أخر الاخبار

رواية شي من الخوف الفصل الثالث3بقلم رحاب القاضي


رواية شي من الخوف
 الفصل الثالث3
بقلم رحاب القاضي



سماء 
اييه ازاي يعني يحيي، عادل اا.. 

سهير
والله العظيم لو اسم عريس بنتي جه علي لسانك تاني هوريكي الوش التاني وانصحك بلاش تشوفيه انا ممكن اخلي عمك يموتك ونخلص منك فاتقي شري.. 

سماء ببكاء
مش عايزه اتجوز خالص، لا يحيي ولا غيره.. 

سهير
وانا يا روح امك هفضل مقعداكي عندي، انتي تقولي حاضر وبس والا هخليكي تتجوزيه وبفضيحه وانا اقدر اعمل كده... 

الدكتوره سلوي 
وقالتلي سماء انها وافقت ورضيت بالجوازه اللي وصفتها بانها من البدايه هم علي قلبها..واتعملها فرح حلو وبتقول انها ما شافتش عادل خالص وما كانتش مهتميه تشوفه لانه ما اتمسكش بيها..

_ وتاني يوم جوازها الصبح طلعت بره اوضتها وقعدت في الصاله وشويه والباب بتاع شقتها خبط ولما فتحت كانت فايزه مرات عمها جيبالهم الفطار .. 

سماء
صباح الخير يا مرات عمي اتفضلي. 

فايزه 
صباحيه مباركه يا عروسة ابني... 

_ ودخلت وحطت الاكل علي الترابيزه، وقالت وهي مدايقه.. 

فايزه 
ايه ده يا سماء هو انتو نمتو وسيبتو التلفزيون مفتوح ولا ايه؟.. 

سماء
لا والله يا مرات عمي ده انا بس صحيت من شويه وما جاليش نوم.. 

فايزه 
حتي لو برضو اياكي تقومي مره تانيه من جنب جوزك انتي فاهمه ولا لا؟.. 

سماء 
وفيها ايه يا مرات عمي بس اا.. 

زعقت فيها فايزه 
تسمعي الكلام يا بت انتي، انا ايوه بحبك بس بحب ولادي اكتر يعني في يوم الاقي يحيي زعلان هتشوفي مني وش يا سماء عمرك ما شوفتيه واللي كان من ناحية عادل كأنه ما كانش فاهمه ولا لا.. 

عيطت سماء وقالت
والله العظيم انتي فاهمه غلط يا مرات عمي وكل ده ليه يعني عشان قومت بدري شويه..

فايزه 
ايوه ما تقوميش من جنبيه غير لما هو يصحي وافردي وشك عليه شويه ده عريس ما تكسريش بنفسه فاهمه ولا لا.. 

سماء
حاضر يا مرات عمي.. 

_بصتلها فايزه من فوق لتحت ونزلت وسماء راحت قعدت قدام التلفزيون تاني، وطلع يحيي من الاوضه وقال.. 

يحيي
هي امي كانت بتزعق ليه دلوقتي؟.. 

سماء
زعلت عشان قومت من جنبك قبل ما تصحي، وجابت الفطار.. 

يحيي
والله العظيم امي دي ست بتفهم.. 

سماء
هتفطر طيب ولا هتكمل نوم.. 

يحيي
لا هفطر طبعا قومي اعمليلي شاي وبلاش القعده دي ما بحبهاش انااا.. 

_قال كلامه وسابها ودخل الحمام وهي قامت قفلت التلفزيون وعملتله شاي وبقيت تسمع كلامه وتقول حاضر ونعم وبس، لحد ما في يوم كانت فايزه قاعده عندهم وقالت.. 

فايزه 
هي مال شقتك كده يا بت انتي ما فيهاش روح وانتي وجوزك علي طول كده ساكتين.. 

سماء
ابدا يا مرات عمي والله احنا علي طول بنتكلم مع بعض اومال متجوزين ازاي يعني.. 

فايزه 
انا عارفه يا اختي متجوزين ازاي، علي العموم انا عايزه حتت عيل افرح بيه من ابني.. 

سماء
دي حاجه بأيد ربنا يا مرات عمي لما ربنا يريد هتحصل.. 

فايزه 
علي عيني وعلي راسي الكلام ده، بس بقالكم اربع شهور متجوزين وما فيش حاجه حصلت، ابقي كلمي جوزك وخديه وروحي اكشفي.. 

سماء 
حاضر يا مرات عمي لما يرجع يحيي من الشغل هبقي اقولو... 

فايزه وقفت وقالت
اما نشوف يا سما وابقي افردي خلقتك كده واضحكي في وش جوزك.، تعالي شوفي عزه عامله ايه مع عادل ، عيني عليك وعلي حظك يا يحيي ياريتني كنت جيبتله واحده من بنات مصر زي عزه وكنت خليته يقعد هناك هو كمان بس اعمل ايه هو اللي اختار.... 

_قالت كلامها ونزلت، وسماء كملت تجهيز الغدا ولما جه يحيي قعدت تتغدي معاه وقالتله علي كلام فايزه.. 






يحيي
وانتي بقي عايزه تخلفي مني ولا لا.. 

سماء بضيق 
عادي انا شايفه ان دي حاجه بتاعت ربنا تيجي وقت ما تيجي.. 

يحيي بحزن
ولو كنتي متجوزه عادل كنتي هتقولي كده برضو يا سماء.. 

سماء بضيق
انت ايه اللي بتقوله ده، انا دلوقتي مراتك انت يعني عادل اخويا وبس ومدام انت فاهم كده اتجوزتني ليه.. 

زعق فيها يحيي وقال
انتي تحمدي ربنا اني اتجوزتك هو انتي ليكي اهل اصلا ولا ليكي حد ده انا لميتك من الشارع اللي كنتي هتترمي فيه.. 

عيطت سماء وهو قال
احترمي نفسك معايا بقي وتسمعي الكلام لان في اي وقت هتزعليني هطلقك وارميكي في الشارع فاهمه يا سماء.. 

سماء 
حاضر يا يحيي اللي انت عايزه انا هعمله.. 

_وسابها يحيي ونزل وراح عند مامته تحت وقالها اللي حصل.. 

فايزه 
جدع يا يحيي، انت بس اسمع كلامي وهي مش هتكسرلك كلمه.. 

يحيي 
ماشي يا ماما، بس هي لو سألت وعرفت انها لو اطلقت هتاخد. القايمه وكمان ابويا مش هيسيبها و.. 

فايزه 
انا مظبطه كل حاجه وانت وشطارتك بقي، هي ما تعرفش حاجه عن الحاجات دي وانت بقي تخليها كده لا تعرف الشرق من الغرب.. 

يحيي
حاضر وان شاء الله خير.. 

الدكتوره سلوي
سماء كان كل خوفها في الوقت ده انها تترمي في الشارع وما كانتش عارفه حاجه عن القانون ولا اي حاجه وكانت فاكره انها لو اطلقت مش هيبقي ليها اي حق ولا حد هيقف معاها،وكان يحيي ومرات عمها مانعين تماماً انها تتكلم مع حد غريب او ختي تتفرج علي التلفزيون غير معاهم،كانت زي المسجون في سجن الحريه،حاجه كده معقده بس دمرت سماء خلتها طول ما هي عايشه خايفه من كل حاجه.. 
ـــــــــــــــــــــــــــــــــــ
_وعدت السنين وخلفت فعلا سماء من يحيي اربع بنات وكان لسه عمرها سته وعشرين سنه، وكانت اكبر بنت من بناتها عندها ست سنين واللي حصل وقتها... 

فايزه 
يا سمااااء تعالي شوفي بناتك دول انا مش ناقصه صداااع.. 

طلعت سماء من المطبخ وقالت
طيب يا مرات عمي معلش خلي بالك منهم بس شويه لحد ما اخلص الغدا يحيي وعمي علي وصول.. 

فايزه 
انا مش عارفه هما عاملين كده علي ايه اومال لو كنتي مخلفاهم ولاد... 

سماء بضيق 
والله يا مرات عمي اللي بيجيب ولاد وبنات ربنا دي حاجه انا ما ليش ذنب فيها... 

فايزه 
اهو ده اللي انتي فالحه فيه، اهي عزه جيباهم تلات ولاد، احسن منك في ايه بنت سهير.. 

_ما ردتش عليها سماء ودخلت تكمل تجهيز الاكل، وبالليل كانت قاعده هي ويحيي.. 

يحيي
انتي هتنامي ده لسه العشا ما اذنتش؟.. 

سماء 
اسكت يا يحيي انا ما صدقت البنات نامو ده انا مش بقعد خمس دقايق علي بعض خالص.. 

يحيي
طيب انا عايز اخلف ولد عادل اخويا معاه تلاته وانا هتبقي خلفتي بنات.. 

سماء
امم وده بقي كلامك ولا كلام مرات عمي.. 

يحيي بحده 
كلامي او كلام امي انا عايزك تبطلي تاخدي المانع وتخلفي وولد.. 

سماء بدموع 
لا حول ولا قوة الا بالله يا رب وانا اعملها ازاي دي هدخل في حكم ربنا.. 

يحيي 
هي اخر مره دي ولو ما جاش الولد انا هجيب اللي تجيبه.. 

سماء 
ياريت اهو تيجي واحده تشيل عني شويه.. 

مسكها من دراعها جامد وقاال
ايوه ما هو ده اللي انتي عايزاه، بس عمرك ما هتنوليها يا سماء وهتفضلي عايشه معايا عمرك كله وبالطريقه اللي انا عايزها.. 

الدكتوره سلوي
وفي الوقت ده سماء وافقت علي كل اللي يحيي عايزه، وبعد فتره بقيت حامل وكانو بناتها صغيرين وكانت بتعمل كل حاجه في البيت برضو عند حماتها وكانت كمان مش بتنزل الشارع لوحدها ولا بتتكلم مع حد...وقبل ما تولد بكام يوم حصل.. 

يحيي
انا مسافر بكره يا سماء جهزيلي الشنطه، في شغل مهم والمدير قالي لازم انا اللي اروح القاهره اخلصه. 

سماء بتعب
هتسافر وتسيبني يا يحيي وانا علي وش ولاده.... 

يحيي
وانا اعملك ايه يا سما عندك امي وابويا، وبعدين انا مش عايز اخسر شغلي واديكي شايفه المصاريف بتاعت البنات والبيت عامله ازاي.. 

سماء
حاضر هجهزلك الشنطه يا يحيي.. 

يحيي
بقولك ايه انتي ما عرفتيش برضو انتي حامل في ولد ولا في بنت.. 

سماء
ما انت عارف ان هنا في البلد ما فيش دكاتره اصلا اكشف عندها، وانتو مش بتخلوني اروح اكشف بره البلد ده انا ولدت البنات بالدايه... 

يحيي بحده 
علي العموم هي كلمه يا سماء لو جيبتيلي البت الخامسه هرميكي في الشارع انتي وبناتك وهجيب واحده تجيبلي ولد.... 

عيطت سماء وقالت
وانا مالي طيب يا يحيي، حرام عليك والله.. 

يحيي 
اللي عندي قولته يا سماء... 

_قال كلامه ودخل اوضته وسماء فضلت خايفه جدا تجيب بنت وتترمي بيها وباخواتها في الشارع، وفضل تقلها يصورلها حاجات مش كويسه... وتاني يوم في شقة فايزه.. 

يحيي
اومال فين ابويا انا عايز اسلم عليه قبل ما يمشي.. 

فايزه 
ابوك نزل شغله وبعدين انت مش مهاجر، قولي بقي انت قولت لمراتك زي ما قولتلك.. 

يحيي بضيق 
ايوه قولتلها ومن امبارح عماله تعيط، انا مش فاهم ايه لازمته.. 

فايزه 
لاا ليه لازمه عشان لو جابت بنت وانا جيت اجوزك تحمد ربنا انها جات علي انك تتجوز عليها ومش هتترمي في الشارع.. 

يحيي
وانتي مين قالك اني هتجوز علي مراتي ولا هرميها في الشارع، انا روحي في سماء يا ماما وعمري ما هسيبها.. 

فايزه 
انت حر خليها تشوف نفسها عليك وتسيبك، ما هي مش بتحبك وانا وانت عارفين كده كويس وهي قاعده معاك بالخوف يا عين امك... 

يحيي بضيق
انا ماشي يا امي بعد اذنك.. 

_قال كلامه ومشي وبعد كام يوم سماء ولدت وطلعت الدايه من اوضتها وقالت لفوزي وفايزه.. 

الدايه 
الف مبروك يا حج فوزي جاتلك بنت زي القمر صوره من امها... 

فوزي 
الحمد لله اللي يجيبه ربنا خير.. 

قامت فايزه ودخلت عند سماء وقالت
جيبتي بت خامسه يا سماء، استني بقي لما يجي جوزك وهتترمي بيهم في الشارع ونخلص منكم.. 

سماء بخوف عيطت وقالت بتعب
لا والنبي يا مرات عمي هروح بيهم فين بس ، والله انا ماليا ذنب في حاجه.. 

فايزه 
اديني قولتلك اللي فيها اجهزي بقي يا حلوه.. 

_قالت كلامها وطلعت وسابت سما تعيط، وبصت لبنتها اللي لسه مولده جنبيها وقالت بخوف.. 

سماء ببكاء
انتي السبب انتي اللي هتخليني انا وانتي واخواتك نترمي في الشارع والله اعلم ايه اللي هيحصل فينا.. 

_وشالت البنت وحطتها علي رجلها ولفت ايدها علي رقبتها وخنقتها،تملك منها الخوف خلاها تقتل حته منها باديها،كتر القسوه والظلم قتلو براءتها قبل ما هي تقتل بنتها... 

_وبعد كام يوم رجع يحيي وكان مدايق جدا وقال.. 

يحيي 
خلاص يا سماء ربنا هو اللي جابها وهو اللي خدها.. 

فايزه 
الحمد لله اهو ربنا اداكي فرصه لما خد بنتك انك المره الجايه تجيبي ولد... 







عيطت سماء اكتر ويحيي قال
لو سمحتي يا ماما بلاش الكلام ده دلوقتي.. 

فايزه 
هو انا قولت حاجه المهم روح اطمن علي حنين بنتك تعباانه من يوم ما اختها ماتت.. 

قام يحيي من جنب سماء وقال
انا هروح اطمن علي حنين وجاي عندك تاني يا سماء.. 

فايزه 
بطل يا اخويا الحنيه دي، وروح شوف بنتك.. 

_طلع يحيي وراح لبنته اللي كانت نايمه وقالها.. 

يحيي
عامله ايه يا حبيبت بابا ايه اللي تاعبك.. 

حنين ببكاء
بابا انا خايفه من ماما لتعمل فيا زي اللي اللي عملته في اختي.. 

يحيي 
وهي عملت ايه في اختك بس؟. 

حنين 
خنقتها قدامي انا شوفتها بس هي ما تعرفش اني شوفتها.. 

قام يحيي بسرعه وراح لسماء وقال بدموع 
ايه اللي عملتيه ده، بنتك فين يا سماء خنقتي بنتك يا سمااء؟.. 

سما ببكاء 
صوتها في وداني انتو السبب، بنتي صوتها بتعيط انا هروحلها انا هروح اجيبها واقعد في الشارع اقعد في الشارع المهم بنتي ترجعلي.. 

يحيي بحزن علي حالتها
انا اسف والله ما كنت هعمل حاجه زي كده، انا بس كنت خايف تسبيني.. 

سماء بانهيار
ابعد عني انتو اللي عملتو فيا كده انتو اللي وصلتوني لكده، بنتي انا عايزه بنتي انا عااايزه اروح لبنتي انا مش هسيبها لوحدها.. 

الدكتوره سلوي
وسماء فضلت كل يوم تهرب تجري في الشارع وراحت لقبر بنتها وكانو بيرجعوها بس كانت بتسمع صوت بنتها بتعيط وكانت بتروحلها ، لحد ما عقلها راح وبقيت عايشه وكانها في دنيا تانيه.. 

_وفي الوقت ده باب أوضة سلوي خبط ودخل يحيي جوز سماء.، والدكتور سلوي قالت.. 

سلوي
تعالي يا يحيي انا هسيبك تتكلم مع سماء شويه زي كل يوم.. 

يحيي 
هو ما فيش اي تحسن في حالتها؟.. 

سلوي
ربنا يشفيها من عنده، المهم انت تخلي بالك منها وتحاول تصلح اللي عملته زمان.. 

يحيي
انا عملت كده عشان بحبها، انا كنت خايف تسيبني.. 

سلوي 
لو بتحبها كنت اشتريت سعادتها حتي لو كانت مع غيرك، انما انت اناني بصيت لنفسك بس وانت وامك دمرتوها.. وعلي فكره اللي محتاج يتعالج دلوقتي اكتر من سماء امك وعمتك وبنت عمتك دول مرضي وحيوانات والله حتي الحيوانات عندها رحمه وبتفهم عنهم

يحيي قرب من سماء وقال
وحشتيني اووي يا سماء، البنات مستنينك ترجعي تاني... 

_ما ردتش عليه سماء وكانت باصه قدامها وساكته لا بتتكلم ولا بتعمل اي حاجه غير انها عايشه في دنيا تانيه... 

_ تفتكرو بقي ايه اللي هيحصل؟ 
ــــــــــــــــــــــــــــــــــــــــ 
ملحوظه: احداث القصه دي حصلت بجد حقيقي من زمان يعني بسمعها من ماما والست دي اللي قتلت بنتها لسه للنهارده عايشه، وان شاء الله هكملكم باقي حكايتها.. 



تعليقات



حجم الخط
+
16
-
تباعد السطور
+
2
-
close