الفصل الثاني عشر12
بقلم سحر حسين
فجاه لقيته مسك ايدي ويمكن اول مره يمسك ايدي بالطريقه دي مش عارفه ليه حسيت ان في حاجه غريبه بتحصل او هتحصل وقلت له هو في ايه قال لي في كلام كثير جوايا عايزه اقوله لك بس يا ريت تفهميني ساعتها بس حسيت ان قلبي بيدق بسرعه صعب قوي حسيت انه من كتر ما بيدق هيطلع من مكانه حسيت ان الجو ساقعه جدا وفي نفس الوقت حر جدا كان كل حاجه جوايا وكل حاجه حواليا متلخبطه مش عارفه ليه وبعدين سكت كده وفضلت بصله ومصدومه ومتنحه وهو قاعد بيتكلم وانا مش سامعاه حتى انا كل اللي انا بعمله ان انا بص في وشه بس لحد ما فجاه لقيته بيقول لي ......
****************
زين : ريم انت سامعاني هو انت مالك متنحه ليه كده .
ريم : هاااااا
زين : يا بنتي مالك في ايه هو انا لسه قلت حاجه عشان تتنحي كده وبعدين انت ايدك ساقعه ليه كده .
ريم : لا ما فيش حاجه خير يا استاذ زين قولي انت عايز تقول ايه .
زين : استاذ استاذ ايه بقى بما ان احنا لوحدينا قولي لي يا زين .
ريم : هااااا لا طبعا ما ينفعش ازاي يعني .
زين : طيب ما علينا بصي هو انا كان في حاجه كده جوايا وكنت عايزه اقول لك عليها بس بصراحه قلت اتاكد الاول هي جوايا من فتره يعني بس قلت اتاكد من مشاعري الاول وبعدين اقول لك عليها ولقيت ان ده الوقت المناسب يعني ان انا اقول لك .
ريم : ايه مشاعرك طيب وانا مالي ومشاعرك .
زين : ممكن ما تقاطعنيش وسيبيني اقول اللي انا عايزه وبطلي الدبشه اللي انت بترميه في وشي ده .
ريم : ما هو انا بصراحه مش فاهمه انت عايز تقول ايه وبعدين انت ماسك ايدي كده ليه سيب ايدي عشان مش قادره اسحبها منك .
زين : لا معلش خلينا كده كده انا هتجرا اكتر اني اقول لك على جوايا .
ريم : تمام قول بقى انت عايز تقول لي ايه طيب .
زين : بس بصراحه ومن غير لف ودوران ومن غير كسوف انا معجب بيكي وكنت عايز اتقدم لك بس الفكره كلها بس ان انا عايز اتعرف عليك اكثر عايز اعرف عنك كل حاجه يعني بتحبي ايه بتكرهي ايه ايه اكثر حاجه ممكن تضايقك او تزعلك مني ايه اكثر حاجه ممكن تسعدك يعني عايزه احفظك انت عارفه يا ريم انا يمكن اول مره في حياتي اهتم بحد كده شكلي حبيتك بجد .
ريم : طيب وقمر .
زين : مالها قمر .
ريم : هي راحت فين هي مش مفروض حبيبتك .
زين : اولا قمر خلاص اختفت من حياتي ثانيا هي كانت حبيبتي دلوقتي هي ما لهاش وجود في حياتي تماما ومش عايزك تهتمي لوجودها وبعدين انا بقالي ساعه عمال اقول كلام رومانسي وحب وبقول لك عايزه تقدم لك وعايزه احفظك وعايزه اعرف كل حاجه عنك في الاخر تقولي لي قمر قمر ايه .
ريم : طيب وانت حبيت قمر كده يعني برده حفظتها وعرفت عنها كل حاجه وقلت لها الكلام الحلو اللي قلته لي ده .
زين : عارف ومتاكد انك يمكن ما تصدقينيش بس والله العظيم انا عمري ما حبيت قمر بالطريقه دي انا و قمر كنا بنحب بعض بطريقه مختلفه حاولت على قد ما اقدر اني احبها بس هي للاسف كانت انانيه جدا وكانت عايزاني وعايزه شغلها وعايزه السفر وعايزه كل حاجه لحسابها واول ما جالها الفرصه انها تتخلى عن حد تخلت عني انا قلت لها كذا مره ما عنديش مشكله اني اكون معاكي بس ما تلغينيش بس للاسف استغنت عني عشان تكسب كل حاجه تانيه سفرها وشغلها وحياتها مع اني عمري ما كنت مشكله ليها بل بالعكس انا يمكن كنت اكثر واحد بدعمها في كل حاجه وفي اي قرار بتاخده بس هي اتخلت عني علشان حاجات كثيره هتفهه صدقيني انا ما حبتش قمر زي ما بحبك دلوقتي يا ريم ويا ريت لو سمحت تطلعي موضوع قمر ده من دماغك خلينا نعيش حياتنا وخلينا في موضوعنا احنا احنا اهم انت اهم عندي بكثير جدا من قمر ومن اي واحده تانيه اوعي تقارني نفسك باي حد تاني واوعي تقاني حبي ليكي باي حد او اي حب ثاني .
ريم : ( انا مصدومه ومتنحه ) هو ده بجد يعني كل الكلام الحلو ده لي انا .
زين : بصي انا عارف ان الموضوع جه فجاه ويمكن تستغربي بس انا ما عنديش مشكله خدي الوقت اللي انت عايزاه بس جاوبي عليا في السؤال ده ما عنديش مشكله استناكي لو حتى هستناكي عمري كله بس قولي لي قوي هل في حد في حياتك ولا لا .
ريم : حد في حياتي ايه انا ما فيش حد في حياتي غيرك يا زين انا كنت قاعده مستنيه اليوم بفارغ الصبر عارف يعني ايه لما تحب حد وتحس ان حبك ده حب ضايع كنت بحبك جوايا كنت بحبك في السر كنت خايفه حتى المحلك باي كلمه كنت خايفه انك تكسفني او حتى انك ما تكونش شايفني اصلا كنت خايفه لتكون قمر لسه في قلبك كنت بدعي ربنا ليل نهار اني اكون ليك وادعيت دعوه ربنا يسامحني عليها بقى انك ما ترجعش الي قمر وما تكونش بتحبها زين انا بحبك بحبك قوي يمكن بحبك بطريقه انت ما تتخيلهاش بجد انا اسعد انسانه في الدنيا .
زين : بجد يا ريم بجد انا اللي اسعد انسان في الدنيا وصدقيني انا عمري ما هسيبك وصدقيني انا هحاول اسعدك باي شكل من الاشكال وعمري ما هقف طريقك في اي حاجه انت عايزاها انا انا هكون دعم ليكي اهم شيء ما تسيبنيش انا مش عارف اعيش من غيرك .
ريم : يا ابني انت مش فاهم انا اللي مش عارفه اعيش من غيرك انا كل حاجه في حياتي دلوقتي بقت انت الاول ما كنتش حابه اجي الشركه اصلا بس لما حبيتك بقيت بعمل حاجات غريبه انا نفسي بقيت مستغربه اللي انا بعمله ده انا اول مره في حياتي اعمل الحاجات دي كلها عشان حتى الفت انتباهك لي بس انت كنت رخم قوي على فكره .
زين : هههههههههه اعمل ايه طيب الاول بصراحه كنت مسترخمك جدا وكنت برخم عليك بصراحه عشان تسيبي الشركه وتمشي حسيت انك جايه تلو دراعي يعني اول ما جيت يعني بس بعد كده كنت بحب اشوفك لو حتى لحظه كنت حتى ساعات كنت بقف ابص عليك من بعيد وانت بتشتغلي كنت ببقى مبسوط جدا اني شايفك قدامي مجرد اني شايفك بس .
ريم : يا ااااا بقى معقوله كنت بتحبني الحب ده كله عندك حق والله ما هو انا برده اتحب .
زين : يااا على التواضع اللي انت فيه ايه التواضع ده كله والله كثر خيرك انك حبيتي واحد غلبان زي .
ريم : يلا بقى مش مشكله صعبت عليا.
زين : رخمه قوي على فكره انما قولي لي صحيح موضوع صاحبتك ده بجد ولا فيشنك .
ريم : فشنك يعني ايه فشنك .
زين : يعني حقيقي ولا تمثيل بس عشان تعرفي رد فعلي ولا ايه .
ريم : لا بصراحه هي قصه صاحبتي دي قصتي انا وكنت عايزه اعرف رايك يعني كنت باخد رايك اعمل ايه بس عن طريق واحده صاحبتي هو طبعا ما فيش حد صاحبتي ولا حاجه بس يعني كنت عايزه اعرف رايك كنت عايزه اعرف انا اعمل ايه بس .
زين : يا بنت اللذينه بس اقول لك على حاجه وانت حاسس ان الموضوع ده قصه جدا مدير وحبيبته القديمه ورجعت وحبيبته الجديده يعني مش عارف حسيت ان الموضوع علينا كانت مكشوفه قوي بصراحه .
ريم : كنت عايزني اعمل ايه طيب ما لقيتش غير الموضوع ده والحجه دي نقولها عشان اعرف رايك او حتى اعرف اعمل معاك ايه اول مره احب حد كنت عايزني اعمل ايه يعني .
زين : ولا اي حاجه المهم ان احنا مع بعض ده المهم بالنسبه لي .
ريم : وده اهم حاجه بالنسبه لي والله ياه اخيرا نطقت اخيرا .
زين : والله المفروض اقول لك انت اخيرا نطاقتي لان انت شلتيني .
**************
مره واحده خدني في حضنه حسيت ان خلاص الدنيا انتهت او انا كنت عايزه الدنيا تنتهي لحد هنا و في نفس الوقت بقول يا رب يكون حقيقه مش حلم مره واحده حسيت ان الدنيا بقت فيها الوان جميله قوي ما كنتش عايزه اللحظه دي تخلص لاول مره في حياتي احس اني عايشه بجد او في سبب عايش عشانه ما كنتش مصدقه اللي بيحصل لي معقوله معقوله انا في حد بيحبني الحب ده كله لا وكمان انا دلوقتي بين ايديه ومش خايفه يمكن اول مره في حياتي ما اخافش من اي حاجه غمض عيني وحسيت ان حلم جميل قوي ما كنتش عايزه اصحى منه خالص فاضلنا قاعدين على الشاطئ قدام البحر يمكن ساعات او يمكن ساعه واحده ما حسيتش في الوقت خالص كان اول مره في حياتي كمان ما اهتمش بالوقت ما كنتش مهتميه باي حاجه غير اللحظه دي وبس اصلا ما كنتش عايزه اهتم نسيت كل حاجه نسيت انا مين وفين وبعمل ايه نسيت الدنيا حسيت في لحظه اني في الجنه عارفه انك يمكن تقول عليا اني مكبره شويه الموضوع بس هو الحب كده يتعايش حتى لو لحظه ولازم تعيش كل لحظه فيه اوعى تضيع لحظه واحده حلوه مع حد انت بتحبه .
بعدين خدنا بعضنا ورجعنا ركبنا العربيه وصلني لحد البيت ونزلني من العربيه وبعدين طلعت ولقيته بيتصل بيا
زين : بيقول لي اطلعي في البلكونه طلعت في البلكونه لقيته واقف لي تحت البيت او بيقول لي وحشتيني وكنت عايزه اطمن عليك مش اكثر .
ريم : وحشتك ايه احنا هنضحك على بعض انا لسه سايباك .
وفجاه وانا عايشه جو الرومانسي ده لقيت صوت امي بينده لي وبتقول لي .....
الام : انت يا بلوه حياتي تعالي هنا .
ريم : ايوه يا ماما حاضر جايه ثواني معلش يا حبيبي لازم اقفل دلوقتي عشان ماما عايزاني .
زين : حبيبي اجمل كلمه سمعتها ماشي يا حبيبتي روحي وان شاء الله باذن الله اشوفك بكره في الشغل .
ريم : تمام ماشي الصبح بدري هتلاقيني موجوده في المكتب باي باي .
****************
قفلت معاه التليفون والجري الجري عند ماما عشان اشوف عايزه ايه .
ويا ريتني ما رحت فاجئتني بموضوع حسيت ان الدنيا كلها رجعت اتحطت تاني فوق دماغي ما هو انا كده مش مكتوب افرح او يمكن وقت الفرح عندي بسيط قوي قليل يعني .
*****************
ريم : ايوه يا ماما نعم عايزه ايه يا قلبي يا حياتي .
الام : قلبي وحياتي انت اتجننتي يا بت .
ريم : عشان بقول لك قلبي وحياتي بقيت اتجننت ايوه ماما نعم عايزه ايه يا حبيبتي .
الام : المهم في موضوع مهم جدا عايزه اكلمك فيه .
ريم : موضوع مهم خير يا ماما في ايه قولي .
الام : عريس يا بنت يا ريم انما ايه زي القمر وعنده عربيه ايه فخمه جدا حاجه كده ما اقول لكيش زي بتوع السيما بالظبط كنت بتمنى لك حاجه كده من زمان يا بنتي .
ريم : ايه يا ماما عريس عريس ايه ده طلع لي منين ده دلوقتي .
الام : يعني ايه طلع لك منين بقول لك عريس تقولي طلع لي جديد يا بنت ده حاجه زي القمر شوفي بس الاول .
ريم : لا يا ماما معلش انا مش عايزه اشوف حد وبعدين انا مش عايزه اتجوز دلوقتي انا حره .
الام : نعم يا اختي مش عايزه تتجوزي دلوقتي انت الاصغر منك دلوقتي مخلف اثنين وثلاثه يا بنتي انا عايزه افرح بك انت واحمد اخوك وانا هفضل عايش لكم لحد امتى .
ريم : يا ماما يا حبيبتي والله هتفرحي بس سيبيني افرحك بطريقه تفرحني انا كمان مش انت بس اللي تفرحي انا كمان لازم افرح .
الام : والله انت بطريقتك دي وباسلوبك ده وبتفكيرك ده شكلي مش هفرح خالص طيب شوفي الاول وبعدين ارفضي يا بنت بقول لك حاجه زي بتوع السيما .
ريم : سيبيني انا بس كده ان شاء الله باذن الله عن قريب يعني هيتقدم لي واحد بصي هيضرب اللي انت جايبه ده بالجزمه ان شاء الله .
الام : ليه هو في عريس تاني يا بنت فرح قلبي .
ريم : لا يا ماما انا ما قلتش كده انا بس يعني بقول لك خلي كل حاجه في وقتها حلو .
الام : اه يبقى شكلك مش حاطه موضوع الجواز ده في دماغك خالص طب اسمعي بقى يا ريم انا مش هصبر عليك كثير انا عايزه افرح بيكي ما هو انت الكبيره انا لازم افرح بيك انت واخوك قبل ما اموت دلوقتي بكره بعده المهم اني افرح بيكم باي شكل من الاشكال ومش هسيبك على كيفك بدام انت مش حاطه الموضوع ده في دماغك .
ريم : يا حبيبتي والله العظيم انا هفرحك بس سيبيني براحتي .
الام : قوم يا ريم من قدامي واعملي حسابك انك هتقعدي مع الشخص ده وهتشوفيه ومش عايزه اتناقش في الموضوع ده تاني انت فاهمه اتفضلي .
******************
اخذت بعض وقمت من قدام ماما وانا متضايقه جدا ومخنوقه كنت عايزه اقول لها ان انا في حد في حياتي بس ما قدرتش اتكلم ما قدرتش اقول اي حاجه عشان للاسف ده مش قراري لوحدي كان لازم اعرفه قبل ما اعرفهم اي حاجه روحت انام وصحيت اليوم الصبح لبست ورحت الشغل واخذت بعض ودخلت مكتبي على طول ما عدتش على زين زي كل مره بعد ما دخلت المكتب حوالي 10 دقائق دخل ورايا زين وقال لي ..........