رواية جوازة ميراث الفصل التاسع9والعاشر10بقلم رانيا عماره
••بعد ما داليدا ضربت سامي على دماغه ووقع على الأرض..مكنتش عارفه تتصرف!..واتجهت ناحية باب الشقه في محاوله منها للهروب!..لحد مادخلت المطبخ وحاولت تنط من الشباك..تنزل على أي حاجه قدامها!..لحد ما فعلاً نطت من الشباك ونزلت على المواسير لحد ماوصلت للأرض..وكانت خايفه حد يشوفها!..لحد ما وصلت لـ مدخل البيت..ولما حسيت بـ صوت حد نازل على السلم..رجعت استخبيت تاني..وكانت صفاء هى اللي نازله وأول مااتأكدت انها مشيت..فتحت الباب وهربت!..وأول حاجه عملتها..اتصلت بـ أختها وكانت متداريه ورا شجره وهى بتكلمها!••
داليدا(بـ تعب) :الو يافريده..الباب مفتوح دلوقتي..انزلي بسرعه قبل ما حد يشوفك
فريده:باب البيت؟
داليدا:ايوه بسرعه هتلاقيني مستنياكي ورا الشجره اللي قصاد البيت
فريده:طيب ماشي
••وقفلت مع داليدا وخرجت الصاله تبص يمين وشمال..لقيت حسناء معديه بـ طبق الأكل وداخله المطبخ..راحت تجري بسرعه لحد ماوصلت لـ باب البيت وهربت..وأول ماداليدا شافتها شدتها وطلعوا يجروا هربوا!..راحوا لـ رشاد!••
<عـنـد حسناء>
••خرجت من المطبخ ودخلت الأوضه لـ فريده ملقتهاش!.. راحت ضاربه ايديها على صدرها من الخضه••
حسناء:يانهار اسود..راحت فين؟
••وطلعت فوق عند سامي..فضلت تخبط محدش رد..لحد ماطلعت المفتاح من البوك..وفتحت باب الشقه ودخلت..ولما وصلت الأوضه لقيت ابنها واقع على الأرض!••
حسناء:يالهوووي يالهووووي..حصلك ايه يابني؟
••وطلعت تجري عليه..بتبص جنبها لقيت طبق مكسور!..فضلت تجري في الشقه كلها لحد ما لقيت للشباك مفتوح..قربت تبص من و عرفت ان داليدا وأختها هربوا••
حسناء(بصويت) :عملوووها وهربوا!!!...احنا اتضحك علينا!...يالهوووووي!!
••ورجعت الأوضه لـ ابنها..كان فاقد الوعي..نزلت تجري تحت اتصلت بـ ماهر••
حسناء(بعصبيه) :رد بقى... هو ده وقته!!..انا دمي محروق على آخره....الو ياماهر الحقني.. داليدا وأختها هربوا
ماهر(مصدوم) :يانهار اسود بستين نيله فوق دماغك!
••وقام من على الكرسي وابتدا يزعق••
ماهر:انا مش قولت الباب ميتسابش مفتوح ويتقفل بـ زفت فوق دماغكم!..هو انتوا ايه حمير؟..مابتسمعوش الكلام ليه؟؟..مااحنا عارفين انهم ممكن يهربوا في أي لحظه..نقوم مساعدينهم في اللي هما عايزينها يوصلوله؟
حسناء(بعصبيه) :وانا ايه عرفني انهم هيهربوا!..ده انا دخلت المطبخ 10 دقايق بس وطلعت ملقيتش فريده...وخد المصيبه الأكبر..داليدا ضربت سامي بالطبق فوق دماغه وواقع في الأرض مبيتحركش!
ماهر(بزعيق) :يانهار اسود..اتكتمي بقى لحد ماآجي..ده انتوا ليلتكم سوده معايا النهارده...اقفلي
••وطلع من الورشه وقفلها وراحلهم!••
<عـنـد رشـاد و مـصـطـفـى>
••خرجوا من البنك، واليأس والحزن ماسكين مصطفى••
مصطفى:انا اللي كنت أناني معاها اوي..اتهمتها بكل اللي فيا..انا متخيلتش ان الموضوع يوصل لـ مروه.. ده انا حتى مش عارف هقول لأهلها ايه لو عرفوا!..أكيد هيطلقوها مني!
رشاد:متقولش كده..يمكن نلاقيها..انا بس مش عارف اخطط..دماغي دي مش قادره تستوعب كل اللي حصل في الكام يوم دول..كل ده كأنه حلم
مصطفى:انا هوصلك لحد البيت وهرجع القسم أشوف الموضوع ده تاني..انا مش قادر استحمل أكتر من كده!
رشاد:لا انا هاجي معاك..مش هسيبك لواحدك
••بص له مصطفى بحزن وقلة حيله وركبوا العربيه••
<عـنـد دالـيـدا>
••ركبوا تاكسي يوصلهم لحد مكان الشغل ودفعوا الفلوس وده لإن داليدا لما هربت خدت معاها شنطتها والفلوس وحاجتهم من بيت أهلها..وبعد ما دفعوا ونزلوا..قبل ماداليدا تدخل الكافيه لقيت واحد بيمنعها••
_ممنوع
داليدا:هو ايه اللي ممنوع؟..ما في ناس بتدخل اهو!
_دي تعليمات أستاذ رشاد!
داليدا:انا عايزه أقابله..عايزاه في موضوع مهم!
_ممنوع برضه
داليدا:شكراً
••وقعدت على الرصيف هى وأختها••
فريده:هما ليه مش عايزين يدخلونا جوا؟
داليدا:مش عارفه
فريده:وهنعمل ايه..أكيد عمي ومراته بيدوروا علينا!
داليدا(بزعيق) :انا لا يمكن أرجع للناس الزباله دي مره تانيه..انا اتضربت واتهانت يافريده!!..عارفه يعني ايه يجوا عليا في وقت ضعفي!..هى دي صلة الرحم؟..انا مش مزعلني غير ان بابا كان شايفهم كويسين وجدعان وكان بيحبهم وبيشكر فيهم!..ده معداش اسبوع إلا وانا متمرمطه من أذيتهم ليا!..الناس دي انا مش هسيبها يافريده بس لازم أقف على رجلي الأول..وكمان اعرف مين اللي اتسبب في موت بابا
فريده:الناس دي وحشه اوي وانا بكرهم ومش عايزه حد فينا يرجعلهم تاني!
داليدا:مش هيحصل..لو فيها موتي مش هيحصل.. المهم نلاقي أستاذ رشاد انا متأكده انه هيقدر يساعدنا
فريده:يارب يجي!
<عـنـد لميس>
••كان جاي مجدي يزورهم في وجود ضياء لاشين..وقبل مايجي كانت لميس واقفه قدام المرايا بتتزوق!..لحد ما جه من وراها ضياء وهو مستغرب••
ضياء:غريبه انك بتتزوقي..ده انتي مابتعمليهاش علشاني يا لميس..هو في حاجه انا معرفهاش ولا ايه؟
••اتوترت لميس من الكلام واديرت ناحيته وربعت ايديها••
لميس:تقصد ايه بالكلام ده ياضياء؟..قصدك ان انا مهمله؟
ضياء:اه اقصد كده..ماشاءالله عليكي تتحسدي..لماحه اوي
لميس:هو انا مقولتلكش؟..أصل بعد الزياره التقيله على قلبي دي.. خارجه في بارتي واحده صاحبتي
ضياء:وتقيله على قلبك ليه؟..ده حتى يعني مجدي ومراته مبيجوش إلا كل فين وفين
لميس:مش عارفه بس مبرتاحلهمش..حاساهم مش لوني
ضياء:مش لازم..المهم انا اكون مرتاح
••وقعد وراها على السرير وحط رجل على رجل••
ضياء:صحيح مقولتيش..هنقدملهم ايه؟
لميس:ماتقدملهم اللي تقدمه انا مالي هعملهم ايه يعني؟..وبعدين من امتى وانت بتهتم لما بيجيلنا حد هتحط ايه وهتعمل ايه؟
ضياء:يعني انتي معندكيش فكره نحطلهم ايه؟
لميس(بقرف) :لا معنديش
ضياء:بس انا عندي
••وطلع الموبايل من جيبه وفتحلها فيديو ووراهولها بكل برود..وهى أول ماشافته وشها جاب ألوان وارتبكت!••
لميس(بتوتر) :ده.. ده ايه ده... ايه الكلام ده.. ده ايه اصلاً؟
ضياء:ولا نقدملهم ده؟
••وفتح تسجيل صوتي ليهم..تنحت لميس واتصدمت..وبقيت تنهج من كتر التوتر والخوف!••
ضياء:ايه سكتي ليه؟..مش ده صوتك برضه؟
لميس(بتوتر) :ده.... ده.... مش مش مش صوتي.. عادي يعني..ده أكيد حد عايز يوقع مابينا
ضياء(بيضحك) :هاهاها..وقولي بقى كمان ان الفيديو متفبرك
لميس(بخوف) :انت عايز ايه؟
••راح ضياء قايم بكل برود وخرج من الأوضه في صمت.. وده اللي خلاها خافت أكتر ومابقتش عارفه تعمل ايه!..لحد ماانهارت من العياط وطلعت الموبايل تتصل بـ مجدي••
لميس:الو انت فين؟؟
مجدي:مسافر
لميس:مسافر؟ مسافر ازاي يعني.. مش انت قولت انك جاي؟
مجدي:دي أوامر أستاذ ضياء هو حد يقدر يتكلم معاه؟
لميس(بعياط) :ضياء عرف ازاي؟
مجدي:ماهو اللي باعتني ليكي يا لميس..كان بيختبر إخلاصك بس للاسف سقطتي في الاختبار
لميس(مصدومه) :انت بتقول ايه؟؟..ضياء هو اللي ورا كل ده؟.. انتوا بتلعبوا معايا ياولاد الكل*؟؟
مجدي:ده حتى المكالمه دي متسجله برضه..انتي كده ثبتيها على نفسك اكتر ياحبيبتي
لميس(بزعيق) :يانهار اسود.. ده انا هوديكم في ستين داهيه بقى انا تعملوها معايا؟..اااه يازبااااله انا هفرمكم..هخفيكم من على وش الأرض ده...
••ولسه بتتكلم..كان مجدي قفل السكه في وشها..انهارت أكتر وقربت من الشباك تبص لقيت ضياء جاي بالبودي جارد بتوعه وشكلهم ناويين على الشر..وكانت ملامحه كلها غضب••
لميس(بصدمه) :ياااارب..احفظني من شر ضياء!!
••لحد ما ضياء وصل ونده عليها من تحت••
ضياء:لمييييس....لميييس..انزلي
••خرجت لميس من أوضتها وهى مرعوبه ووقفت على السلم ودموعها نازله من الخوف..وبناتها الاتنين خرجوا••
يمنى:في ايه يا بابي؟
هنا:انتي كويسه يا مامي؟
ضياء:لمى حاجتك وامشي من هنا
لميس(بعياط) :مينفعش!..انا ليا حاجات كتير هنا..وكمان مقدرش أسيب البنات!
ضياء(بضحكة سخريه) :انتي هتنزلي بالهدوم اللي عليكي دي ويبقى الحمدلله على كده..ده نقطة التراب اللي هنا ملكيش حاجه فيها..وبناتك دول مش هتشوفيهم تااني..ورجليكي الحلوين دول ميعتبوش عتبة الفيلا مره تانيه
لميس(بعياط) :طيب اديني فرصه أفهمك!..مش يمكن انت فاهم غلط؟..أكيد في سوء تفاهم!..ده انت جوزي وبينا أيام كتير حلوه..ده انا مش هلا...
ضياء(بيقاطعها) :مش هعيد كلامي..يلا برا.. براااا
يمنى:في ايه يابابي حد يفهمنا؟
ضياء:متخافيش هتفهمي يا يمنى..الفيديو هيتبعتلك انتي وأختك..لأ ومش انتي واختك وبس.. لالا.. هيتبعت لكل العيله..والموضوع هيفضل يتطور يتطور لحد ما يوصل للعالم كله
هنا:هو في ايه احنا مش فاهمين حاجه.. فيديو ايه؟
لميس(بعياط) :لا يا ضياء اوعى تعمل كده ده انا مهما كان أم بناتك..ولو صورتي باظت.. انت كمان صورتك هتبوظ!
ضياء:ماهو لما يقولوا واحد قتل مراته عشان خاينه..يبقى صورته هتبوظ ليه وهو غسل عاره بـ ايديه الاتنين؟..بس انا مش هعمل كده علشان الموت راحه وانا مش عايزك ترتاحي..لأ هسيبك بتتعذبي لحد ماتموتي لواحدك
لميس(بعياط) :حرام عليك انا مستاهلش كل ده
ضياء(بزعيق) :طلعووها براااا.. يلاااا..نضفوا البيت من الأوباش والخوَنه!
••طلعلها البودي جارد وسحبوها وهى بتصرخ••
لميس(بصريخ) :متبعدونيش عن بناتي...انا بحبهم...حرام عليكم...والله حرااام
يمنى(بعياط) :سيبوا مامي..ياماامي!!
ضياء(بزعيق) :ادخلوا اوضتكم يلاااا..مش عايز أشوف حد قدامي!
••وطلع المسدس وضرب نار..ووقعت النجفه على الأرض ومن كتر خوف البنات منه دخلوا اوضتهم••
ضياء(بزعيق) :انا ضياء لاشين ياشوية زبااااله...أوساااخ!!
<عـنـد ماهر>
••رجع البيت وطلع فوق في شقة سامي..وحسناء كانت بترش مايه على وشه لحد ما فاق..وكان تعبان جداً من الخبطه••
ماهر:بقى بنت اخويا تعمل فينا ده كله؟
حسناء(بصويت) :اه ياخويا شوف سبحان الله..حتة بت متسوااش عملت في ابننا كل ده!..احنا اتسكعنا على قفانا ياماهر من بتين ميسووش ربع جنيه في سوق الحريم!
ماهر(بزعيق) :متقوليش كده متخلنيش امد ايدي عليكي..انا متضحكش عليا ولا حد يقدر يعملها!..هيروحوا مننا فين يعني..ايه اتشلينا ومش هنعرف نلاقيهم؟..هنجيبهم لو كانوا تحت الأرض!
حسناء:ده ان لاقيتهم!
سامي:اااه اااه
ماهر:سلامتك..هتصلك بالدكتور يجي يكشف عليك.. شكل الضربه كانت جامده!.. هو انت ايه يابني اللي حصل بينك وبينها؟
••وطلعت الموبايل اتصلت بـ بنتها••
حسناء:انتي فين؟
صفاء:في الكوافير بعمل شعري
حسناء:الحقينا في المصيبه اللي وقعنا فيها!
صفاء(بخوف) :مصيبة ايه؟
حسناء:داليدا ضربت اخوكي على دماغه وهربت هى وأختها
صفاء:يانهار اسود ضربته ازاي يعني؟ طب وهو عامل ايه دلوقت؟
حسناء:ضربته يعني ضربته ملهاش معنى تاني!
صفاء:قلبي مكنش مرتاحلها..اللي زي داليدا دي ميجيش من وراها غير المشاكل ووجع الدماغ
حسناء:ولما الناس تسأل عليها نقول ايه هربت مننا؟
صفاء:متخافيش كده كده هترجع تاني علشان ورث أبوها..احنا مابينا حبال كتير لسه متقطعتش وبكرا تيجي غصب عنها عشان مصلحتها فا احنا بقى عايزين نشتغل على الحته دي
حسناء:ازاي ياصفاء؟ ماتفهميني!
صفاء:يعني مهما هربت.. في الآخر هترجع ساعتها مش هتطول مليم من ورث أبوها إلا لما تعيش خدامه تحت رجلينا وتسمع الكلام بالحرف..أصل مهما هربت مسألتيش نفسك هتصرف عليها وعلى أختها منين؟..فا متقلقيش هترجع هترجع مفيهاش كلام
حسناء:دماغك سِماويه ياصفاء..مش عارفه طالعه كده لمين!..المهم ارجعي بدري لأننا هناخد اخوكي وهنروح نكشف عليه ومش هتلاقي حد يفتحلك
صفاء:لا متقلقيش انا كده كده معايا مفتاح..ابقوا طمنوني بس
حسناء:طيب..سلام
صفاء:سلام
حسناء:عامل ايه دلوقتي يا سامي؟
سامي(بتعب) :تعبان اوي ودماغي بتلف
حسناء(بصويت) :تبقى مصيبه لو جابتلك ارتجاج في المخ!..كان مستخبيلنا كل ده فين بس يارب!
<عـنـد رشـاد>
••بعد ماراحوا القسم..أخوه وصله لحد شغله••
مصطفى:خد بالك من نفسك
رشاد:وانت كمان
••ونزل من العربيه..وأثناء ماهو كان داخل الكافيه.. قامت داليدا هى وأختها بسرعه علشان يلحقوه••
داليدا:أستاذ رشااد..أستااذ رشاااد
رشاد:داليدا؟...ايه اللي جابك هنا وعايزه ايه؟
داليدا:انا جايه في موضوع مهم..ومن الواضح انك فهمت غلط..بس قبل أي حاجه دي فلوسك
••وطلعت الفلوس من شنطتها وادتهاله••
داليدا(بحزن) :هما ناقصين ٢٠٠ جنيه بس هرجعهملك في أقرب وقت..انا اتحطيت في ظروف صعبه غصب عني
رشاد:ظروف ايه دي يااستاذه داليدا؟
داليدا:هنتكلم هنا؟
رشاد(بتريقه) :لا ازاي اتفضلي
••وخد داليدا وأختها ودخلوا المكتب وقعدوا••
داليدا(بحزن) :نفس اليوم اللي حضرتك اديتني فيه الفلوس انا اتكتب كتابي على ابن عمي بالإجبار..وتاني يوم اتجوزته..انا اتحبست في بيت عمي وكنت بتضرب وبتهان..استغلوا موت أبويا علشان يعملوا كل اللي هما عايزينه..ولما جات الفرصه هربت منهم..مش عارفه ليه جيت لـ حضرتك انت بالذات بس يمكن علشان مليش حد..وأول حاجه حبيت اعملها ارجعلك فلوسك لإن مش هقبل على نفسي آخد فلوس في حاجه متعبتش فيها..انا مش عايزه حد يشوفني حراميه او نصابه.. انا بجد اتحطيت في ظروف صعبه جداً
••ولما رشاد سمع كلامها حس انه اتسرع وفهم الموضوع غلط!لدرجة انه أخد قرارت غلط ووصى كل اللي شغالين معاه لو شافوها..ممنوع تدخل!..ابتدت نبرة صوت داليدا تتغير وبقيت تعيط••
داليدا:انا اسفه لو تقلت على حضرتك
••وقامت هى وأختها ولفيت ضهرها ولسه هتمشي..راح رشاد ندهها••
رشاد:استني يا داليدا..استني بس.. هو سوء تفاهم وانتي وضحتي موقفك فا خلاص مفيش مشكله..اتفضلي اقعدي انا لسه متكلمتش
••بصيت داليدا في الأرض وهى مش ملاحقه دموعها••
رشاد:ممكن متعيطيش!..تعالي اتفضلي..اقعدي يا فريده.. اقعدوا وهنلاقي حل ان شاء الله
••رجعت قعدت داليدا هى وأختها..وقام رشاد وجاب كرسي قعد قصادهم..وكان متأثر بكلامها••
رشاد:ميحسش بالوجع غير صاحبه او اللي جربه وعاش نفس ظروفه!..وانا عيشت ظروفك دي بس بإختلاف التفاصيل ويمكن معاكي انتي بالذات الموضوع يوجع أكتر.. انتي قولتي ان والدك لسه متوفي وحصل كل ده..انا عارف ان انتي مظلومه من الدنيا..بس ممكن تهدي وهنلاقي حل
داليدا(بعياط) :مش عايزه أتقل على حضرتك..أرض الله واسعه وأكيد ربنا مش هيسيبني..انا واثقه في ربنا وعارفه انه مش هيخذلني
رشاد:ونعم بالله..بس الناس لـ بعضها!..انتي بس احكيلي تفاصيل أكتر علشان افهم..انتي ازاي اتجوزتي ابن عمك بالغصب!
••بصيتله داليدا وعيطت أكتر..راحت أختها هى اللي حكيت••
فريده:داليدا مش بتحب سامي..وهو عايز يتجوزها من زمان وحاططها في دماغه وبيجري وراها في كل حته..ولما بابا مات عدى حوالي 4 أيام بالكتير وكان سامي جايب اهله والمأذون وجاي.. وداليدا مكنتش موافقه لحد مارشوا حاجه في وشها وأغم عليها وكتفوني وودونا البيت هناك..وكتبوا الكتاب وتاني يوم كنا لسه محبوسين لحد ما سامي خدها وروحنا الفرح ومن ساعة مارجعوا وهو بيضربها..حتى انا ربطوني جوا الأوضه!
رشاد:المفروض انه ابن عمك..يعني يكون أكتر حد خايف عليكي..وحتى لو حس انك مش عايزاه ميضغطش عليكي ويسيبك براحتك!
داليدا(بعياط) :من يومه وهو محدش قادر عليه..حتى عمي ومراته واخته ماشيين وراه وبيسمعوا كلامه في كل حاجه..انا عمري ماحسيته الانسان اللي ينفع أكمل حياتي معاه..وكنت دايماً شايفاه أخ وبس!
رشاد:طب وانتوا هربتوا من البيت كده صح؟
فريده:ايوه هربنا..ولو رجعنا هيحصل فينا زي ما كان بيحصل
رشاد:لا مش هيحصل تاني..عموماً يا أستاذه داليدا انا مجيبتش حد مكانك..انا هعتبرك كنتي غايبه لأسباب مرضيه..انا عندي شقه هتكون حلوه ليكم
داليدا:لا..كفايه الشغل..وانا هدور على شقه صغيره
رشاد:اسمعي الكلام يا استاذه داليدا..انا هساعدكم في الموضوع ده..انا عندي أخت وانتوا في مقام أختي سلمى!
داليدا(بحزن) :مش عارفه أشكر حضرتك ازاي!
رشاد:متشكرنيش..تعالوا معايا نشوف الشقه..اتفضلوا
••وقام ووراه داليدا وأختها••
<عـنـد مـصـطـفـى>
••رجع البيت.. وقعد على الانتريه وكانت نفسيته متدمره..ومش عارف هيطلع من كل ده ازاي!••
مصطفى:حقك عليا يا مروه..انا كنت غلطان وقتها ومفهمتش ان طبيعي تكوني خايفه على نفسك..وإن كل اللي فهمته انك انانيه و بتفكري في نفسك وبس..انا اللي اناني مش انتي!..إن شاء الله هلاقيكي..وهنمشي من البلد كلها..كفايه خوف وقلق بقى انا تعبت!..عايزين نعيش في راحة بال!.. بس اللي انا مش قادر استوعبه.. كلام بابا!.. كلامه مدخلش دماغي ولا قادر اقتنع بيه.. انا متأكد ان في سبب تاني هو اللي اتسبب في كل ده!..ياارب انا بجد تعبت..عايز أخرج من كل ده!
••وقام من مكانه دخل الأوضه..وبعدين حس بـ حركه غريبه في الريسيبشن..خرج برا بـ حذر وبطء..لحد ماشاف فار..اتنهد وحط ايده على قلبه..كان فاكره حد نط عندهم! ••
<عـنـد دالـيـدا>
••راحوا مع رشاد يشوفوا الشقه..كانت شقه صغيره خالص..أوضه وصاله ومطبخ وحمام صغير وبلاكونه صغيره••
رشاد:اتفضلوا...انا عارف انها مش قد مقامكم..بس تقضي الغرض دلوقت.. المهم بس محدش يعرف مكانكم!
داليدا(بحزن) :مش عارفه اشكر حضرتك ازاي!..بجد شكراً ليك!
رشاد:متشكرنيش انتوا زي اختي..ربنا يحفظكم..لو احتاجتوا أي حاجه انتوا معاكم رقمي..انا هبعتلكم حد بـ أكل..أكيد يعني مكلتوش ومكنش ليكم نفس الايام اللي فاتت
داليدا(بحزن) :ربنا يخليك يااستاذ رشاد مش عارفه أودي جمايلك دي فين
رشاد:احنا قولنا ايه؟..بلاش الكلام ده بقى..يلا عايزين حاجه؟
داليدا:شكراً لـ حضرتك
رشاد:سلام
••وخرج من الشقه وداليدا قفلت الباب..وقعدوا يرتاحوا••
فريده:عمو رشاد ده شكله طيب
داليدا:أستاذ رشاد ده هو الخير اللي بابا كان بيعمله مع الناس!..ربنا يراضيه.. ويراضينا احنا كمان!
••وأثناء ما كان رشاد نازل من البيت..شاف مروه مرات مصطفى ماشيه مع واحده في الشارع!••
الفصل العاشر
رشاد: دي مروه!!
••ومشى وراها لحد ما لقاها داخله محل هى وصاحبتها..راح مطلع موبايله واتصل بـ مصطفى••
رشاد: انا شوفت مروه!
••قام مصطفى من مكانه وهو مش مستوعب!••
مصطفى:مروه ايه اللي شوفتها؟..انت بتقول ايه يارشاد!
رشاد:زي مابقولك كده شوفتها..هى دلوقتي في محل مع صاحبتها..وانا واقف برا..عايز تيجي تعالى بس بسرعه
مصطفى:انت فين؟؟
••وبعد ما قاله العنوان..ركب عربيته وكان طاير بيها على أعلى سرعه علشان بس يلحق مروه!..ولما وصل كانت مروه وصاحبتها بيركبوا تاكسي••
مصطفى:اركب بسرعه
••ركب رشاد جنب مصطفى..ومشوا ورا التاكسي لحد ما وقفوا في مكان غريب يشبه الصحراء..نزلت مروه وصاحبتها ودخلوا المبنى اللي في المكان ده..وكل ده و رشاد ومصطفى بيراقبوهم من العربيه..وبعد ما دخلوا المبنى..كان مصطفى مش قادر يستحمل وعايز يدخل المكان ده بأي شكل••
مصطفى(بعصبيه) :انا مش قادر يا رشاد.. لازم أنزل!
رشاد:استنى يامصطفى متبوظش المخطط بتاعنا!..لو نزلت ممكن نتكشف
مصطفى(بزعيق) :نتكشف ايه؟..هو مين اللي سكته مش مظبوطه ومريب.. احنا ولا هما؟.. انا عايز اعرف مروه بتعمل ايه جوا!!
رشاد:استنى لحد مايخرجوا!
مصطفى(بزعيق) :وانا مش هستنى.. وسع ايدك
••ونزل مصطفى من العربيه ووراه أخوه رشاد لحد مادخلوا المبنى..كان مبنى ضخم وعامل زي المتاهه••
رشاد:انت ليه مابتسمعش الكلام؟..احنا كده هنغرق بسببك
مصطفى:عايز ترجع العربيه..ارجع..انا مطلبتش منك تيجي معايا!
رشاد:مينفعش اسيبك لواحدك..انا ايه ضمني ان المكان ده أمان!
مصطفى(متعصب) :مانا لازم أعرف مروه بتعمل ايه هنا!!
••ووقت ما هما ماشيين..سمعوا صوت خطوات نازله على السلم..لحد مااتداروا ورا حيطه..ولقى اتنين رجاله بودي جاردات لابسين بدل سوده ونضارات شمس..وجايين ناحيتهم!..وفي اللحظه دي كان لازم يمشوا بعيد من غير مايعملوا صوت!..لحد ماقابلهم سلم..طلعوا عليه ولحد الآن كان الدور زي المتاهه ومش عارفين يروحوا فين!..وكل ما يمشوا خطوه يسمعوا صوت حد جاي..لحد مااضطروا يخرجوا من المكان ورجعوا العربيه تاني••
رشاد:دخلنا زي ما خرجنا..معملناش أي حاجه غير اننا عرضنا حياتنا للخطر وبس!
مصطفى(متعصب) :انا هتجنن...ازاي مروه متخطفتش!..وايه اللي جايبها الاماكن الغريبه دي!
رشاد:انا زي زيك مش عارف!..إلا لو دي لعبه بتلعبها علينا كلنا
مصطفى:وهى ليه تعمل كل ده اصلاً!!
رشاد:لازم تعرف أهلها بـ كل حاجه حصلت..الموضوع ده مينفعش يتسكت عليه
مصطفى:عندك حق.. انا هعمل كده فعلاً
••و دَور العربيه ومشوا من المكان المريب ده••
<عـنـد لـمـيـس>
••رجعت بيت أهلها..وكانت قاعده لواحدها لإن أهلها متوفيين..وطول ماهي في البيت كانت بتكلم نفسها••
لميس:انا مستغربه رد فعل ضياء!..ده مش ضياء اللي انا اعرفه!..في حاجه غلط..ضياء ده ابليس ماشي على الأرض..انا أكيد مش هفرح لو كان أذاني!..بس هو ازاي كان رد فعله بالبساطه دي!.. انا توقعت انه هيعمل الأكتر من كده..طيب ازاي؟...اعتقد ان سكوته ده وراه حاجه كبيره ناويلي عليها!.. انا بجد مش هستحمل أذيته ليا!..ولا ده هدوء ما قبل العاصفه؟..انا لازم امشي من مصر قبل مايعمل فيا حاجه.. بس هاخد البنات الأول..لو سيبتهم أكيد هينتقم مني فيهم!.. ايوه هاخدهم معايا مفيش حل تاني!
<عـنـد دالـيـدا>
••فرشوا حاجتهم في الشقه..وشويه والباب خبط..راحت تبص لقيت حد معاه أكل وده أكيد تبع رشاد!..فتحت داليدا الباب وابتسمتله••
_انا تبع أستاد رشاد..وبعت الأكل ده ليكي
داليدا:ماشي شكراً
_العفو
••وخدت منه الأكل وقفلت الباب وقعدت..وأختها جات••
فريده:الشقه دي جميله اوي برغم انها صغيره
داليدا:صغيره كبيره مش هتفرق..المهم اننا نلاقي مكان نعيش فيه لحد مانلاقي حل
فريده:طيب هو انتي هتدفعي فلوس الشقه؟
داليدا:أكيد طبعاً هخليه يخصم الايجار من مرتبي..انا مينفعش أعيش عاله على حد!..عايزه كل حاجه تكون بـ تعبي انا..علشان أحس بقيمتها ومتبقاش عيني مكسوره لحد
••وفتحت الأكل وقعدوا على الترابيزه••
فريده:احنا لازم نشكر عمو رشاد على الأكل ده
داليدا:ده أكيد..يلا كلي
فريده:مش هاكل لواحدي..هتاكلي معايا!
داليدا:مليش نفس يا فريده..كلي انتي ياحبيبتي
فريده:خلاص يبقى مش هاكل
داليدا:بطلي بقى يافريده وكلي!
فريده:مش هاكل!
داليدا:طيب انا هاكل معاكي بس حاجه بسيطه علشان مش قادره
فريده:ماشي
<عـنـد مـصـطـفـى>
••راح هو ورشاد بيت أهل مروه••
هدى:اشربوا...طمنوني عليكم عاملين ايه؟
رشاد:احنا مش جايين نتضايف..احنا عايزين نعرف حاجه واحده ليه بنتك عملت كده؟
هدى(بإستغراب) :بنتي انا؟.. مروه عملت ايه؟
رشاد:مروه اتخطفت
••اتصدمت هدى أول ماعرفت..وقامت من مكانها وصوتت••
هدى:بنتي فين يارشاد؟؟؟...واتخطفت ازاي؟؟
مصطفى:بنتك متخطفتش
هدى(بزعيق) :انتوا هتشتغلوني؟..اخوك يقول اتخطفت وانت تقول متخطفتش؟؟
مصطفى:ايوه فعلاً بنتك متخطفتش وده اللي انا لسه عارفه من شويه..بنتك عامله فيلم هندي والله اعلم هى قاعده فين دلوقت!
هدى(بزعيق) :انا مش فاهمه حاجه!
مصطفى:انا هفهمك..الاستاذه لما رجعت امبارح ملقيتهاش والباب كان مقفول ٣ قفلات وده يدل انها مدخلتش الشقه أصلاً.. روحت عملت بلاغ ومرضتش اجيبلك سيره علشان متنهاريش ويحصلك حاجه..والنهارده الاقي رشاد بيقولي ان الهانم داخله محل هى وصاحبتها ولما مشينا وراهم لقيتها داخله متاهه غريبه..انا بقى عايز افهم ايه ده!
هدى(بصويت) :وانت ايه عرفك انها هى؟
مصطفى:هو في واحد هيتوه عن مراته برضه؟
هدى(بصويت) :يانهار اسود..ايه اللي بيحصل ده؟
••طلعت هدى موبايلها واتصلت بـ مروه..ورشاد ومصطفى كانوا بيبصوا لـ بعض..بس مروه مكنتش بترد!••
هدى(بصويت) :ردي بقى يامروه حرام عليكي!..بتعملي فينا كده ليه عملنالك ايه بس!
مصطفى:ومش هترد اساساً!!.. بنتك وراها لعبه كبيره ايه هى بقى دي حاجه ميعرفهاش غير ربنا..بس والله لو طلع اللي في دماغي صح ماهتقعد دقيقه واحده على ذمتي!
هدى(بعياط) :لا ياحبيبي متقولش كده.. دي مروه وانت عارفها كويس ويستحيل تعمل كده أصلاً.. اكيد في حاجه غلط..ماتقوا حاجه يارشاد!
رشاد:هقول ايه أكتر من اللي اتقال؟..مابقاش في حاجه تانيه تتقال بعد اللي شوفناه بـ عنينا.. يلا يا مصطفى
••وقام رشاد ووراه أخوه مصطفى••
مصطفى:قلبي حاسس ان بنتك نهايتها معايا قربت
••وسابها ومشى وهى كانت لسه بتعيط••
<عـنـد سـامـي و أهـلـه>
••خدوه للدكتور في المستشفى..يعمل أشعه••
حسناء:يارب هاتها سليمه
الدكتور:الجمجمه سليمه مفيهاش اي حاجه بس ده من أثر الوقعه..فيها شوية كدمات بس هتروح مع الأدويه والمسكنات
ماهر:انت متأكد يادكتور انه سليم؟ أصله من وقتها وهو بيتألم!
الدكتور:الأشعه مفيهاش أي حاجه..إحمدوا ربنا انها جات سليمه
حسناء:اللهم لك الحمد والشكر يارب..الحمدلله
••وبعد ما الدكتور كتبلهم على العلاج..خدوه ومشوا••
حسناء:براحه عليه يا ماهر
ماهر:ربنا يشفيك يابني..حقك هيرجع ان شاء الله
سامي(بتعب) :مش هسيبك يا داليدا
حسناء:اللهي لا يوفقها ولا يربحها..ويقعدلها في صحتها يارب
ماهر:أجلوا الكلام ده لـ بعدين واللي يسأل سامي حصله ايه.. الاجابه معروفه.. وقع من على السلم!
حسناء:حاضر
<عـنـد صـفـاء>
••بعد ماخلصت في الكوافير..راحت تركب مركب على النيل علشان تغير جو..وهى باصه للسما كانت بتحلم! ••
صفاء:نفسي أعيش عيشه حلوه..وسط الناس الحلوه..ياسلام كده لو أصحى كل يوم ألاقي قصادي المنظر الحلو ده..ولا الهوا اللي يرد الروح..مزاج والله
••جه واحد جنب منها وكان ماسك موبايله بيتكلم فيه••
_ايوه خلاص لقيتها..قاعده جنبي اهو..ده انا بدور عليها بقالي كتير...ايوه وحياتك هى بحلاوتها وجمالها بكل حاجه... انا بجد مش مصدق نفسي...دي حته من القمر..مانت لو شوفتها هتعرف ان عندي حق
••وبمجرد ما صفاء سمعت الكلام ده..كانت مركزه في الكلام ومش عارفه هو بيتكلم عن مين!••
صفاء:ماله ده!
_طيب هكلمك بعدين علشان اللي يشوفها يضعف قدام جمالها وانا مش عايز أضيع دقيقه واحده..يلا سلام
••بعد ماخلص كلام..كانت صفاء متنحه فيه ومستغربه ده مين وبيقول كده ليه؟ ••
_قمر والله
صفاء(بزعيق) :ما جرا ايه ياجدع انت..عمال تعاكسني من ساعتها وانا عماله أقول يمكن مش عليا..يمكن قصده واحده تانيه لكن لاااا انت زودتها...مالك ومالي تعرفني منين؟؟
_مابراحه عليا..ولا هى كلمة الحق بتزعل؟
صفاء(بزعيق) :وانت مالك يابارد؟..تعرفني منين انت علشان تقول الكلام ده؟
_هو لازم اكون عارفك علشان أقول اللي في قلبي؟..انا الصراحه مشوفتش في جمالك ده قبل كده
صفاء(بزعيق) :طب اتعدل بدل مااصوت والم عليك الدنيا بحالها
_خلاص ياستي انا آسفلك
صفاء(بزعيق) :لا خلاص ولا مخلصش ملكش دعوه بيا
_حاضر
صفاء(بتبرطم) :جاتك داهيه وانت حلو كده
••وقامت من مكانها وهى ماشيه..كلمها بصوت عالي••
_هشوفك تاني!
صفاء(بزعيق) :ماقولنا بلاش الطريقه دي!..هتزعل يا حلو
_حلوه من بؤك
••بصتله صفاء ومشيت..ده طبعاً بعد ما دخل دماغها!••
<بـعـد اسـبـوع>
••كانت كل حاجه زي ماهى..وقررت داليدا تنزل الشغل لانها اتأخرت كتير ولازم أختها تاخد دروس علشان امتحاناتها••
داليدا:خدي يا فريده..معاكي 100 جنيه فلوس الدرس..خدي بالك من نفسك وبلاش تقفي تتكلمي مع حد!
فريده:حاضر متخافيش
داليدا:خلصي دروسك وعدي عليا في الشغل نروح سوا
فريده:حاضر
داليدا:لا اله الا الله
فريده:محمد رسول الله
••نزلت فريده الدرس..وداليدا دخلت تحضر شنطة الخروج..وبعدين نزلت هى كمان وراحت الشغل..وكان رشاد قاعد في المكتب بيشرب قهوه••
داليدا:صباح الخير يااستاذ رشاد
رشاد:صباح النور يااستاذه داليدا..اتفضلي
••قعدت داليدا على الكرسي••
داليدا:بعتذرلك عن تأخيري في الشغل..خلاص الفتره الجايه هتكون كلها شغل وبس..انا بس كنت محتاجه ارتاح الأول
رشاد:وارتاحتي؟
داليدا(بحزن) :بيني وبينك مرتاحتش..ومش هقدر ارتاح..كل يوم بيعدي عليا وانا بموت بالبطئ..المهم سيبك من كل ده..حضرتك عامل ايه دلوقت؟
رشاد:الحمدلله أحسن شويه..خدي الشغل ده اعمليه على الكمبيوتر
داليدا:حاضر
••وخدت اللابتوب وابتدت تشتغل..وأثناء ماهى شغاله..كان رشاد كل تفكيره هيلاقي يوسف ابنه ازاي..وافتكر يوم ما ابنه اتخطف..كان قاعد هو وداليدا نفس القاعده دي!••
رشاد:يوسف وحشني اوي!
••ولما فاق من خياله..اكتشف انه بيتكلم بصوت عالي لدرجة ان داليدا سمعته وسابت الشغل من ايديها وهى متأثره••
داليدا:حضرتك مش عارف طريقه لحد دلوقت؟
رشاد:لا..وعملنا بلاغ محدش لاقيه..انا فقدت الأمل..حاسس انه...اتقتل!!
داليدا:لا بعد الشر ان شاء الله هيكون بخير..اعتقد لو لقدر الله حصل حاجه كان الشخص اللي عمل كده كلمك يبلغك
رشاد:تفتكري؟
داليدا:ايوه طبعاً..لكن مادام هو ساكت كده يبقى ابن حضرتك بخير
رشاد:ياااارب...يااارب
••ولفلها صورة يوسف يوريهالها وهو متأثر بيه! ••
رشاد:ده يوسف..عنده سنتين بس!
داليدا:ماشاء الله زي القمر..ربنا يرجعهولك بألف سلامه
رشاد:ياااارب...انا قلبي محروق اوي عليه...بجد خايف اوي
داليدا:لا ان شاء الله خير يااستاذ رشاد..انا حاسه انه عايش..لان زي ماقولت لـ حضرتك..لو حصل أي حاجه أكيد الشخص ده هيبلغكم..بس هو ليه بيعمل كل ده؟
رشاد:ده اللي انا نفسي أفهمه!..بس مش لاقي جواب!..ليه كل ده يحصلي في حياتي وانا ٢٦ سنه بس!!..هو مش المفروض أحسن فتره هى فترة الشباب؟..طيب لما الواحد يكبر ويعجز.. ازاي هيقدر يقول الجمله الشهيره "ليت الشباب يعود يوماً".. ليت على ايه؟.. على الظلم ووجع القلب؟.. ولا على الفراق وكسرة النفس والأذيه؟..تفتكري هيكون في حاجه وقتها تخلينا نتمنى نرجع شباب تاني؟
داليدا:مش بس حضرتك اللي كده..ناس كتير كده وانا من ضمنهم..مش يمكن ده اختبار من ربنا يشوف مدى صبرنا على ابتلاءه؟..اللي اعرفه ان ربنا مش بيختبر أي حد..ربنا بيختار اللي عارف انهم قد الاختبار ده وعندهم القدره على تحمله..ربنا عمره مابيدي ابتلاء لإنسان وهو فوق قدرته!.. بالعكس حتى لو ابتلاء شديد وبيهد بس انت بتكون قده واللي يثبت كلامي ان أيام كتير عدت كنا فاكرينها مش هتعدي!
رشاد:صح يااستاذه داليدا عندك حق..هو اختبار وان شاء الله هعدي منه..معلش انا اسف مش عارف ازاي اتكلمت!.. انا كنت بفكر بيني وبين نفسي وفجأه كل اللي بقوله طلع بس بصوت عالي!
داليدا:لا حضرتك متقولش كده..ده الكلمه الطيبه صدقه..اوقات الكلمه الحلوه بتهون على الانسان أوجاعه
رشاد:صح يااستاذه ياداليدا
••دخل شخص من اللي شغالين مع رشاد••
_استاذ رشاد..احنا كنا حابين ندخل أصناف جديده للكافيه
رشاد:قول لـ أستاذه داليدا
داليدا:اتفضل حضرتك عايز ايه؟
_عايزين نعمل أصناف جديده تبقى تريند على السوشيال ميديا بـ أسامي تشد الناس
داليدا:زي ايه مثلاً؟
_طيب اتفضلي معانا للمطبخ علشان اقدر اوصفلك أكتر
داليدا:طيب تمام
••وقامت داليدا..دخلت معاه المطبخ••
_عايزين نعمل كذا صنف جديد من ضمنهم نوع عباره عن تشيز كنافه مولتن كيك
داليدا(بإستغراب) :تشيز كنافه مولتن كيك؟..ايه اللي جاب الـ ٣ أصناف لـ بعض اصلاً؟
_كل المحلات دلوقتي بقيت تعمل كده وفي الآخر هنسميها اسم مطرقع
داليدا(بإستغراب) :وده من اختراعك انت ولا شوفت حد بيعمل كده؟
_لا طبعاً الوصفه دي من تأليفي وحاسس انها هتنجح
داليدا(بتفكير) :طيب جرب واحده ولو طلعت كويسه ابقوا اعتمدوها بعد كده
_خلاص تمام
<عـنـد عائـشـه>
••خدت سلمى بنتها وقالوا يعدوا على مصطفى ومروه يعملوهالهم مفاجأه••
سلمى:المفروض يا ماما كنا نعرفهم قبل مانيجي!
عائشه:هو المفروض ده الصح..بس عايزه اعملهم مفاجأه!
••ورنيت الجرس..جه مصطفى وفتح••
عائشه:سربرايز!
••وخدته بالحضن..وكل ده وهو مكشر! ••
عائشه(بإستغراب) :ايه يامصطفى مالك؟
مصطفى:ادخلوا بس
••ودخلوا وقعدوا في الريسيبشن••
عائشه:في ايه ياحبيبي مالك؟
مصطفى:مروه هربت من البيت
عائشه(بتضحك) :ههههه هربت؟ يعني ايه هربت؟.. هى قطه وحابسها فا هتهرب؟
مصطفى:مروه هربت!!!..عملت فيلم هندي وهربت! وانا كنت فاكرها مخطوفه وروحت بلغت!..انا نفسي افهم هى عملت كل ده ليه؟
عائشه:انت بتقول ايه؟..وهتهرب ليه اصلاً!
مصطفى:السؤال ده تسأليهولها هى!
سلمى:وانت عرفت منين انها هربت؟ مش يمكن اتخطفت فعلاً؟
مصطفى:معرفش بقى..انا تعبت من التفكير
سلمى:انت رجعت كاميرات العماره؟
مصطفى:لا
سلمى:طيب ماترجعها وتشوف
مصطفى:انا ازاي عدت عليا حاجه زي دي؟..انا نازل
عائشه:استنى طيب نيجي معاك
••ونزلوا مع مصطفى، ودخلوا مكتب العماره..والأمن رجع الكاميرات••
_كان الساعه كام؟
مصطفى:تقريبا على ١٢ وشويه بالليل
••ورجع الفيديو شويه••
مصطفى:ايوه ده لما كنا في العربيه وهى لسه نازله..هاتلي الكاميرا اللي جوا العماره
عائشه:لا حول ولا قوة الا بالله
••وجابوا وقت ما كانت مروه واقفه قصاد الاسانسير واكتشفت انه عطلان وطلعت على السلم وجه حد من وراها••
مصطفى:ايوه هو ده!!!..انا هتجنن ازاي هى ماشيه في الشارع عادي بعد ماحصلها ده!..ازاااي الا لو هى بتلعب عليا لعبه حقيره!
عائشه:اهدى يابني يمكن في سوء تفاهم ولا حاجه
مصطفى(بعصبيه) :سوء تفاهم ايه بعد اللي شوفته بعينيا انا ورشاد!..ايه احنا الاتنين مسطولين؟..هو في واحده مخطوفه هتمشي في الشوارع عادي كده؟
سلمى:قصدك يامصطفى ان مروه وراها حاجه؟
مصطفى:بالظبط بس ايه هى الحاجه دي!.. مش عارف!
<عـنـد حـسـنـاء>
••كان سامي خف من الخبطه..ورايح جاي في الشقه••
حسناء:هتفضل رايح جاي كده كتير؟
سامي:بقى انا..داليدا تعملها فيا وتهرب؟؟
صفاء:انت ماسك فيها كده ليه ماتفكك منها..دي لا منظر ولا مال ولا اي حاجه خالص
سامي:وانتي مالك كان حد اتدخل في حياتك؟
صفاء:خلي عندك دم وسيبك منها
سامي:دي مراتي وعلى ذمتي..يعني ايه اسيبني منها؟ ماتقولي حاجه ياماما
حسناء:بكرا ترجع غصب عنها..والنبي ماهيرجعها غير القوي الشديد وهو الورث..اصل صحيح على رأي أختك هتصرف منين عليها وعلى أختها؟
سامي:ويفرض مرجعتش اعمل ايه انا؟
صفاء:لو مرجعتش علشان ورث أبوها فا هترجع علشان تطلق
سامي:ماهي ممكن تخلعني من برا برا..ومش هترجع برضه
صفاء:اصبر بس ميبقاش طلقك حامي كده..خلينا نفكر بالهداوه
سامي(بزعيق) :عبال مانتي تفكري بالهداوه اكون انا ولعت حريق..ولا طبيت ساكت مكاني
حسناء:تف من بؤك بلاش الكلام الوحش ده بعد الشر
سامي(بزعيق) :مانتوا محدش فيكم حاسس بيا..داليدا خليت شكلي زي الزفت قدام كل الناس..هى بعد عاملتها السوده دي فاكره انها هربت مني؟..دي لو هربت لآخر الدنيا هجيبها يعني هجيبها!
صفاء:ماتشوفي حل مع ابنك ده..انت صدعتني..وطي صوتك شويه
سامي(بزعيق) :بقولك ايه ياصفاء خشي جوا متعصبنيش اكتر مانا متعصب وشايط!
حسناء:وانت لما تزعق وتتنطط هى كده هترجع؟ ما هينوبك إلا وجع الدماغ
سامي:طيب أعمل إيه اتصرفولي!
حسناء:لما ابوك يرجع نبقى نفكر كلنا
••راح سامي قاعد جنبهم••
سامي(بزعيق) :اديني قاعد مستنيه اهو
<عـنـد لـمـيس>
••لميت هدومها وقررت تهرب هى وبناتها برا مصر بالاتفاق معاهم في الموبايل••
لميس:انا واقفه بعيد انزلوا بسرعه
يمنى:احنا جايين اهو
••وخرجوا من الفيلا وركبوا العربيه..وأول ما لميس شافتهم حضنتهم••
لميس:وحشتيني اوي ياحبيبتي..وحشتوووني كلكم
هنا:وانتي اكتر يا مامي
يمنى:يلا يا مامي قبل ما حد يشوفنا
لميس:حاضر..اطلع بالعربيه
••وطلعوا بالعربيه ولميس حاضناهم وأول ماوصلوا••
لميس:يلا يابنات انزلوا
••ولسه هنا بتمد ايدها علشان تفتح الباب..لقيت ضياء هو اللي بيفتحه••
لميس(بخوف) :ضياء!!