رواية احتواء القاسي الفصل الثاني والثلاثون32بقلم سوسو تويكس
صحيت الصباح وعملنا الروتين اليومي، بدينا حفظ في سورة البقرة زي ما كان في الشرط،كل يوم نص وجه وبجي يسمعها لي المسا،لانو ح ينزل شغل اليله،بعد شرب الشاي كان طالع مشيت لحقتو جمب الباب _عاين لي بخبث وقال بابتسامه:اها الشرط كان بقول شنو_لينه:ما ح اقول مع السلامه، ح اقول رافقتك السلامه _معتصم:يا... شنو نسيتي الشرط ومعاهو إضافات كده (غمز لي) _لينه:يا سجمان البلعب بدون نزاهة_ضحك فيني وقال:انتي لحسي مركزه مع الحصل امبارح، يلا انتبهي على نفسك يا نُنَّتي_قرب و طبعها على خدي وهمس:ما مشكلة الإضافات عملتها انا_بقيت اتبسم زي وانا فاتحه خشمي زي الهبلة، بعد فات ختيت يدي في قلبي وانا كلو مرة بقول ننتي، طبعا الاسم عجبني شديد، المهم قفلتا الأبواب من جوا عشان قاعده براي _دخلتا الواتس لقيت اماني خاشه اتونست معاها مسافه وقت عرفت اني قاعده براي قالت ح تجي بعد الضهر وتشرب القهوة معاي، طبعا بيتهم في الحلة البعدينا طوالي يعني ما بعيد_جهزتا حاجات للقهوة، ومسافة اماني تجي قلتا استحم واتجهز _دخلتا الغرفه شلتا لي غيار لفت انتباهي دفتر اسود تحت هدوم معتصم _طبعا الشمار حرقني بقيت اقرا فيهو في الاول كلو عبارة عن امنيه ومعاناتو وقت اتوفت، وانا بقرا وببكي بزعل للان نحنا في موال امنيه، هي حارة انو يكون في طرف تالت، بس الاحرا انو يكون الطرف التالت ما موجود لكن عندو تأثير ومكانه كبيرة _كلمتا قراية الدفتر لحدي ما لقيت كم صفحه فاضيه بعديها كان كاتب عن الانجذاب _السيطره _الغيرة _التملك، واخر شي كان كاتب عن #الاحتواء _كلامو كان مؤثر بس ما كاتب اسم زول محدد كان بتكلم عنهم بالتفصيل كانو عاش الاحاسيس دي كلها، رجعتا الدفتر في مكانو، ومشيت استحميت، بعد اماني جات قاعدين نتونس كده، قالت لي: والله يا لينه انتي محظوظه بحب معتصم ده_قلتا ليها بسخريه:انا؟ _اماني:ايي انتي، يخ ما شفتي الطريقه البعاين ليك بيها كيف، حتى امبارح وقت جيتو وكلنا بنتونس وقت انتي بتتكلمي بكون مركز معاك بنظرات وطريقة جابت لينا جفاف عاطفي انا وملاذ _ضحكتا فيها لاني ما مصدقه ايي عارفه اني مهمة عندو لكن ما بالطريقه دي، اماني:اريتو لو مالك ده زيو، حسي تصدقي قال زعلان لاني ما مشيت ليهو في بيتو وقت كان عيان_مالك ده الزول المرتبطه بيهو، طوالي اتذكرتا غسان وخدعتو لي
قلتا ليها:اوعك اسالك تمشي مهما حاول معاك زاتو واحد زي مرتبطه بيهو لشنو يا اماني ما تزعلي مني لكن انا شايفه انك تنفصلي عنو انا ما مطمنة ليهو والبقول ليك تعالي بيتنا ده واضح نيتو شنو_بقت تبكي وقالت:انا والله حاولتا انفصل عنو بس ما قدرتا انا بحبو يا لينه حاولتا كم مرة اغير فيهو من أسلوبو ده، مرات بحس انو ما يبادلني نفس المشاعر بس اعمل شنو انا متعلقه بيهو وما بقدر افارقو_لينه :خلاص ما تبكي انا نصحتك وريتك الزول ده نيتو شنو، لكن بما انك واثقه انو ما بيعمل شي يضرك خلاص _بعد هدت غيرت الموضوع اتونسنا في مواضيع تانيه وحقيقي بقت أقرب واحده لي في ناس كده سبحان صاح بتلقاهم في فترة بسيطه بس تحس كانك بتعرفهم من سنين _بعد العصر رجعت بيتهم، وانا بقيت قاعده ولسه موضوع الدفتر شاغل بالي، لدرجة وقت معتصم جا ودخل انا ما حسيت بيهو جا قعد جمبي في الكنبه وقالي:ننتي سرحانه في شنو _لينه:هيي جيت متين ما حسيت بيك _معتصم:قبلي شويه من مالك الشاغل بالك شنو _لينه :ولا شي، اها يومك كان كيف في الشغل _قالي وهو مركز معاي:ما تكذبي في شي لكن ما بتغط عليك، يومي كان عادي بس بكرة ح اسافر _قلتا بزعل وانا اصلا كنت زعلانه وفايته لي بكيا وجا هو تما الناقصه:كيف يعني، ومسافر وين، طيب وانا؟ _مسك يدي وهو بقول:كلها ١٠ يوم واجي حصلت مشكلة في واحد من فروعنا بتاعة الشغل وح نسافر ومعاي كم مهندس ونرجع بعد ١٠ يوم_قمتا بسكات مشيت اجهز ملابسو للسفر، جا قالي:من بكرة حتمشي تقعدي مع ناس امي لحدي ما اجي_جا الصباح وبعد الصلاة طوالي كان طالع، قدمت للباب ضماني عليهو وهو بقول :ننتي ح تفرقي معاي شديد والله_سلم على في راسي وزحا وهو بقول:خلي بالك على نفسك _لينه:رافقتك السلامه_ابتسم وهو بقول:ادمنتا جملتك دي لو ما قلتيها يومي ما بمشي عديل.....
يتبع