رواية ذئاب لا تعرف الحب الجزء الثاني2الفصل الخامس والعشرون25بقلم نجمه براقه
خلود
كان كل خوفي وارتباكي من البصة ليه بعد اللي حصل واللي اتقال مكنتش فاكره انه هيكون زعلان لدرجة اللي تخلي عقابه بالكلام اقسي مليون مره من ردة فعل ملموسة..
وبعد ما جاهدت كتير وقدرت افتح وقف لحظات يبصلي من تحتي لفوقي بسخرية وتقليل وكأني حشرة قدامه ملهاش تمن وبعدين دخل تفحص شكل البيت بعينه وقال
_ بقالي سنين مجتش هنا لسه البيت زي ماهو ، مفهوش اي تجديد
استدار ليه وقال
_ بسيط قوي... هو ابسط ولا بيت ابوكي تفتكري.... الاتنين زي بعض صح؟ اكيد حاله مش احسن من كدة ، بس حلو اهو حاجة تلم من الشارع وخلاص... المهم
قرب مني وقال
_ انتي مشيتي ليه
_...
_ إيه؟ لتكوني مكسوفة مني بسبب اللي حصل ، لا انا مش عاوزك تاخدي في بالك
قولت بتوتر
_ مش زعلان؟
_ لا خالص ، انتي مشيتي علشان كدة ولا ايه
_ اه
_ ملكيش حق دة انا بقيت ساعة انده عليكي لغيت ما قالولي انك مشيتي... كنت عاوز قهوة
_ هو في ايه
_ مفيش اي حاجة ، عاوز قهوة وبس... يلا نرجع ولا هتلحقيني
نزلت دموعي من شدة التوتر وقولت
_ لا.. وعاوزة افهم مالك.. شكلك ناوي علي حاجة
_ بقولك عاوز قهوة
_ طيب واللي عملته عادي مخدتش بالك منه
_ انك خدعتيني وكدة قصدك
هزيت دماغي ف قال
_ مكنتش حابب اتكلم في الموضوع ، كنت فاكر انك عارفة اللي هيحصل ، بس انتي شكلك نسيتي وعدي ليكي
_ اي وعد
_ لاااا نسيتي بجد زعلتيني جامد ... طيب نبدء من الاول خالص... انا دلوقتي عايز اعرف انتي عملتي معايا كدة ليه
صوتي مأسعفنيش لرد ف قال
_ ليه ردي.. انا بتكلم معاكي مش هتعصب ولا هعمل اي حاجة... مجرد رغي.... خدي نفس واهدي مفيش اي حاجة تستاهل التوتر دة
قولت بعد ما استجمعت نفسي بصعوبة
_ كنت... كنت عايزة
_ ايوووه كنتي عايزة ايه... قولي من غير خوف وتوتر
_ كنت متضايقة منك علشان كل شويه تنتقدني وتقلل مني... كنت عايزة اوصلك انك دكتور فاشل علشان تحس احساسي
_ اه صحيح حتي انا خدت بالي من الموضوع دة في اول مره كلمتيني فيها ، بس عايز اعرف لغيت امتي
_ لغيت امتي إيه
_ لغيت امتي وانتي بتكلميني للهدف دة
قولت بصوت متحشرج
_ كنت هقفل معاك والله
_ ماشي بس بردو لغيت امتي وانتي بتكلميني علشان تعرفيني اني فاشل
مقدرتش ارد ف قال
_ يعني فضلتي تكلميني الفترة دي كلها عشان السبب ده ولا جيتي بعد فترة هدفك اتغير دة اللي انا عايز اعرفه
قولت ببكاء
_ اتغير
_ من امتي
__...
_ يابنتي ردي في ايه هو انتي شيفاني طلعتلك سلاح اتكلمي عادي... من امتي هدفك اتغير
_ من وقت ما حذفت الفيديوهات وعلقت عندي
_ اه لا ده من فترة كبيرة... طيب والباقي كان ايه هدفه
_...
_ ردي بتسكوتي ليه
_ كان علشان....
_ ايوووه عشان إيه
قولت ببكاء
_ انت عارف
_ لا مش واخد بالي سهلهالي.... سهلهااالي.. صعبة دي
_...
_ يا سلام يعني كان سهل انك تقوليلي كلمتيني علشان تثبتيلي اني فاشل وتحبطيني وصعب انك تقولي انك حبتيني يااااشيخة حرام عليكي
ديرت ضهري ليه وانا لسه ببكي لفني ليه وقال بإبتسامة
_ في ايه! ، بنتكلم عادي يا خلود... اهدي
كمل وهو بيمسح دموعي
_ ايوه اهدي كده مش عايز بكا... ايوه ، اهدي.. هديتي؟
هزيت دماغي ف قال بإبتسامة
_ اوكي... عاوز اسمعها منك
_ إيه
_ السبب اللي خلاكي تكملي كلام معايا
رجعت دموعي تسيل ف قال
_ خلود هتزعليني منك... انتي قلقانه مني يعني علشان البكا دة كله
_ لا
_ طيب امال ايه
_ معرفش
_ اها... طيب يلا سمعيني.. انا مش هسيبك غير لما اسمعها بودني... وادي فرصتي مش هضيعها... قولي... خدي نفس واهدي وقولي
خدت نفس عميق وقولت
_ كملت علشان كنت مبسوطه من الكلام معاك... انت كنت مع اسيل كويس غيري انا... مكنتش دائما تحبطها زيي
_ ايوه كملي
كملت ببكاء
_ انا عارفه انك مكنتش بتنافق وكان عندك حق في كلامك معايا بس مكنتش توصلهوني بطريقة كويسه... انت متعدلتش معايا غير لما لحقتني من مصيبة
_ ايوه سامعك
_ وانا والله كنت هقول بس خوفت تزعل
_ يعني مخوفتيش تخسري اللي حبتيه.. ولا خدعتيني فيها دي كمان
_ لا والله ما خدعتك... انا حبيتك بجد
ابتسم وقال وهو بيعدلي ياقة الفستان واكتافه
_ هوووف... هو ده اللي انا كنت عاوز اسمعه... تعبتيني علشان تقوليه... حلو كده
بعد ايديه عني وقال
_ يعني حبتيني
_ ايوه
_ طيب لحظة واحده ، هوريكي وعدي ليكي اللي انتي نسيتيه يا خلووود... دي الحاجة الوحيدة اللي زعلت منك فيها والله انك نسيتي ازاي تنسي .. شوفي
فتح التليفون ودخل علي الشات و وراني رسالته اللي بيقولي فيها زي ما حبيته هيخليني اكره وبعدها رسالتي اللي بقوله فيها انه مهما ازاني مش هبطل احبه ف قال
_ قريتي كويس
هزيت دماغي ايجاباً وانا مستمرة في البكا ف قال وهو بيحط تليفونه في جيبه
_ معلش دة مبدء مش هغيره حتي لو طلعتي انتي... وكنت هوفي بوعدي لو طلعت هاجر بس عملت حساب ان بشر بيحبها وكمان هو رفض قالي اسيبهاله ، لكن انتي بقا خدامه مش هعمل حساب لحد .. اه هقولك حاجة قبل ما انساها
_ كل كلام الحب اللي قولته قولته لما كنت شاكك ان هاجر اللي بتكلمني كنت بحاول اوقعها بس لو كنت اعرف انك انتي مكنتش هنزل ابدا لمستوي الخدامين واتغزل فيهم حتي لو بالكدب... ربع ساعة وتكوني في البيت لو فكرتي متجيش اقسملك هعرفك ازاي تكون الازية
قالها واتجه ناحية الباب ف قولت وانا ببكي
_ زيد انا اسفة
قال من غير ما يلتفت ليه وهو مكمل طريقه
_ دكتووور زيد... اسمي الدكتور زيد
#زيد
مكنتش هعديها كدة من غير رد يناسبها... رد يخليها تتمني لو كانت ماتت قبل ما تفكر تخدعني واحسن رد علي خلود بذات هو انها تتزل وتتهان ..
وبعد ما سيبتها رجعت البيت كركبت الأوضة وبهدلت الهدوم واستنتها لغيت ما جت لون عيونها احمر من كتر العياط وبتتهرب من النظر لأي حد عشان ميلحظوش اللي هي فيه في وقت كنت قاعد في الصالة لوحدي ندهت عليها وجت وقفت قدامي مزلولة ومش قادرة ترفع عينها ف قولت
_ الاوضه متكركبة والهدوم متبهدلين رتبيهم وغيري مفرش السرير ورشي معطر... ابدعي يعني عاوزها اوضة عرايس
اومات ايجاباً وهمت انها تمشي ف قولت
_ الاول اعمليلي قهوة
_ حاضر
قالتها بخضوع ودخلت المطبخ وبعد دقايق جابت القهوة حطتها قدامي واول ما استدارت زقيت الفنجان بأيدي وقع واتدلق ف قولت
_ استني عندك ، ايه ده... مش تحطيها كويس... تعالي نضفي المكان واعملي غيرها
اومات بدماغها وجت تنضف من غير ولا كلمة وبعدها دخلت عملت قهوة حطتها قدامي وراحت تنضف الأوضة وانا رجعت اشتغل وافكرلها في حاجة جديدة
#ريان
بعد تردد كتير قوي كتبت رسالة ودخلت ل اسراء قولتلها وانا بديهالها
_ تروحي دلوقتي ل جويرية تديها دي
_ ايه دي
_ رسالة ، روحي ادهالها
_ ريان انت اتجننت ،رسالة اية دي خطيبة صاحبك ، لا طبعاً مش رايحة
_ يابنتي رسالة عادية هو انا هظبطها يعني... علشان خاطري لازم تروحي جويرية بتعك وهتوقعني في مشكله مع بدر
_ عملت ايه
_ رايحة تحكي ل صبحتها عني ، شكلها حكتلها عن القصة اللي وعدتها بيها وصاحبتها حطاني في دماغها وشكلها مش هتسكت غير لما تعرف بدر
_ وهي هتستفاد إيه
_ معرفش.. روحي بس
_ اه بس هي طردتني المرة اللي فاتت هروح ازاي
_ معلش ، علشان خاطري.. بدر لو حس هيزعل قوي
#جويرية
كنت قاعده في اوضتي لما جت ماما تقولي اسراء عاوزة تسلم عليكي ف قومت من مكاني واستنيت دخلتها عليه وانا حاسه انها جايبه رساله من ريان وبالفعل ادتني رسالة بس كانت رسالة ورقية مش شفوية زي ما تخيلت ، خدتها منها وفتحتها بسرعة وكأنها الرسالة المخلصة اللي هتفهمني كل حاجة وتريحني من الحيرة اللي انا فيها وبدأت اقراء لقيته بيقولي
_ ازيك يا جويرية.. انا ترددت كتير قوي علشان اكتبلك الرسالة دي ودلوقتي وانا بكتبلك حاسس اني بغدر ب بدر ، وحتي لما جيتلك وخبطت علي شباكك ولما دخلت الحمام في القاعه كنت حاسس بالاحساس دة بس انا كنت بحاول افهم ايه معني كلامك اللي بعتهولي علي لسان اسراء ، يعني إيه عاوزة تفهمي عملت معاكي كدة ليه ، انا مش فاكر اني عملت معاكي اي حاجة ... لو بتتكلمي عن القصة ف انا نسيتها ومكتبتش اكتر من عشر صفحات زمان وقطعتهم كمان .. ولو انتي فهمتي وعدي ليكي بيها بطريقة تانيه غير انها هدية عيد ميلادك تبقي غلطانه.. انا لا بحب ولا بفكر في جواز.. ولما وعدتك بالقصة كان احراج منك بعد ما انتي اللي طلبتيها بنفسك... ف من فضلك ننهي الحوار ده هنا وابعدي صحبتك عني.. مش عايز اخسر بدر علشان حاجة في دماغك انتي وهي ملهاش اي اساس
نزلت دموعي وانا ببصلها واقول
_ مذكرش اي حاجة تدينه ، خايف استغلها ضده
_ تدينة بأية
قولت بصوت متحشرج
_ ولا حاجة... قوليله بس حسبي الله ونعم الوكيل فيك وذنبي في رقبته ليوم الدين
_ ذنب إيه يا جويرية... ريان موعدكش بحاجة هو مش ذنبه انك خدتي وعده ليكي بالقصة بطريقة تانيه
_ مش علشان القصة... انا كنت عايزة القصة عشان ادور عن سبب واحد للي عمله
_ عمل اااايه
_ اللي عمله بقا... روحي بلغيه رسالتي وقوليله ميخفش صحبتي انا هسكتها، انا قدرت اخبي السر خمس سنين من غير ما احتاج اقوله لحد وهعرف اخبيه لاخر العمر كمان
_ يابنتي سر ايه ماله ريان
_ ارجعي بيتكم
_ طيب فهميني في ايه
_ مش هفهمك حاجة ، افهمي منه هو... امشي
#ريان
استنيتها علي نار لغيت ما جت وقالتلي بشك
_ ريان.. هو انتي مخبي عني حاجه
_ حاجة ايه... جويرية قالتلك إيه
_ قالتلي اقولك حسبي الله ونعم الوكيل فيك وذنبها في رقبتك ليوم الدين ومتخفش من صحبتها هي قدرت تخبي السر لخمس سنين وهتقدر تخبيه طول العمر
_ يعني ايه... سر ايه دة !! .. مفيش بيني وبينها اسرار
بصتلي بشك ف قولت
_ اقسم بالله العظيم ما في... انا مش فاهم هي بتتكلم عن ايه.. والله ما فاهم
_ يمكن غلطت معاها في حاجه
_ مغلطتش!! اخر مره شوفتها فيها كنا كويسين مع بعض وبعدين مشوفتهاش تاني... انا مش فاهم حاجه... اسراء انتي لازم تروحيلها تاني وتسأليها تقصد إيه
_ لااا انا اطردت لتاني مره ومش هروح تاني... انت بقا فكر وشوف عملت ايه
هتفت بانفعال
_ يعني إيه افكر ، انتي مش مصدقاني
_ معرفش بس باين ان في حاجة كبيرة حصلت.. البنت شكلها منهارة بسببك
حسيت بتوتر وتنميل في اطرافي بعد ما رجعت بذاكرتي لورا وافتكرت لما اسراء قالتلي اني رجعت وفي هدومي بقع دم ف قولت بصوت مهزوز
_ لا لا... اكيد لا
_ لا ايه
_ اكيد انا معملتش حاجة معاها.. والله ما عملت.. اسراء انا معملتش حاجة
_ في ايه يا ريان مالك
_ مش فااااكر انا مش فاكر حاجه ودي المصيبه... انا مش فاكر اي حاجة حصلت يومها
_ طيب في ايه اتكلم خوفتني
قولت بعد ما رجلية عجزت عن انها تشيلني
_ معرفش معرفش... معرفش اي حاجة... مش فاكر اي حاجة...
كملت وانا بمسك ايديها بترجي
_ علشان خاطري يا اسراء تروحي وتسأليها تاني ، قوليلها انا عملت ايه.. قوليها مش فاكر حاجه بعد حفلة عيد ميلادها
قالت بدموع
_ اهدي طيب اكيد معملتش حاجة ، مش معقول يكون شوفتها تاني
_ طيب امال في ايه.. والدم اللي كان علي هدومي بتاع مين
_ ياحبيبي اهدي... دي بقعة دم كبيرة اكيد لو كنت ازيتها كان اهلها عرفوا وشافوك
_ طيب امال ايه... هي تقصد ايه؟ ماهو كلامها ميتقالش غير لو كنت اذنبت في حقها وانا زي مانتي شوفتي مغلطتش معاها ف هيكون ايه اللي حصل مخليها تقول كده
قالت بدموع
_ معرفش... معقول تكون رجعت من عندها ليلتها
سيبت ايديها ونزلت بجسمي علي الارض قعدت تايه ومش عارف ايه اللي بيحصل بس كنت شبه متأكد ان بقعة الدم ليها علاقه بجويرية وبقيت قاعد مبعملش حاجة ومستني جيت بدر يحاسبني علي حاجه انا مش فاكرها واخر ما الدنيا اسودت في وشي وهو مجاش مشيت مش محدد وجهه
#بيجاد
عدت ساعات وانا لسه صاحي بفكر في كلام فاطمة عن انها مش عارفة هي مين وتصرفات خالي اللي تشكك فيه غصب ولما جه تاني يوم دخلت ل ماما اوضتها لقيتها بتجهز ف قولت
_ علي فين؟
_ رايحه المستشفي
_ هتتأخري
_ هرجع علي الساعة تلاتة
_ طيب ما تحاولي تيجي بدري شوية
_ ليه
_ كنت بفكر نعزم خالي علي الغدا بدل ما يقعدوا لوحدهم
ابتسمت بمكر وقالت
_ نعززززمهم ، اه طبعاً نعزمهم طالما انت حابب كدة
_ ماما بطلي عبط
_ انا عبيطة يابن الهبلة
_ الاتنين واحد خدي بالك
_ طيب يا بيجاد افوقلك بس
_ طيب ايه هتيجي بدري ولا لا
_ ما هاجي بدري وهقولهم يجوا من دلوقتي لو تحب كمان
_ ماشي كلميهم
_ مستعجل انت ، مالك النهاردة
_ يا ماما لو سمحتي متقلبيش كل حاجه هزار انا بس بقول بدل ما يقعدوا لوحدهم يجوا يقضوا اليوم معانا
_ ولو انك بتقل ادبك عليه بس ماشي.. مقولتليش عملت ايه امبارح انت وفاطمة
_ روحنا وارجعنا
_ لا ياشيخ
_ وربنا
_ بيجاد هزعلك... احكيلي عملت ايه بالتفصيل انا امبارح مفضتش اقعد معاك
قولت بتنهيدة
_ مش عارف يا ماما بس المشوار مكنش لطيف.. حملني هم وخلاص
_ ليه
حكتلها كلام فاطمة ف قالت
_ دي بنت هبله.. كل الرجالة كدة عندك ابوك مبيحكيش حاجة انا بس اللي بحكي ، وتلاقيها حاسة بكدة بس علشان امها مش موجودة ولا ليها صحاب لكن هي كدة كل الرجالة
_ ماشي هو طبعه كدة كان عوضها عن غياب الام خلاها تصاحب بنات.. او كان جابها وجه... بصراحة هو ظلمها
_ وانت زعلان عليها ولا ايه
_ وانا ازعل لية ، بس حملتني هم
_ واضح انها ارتحتلك علشان تتكلم معاك في الكلام دة
_ لا وانتي الصادقة واضح انها متعرفش حد غير ابوها ولما لقتني في وشها حكتلي اللي متقدرش تحكيه لأبوها
قالت بإبتسامة
_ صح كلامك
_ ماما والله مبهزرش انا بجد حاسس بانها رمت حمل عليه
_ طيب ما دة حلو شيله معاها بقا
_ اشيله معاها
_ ايوة
قولت بتنهيدة
_ طيب يلا روحي ومتتأخريش ، ومتنسيش تكلميهم خليهم يجوا واهو تلاقي ناس تتعامل معاهم
_ هههههه إيه دة بقا حبيتها ولا ايه يا واد
_ طيب اقولك ايه... ورحمة ابوكي في حياتك شوفتي حد يحب واحدة مشافش عينها حتي
_ العين والشكل بيعجبوا بيه انما الشخصية بيحبوها
_ تصدقي انا غلطان اني بتكلم معاكي راجع اوضتي احسن
_ استني عندك
وقفت ف قالت بعد ما وقفت قدامي ومسكت ايدي
_ مالك انا بتكلم معاك ، لو حاسس انك ارتحتلها وفي شويه قبول انا ممكن اوريك صورتها وبحلفلك بالله انك اول ما تشوفها هتجري تطلبها من ابوها
_ لا... سيبيني بس دلوقتي وهنشوف الموضوع ده بعدين
_ طيب مفيش اي امل
_ فيه بس بردو اديني وقتي
قالت بإبتسامة
_ بجد في امل
_ والله انا ارتحتلها حاسس انها مش وحشة لكن بردو محتاج وقت علشان اخد قراري
_ وانا واثقة انها هتعجبك وانت بنفسك اللي هتيجي تقول جوزوهاني
_ يا مسهل ادينا هنشوف
_ ربنا يسعدك ياقلبي واشوف احسن عريس في الدنيا...
كملت بإبتسامة خفيفة
_ انا مش متمنية حاجة من ربنا غير اني افرح بيك انت واختك واشيل عيالكم وبعدها اموت مرتاحة
قولت وانا بحضنها
_ بعد الشر عنك ، ربنا يخليكي لينا .. انا بحبك قوي علي فكره
_ وانا كمان ياعمري ، ربنا يسعدك ويهنيك
_ يارب... يلا بقا اتأخرتي
بعد ما مشيت رجعت اوضتي اترميت علي السرير وخرجت الطرحة من تحت المخده ورجعت تتردد كلمة فاطمة في ودني
_ افرض شكلها بس اللي حلو..
عندها حق افرض شكلها بس اللي حلو في حين ان واحده تعتبر كاملة قدامي وكل الظروف سامحة اني اتجوزها .. ومش يمكن تطلع احلي..
احلي؟؟ .. شكلي بحلم.. مفتكرش في احلي من دي.. عنيها ، نعومتها ، شعرها ، شفايفها الوردية ، ثغرها.. كلها علي بعضها مظنش ان في واحدة خلقها ربنا اجمل منها
#فاطمة
كنت بفكر في كلام بيجاد عن اني اضغط علي بابا علشان اعرف كل حاجة وبعد ما اتشجعت خرجت من الاوضة وانا مقررة اتكلم معاه ولكن لما شوفته خارج من الحمام مرهق وبيسند علي الحيط خوفت عليه وآجلت اي كبلم لبعدين وبعد ما ساعدته يقعد واطمنت عليه قالي ان عمتي عزمانا علي الغدا وفوراً وافقت ، مكنتش حابة اروح علشان الغدا كنت حابه اروح علشان اشوف بيجاد وبس وروحنا وهو اللي استقبلنا لوحده وقعدنا في الصالة وطول الوقت كنت ملاحظة رغبته في توجية نظره ليه بس كان متردد ف كان يبصلي لثواني ويجري بعنيه وبعد ساعتين جت عمتي وقعدت معانا وزي المرات اللي فاتت حبت تفضيلنا المكان وبعد ما خدت بابا معاها المطبخ توجه ليه و قالي
_ كويسة النهاردة
_ الحمدلله كويسة كل يوم ، لية؟
_ أبداً ، بس شغلني كلامك امبارح
_ كلام إيه
_ اللي قولتيه عن باباكي
_ وشغلك ليه
_ انشغلت ... عملتي معاه إيه
قولت بعد ما ظهرت ابتسامتي
_ ولا حاجة
_ متكلمتيش معاه
_ لا
_ ليه
_ لقيته تعبان خوفت عليه
_ كنتي اتكلمتي براحه
_ لما احس انه كويس
_ اوكي يكون احسن بردو
_ متشكرة علي اهتمامك
_ علي ايه.. احنا اهل
_ اها
سكتنا شويه وبعدين قال
_ اشغلك التليفزيون
_ ماشي شغله
شغله ورجع قعد مكانه وقال
_ حابه حاجة معينه
_ اي حاجة.. انا مش متابعة حاجة محددة
_ اظن ان في امريكا كنتي بتسمعي عربي كتير؟
_ ايوه صحيح اغلب اللي كنت بسمعه كان مصري... قليل جدا لما كنا بنتفرج علي حاجات تانية
_ علشان كده
_ بتكلم مصري كويس يعني
_ اه كويس جداً محدش يصدق انك عيشتي في امريكا
_ بابا كان دايما يقولي امريكا حاجة وجوة البيت حاجة... كان عملي دولة جوة دوله مكنش يقبل بأي كلمة انجليزي.. كان كله عربي
_ واضح...
بهتت ملامحه وهو بيقول
_ وكنتي مبسوطة وسط كل الحاجات دي... الاسرار ، واعتزالك عن الناس.. وصنع دولة خاصة ليكي في بيتكم
_ كان ومازال في حاجات مكدراني بس الحمدلله عندي كتير يخليني احس بالسعادة... هي كده الدنيا محدش مرتاح فيها مية لمية.. ويمكن لو انا مش بركز قوي مع التفاصيل مكنتش الحاجات دي هتكون سبب يضايقني
_ صح... مش عايز احسد نفسي بس انا عمري ما حسيت ان في حاجة نقصاني.. كل حاجه في حياتي حلوة.. نفسي بقا اجرب الجانب الوحش
_ لييه ليه.. انت عارف ممكن يكون ايه الجانب الوحش لو ربنا استجاب مش يمكن اللي يحصل يوجعك
_ عندك حق.. بس بردو نفسي اجرب اشكي من تعب في حياتي
_ صحيح اكبر عدو للانسان هو نفسه هههههه
قال بإبتسامة
_ عندك حق.. الحمدلله ربنا يديم علينا فضله ووو..... ويسعدك
قولت بإبتسامة
_ امين
#هاجر
كنت بنضف المطبخ بعد الغدا لما سمعت جرس الباب ولأن ماما وبابا موجودين مروحتش افتح وبعد دقايق جت ماما تقولي بشر عاوز يسلم عليكي ف قولت من غير ما التفت ليها
_ مش فاضية
_ قولتله هندها روحي سلمي عليه وتعالي
سيبت اللي بعمله وقولت بعد ما توجهت ليها
_ لا يا ماما مش هسلم
_ ليه
_ انتي مش قولتي انسيه دي الطريقة الوحيدة لنسيانه... من فضلك ساعديني ومتخلنيش اشوفه
قالت بتنهيدة
_ عندك حق... طيب ياحبيبتي انا هقوله مش هتقدر
#بشر
طلعت امها تقولي انها مشغوله دلوقتي وبعدين هتطلعلكم فوق عمي اعترض وندة عليها تاني بس انا قولت خليها علي راحتها وبعد ما مشيت بعتلها رساله قولتلها فيها
_ طول عمرك بتزعلي وتتقمصي وتختفي وبردو بصالحك ومبملش مع انها بتكون اسباب تافهة ف تخيلي ممكن افضل اصالحك لامتي وازاي علشان سبب زي دة ، تدللي براحتك واختفي براحتك انا هفضل وراكي لغيت ما ترضي ياست البنات ... هو انا عندي كام هاجر.... بس متزودهاش قوي في الدلال والتقل عشان انتي بتقعدي في البيت لوحدك كتير واللي داق الشهد مرة بيحب يجربه تاني ، فهماني طبعاً
بعتها وابتسامتي علي وشي قبل ما تتلاشا لما شوفت اسراء و امها طالعين وبيبصوا يمين شمال بقلق ف اتقدمت ناحيتهم وقولت
_ خير يا جماعة في ايه
قالت امها بقلق
_ ريان مرجعش من امبارح
_ راح فين
قالت اسراء بدموع
_ منعرفش
_ طيب بتبكي ليه هيرجع
هزت دماغها ايجابا وصوتها ماسعفهاش ترد ف قولت
_ انا هدور عليه يمكن راح الشغل
_ مراحش بدر بيقول مراحش النهاردة
قالت كده ف لقيت بدر جاي يقول
_ مظهرش
قالت امها
_ لا ، حس ولا خبر... انا خايفه عليه قوي
قولت
_ متخافيش هيكون كويس.. انا وبدر هندور عليه لغيت ما نلاقيه يلا يا بدر
خدته ومشينا بالعربية وبقينا ندور عليه في كل مكان لغيت ما تعبنا من الف ف قال بدر بقلق
_ هيكون راح فين... الواد ده مش عارف اعمل فيه ايه
_ انت تعرف عنه حاجة
_ معرفش بس اختفائه دة اكيد وراه حاجة كبيرة.. والله ما مستبعد انه يكون مختفي بمزاجه
_ ليه
_ واد معقد وغم عاوز يدخل نفسه في حالة اكتئاب غصب
_ يا راجل هو في حد يحب يكئب نفسه... كان الله بالعون
#جويرية
اختفائه بعد اللي حصل شغلني قوي ومكنتش فاهمة هو اختفي بسبب كلامي ولا في سبب تاني وهل قاصدها ولا لا.. بقيت طول الوقت مهتمة اعرف اي جديد عنه لغيت ما جه بدر وطلب من بيجاد نقعد علي السلم وبيجاد وافق وهو مش راضي خالص وبالفعل قعدنا ف قولت بتردد
_ لقيتوه
التفت ليه مستغرب سؤالي بس جواب وقال
_ هه ، لأ لا ملقنهوش
كمل بتنهيدة
_ ومش عارف ممكن يكون فين دورنا عليه في كل حتة وملقنهوش.. انا قلقان عليه بجد
_ قلقان ليه
لتاني مره يستغرب سؤالي او مشاركتي ليه ولكن بردو رد وقال
_يعني ... قلقان علشان مش عارف هو راح فين.. الواد ده معقد طول الوقت قالبها غم دة مش بعيد يعمل في نفسه حاجة
_ وقالبها غم ليه
طال سكوته وهو باصصلي ف قولت
_ اكيد في سبب
قالت بتعجب
_ طبعاً في سبب كل حاجة في الدنيا ليها سبب حتي حالتك يا جويرية ، بس سيبك انتي ، حلو انك بتشاركيني حاجة بتحصل انا مندهش
_....
_ بهزر... اممم بس تفتكري إيه ممكن يخلي واحد يعتزل الناس كلها وفجأة يبعد
مكنتش عارفه ارد اقول ايه وفي نفس الوقت كنت عاوزه يتكلم اكتر علشان اعرف اكتر عن ريان ف قال بعد ما طال سكوتي
_ مردتيش
_ معرفش
_ طيب ومش عارفة نفسك بعيدة ليه
_ انا مش بعيدة ، انا بتكلم معاك اهو
_ اول مرة تحصل ، دي اعجوبة.... طيب نكمل ، وريان تفتكري اختفي ليه
سؤاله يبان انه شك فيه بس هو كمل في موضوع ريان لانه لقا مني مشاركة ف قولت من غير ما اهتم بأنه يلاحظ اهتمامي بيه
_ يمكن في حاجه مزعلاه وحب يقعد لوحده شوية بعيد عن الناس
ضيق عينيه وقال
_ امممم فعلاً كلامك صح
اعتدل في كلامه وقال بجدية
_ ريان من فترة كبيرة مر بتجربة بوظت حياته مع اهله وابوه بقا كارهه ، هو مقاليش بس انا لاحظت طريقته معاه
قولت سريعاً
_ علشان جرح اخته؟
قال باستغراب
_ جرح اخته! ، ايه خلي كلام زي دة يجي في دماغك
_ بتقول ابوه كارهه
شرد بعنيه يفكر وبعدين بصلي وقال
_ والله ممكن ، بس معرفش مجبليش سيرة انجرحت ازاي بس لا ريان ميعملهاش الا لو بقا مكنش حاسس بنفسه
_ ودي حاجه ميحسش بنفسه فيها؟
_ اه ده لو كان بجد عملها يعني... اصله من فترة هو كان.....
لتاني مره يقطع كلامنا دخول حد علينا والحد المرة دي كانت مليكة ولما شوفتها صبيت كل تركيزي معاها وقولت وانا بقوم واتجه ناحيتها علشان اخدها وندخل
_ تعالي
وزعت نظراتها بينا وقالت
_ مالكم ، شكلكم مش تمام ليه
قولت
_ ريان صاحبه ، اختفي فجأة مش عارفين ليه وهو زعلان عليه
_ ويزعل ليه وهو صغير دة راجل
قال بدر
_ راجل بس اختفي واجب نقلق
_ ولا واجب ولا حاجة دلوقتي يرجع
_ مزعلك قوي ريان انتي.. بس انا قولتلك انه مش بيقصد يقل ذوقه معاكي هي طريقته كدة
_ مش زعلانة ولا حاجة.. هو اه قليل الذوق بس عادي ولا يشغلني
قولت وانا حاسه بالنرفزة منها وندمانة اني آأتمنتها علي سر
_ وهو مضايقك ليه؟
قال بدر
_ بيعاملها برخامة
_ اها... طيب احنا هندخل
دخلنا البيت ومرينا ب بيجاد وبعد ما سلمت عليه خدتها ودخلنا الاوضه قفلت الباب علينا وقولت بنرفزة
_ كلمتيه ليه
_ هو مين
_ ريان
قالت بتوتر
_ كلمته ازاي يعني....
_ انتي فاهمه اقصد ايه ، ايه وداكي عنده وقولتيله إيه ، انا آأتمنتك علي سر فضلت مخبياه سنين وتيجي انتي عاوزة تكشفيه في لحظة علشان متضايقة منه
_ لا انا مقولتلهوش ولا حاجة انا روحت السايبر ماركت لقيته هناك واتكلمنا دة كل اللي حصل
_ ولمحتيله
_....
_ لمحتيله؟
خدت نفس عميق وقالت
_ اه لمحتله يا جويرية وبصراحة كنت هواجهه علشان ميحاولش يقربلك تاني...
_ ليه؟!! انا مطلبتش منك تدافعي عني .. انتي خلتيني اندم اني اتكلمت معاكي
_ انا حاولت اساعدك ، وانتي لازم تحكي اللي حصل انتي كده بتأذي الكل واولهم خطيبكم.. انتي مشوفتيش حبه ليه قد ايه ده جابله لاب توب وهو في المقابل بيغدر بيه وبيحاول يوصلك
نزلت دموعي وانا بقول بخوف ان بيجاد يسمعني
_ وطي صوتك بيجاد بره
قالت بتنهيدة
_ يا جويرية يا حبيبتي افهميني انتي مستحيل هتفهمي سبب للي عمله... لأن مفيش سبب غير انه شخص سادي ومش كويس... هتفضلي لأمتي مخبية وسيباه حر
_ لغيت ما اتشجع واقدر اسأله وش لوش
قالت بنرفزة
_ ماهو ااانتي لو سألتيه وش لوش مش هتسلمي من شره ، انتي ليه مصممه تلتمسيله عذر.. دة خوفك وجرحك وكان هيعتدي عليكي ويموتك لولا ستر ربنا
_ وطي صووتك بقولك... انتي مش فاهمة حاجة... هو كان قدامه فرصة تانية يعمل اللي عايزة بس معملش.. جه شالني نيمني علي سريري ومشي ، انا بس عاوزة افهم
_ واذا منفذش اللي في دماغه المرة دي ماهو ممكن ينفذ بعدين؟... انتي كده بتسمحيله يكرر عملته تاني وتالت
ديرت وشي عنها بعد ما عجزت عن اني الاقي رد لكلامها ف قالت بشك
_ ايوة ايوة ، ما تقولي انك بتحبيه وخايفة اهلك يعرفوا ف يتدبـ....
قاطع كلامها دخول بيجاد علينا وهو بيقول
_ ارجعوا قولوا اللي قولتوه كدة.. مين كان هيقتل ويعتدي... وعلي مين؟
وجه نظره ليه وقال وهو بيقرب ويقبض علي دراعي بعنف
_ دة العفريت اللي حلمتي بيه صح؟