رواية جوازة ميراث الفصل الخامس5والسادس6بقلم رانيا عماره
••قامت داليدا تفتح الباب واتفاجئت بـ سامي ابن عمها! ••
سامي:مين الناس اللي عندكم ياداليدا؟
داليدا:وانت مالك؟..بقى طالع مخصوص علشان تسأل مين دول؟
سامي:ده شكلك مظبطاها معاهم..ومين الراجل اللي هناك ده؟..واحد من اللي بيجولك مش كده؟..بس الغريبه يعني انه المره دي جاي مع الست اللي هناك دي..ايه عرفت اللي مابينكوا ولا ايه وجايه تصفي حساباتكو؟
••برقت داليدا بعد ما سمعت قلة الادب دي..ومحستش بنفسها غير وهى رازعاه قلم على وشه..قامت خالتها وجوزها وبنتهم علشان يفهموا في ايه••
داليدا(بزعيق) :انت قليل الأدب..وقذر..وكل يوم بتنزل من نظري أكتر من الأول..انا أنضف من مليون واحد شبهك يازباله
عصام:هو في ايه؟
صابرين:مين ده يا داليدا؟
سامي(بزعيق) :وحياة أمك لأدفعك القلم ده غالي اوي ياداليدا..انا هخلي حياتك جحيم وهعرفك مين هو سامي
داليدا(بزعيق) :اطلع برا يا زباله...انا عمري مااتخيلت انك وسخ وحقير بالطريقه دي..وانا اللي هدفعك غلطك فيا ده بالغالي..اطلع براااااا...اطلع بقى في داهيه
••وزقته ورزعت الباب في وشه وجريت فريده دخلت في حضنها وكانت بتبصلها بصة يأس••
عصام:لا اله الا الله...مين عديم التربيه ده يابنتي؟
داليدا(بعياط) :مش هيسيبني في حالي انا عارفه..واستغل موت بابا أكتر..ده ابن عمي وانا عارفاه
صابرين:هو ده سامي ابن عمك؟...يانهار اسود امال لو مكنتيش من دمه كان عمل ايه!..ده الواحد المفروض يعمل احترام حتى للقرابه اللي مابينكم..لكن ده مفيش!
عصام:بصي ياداليدا يابنتي..قعدتك انتي واختك هنا لواحدكم هتخليكم مطمع كبير لأي واحد زي ابن عمك ده..ده واحنا قاعدين معملش احترام لينا..امال لما تبقي لواحدك انتي واختك هتعملوا ايه بقى؟
داليدا(بعياط) :انا مش هخاف منه..انا اقدر عليه هو مش أحسن مني..وكل مايجي كل ماهياخد بالجزمه على دماغه
فريده(بعياط) :انا خايفه عليكي اوي يا داليدا
داليدا(بعياط) :متخافيش عليا.. أختك بميت راجل
صابرين:لا ياداليدا ياحبيبتي...كلام عمك عصام صح..انتوا بنتين ولواحدكم وفيكم الطمع..كده هتخلي كلاب السكك تنهش في لحمكم..انتي تيجي تقعدي معانا لحد ماتشوفوا حل في موضوع الشقه دي
داليدا:انا عايزه أبيع الشقه وأشتري واحده برا..قعدتنا هنا بقيت في خطر
عصام:خلاص احنا نمشي في إجراءات بيع الشقه واللي فيه الخير يقدمه ربنا
داليدا:دي أول حاجه انا هعملها بس مفتكرش إني هعدي من تحت ايد سامي بالساهل..هى حرب بس انا قدها
<عـنـد سـامـي>
••رجع البيت وهو متعصب..وكانت امه واخته قاعدين في الصاله بيقوروا الكوسه والبتنجان••
سامي(بزعيق) :بقى انا اتضرب بالقلم ويتقل مني من واحده شمال لا راحت ولا جات؟
حسناء:يانهار اسود مين اللي عمل كده؟؟
سامي:الزباله داليدا..وحياتك عندي ياأمي لأتجوزها وتبقى تحت سلطتي وهطلع القديم والجديد كله على جتتها..طول عمرها شايفه نفسها علينا وعامله نفسها بنت بارم ديله..بس مش عليا انا..ده انا سااامي ماهر الألفي..وحياة أمك يا داليدا مانا ساكتلك
حسناء:ياخبر اسود هى قلة ادبها وصلتها انها تمد ايدها عليك؟
••وراحت راميه اللي في ايديها وقامتله مسكته من رقبته بكل عصبيه••
حسناء:انت راجل ولا مش راجل ياولا؟؟
سامي:راجل وسيد الرجاله
حسناء:يبقى تحكمها.. مش عايزين البت دي يطلعلها صوت من النهارده..وجو سبع الرجاله اللي هى عاملاه ده تركنه على جنب..ده احنا لا قدنا قد ولا زينا حد..وياشلااه
سامي:وانتي فكرك ان انا هسيبها تهرب بعملتها السوده دي؟ انا خلاص خدت القرار ومش راجع فيه..الخميس الجاي دخلتي على داليدا
صفاء(ببرود) :مبروك ياعريس
••وقامت لأخوها حضنته وكانت مبتسمه••
صفاء:قوليلي بقى ياماما..هنشتري الفساتين من هنا ولا هنجيبها منين؟
حسناء:لا ياقلب أمك هنجيبها من أحسن الاماكن..ده في حتة دين مكان انما ايه حاجه فخمه فخامه..دي اللي تليق بمقامنا ياحبيبتي.. عقبال كده يارب لما نشوفك انتي كمان عروسه
صفاء:يارب ياماما
حسناء:يلا ياحبيبي متدايقش نفسك..وكلم أبوك واتفقوا على كل حاجه قبل ماالبت تكُت هى وأختها
سامي:لا تكُت فين؟..ده انا هخلص كله قوام قوام..سلام دلوقتي
••وفتح باب الشقه ومشى..ورجعت حسناء قعدت تاني••
<عـنـد مـاهر>
••كان في الورشه..وجاله سامي ابنه••
سامي:انا خدت القرار مع أمي..واتفقنا
ماهر:اتفقتوا على ايه؟
سامي:فرحي على داليدا الخميس الجاي
ماهر:وانت كنت جهزت شقتك؟
سامي:مش لازم..تترزع معانا، توب التناكه اللي لابساهولنا ده تركنه على جنب..هى مش أحسن مننا في حاجه
ماهر:خلاص مبروك ياعريس
سامي:الله يبارك فيك
<تـانـي يـوم عـنـد مـايـا>
••راحت الجامعه..ودخلت المدرج وفضلت تدور على الولد المطلوب مش لاقياه..نفخت واتدايقت وحست بالإحباط••
_ازيك يا مايا عامله ايه؟
مايا:الحمدلله يارودي، انتي عامله ايه؟
_الحمدلله..انتي جايه هنا ليه صحيح..ليكي حد تعرفيه هنا؟
مايا:اه واحده صاحبتي بس شكلها مجاتش
_مين يمكن اعرفها؟
مايا:لا هى مبتحضرش اصلاً فا مش هتعرفيها..هى كانت قايله هتيجي النهارده فا قولت آجي اسلم عليها بس شكلها مجاتش
_اها.. طيب محتاجه حاجه؟
مايا:لا ميرسي يا رودي
_اوكي فرصه سعيده ان انا قابلتك
مايا:انا اسعد ياروحي
••مشيت البنت من هنا..ومايا خرجت من المدرج وهى خارجه خبطت في الولد المطلوب!..ولما بصتله تنحت واتوترت••
مايا:معلش انا اسفه
شادي:ولا يهمك..انتي معانا هنا؟
مايا:لا..بس انا كنت...
••وكانت بتحاول تفتكر أي حجه تقولهاله،ولما ملقتش عملت نفسها دايخه ومش مركزه وده اللي أثار فضوله••
شادي:انتي كويسه؟
مايا:دوخت اوي..الشمس حاميه النهارده..تؤ..صاحبتي مجاتش لحد دلوقت مش عارفه هعمل ايه!
شادي:انتي شكلك تعبانه اوي
مايا:اوي...لا بجد دوخه فظيعه
••وحطت ايديها على دماغها••
شادي:طب اتفضلي معايا
••وخدها ونزلوا كافتيريا الجامعه..وطلبلها عصير••
مايا(بتعب) :مكنش له لزوم كل ده..انا شويه وهبقى كويسه
شادي:لا عادي مفيهاش حاجه..انتي اسمك ايه؟
مايا: اسمي مايا وانت؟
شادي: شادي.. عاشت الاسامي يا مايا
مايا:ميرسي..فرصه لطيفه ان انا قابلت حد محترم زيك
شادي:هى فعلاً فرصه لطيفه بس انا أول مره أشوفك هنا
مايا(بتردد) :مانا كلية آثار
شادي:طب حلو.. فرقه كام؟
مايا: تالته
شادي:انا اكبر منك بـ سنه..بس انا يعني كان نفسي ادخل آثار بدل علوم..ده يابختك بقى.. على كده مبسوطه فيها؟
مايا:لا انا كان نفسي ادخل كلية اعلام وابقي مذيعه وكده يعني
شادي:محدش دخل الحاجه اللي بيحبها..بس يمكن هى أحسن لينا من الحاجه اللي كنا عايزينها
مايا:أكيد طبعا ربنا بيشيلنا الحاجه الأحسن
شادي:انتي منين؟
مايا(بتردد) :انا من التجمع بس عايشه في مدينتي
شادي:ياه مدينتي مره واحده..باباكي شغال ايه على كده؟
مايا:بابايا رجل أعمال..وانت؟
شادي(بيضحك) :رجل اعمال برضه..بس أعمال حره..بيصنع الفخار يدوياً
مايا:ايه الفخار ده؟
شادي:لا انتي كده ضايعه ومش هتعرفي..هى حاجه زي الاطباق والكوبايات بس مصنوعه من الطين
مايا:اها سوري اول مره اسمع الكلام ده منك
شادي:صاحبتك مجاتش ليه لحد دلوقتي؟
مايا:أكيد جايه..اسفه ان انا عطلتك.. تقدر تحضر محاضراتك دلوقتي
شادي:لا انا مبحضرش اساساً بس يعني جيت النهارده مش عارف ليه يمكن علشان أقابلك مثلاً
مايا:ممكن بس مبسوطه ان اتعرفت عليك
شادي:وانا اكتر
<بـعـد يـومـيـن>
••كانت كل حاجه زي ماهي والفلوس ابتدت تخلص••
فريده:داليدا.. الفلوس قربت تخلص هنعمل ايه؟
داليدا:قومي البسي يا فريده..هنروح ندور على شغل
فريده:احنا الاتنين؟
داليدا: لا طبعاً..بس علشان مش هينفع أسيبك لواحدك في البيت..انا مش هكون متطمنه وانتي بعيد عني
فريده:طيب انا هدخل البس
داليدا:ماشي
••وبعد مالبسوا وجهزوا..نزلوا يسألوا على شغل في المحلات••
داليدا:لو سمحت مش محتاجين شغل هنا؟
_لا
داليدا:طيب شكرا
••وراحت محل تاني••
داليدا:حضرتك محتاج حد يشتغل هنا؟
=لا للاسف
داليدا:طيب شكراً
••ولفيت على محلات كتير لحد مالقيت محل••
داليدا:مش محتاجين شغل هنا؟
_ايوه محتاجين..حضرتك معاكي مؤهل ايه؟
داليدا:معايا ليسانس أداب
_طيب ممكن بياناتك
داليدا:أكيد
••وبعيد كان سامي بيراقبهم من ورا شجره..رن موبايله فا رد••
سامي:الو
ماهر:عملت ايه..اتفقت مع المأذون ولا لسه؟
سامي:لا هخلص مشوار وهعدي عليه
ماهر:طيب..ابقى هاتلي المسامير اللي قولتلك عليها
سامي:طيب..اقفل دلوقت
ماهر:ماشي يا سامي مع الف سلامه
سامي:الله يسلمك
••وبعد ما داليدا خلصت..كانت خارجه مع أختها وبيتكلموا••
فريده:مش انتي معاكي شهاده يا داليدا؟
داليدا:ايوه معايا
فريده:طيب ليه مش بتشتغلي بيها؟
داليدا:هو في حد بيشتغل بـ شهادته دلوقتي يا فريده؟..هيشغلوا مين ولا مين بس؟..ده الخريجين في زمنا ده بعدد شولة الرز
فريده:يعني انا مش هشتغل لما ادخل الجامعه واتخرج؟
داليدا:لا ممكن تشتغلي..انتي وحظك بقى..الحمدلله ان انا لقيت شغل
فريده:وهتقدري تشتغلي وانتي في الحاله دي؟
داليدا:الشغل مالوش علاقه بمزاجك مبسوطه مدايقه بتموتي بعد الشر طبعاً.. لازم تشتغلي علشان تكفي احتياجاتك تفتكري يافريده لو انا مشتغلتش..هتقدري تروحي دروسك ومدرستك أكيد لا!..حد هيبعتلنا الأكل والشرب أكيد لا برضه!..ان معملتيش حاجتك بنفسك محدش هيعملها!
فريده:عندك حق يا داليدا..ربنا يخليكي ليا
داليدا:ويخليكي ليا يارب
••وبعد ما سامي اتأكد انهم مشوا من المنطقه خالص..دخل لـ صاحب المحل••
سامي:السلام عليكم
_وعليكم السلام ورحمة الله وبركاته
سامي:في بنتين لسه كانوا جايين عندك..كانوا بيشتروا ولا عايزين شغل؟
_وانت مالك؟
سامي:لا اتعدل معايا في الكلام بدل مانا اللي أعدلك!
••وقرب منه وابتدا يتحول! ••
_اوعى ايدك دي.. انت عبيط ولا ايه؟
سامي:رد عليا كانوا بيشتروا ولا عايزين شغل؟
••وطلع من جيبه رزمة فلوس تاني! ••
سامي: دول ٥ ألاف جنيه..بس اتكلم
_كانوا عايزين شغل..انت تعرفهم ولا ايه؟
سامي:مش شغلانتك..هيجولك تاني.. عايزك تقولهم مفيش شغل.. تمام؟
_وانت ايه مصلحتك من ده كله؟
سامي:متلكش معايا كتير..انت هتسمع اللي بقولهولك بالحرف الواحد ولا عرفت انهم اشتغلوا عندك..هقفلك المحل ده ووريني هتاكل عيش ازاي..يبقى ضيعت نفسك علشان بنتين عبط..فكر في مصلحتك
••وسابه ومشى وصاحب المحل خايف منه••
<عـنـد عائشه ووالد رشاد>
••رجع مصطفى من برا، وهما قاعدين في الصالون••
عائشه:اهلاً ياحبيبي تعالى
مصطفى:عامله ايه ياماما؟
••وقعد على الكرسي••
عائشه:بخير يامصطفى.. امال مروه مبتجيش معاك ليه؟
مصطفى:مروه غضبانه في بيت أهلها بقالها يومين
عائشه(مصدومه) :يانهار اسود.. انت بتتكلم بجد؟
والد رشاد:يعني ايه غضبانه في بيت أهلها؟هو في حاجه حصلت مابينكم؟
مصطفى:لا مفيش هى بس عايزه تطلق مش أكتر
عائشه:لا يامصطفى قول كلام غير ده!..ده انتوا متجوزين من شهرين يابني! لحقتوا يحصل بينكم مشاكل وكمان توصل للطلاق؟ انتوا أكيد مش طبيعين
مصطفى:ممكن تقفلي السيره دي علشان بجد بتستفزني كل ماافتكرها
والد رشاد:طب ماتفهمنا يابني بدل مااحنا على عمانا كده
مصطفى:مش هقدر اجيب سيرتها بأي حاجه وحشه مش هقول غير ان ربنا يهديها وترجع لـ عقلها
عائشه:متربي يابني..عرفنا نربيك صح
مصطفى:رشاد عامل ايه دلوقت؟
عائشه:تعبان..نفسيته وحشه اوي..قولتله نجيب دكتور نفسي يتابع حالته..اتخانق معانا ورفض..قالي بقى دي آخرتها ياماما..توصل ان ابنك بقى زي المرضى النفسيين والدكتور جاي يتابع حالته والكل متعاطف معاه بسبب ناس معندهاش نقطة ضمير!..قولتله لا ياحبيبي اللي انت فيه ده طبيعي وأي حد مكانك هيكون كده وأكتر..رشاد مش مدينا فرصه حتى نكون جنبه..وكل ماادخل يااما ماسك صورة يوسف ودينا.. يااما واقف قدام المرايا يكلم نفسه ويعيط زي العيال الصغيره
والد رشاد:ربنا يكون في عونه..اللي رشاد شافه مكنش قليل
مصطفى:انا هدخل اشوفه
••وقام وراح لأخوه..خبط على الباب ودخل..كان رشاد ملامحه باهته جداً وحزينه••
مصطفى:عامل ايه دلوقت؟
رشاد:كويس
مصطفى:طب الحمدلله..ممكن اطلب منك طلب وتوافق؟
رشاد:على حسب
مصطفى:صدقني ده طلب بسيط جداً مش هياخد منك حاجه..انا عايزك تخرج من الأوضه وتقعد معانا زي زمان..مش هقولك انك انت اللي محتاجنا لا احنا بجد اللي محتاجينك وسطنا..وجودك وسطنا ده بفلوس الدنيا كلها..ماما زعلانه ونفسها تخرج تقعد معانا شويه..نتكلم ونضحك زي زمان..نهون على بعض هموم الدنيا
رشاد(ببرود) :نتكلم ونضحك؟ ليه عندنا فرح؟
••وفجأه نبرة صوته اتغيرت وفضل يصوت••
رشاد(بصويت) :انا مراتي اتقتلت قدام عينيااااا...اتقتلت هى وأهلهاااا... وابني معرفش اتقتل ولا عايش!....انا حياتي اتدمرت في لحظه!!!.. وتقولي نضحك ونهزر!!
••جه باباه ومامته وأخته على صويته••
عائشه:في ايه؟؟؟
مصطفى:اهدى طيب
والد رشاد:رشاد ماله انت قولتله ايه يامصطفى؟
مصطفى:والله ماقولت حاجه غلط انا كنت بقوله يخرج يقعد معانا مش أكتر!
عائشه:الحقنه المهدئه بسرعه ياسلمى
سلمى:حاضر ياماما
••وكتفوه وأخته اديته الحقنه المهدئه..لحد ماراح في النوم..وأمه وأبوه كانوا مقهورين عليه!••
عائشه(بعياط) :ليه كده يامصطفى؟.. ليه كده؟ ... حرام عليك حرام عليك
مصطفى:انا اسف ياماما
والد رشاد:رشاد حالته بتسوء كل يوم عن اللي قبله..احنا لازم نسفره برا وننهي المشكله دي..وبالنسبه لـ ضياء انا مش هسيبه مهما يحصل
سلمى:تعالي ياماما اهدي ارجوكي
••وخدت مامتها وخرجوا من الأوضه••
<عـنـد دالـيـدا >
••بعد مالفوا شويه، راحت داليدا وأختها علشان تسأل على الشغل••
داليدا:عندي احساس ان انا هشتغل
فريده:يارب ياداليدا
••ولما وصلوا ودخلت تسأل••
داليدا:حضرتك قولتلي ساعه وهترد عليا
_ايوه انتي أستاذه داليدا صح؟
داليدا:ايوه انا
_للاسف مفيش شغل..صاحب المحل جاب حد تاني امبارح والمفروض انها تستلم النهارده بس انا مكنتش أعرف
داليدا(مستغربه) :ازاي بس؟..طيب ممكن تسأله لو محتاج حد كمان!
_انا كلمته وقالي ان هو اكتفى خلاص..ممكن تشوفي شغل في مكان تاني
داليدا:هى مالها متقفله كده ليه؟.. عموماً شكراً
_العفو
••وخدت أختها وطلعوا، وكانت حاسه بيأس رهيب، ومش عارفه هتعمل ايه!..لحد ما افتكرت رشاد وقالت تسأل عليه يمكن عارف حد محتاج حد يشتغل معاه..لحد ماخدت أختها ووصلوا للكافيه بتاعه وكان مقفول وده زاد احباطها أكتر..لحد مالقيت راجل واقف قدام الكافيه••
داليدا:من فضلك..حضرتك تعرف استاذ رشاد؟
_طبعاً اعرفه عز المعرفه ده حبيبي..انتي مين وعايزاه في ايه؟
داليدا:كنت عايزه اعرف بيته فين..خصوصاً بعد اللي حصله آخر مره فا محتاجه اتطمن عليه
_رشاد متدمر اوي دعواتك له
داليدا:ربنا يشفيه ويعافيه..ممكن العنوان؟
••راح الراجل مطلع ورقه وكتبلها العنوان وادهالها••
داليدا:شكراً لـ حضرتك
_العفو
••وخدت أختها وراحوا يجيبوا علبة شوكولاته صغيره بحيث ميبقاش شكلهم وحش وهما داخلين••
فريده:مين ده يا داليدا؟
داليدا:ده أستاذ رشاد اللي المفروض كنت هشتغل عنده في الأول بس لولا الظروف اللي حصلتله..هنتطمن عليه وبالمره هنسأل على شغل..انا عارفه ان سؤالي ده مش وقته خالص.. بس اديكي شايفه متقفله ازاي في وشي!
فريده:بس لو هو تعبان يبقى مش هيقدر يقولك حاجه
داليدا:اهي محاوله..نفعت نفعت..منفعتش خلاص
••شاورت لـ تاكسي، وقالتله على العنوان ووصلوا••
داليدا:تقريباً هى دي العماره؟
فريده:اسألي احسن
••قربت داليدا من العماره وسألت البواب••
داليدا:لو سمحت في حد هنا اسمه رشاد ساهر
البواب:اه في.. انتوا مين وعايزينه في ايه؟
داليدا:انا زميلة أستاذ رشاد وكنت جايه اتطمن عليه
البواب:ومين اللي معاكي دي؟
داليدا:دي أختي
البواب:ممكن البطايق اللي معاكوا
••راحت داليدا مطلعه بطاقتها واديتها للبواب••
البواب:اتفضلوا هو في شقة رقم 4.. الدور الثاني
داليدا:شكراً
••طلعت داليدا واختها في الاسانسير..وخبطوا على الشقه.. فتحتلهم سلمى أخت رشاد وكانت مستغربه هما مين! ••
سلمى:انتي مين؟
داليدا:انا داليدا زميلة أستاذ رشاد
سلمي:اتفضلي
••دخلت داليدا وفريده أختها ورا سلمى لحد الصالون••
سلمى:اتفضلوا اقعدوا..ثواني هنده ماما وجايه
داليدا:ماشي
••وقعدت هى وأختها..وسلمى دخلت تنده مامتها وخرجوا••
عائشه:اهلاً ياحبيبتي
••قامت داليدا وفريده يسلموا عليها••
داليدا:البقاء لله ياطنط..وألف سلامه على أستاذ رشاد
عائشه:الله يسلمك..اتفضلوا..هاتي الضيافه ياسلمى
سلمى:حاضر ياماما
••ورجعوا قعدوا تاني••
داليدا:اعرفك على نفسي انا زميلة أستاذ رشاد
عائشه:يااهلاً بيكي..ودي اختك صح؟
داليدا:ايوه..انا روحت آخر مره اسأل علي أستاذ رشاد في المستشفى ملقيتهوش..قالوا انه مشى..قولت لازم اعرف العنوان وآجي بنفسي رغم وفاة والدي
عائشه:انتي باباكي اتوفى؟
داليدا:ايوه ياطنط..وانا بدور على شغل قولت اعدي على استاذ رشاد أعزي
عائشه:انا حاسه إني شوفتك قبل كده!
••وكانت بتفتكر لحد ماافتكرت انها كانت معاهم في المستشفى••
عائشه:انتي اللي كنتي معانا في المستشفى صح؟
داليدا:ايوه انا
عائشه:ياه يابنتي تاعبه نفسك ليه..انتي عملتي الواجب مره..كفايه ان والدك لسه متوفي ورغم كده جايه تعزي.. احنا اللي المفروض نعزيكي..البقاء لله ياداليدا
داليدا:الظروف قريبه من بعضها ياطنط
عائشه:ياحبيبتي طيب ومامتك عامله ايه دلوقتي؟
داليدا:انا مامتي متوفيه
عائشه:طب قرايبك؟
داليدا:مليش غير ربنا..الحمدلله
عائشه:ربنا يخليكي لـ أختك
داليدا:يارب
••وأثناء ماهما قاعدين..لقوا رشاد طالع من أوضته••
عائشه:رشاد!
الفصل السادس
••أول ما عائشه شافت رشاد قامت من مكانها ومكنتش مصدقه انه خرج من الأوضه أخيراً..لحد ما قرب وقعد معاهم••
عائشه:اخيراً ياحبيبي جيت قعدت معانا؟
رشاد:ازيك ياداليدا؟
داليدا:الحمدلله ازيك انت يااستاذ رشاد؟
رشاد:انا كويس..اختك دي؟
داليدا:ايوه أختي الصغيره
رشاد:فيها شبه منك
عائشه:انت كويس يابني؟
رشاد:كويس
داليدا:حضرتك هترجع الشغل امتى؟
رشاد:بكرا
عائشه:بكرا؟..ده انت مكنتش عايز تخرج من أوضتك لما هتنزل الشغل مره واحده؟..انت متأكد انك كويس؟
رشاد:لازم أقف على رجلي..وأرجع حق دينا وأهلها وحق يوسف ابني
عائشه:حرام عليك بقى يا رشاد احنا مابقناش حِمل مشاكل تاني!
رشاد:انا لو سيبت حق دينا ويوسف استاهل اللي يجرالي بعد كده.. انا مش ضعيف ياماما علشان اسيب حقي لـ كلب زي ضياء لاشين!
عائشه:داليدا زميلتك..والدها اتوفى بعد وفاة دينا ورغم كده جاتلك مخصوص
رشاد(مصدوم) :ازاي؟
داليدا:قضاء وقدر..بس انا متأكده ان اللي حصله ده حد له ايد فيه..بابا كان مريض كانسر..ومماتش منه..مات مسموم!
عائشه(بصدمه) :ياه يابنتي..أكيد حد هو اللي اتسبب في كل ده
داليدا(بحزن) :أكيد.. كل حاجه وليها سبب
رشاد:للبقاء لله ياداليدا..انا حاسس بيكي لان انا زيك..الفراق صعب..بيموت بالبطئ.. وخصوصاً الموت لما ياخد حبايبك منك بدون استئذان..بتوجع اوي لانك بتبقي عارفه ومتأكده ان مهما حصل مش هيرجعوا
داليدا(بتنهيده) :انا ليا وجهة نظر مختلفه في الموضوع ده..اللي بيوجع أكتر مش الموت..لانك عارف انه مش هيرجع فا مش هتكون عايش على أمل الرجوع..وهتبقى عرفت النهايه شكلها ايه..لكن اللي بيوجع كتر التفكير..هيرجع ولا مش هيرجع فا بالتالي مش عارف راسك من رجلك وبتكون متوقع في اي لحظه انك تقابله ولو حتى صدفه ووقتها مش هتكون عارف هتتصرف ازاي لمجرد انك هتشوفه
عائشه:ربنا بيعوض عن كل حزن او وجع..ربنا اللي شايف ايه جوا كل واحد فينا..انا شايفه انها خطوه كويسه منك يا رشاد..ارجع شغلك ياحبيبي بلاش توقف حياتك..وياريت تشوف لـ داليدا شغل معاك
رشاد:حاضر يا ماما
••قامت داليدا هى وأختها••
داليدا:البقاء لله ياطنط، ربنا يجعلها آخر الأحزان
عائشه:يارب..يصبرنا ويصبرك
••وبتقوم هى ورشاد••
رشاد:تعالي بكرا ياداليدا..هشوفلك موضوع الشغل ده
داليدا:ان شاء الله
عائشه:طيب ياحبيبتي هو انتوا لحقتوا تقعدوا؟
داليدا:معلش ياطنط ورايا حاجات كتير..اتشرفت بمعرفتك
عائشه:انا اكتر ياداليدا..نورتونا
••مشيت داليدا وأختها ووراهم عائشه ورشاد••
داليدا:ده بنور حضرتك
••وبعدها نزلت داليدا وأختها ورجعوا البيت••
<تـانـي يـوم>
••نزل رشاد الشغل،وكان كل الناس بيسلموا عليه لانه قعد فتره مبينزلش••
_حمدالله على السلامه يارشاد بيه
رشاد: الله يسلمك
=ربنا يجعلها آخر الأحزان يارب
رشاد: يارب
_نورت الدنيا يااستاذ رشاد
رشاد:متشكر ده بنورك..يلا كل واحد يشوف شغله
••ودخل مكتبه وقعد على المكتب ومسك صورة يوسف ابنه..وطول ماهو باصص للصوره كان بيتكلم في خياله••
رشاد: وحشتني اوي يا يوسف..مش ناسي لما كنت لسه مولود كنت فرحان بيك قد ايه..معقول السنه اللي فاتت في نفس الميعاد مكنتش عارف ان النهارده هكون من غيرك
<فـلاش بـاك>
••في عيد ميلاد يوسف لما كمل سنه••
دينا ورشاد: هابي بيرث داي تو يو..هابي بيرث داي تو يوسف..هابي بيرث داي تو يو..يلا حالا بالا بالا هنوا ابو الفصاد حيكون عيد ميلادة الليله اسعد الاعياد هنوا ابو الفصاد هيييه
••وطفوا الشمع وحضنوه..وجات جدته بالهديه••
مديحه:هابي بيرث داي ياحبيب قلب تيته..كل سنه وانت طيب
دينا(مبتسمه) :وانتي طيبه ياماما..شوفت تيته جايبالك ايه؟
مديحه:ده انا لو أطول أجيبله الدنيا كلها لحد عنده كنت عملتها هو احنا عندنا كام يوسف؟
رشاد:طب ايه وانا مليش حاجه؟..انا عيد ميلادي عدى ومحدش قالي كل سنه وانت طيب
دينا:ايه الكدب ده بقى؟ مش انا لسه جايبالك هديه؟
رشاد:انا بقولهم كده علشان يجيبوا تاني انتي كده بوظتي الدنيا
وجدي:بس ياسيدي بكرا الصبح يكون عندك أحلى هديه
رشاد(بيضحك) :حبيبي ياعمي
______________________
••ووقت ما كان رشاد بيفتكر..فاق من خياله على صوت الباب بيخبط••
رشاد:اتفضل
••دخلت داليدا ••
رشاد:اتفضلي ياداليدا
داليدا:شكراً
رشاد:انا همسكك مديره هنا
داليدا(مصدومه) :مديره مره واحده؟
رشاد:ايه المشكله..ولا انتي في مشكله معاكي؟
داليدا:لا خالص.. ولا مشكله ولا حاجه.. بس انا يعني مش عارفه حاجه لسه
رشاد:هعرفك
••ولفلها اللابتوب وراح قعد جنبها يوريها••
رشاد:ده البرنامج اللي احنا بنشتغل عليه..وهعرفك ازاي تديري الكافيه..وازاي تتابعي كاميرات المراقبه بس واحده واحده
داليدا:تمام
••وأثناء ماهو بيوريها تعمل ايه..سكت شويه وجاتله نوبة غضب..راح قايم وواقف قدام الشباك وكان بياخد نفس عميق وده اللي خلى داليدا استغربت••
داليدا:حضرتك كويس يااستاذ رشاد؟
رشاد:لا مفيش حاجه
داليدا:بس يعني باين على حضرتك انك مدايق
رشاد:متشغليش بالك يااستاذه داليدا..خلينا نكمل الشغل
داليدا:تمام
••ورجع قعد تاني وكمل شرح••
<عـنـد سـامـي>
••جاب المأذون وطلع هو وأبوه وأمه وأخته..ولما خبط على الباب ومحدش رد..استغربوا••
ماهر:راحت فين دي؟
سامي:اهو ده اللي انا كنت خايف منه
حسناء:طب خبط تاني يمكن نايمه
••ولما خبطوا كذا مره ومحدش رد عرفوا انها مش في البيت••
سامي:اراهنك انها مش جوا..تلاقيها بتتسرمح هى وأختها ماهو ملهمش لا ظابط ولا رابط ولا راجل يشكمهم..الله يرحمك ياعمي مكنتش عارف تبقى راجل في بيتك
صفاء(بتتأصع) :هاء..يعني جينا على الفاضي ولا ايه؟.. لا بقولكم ايه انا مش ضاربه المشوار ده كله وفي الآخر متطلعش موجوده
حسناء:اتنيلي ده اللي بينا وبينهم شارع
المأذون:طب يااخوانا..نيجي وقت تاني مادام العروسه مش هنا
سامي:مش هتتعتع من هنا واصبر..انتي معاكي رقمها ياماما؟
صفاء:اه معايا..استنى كده
••وطلعت موبايلها وابتدت تدور على رقم داليدا••
حسناء:داليدا...داليدا...داليدا...اهو لقيتها..خد يا سامي
••شد منها الموبايل واتصل بيها ولكن هى مردتش..لحد ما رن 10 مرات ودي حاجه عصبت داليدا منهم••
داليدا:ثواني بس يااستاذ رشاد
رشاد:اتفضلي
••وقامت ترد بعيد••
داليدا:الو يامرات عمي خير؟
سامي:مرات عمك ايه ياداليدا..انا حبيب القلب
••وأول ماسمعت صوته راحت قافله في وشه وقرفت!••
داليدا(بقرف) :هو انت!
••ورجعت قعدت••
داليدا:كمل يااستاذ رشاد
••وعند سامي وأهله..كان سامي متعصب جداً من الحركه اللي داليدا عملتها فيه••
سامي:بقى انا تقفل السكه في وشي..طب والله مانا ماشي من هنا النهارده
المأذون:طب يااخوانا احنا ورانا ناس تانيه مستنيه
ماهر:اقعد ياعم الشيخ وهنديك اللي انت عايزوا
المأذون:مينفعش انا ملتزم بمواعيد
ماهر:اقعد بقولك..زمانها جايه في الطريق
<عـنـد مـايـا>
••دخلت دماغ شادي وعجبته..وبعد ماعرف هى كلية ايه وفرقه كام ومدرجها كام..راح مخصوص قدام المدرج وكان بيبص في كل الوشوش لحد ماجات هى وصاحبتها••
شادي:ازيك يامايا؟
مايا:الحمدلله انت عامل ايه ياشادي؟
شادي:انا بخير..كنت عايز أطلب منك خدمه
مايا:اتفضل
شادي:انا ليا واحد صاحبي معاكم في المدرج هنا بس مبيحضرش وكان محتاج يعرف ايه التكاليف اللي الدكاتره طالباها خصوصاً ان الامتحانات قربت
مايا:اه طبعاً هو اسمه ايه؟
••اتردد شادي ومكنش عارف يقولها ايه..لحد ماافتكر ان كل المدرج بحرف الميم••
شادي:اسمه محمود
مايا:خلاص اوكي..انا بس مش معايا الاسكتش دلوقتي..ممكن تديني رقمك ابعتهملك على الواتساب؟
شادي:اه طبعاً مفيش مشكله.. رقمك كام؟
مايا: 01007524196
شادي:تمام هديكي رنه بقى
••وبعد ما رن عليها رقمه ظهر عندها••
شادي:سيفيني..وياريت متنسيش تبعتي التكاليف هو بجد محتاجها جداً
مايا:اوكي مفيش مشكله.. يلا عايز حاجه؟
شادي:لا سلامتك
مايا:باي
شادي(بإبتسامه) :باي!
••وبعدين مشيت..وكانت مايا مبسوطه ان الخطه بتنجح••
<عـنـد مـروه>
••كانت واقفه مع مامتها في المطبخ،رن الجرس وراحت تفتح لقيته مصطفى جوزها!..فا اتوترت لما شافته••
مصطفى(بتنهيده) :انا قولت اسيبك كام تهدي مع نفسك..وترجعي لـ عقلك..انتي مبسوطه من اللي قولتيه ده؟
••سكتت مروه ومعرفتش ترد..فا جات مامتها••
هدى:مين يامروه... ايه ده مصطفى؟..تعالى ياحبيبي اتفضل
••دخل مصطفى وقعد في الانتريه••
هدى:كل دي غيبه يامصطفى؟
مصطفى:انتي عارفه ان بنتك زودتها آخر مره..ولو كنا شدينا مع بعض كانت النهايه هتكون صعبه اوي..انا مكنش ينفع آجي وانا في الحاله الصعبه دي..كان لازم كل وأحد فينا يقعد مع نفسه ويقرر
هدى:وانت قررت ايه؟
مصطفى:قررت ان مينفعش حد فينا يبعد عن التاني..انا اديت مروه فرصه ترجع لـ عقلها
هدى:معلش كل بيت وفي مشاكله وبيحصل من ده كتير..قومي يامروه جهزي حاجتك علشان ترجعي مع جوزك
مروه(بتردد) :بس يامـ...
هدى:مفيش بس..اسمعي الكلام وقومي
••قامت مروه وهى ساكته ودخلت أوضتها••
هدى:انا عمري ماهلاقي حد زيك اتطمن على بنتي وهى معاه..أحب أشكر والدتك على تربيتها ليكم
مصطفى:انتي عارفه ياطنط ان انا بحب مروه..زي مانا متأكد انها هى كمان بتحبني
هدى:ربنا يخليكم لـ بعض ويهديكم
<عـنـد دالـيـدا>
••وهى قاعده على اللابتوب بتتعلم..لقيت رشاد داخل وبيديها فلوس••
داليدا:ايه ده؟
رشاد:ده مرتبك هتاخديه مقدماً..أكيد مش هتستني لآخر الشهر يفرض عايزه تجيبي طلبات ليكي!
داليدا(بإحراج) :مش عارفه أشكر حضرتك ازاي..هو انا فعلاً كنت محتاجاهم اوي
رشاد:ان شاء الله هتيجي من بكرا بدري على حوالي الساعه 10 وكل يوم هفهمك شويه
داليدا:خلاص تمام..أمشي دلوقتي؟
رشاد:اه عادي
••قامت داليدا وهى مبتسمه..وخرجت..ولما طلعت من الكافيه اتصلت بـ أختها فريده••
داليدا:خلصتي الدرس يا فريده؟
فريده:اه لسه مخلصه
داليدا:طيب خليكي عندك انا جايه أخدك.. متتحركيش
فريده:ماشي يا داليدا
••وراحت تجيب أختها فريده من الدرس••
<عـنـد ضياء لاشين>
••كان لسه راجع من برا،جات بنته المخطوبه هَنا••
هنا:ايه ده انت جيت يا بابي؟
ضياء:ايوه جيت..يمنى فين؟
هنا:خرجت من شويه
••وقعدت جنب منه••
هنا:انا عايزه 15 ألف جنيه يا بابي
ضياء:عايزاهم في ايه؟
هنا:عايزه اشتري ميك اب و بادي لوشن
ضياء:عدي عليا في الشغل بكرا وخدي اللي انتي عايزاه
••وقام تاني وطلع فوق عند مراته كانت بتتكلم في الموبايل وأول ماحسيت بيه..قفلت••
ضياء:مروحتيش الشغل ليه يالميس؟
لميس:مليش مزاج اروح النهارده..انت رجعت بدري ليه؟
ضياء:مليش مزاج
••وقعد جنبها على السرير••
لميس:زي يعني..طيب احنا عايزين نسافر يومين الغردقه
ضياء:ماتسافروا حد ماسككم؟
لميس:مش هتيجي معانا ولا ايه؟
ضياء:لا مليش مزاج
لميس:مالك ياضياء متغير ليه؟
ضياء:هقولك بعدين..انا هدخل آخد شاور.. اقفلي الشبابيك علشان لما اطلع عايز انام ومش عايز اسمع نص كلمه من حد
لميس(مستغربه) :حاجه غريبه يعني
••وأول ما قام ودخل الحمام..مسكت موبايلها ومسحت حاجه••
<عـنـد دالـيـدا وفـريده>
••جابت أختها وهما طالعين على السلم لقيت ماهر وسامي وحسناء وصفاء والمأذون واقفين على الباب مستنيها••
داليدا:هو في ايه ياعمي؟
ماهر:انتي وصلتي ياعروسه؟
داليدا(مستغربه) :عروسه؟..عروسة ايه؟
حسناء:هو انتي متعرفيش؟
داليدا:لا معرفش
حسناء:سامي هيكتب عليكي دلوقتي
داليدا:يكتب على مين؟..عليا انا؟؟..انتوا بتهزروا ولا بتتكلموا بجد.. انا فعلاً مش قادره أصدق
فريده:انتوا عايزين ايه من داليدا أختي؟
حسناء:عايزين كل خير..عايزين يبقى زيتنا في دقيقنا
••طلعت داليدا وفتحت باب الشقه ودخلت هى واختها ولسه هتقفل الباب في وشهم..راح سامي حاطط ايده وزق الباب ودخلوا كلهم••
داليدا(بزعيق) :محدش داخل هنا! فاهمين!..ده بيتي انا وأختي ومن حقي اوافق أو ارفض بمزاجي
سامي(بزعيق) :الكلام ده أيام ماكان أبوكي عايش..دلوقتي انتي ملزومه مننا وفي رقبتنا..واحنا اللي من حقنا نحدد مش انتي!
داليدا(بزعيق) :من حقك تحدد اللي يخصك...مش اللي يخصني انا!!
ماهر:عيب كده ياداليدا..سامي ابني شاريكي وبيحبك وعايزك في الحلال..مش أحسن ما يعمل حاجه غلط
داليدا:مايعمل اللي يعمله المهم بعيد عني في الآخر!
حسناء:انا مرضتش آخد على كلامك آخر مره وقولت حقها ده ابوها مبقالهوش كام يوم ولسه دمه مبردش..احنا عايزينك في الحلال..ده انتي مش هتلاقي أحسن من ابني
داليدا(بصويت) :وانا مش عايزه اتجوزوا!!!
المأذون:يااساتذه من شروط الزواج انها تكون موافقه وإلا كده يكون الزواج باطل
ماهر(بتريقه) :باطل ليه ان شاء الله ضاربين ورقتين عرفي؟.. ده جواز على سنة الله ورسوله.. يلا اكتب وخلص
داليدا(بصويت) :انتوا بتستغلوا موت ابويا علشان تعملوا مابدالكم؟ده بدل ماتقفوا جنبي وتكونوا ضهري وسندي!
ماهر:مااحنا ضهرك وسندك ياداليدا يابنتي..بقى تظني فينا كل الظن الوحش ده لمجرد اننا عايزينك تبقي مرات ابننا؟
داليدا(بعياط) :وانا مبحبوش ومش عايزاه ومش هقدر أعيش مع حد مش بحبه
حسناء:بكرا تحبيه..سامي يتحب.. انا أمه واعرفه اكتر منك
فريده:ملكوش دعوه بـ داليدا...داليدا مش هتتجوز سامي
سامي:هه..مابقاش ناقص غير العيال الصغيره هى اللى تتكلم..خلص في الموضوع ياعم الشيخ
داليدا(بصويت) :حرام عليكم بقى...حرااام عليكم!!
••وفضلت داليدا تصوت لحد ماأغم عليها!..ولما فاقت لقيت نفسها هى وأختها في بيت عمها ماهر..و المأذون كان رافض انه يكتب الكتاب ولكن هما ضغطوا عليه وخوفوه!••
داليدا(بتفوق) :انا فين؟؟
فريده(بعياط) :انا جنبك يا داليدا
حسناء:مبروك ياداليدا..كتبنا كتابك على سامي وبقيتي مراته وبكرا إن شاء الله فرحكم..و متخافيش من أي حاجه الفستان هيجيلك لحد عندك
داليدا(بصويت) :لااااااا....ازاي؟؟؟..انا مش عايزه سامي!!!... مش عايزااااه!!
••لقيت سامي داخل الأوضه وهو مبتسم••
سامي:مش هقولك مبروك..هخليها لـ بكرا علشان تحسي بـ قيمتها..انا مش مصدق يا داليدا انك اتكتبتي على اسمي
فريده:بابا لو كان عايش مكنش وافق على الجوازه دي
صفاء:ليه ده انا سامي أخويا..كل البنات بتجري وراه
داليدا(بصدمه) :انتوا بتتكلموا بجد ولا بتهزروا؟؟؟
حسناء:وهى حاجه زي دي فيها هزار؟..لو مش مصدقه.. بكرا هتصدقي..يلا ياسامي ياحبيبي علشان تلحق تروح للحلاق
سامي:ياه ده انا كنت ناسي
حسناء:اديني فكرتك اهو
••وخرجت هى وصفاء وسامي..وداليدا من الصدمه كانت بتلطم!..وأختها بتحضنها وبتعيط!..وتاني يوم دخلت حسناء لـ داليدا بـ فستان الفرح••
حسناء:صباح الخير ياعروسه..انتي عارفه ان شقة سامي لسه مخلصتش يادوب على المحاره..بس انا قولت لـ عمك ماهر يركب الابواب والشبابيك ويدهنهم..وظبطنالك أوضة النوم..لحد ما سامي.. ربنا يكرمه ويجيب العفش وإلا هتقعدي معانا ده لو مش عاجبك يعني
••وحطت الفستان قدام داليدا وخرجت بكل برود••
<عـنـد رشـاد>
••صحى من النوم..ودخل الحمام يتوضى وخرج يصلي ركعتين لله، وكانت عائشه معديه ولما لقيته بيصلي..ابتسمت..ومشيت راحت الريسيبشن..و بالصدفه جه مصطفى ومراته مروه••
عائشه:ايه ده مصطفى ومروه؟
••وخدت مروه بالحضن وسلمت على ابنها••
عائشه:الف حمدالله على السلامه ياحبيبتي
مروه:الله يسلمك ياطنط
عائشه:تعالوا اقعدوا
••وراحوا يقعدوا في الصالون••
عائشه:الحمدلله ان انتي رجعتي بيتك ونورتي الدنيا من تاني
مروه:الحمدلله ياطنط..رشاد عامل ايه دلوقت؟
عائشه:عايزه اقولكم بسم الله ماشاء الله.. رشاد النهارده يتحسد..دخلت عليه لقيته بيصلي
مصطفى:طب والله فرحتيني..ده كده في تحسن
عائشه:الحمدلله..انا عارفه انه مش هيخرج من اللي هو فيه ده مره واحده..بس كفايه انه بيحاول مع نفسه
مصطفى:على أقل من مهله..المهم يبقى كويس في الآخر
عائشه:هيبقى كويس ان شاء الله..المهم طمنوني عليكم انتوا كويسين؟
مروه:اه ياطنط الحمدلله
عائشه:لازم تتغدوا معانا النهارده بقى..ده انا مشوفتكيش بقالي كام يوم
••بص مصطفى لـ مروه وهزلها راسه بمعني وافقي،فابتسمت••
<عـنـد مـايـا>
••بعتت التكاليف والملخصات لـ شادي على الواتساب••
شادي:شكراً يامايا تعبتك
مايا:العفو على ايه!
••سكت شويه وبعدين بعتلها تاني••
شادي:ممكن أطلب منك طلب!
مايا:اه اتفضل
شادي:ممكن تحضري معايا حفلة التخرج؟
مايا:هفكر وأرد عليك
شادي:ياريت تيجي، هكون مبسوط
مايا:اوكي..انا ممكن أجي
شادي:خلاص هبقى أقابلك في الجامعه ونتفق
مايا:اوكي تمام
<عـنـد دالـيـدا>
••كانت بتعيط وحابسينها هى وأختها..لحد ماسمعوا صوت زغاريد برا..وشكل الناس بتزيد!..فضلت داليدا تبص حواليها علشان تهرب ولكن الشبابيك كانت مقفوله بـ سلك!..لحد ما جاتلها حسناء ومعاها الكوافيره••
حسناء:لولولولولوي...الكوافيره جاتلك لحد عندك..والنبي ياأبله سماح تشوفي عايزه ايه وتحطيهولها..داليدا دي مفيش حاجه تغلى عليها!
سماح:من عينيا..داليدا مش محتاجه مكياج اصلا دي حلوه طبيعي
حسناء:الله يخليكي أصل احنا مش بننقي أي حد برضه
داليدا(بزعيق) :ومين قالك اصلاً ان انا هتجوز ابنك ده؟؟
حسناء:انتي اتجوزتيه مش لسه هتتجوزيه ياحبيبتي..فا خلي الليله تعدي بدل ما سامي يجي ويسمع الكلام ده ويمد ايده عليكي والناس كلها تتفرج
داليدا(بزعيق) :لو راجل يعملها
فريده(بعياط) :الله يرحمك يا بابا..لو كنت عايش مكنش كل ده حصلنا..احنا ملناش غير ربنا
حسناء(بتريقه) :ليه يابت بنعزبوكم ولا بنعزبوكم؟..ده احنا هنشيلكم على كفوف الراحه
داليدا(بزعيق) :والله لآخد حقي منكم تالت ومتلت..هخليكم تجروا ورايا زي الكلاب علشان بس أرحمكم
حسناء(بزعيق) :احترمي نفسك يابت ومتخلنيش اعلي صوتي..مش عايزين وجع دماغ..خشي ياسماح وحطيلها العفريت الأزرق على وشها خلصونا
••وخرجت من الأوضه وداليدا بتبصلها بـ غل••
<عـنـد رشـاد>
••نزل الشغل وملقاش داليدا وأول حاجه جات في دماغه انها ضحكت عليه و خدت الفلوس وخلعت!••
رشاد:بقى تعمليها فيا يا داليدا؟.. هو انا كل ماأدي لحد الأمان يعملها فيا؟...ماشي
••وقعد على المكتب وهو مدايق..وكل مايتصل بيها مابتردش••
رشاد:اتمسكنت لحد مااتمكنت..انا اللي عبيط أدي لحد مرتب مقدم وفي الآخر يخلع..بس مش هتعرف تهرب مني..انا هعرف ازاي أجيبها!
••يدخل واحد من اللي شغالين مع رشاد••
_أستاذ رشاد..في حد عايز يقابل حضرتك
رشاد:لا انا مش قادر أقابل حد دلوقتي..قوله بعدين
_بس هو عايزك في موضوع ضروري
رشاد:موضوع ايه ده؟.. طيب خليه يدخل
••طلع الشخص ده ونده الحد المهم••
_اتفضل
=شكراً
<عـنـد دالـيـدا>
••طلعت الموبايل ولسه بتتصل بـ رشاد لقيت سامي بيفتح الباب وداخل••