رواية ابي بواب وامك خدامه الفصل التاسع9والعاشر10بقلم رانيا عماره
سميح(بزعيق) :انتي اتعبطتي في مخك ولا ايه؟
نسمه:لا متعبطش في مخي ولا حاجة..انا سليمة وزي الفل كمان، انت اللي كل مابتكبر كل مابتتعبط زيادة..وعلفكرا بالشكل ده أمي مش هتكمل وياك كتير
هويدا(بصوت حاد) :اطلعي منها انتي يا نسمة!
نسمه:لا ياما مش طالعه منها..انا مش هستنى لما اسمع انه عمل فيكي حاجة..انتي مبتسمعيش جرايم القتل اللي بتحصل حوالينا ولا ايه؟
سميح(بزعيق) :انتي تجصدي إني جتال جُتلة؟؟
هويدا(بزعيق) :امشي يا نسمة وارجعي دارك، يلا خلصي متجيبيلناش الكلام!!
نسمه:تصدقي بالله ياما ان انا غلطانة؟..طب والله مانا متدخلة في حاجة تاني، ويعمل فيكي زي ما يعمل ولا هفتح بؤي بنص كلمة..صحيح تعمل خير وفي الآخر يتقلب عليك بالشر !
هويدا(بزعيق) :امشي يا نسمه، امشي يلااا
{مشيت نسمة وهي بتبص لـ سميح بقرف و كره..راح سميح ماسك في رقبة هويدا}
سميح(بعصبية) :بتك مش متربية ياهويدا، دي جليلة الرباية!!
هويدا(بزعيق) :ابعد ايدك عني، آني بتخنج
سميح(بزعيق) :دي غلطتي ان آني رضيت أتچوز واحدة عندها عيال، كنت دورت على بت صغيرة مسبجش ليها الچواز
هويدا(بزعيق) :وهى ذنبها ايه تُجع في راجل كبير زيك؟..ده انت ولا النسوان الشراشيح اللي بميت لسان!
سميح(بزعيق) :لمي نفسك يا هويدا، متخلنيش أتچنن عليكي!!
{راحت هويدا زاقة إيده بكل غل، وقامت}
هويدا(بزعيق) :غور في داهية انت هتجرفنا ليه؟..مش كفاية رضيت بيك..آني اللي مسمعتش كلام بناتي جالولي بلاش لكن هجول ايه كنت حمارة بديل يوم ما وافجت عليك!!
{ودخلت جوا البيت، راح ماشي وهو متعصب}
========على السفينة عند حاتم ومهره========
{بعد ما حاتم ومهره لفوا نفسهم بالفوط، كانت مهره ساندة دماغها علي حاتم من تعبها..وقصادهم القبطان والمساعد بتاعة..كان القبطان بيعملهم مشروبات سخنة، والمساعد بيحضرلهم الأكل}
القبطان:ياه يا حاتم بقى كل ده حصل؟
حاتم:اه والله يا قبطان..وعشان نرجع مصر..دخلنا في مليون مشكلة تانية..كل ما نحاول نرجع منعرفش!
القبطان:لا حول ولا قوة الا بالله، ما كنتوا روحتوا المطار وريحتوا نفسكم من كل ده!
حاتم:فكرك ان انا محاولتش اعمل كده؟..لا انا حاولت بس لازم ورق وليلة طويلة..وعشان نسافر بالمركب عايزين فلوس، واحنا ممعاناش فلوس.
القبطان(بإبتسامه) :ربنا بعتني ليكم نجدة..إحمدوا ربنا انكم جيتوا في طريقي..هترجعوا مصر متقلقوش!
حاتم:بجد؟
القبطان:بجد..هي الأستاذة تبقي مراتك؟
{بص حاتم لـ مهره وبعدين رد على القبطان}
حاتم:لا، بس نفس الظروف جمعتنا سوا
القبطان:بصراحة لايقين علي بعض
حاتم:انا ومهره اخوات، وبخاف عليها زي أختي الصغيره بالظبط..أهلها هيفرحوا اوي لما نرجع!
القبطان:بس يكون في علمك انا مش هقدر أرجعكم دلوقتي خالص..هخلص السفرية اللي ورايا وبعدين هنرجع كلنا!!
حاتم:وانت رايح فين دلوقتي؟
القبطان:انا متجه لليونان
حاتم ومهره(بصوت واحد) :اليونان؟
القبطان:ايوه اليونان..لعلمكم اليونان دي بلد جميلة جداً وانا متأكد انها هتعجبكم
حاتم:بس انا معرفش حاجة هناك!
القبطان:واحده واحده هتعرف!
{قام مساعد القبطان وقدم الأكل والمشروبات لحاتم ومهره}
حاتم:شكراً
المساعد:العفو
{حاتم عدل مهره، وسندها وابتدا يقرب منها الأكل والمشروب السخن..ويشربها بإيديه}
القبطان:عايزكم تاكلوا كويس..أكيد بقالكم مده مكلتوش ولا حتي نمتوا!!
حاتم:احنا فعلاً بقالنا كتير مكلناش ولا نمنا.. احنا اتبهدلنا اوي..والدنيا حطتنا في ظروف صعبة
القبطان:كل ما تضيق كل ما هتُفرج ولكن يا حاتم حط في دماغك دايماً إن كل حاجة بتيجي في الوقت المناسب!
حاتم:عندك حق..شكراً لتعبك معانا..انا مش عارف أقولك ايه بصراحة علي اللي عملته معانا ده كله!
القبطان:لا شُكر على واجب..بعد ما تخلصوا أكل..هاخدكم وأوريكم الأوضة اللي هتناموا فيها
حاتم:شكراً يا قبطان، تسلملي على وقفتك معانا
==============عـنـد زهرة============
{مشيت من المستشفى من غير ما حد يشوفها..وراحت عند ليلى وأنيسة في مصحة الأمراض النفسية والعقلية..وأول ما شافت مامتها حضنتها}
زهرة(بعياط) :وحشتيني اوي ياماما
أنيسة(بحزن) :وانتي كمان يا زهرة..انتي جيتي هنا ازاي لواحدك؟
زهرة:انا جيت أخرجكم!...يلا عشان هنمشي من هنا
{وشدت أنيسة}
أنيسة:استني يا زهرة..هنمشي من هنا ازاي فهميني!!
زهرة:دي فرصة اننا نمشي من هنا ومحدش موجود..وبصي متقلقيش انا عاملة حساب اللحظة دي
{وطلعت من الكيس اللي معاها..نقابين}
زهرة:البسي ده بسرعة
أنيسة:طب وليلى هنعمل فيها ايه؟
زهرة:انا عاملة حسابها متقلقيش
{وقربت من ليلى واديتها النقاب..ولكنها مكنتش فاهمة حاجة}
زهرة:البسي ده..البسيه فوق هدومك يا طنط ليلى!
ليلى(بتوهان) :البس ايه؟
زهرة:ده..النقاب ده.. يلا بسرعة!
ليلى:ليه رايحين فين؟
زهرة:رايحين نشوف غسان ابنك!...يلا بسرعة انا هساعدك!
ليلى(بلهفه) :ياه أخيراً هشوفه..ياحبيبي.. ده وحشني اوي!
{قربت زهرة من ليلى وابتدت تلبسها النقاب، وبعد مالبسوا..خدهم ومشيت..وأثناء ماكانوا ماشيين في طُرقة المستشفى كانت زهرة وأنيسه متوترين}
زهرة:محدش يتكلم لحد ما نخرج من هنا على خير !
{وجات اللحظة الحاسمة وهى إنهم يعدوا من قصاد ريسيبشن المستشفى وهما ماشيين ندهم الموظف}
_رايحين فين؟
============فـي بـيـت فـاتن============
{كانت بيري لابسة وجاهزه، ولسه هتنزل لقيت فاتن جاية وراها، كانت فاتن مستغربة بنتها رايحة فين؟}
فاتن:انتي رايحة فين الساعة دي يا بيري؟
بيري(بتردد) :رايحة مشوار
فاتن:مشوار ايه ده؟
بيري:مشوار ياماما
فاتن(بتريقه) :مشوار يا ماما؟..ايوه مشوار ايه يعني؟
بيري(بتردد) :هقولك بعدين..يلا باي دلوقتي
{نزلت بيري، ولسه فاتن مستغربة}
فاتن:باي؟..باي ايه؟..هو في حاجة البنت مخبياها عليا وانا معرفهاش؟
{نزلت بيري وركبت عربيتها..وفوق في البلاكونة كانت فاتن بتبص عليها..وبعد ما بيري وصلت مشوارها ودخلت سنتر شحن}
بيري:عايزه أحول ١٠آلاف جنية على المبلغ ده
{واديته الورقة والفلوس}
_فودافون ولا اتصالات؟
بيري:فودافون
{وبعد ما تمت المهمة}
بيري:خلاص كده؟
_اه تمام
{طلعت بيري موبايلها واتصلت على المجهول}
بيري:الفلوس وصلتك؟
========عـند حاتم ومُهره في السفينة======
{بعد ما كلوا..خدهم القبطان على الأوضة..كانت أوضة صغيره فيها سرير دورين..وكنبة جلد وترابيزة صغيره ودرفة دولاب واحدة}
القبطان:اعذروني، المركب صغيرة ومفيهاش غير أوضتين..دي حاجة كده لحد ما نوصل اليونان
حاتم:مفيش مشكلة، مش هتفرق كتير
{جه مساعد القبطان بملابس}
القبطان:على بختكم الحلو لقينالكم لبس..غيروا ولو احتاجتوا أي حاجة اخرجولنا برا
حاتم:متشكر ليك يا قبطان
القبطان:يلا يا حسن
{وخد المساعد ومشى..وحاتم ادي اللبس لـ مهره}
حاتم:انا هخرج البس برا تكوني انتي كمان غيرتي
مهره:ماشي يا حاتم
{خرج حاتم ومهره قفلت الباب وراه وغيرت هدومها..وبصيت جنبها لقيت فرشة شعر و كريم..ابتدت تحط الكريم وتسرح شعرها ولفيت الطرحة حوالين دماغها..وشوية كان حاتم جه بعد ما غير..قعدت مهره علي السرير، وحاتم قعد على الكنبة}
حاتم:عاملة ايه دلوقتي يا مهره؟
مهره:انا محتاجة انام..تصبح على خير
حاتم:وانتي من أهله
{نامت مهره على السرير واتغطت، وحاتم كان بيبص عليها وبعدين قام وخرج وقفل الباب و راح عند القبطان أثناء ماكان سايق}
القبطان:منمتش ليه يا حاتم؟
حاتم:مش جايلي نوم يا قبطان
{قعد حاتم وقصادة منظر البحر اللي يرد الروح..كان بياخد نفسه بعمق، وكأنة بيجدد طاقته السلبية}
حاتم:حلو اوي المنظر ده
القبطان(بيضحك) :عجبك؟
حاتم:أوي
==========================
{وفي بــيـت نسمة أخت حاتم..كانت قاعدة في شقتها..لقيت جوزها داخل وملامحه متغيرة}
عبدالله:ايه اللي انتي هببتية ده يا نسمة؟؟
نسمه:ايه اللي أنا هببته؟؟
عبدالله:هو احنا مش هنخلص من حواراتك مع سميح جوز أمك؟..ماتلمي الدور بقى وتبطلي تجيبيلنا الكلام من اللي يسوا واللي ميسواش!!
نسمه:مالك يا عبده في ايه؟...وانا كنت جيت ناحيته؟
عبدالله:أه جيتي..والخلق بقيت تتكلم علينا ليل نهار، اللي يقول نسمة مش متربيه..واللي يقول انا لو مكان سميح كنت جيبتها من شعرها، واللي يقول دي غلاطة ولسانها قد الفرقلة!
نسمه:اااه يبقى لعب في دماغك وقواك عليا..أصل انا عارفاه كويس..اللي زي سميح ده عايز ضرب النار...ده شيطان من شياطين إبليس!!
عبدالله:انا نفسي أفهم حاطة نقرك من نقره ليه؟
نسمه:مانت مش حاطط نفسك مكاني...جوز أمي اللي انت جاي في صفه ده ياما بهدلنا ومرمطنا وطلع عينا..عمره ما اعتبرنا زي عياله وقال يعاملنا بما يرضي الله..لا بالعكس كان بيجي علينا وبيستغل غياب ابويا.. طب والله ولا يوم من أيام أبويا
عبدالله:عشان خاطري تفكك منه وتريحينا ومتدخليش في المشاكل اللي مابينه وبين أمك!!
نسمه:شوف انا بقول ايه وانت بتقول ايه!!..بقولك كان ممرر عيشتنا تقوم قايلي فكك منه؟
عبدالله:هقولك ايه طيب..روحي اضربيه ولا افتحيله دماغه؟
نسمه:لا يا حبيبي معتش هتتكرر تاني.. مش عشان كلام الناس...لالا...عشان حرقة دمي..وانا مين هينفعني لو جرالي حاجة؟
عبدالله:بشوقك يا نسمه، المهم ابعدينا عن وجع الدماغ!
نسمه:طيب
===============================
{عـنـد بـيـري بعد ما رجعت البيت..ودخلت أوضتها..لقيت الباب بيخبط}
بيري:ادخلي يا ماما
{دخلت فاتن وهى على وشها ملامح الشك}
فاتن:كنتي فين يا بيري؟
بيري:برضة مصممة تعرفي؟
فاتن:انتي عارفاني كويس، انا مش ههدي ولا هرتاح غير لما تقوليلي!
بيري:بصي ياستي..انا كنت بدفع فلوس للهكر اللي هيفتحلي كل حسابات علاء، حتى أجهزته هتكون قدامي وهعرف خط سيره وكل حاجة بيخططلها
فاتن:وانتي هتعرفي ازاي وهو مرمي في السجن؟..ولا كل ده هيفيدك بـ ايه أصلاً!!
بيري:من ناحية هيفيدني..فااهو هيفيدني كتير..انا بس مش عايزة اتكلم في حاجة دلوقتي..خليني أخطط في صمت.
فاتن:يعني انتي كنتي برا بتعملي ايه، برضة مافهمتش!
بيري:كنت بدفع فلوس الخدمة اللي هتتعملي..ماهو أصل مفيش حاجة ببلاش
فاتن:خدي بالك لا تتكشفي يا بيري وتروحي في داهيه!
بيري:لا متخافيش بنتك جامدة اوي اوي اوي..وهتخططلها صح..وهتقلب عاليها واطيها
==============================
{عـنـد زهرة و أنيسة و ليلى بعد ما هربوا...وصلوا الميناء ولما سألوا واحد من الموجودين}
زهرة:بقولك يا حاج..انا مش عارفة أقولك ايه يعني ومحرجة جداً كمان..احنا عايزين يعني....
_عايزين ايه، ماتكملي يابنتي!!
زهرة:عايزين نسافر وممعاناش فلوس..عايزين نروح أي دولة بعيده عن مصر
_هجرة غير شرعية يعني؟
زهرة:بالظبط كده هجرة غير شرعية..ومش عارفين نروح فين ولا نعمل ايه!...هو انت ممكن تساعدنا؟
_الهجرة غير الشرعية للنفر بتاع ١٠٠ ألف جنية
زهرة(مصدومه) :يانهار اسود ١٠٠ألف جنية مرة واحدة؟
_أمال انتي فكرك ايه..طب أقولك
زهرة:قول!
_في هجرة عندنا بـ ١٥ ألف
زهرة:اممممم بس احنا ممعاناش فلوس خالص
_يبقى متسافروش، جيبتلك الحل اهو!
زهرة(بتردد) :طب مفيش حاجة ببلاش خالص؟
_في
زهرة:طب وسايبنا نحرق في دمنا ليه كل ده؟
_هو قارب صغير هيشيل بتاع ٣٠ نفر...وساعات بيحصل حالات غرق، لكن انا بقولك المضمون!
زهرة:احنا هنسافر وأمرنا لله،قولي هنسافر امتى؟
_في هجرة هتطلع الساعة ١٢ بالليل
زهرة:احجزلنا معاك طيب
_اساميكم ايه؟
{وطلع الورقة والقلم، وقربت منه زهرة وهى بتبص لـ ليلى و أنيسة بخوف}
==============================
{بالليل في السفينة بالتحديد في أوضة مهره..كانت مهره نايمة وصحيت على ضوء القمر اللي داخل من الشباك..وصوت أمواج البحر والهوا..عدلت طرحتها وقامت فتحت الباب وخرجت برا..كان حاتم قاعد قصاد البحر..والقبطان ومساعده نايمين..ولما شاف مهره جاية ابتسم}
حاتم:أخيراً صحيتي؟
مهره(بإبتسامه) :أه صحيت، ايه الجو التحفه ده؟
{وقعدت جنبه وبصيت للسما وهي بتتنفس بعمق وبتاخد كل الهوا اللي حواليها يجددلها روحها ومزاجها اللي كاد يكون سئ..الحقيقة إن مهره كانت بتحب القُرب من حاتم وده شئ كان بيحسسها بالأمان طول ماهيّ قريبة منه!..وحاتم كان نفس الشئ..الاتنين كانوا اتعودوا على بعض جداً وبقوا شئ أساسي في حياة بعض، والظروف هى اللي جمعتهم!...ومن شدة الهوا طَيَر طرف الطرحه من على رقبة مهره، وفي ساعتها كان حاتم بيعدلها الطرحه وبيداريلها الجزء اللي اتكشف!.. ولكن مهره اتحرجت..كانت مستغربة كل أفعاله اللي بتدل على الحب ومع ذلك دايماً يقولها انهم اخوات مش أكتر!}
مهره:عارف يا حاتم..انا نفسي أرجع مصر اوي مش عشان أشوف ماما واخواتي لو كانوا لسه عايشين..انا أه أكيد عايزه أشوفهم وبحلم باليوم ده..ولكن السبب الأكبر اللي مخليني عايزه أرجع هو عشان ابراهيم أكيد هيموت ويعرف ايه آخر اخباري!
{وفي ثانية اتبدلت ملامح حاتم}
حاتم:ابراهيم مين؟؟
مهره(بتردد) :ابراهيم اللي كان متقدملي..ماهو كان دايماً بيسأل عليا حتى بعد ما رفضته!..بس انا ندمانه وحاسة ان اللي عملته ده غلط..كان المفروض أوافق عليه من بدري هو بجد حد كويس ومحترم وبيحبني
حاتم(بصوت حاد) :بس انتي مقولتيش حاجة زي دي قبل كده!!
مهره:بصراحة اتحرجت اتكلم قصادك في حاجة زي دي، بس لما اتعودنا علي بعض وبقينا أكتر من الأخوات كان لازم أقولك..بس انت ايه رأيك؟
حاتم:وانا برضة كنت عايز آخد رأيك في حاجة
مهره:حاجة ايه؟
حاتم:في نانيس..انا حاسس ان انا ظلمتها وجيت عليها..هي برضة في الأول والآخر بنت ناس وتستاهل كل خير
{قامت مهره والنار بتطلع من عينيها لدرجة انها مكنتش قادرة تخبي}
حاتم:مالك اتغيرتي كده لية؟
مهره(بعصبيه) :هى مش نانيس دي اللي اتبليت عليك ولا انا يمكن بيتهيئلي؟
حاتم:ماهو من رفضي ليها، يمكن لو كنت وافقت عليها من أول مره مكنش كل ده حصل!
مهره(بعصبيه) :وكمان بتبررلها حقارتها؟
حاتم:وانتي مدايقة ليه؟..هو مش المفروض تحبيلي الخير؟
مهره:طب ايه رأيك ان حوار نانيس ده مدخلش دماغي
حاتم:وانا كمان حوار ابراهيم ده مدخلش دماغي برضة؟..لا تكوني فاكرة انك لواحدك اللي ذكيه!!..لالا انا كمان ذكي وعندي عقل بفكر بيه
مهره(بتريقه) :طب والله كويس
حاتم:كل حاجة في وقتها المناسب يا مهره
مهره(مدايقه) :تصبح على خير يا حاتم
{دخلت مهره الحمام ووقفت قصاد المرايا..كانت بتعيط ومهما تداري في صوت بكاها..كان غصب عنها بيتسمع..كانت بتبص لنفسها بكل حزن ومش فاهمة حاتم عايز ايه بالظبط!..و ليه بيهتم بيها لما هى مش في دماغه؟..وشوية كانت خرجت ولقيت حاتم جاي قصادها}
حاتم:انتي كنتي بتعيطي يا مهره؟...مهره!!
{دخلت مهره الأوضة ونامت على السرير وغطت وشها بالغطا..جه حاتم ووقف قصاد السرير}
حاتم:مهره..ممكن تردي عليا؟...انتي بتعيطي ليه؟...مهره!!..ردي عليا وفهميني بتعيطي ليه!!
{قامت مهره وقعدت على السرير ومسحت دموعها}
مهره:مين قال ان انا بعيط؟..انا مش بعيط ولا حاجة
{قعد حاتم على السرير وبص في الأرض}
حاتم:يمكن انا قولت حاجة زعلتك مثلاً؟
مهره:لا مقولتش حاجة، تقريباً جالي دور برد
حاتم:انا بقيت أحس بيكي...حتى وانتي بعيده..يمكن لاننا نعرف بعض من سنين؟...ولا عشان الفتره الطويله اللي قعدناها مع بعض؟
مهره:الله أعلم
حاتم:بصي يا مهره..علمياً احنا حالياً مبقاش لينا إلا بعض..عملياً بقى....
مهره:عملياً ايه؟
حاتم:دي هتعرفيها بعدين لو قولتيلي مالك وايه اللي مزعلك!
مهره:خالص محدش قال ان انا زعلانة أصلاً!!
{طلع حاتم سلسلة من جيبه ولبسها لـ مهره}
حاتم:دي الهدية اللي ادهالي عم صالح..وانا بهاديكي انتي كمان بيها لانها عجبتني اوي..خليها معاكي للذكرى!
مهره(بإبتسامه) :شكراً
حاتم(بيضحك) :اضحكي بقى!
مهره(بتضحك) :حاضر
===============================
{تـانـي يوم عـنـد بـيـري في أوضتها..كانت قاعدة قصاد اللابتوب على السرير..وفجأة المجهول بعتلها فيديوهات وصور وريكوردات كتير اوي..وأول ما وصلوا لـ بيري نبضات قلبها زادت وخافت من المستخبي اللي هيتكشف دلوقتي حالاً..ولما فتحت أول فيديو كان عبارة عن فيديو لـ علاء مع واحدة في أوضة النوم..تنحت بيري لما شافت الفيديو..وبعد ما خلصته ودخلت على اللي بعده.. لقيته واقف في أوضة ضلمه وسط ناس غريبة، وقصادهم شخص مجهول وبيعملوا عبادات غريبة}
بيري(مصدومه) :ايه اللي انا شايفاه ده؟..معقول ده حقيقي؟
{ولما رجعت الفيديو الأول وركزت في ملامح الست اللي جوزها بيخونها معاها، كانت حاسة انها تعرفها..فقررت تتصل بالهاكر}
بيري:بقولك ايه..عايزاك توضحلي صورة الست اللي مع علاء في فيديو أوضة النوم..ينفع؟
_تمام
بيري:ابعتهالي انا مستنياها، سلام!
{وتابعت بقيت الفيديوهات والصور اللي كان فيها كوارث مستخبية..لحد ما وصلت لـ صورة علاء وهو ساجد على الأرض وسط الشموع في الضلمة}
بيري(بصدمة) :لالا يمكن...علاء يعمل كل ده؟؟
{وبعد ربع ساعة وصلتلها صورة واضحة، ولما ركزت فيها اكتشفت انها علا صاحبتها اللي كانت شغالة عندها في البيوتي سنتر!!}
بيري(بصويت) :علا؟؟؟؟؟...علا صاحبتي؟؟؟...ياربي...لا يمكن... لا يمكن ابداً!!
{وحفظت الفيديوهات والصور عندها على ملف..شوية والهاكر اتصل عليها}
_كده تمام؟
بيري:لو عندك حاجة تانية ابعتها وخد اللي انت عايزوا!!
_مفيش حاجة تانية..كل اللي لقيته بعتهولك، باقي الفلوس توصلي النهاردة
بيري:حاضر هتكون عندك!...هبعتهم بالليل
_متتأخريش!
بيري:متقلقش!
==============================
{عند زهرة ووالدتها ومرات أبوها، كانوا في المركب لسه موصلوش اليونان..كانت الأعداد كبيرة على مركب بالحجم ده..وكان الخوف متملكهم من أي غرق ممكن تتعرضلة المركب}
أنيسة(بخوف) :ياريتني ما سمعت كلامك يا زهرة ولا هاجرت معاكي..احنا ممكن نموت في أي لحظة!
زهره:متخافيش ان شاء الله كل خير..المهم اننا نبعد عن غسان و شره..انتي أصلك مش عارفة كان بيعمل معايا ايه...لو كنتي تعرفي مكنش هيبقى ده كلامك!
أنيسة:انا عارفة كل حاجة من غير ماتحكي..انا يعني هتوه عن غسان اللي دمر حياتي انا وأمه...ده أمه اللي خلفته وجابته للدنيا هانت عليه..ما بالك احنا بقى؟
زهره:اللي مالوش خير في أهله..مالوش خير في حد
أنيسه:انا بحمد ربنا إن انا لسه بعقلي يابنتي، الله يكون في عون ليلى..انا خايفة تعمل حاجة في نفسها!!
ليلى(بتوهان) :انا تمام...تمام...تمام اوي
زهره:ايوه انتي تمام و كده!
ليلى(بتوهان) :أيوه انا كده...ايوه...ايوه
{وعـنـد غسان خد كمال وراحوا المستشفى..وقف غسان قصاد أوضة زهرة وسأل الممرضة}
غسان:زهرة عامله ايه دلوقتي؟
الممرضه:لسه تعبانة، وشكل حالتها هتطول
غسان:طيب انا عايز أشوفها
الممرضه:لالا تشوفها ايه، مينفعش
غسان:وايه اللي قل نفعه؟..مانا هبص عليها من بعيد.. هو انا بقولك هسلم عليها وأبوسها؟
الممرضه:حضرتك مينفعش تشوفها حتى..لإن المرض منتشر انتشار كبير في كل أركان الغرفة..ده احنا عشان ندخلها بنتعقم كويس اوي وبنلبس بدلة الوقاية وبعد كل ده بنحس اننا برضة مش محمين كفاية!!
كمال:خلاص يا غسان بدل ما تعدينا هو احنا ناقصين أمراض؟.. هي هتيجي علينا من كل ناحية؟..مش كفاية اللي احنا مستحملينه من الدنيا؟
الممرضه:ربنا يحفظكم ويستر طريقكم
كمال:هو الحمام فين؟
الممرضه:هناك اهو
كمال:هناك فين؟
الممرضه:اتفضل معايا في سكتي
كمال:هروح الحمام وراجع
{قعد غسان على الكرسي، وكمال مشى بعيد ورا الممرضة لحد مااتداروا..راح مطلع رزمة فلوس من جيبه واداهالها}
كمال:حلو كده؟
الممرضه:حلو وزي الفل كمان
كمال:على اتفاقنا، والكلام ميتغيرش!
الممرضه:حاضر
{مشيت الممرضه، وكمال دخل الحمام}
=============================
{عند حاتم ومهره في الأوضه..صحيت مهره على ضوء الشمس..وقامت من السرير، لقيت حاتم نايم فوق على سريره..طلعت على السلم ومشيت الريشه على وشه..صحى حاتم وهو مستغرب وبيبص حواليه..ولما شاف مهره..لقاها بتضحك..نزلت مهره من على السلم وهو قام قعد}
مهره(بتضحك) :صباح الخير، هنقضيها نوم اليوم كله ولا ايه؟
حاتم(بيضحك) :صباح النور...ياستي انا منمتش بقالي كتير مش زيك تنامي وتصحي..تنامي وتصحي!!
مهره:مش يمكن عشان غرقت بسببك؟
حاتم:ااه هاتيها فيا بقى..لا معلش انتي اللي مبتعرفيش تعومي، دي مشكلتك انتي!!
مهره:لا مشكلتك انت وهقولك ليه..عشان كان واجب عليك تعلمني..لكن انت طنشت وكبرت دماغك!
{نزل حاتم من على السلم وهو بيضحك}
حاتم:تصدقي ان انا اللي غلطان فعلاً..انتي صادقة مبتكدبيش!
{دخل مساعد القبطان}
المساعد:القبطان بيقولكم الأكل جاهز
حاتم:ماشي احنا جايين اهو
{وخد مهره وخرجوا برا..لقوا القبطان مجهزلهم الفطار على ترابيزة..وقاعد مستنيهم}
حاتم:صباح الخير
القبطان:صباح النور.. عرفتوا تناموا كويس؟
مهره:اه الحمدلله..شكراً يا قبطان على مساعدتك لينا..بجد انت أنقذتنا من الموت!
القبطان:قولت وهفضل أقولكم..الحمدلله إن ربنا بعتني نجدة في طريقكم..ودي رسالة نتعلم منها احنا الأربعة..إن في عز عتمتك وإحساسك إنك خلاص بتغرق ومفيش أمل لنجاتك..فجأة هيجيلك قارب عليه قبطان عشان يساعدك!
حاتم:ربنا يخليك يا قبطان ويبعتلك اللي يساعدك زي ما ساعدتنا كده
القبطان:قربوا يا ولاد و كلوا..وانتوا بتاكلوا هحكيلكم حكايتي!
حاتم:ايه ده هو انت مش هتاكل معانا؟
القبطان:سبقتكم من بدري..ولعلمك مرضتش أصحي حد فيكم..قولت أسيبكم نايمين براحتكم!
مهره:كتر خيرك يا قبطان، احنا حبيناك من كل قلبنا!
القبطان:وانا كمان حبيتكم وارتاحتلكم!
=============================
{فـي بـيـت الظابط..كان قاعد في الصالون بيشرب فنجان القهوة وقصاده اللابتوب بيشتغل عليه..وفجأه جاتله مكالمة من رقم غريب، ولما رد مكنش في أي صوت}
حسني:الو مين معايا؟...الو
_الدور عليك
{والخط اتقفل، وفي ساعتها كان الظابط راح القسم، وابتدوا يتتبعوا الرقم اللي كلمه..لحد ماالظابط صاحبة جه وملامح وشه عليها التعجب}
حسني:في ايه؟
الظابط:الرقم اللي تتبعناه كل ثانية يتنقل في نطاق جغرافي بعيد عن اللي قبلة
حسني:ازاي يعني مش فاهم!!
{راح زميله رافع موبايلة ناحية الظابط}
حسني:ازاي ده؟؟
الظابط:مش عارف يافندم.. ماهو ده الأمر اللي مخلينا كلنا مستغربين اوي..يعني يا فندم من ثانية واحدة كان في محافظة القاهرة فجأه بقى في الشرقية فجأه بقى في السويس!
حسني:طيب روح انت دلوقتي على ما أخلص الشغل اللي عندي ده
الظابط:اوامرك
{مشى زميل الظابط...وكان الظابط مستغرب جداً ازاي الخط بيتغير خط سيره مابين لحظة والتانية في أماكن متفرقة!..لحد ما خد الجاكت بتاعه وقام}
===========================
{في السجن عند علاء..لقى العسكري بينده عليه}
العسكري:علاء الدين محمد جمال الدين
علاء:انا اهو
{وأول ما قام وراحله..حطله الكلبشات وخده على الحبس الإنفرادي لتاني مره}
العسكري:خليك هنا ثواني
علاء:أما نشوف آخرتها ايه
{وبعد ٥ دقايق رجعله العسكري وهو بيبص حواليه ومتوتر..وفي ايده لبس}
العسكري:خد بسرعة
علاء:ايه ده؟؟
العسكري(بصوت حاد) :البس ده بسرعة...خلص!!
علاء:طيب ياعم براحة
{وبعد ما علاء لبس ملابس العساكر..فكله العسكري الكلبشات}
العسكري:قبل ما تمشي اضربني
علاء:أضربك؟...وأضربك ليه؟...اااه مش يمكن عشان نسبكها صح...حاضر مفيش مشكلة
{وضرب العسكري ومشى في السجن على إنه عسكري لحد ما خرج برا.. واستخبى ورا الشجر ونط من على السور وبمجرد مانط...ضرب النار اشتغل..طلع يجري يهرب...والعسكري فضل يصرخ}
العسكري(بصويت) :اااااه بموت..ضربني وهرب...اااه
{اتلم الظباط على الصويت..وخرجوا يدوروا على علاء كان هرب ووصل مكان سري..وأول ما نويري شافه حضنه}
نويري:مليون حمدالله على السلامه يا علاء
علاء:الله يسلمك..انا اتبهدلت اوي جوا السجن يا نويري!!
نويري:وأديك خلاص خرجت اهو ورجعت وسطنا من جديد..طمني عليك عامل ايه؟
علاء:زفت...انا مكنتش عايز أخرج بالطريقه دي..كنت عايزك تخرجني بمحامي..انا كده مش هعرف أخرج ولا أعيش حياتي طبيعي!!
نويري:مين قالك الكلام ده؟..طب ايه رأيك انك هتعيش حياتك طبيعي وأحسن مننا كلنا كمان!
علاء:ازاي بس بعد اللي حصل!!
نويري:زي السكر في الشاي..اسمع مني بس...انت تطلع تغير الهدوم دي وتنزل تاكلك لقمتين، وبعدين نتكلم على رواقه!
علاء:بس انا مليش نفس
نويري:هيبقى ليك بس نفذ كلامي!...يلا!
{طلع علاء فوق..ونويري قعد على الكرسى..وتظهر رِجل شخص مجهول..بتقرب من نويري وهو مبتسملها}
=============================
{فـي بـيـت هويدا...كانت قاعدة بـ فرشة الخضار قصاد بيتها}
هويدا:الكيلو طماطم بـ ١٠..يلاا...الكيلو بـ ١٠
{جالها عبدالله جوز بنتها}
عبدالله:هاتيلي كيلو طماطم، و٢ بطاطس، وواحد ليمون
هويدا:نسمه عاملة ايه؟
{ونقيت الفاكهه في الأكياس بينما كان عبدالله بيتكلم معاها}
عبدالله:انا اتكلمت معاها كلمتين يعقلوها، ربنا يهديها بقى مش عارف أعمل إيه تاني أكتر من اللي عملته
هويدا:نسمه من يومها وهى متعبه وحِشَرية..ودي غلطتي إن آني دخلتها في مشاكلي... هو اه سميح زي الزفت والجطران..بس برضة اللي بتعمله دهو ميصحش ابداً
عبدالله:والله يصح ميصحش مابقتش فارقة..انا مش عاوز الموضوع يكبر وأحلف عليها بالطلاق ماتيجي هنا تاني!
هويدا(بصويت) :لا ياعبده أوعى تعملها..طلاج ايه بس الله يسترك..مش للدرچادي يعني..هى بتي لاسعة وآني عارفاها..بس مليش أطيب منها ومن جلبها..ده زي البفتة البيضا اسألني آني!
عبدالله:ربنا يهدي الحال يا خالة هويدا...خلصيني عشان مستعجل
هويدا:حاضر اهو
===============================
{عـنـد بـيـري في الصالة..كانت قاعدة باللابتوب على رجليها..وفتحت فيديو جديد}
فاتن:برضة ساكتة ومكتمة ومش عاوزه تعرفيني أي حاجة!!
بيري(بتركيز) :استني بس يا ماما
{وفجأه قام بيري وصوتت}
فاتن(بخوف) :في ايه؟؟
الفصل العاشر
فاتن:برضة ساكتة ومكتمة ومش عاوزه تعرفيني أي حاجة!!
بيري(بتركيز) :استني بس يا ماما
{وفجأه قامت بيري وصوتت}
فاتن(بخوف) :في ايه؟؟....مالك يا بيري في ايه؟؟؟
{ولكن بيري دخلت أوضتها وقفلت على نفسها}
=============فـي بـيـت نويري===========
{بعد ما علاء غير ونزل يقعد مع نويري}
علاء:أمال وديتوا فيروز فين؟
نويري:فيروز نايمة في الأوضة متقلقش عليها
علاء:طيب..قولي بقى هنتصرف ازاي!
{وقعد معاه}
نويري:احنا هنسفرك برا، تعيش عيشة فل في راحة بال...وكام شهر هتلاقيني انا كمان عندك..بيني وبينك القاعدة في مصر مابقتش جايبة همها
علاء(بعصبية) :ومين قالك ان انا عايز اسافر؟...انت ليه بتتصرف من دماغك يا نويري؟..يفرض انا مش عايز اسافر يا أخي!!
نويري:وانا يعني كنت كتفتك وسحبتك غصب عنك؟..ياسيدي انت حر...عايز تسافر سافر...مش عايز خلاص براحتك بس خد بالك ممكن تتمسك في أي لحظة!!
علاء(بعصبية) :ده بقى اللي انا مكنتش عايزوا!!..مجيبتش محامي يخرجني ليه؟..و ليه هربتني وخلتني أتحط في دايرة الخوف من إن ممكن في أي لحظة اتمسك!!
نويري:اهدى بقى وبلاش عصبية!!..أسهل الطرق أسلكها..وانا دورتلك على طريق مختصر..لو خايف أوي كده نعملك بطاقة بشخصية جديدة واهو لا من شاف ولا من دري!
علاء:ااه عشان القضية يبقوا اتنين..مانت خسران ايه؟.. مانت لو كنت مكاني كان زمانك بتلف حوالين نفسك وكنت كلمت طوب الأرض يشوفلك واسطة يخرجك بيها!!
نويري:يعني مش كتر ألف خيري ان انا ساعدتك؟
علاء:خلاص بقى يانويري كفاية انا دمي محروق..مش لسه هيتحرق أكتر...انا هطلع أبص على فيروز
{طلع علاء فوق ودور على فيروز ملقهاش}
علاء(مصدوم) :البنت راحت فين؟؟
{ونزل يجري تحت عند نويري}
علاء(بصويت) :فيروز اختفت!!
============بـعد ما وصلوا اليونان=========
{نزل حاتم ومهره مع القبطان والمساعد، وراحوا سوق من أسواق اليونان..كان سوق كبير}
حاتم(بإستغراب) :هو احنا رايحين فين؟
القبطان:هنشتري أكل وهدوم، و بالمره هنشوفلك شغل انت ومهره!
حاتم:شغل؟..هو مش انت قولت اننا مش هنطول هنا!!
القبطان:مانا مش ضامن الظروف..وبعدين ده الشغل هنا حلو اوي هتكسب باليورو..وهتعمل مبلغ محترم يخليك تعيش عيشة مرتاحة لو رجعت مصر!
{وفي اللحظة دي، حاتم لما فكر في كلام القبطان اكتشف انها فرصة متتعوضش ولكن هيشتغل فين؟}
حاتم:امممم طيب هشتغل فين؟
مهره:قصدك هنشتغل فين!
حاتم:بس انتي مش هتشتغلي يا مهره..هو انتي عارفة حاجة هنا؟
مهره:وانت يعني اللي عارف حاجة هنا؟
حاتم:بس انا مآمنش عليكي برا ومش هكون متطمن!
القبطان(بيضحك) :هههههه انا عندي واحد صاحبي يوناني أصيل..بصراحة هو طيب وجدع وعمري ما طلبت منه حاجة و رفضها..تسمحولي آخدكم ونروحله؟
حاتم:مفيش أي مشاكل، نروحله ليه لأ؟
{ضربت مهره..حاتم على كتفه بـ غل ومشيت وهى مدايقة}
مهره:بعد كده متتحكمش فيا!..انا اشتغل مشتغلش دي حاجة متخصكش!
حاتم(بصوت حاد) :بقولك ايه يا مهره متخلنيش أزعل منك!!..انا مبتحكمش فيكي، انا خايف عليكي!
مهره:وانت تخاف عليا ليه بقى ان شاء الله؟
حاتم:عشان انتي أمانة في رقبتي ولازم...
مهره(بتكمل بتريقه) :ولازم أوصلك سليمة لأهلك..خلاص حفظتها زي اسمي!!
{وبعد ما وصلوا محل المنتجات او بمعنى أصح الماركت..كان ماركت صغير ولكن منظم..وواقف فيه راجل في سن السبعين، شعره أبيض..وأول ما شاف القبطان، قرب عليه وحضنه بكل اشتاق}
أركون:Μου έχεις λείψει πραγματικά (اشتقت اليك حقا)
القبطان:Κι εγώ, τι γίνεται; (وأنا أيضاً، ما الأمر؟)
أركون:καλα..ποιοι ειναι αυτοι؟ (طيب.. من هم؟)
{وأثناء ما كان القبطان بيكلم صاحبة، كان حاتم ومهره واقفين بعيد مش فاهمين أي حاجة من كلامهم}
مهره:انت فاهم حاجة؟
حاتم:لا انتي فاهمة؟
مهره:لا
حاتم:طيب ما بقولك ايه ماتيجي ناخد لفه
مهره:لفة ايه بس يا حاتم..انت عايزنا نتوه؟
حاتم:بدل مااحنا واقفين زي قلتنا كده
مهره:اصبر بس!
القبطان: Καλή τύχη, πότε θα πάρουν τη δουλειά; (بالتوفيق متى سيحصلون على الوظيفة؟)
أركون:αύριο (غداً)
القبطان:σε ευχαριστώ φίλε μου(أشكرك يا صديقي)
{وحضنه ومشى}
حاتم:ايه مفيش شغل؟
القبطان(بإبتسامه) :ده انتوا حظكم من السما..هتستلموا الوظيفة من بكرا
حاتم(بتردد) :طب هنتعامل معاه ازاي طيب؟
القبطان:سهله بتتكلموا انجليزي؟
حاتم:اه بس مش اوي يعني..انجليزي مكسر
القبطان:هتفهموا بعض..وبعدين الشغل هنا مش كتير يكون في علمك..حاجات خفيف خفيف كده
مهره:طب والمرتب كام يا قبطان؟
القبطان:اليوم هنا بـ ١٣ يورو وشوية، يعني آخر الشهر ٤٠٠ يورو
حاتم:وبالمصري يبقى كام؟
القبطان: اليورو بـ ٣٢ جنية..يعني قول حوالي ١٣ ألف جنية مصري!
حاتم ومهره(بصوت واحد) :ايه..١٣ ألف جنية مصري؟؟؟
القبطان:ايوه ١٣ألف..مش بقولكم هتعيشوا عيشة مرتاحة؟
================================
{في العمارة عند وجيدة..في شقة أحد السكان..كانت وجيدة بتغسل المواعين..جات سيدة المنزل..ولما شافت وجيدة وهى بتغسل..مكنش عاجبها الغسيل..ودي حاجة بانت على وشها}
_اية الطريقة المقرفة دي يا وجيدة؟؟..حد يغسل المواعين بالطريقة دي؟
وجيدة(بحزن) :بس دي الطريقة اللي انا متعودة عليها من زمان واعذريني يعني محدش كان بيتكلم ولا بيقول حاجة!
_لا انا غير أي حد..المواعين دي كلها تتغسل تاني وكويس..ونضفي البلاكونة وافرشيها..وعايزاكي تعلقي الستاير بس اكويها كويس الأول
وجيدة:حاضر.. طب استأذنك هو انا ينفع أقسم الشغل ده على يومين..انا والله ما قادرة و رجلي مش شايلاني!
_الشغل شغل انا مش هقبل أي أعذار..وكل اللي انا أمرتك بيه يتنفذ بالحرف الواحد!!
وجيدة(بتعب) :بس انا بقول لحضرتك تعبانة و رجلي مش شايلاني، دي حاجة غصب عني!
{بصيتلها الست بملامح حادة وقوية، وصوتها عَلى}
_انتي غبية مبتفهميش؟..انا مش فاهمة انتوا ليه بتجادلوا وتقاوحوا معانا على الفاضي والمليان..هو مين فينا صحاب البيت..احنا ولا انتم؟..انتم هنا مجرد خدامين مش أكتر..واللي صحاب البيت يؤمروا بيه يتنفذ بدون ولا كلمة!!
{نزلت الكلمة على وجيدة..زي السكينة الحامية..حبست دموعها واتمالكت أعصابها اللي كانت هتفلت..بصيت في الأرض بحزن ونطقت بصوت مهزوز}
وجيدة:ربنا يسامحك..حاضر
{مشيت الست..ووجيدة كملت تنضيف}
وجيدة(بعصبية) :وانا لسة هغسل المواعين دي تاني؟؟..روحوا ربنا لا يكسبكم ولا يربحكم!
===============================
{وتحت في العمارة عند متولي..كان بيكنس سلالم العمارة..وبيمسح عَرقه بإيده وبيكمل كنس..كان بيكح وبيسند على الحيطة..كان بيقاوم سِنه اللي كبر ورجليه اللي مابقتش شايلاه زي الأول!..وفجأة طلع صورة حاتم وبص فيها وهو كله حنين واشتياق}
متولي(بحزن) :وحشتني اوي يا حاتم يابني!
{رن موبايل متولي.. و رد على صاحب العمارة}
متولي:الو يا أستاذ حسن...حاضر هشوفلك ماله... لو فيه عطل هتصلك بالصيانة ويجوا يشوفوا ماله...طيب ماشي مع ألف سلامة
{وبعد ما قفل معاه...فتح الأسانسير بالمفتاح وكان بيبص على العطل اللي فيه}
=============================
{عند غادة ونبيل في البيت..دخلوا بـ فيروز وقفلوا الباب كويس وراهم..كانت فيروز بتعيط ومش فاهمة حاجة!..قربت منها غادة وحضنتها}
غادة:متخافيش يا فيروز..حمدالله على سلامتك..الحمدلله انك رجعتي لينا بألف سلامة ياحبيبتي..متعيطيش، بيري هتيجي تشوفك مش عايزاكي تقلقي من أي حاجة!
فيروز(بعياط) :انتوا ليه بتاخدوني من بعض؟..وانا لية مش عايشة مع ماما؟..لية كل شوية بروح مكان جديد؟
غادة:مبدأياً قبل أي حاجة..مش خالتو زي ماما بالظبط صح؟
فيروز:صح
غادة:طول مانا معاكي مش عايزاكي تخافي من حد..المشكلة كلها جاية من باباكي يا فيروز مش مننا احنا..وطول مانتي معاه احنا حاسين بالخطر..لانه ممكن يإذيكي في أي لحظة!..انا عارفة ان مينفعش أقولك كلام زي ده مهما حصل..بس انا لو منبهتكيش منه..سواء بإرادتك أو غصب عنك..هتكتشفي حقيقته البشعة!
فيروز:قصدك ان بابا وحش يا خالتو؟
نبيل:بصراحة يا فيروز أه..أبوكي وحش..كان نفسي أقولك غير كده بس دي الحقيقة..أبوكي مش خطر عليكي انتي بس..لاا ده خطر علينا كلنا بلا استثناء!
غادة:مامتك زمانها جاية متقلقيش من حاجة!
{رن الجرس}
غادة:أكيد هيَّ!
{راحت غادة تبص، لقيتها بيري..فتحتلها..وأول ما بيري دخلت خدت بنتها في حضنها}
بيري(بحزن) :ياحبيبتي...ياقلبي انتي كويسة؟
فيروز:اه ياماما
بيري:الحمدلله انا قلبي اتخلع من مكانة عليكي!...انتوا جيبتوها ازاي ووصلتوا لمكانها ازاي اصلاً؟؟؟
============فــلاش بـاك (1)===========
{اتصل نويري بـ نبيل}
نويري:علاء هيخرج النهاردة، تيجوا تاخدوا البنت امتى؟
نبيل:دلوقتي حالاً..هو في وقت نضيعه؟؟
نويري:انا مستنيكم
=============فــلاش بـاك(2)===========
{وصل نبيل وغادة لبيت نويري، وسلموا عليه}
نويري:نورتوا الدنيا كلها
نبيل:ده بنورك يا نويري، فين فيروز؟
نويري:عالطول كده؟..مش ناخد واجبنا الأول طيب؟
غادة:احنا متشكرين ليك..هاتلنا فيروز قبل ما علاء يرجع
نويري:حاضر
{طلع نويري جاب فيروز ونزل، واول ما غادة شافتها حضنتها}
غادة:الحمدللة انك بألف خير يا فيروز...بيري هتفرح أوي لما تعرف انك رجعتي!!
نبيل:حسابنا مع بعض بعدين يا نويري
نويري:مفيش مشكلة، نورتونا
نبيل:يلا يا غادة
{وخد غادة ورجعوا البيت بـ فيروز بعد ما بلغوا بيري}
============نهاية الفلاش باك============
بيري:برضة انا مفهمتش اية علاقتكم بـ نويري وازاي وصلتوله اصلاً؟؟
نبيل:هنفهمك كل حاجة بس اقعدي!
بيري(بتقعد) :اديني قعدت اهو..قولولي بقى وريحوني!!
{وبعد ما غادة ونبيل وفيروز قعدوا}
نبيل:جوزك اللي قريباً هيبقى طليقك..اغبى خلق الله..فاكر نفسة جايب الديب من ديلة..وهو ميعرفش اللي بيحصل من وراه..علاء قريب اوي هياخد قلم مخدوش في حياته ومن أعز صحابة نويري...وهى حاجة من الاتنين يا هينتحر يا إما هيطب ساكت مكانه..وهيكون على يد نويري واحنا خارج الموضوع!
بيري:انتوا في علاقة بينكم وبين نويري؟؟
نبيل:طبعاً في..بس انا مش عايز أحرقلك الأحداث عايزينها مفاجأة كل اللي عليكي تشغلي دماغك الفتره الجاية وبس خصوصاً بعد ما علاء هرب!
بيري(مصدومة) :نعم؟؟...علاء هرب؟؟
================================
{عـنـد زهـرة وأنيسة وليلى بعد ما وصلوا اليونان..كانوا بيلفوا حوالين نفسهم ومش عارفين أي حاجة!..لحد ما أنيسة وقفت من تعب رجليها}
أنيسة(بتعب) :مش كفاية كده..احنا رايحين على فين؟
زهرة:معرفش ياماما..انا ايه عرفني بس...صحيح الغريب أعمى...استني طيب
{وراحت عند راجل واقف هناك وحاولت تتكلم}
زهرة:لو سمحت
{ولكن هو مش فاهم حاجة منها}
زهرة(بيأس) :شكلك مش فاهم حاجة...بص...انا Egyptian...Egypt...يعني...طب هقولك ايه طيب
_I don't understand
زهرة: تعرف فين street..بيودي على Egyptian place؟؟
_What do you want from this street?
زهرة:طيب خلاص Thank you
{ورجعت تاني..كانت أنيسة ماسكة ليلى في ايديها}
زهرة:لا انا فاهماه ولا هو فاهمني!
أنيسة:طيب ماتشوفي يا زهرة أي حد من أهل العرب، يمكن يفيدنا بمعلومة ولا حاجة!
زهرة:حاضر
{مشيت زهرة قدام شوية، لقيت راجل معدي لابس قفطان وباين علية انه عربي}
زهرة:لو سمحت بتتكلم عربي ولا لا؟
الراجل:أي بتحدث عربي
زهرة(بإبتسامة) :طيب الحمدللة...انا سمعت ان أي دولة بيبقى فيها مكان للمصريين والعرب على العموم متعرفش أروحلها منين؟
الراجل:صحيح هاد الكلام..لو رايدة تروحي، اركبي سيارة تاكسي، وقولي إله وديني نافبليو..راح تلاقي بيوت كثيرة..هناك اسألي حدا عن مسكن راح يقِلك
زهرة:متشكرة
{رجعت زهرة عند أنيسة و ليلى}
أنيسة:اية يا زهرة هنعمل ايه؟؟
زهرة:هنركب تاكسي يودينا عند مش عارفة مكان ولا مدينة اسمها نافبليو
أنيسة:ناه ايه؟
زهرة:نافبليو، خلاص بقى متغلبطنيش، يلا بينا
{وخدتهم وشاورا لـ تاكسي وركبوا}
زهرة:نافبليو
{وهناك بعد ما وصلوا ونزلوا}
السواق:αριθμητική!! (الحساب)
زهرة: انت بتقول ايه انا مش فاهمة حاجة!!
{نزل السواق من التاكسي وهو متعصب جداً وبيشد ايد زهرة}
السواق:Πού είναι η ανταμοιβή, κλέφτες; (أين الأجره أيها اللصوص؟)
أنيسة(بصويت) :حرام عليك سيب بنتي، ابعد عنها!!
زهرة(بصويت) :I don't have money!!
السواق(بزعيق) :Ένιωθα σαν να ήσασταν κλέφτες, εσείς. (كنت أشعر أنكم لصوص أيها العاهرات!!)
{والغريب ان حاتم ومهره والقبطان كانوا واقفين بالصدفة في نفس المكان ولما سمعوا زعيق قوي، قرر حاتم ومهره يتدخلوا وراحوا هناك..ولما مهره شافت زهرة صرخت وحضنتها!!}
مهره(بصويت) :زهرة...زهرة...انتي زهرة انا متأكدة!!
زهرة(بعياط) :وانتي مهره، انا لا يمكن عيني تخوني!!
مهره(بعياط) :دي صدفة عجيبة جداً يا زهرة..انتي ايه اللي جابك هنا؟؟
السواق(بزعيق) :Πού είναι τα χρήματα; (فلوسي فين؟)
{جه القبطان على الزعيق وشد السواق على جنب}
أنيسة:انتوا تعرفوا بعض؟؟
زهرة:عز المعرفة ياماما...مش مصدقة ان انا شوفتك يا مهره، دي صدفة خير من ألف ميعاد
مهره:طمنيني عليكي انتي كويسة؟؟
زهرة:الحمدلله يا مهره انتي عاملة ايه؟؟
مهره:الحمدلله بخير، ارتاحت اوي لما شوفتك..انتي كويسه؟
زهرة:كويسة والله...امممم مين ده؟
مهره:ده حاتم
زهرة:انتي اتجوزتي؟
مهره:لا متجوزتش..بس انا وحاتم أكتر من الأخوات
أنيسة:واحنا هنفضل هنا كتير؟
حاتم:لا اتفضلوا...يلا يا قبطان!
{ومشوا كلهم ورا القبطان}
===============================
{عند علاء في بيت نويري..كان قالب الدنيا كلها على فيروز}
نويري:اهدى بقى يا علاء..ما قولتلك اننا عملنا اللي علينا وزيادة انت لية مصمم؟؟
علاء(بزعيق) :يعني انا سايبها عندك أمانة..ارجع ملاقيهاش!!
نويري:طب أحلفلك بكتاب الله إنها كانت في أوضتها الصبح!...ياريتني ما خرجت اتكلم برا..أكيد استغلتها فرصة وهربت!!
علاء:انا كده روحت في ستين داهية..زمانها وصفتلهم المكان..والشرطة زمانها جاية دلوقتي تقبض عليا!!
نويري:أحب أطمنك ولا هتعرف تعمل أي حاجة..البيت في متاهة هتقولهم ايه بس.. ده احنا في آخر الدنيا!!.. ده يبقى كويس اوي لو عرفت توصل لآخر الطريق!
علاء:على كدة زمانها في المنطقة مخرجتش!!...ومادام لسة مخرجتش يبقى دي فرصة حلوه اوي تخلينا ندور عليها!!
نويري:هو انت جايب الثقة دي كلها منين؟..انا بخمن مش متأكد انها هنا..ممكن تكون مشيت من طريق تاني..بقولك ايه سيبك منها، هنبقى نرفع على أمها قضية اهمال بس لما الدنيا تفك شوية!!
علاء(بزعيق) :قضية اهمال ايه بس ياعم انت؟...مين اللي هيرفعها وانا هربان من الحكومة زي فار الجحر؟
نويري:انت ليه عالطول طلقك حامي أوي كده؟..ماتصبر يا علاء وانا هدبرهالك بطريقتي
علاء:ياخوفي منك!!
نويري:لا ياخويا متخافش..انا لما بقول كلمة ببقى قدها، واظن انت عارف كده..انا مش محتاج اتكلم!
=============================
{فـي عـربية بيري..خدت بنتها وكانت راجعة بيت فاتن..رنيت عليها فاتن فا ردت}
بيري:الو يا ماما
فاتن:هاتيلي معاكي الطلبات اللي هبعتهالك على الواتس..وبلاش تجيبيلي على مزاجك زي كل مره، اللي أقوله يتجاب ميتغيرش منه حرف!
بيري:وانا مش هجيب حاجة..انتي متعرفيش اللي حصل!
فاتن(بإستغراب) :ايه اللي حصل؟
بيري:مانا مش عايزة أحكي دلوقتي...هحكيلك لما أرجع...أصل انا لو حكيت عارفة التوتر النفسي اللي هتلبسيني فية اسبوعين قدام!!
فاتن:إخص عليكي يا بيري، بقى تخبي على مامتك، واحنا في بينا أسرار برضة؟
بيري:لا طبعاً انا أكيد هحكيلك بس لما أرجع..واه فيروز راجعة معايا!
فاتن(مصدومة) :فيروز بنتك؟؟...راجعة معاكي ازاي؟
بيري:مااحنا رجعناها ياحبيبتي
فاتن:رجعتوها ازاي؟
بيري:شوفتي بقى انا ليه مكنش ينفع اتكلم؟
فاتن:انتي سايقه؟
بيري:اه سايقه..برافو عليكي انك خدتي بالك..كلها ربع ساعة وهتلاقيني عندك...باي
{قفلت بيري مع فاتن، ولما بصيت في مراية العربية..شافت عربية وراها قطراها!}
==============================
{فـي مـركـب القـبـطان، كانوا كلهم متجمعين}
مهره:وانتوا اية اللي جابكم هنا؟
زهرة(بحزن):اخويا غسان مش سايبنا في حالنا يا مهرة، بيتعامل معانا أوحش معاملة..وحابسني لا بيأكلني ولا سايبني أخرج...قضيت شهور في الأوضة وانا مش شايفة البشر..حتي دموعي كانت بتهون عليه..محدش كان بيمدلي ايده ويساعدني غير كمال..نفسي أكلمه وأشكره على مساعدته ليا..لولاه مكنتش قدرت أهرب من قيد غسان!
مهره:ويطلع مين كمال ده؟
زهرة:كمال ده صاحب غسان أخويا..بس تصدقي انه عكسة في كل حاجة!...انا شوفت منه الحنية اللي مشوفتهاش من اخويا أقرب الناس ليا!
القبطان:وانتوا لاقيتوا سكن ولا لسه؟
زهرة:لا احنا لسه جايين ومنعرفش حاجة هنا..حتى مش لاقيين اللي يساعدنا
حاتم:احم...هو ممكن تستضيفهم عندك في المركب يا قبطان؟
القبطان:كان على عيني بس زي مانت شايف، المركب كله على بعضه قد كده..يادوب كان واخدني انا وانتم بالعافية!
حاتم:هو سواد الليل بس، وانا من بكرا لما اشتغل انا ومهره هنحاول نساعدهم ونشوفلهم شغل هما كمان!
القبطان:ماشي يا حاتم..كلة لله ينورونا
{قامت مهره وخدت زهرة و أنيسة وليلى جوا}
القبطان:الجماعة دول شكلهم غلابة!
حاتم:انا معرفهمش، بس هما من الواضح يعرفوا مهره من سنين
القبطان:نصيبهم انهم يتلاقوا ويانا هنا..يمكن ربنا كاتب حاجة احنا منعرفش ايه هى!
{وجوا في الأوضة..كانت مهره مع زهرة}
مهره:ناموا هنا..ان شاء الله السريرين دول يكفوكم
زهرة:وانتي هاتنامي فين يا مهره؟
مهره:هانام على الأرض..مش إشكال يعني..ولا اقولك هانام على الكنبة..المهم بس مش عايزاكي تشيلي هم..ده ربنا فوق كل شئ!
زهرة:ونعم بالله يا مهره..اطلعي فوق ياطنط ليلى..وانتي نامي هنا يا ماما..هما يومين بالكتير لحد ما ندبر أمورنا
أنيسة:ماشي يا زهرة...معايا يا ليلى
ليلى:ابني غسان هيجي؟
أنيسة:اه هيجي ويقعد معانا هنا..بس اطلعي
{وبعد ما طلعوا على السرير..خرجت مهره ووراها زهرة ووقفوا عند سور السفينة}
زهرة:وانتي يا مهره ايه اللي رماكي هنا بعيد عن أمك واخواتك؟
مهره(بحزن) :ماما واخواتي معرفش عنهم حاجة..معرفش اذا كانوا عايشين ولا ماتوا!..انا يمكن يبان عليا عايشة حياتي طبيعي..لكن انا من جوايا بموت..وعشان أرجع مصر مش عارفة اعملها!!
زهرة:ايه الظروف اللي حطيتك هنا؟..ومين حاتم والقبطان اللي قاعدة معاهم هنا؟
مهره(متأثرة) :حاتم ده أحسن حاجة قابلتني في حياتي يا زهرة..انا بحس بالأمان طول مانا معاه وقريبه منه...بحس انه سندي وأماني..ومن غيره بحس ان انا يتيمه رغم ان انا يتيمة الأب فعلاً...انا من ساعة ما القدر حطني وياه في الظروف دي وانا رغم كل حاجة بتوجعني بس بحس إني مبسوطة..عارفة ببقى نفسي اترمي في حضنـ....
{ولسه بتكمل الجملة، راحت زهرة دغزتها في ايديها لما حسيت ان حاتم جاي}
زهرة(بصوت واطي) :جاي
مهره(بصوت واطي) :يانهار اسود لا يكون سمع اللي قولته ده!!..هيبقى شكلي وحش اوي!!!
{جه حاتم ووقف جنبهم وهو باصص للسما}
حاتم:مش محتاجين أي مساعدة؟
زهرة:شكراً يا أستاذ حاتم...احنا كل اللي محتاجينة سكن وشغل والباقي ربنا يرزقنا بيه من تعبنا
حاتم:انا ومهره هنستلم الشغل من بكرا ان شاء الله..وهنسألكم عن وظيفة وسكن..انتي برضة في مقام أختي زيك زي مهره بالظبط!
{بصيتله مهره بغضب بعد ما قال أكتر جملة بتكرهها..ودي حاجة لاحظها حاتم على وش مهره}
زهرة:شكراً ربنا يكرمك ويكرم أصلك يااستاذ حاتم
حاتم:العفو...على العموم القبطان راجل طيب وبيحب يعمل خير وزي ما ساعدنا هيساعدكم!
زهرة:ربنا يخليكم، وما يحطكم في اللي احنا فيه
{مشى حاتم وهو ومهره بيعملوا Eye contact لبعض.. راحت زهرة مطلعه موبايلها واتصلت على كمال}
زهرة:الو...احنا وصلنا!
==============================
{تـانـي يـوم عند غسان وكمال في المستشفي..راح غسان مع كمال عشان يتطمنوا على زهرة..ولما سأل الممرضة}
غسان:حالة زهرة اتحسنت ولا زي ما هي؟
الممرضة:لسة مش أوي..أصل التحسن ده مبيظهرش بين يوم و ليلة...ده محتاج فترة طويلة!
غسان:بس الدكتور قال ان الحالة كام يوم وتبقي كويسة!...انا مش فاهم هو في ايه؟
الممرضة:ممكن حضرتك تهدي شوية وبلاش عصبية!!.. دي تعليمات الدكتور واحنا بننفذها...عن اذنكم!
غسان(بزعيق) :تعليمات ايه وزفت ايه؟..طب انا متأكد اننا لو وديناها لدكتور تاني هيقول انها سليمة ومفيهاش حاجة!!
كمال:خلاص بقى يا غسان هو احنا يعني هنفهم أكتر من الدكتور؟...ياسيدي كل واحد أدرى بشغله!
{اتجه غسان لغرفة زهرة وفتحها وهنا كانت الصدمة}
غسان(بزعيق) :زهرة فييين؟؟؟؟؟
كمال(في سره) :يانهار اسود ومنيل!!!
===========================
{عـنـد بـيـري راحت تزور صاحبتها علا اللي المفروض جوزها بيخونها معاها..دخلت بيري بـ بوكية ورد وعلبة شوكولاتة..كانت واقفة بكامل اناقتها..والابتسامة من الخد ده للخد ده!!...ولما صاحبتها فتحت اتفاجئت بيها}
علا(مصدومه) :بيري؟
بيري(بتحضنها) :أه بيري ياروح قلبي..اخبارك ايه طمنيني عليكي؟
علا(بتردد) :انا كويسه...انتي عاملة ايه.. تعالي ادخلي!
{دخلت بيري، واديتها الهدايا وقعدت وحطيت رجل على رجل..وكانت بتلف عينيها في كل مكان في الشقة}
علا:تعبتي نفسك ليه بس يا بيري؟
بيري:لا ياحبيبتي ولا تعب ولا حاجة..انتي غيرتي ديكورات الشقة ليه؟...الأول كان أحسن بكتير!
علا:التغيير مطلوب
بيري:مين بقى اللي مختارلك الديكورات دي؟..أصلها بصراحة مش حلوه وده مش ذوقك خالص!
علا:اه مش انا...دي اختيارات واحدة صاحبتي
بيري:اها واحدة صاحبتك قولتيلي!
علا:قوليلي بقى تشربي ايه؟
بيري:أي حاجة من ايدك هتكون حلوه
علا:ميرسي ياحبيبتي، اديني ٥ دقايق
بيري:خدي وقتك
{وبعد ما علا دخلت المطبخ..قامت بيري وحطت جهاز تصنت صغير في مكان لا يمكن يجي على بالها..وفجأة خرجت علا من المطبخ ولقيت بيري واقفة}
بيري:ماشاء الله حاسة ان انا شوفت صورة مامتك وباباكي دي قبل كده!
علا:اه مانا وريتهالك قبل كده في البيوتي سنتر انتي نسيتي؟
بيري:اه نسيت..بجد متفكرنيش انا بقيت أنسى كتير اوي الفتره دي بس بقول يمكن من اللي فيا مانا برضة معذوره!
علا:اه ياحبيبتي ربنا يقويكي على اللي انتي فيه...كنت عايزة اسألك بس..نتغدا الأول ايه رأيك؟
بيري:لالا انا كلت في البيت، ميرسي يا علا
علا:اوكي مفيش مشكلة
{ورجعت المطبخ تاني، وبيري قعدت على الكرسي}
==============================
{أول يوم شغل لـ حاتم ومهره في الماركت...كان حاتم ومهره وظيفتهم يقفوا في المخبز يبيعوا المخبوزات زي الدوناتس و الكرواسون والوافل والبان كيك، والعيش وهكذا..وصاحب الشغل بعد ما شاورلهم بلغة الاشارة، سابهم ومشي وكان اعتماده كله عليهم..لحد ما دخلهم أول زبون..كان راجل ومراتة وابنهم}
الراجل:Δώσε μου δύο ντόνατς.(أعطني قطعتين دوناتس)
حاتم:Me انا يعني...انا I don't speak the language.
{كان حاتم بيحاول يتكلم انجليزي على قد إمكانياته}
حاتم:Do you speak English؟
الراجل:Yes, it's the mother tongue.(نعم انها اللغة الأم)
{ولكن كان حاتم مش فاهم حاجة برضة..لحد ما الراجل شاورلة على الدوناتس..رفع حاتم صوابعه بمعنى عايز كام واحده؟..رفع الراجل صوابعة الاتنين..ووقتها حاتم فهم وجهزلة طلبة..وبعد ما دفع ومشى..رجع حاتم وقف تاني}
حاتم:شكلنا هنتعب اوي في الشغلانة دي!..مكنش خدنا أمريكا اهو على الأقل كله بيتكلم انجليزي..مش هنا يوناني وليلة زرقا!!
{ضحكت مهره على كلام حاتم}
مهره(بتضحك) :بيني وبينك يا حاتم..انا بقول صاحب الشغل آخرنا معاه يومين بالكتير وهيطردنا!
حاتم(بيضحك) :طب خليه يعملها وشوفي انا هعمل فيه ايه...هيبقى مصيره زي مصير حريث...الله يرحمه كان طيب
مهره(بإبتسامه) :مبسوطة انك انقذتني..كان زمانك بتترحم علينا احنا الاتنين دلوقتي!
حاتم:بعد الشر عليكي يا مهره..انتي غالية عليا اوي ومش هقدر استحمل خسارتك!...انا أفديكي بروحي!
{بصيت مهره لـ حاتم نظرة حب..كان قلبها بيرفرف من حبها له، ولكن كان لازم تداري!..لحد ما دخل تاني زبون}
حاتم:اتعاملي معاهم انتي بقى!
==============================
{في المستشفي عند غسان وكمال، في مكتب مدير المستشفي..كان غسان بيتخانق معاهم}
غسان(بزعيق) :يعني اية زمانها مشيت؟...ولما هي مشيت متسجلتش في دفتر المغادرة ليه؟؟
المدير:يبقى هربت يااستاذ مفيش حل غير كده!
غسان(بزعيق) :ما دي أنيل!!...ماهي كوسه بقى اللي يمشي يمشي واللي يهرب يهرب..ده انا هوريكم أيام سوده، وقفل المستشفى دي هيكون على ايدي!!
كمال:هنرجع الكاميرات يا غسان ونبقى ريحنا دماغنا وعرفنا اذا كانت مشيت ولا هربت!
غسان:كاميرات ايه اللي هترجعوها؟.. وهما لما يرجعوا الكاميرات، كانت زهرة هترجع؟
كمال:طب انت عايز ايه دلوقتي؟
{دخلت الممرضة بالدفتر}
الممرضة:أستاذة زهرة سجلت مغادرة النهارده الصبح
المدير:اهو يبقى مهربتش وتبقى مشيت بمزاجها...احنا كده خِلينا مسئوليتنا..ومشاكلكم دي تحلوها برا مش هنا!!
{قرب غسان من المدير على مكتبه والشر في عينيه}
غسان(بزعيق) :طب مابلاش الطريقة دي عشان متزعلش طيب
المدير(بزعيق) :ابعد والتزم حدودك بدل مااندهلك الأمن!!
غسان(بزعيق) :انت هتهددني ولا ايه؟..انا مبتهددش!
{فجأة الظابط دخل عليهم ولما غسان لف وشه وشافه ارتبك}