رواية ليه يا زمن
الفصل الثامن والعشرون 28
بقلم نسرين بلاعجيلي
زهرة فضلت في القسم وطلع لها طارق
زهرة : طمني هيطلع؟
طارق: للأسف اخد 4 ايام علي ذمة التحقيق
زهرة: يا نهار اسود أبويا تعبان عنده الربو و السكري مش هيقدر يستحمل البهدلة
طارق: بصراحه الموضوع غريب أنا شوفت ابوكي وقريت التقرير الطبي فا استغربت ازاي ابوكي يضرب الراجل بالطريقه دي
زهرة: طيب ايه الحل ؟
طارق: حاولي تتواصلي مع الراجل دا وكمان الحاج نعمان
زهرة : مين هو الحاج نعمان؟
طارق: صاحب الكمبيالات
زهرة: بس اللي اعرفه ان الكمبيالات دى بتاعت المعلم سعد ابو علي
طارق: يبقي الموضوع فيه إن بصي أنا وعدتك اساعدك ومن غير مقابل باين عليكي غلبانه وعلي نياتك
زهرة: كثر خيرك
طارق : نروح مع بعض نشوف الراجل نحاول معاه يتنازل والا والدك هيروح فيها
زهرة: كثر خيرك مش عارفه اقولك ايه
وهي بتتكلم جاله تليفون
وراح يجري
زهرة استغربت ازاي مشي وسابها
راحت وراه
زهرة: استاذ طارق استني لحظه
بس طارق ركب عربيته وطار
بليل في بيت فاطمه
فاطمه: جهزتوا هدومكم
زهرة: أيوه بس هنروح فين؟
فاطمه: شقه اختك
وداد: يالهوي ياما ازاي؟
فاطمه: قوليلي يا حليتها هنروح فين ؟
زهرة: يا ما بنتك جايه غضبانه
فاطمه: بقولكم إيه لموا الهلاهيل بتاعتكم و حصلوني
وداد : يا نهار اسود دي حماتي المفتريه مش هترضي
زهرة: ربنا يستر
لموا هدومهم ونزلوا
رحمه و فكريه طلعوا عند نوال
نوال: اهلا
فكريه: ابعدي كدا عن الباب احنا جايين نطمن علي البت
رحمه: بعد اذنك يا نوال احنا مش عايزين مشاكل
نوال: اتفضلوا
البت لا بتتكلم ولا بتاكل
فكريه: يا لهوي عليكي وساكته
نوال: اعمل ايه؟
فكريه: تنزلي تقولي لينا تتصلي بالدكتور البت كده هتروح مننا
نوال: حسبي الله ونعم الوكيل في اللي كان السبب
رحمه: نوال بلاش الكلام ده
فكريه: و بلاش ليه ماتخليها تطلع اللي في قلبها
رحمه: مش وقته خلينا نطمن على البنت
دخلت رحمه و فكريه الاوضه
سماح كانت صاحيه وعينها علي السقف
فكريه: لا حول ولاقوة الابالله
رحمه دخلت قعدت جنبها علي السرير
رحمه: روحي جيبي صينيه الأكل يا نوال
نوال: حاضر
فكريه: بسم الله عليكي يا بتني
فيكي إيه بس؟
سماح دموعها نازله من غير كلام
رحمه: اتكلمي يا بنتي فيكي ايه؟
دخلت نوال بالصنيه
نوال: هيكون فيها ايه يعني البت زعلانه من اللي عملتوه
مش دي بنتك اللي مربياها يرضيكي اللي حصل لها
انتوا السبب في ده بنتي كانت حتموت
فكريه: ما خلاص يا نوال
نوال: خلاص ايه؟ بسببكم المعلم طلقني
فكريه: و بعدهالك يا وليه ما تلمي نفسك بقي
نوال: والم نفسي ليه بقي ؟
رحمه: كفايه بقي واطلعوا بره انتم الاثنين
فكريه و نوال طلعوا بره
رحمه قامت قفلت الباب
وقعدت جنبها علي السرير
رحمه: اسمعيني يا سماح انا مربياكي علي إيدي وغلاوتك زي سميره و فرح
لو انا كان عندي شك 1% انك فعلا بتحبي مراد ماكنتش وافقت انه يتجوز فرح انا عارفه انك اتعودتي اي حاجه في ايد فرح لازم تاخديها ومن زمان كده وكنت بطنش كنت بقول دا لعب عيال بس توصل انك تطمعي في عريس اختك وتكدبي علينا وتشوهي سمعتها بين الجيران هو دا اللي خلاني مصممه اجوزها بالسرعه دي
انتي كسرتي فرحت اختك مرتين رغم ان فرح بتحبك اوي اوي بس مش عارفه ليه عملتي كده هو انت كنتي بتنتقمي منها ولا من نفسك ولا من امك عارفه ان هي ليها دور كبير في اللي حصل بس ايه اللي يخليكي تنتحري ؟
وإيه اللي يوصلك للحاله دي ؟ مش بسبب مراد في حاجه انت مخبياها علينا
قوليلي انا امك سترك وغطاكي اللي هتقوليه هيفضل بينا ماحدش هيعرفه
ليه انتحرتي؟؟؟
سماح فضلت ساكته ومش بتتكلم
رحمه: علي راحتك بس انا مش هطلع من هنا غير لما تاكلي
حاولت تأكلها بس سماح كانت رافضه خالص
رحمه خافت عليها وطلعت بره
نوال: طمنيني اكلت؟
رحمه: لا اتصلي بالدكتور يجي يطمنا عليها البت هتروح مننا كده وشها أصفر يمكن يعلق ليها محلول ترجع الدمويه في وشها
نوال: اه يا بنتي كان مستخبيلك فين كل ده؟
رحمه فضلت ساكته و سرحانه
فكريه قربت منها
فكريه: مالك يا ختي ساكته ليه؟
رحمه: البت مش مطمناني ايه اللي يخليها تنتحر
فكريه: ماتكونش فعلا بتحبه ؟
رحمه: مابقتش عارفه اعمل ايه فرح قافله علي نفسها ومش عايزه تتكلم وقاعده تعيط سميره روحت بيتها وقلبها علي اختها
وعلي اللي سافر وماتصلش خالص ولا اخوكي اللي مختفي مش عارفين راح فين
وكريم اللي مابتش في البيت
فكريه: مشاكلكم كثيره يا رحمه
رحمه: يارب الرحمه من عندك
طارق راح يجري علي المستشفى
لقي امه واقفه
طارق: حصل ايه؟
حنان : اهدا يابني هي كانت بتلعب في المدرسه و وقعت من علي السلم
طارق: ايه؟؟؟ وقعت من السلم
حنان: ايوه الدكتوره جوه معاها
طارق: اقسم بالله مش هسكت لازم اخد كل الإجراءات القانونيه ضدهم
ازاي التسيب اللي في المدرسه ده
حنان: قدر الله وماشاء فعل حكمة ربنا
Nisrine Bellaajili
طلعت الدكتورة
طارق: بنتي مالها ؟
الدكتوره: في كسر في رجليها وايدها اليمين وبعض الجروح في جسمها
حنان: ياعيني عليكي يابنتي
الدكتوره : الإسعاف بتقول انها وقعت من السلم وسجلوا الحاله لما وصلوا كدة. بس من اللي انا شايفاه ان في حد زقها جامد من علي السلم
لان لو هي اتزحلقت مكانتش الوقعه تعمل كده بس لو حد زقها جامد تفرق
طارق: لو سمحتي انا عايز تقرير مفصل عن حالتها لاني عايز أبلغ عن المدرسه
الدكتوره: اكيد حضرتك وكمان كلمت الطب الشرعي يعاينوا الحاله
بص حضرتك بنتك جات في حاله وحشه جدا كانت خايفه وبتترعش وبتعيط دلوقتي جبسنا ايدها و رجلها وايدتها حقنه مهدئه ونامت بس ممكن تدخلوا تطمنوا عليها
طارق: شكرا لحضرتك
ودخلوا لها الاوضه . حنان ماقدرتش تمسك نفسها و فضلت تعيط
أما طارق قرب من بنته حضنها و دموعه خانته ونزلت علي خده
فاطمه و بناتها وصلوا الشقه
فاطمه رنت الجرس
فتحت لها عواطف
فاطمه: إزيك يا بنتي امك موجوده؟
عواطف: اه اتفضلي حضرتك
دخلوا الشقه و معاهم الشنط
عواطف استغربت .
جمالات : يا اهلا وسهلا شرفتي يا عروسه يالي فاضحتينا في المنطقه
فاطمه: استهدي بالله ياختي البت لسه صغيرة و اللي حصل لها مش،قليل
جمالات : بنتك مش شايفه بربع جنبه تربيه ماعرفتيش تربي يا فاطمه شغلك في البيوت نساكي انك تربي بناتك
زهره: عيب تتكلمي مع امي بالطريقه دي و اختي متربيه احسن تربيه الدور و الباقي علي المجنون إبنك الحيوان
جت بطه بسرعه وزقت زهره لحد ما وقعت
بطه: اخرسي وقطع لسانك انك تتكلمي علي اخويا كده ؟
فاطمه: استهدوا بالله مايصحش كده احنا ضيوف عندكم
جمالات: وإيه الشنط اللي معاكم دي انتوا ناوين تقعدوا ولا إيه
فاطمه: معلش يا ست جمالات اصل صاحب الشقه طردنا و معندناش مكان نروحه هنقعد في شقه البت لحد مانشوف مطرح يتاوينا
جمالات : نعم يا ختي هي شقه البت بقت شقتها حكم البيت بيت ابونا و الغرب يطردونا
فاطمه: مش القصد ياختي هما كم يوم بس
جمالات: بس بتك طلعت من الشقه وجوزها مش موجود
فاطمه: معلش امسحيها فيا
وراحت مسكت إيد وداد
وطي بوسي واستسمحي من حماتك
وداد: ياما
فاطمه: إسمعي الكلام
زهره بعد ماقامت حست بإهانه كبيره جدا ودموعها بتنزل
كل اللي بيحصل لها كثير اوي مش قادره تستحمل
جمالات: روحي يا بطه افتحي لهم الشقه
بقولك إيه يا فاطمه ابقي انزلي ساعديني عايزه اروق الشقه
اصلي تعبانه واهو تقعدوا بلقمتكم ولا إيه ؟
فاطمه: ومالة ياختي انزل ومانزلش ليه
زهره طلعت من الشقه تجري
جمالات:هي ايه حكايه بناتك يا فاطمه كل شويه وحده تهرب
فاطمة: معلش
طلعوا مع بطه وفتحت لهم الباب
وداد: هاتي المفتاح يا بطه
بطه : لا يا ختي امي قالتلي افتح ليكم الباب بس عن اذنكم
دخلوا الشقه
وداد: عاجبك كده دي عايزه تشغلك خدامه عندها
فاطمه: اخرسي و اسكتي وشوفي الزفته اختك راحت فين لا البت تهرب مننا
وداد: حرام عليكي ياما
فاطمه: حرمت عليكي عشتك اسكتي خالص ماسمعش حسك خالص
أنا داخله اريح شويه و شغليلي التكييف
وداد: تكييف !!!
فاطمه: و مالك يابت خساره في امك ولا خساره
وداد: لا مش خساره
المعلم راح البيت عند رحمه و دخل
كانت فكريه و رحمه قاعدين
المعلم : سلام عليكم
فكريه : و عليكم السلام كنت فين يا خويا ؟
المعلم: مشاغل بس مالكم قاعدين كده ليه ؟
فكريه: مافيش لسه الدكتور خارج من عند البت سماح وقال لازم لها علاج نفسي عندها صدمه
المعلم: لا حول الله والعمل ايه دلوقتي؟
طلع حسنين من الاوضه
حسنين: رجع امها لذمتك يمكن دا يشفيها وكمان البت حاسه انها السبب في طلاق امها الله أعلم بقي الحق و الصح فين ؟
المعلم: و انا مش عايز ارجعها ايه قولك بقي ؟
فكريه: مش هي دي نوال اللي خاصمتنا علشانها جرالك ايه يا سعد اوعي تكون حاطط عينك علي واحده تانيه ؟
المعلم : و ماله لا هو عيب و لا حرام
فكريه: يا راجل انت اتجننت ولا إيه دا انت بقيت جد و بنتك بتتجوز فوق لنفسك يا خويا عيالك بضيعوا منك
حسنين: اسمع مني الكلمتين دول
أم عيالك يتيمه ومالهاش حد قولي هتروح فين ولا تعيش ازاي ولا هتقولي هتخليها في شقتها
اوعي تيجي عليها يا سعد اما اليتيم فلا تقهر
يا سعد فوق من اللي انت فيه ؟
المعلم: هي غلطت ولازم تتربي وانا استحملت منها كثير اوي
رحمه: وهي استحملت منك كثير وانا استحملت منك كثير هو انت ليه اناني كده مش شايف غير نفسك بس
حسنين: يعني انتي يا رحمه ماعندكيش مانع انه يرجعها؟
رحمه : لا طبعا نوال عشرة عمر مهما عملت مش هاجي عليها نوال بتحب المعلم حب هو نفسه مش بيعرفه نوال شايفه فيه أبوها و اخوها و جوزها وكل دنيتها نوال نسيت نفسها و ولادها كل همها ازاي تسعد المعلم اللي هو مش عارف يسعد نفسه ازاي ؟
بص يا معلم قدام اخواتك الاثنين ترجع نوال والا مش هتشوف وشي ثاني في البيت دة اخد بنتي واروح شقة ابني
المعلم: تهديد دة ولا ايه يا رحمه مش هي ضرتك اللي فضحت بنتك يعني انا اخد حق بنتك وانت تضيعيه هي غلطت في حقك وحقي وحق فرح
وكمان ملت عقل البت سماح
وهما بيتكلموا
الجرس رن في الشقه
راحت مسعده فتحت الباب
كانت زهره واقفه وبيتعيط
رحمه : مالك يا زهره؟؟؟
زهره وهي مش قادره تطلع صوتها
زهره: علي ....
وابتدت تعيط جامد
المعلم فضل مصدوم
يا ترى علي جراله حاجه؟
ولا زهره جايه تشتكي منه