فرض بس زي ما قولتلك بخفي جمالي عشان ملفت
ضحك بسخرية وقال
_ ربع ثقتك في نفسك وانا مش هكلم حد
خفيت ضحكتي ومكنش في دماغي حاجة غير منظره لما شافني ف قال
_ ماشي فلنفترض انك جميلة ما كل الاجانب جُمال وعادي ، مفيش واحدة فكرت زيك
_ مش عارفة اهو حباه وخلاص
_ انتي حرة ، انتي اللي هتتخنقي
_ طيب انا ممكن اعرف انت ليه مبتحبش المنتقبات
_ انا مش مش بكرهم بس في نماذج بشوفها رقاصة تتكسف تعمل زيها... للأسف في كتير بيتعاملوا مع النقاب علي انه ستر للهاوية مش الشكل
_ ازاي
_ يعني في كتير بنات صيع لبسينه وفرحانين بيه عشان الناس مش عارفة مين دي ف بيعملوا اللي عاوزينه مش علشان يستروا نفسهم او جمالهم
كمل بشيء من السخرية
_ زيك كدة ، وصلتك؟
_ اه يعني واحده بتغلط ف مدارية وشها عشان محدش يعرفها
_ اه ، وفي ستات اعوذ بالله.. سوري في اللي هقوله ، بس في فتيات ليل بيلبسوا النقاب ويسرحوا في الشوارع علشان يخفوا هويتهم
_ صحيح.. وهناك في الولاية اللي كنت فيها شايفينه رمز من رموز الارهاب وبيخافوا منه ،ودائما تلاقي لقطة في فيلم واحد او واحده منتقبة لابسين حزام ناسف وهوب ينفجر وهما متخيلين اننا كدة... ومتعرفش ازاي تفهمهم ان العيب مش في النقاب.. النقاب معمول علشان حاجة محددة وهو الستر والعفة ، ف ايه ذنبه ان الناس بيستخدموه غلط... كل حاجه في الدنيا ممكن تستخدمها صح وممكن تستخدمها غلط ، العيب مش في النقاب العيب في اللي بيستخدموه بطريقة متلقش بيه.. ف مينفعش تعمم ان كل المنتقبات وحشين في كتير بيلبسوه بداعي الستر
_ في طبعاً وانا معنديش مشكله مع النقاب ولا البنات المحترمة اللي بتلبسة وبتمشي في حالها وبتنفذ كل شروط النقاب انا علي التانين
_ صح ، ربنا يهديهم
_ آمين... طيب إيه مش هنرجع
_ نرجع كفاية كدة
رجعنا لقينا بابا لسة نايم ف قال وهو واقف علي الباب
_ لسة نايم ، اية رايك تروحي وتيجي الصبح
_ مش هقدر اسيبه لوحده
_ مش هتعمليله حاجة
_ مش هقدر اسيبه لوحده وهخاف لوحدي في البيت
_ طيب تروحي البيت عندنا
_ لا ، انا هقعد هنا لصبح وبعدين اروح معاه
_ ماشي بس انا لازم اروح ورايا مذاكرة
_ مذاكرة إيه انت مش معيد
_ رسالة الماجستير
_ ااه... طيب اتفضل
_ ماشي تصبحي علي خير
_ وانت من اهله
مشي وانا دخلت عند بابا وبقيت وقت كبير بضحك بيني وبين نفسي وانا متخيلاه بيفوق ويكتشف انه كان لطيف معايا أكيد هيتضايق من نفسه
#بيجاد
رجعت البيت سلمت علي ماما وبابا ودخلت فتحت الدولاب اجيب منه اللبس ف لقيت طرحت البنت في وشي مسكتها وبقيت اكلم نفسي بشرود واسألها ياترا هشوفها تاني ولا خلاص كدة ولو شوفتها هقولها ايه
_ بيجاد
قالهالي بابا وانا واقف عند الدولاب ف رميت الطرحة وقولت
_ نعم يا بابا
_ خالك عامل اية
_ بقا كويس والصبح هيسيب المستشفي
_ طيب انا كنت عايز اتكلم معاك في موضوع
_ اتفضل
دخل عندي وقال
_ اول حاجه كنت عايز اقولك ان يوم السبت خطوبة بشر وبدر وجويرية
_ اتفقتوا
_ ايوه
_ الف مبروك
_ عقبالك
_ متشكر يا بابا
_ طيب منفسكش تجوز
_ وانا اكره بس لما الاقي صاحبة النصيب
_ماهي موجودة
_ متقولش هاجر!!!!
_ ومالك اتفزعت اكدة
_ يعني هاجر! بابا وربنا اركب علي التربيزة وارمي نفسي
_ يابوي ليه القسوة دي كلها علي نفسك ، التربيزة مرة واحده!!
_ وربنا ما بهزر... هاجر لا
_ لا مش هاجر
_ خلود مثلا
_ لا
_بنت عم جلال
_ لا
_ امي طيب
قولت كده وفجاة لقيت قلم نازل علي وشي وبيقولي
_ اتعدل
_ انت خدتني علي خوانه علي فكره
_ ولو كنت نبهتك كنت هتعمل ايه
_ ولا حاجه
_ نفسك تضرب قلم تاني صح
_ لا يا بابا بس في ايه ما تقول علي طول هي فزورة
_ لا مش فزورة ، فاطمة بنت خالك
_ مالها
_ تجوزها
_ اتجوز مين
_ فاطمة
_ مالها
برقلي بعنيه ف قولت
_ اتجوووز مين يابه... انا اتجوز دي طيب وااااللهي انط من فوق الخامس
_ ومالها فاطمة بت مؤدبة وبت خالك
_ يابابا علي عيني وعلي راسي بس دي بذات لا... انا مبطيقهاش ومتناسبنيش دي منتقبة
_ دي منتقبة!!! . والله حسبتك هتقول دي رقاصة يعني ايه دي منتقبة
_ يابابا انا بكره المنتقبات... انا مش موافق عليها
_ امال مين هيتجوزها
_ وانا مالي ما تجوووزش ، هو انا هتبلي بيها علشان بنت خالي
_ بيجاد !!!!
_ ايه هو ده ... هو انت بتقترحها عليه ولا مقرر تجوزهاني
_ وانت هتلاقي زيها فين وانت تطول
_ ومطولش ليه... شايفني مكسح ولا فيه عيب.. مطولش ليه ده انا بمشي اتكعبل في البنات علي كل شكل ولون
_ وااد
_ يا بابا مش قصدي بس فاطمة متناسبنيش مش عاوزها
_ الكلام ده ميمشيش معاي البت زينة ومفهاش عيب وانت اولي بيها لو بتفكر تجوز بت بتلبس جنز ومحزق وملزق انسي
_ لا انا مش عاوزها كدة بس بردو مش عاوزها زيي فاطمة
_ طيب اسمع بس.. انت تشوفها ولو معجبتكش نبقي نتكلم امك بتقول البت جميله قوي
_ جميله لنفسها مش هشوفها ولا هتجوزها يا بابا
_
_ بابا من فضلك مش عاوزين نشد مع بعض في موضوع مينفعش فيه النقاش اصلا
_ انت هتقولي اللي ينفع فيه نقاش واللي مينفعش
_ يابابا يا حبيبي انت بتتكلم في ايه ده جواز وانا اللي هتجوزك.. انا ليه حاسك جاي تجبرني عليها
_ مش بجبرك بس خالك عيان والبنت ملهاش حد
_ عيان وخف ، مماتش
_ هيموت
_ إيه!
_ ايوة خالك قلبه عيان وهيموت امك بنفسها قالت
_ خاااالي بيجاد؟
_ وانت معاك خال غيره
سكت شوية استوعب كلامه وبعدين قولت
_ ولو ربنا يبارك في عمره وميموتش وحتي لو حصل احنا مش هنسيبها بس جواز لا
_ ولو قولتلك ان دي وصيته
_ وصيته لأية
_ تجوزها
_ لاااا ده انتوا متفقين عليه بقا.... لا بقولكم إيه والله ما ينفع... لا يا بابا يوصي بأي حاجة تاني غير دي مش هتجوزهااااا
_
_ بابا من فضلك
اتنهد بعمق وبعدين قال بحزم
_ اسمع! .. مفيش غيرك هيتجوزها.. اقعد معاها شوف شكلها اتعرف عليها حبها متحبهاش بس مفيش غيرك هيتجوزها
قال كدة ومشي وماما جت بعد شويه تقولي
_ في ايه يا بيجاد
_ في ايه انتوا!!!
_ يابني مالها فاطمة البنت جميلة وهادية وهتعجبك والله
_ جميلة وهادية لنفسها انا مش عاوزها ومش هتجوزها ريحوا نفسكم
_ وحتي لو قولتلك علشان خاطري
_ ياماما متجنيننيش هي دي كمان فيها علشان خاطري
_
_ استغفر الله العظيم يارب... والله ما مصدقكم ماما سيبيني دلوقتي
#بدر
دخلت ل بشر اوضته علشان نتكلم في اللي هنعمله لقيته مشغول بالتليفون ف قولت
_ بتعمل ايه يابشر؟
قال وهو بيسيب التليفون
_ ولا حاجة
_ طيب مش هتقوم نشوف اللي ورانا
_ إيه اللي ورانا
_ لا وهو كمان انت ناسي ورانا إيه
_ مش واخد بالي
_ يابني الخطوبة مش في شبكة هتجاب وفي قاعة هتتحجز وفي فساتين هنجيبها
_ ماشي الفساتين والشبكة يتجابوا في ساعة والقاعة نخلي حد من الكبار يحجزها
_ ساعة ايه اللي تجاب فيها شبكة وفستان ، حبيبي دي عايزة اليوم كله انت مش فاهم حاجة... كلمت اسراء؟
_ اكلمها ليه
_ يا خراب عقلك يا بدر... يابني ازاي تكلمها ليه مش المفروض هنروح نشتري الحاجات
_ هو لازم انا اروح مينفعش الستات يورحوا
_ لا تصور لازم تروح... مالك مش فرحان ليه
_ بدر متزهقنيش ، انا معرفش في الحاجات دي لا خطبت قبل كدة ولا حضرت خطوبة
_ اه ما انا عارف بس انت لازم تكلمها وتخليها تجهز ، مش ابوك قالنا منروحش الشغل ونبتدي نجهز ولا انت نسيت
_ منستش... طيب امشي بس وانا هروحلهم
_ تمام وانا هروح بيت عمك اخليهم يجهزوا
#بشر
خلصت كلام معاه ورجعت اتصل ب هاجر اللي مش راضيه ترد ولا تفتح رسالة ف قومت من مكاني غيرت هدومي وروحت هناك وعمي شبل فتحلي حسيت بالاحراج وكأني عامل عملة ومش عارف اقوله جاي لية ف قال
_ تعاله
دخلت وراه ف قالي
_ إيه الاخبار
_ تمام
_ مروحتش الشغل النهاردة
_ لا ابوي قالي خليك
_ اه صحيح نسيت انكم هتجهزوا للخطوبة
_ اه
_ يدوبك تلحق
_ ادينا هنبدء اهو ، هروح اشوف اسراء علشان نشتري الشبكة والفستان
_ تمام بس خد معاكم خالتك او امينة
_ ليه
_ الستات هما اللي بيعرفوا يتصرفوا في الحالات دي
_ حاضر
كملت بتردد
_ امال فين هاجر
_ جوة
_ طيب انا كنت عاوزها تروح معايا بيت عمي السبع بدل ما اروح لوحدي هي بتعرف تتكلم مع الستات
_ ماشي تروح ثانية واحده.... هاااجر
توجهت بعنيه لاوضتها مترقب خروجها لغيت ما جت وهي بتتحاشا البصة لية
_ نعم يا بابا
_ بشر عاوزك تروحي معاه بيت عمك السبع
_ ليه
قولت
_ كنت رايح اتفق مع اسراء علي روحتنا نشتري فستان والشبكة ، وبقول يمكن عم السبع مش هناك ف تروحي معايا
بعثرت نظراتها وهي بتقول
_ مش هقدر مصدعة قوي النهاردة .. معلش خلي حد تاني... الف مبروك... داخلة انام
فهمت انها مش مصدعة وبتتهرب مني علشان متكلمنيش ف مشيت وطلعت من العمارة وهناك بعتلها فويس بقولها فيه
_ دي زعلة جديدة ولا ايه ، انا مش فاكر اني زعلتك علشان مترديش عليه وتتهربي مني كدة ، ولا يكونش هتحاسبيني علي زعلتك من خلود
استلمتها ومردتش ف قولت
_ يااه.. ده انا باين عليه زعلتك جامد قوي في دماغك ، في ايه يابت ما تردي بدل ما اجيلك
استلمتها وبردو مردتش وسابتني في حيرة من ناحيتها وبفكر ارجع اجيبها من شعرها وافهم مالها بس مكنش وقته وروحت لبيت عمي السبع اتفقت معاهم وبعدين سبتهم ورجعت اتصل بيها تاني واخر ما زهقت رجعت البيت وقولت لخالتي تجهز عشان تروح معانا وافقت وقالت هناخد دادة امينة علشان هي جربت قبل كدة شري الشبكة
#جويرية
كنت قاعدة في اوضتي لما جت ماما تقولي بدر بره وعلي غير عادتي طلعت من غير تأفأف ولا اعتراض وده خلي ماما تمبسط وتفتكر اني فرحانه بالخطوبة ومن غير تعليق ولا اهتمام بامبساطها دة روحت وسلمت علي بدر ف قال بإبتسامة ولمعة في عينه
_ عاملة اية
_ كويسة
_ جاهزة
_ لأية
_ هنروح نشتري الشبكة والفستان
_ النهاردة
_ اه يدوب
نزلت جفوني وشردت ف قالت ماما
_ اه طبعاً هنروح
قال
_ في ايه يا جويرية مش عاوزه تروحي
_ عاوزة
رجعت ابتسامته وهو بيقول
_ طيب يلا بقا يدوب تجهزي.. بشر زمانه كلم نسايبه وهيروحوا معانا
انتفض قلبي بسبب كلمته دي ف قولت بتلعثم
_ مين هيروح معانا
_ أكيد اسراء وامها
_ و..... و ابوها
_ مش عارف بس مفتكرش هيروح
مقدرتش اسأله علي ريان وبقيت خايفة ومرعوبة من اني اقابله ومع كدة دخلت اجهز وبعدين خرجنا لشارع وشوفت اسراء وامها وبشر وخالتي ورد ودادة امينة وطول الوقت انا حاسة اني هقع من طولي وانا متوقعة اشوفه طالع من بيتهم ولكن بدأت ارتاح واخد نفسي لما بدأنا نطلع في العربيات ومشفتهوش مع اني نفسي قوي اتشجع واقابله علشان اواجهه واعرف عمل معايا كدة ليه ...
وبعد ما وصلنا وقفت إسراء مع امها و خالتي ورد في ناحية وانا وماما وبدر في ناحية تانية وعلي قد ما حاولت بس مقدرتش اكلمها وكان نفسي تيجي هي تكلمني وتقولي قالها ايه لما مشيتها بقصصه
_ اية رأيك في دة
قالهالي بدر قطع حبل افكاري ف قولت
_ حلو
_ طيب بصي وشوفي يمكن حاجة تعجبك
وجهت نظري ناحية الخواتم وشاورت علي واحد شكله عجبني شوية ف طلب من الراجل يوريهوني وقال وهو بيلبسهوني
_ ذوقك حلو قوي بس نشوف علي مقاسك ولا لا
كمل بعبس
_كبير عليكي... لو سمحت مفيش مقاس اصغر
_ لحظة هوريك تشكيلة تانية
راح ورجع بمجموعة تانية ف قالي بدر
_ مفيش نفس الشكل اية رأيك
_ اي حاجة
_ اي حاجة ايه اختاري
شاورت علي خاتم تاني وجابهولي وقال
_ بردو حلو بس يارب يطلع علي مقاسك
لبسهوني وبعدين ابتسم وهو بيقول
_ طلع علي مقاسك
_ اه
_ الف مبروك... نشوف بقا السلسلة
_ كفاية دة
_ دة بس .. دة انتي قنوعة جداً تعالي
بصيت لماما اللي واقفة كأنها مش موجودة ف قالت بإبتسامة
_ سيباكم براحتكم.. كملوا وانا هتصل بخالك وارجعلك
مشيت ف قال بدر لما لاحظ توتري
_ خايفة مني ولا اية
_ لا
_ امال مالك
_ مفيش...
كملت بعد تردد
_ بس كنت عاوزه اعرف لو زعلت من بيجاد المرة اللي فاتت
_ لا خالص انا عاذرة ، هو بيغير علي اختة انا لو مكانة مكنتش جوزتك
ابتسمت بمجاملة وقولت
_ انا خوفت تزعل لما قاطع كلامك عن صحابك
_ لا لا أبداً ازعل ليه
_ اها
قال بإبتسامة ناهي اي كلام عن ريان
_ بس حلو انك اهتميتي بزعلي ، في تطور
#بشر
كنت واقف بعيد شوية وسايبهم يختاروا ورجعت اتصل ب هاجر اللي اخيراً ردت عليه وقالت
_ ايوه يا بشر
_ ايوة يا بشر؟!!.. بقا كل دة عشان تردي وفي الاخر تقولي ايوة يا بشر
_ انا اسفة بس مخنوقه شوية ومليش نفس اكلم حد
_ وايه السبب
_ مش عارفة
_ طيب إيه رأيك تخرجي
_ مين هيخرجني
_ ومين بيخرجك غيري
_ وخطيبتك
_ هيحصل إيه يعني... اجهزي ساعتين كدة ونرجع واخدك ونخرج
_ تؤ
_ ليه
_ بقول كفاية رزالة واسيبك تحضر لخطوبتك
_ دة إيه العقل دة ومن امتي
_ من دلوقتي
قلقت من اسلوبها ف قولت
_ في ايه يا هاجر قلقتيني
_ مفيش حاجة
_ لا في وهتقولي
_ صدقني مفيش
_ في ايه يااا هاجر
_
_ هاجر!
قالت بصوت مخنوق
_ مش عارفة
_ مش عارفة يعني إيه ، قوليلي إيه اللي حصل مش هحايل فيكي كتير
_ مفيش اي حاجة حصلت انا مخنوقة لوحدي.. معلش هقفل
قالت كدة وقفلت ورجعت اتصل عليها بعد ما قلقي زاد ولكن مردتش
#خلود
محاولتش اكلمها وكنت مستنياها هي اللي تكلمني وتفهمني ايه اللي بيحصل وفي الوقت دة فتحت النت لقيت رسالة من زيد قبل ربع ساعة تقريباً بيقولي فيها
_ فاتحة ومبتكلمنيش لية
ف فهمت ان لسة الحساب مفتوح عندها لأني كنت قافلة من ساعتين تقريباً ف قولت
_ أبداً دي الشبكة مفتوحة لوحدها
_ مفتوحة لوحدها ولا انتي اللي مش حابة تتكلمي
_ لا طبعاً مش كدة
_ طيب مالك زي مايكون مودك مش مظبط
_ أبداً بس حاسة بشوية ملل
_ تعالي جمبي وانا كمان هطق من الملل
_طيب وهنعمل اية علشان الملل يروح
_ ياريتك قريبة كنا اتمشينا شوية مع بعض
_ ياريت
_ بعد ما نتجوز هاخدك كل يوم ونتمشي مع بعض عند البحر
_ بعد مانتجوز؟
_ اه... مالك مش موافقة ولا اية
_ موافقة بس بحب اقدم المشيئة
_ إن شاااااءلله هنتجوز وهاخدك وهنسافر في اي مكان تختاريه. وفي يوم هاخدك في يخت نقضي فيه يوم كامل في نص البحر وهنعمل زي تيتانيك
_ نقف فوق السفينة ونمسك ايدين بعض ونبص للغروب والجو دة
_ لا هنغرق انا مبعرفش اعوم
_ هههههههه اوك معاك
_ هتغرقي معايا ولا هتستندلي زي روز وتاخدي الباب لوحدك
قولت بإبتسامة
_ هديهولك انت لوحدك
_ وتغرقي انتي
_ اه
_ ياه دة انتي طلعتي بتحبيني قوي
_ قووووي.. اساساً حياة انت مش فيها انا مش عاوزاها
_ ياوعدي علي الرقة والرومانسية
_ دي حقيقة ، اممم اقولك حاجة
_ قولي حاجة
_ اكتشفت في نفسي حاجة كبيرة وفارقة في حياتي
_ هي اية
_هي إني كتير بلاقي نفسك بتكلم زيك ومتأثرة جداً بالكلام اللي بتقوله ، من غير ما احس لقيت نفسي بكون نسخة منك
_ دة بجد
_ اه
_ ايوه ممكن ليه لا حتي انا ملاحظ اننا متفقين وبنفهم بعض بسرعة اتاريكي متأثرة بيه
_ شوفت بقا
_ شوفت وعشان كدة لقيت نفسي بحبك مع اني مشوفتكش .. حسيتك انتي اخر قطعة في لعبة البازل
_ هههههههه قطعة البازل
_ اه مش انتي اللي اعتمدتي الكلمة دي
_ اه وحساها لايقة علي الوصف
_ طيب وانتي بقا شيفاني قطعة البازل
_ انا شيفاك الصورة كاملة ، ومستكتراك علي نفسي ، يعني انا دلوقتي بكلمك وبعيش حلم وانا متاكده اني هصحي منه ومش هيكمل
_ بتخديني علي قد عقلي يعني لما قولتي انك موافقه تجوزيني وانك بتحبيني
_ موافقة طبعا بس زي ما قولتلك شايفة ان دة حلم
_ ليه يعني ، ايه اللي يمنع اننا نكون لبعض
_ مش عارفة
_ انتي اللي موسوسة ومعندكيش ثقة في حجم حبي ليكي ، بس انا بقولك متخافيش انا قولتلك ان مفيش حاجة هتخليني اسيبك... ولو حصلت هخطفك
_ هههههههه من غير خطف انا هاجي معاك
_ طيب اقلقي مني شويه مش يمكن أآذيكي
قولت وانا شايفة اللي ممكن يحصل لو عرف ان دي انا
_ مش مستبعدة انك تأذيني وبقولك من دلوقتي ان حتي اذيتك انا حباها
_ متوقعه اني آأذيكي
_ بهزر
_ لا بجد انتي متوقعة اني هأذيكي
_ بقولك بهزر
_ محستهاش هزار
_ اممم يعني
_ يعني ايه
_ اقصد يعني اقولك ان حتي لو أذتني في يوم هفضل أحبك
_ غريبة انتي بتتكلمي كأني لو شوفتك وعرفتك هزعل قوي... وكتير بتحسسيني اني اعرفك قبل كدة
_ فلنفترض انك طلعت تعرفني وبخدعك واكتشفت اني بجد حبيتك هتعمل إيه
_ مش هرحمك
_ هتعمل ايه يعني
_ مش عارف بس انا قولتلك قبل كدة بكره الكدب والخداع ، ومش بكرهم مجرد كلمة لا دول ممكن يكونوا سبب في جرحي ، حتي لو كدب ابيض بيزعلني ف تخيلي انتي تطلعي كدبة ممكن اعمل فيكي ايه... صدقيني زي ما حبتيني زي ما بتقولي هخليكي تكرهيني
تجمعت دموعي وانا بقول
_ دة انت شكلك زعلك وحش قوي
_ مش قوي بس مفتكرش هيعجبك
_ ربنا يستر ، والحمدلله مش بخدعك ف مش هجربة
_ اه ما انا عارف ، اكيد لو تعرفيني وبتخدعيني كنت كشفتك
_ الحمدلله
_ الحمدلله.... اممم بحبك يا اسيل
_ هههههههه بحبك ايه بقي انت خوفتني منك
_ خوفتي مني بجد
_ شوية
_ لو جمبي كنت خدتك في حضني وطمنتك
_ ااه انت طالبة معاك قلت ادب.. لا ارجع خوفني احسن
#زيد
للحظة صدقتها وقولت يمكن صحيح حبتني من غير قصد وهي بتحاول تشتغلني ، ايوة دة مشفعلهاش عندي ولا قلل من زعلي منها بس بردو صدقتها ولكن بعد ما خلصت كلام معاها ب ساعة او أكتر جت خالتي ودادة امينة وبدر من غير بشر ولما سألتهم عنه قالولي بيشوف هاجر وجاي كنت حابب اشوف بتتعامل معاه ازاي ف نزلت وقصدت مبينش صوت ف لقيتهم واقفين عند الباب وبيقولها
_ يابنتي قلقتيني في ايه
_ قولتلك مفيش يا بشر
_ مش هسيبك النهاردة غير لما اعرف مالك احكي علشان تخلصي مني
سكتت شويه وبعدين قالت بتنهيدة
_ اقولك وتفهمني
_ هفهمك
_ بصراحة
_ ايوة
_ انا مبحبش اشوفك مع اسراء دي... مبحبهاش خالص ولا حابه انك تجوزها... بس لما فكرت بيني وبين نفسي وبعد كلام قالتهولي خلود لقيت اني بقيت خسيسة قوي ومبفكرش غير في نفسي .. بأي حق همنعك تجوزها عشان تفضالي دائما وتفسحني وتجبلي شيبسي وهدايا
_ لا استني بس... مش فاهم يعني ايه مبتحبيش تشوفيني معاها.. ليه؟
سكتت شوية وانا مشيت قبل ما يشوفوني ولكن فهمت قصدها اللي عايزة توصلهوله وهو انها بتحبه ، بس عاوزاها تيجي منه هو الاول ، وقتها فهمت ان احساسي كان غلط وهي مريضة وعاوزة تتعالج ، ف قررت اني هقول لبشر وهوريله الشات والكلام اللي دار بينا ومن تليفونها كمان علشان يصدق ويسيبه منها وبعدها اعرف ازاي اعالجها بطريقتي
#هاجر
تقريبا قولتله اللي حساه بس لحساسية الموقف ولأني عارفه إني بنسباله اخته الصغيرة مقدرتش اقولها صريحة وقولت كلام اقدر اسمية غيره اخت علي اخوها وبعد ما سكت شوية افكر في كلام اقوله قالي
_ سكتي ليه ما تردي..
قولت بإبتسامة خفيفية
_ يعني مش عاوزة حد يشاركني في عمي
بهتت ملامحه ف قولت
_ مالك وشك قلب ليه
ابتسم بخيبة وهو بيقول
_ كلامك دائماً بيحمل اكتر من معني يا هاجر
_ واية المعني التاني اللي فهمته
_ ولا حاجة
_ في ايه يا بشر
قولت بتذمر
_ في اني زهقت... انا حاسس اني معاكي ببقي عبيط
_ لييبة
_ ولا حاجة ، انا مروح
قال كدة وخطي خطوات لفوق ف جريت وراه وقولت
_ بشر استني
كملت وانا بقف قدامه
_ انت زعلت ليه... في ايه
قال بنرفزة ولمعة دموع في عينه
_ في انك غبية وانا تعبت بسببك... انتي انسانة ذكية جداً وبتلقطيها وهي طايرة بس معايا انا غبية مبتفهميش الكلام الصريح والمباشر وانا لغيت دلوقتي مفقدتش الامل لحظة انك تفهميني ، بوصلهالك بكذا طريقة ، كلام ، وهدايا ، واهتمام ، وفسح وانتي مش عارف فيكي إيه ، جبلة مبتحسيش وغبية ، ولا يكونش انا اللي طمعان في مكان مش ليه وبوهم نفسي في كل مرة بتعكي وتقولي كلمة علي هوايا
كمل بخيبة
_ انا بحكي في اية مانتي غبية مش هتفهمي... بس عارفة احسن انك مش هتفهمي.. اصلا مبقاش ينفع تفهمي
قالها ومر من جمبي وسابني مش عارفة اضحك ولا امسح دموعي اللي نزلت بسبب غبائي... ازاي مكنتش فاهمه ان انا اللي بيتكلم عليها طيب ازاي مخدتش بالي ان هو ملهوش صحاب غير كريم اللي معندوش اخوات. ازاي مكنتش قادره افهم تلمحاته ونظراته اللي بتقول كل اللي في قلبه ناحيتي ، ازاي مش فاهمه...
وبعد ما فهمت كنت هروح وراه واقوله احساسي ناحيته بس مقدرتش وقررت اتريث وافكر في طريقة اقوله بيها ، ولكن بعدين ندمت اني مقولتش وقتها... لا دة انا ندمت اني فهمته من اساسه