رواية جوازة ميراث الفصل الخامس والعشرون25والسادس والعشرون26بقلم رانيا عماره
••وأول ما سامي عرف ان داليدا هتتجوز..وقع الحله والبرطمان من ايده على الأرض..ومشى بسرعه••
ام خالد(بصويت) :يالهوااااي...كسرت برطمان السمنه؟..ده انا بقالي 5 شهور بجمع القشطه من على وش اللبن!...يلا اهو خد الشر وراح
<عـنـد سـامـي>
••راح لأبوه الورشه وهو كله عصبيه••
ماهر:ايه مالك؟
سامي(بزعيق) :بقى داليدا هتتجوز؟؟..ماهي زحلقتني عشان تفتح سكه للي بعدي..وديني مانا سايبها..بقى انا اتساب عشان واحد تاني؟؟..ليه خرونج؟؟
ماهر(مستغرب) :وانت مين قالك انها هتتجوز؟..جيبت الكلام ده منين؟؟
سامي(بزعيق) :كله اتكشف وبان خلااص..ام خالد جابت قرارها..ماشي يا داليدا مبقاش انا سامي إن ما خليتك تتهني بالجوازه الجديده
<عـنـد دالـيـدا>
••راحت هى ورشاد وفريده معرض موبيليا••
فريده:السرير اللي هناك ده حلو اوي!
داليدا:ايوه فعلاً..ايه رأيك يا رشاد؟
رشاد:حلو اوي..انتوا عايزينه؟
داليدا:ايوه بصراحه ذوقه شيك اوي
رشاد:طب تعالوا نلف لفتنا يمكن يعجبك حاجه أحسن
داليدا:ماشي
••وطلعوا الدور اللي فوق..وكانوا بيلفوا يتفرجوا..لحد ماجالهم واحد من المكان••
_نورتونا
داليدا ورشاد:شكراً
_عندنا هنا أفضل انواع الخشب..زان وموسكي
رشاد:ايوه ماهو باين ان الشغل نضيف
_احنا شغالين في أنضف انواع..وكله من صناعتنا احنا يافندم
داليدا:معقول ده شغلكم انتوا؟
_ايوه طبعاً..احنا اللي بنصنع كل حاجه..هل حضراتكم عايزين حاجه معينه؟
رشاد:احنا بندور علي أوضة نوم وكنب عشان الريسيبشن
_تحبوا الكنب يكون أمريكي.. ولا مودرن ولا حرف L؟
داليدا:احنا الريسيبشن عندنا واسع ممكن أمريكي ونخلي حرف الـ L لأوضة النوم
رشاد:الأسعار عندكم ايه؟
_في بـ 5.100 يافندم..وفي بـ 5900 ده بالنسبه للكنب الامريكي..انما المودرن في بـ 3000 وطالع..وحرف الـ L بـ 5000 وطالع..و الانتريه العادي 4 كراسي بـ 30 ألف
رشاد:انا عايزك تجيبلي أحسن وأغلى نوع..عايز حاجه تعيش فتره طويله
_يبقى خشب زان يافندم..عمرك ماهتلاقي أحسن منه..سواء في صلابته او في مرونته او في قابليته للدهن بكل سهوله
وطبعاً عندنا زان أمريكي وتركي وروسي
رشاد:انت شوف الأحسن ايه واحنا معاك فيه
_اتفضلوا معايا هناك..هتلاقوا كل اللي انتوا عايزينه
••ولما راحوا معاه كان في حاجات أفخم••
رشاد: لا ده هنا الحاجات أحلى بكتير ماشاء الله
داليدا:الانتريه اللي هناك ده تحفه اوي.. هو بكام؟
_بـ 35 ألف يافندم
رشاد:طيب احنا عايزينه
داليدا:لا يارشاد..تعالى عايزاك!
••وخدته بعيد واتكلمت بصوت واطي••
داليدا:ده غالي اوي!..واحنا لسه هنجيب حاجات تانيه!
رشاد:وانا عايز أجيبه ياداليدا..وياريت متقوليش غالي دي تاني!..علشان انا كل مره بقولك وهفضل أقولك إن مفيش حاجه تغلى عليكي!
داليدا:خلاص انا مش هتكلم تاني..بس إفتكر ان انا نصحتك كتير وانت برضه مصمم!
رشاد:انا متقبل نصيحتك في أي حاجه إلا دي..علشان انتي عارفه كويس ان انا مش هقدر أجيبلك أي حاجه!..انا عايزك تكوني مرتاحه!
داليدا:انا مرتاحه من غير كل ده صدقني!
رشاد:علشان خاطري بقى يا داليدا متخلنيش ازعل منك!
داليدا:طيب خلاص اللي تشوفه
••ابتسملها رشاد وبعدين رجع للراجل تاني••
رشاد:خلاص احنا اتفقنا على ده
_تمام يافندم.. من الواضح كده انكم مخطوبين
رشاد(بيضحك) :ايوه فعلاً وفرحنا كمان 13 يوم ان شاء الله
_الف الف مبروك ليكم، ربنا يتمملكم على خير
رشاد:الله يبارك فيك
<يـوم الـفـرح>
••كان والد رشاد واقف في الفندق مع واحد صاحبه.. عازمه••
_مليون ألف مبروك ياساهر..عقبال ما تجوز مصطفى وسلمى
والد رشاد:الله يبارك فيك يا كارم وعقبال أولادك
_ههههه ان شاء الله
••وعند عائشه كانت هى وسلمى في الأوضه مع داليدا••
سلمى:ماشاءالله زي القمر ياداليدا
داليدا:يا حبيبتي انتي اللي قمرايه
فريده:داليدا ايه رأيك في الفستان بتاعي؟
داليدا:يجنن عليكي..هتتحسدي
عائشه:فريده زي القمر وأي حاجه بتلبسها بتحليها
داليدا:ربنا يخليكي ياطنط..ربنا ميحرمناش منك
عائشه:ولا يحرمني منكم ياحبيبتي..ده انا فرحانه فرح ومش مصدقه ان رشاد..ربنا عوض عليه بالسرعه دي
داليدا:انا اللي ربنا عوضني خير بـ رشاد..عمري ماكنت أتخيل ان عوض ربنا هيجيلي بالسرعه دي
سلمى:انتي ورشاد بجد لايقين على بعض اوي
داليدا:ياقلبي عقبالك
عائشه(بتضحك) :عقبال فرحة شهادة الثانويه العامه الأول وبعدين فرحة جوازها ان شاء الله
داليدا:ان شاء الله ياحبيبتي
••خبط الباب..راحت فريده تفتح لقيته رشاد••
سلمى:استنى متدخلش!
رشاد:يابنتي انا جاي آخدها هو ايه اللي متدخلش!
سلمى:استنى بقى متبوظش الفرست لوك..اقفي بضهرك يا داليدا!
داليدا(بتضحك) :حاضر
عائشه:لولولولولوي
••دخل رشاد بالبوكيه ووقف ورا داليدا..لحد ما لفتله..راح حاضنها••
رشاد:قمر ياداليدا..انا بجد مش مصدق ان كلها نص ساعه وتبقي مراتي!!
داليدا(بعياط) :وانا والله مش مصدقه!
••وبعد ماحضنها حضن مامته••
عائشه:الف مبروك ياحبيبي.. ربنا يسعدكم
رشاد:الله يبارك فيكي ياماما..ربنا يخليكي ليا
سلمى(بتحضنه) :ماشاءالله عليك يا رشاد..انا فرحانالك اوي!
رشاد:عقبالك يا سلمى
فريده:مبروك يارشاد
رشاد:الله يبارك فيكي..بتعيطي ليه يا داليدا؟
••ورجع حضنها تاني وكانت داليدا لسه بتعيط••
داليدا(بعياط) :بعيط من فرحتي ان انا بقينا مع بعض!
رشاد(بحب) :بحبك اوي ربنا يخليكي ليا
داليدا:وانا كمان
••وباس ايديها..وشدها وخرجوا..وبرا كانت أم خالد نازله من التاكسي..ومش قادره تمشي••
ام خالد:الأجره كام؟
التاكسي: ٣٠ جنيه
ام خالد(بزعيق) :٣٠ جنيه ليه؟..ده انا بركبه عندنا بـ ١٠!!
السواق:ياحجه انا مشيت بيكي ٢٠ كيلو..هاتي حق الأجره متعكريش مزاجي
ام خالد:خد..حرقوا نار في جتتك يابعيد
السواق:الله يسامحك انا مش هرد عليكي عشان انتي ست كبيره في مقام أمي
••وسابها ومشى••
ام خالد(بزعيق) :يانصابين ياحراميه هتروحوا من ربنا فين؟
••وبدأت تبص يمين وشمال بتدور على الفندق••
ام خالد:هو انا توهت ولا ايه؟..حوسه لأكون توهت ونزلت في مكان غلط!
••وبتبص لقيت فندق بعيد وفي ناس نازله من العربيات لابسين بدل وفساتين وداخلين جوا••
أم خالد(بتضحك) :لا متوهتش ولا حاجه.. الحمدلله..انا أصل فلوسي حلال..ليه هو انا كنت لسه هركب تاكسي تاني وياخد مني ٣٠ جنيه غير اللي الحرامي التاني خدهم؟..٣٠ جنيه على ايه؟ كان شايلني على ضهره؟..روح اللهي لا يكسبك ولا يربحك
••وبعد مادخلت كانت تايهه..لحد ما سألت واحد معدي••
ام خالد:بقولك يااستاذ الله يكرمك
_اؤمريني يا حجه
ام خالد:في فرح هنا لـ واحده اسمها داليدا بنت الحاج طاهر؟
_مش عارف بس اللي جوا ده لـ أستاذ رشاد ساهر
ام خالد:لا يبقى مش سكتنا..طيب ماشي شكراً
_العفو
••ودخلت القاعه لقيت فريده..لحد مافضلت تشاورلها••
ام خالد(بصوت عالي) :يا فريده...يافريده يابنت الحاج طاهر.. يافريده ياأخت داليدا...يافريده ردي عليا..يوه صوتي اتنبح!
••لحد ما فريده خدت بالها وجات وهى مستغربه••
فريده:ايه ده طنط أم خالد؟.. انتي جيتي ازاي؟..وعرفتي مكانا منين؟
ام خالد:ليه مكنتيش عايزاني آجي ولا ايه؟
فريده:لا مش قصدي انا بس مستغربه انتي جيتي ازاي ومحدش اتكلم قصادك في حاجه
ام خالد:خالتك ست محترمه وجدعه هى اللي عزمتني
فريده:اه طب كويس
ام خالد:هو ايه اللي طب كويس فين العروسه؟
فريده:داليدا جوا اهو.. تعالي معايا
••دخلت أم خالد مع فريده لقيت صابرين وغاده وعصام واقفين جنب داليدا••
صابرين:لولولولولوي
••ولما داليدا شافت أم خالد استغربت! ••
داليدا:ايه ده ازيك ياطنط؟
••راحت أم خالد مقربه من داليدا وحضنتها وباستها••
ام خالد:الف مبروك يا داليدا يابنت الغاليه..الله يرحمك يا منى كانت هتفرح بيكي اوي وانتي عروسه زي القمر كده
داليدا:انتي عرفتي مكاني منين؟
ام خالد:خالتك عزمتني
داليدا:اه طب اتفضلي اقعدي.. خديها هناك يا فريده
ام خالد:مش نسلم على العريس الأول؟..ازيك ياعريس؟
رشاد:الحمدلله
داليدا:دي جارتي..اسمها أم خالد
رشاد:اهلاً بيكي
ام خالد:الله يخليك ماشاءالله لايقين على بعض مش زي الموكوس سامي
فريده:تعالي ياطنط ارتاحي
ام خالد:نيجي.. منجيش ليه؟
داليدا:بتعزميها ليه ياخالتوا؟
صابرين:وقعتني في الكلام والله وفرضت نفسها علينا مكنش ينفع معزمهاش..كان هيبقى شكلنا وحش
المأذون:يلا بسم الله نبدأ..إن الحمد لله نحمده ونستعينه ونستغفره, ونعوذ بالله من شرور أنفسنا ومن سيئات أعمالنا من يهده الله فلا مضل له, ومن يضلل فلا هادي له, وأشهد ألا إله إلا الله وحده لا شريك له, وأشهد أن محمدا عبده ورسوله صلى الله وسلم عليه وعلى آله وصحبه أجمعين
<عـنـد شـادي>
••نزل أجازه في البلد عندهم..وكان قاعد قصاد بيتهم بيشرب الشاي..وبيفكر في مايا..ونفسه انه يصارحها باللي في قلبه ولكن خايف من رد فعلها••
شادي:مانا لو كلمتها ممكن تقولي احنا اخوات ولا حتى صحاب!..ويبقى شكلي وحش قصاد نفسي!..وأخاف توافق يقوم ضياء حاططني انا وهى في دماغه ويمسكلي ايدي اللي بتوجعني..طب ولو وافقت هجيبلها طلباتها منين؟..ده انا اللي باخده من ضياء بيتصرف على أبويا وأمي واخواتي!..ولا هترضى بعيشتنا دي؟..ولا هتحط راسها في العالي إكمنها هى وأهلها أغنيه..ولو هى وافقت هل أهلها هيوافقوا اصلاً؟..طب ماتطلع الحوار ده من دماغكم وتشوفلك واحده من أهل بلدك..طيب تخسر حبك؟..اعمل ايه انا اعمل ايه؟؟
••لقى امه جايه..وكانت ست غلبانه على قد حالها••
أمه:ايه يابني جيبت مفتاح الدار؟
شادي:هقوم أجيبهولك..بس كنت عايز اقولك حاجه
امه:حاجة ايه؟
••وقعدت جنب منه وهى بتأكل البط••
شادي:مش عارف اقولك ايه...بس انا في واحده زميلتي معجب بيها ومش عارف اتصرف
امه:لا ياحبيب أمك..قولنا بنات برا العيله لا..احنا متفقين مع عمك مصيلحي من وانت في اللفه..والناس موافقين ومرحبين وطلباتهم مش كتيره علينا!
شادي:بس انا مش عايز اتجوز بالطريقه دي!!
امه:طريقة ايه؟
شادي:لا انا بحبها ولا هى بتحبني يبقى ليه جواز من أصله؟
امه:الحب بيجي بعد الجواز..ياما ناس اتجوزت عن حب وفي الآخر اتطلقوا بعد فضايح مابينهم
شادي:افضلي قولي كده بقى الحب بيجي بعد الجواز!.. الحب مبيجيش بعد الجواز.. ولو محبتهاش من أول ما شوفتها يبقى عمر ما هيكون في حب!
امه:سيبك من كلام الافلام ده..احنا عاوزين مصلحتك
••راح شادي قايم وهو متعصب••
شادي(بزعيق) :مصلحة ايه اللي عايزينها؟..تدبسيني في واحده لا بحبها ولا بتحبني وتقوليلي مصلحتي؟..ده انا شايل البيت ده فوق كتفي وبنفذلكم طلباتكم! تيجوا عند طلبي انا وتقف؟.. هو شادي حلو بس وقت دفع الفلوس؟.. لكن كخه وزفت يوم مايحب يفرح زي بقيت الناس؟
امه(بزعيق) :متعليش صوتك ياواد انت!!..عاوز الناس تاكل وشنا؟.. بقى بتقل من ابوك وامك قصاد الناس؟
شادي:انا مش فاهم ايه الحكمه من انك تحجزي عيلين لسه في اللفه لبعض؟..انتي ايه ضمنك انهم لما يكبروا هيعوزوا بعض؟ ولا هيكون في وفاق مابينهم؟..ولا هتفرحي لما اتجوز وبعد شهر جواز أطلقها تاني؟
امه:معندناش حد يطلق..الطلاق ده مش في قاموسنا!
شادي:انشالله عنه مابقى في قاموسكم!.. كفايه ان ربنا حلل الطلاق وأباحُه!!.. ولا احنا هنعمل دين جديد على مزاجنا؟
••قربت أمه منه وضربته بالقلم..بصلها بصدمه وبعدين سابها ومشى في سكات••
<عـنـد صـفـاء>
••كانت خطوبتها بعد فرح داليدا بيوم واحد..وبيجهزوا في البيت..وكانت صفاء واقفه مع أمها في المطبخ بيجهزوا المحشي••
حسناء:قورتي الكوسه والبدنجان؟
صفاء:بعملها اهو.. انا مش فاهمه عروسة ايه دي ياربي اللي واقفه تعمل بنفسها؟..ده بدل ماتجيبي حد يعمل بدالي وانا اقعد برنسيسه يادوب أجهز للخطوبه وبس؟
حسناء:ياهبله وفري الفلوس اللي هياخدوها..وبعدين هو المحشي بياخد ايه يعني؟..ده انا مسبكه الطماطم ومقطعه الخضره..يادوب هغسل الرز وأنزل عليهم..والشوربه على النار اهي
صفاء:مانتي عارفه ان انا مبحبش المحشي..انا عامله دايت
حسناء:دايت ايه ونيلة ايه ده مفيش أحلى من صوباع الكوسه ولا البدنجان..ولا بقى ورق العنب..اما قوليلي عايزه الجلاش محشي لحمه مفرومه ولا فراخ؟
صفاء:يانهار اسود واحنا هنلحق نعمل كل ده النهارده؟.. خدي بالك انا آخري معاكي النهارده..وبكرا مش هكون فاضيالك..ده انا من أول مااصحى لحد آخر اليوم هيبقى ورايا مليون حاجه
حسناء:لولا ان خالتك مش فاضيه النهارده مكنتش اتحوجت ليكي..بنات آخر زمن
صفاء:مااشي ياماما شكراً
••رن موبايلها صفاء فا راحت ترد••
صفاء:الو يازينه ياحبيبتي
زينه:افتحى الباب انا واقفه تحت مع ماما
صفاء:انتوا جيتوا بجد؟
زينه:وانا اقدر افوت حاجه زي دي..يلا افتحي الا معانا شيل
صفاء:حاضر انا جايه اهو.. سلام
حسناء:في ايه؟
صفاء:اهو حظي جالي من السما..زينه والحاجه جليله وصلوا..جايين يساعدونا
حسناء:طب ده كتر ألف خيرهم..عقبال زينه بنتها
••خرجت صفاء وفتحت الباب وشالت منهم لحد ما دخلوا••
جليله:لولولولولولولولوي..مبروك ياعروستنا
صفاء:الله يبارك فيكي ياطنط..تعالوا..شايلين كل ده ليه؟
زينه:كله يهون عشان عيونك ياصفصف
صفاء:طب والله يازوزا بحبك
حسناء:يااهلاً وسهلاً..ازيك ياجليله ياحبيبتي؟
••وقربت تسلم عليهم••
جليله:الحمدلله ياام العروسه..ده احنا قولنا لازم نيجي بنفسنا نساعدك..ده انتي الله يكون في عونك وراكي كتير
حسناء:ربنا مايحرمني منكم ابداً
جليله:يارب
حسناء:تعالوا خشوا المطبخ
••دخلت جليله مع حسناء..وزينه كانت بتدور على سامي••
زينه:امال سامي فين؟
صفاء:مش هنا.. كنت متأكده انك هتسألي عليه
زينه:حاسه بيا..وبالي في قلبي..ده انتي لو دخلتي جوا قلبي مش هتلاقي غير سامي
صفاء:ههههه سبحان الله.. اخويا سامي لقى اللي تحبه..ربنا يهديكم ياحبيبتي ونفرح بيكم قريب
زينه:يااارب
<عـنـد دالـيـدا>
••بعد ماالمأذون خلص صيغة عقد القرآن..كانوا بيمضوا على قسيمة الجواز بالكربون..وبعد ماخلصوا قام رشاد وحضن داليدا وكان هو وداليدا بيعيطوا دموع الفرح..وكل المعازيم متأثرين باللحظه الجميله دي ••
المأذون:ربنا يباركلهم في حياتهم ويجعل الجاي خير عليهم
عائشه:ياااارب
صابرين:لولولولولولوي
سلمى:خلاص بقى كفايه عياط!
••قربت سلمى وفريده من رشاد وداليدا وحضنوهم..والمأذون قام وسلم على جوز خالة العروسه وأبو العريس••
أبو رشاد:الله يبارك في حضرتك.. اتفضل
••وخرج ورا المأذون من باب القاعه..وكانت فريده حاضنه أختها وبتعيط..لحد ماالفرح بدأ..والمغني وقف يلقي كلماته••
المطرب:إوعدني جنبي تعيش..ولا ليلة تنساني..وليك عليّ أعيش وأموت...يا حبيبي وأنا وياك...إوعدني ما تسبنيش
ولا حتى لثواني...ده عمري كله هيسوى إيه...لو يوم مكنش معاك
عائشه(فرحانه) :قمر قمر..فرحانه اوي.. عقبالك يامصطفى ياحبيبي
مصطفى:ان شاء الله
••ووقت الرقصه السلو على الأغنيه..كانوا كلهم بيصوروهم..وداليدا ورشاد كانوا في عالم تاني خالص!••
رشاد:بحبك
••ضحكت داليدا..لحد ما رشاد شالها ولف بيها وكلهم كانوا بيسقفوا وتعالت الأصوات مابين الأغاني والزغاريد••
فريده:سلمى بقولك ايه ماتيجي تصوريني برا
سلمى:حاضر يلا بينا
••خرجت فريده وسلمى..ووقفت بعيد تصورها..وهى واقفه تتصور شافت سامي نازل من تاكسي وجاي ناحيتهم!..برقت وخافت!..ومكنش في اي بتعملها غير انها باصه ناحيته..ولما قرب..جريت فريده وقفت قصاده••
فريده(بزعيق) :انت داخل فين؟؟
سامي(بيزقها) :وسعي كده انا جاي أبارك لـ بنت عمي الغالي..وسعي يابت من قدامي
سلمى:مين ده يافريده؟
فريده(بزعيق) :ده الحيوان اللي داليدا كانت متجوزاه
سامي(بزعيق) :اوعي يابت من وشي..بدل مااقتلك في مكانك
فريده(بصويت) :مش هتدخل!!
••وكانت بتقاوم هى وسلمى انه ميدخلش القاعه لحد ما زقهم ودخل..ولما دخل كان باصص على داليدا وهى بترقص مع رشاد بنظرة شر..لحد ما قرب منهم..وابتدا يزعق..وبعيد كانت فريده واقفه حاطه ايديها على بؤها من الخوف••
سامي:الاستاذه داليدا..اللي واقفه قدامكم دي كانت ماشيه معايا في الحرام..ولما حصل اللي حصل اتجوزتها أستر عليها بعد ما باست ايدي ورجلي عشان اتجوزها..ولما لمؤاخذه يعني في الكلمه..حملت فا قولتلها تنزل العيل عشان القيل والقال وقولتلها بصي يابنت الحلال انا هتجوزك شهر وهنطلق وكل واحد يروح لحاله..وحصل وراحت لل...
••راح رشاد ماسك في سامي والمشكله ابتدت تولع حريق🔥••
داليدا(بصويت) :كدااااب والله العظيم ماحصل والله ماحصل
والد رشاد(بزعيق) :انت مين؟؟.. وايه اللي جابك هنا!!
سامي(بزعيق) :عامله نفسها الخضره الشريفه وهى ماشيه مع نص شباب البلد وعامله معاهم اللي مايتعمل..دي بتتأجر بالساعه..ده انا كنت ناوي اكمل معاها بس لما اتفضحت قدامي..الدم غلى في عروقي ورجولتي نقحت عليا وطلقتها امال اكمل معاها بعد اللي عملته؟؟
داليدا(بصويت) :والله العظيم ماحصل...والله ياطنط ماعملت حاجه!
ام خالد(بخوف) :ياريتني ماقولتله!
فريده(بزعيق) :انت كدااااب وكل اللي قولته محصلش!..سامى اتجوز داليدا غصب وكان بيضربها وبيهينها ولما اتطلقت منه بقى عايز ينتقم منها!
رشاد(بزعيق) :داليداااا لااااا....داليدااا لا... ياكلب ياابن الكلب... يازبااااله
••وضرب سامي ووقعه على الأرض وكانوا هما الاتنين بيتخانقوا وداليدا والمعازيم بيسلكوا مابينهم..ووالد رشاد اتصل بالشرطه بعد ما عجنوا سامي ضرب..وداليدا كانت منهاره وبتصوت وتلطم من الكلام اللي اتقال عليها! ••
داليدا(بصويت) :ااااه....اااه...والله ماحصل... حسبنا الله ونعم الوكيل فيك ياسامي.. ربنا ينتقم منك.. بتغلط في عرضي وشرفي بعد كل الذل اللي شوفته معاك!!... مش مكفيك اللي عملته!!... والله ماعملت حاجه والله كدب!!....ياااااارب..ياارب
فريده(بعياط) :اهدي ياداليدا.. ربنا ينتقم منك ياسامي!
••لحد مالشرطه جات وخدت سامي ومن كتر الضرب اللي خده مكنش قادر يتكلم كلمه••
<فـي الـقـسـم>
••كان رشاد وأبوه وعصام وسامي..وناس تانيه شهود على اللي حصل••
رشاد(بزعيق) :تفتحلي محضر سب وقذف دلوقتي حالاً..والله العظيم ماهسكت على اللي حصل ده..داليدا خط أحمر.. ده انا هندمك على اليوم اللي شوفتني فيه!!!
الظابط:اهدي عشان نفهم اللي حصل
والد رشاد:النهارده فرح ابني رشاد..جه الحقير اللي برا ده.. انا معرفش ده مين ولا ايه نظامه المهم..وابتدا يهفلط بكلام وحش في حق مرات ابني..كلام خطير دي جريمه ازاي يطعن في شرفها بالشكل ده؟؟
الظابط:ايه اللي هو قاله؟
والد رشاد(بتردد) :والله هو كلام ميتقالش بس انا هقولك
<عـنـد دالـيـدا>
••كانت قاعده في اوضتها في الفندق بتعيط عياط هيستيري..وحواليها أختها وسلمى وعائشه وغاده وكام بنت من المعازيم••
عائشه(بحزن) :والله يا داليدا انا عارفه انك معملتيش أي حاجه من اللي قالها..احنا واثقين فيكي وعارفين انك متربيه وطالعه من بيت محترم!
صابرين:والله العظيم ومش هى علشان بنت اختي لالا!..داليدا من صغرها وهى بميت راجل ومحدش يقدر يضحك عليها بكلمه!..دي بنت جدعه وغلبانه..والدنيا ياما جات عليها..دي بنت اختي وانا عارفاها كويس!
غاده:ليه يإذيكي ويبوظ عليكي يومك؟..كل ده علشان ايه؟
داليدا(بتعب) :عمري ماهسامحك يا سامي..جيت عليا كتير وأذتني..ليه كل ده وعلشان ايه؟.. علشان اترفضت؟.. وايه يعني؟..هو الجواز بالعافيه!.. أحبك بالعافيه واتجوزك بالعافيه يااما تموتني بقهرتي؟
فريده(بتحضنها) :مهما يعمل هو في الآخر مش هيروح من ربنا..هيجي يوم وربنا هينتقم منه!
صابرين:اسمعي كلام اختك.. ده كما تدين تدان ياحبيبتي!.. هو غلط في شرفك وقال كلام محصلش اه! بس تفتكري ان ربنا هيسيبه؟..والله ابداً ده ربنا بيقول(وعزتي وجلالي لأنصرنك ولو بعد حين)..مهما يمشي يفسد في الأرض ويإذي خلق الله ب أفعاله وأقواله فا هو كده بيزود سيئاته وحسابه بيتقل عند ربنا..علشان يوم ما هيتعاقب هيكون عقابه شديد اوي!
عائشه:صح عندك حق..اهدي ياحبيبتي انا عارفه اللي حصل صعب ومفيش حد يستحمله بس احنا ورشاد عارفين كويس انك متعمليش كده..وعارفين ان ابن عمك انسان شر مبيتقيش ربنا في بنات الناس..بكرا يقعدله في أخته ده كله سلف ودين!
داليدا:صح عندكم حق وانا بقى مستنيه حقي من ربنا..علشان انا عمري ماأذيت حد ولا جيت ناحية حد انا طول عمري في حالي ورغم كده الناس مش عايزه تسيبني في حالي!.. الله يرحمك يابابا انا من بعدك ضهري اتكسر والدنيا جات عليا!
عائشه:ربنا يرحمه ويغفرله انا عارفه ان مفيش زي الأب..بس رشاد ابني مسكتش!..وشوفتي عمل ايه علشانك!..رشاد مبيستحملش نص كلمه عليكي ياحبيبتي!
داليدا(بعياط) :وانا هقدر أبص في وشه ازاي بعد اللي اتقال عليا؟..تفتكري هيبقى ليا عين؟
••راحت عائشه رافعالها راسها••
عائشه:راسك دي تفضل مرفوعة دايماً مادام معملتيش أي حاجه غلط!..صاحب الحق عينه قويه!.. وانتي صاحبة حق يبقى متخليش حد يأثر عليكي!..اتفقنا؟
داليدا(بعياط) :حاضر
••قربت منها عائشه وحضنتها وهى لسه بتعيط••
عائشه:ياحبيبتي يابنتي
<عـنـد مـاهـر>
••كان طالع على سلم عمارة بيتهم..لقى الموبايل بيرن••
ماهر:الو ياسامي
سامي(بتعب) :تعا.... تعال..تعالى القسم
ماهر:ماتتكلم بصوت واضح انا مش فاهم حاجه
سامي(بتعب) :انا اتضربت وممسكوك في القسم
الفصل السادس والعشرون
ماهر(بصدمه) :يانهار اسود ومنيل بستين نيله..ايه اللي حصل؟؟
سامي(بتعب) :انا... في....انا في قسم...
ماهر:قسم ايه كمل!
سامي(بتعب) :انا في نقطة شرطة الجزيره اللي في الزمالك
ماهر:يخربيتك وانت ايه اللي وداك هناك؟؟
سامي(بتعب) :تعالى..انا.. انا مستنيك
••والخط اتقفل!..راح ماهر نازل تاني وراح القسم••
ماهر:ايه اللي حصل؟؟؟
الظابط:ابنك طعن في شرف داليدا طاهر وقال عنها كلام محصلش!
ماهر:طعن في شرفها ازاي؟
الظابط:عرف ان فرحها النهارده وقرر انه يروح يبوظ عليها الليله..واحنا فتحناله محضر، وبكرا هيتحول للمحكمه ولحظكم الحلو ان أستاذ ساهر..معرفه ليا والصراحه هو راجل محترم ومكنش يستاهل منكم اللي حصل ده
ماهر(بزعيق) :الله يخربيتك وديتنا في داهيه بسبب عمايلك..طب ياباشا الله يسترك مانحل الموضوع ودي مابينا وكان الله بها
الظابط:مفيش مشكله نسأل أستاذ ساهر وأستاذ رشاد ونشوف...دخل أستاذ ساهر وأستاذ رشاد يابني
_اوامرك
••خرج العسكري وندهم لحد ما دخلوا وكان رشاد مغلول من سامي وباين على وشه العصبيه••
الظابط:الحاج عايز يحل الموضوع ودي..رأيكم ايه؟
ماهر:ده عيل مترباش..ودي غلطتي ان انا معرفتش أربيه..هو اه يستاهل بس ياباشا ده خطوبة أخته بكرا والناس لو عرفت هتاكل وشنا
رشاد(بزعيق) :انا مش هسيب حق داليدا..لما كلب زي ده يغلط في شرف مراتي اللي شايله اسمي!!.. يبقي يستاهل القتل مش الحبس وبس!..لو سمحت يا هلال باشا..انا عايز اعمل محضر بعدم التعرض.. لان اللي زيه مبيحرمش
الظابط:عارف يا سامي...لا بصلي وانا بكلمك!!
سامي:اوامرك
الظابط:لو قربت من داليدا مره تانيه انا هحبسك وهتترمي هنا لحد ماالمحكمه تحكم..وهيحصل حاجات وحشه اوي انت متتخيلهاش..فا تحترم نفسك وتبطل فرك..أستاذه داليدا مش عايزاك وعلاقتكم ببعض كان محتم عليها الفراق لانك لا انت شبهها ولا هى شبهك.. ومش هتكلم كتير ياتلم ابنك ياحاج يااما هيضيع من عمره سنين جوا السجن
ماهر:حاضر ياباشا انا هربيه لما أرجع..بس الله يكرمكم الموضوع يتحل ده الواد خطوبة أخته بكرا
ساهر:انا لا يمكن اتنازل عن المحضر ده واللي غلط يستحمل نتيجة غلطه
رشاد(بزعيق) :خليك هنا عشان تحرم تقرب مني انا وداليدا..داليدا بالنسبالك صفحه وانتهت وعمرها ماهتتفتح تاني..وعلفكرا انت اللي فتحت على نفسك أبواب جهنم
الظابط:حقهم بصراحه..انا مقدرش ألغي المحضر إلا لو هما اللي طلبوا
ساهر:متشكر ليك يا هلال باشا..واتمنى اننا نشوف بعض دايماً في الخير
الظابط:اتشرفت بوجود حضرتك يااستاذ ساهر وحقيقي زعلت على اللي حصل
ساهر:قدر الله وما شاء فعل
ماهر:استنى بس ياحاج..خلينا نتكلم كلمتين
ساهر:يلا يا رشاد
••وخرج هو ورشاد و ماهر لسه بيتكلم معاهم••
ماهر:يااستاذ استنى خلينا نحل الموضوع مع بعض من غير شوشره ده الواد خطوبة اخته بكرا.. عقبال عندك ياباشا
الظابط(بزعيق) :مش عايز وجع دماغ..ياعسكري
••جه العسكري••
الظابط:خده على الحجز
••العسكري خد سامي ومشى••
الظابط:لو كنت ربيت ابنك مكنش حصل كل ده!
<عـنـد صـفـاء>
••كانت قاعده في الأوضه هى وزينه..بتعملها وشها••
صفاء:براحه ياختي الفتله بتوجع
زينه:ايه كل الشعر اللي في وشك ده..انتي معملتيش وشك بقالك سنه؟
صفاء:لا ياحبيبتي انا قولت استنى لحد قبل الخطوبه بكام يوم واعمله عشان يطلع من جدوره..أصل لو كنت عملته بدري كان طلع صغير ومرضاش يتشال
زينه:خبره ياصفصف
صفاء:امال..بس اما قوليلي..انتي حبيتي ايه في سامي أخويا؟
زينه(بتضحك) :حبيت فيه كل حاجه..سامي بحسه أسد..سيد الرجاله كده..هو ده اللي أقدر أتحامى فيه..ولا صوته وكلامه بقى يالهوي يانا..كلامه دوبني
صفاء(بتضحك) :شوفي اهو اه اخويا.. بس عمري ماشوفت فيه اللي بتتكلمي عنه ده..انتي متأكده انك بتتكلمي عن سامي؟
زينه:طبعاً ماهو انتي متحسيش باللي بقوله ده لانك اخته..طب مانا جمال أخويا نفس الحوار لو واحده حلفتلي انه فيه مميزات الدنيا ماهصدق..أصل الحاجات دي تتحس بالمشاعر
صفاء(بتضحك) :ده احنا زي بعض بقى هههههه
زينه:أمال ايه..هو انتي يابت أختي وانا معرفش؟
صفاء:هههه لا بس كان نفسي..ده انا لو كان عندي أخت زيك كانت حاجات كتير اتحلت
زينه:خلاص اعتبريني اختك من هنا ورايح
صفاء(بتضحك) :خلاص اتفقنا
••و في المطبخ كانت حسناء وجليله بيجهزوا الأكل••
حسناء:عقبال بنتك زينه كده ان شاء الله
جليله:الله يخليكي ياحسناء..ده يوم المنى
حسناء:ياختي متخافيش كله مكتوب عند ربنا بس اهو كله بيجي في وقته المناسب
جليله:بيني وبينك ياحسناء انا مش عارفه هجهز زينه منين..ده الحال مايل..وجهاز العرايس دلوقتي بيتكلف شئ وشويات
حسناء:سيبيها على ربنا ده كله بيجي بـ رزقه..منين ماتقولي ياجواز هتلاقي نصيبها جالها لحد عندها
جليله:على رأيك..ده يا مخلفه البنات يا شايله الهم للـ ممات
حسناء:معلش كله يهون عشانهم
جليله:ربنا يعينا
حسناء:يارب
<عـنـد شـادي>
••كان واقف قصاد الأرض الزراعيه..وبيبص للسما..زعلان على نفسه!..لحد ما حس بـ حد وراه..ولما بص لقاها أمه••
أمه:واقف هنا ليه؟..كده سايبني في الدار وحدي؟
شادي:____________
أمه:كده ياشادي تزعل أمك منك؟
شادي:وانا زعلتك فين؟..ده انتوا كلكم اللي زعلتوني وقهرتوني!
أمه:ياابني..علي قد لحافك مد رجليك..وبعدين انا حاسه انك اللي عاوز تتجوزها دي مش من توبنا..لا شبهنا ولا زينا
شادي:عادي انا مش عايز اتجوز..عارفه انا عايز ايه؟.. انا عايز أدب سكينه في قلبي وأخلص..دي مابقتش عيشه..حتي أقل حاجه عايزها واقفينلي فيها زي العقده في المنشار
••سكتت أمه شوي وبصيت للسما ورجعت اتكلمت••
امه:اللي عاوز تتجوزها دي اسمها ايه؟
شادي:وهتفرق معاكي في ايه لما كده كده مش هتجوزها؟
امه:طيب ولو أمك وابوك وافقوا..هترضى تقولي اسمها؟
شادي:وانا ايه ضمني انكم هتوافقوا اساساً
امه:اعتبرنا موافقين يا شادي بس قولي وريحني
شادي:اسمها مايا
امه:وهى تعرف انك عايزها؟
شادي:لا متعرفش مانا لسه متكلمتش
امه:قولها ولو وافقت عرفنا
شادي:ربنا يسهل
••طبطبت أمه على ضهره ومشيت وهو لسه باصص للسما••
شادي:يااارب
<عـنـد رشـاد>
••رجع الاوتيل هو وساهر..وقف ساهر على باب أوضة داليدا..ورشاد دخل..وجوا كانت عائشه وفريده وسلمى وصابرين وغاده..كانت فريده حاضنه أختها وباين الحزن والتعب على وش داليدا..قرب رشاد منها في صمت وشدها لحد ما وقفت قصاده وهى وشها في الأرض..راح رافع راسها••
رشاد:ابن عمك خد جزاؤه..ودلوقتي في الحبس..وقريب الموضوع هيتحول لـ قضيه وهيتسجن..انا مش عايزك تزعلي ولا تخافي من أي حاجه طول مانا معاكي..انا واثق فيكي ياداليدا ومصدقتش ولا كلمه من اللي اتقالت..لانه لو انسان محترم مكنش حصل منه كل ده..ابن عمك طالع من بيت حقير ميعرفش يعني ايه اخلاق وأدب وتربيه!..وكفايه ان ربنا نجدك منه وبعدتي!..علشان تروحي للي يصونك ويقدر قيمتك!.. ممكن يا داليدا ترمي اللي حصل ورا ضهرك وتبدأي صفحه جديده؟..هو خلاص مش هيقدر يقرب ناحيتك تاني!
داليدا(بعياط) :هبص في وشك ازاي بعد مااتغلط فيا وفي حقي؟..حتى لو مظلومه فا مبقاش ليا عين!..طب بلاش انا.. انت هتبص ازاي في وش قرايبك بعد اللي اتقال عليا؟..انت هتفضل تعاني من كلام الناس طول مانا موجوده في حياتك!
رشاد:اوعي تتكلمي الكلام ده تاني.. فاهمه؟..انا ميهمنيش الناس ولا يهمني حد. انا يهمني انتي وبس!.. وانا مش هفرط في أكتر واحده حبيتها علشان كلام الناس!.. كلام الناس ده تحت رجلي!
عائشه:اسمعي كلامه يا داليدا ياحبيبتي ومتخليش اللي حصل ده يأثر على حياتكم!..احنا عايزين نفرح بيكم!.. ده انتوا بقالكم مده بتحلموا باليوم ده.. ويوم مايجي تتنكدوا؟
داليدا(بعياط) :غصب عني ياطنط..محدش بيحب الزعل ولا كسرة النفس..انا زي أي واحده عايزه تفرح..وفجأه طلعلها الزعل من تحت الأرض..انا كل مااجي افرح بفشل!..كأن الدنيا دي حالفه ماتخليني افرح!
عائشه:هتفرحي والله هى مسألة وقت مش اكتر!
صابرين:افرحي ياداليدا وانسي اللي حصل وهو فوضي أمرك فيه لـ ربنا..يلا ياحبيبتي
فريده:روقي يا داليدا صدقيني مش هيقدر يقربلك تاني ده اتعجن عجن تحت ايد رشاد والبودي جاردات لحد مابقى شبه العجينه هههههه
سلمى(بتضحك) :يستاهل..حد قاله يقرب مننا؟
عائشه(بتضحك) :هههه شوفتي بقى ياداليدا؟..ده هيحرم يقرب ناحيتك تاني
رشاد:هو مش هيقرب لمليون سبب..أولهم العلقه المحترمه اللي كلها..ومحضر بعدم التعرض.. ده غير السجن اللي هيلبس فيه شوفي حصله قد ايه بسبب شره؟
داليدا:مش قادره انسى اللي حصل..مش هقدر!
رشاد:لا هتقدري..وهو كان عايز يحرق دمنا في يوم مهم زي ده بس مش هيعرف!!..هو أكيد الواحد مدايق بس نحاول كلنا
فريده:يلا يا داليدا متخلنيش ازعل منك!
سلمى:انسي اللي حصل وافتحوا صفحه جديده سوا!
عائشه:حياتكم هتبتدي من اللحظه دي متخليش اي حاجه سلبيه تأثر عليكم!
••ولما داليدا حسيت بدعم اللي حواليها، ابتسمت!..لحد مارشاد خدها من ايديها وخرجوا وكلهم خرجوا وراهم لحد مارجعوا البيت وداليدا ورشاد وصلوا شقتهم••
عائشه:لولولولولولوي
صابرين:ربنا يفرح قلبهم يارب
عائشه:يارب
رشاد:ادخلي يا فريده
عائشه:لا فريده هتبات مع سلمى..انتوا ياحبايبي عرايس جداد..ومحتاجين تقعدوا لواحدكم..استمتعوا بوقتكم يا داليدا وانسوا اللي حصل
داليدا:حاضر هحاول
••راحت صابرين مقربه من داليدا وحضنتها••
صابرين:خدي بالك من نفسك ياحبيبتي واحنا ان شاء الله هنيجي بكرا نتطمن عليكم
داليدا:حاضر ياخالتو
غاده(بتحضنها) :مبروك ياحبيبتي
داليدا:الله يبارك فيكي
صابرين:لولولولولوي
••وخدوا نفسهم ونزلوا..ورشاد وداليدا دخلوا أوضة النوم..قرب رشاد منها وحضنها وكانت داليدا بتعيط وصعبان عليها نفسها اوي وحاسه بالضعف والمذله••
رشاد(بحب) :حقك عليا انا هاتيها فيا
داليدا(بعياط) :انت هدية ربنا ليا..جيت انقذتني من كل الشر اللي محاوطني!..انا عمري ماعرفت انام وبالي مرتاح!..بس النهارده هعرف لاني بقيت معاك!.. انت سندي وضهري..اوعى تبعد عني وتسيبني!
رشاد:مش هيحصل..وهفضل معاكي وجنبك لحد مااموت!
داليدا(بعياط) :بعد الشر عنك..يارب هو وانت لا!..اسفه يارشاد لو اتسببتلك في احراج وسط قرايبك
رشاد:بتتأسفي علي حاجه ملكيش ذنب فيها؟..وانتي ايه ذنبك في اللي حصل ده؟..لو ابن عمك ده مترباش فا دي مشكلته هو مش مشكلتك انتي!.. بس متقلقيش هو بعد اللي حصل النهارده اتربى تربيه هيحلف بيها طول حياته
••ضحكت داليدا..وبعدين بعدت عنه وابتدت تغير الفستان وتفك الدبابيس والتاج..ودخلت الحمام••
<تـحـت عـنـد عائـشـه>
••كانت فريده في أوضة سلمى..وبعد ماغيروا هدومهم دخلت عائشه بـ صينية أكل فيها ساندوتشات وحلويات ومكسرات••
عائشه:دي حاجه بسيطه يابنات..انا عارفه انكم مكلتوش في الفرح..بعد ماتاكلوا ناموا..واوعي تتكسفي يا فريده انتي بنتنا التانيه..وده بيتك انتي مش غريبه!
فريده:عارفه ياطنط والله كتر خيرك
عائشه:يلا بالهنا والشفا
••وحطت الأكل وخرجت وقفلت الباب وراها••
<تـانـي يـوم>
••صحى رشاد من النوم لقى داليدا ساجده على سجادة الصلاه وبتدعي••
داليدا:وأفوض أمري إلى الله في سامي ابن عمي..اللهم انتقم منه انتقام يتعجب منه أهل السماوات والأرض..اللهم أرني فيه عجائب قدرتك..حسبنا الله ونعم الوكيل
••وبعد ماخلصت قامت••
رشاد:صباح الخير يا حبيبتي..ربنا يتقبل منك
داليدا:صباح النور ياحبيبي
رشاد(بيحضنها) :عامله ايه دلوقتي؟
داليدا:الحمدلله أحسن..ارتاحت اوي لما صليت!..حسيت قوتي رجعتلي!
رشاد:انتي كده خلتيني أغير منك ودلوقتي هقوم اتوضي واصلى.. اشمعنا انتي؟
داليدا(بتضحك) :ماشي..لحد مانت تصلي اكون جهزتلك الفطار
رشاد(بإبتسامه) :ماشي.. اوعي تاكلي من غيري!
داليدا(بتضحك) :لا متقلقش
رشاد(بيضحك) :ماشي
<عـنـد حـسـنـاء>
••صحيت من النوم وقامت من السرير••
حسناء:صباح الخير ياماهر
ماهر:صباح النور
حسناء:صفاء صحيت ولا لسه؟
ماهر:معرفش
••راحت داخله أوضة صفاء لقيتها صاحيه وبتتكلم في الموبايل••
حسناء:صباح الخير يا صفاء
صفاء:صباح النور.. طب هكلمك بعدين.. سلام
حسناء:قومي خديلك دش عشان تشوفي وراكي ايه
صفاء:ماشي
••خرجت حسناء ووراها صفاء لحد مادخلت المطبخ..وماهر مكنش عارف هيعمل ايه بعد ما سامي اتحبس..ولو قالهم الخطوبه هتبوظ وبنته هتتنكد..لحد ما رجعت حسناء••
حسناء(بصوت عالي) :يا ساامي..ساامي..تعالي عايزاك..
هو مابيردش ليه؟
••وراحت تخبط على أوضته••
حسناء:افتح ياسامي..عايزاك في كام مشوار كده
••وراحت فاتحه الباب ودخلت فا ملقيتهوش••
حسناء:يبقى نزل..اما بقولك ياماهر..هو سامي نزل ولا ايه؟
ماهر(بتردد) :سامي سافر
حسناء(بإستغراب) :سافر ازاي؟..يعني ايه سافر؟..هى حبكت يسافر يوم شبكة أخته؟..وبعدين تعالالي كده سافر فين؟
ماهر(بتردد) :امممم..سافر في شغلانه هتكسبه دهب..وصاحب الشغل قاله لو جيت النهارده ليك ٢٠ ألف مرتب مقدم..وهو كان أولى بيهم ومينفعش يضيع فرصه زي دي
حسناء:طيب انا هكلمه
ماهر(بخوف) :استني يا حسناء.. استني!
حسناء:استنى ايه؟..هو في ايه ياماهر بتلف وتدور ليه؟
••راح ماهر قايملها وهو وشه ألوان وخايف••
ماهر:مين قال ان انا بلف وأدور؟.. ماهي دي الحقيقه
حسناء:طب ايه رأيك بقى ان مش دي الحقيقه وانا أساساً مش مصدقاك وكلامك ده مدخلش دماغي!
ماهر:ششش وطي صوتك متخليش صفاء تسمع!
حسناء(بزعيق) :اتكلم وقول في ايه متخليش الفار يلعب في عِبي!
ماهر(بخوف) :ابنك سامي هربان من الحكومه
حسناء(بصويت) :يا مصيبتي!!!.. سامي؟؟.. ايه اللي حصل؟؟
ماهر:راح لـ داليدا امبارح في فرحها وخاض في عرضها ولما جم يتصلوا بالشرطه هرب منهم..وعملوله محاضر ودلوقتي ابنك هربان منهم
حسناء(بصويت) :يالهوي
ماهر(بزعيق) :متتكلميش ولا كلمه قصاد صفاء خلي الشبكه تعدي على خير..وانا هتصرف بس بعد ماالشبكه تخلص
حسناء:شبكة ايه وزفت ايه؟؟..يبقى ابنك هربان واحنا هنا بنفرح؟.. طب ماهو ممكن الحكومه تيجي في آي وقت والمستخبي يبان!
ماهر:لا متخافيش مفيش حاجه هتحصل بس متتكلميش قصاد البت في حاجه احنا مش ناقصين!
••لقوا صفاء جايه••
صفاء:هو في حاجه ولا ايه؟
ماهر:لا مفيش ده انا بتفق مع امك هنحط للناس أكل ايه في البوفيه..روحي انتي خلصي اللي وراكي مش عايزين عطله!
صفاء:طيب..غنوا وبلوا الشربات، وافرحوا ده العمر ساعات
زغرطوا وارقصوا يلا، عقبال عندكم يا بنات..ههههه
••وراحت داخله أوضتها وهى بتغني..وحسناء متمسمره مكانها••
ماهر:انا قولت ايه؟
حسناء:مع انه صعب اوي بس البت ملهاش ذنب
ماهر:خشي المطبخ وكأن مفيش حاجه حصلت
حسناء:طيب
<عـنـد فـريـده>
••صحيت من النوم وكانت محرجه من أهل رشاد..لحد ما عائشه دخلت الأوضه عندهم••
عائشه:صباح الخير يابنات
فريده:صباح النور ياطنط
سلمى:صباح الفل والورد ياماما
عائشه:شكلكم لسه صاحيين من شويه
سلمى:ايوه فعلاً
عائشه:عايزاكي تقومي انتي وفريده تغسلوا وشكم وتيجوا علشان نفطر سوا
فريده:حاضر ياطنط
عائشه:يلا يا قمرات مستنياكم
••قامت سلمى ووراها فريده ودخلوا الحمام يغسلوا وشهم..وعلى السفره كانت عائشه وجوزها ومصطفى مستنينهم••
مصطفى:ماما ناوليني العلاج بتاعي
عائشه:حاضر
••ومدت ايديها من على السفره واديته العلاج••
والد رشاد:البنات جايين؟
عائشه:ايوه.. في الحمام بيغسلوا وشهم..كل انت يامصطفى عشان علاجك..ربنا يشفيك يابني
مصطفى:يارب.. انا هستنى لما هما يجوا
عائشه:ماشي ياحبيبي
<فـوق عـنـد دالـيـدا>
••كانت جهزت الفطار..وقاعده مستنيه رشاد يخلص صلاه••
داليدا:حرماً
رشاد:جمعاً..ايه كل الأكل ده؟..ده انتي مظبطاني اوي!
داليدا(بتضحك) :لانك مكلتش حاجه من امبارح..قولت أعوضك..المهم كل كويس
رشاد:حاضر وانتي كمان.. بس قبل ماناكل نشغل التلفزيون نشوف مسلسل ولا فيلم يسلينا
داليدا:صح..كلك فهم..اقولك خليك انت.. انا هقوم أشغله
رشاد:ماشي
••وقامت داليدا فتحت التلفزيون وجابت قناة أفلام..ورجعت قعدت..وحطت الأكل قصاد رشاد••
داليدا:كل ياحبيبي بالهنا والشفا
••وبعد ما رشاد داق الأكل••
رشاد:تسلم ايديكي
••وباس ايديها وهى ابتسمتله••
رشاد:انا مكنتش اعرف انك شيف هايله كده!
داليدا(بتضحك) :بس انا معملتش حاجه كل ده أكل جاهز
رشاد:كفايه بس رصته في الاطباق..لا مرصوص بـ معلمه!
داليدا(بتضحك) :حبيبي
••وحضنته بـ ايديها وكملوا أكل..رن موبايل داليدا فا ردت••
داليدا:الو يا خالتو
صابرين:صباح الفل ياحبيبة خالتك
داليدا:صباح النور عليكي
صابرين:انا قولت أصبح عليكي وأقولك صباحيه مباركه ياعروسه
داليدا:ربنا يخليكي ياحبيبتي
صابرين:هنجيلك النهارده بإذن الله..قبل ماتسافري
داليدا:مانا مش عارفه هسافر ولالا..هسيبها بظروفها
صابرين:ازاي ده شهر العسل ده أهم من الفرح نفسه..ده اللي بيخليكي تعيشي سنك وتستمتعي بـ شبابك انتي والعريس.. أما قوليلي عريسك عامل ايه؟
داليدا:الحمدلله بخير
صابرين:طيب ونفسيتك عامله ايه دلوقتي؟
داليدا:والله ياخالتو بحاول انسى اللي حصل بس مش هنسى بسهوله اللي حصل كان كبير اوي
صابرين:خد جزاءه ولسه بقى عقاب ربنا له.. ده هيشوف أيام سوده اصبري انتي بس
داليدا:مستنيه والله..وعارفه ان ربنا هيرجعلي حقي
صابرين:واحنا مش عايزين اكتر من ثقتك في ربنا
داليدا:ونعم بالله..انا راضيه بقضاء ربنا
صابرين:ربنا يزيد ايمانك ياحبيبتي ويحفظك
داليدا :يارب
<عـنـد عائـشـه>
••جات سلمى ووراها فريده وقعدوا على السفره••
والد رشاد:يااهلاً بالبنات الحلوين..منورين الدنيا
فريده:شكراً ياعمو ده بنور حضرتك انت وطنط عائشه
عائشه:حبيبتي يا فريده..يلا مدوا ايديكم وكلوا..عايزاكم تاكلوا كويس ومحدش يتكسف
فريده:حاضر
عائشه:كل يا مصطفى
مصطفى:حاضر
••وأثناء ماهما بياكلوا..عيون مصطفى جات في عيون فريده بالغلط..فا فريده اتحرجت وبصيت ناحيه تانيه••
والد رشاد:الفول ناقص ملح يا عائشه
عائشه:معلش ياساهر..استنى هجيبلك ملح من جوا
والد رشاد:لا خلاص كده حلو..انتي عارفه الضغط عندي بيعلى من الاملاح
عائشه:مانا كنت عالطول بقولك بلاش تكتر في الملح..ده ياريت نمنع الملح من أكلنا
سلمى:ازاي بس ياماما ده الأكل ميبقاش له طعم!
عائشه:هحطلكم انتوا عادي..لكن باباكي انتي عارفه ان عنده الضغط وبيتعب من الاملاح
مصطفى:وصلتوا لـ ايه في حوار رجلي؟..انا هفضل عاجز كده كتير؟
والد رشاد:لا ولا كتير ولا حاجه..الدكتور ادانا أمل كبير في علاجك وقال انك تقدر تقف على رجلك من تاني..بس اهم حاجه نفسيتك تكون تمام
مصطفى:يبقى عمري ماهتعالج..وانا نفسيتي هتكون تمام ازاي بس؟..ده انا كل يوم بموت مليون مره..انا نفسي أرجع لـ حياتي زمان من قبل مااقابل مروه!
والد رشاد:خلاص مروه بح.. مبقاش في مروه تاني..بص لـ قدام وارمي اللي حصل ده ورا ضهرك
عائشه:تفائل خير ياحبيبي..ده حتي تفائلوا بالخير تجدوه ولا ايه يافريده؟
فريده:ايوه طبعاً ياطنط..حضرتك يااستاذ مصطفى فكر بإيجابيه وبلاش تفكر في اللي فات من حياتك
سلمى:احنا كلنا جنبك يا مصطفى لحد ماتقف على رجلك من تاني
مصطفى:ربنا يخليكوا ليا
والد رشاد:ويخليك لينا ياحبيبي
<عـنـد ضـيـاء>
••كان بيقلب في دولاب مروه..لقى حبوب منع الحمل..راح ماسكها بـ ايديه وهو مصدوم!..وابتدا يتحول..لحد مانده لـ واحد من رجالته••
ضياء(بزعيق) :تعالى عايزك!!
_اؤمرني ياضياء بيه
ضياء:تاخد الحبوب دي وتوديها على أقرب صيدليه وتعرفلي دي بتاعت ايه..تمام؟؟
_حاضر
ضياء:يلااا
••مشى وراح الصيدليه..وضياء كان بيلف حوالين نفسه وعايز يتأكد..لحد ما مروه جات وحضنته••
مروه:هاي ياروحي
ضياء:ايه؟
مروه:معقول ترد على مروه حبيبتك كده؟..ده بدل ماتقولي نعم ياحياتي او نعم ياعمري؟
ضياء(بصوت حاد) :انا مش فايقلك دلوقتي..ابعدي عن سكتي
مروه(بسهوكه) :حد زعلك؟.. قولي بس
ضياء:وانا حد يقدر يزعلني؟؟..انتي بتعبطي بتقولي ايه؟؟
مروه:مش قصدي..انا بطمن بس!
ضياء:وسعي بقولك مش فايقلك!
••وبعد عنها وكان رايح جاي في القصر..وهى مستغربه ايه اللي حصله وبعد ربع ساعه رجع الشخص اللي بعته••
ضياء:ها ايه؟؟
_الدكتور بيقول دي حبوب منع الحمل لمؤاخذه يعني