رواية جوازة ميراث الفصل التاسع عشر19والعشرون20بقلم رانيا عماره
سامي:وجيبتي رقمي منين؟
زينه(بتضحك) :ملكش دعوه...عامل ايه يا سامي؟
سامي:تمام..جيبتي رقمي منين؟
زينه(بتضحك) :برضه مصمم تعرف؟...انا خدته من صفاء بس وهى مش واخده بالها هههههه
سامي:وعايزه ايه؟
زينه:كنت حابه اننا نتعرف على بعض أكتر ولا انت معاك مشكله؟
سامي:اشمعنا انا يعني؟
زينه:حسيت كده ان قلبي مرتاحلك معرفش ليه..فا قولت لا.. لازم اكلمك واتطمن عليك وبالمره نعرف بعض
سامي(بغرور) :انا أي حد يعرفني لازم يرتاحلي ويحبني
زينه(بتضحك) :ده لازم..مانا ارتاحتك وحبيتك الصراحه..انا سمعت انك كنت متجوز وطلقت بقى ده بجد؟
سامي:اه بجد..وانا اللي مكنتش عايزها...دي بت فقريه ومش عاجبها عيشتها وكل يوم طلبات طلبات..روحت مطلقها وخلصت من همها
زينه(بسهوكه) :معقول كانت مدايقاك اوي كده؟
سامي:هى كانت مدايقاني بـ عقل!..دي كانت مكرهاني في عيشتي..ده انا مكنتش عارف آخد نفسي منها!
زينه(بسهوكه) :حد يدايق القمر ده
سامي:الله يخليكي كلك ذوق
زينه:تسلملي ياغالي...ومخلفتش منها عيال؟
سامي:لا مش عايز من وشها حاجه..دي مكملتش شهر معايا روحت مطلقها..قعدت تتحايل عليا وتدخل في جو صعبانيات بس انا كنت خلاص جيبت آخري منها!
زينه:طب كويس انك دلوقتي فاضي وبـ طولك..بكرا ربنا يعوضك بـ بنت الحلال اللي تستاهلك
سامي:ياااارب
<عـنـد مـصـطـفـى>
••كان قاعد في الأوضه يعيط بعد ما طلق مروه..وكانت سلمى أخته معديه..سمعت صوت عياط..ولما قربت الصوت وضح أكتر راحت فاتحه الباب••
سلمى:انت بتعيط يا مصطفى؟
مصطفى(بيداري) :لا...مفيش حاجه
سلمى:ازاي مفيش..وانت وشك إحمر من كتر العياط!..انت زعلان علشان مروه؟
••وقعدت جنبه••
مصطفى(بعياط) :انا مش زعلان على حد!..انا مصدوم فيها..مصدوم في السنين اللي هانت عليها بكل سهوله!..مروه يطلع منها كل ده يا سلمى؟..طب ازااي!...ازااي ياناااس حد يفهمني!!..مروه اللي كنت راسم معاها حياتي من سنين؟..كنت بشكر فيها لـ طوب الأرض وبقول دي العوض!...ده انا وقفت قصادكم علشانها..خوفت تضيع من ايدي وتكون مع حد تاني!..بقيت أنحت في الصخر علشانها!...وهى من تاني ناحيه بتخطط وبترتب!..وانا هنا غبي مش فاهم حاجه!..دي باعت امها يبقى مش هتبيعني؟...تطلع هى سبب المصايب دي كلها؟..طب بلاش انا...انا اولع..رشاد ودينا وأهلها ويوسف ذنبهم ايه؟...دمرت أسره بأكملها..وانا اتعجزت
سلمى:لا ياحبيبي متقولش كده..مش الدكتور ادانا أمل في علاجك؟..بس قال الأهم من كل ده نفسيتك؟
مصطفى(بزعيق) :انا مش عايز حاجه من الدنيا دي خلاص!!..انا اللي زي ملهمش مكان في الدنيا!!
••وفجأه مصطفى بدأ يتوجع••
مصطفى(بتعب) :اااه....اااه
سلمى(بخوف) :مالك يامصطفى فيك ايه؟؟
مصطفى(بتعب) :ااااه
••قامت سلمى من مكانها وندهت على مامتهم••
سلمى:مامااااا...يامامااااا...ماماااا
••تيجي عائشه من المطبخ••
عائشه:ايه ياسلمى في ايه؟
••وبتبص لقيت مصطفى بيتوجع..لحد ما ما جريت عليه••
عائشه(بخوف) :مالك يامصطفى؟؟...حاسس بـ ايه ياحبيبي؟
مصطفى(بتعب) :حاسس حاجه انفجرت في بطني!!
عائشه(بصويت) :حاجة ايه دي؟؟.. مالك ياحبيبي...ايه اللي تاعبك!
مصطفى(بتعب) :بموت يامامااا
عائشه:بعد الشر عليك ياحبيبي..اسنديه معايا يا سلمى.. ولا أقولك هاتيلي موبايلي بسرعه
سلمى:حاضر
••وطلعت تجري سلمى..لحد ما جابت الموبايل••
عائشه:هاتي
••واتصلت بـ رشاد••
عائشه:الو يارشاد..الحقني..اخوك تعبان اوي..تعالالنا بسرعه!
رشاد(بخوف) :مصطفى ماله؟؟
عائشه(بخوف) :بيقولي في حاجه انفجرت في بطنه..تعالى بسرعه... بسرعه يا رشاد علشان خاطري
رشاد(بيقوم) :حاضر...انا جاي حالاً
••وخد موبايله والمفاتيح ومشى..كل ده وداليدا مستغربه..وبعد ما رشاد وصل..طلعلهم بسرعه...جات سلمى فتحت..وطلع يجري جوا يشوف مصطفى••
رشاد(بخوف) :مالك يامصطفى؟
مصطفى(بصويت) :ااااه...تعبان اوي
عائشه:شيله معايا بسرعه
••سندوه هما التلاته..وركبوا العربيه ومشوا••
<عـنـد هـنـا ويـمـنـى>
••قرروا يسافروا مع خالتهم ثناء لـ أمريكا 🇺🇸 ••
هنا:حطيتي كل حاجه؟
يمنى:ايوه... يلا بينا
••وطلعوا يجروا ركبوا العربيه مع خالتهم لحد المطار••
ثناء:يلا ياحبايبي انزلوا!
••ودخلوا المطار وخلصوا الاجراءات بتاعتهم وركبوا الطياره وسافروا برا بدون علم ضياء••
<عـنـد ضـيـاء>
••كان لسه متداري من الشرطه طول الشهور اللي فاتت ومحدش يعرف مكانه غير مساعدينه..وفي الوقت ده كان قاعد في حمام السباحه وفي ايده كاس..لحد ما جاله واحد من مساعدينه••
_بناتك هربوا مع خالتهم يا ضياء بيه
ضياء(بصدمه) :امتى؟؟؟
_من ساعه كده ولا حاجه
ضياء(بعصبيه) :ازاي يمشوا بدون علمي!!..بيهربوا من أبوهم؟..أبوهم اللي ياما استحملهم واستحمل قرفهم!
_انا قولت أبلغ حضرتك
ضياء(بزعيق) :تبلغني بعد مالدنيا خربت؟؟...امشي ياكلب من قدامي..انتوا اللي زي أمثالكم دول ميستحقوش الجنيه الواحد انتوا آخركم تمسحوا عربيات وسلالم!..دي غلطتي ان انا شغلت كلاب معايا مش مقدرين قيمة النعمه اللي في ايديهم...قال ايه جاي يعرفني بعد ماهربوا!..وانا اعمل ايه هروح المطار واقولهم بناتي هربوا علشان اتمسك وأروح في ستين داهيه!..مانتوا كل اللي هاممكم نفسكم وبس!
••بص المساعد له في الأرض ومقدرش يتكلم نص كلمه••
ضياء(بزعيق) :غور من قدامي!!.. يلاااا
••وكسر الكاس اللي في ايده على الأرض بعيد..وبعدين طلع من حمام السباحه وعدى من فوق الإزاز المكسور!••
<عـنـد رشـاد>
••كانوا وصلوا المستشفى..ومستنين مصطفى جوا في العمليات..وعائشه كانت منهاره انهيار شديد!••
عائشه(منهاره) :كل مانخرج من مصيبه ندخل في اللي بعدها!!..ياااارب كده كتير اوي علينا!!..انا في كل مره بقول الحمدلله ومبتكلمش نص كلمه!..بس كده كتير اوي يارب والله مابقينا قادرين نستحمل ده عذااب!..دول عيالي انا مليش غيرهم!..يارب استرها معاهم طول طيبين زينا!..طول عمرنا ماشيين جنب الحيط ومبنإذيش حد..وبرضه الأذيه جايالنا من الناس!
سلمى(بحزن) :اهدي ياماما
رشاد(بعصبيه) :انا ذات نفسي زهقت...ومابقتش عارف ايه ممكن يحصل تاني!!!..دي عيشه قرف...كلمة قرف دي شويه!
••يجي والد رشاد من بعيد وهو بيجري وقلقان••
والد رشاد:مصطفى لسه في العمليات؟
رشاد:ايوه
والد رشاد(بخوف) :ايه اللي حصل طيب؟
رشاد(بخنقه) :بيقولوا عنده انفجار في الزايده
والد رشاد(بصدمه) :يانهار اسود..حد فيكم زعله؟؟
سلمى(بعياط) :انا دخلت الأوضه لقيته بيعيط وزعلان على نفسه اوي بسبب مروه..قالي انه مصدوم فيها ومش مصدق..وبعد شويه تعب اوي وفضل يصرخ لحد ماندهت ماما وجات
والد رشاد(بزعيق) :من يوم ما عرفنا مروه واحنا حياتنا متدمره بسببها..حسبنا الله ونعم الوكيل فيكي اللهي ربنا ياخدك وينتقم منك..دي كانت جوازة الهم والقرف من يومها واحنا مشوفناش يوم راحه..انا الود ودي أقتل مره وارتاح منها ومن سيرتها..انا عيالي شافوا كتير ولسه بيشوفوا..هو في ايه؟...الدنيا عايزه مننا ايه؟
سلمى(بعياط) :اهدى يا بابا لو سمحت..إن شاء الله مصطفى هيقوم بألف سلامه
••طلع الدكتور من العمليات وهو مبتسم..وكلهم قاموا••
الدكتور:حمدالله على سلامة مصطفى..الحمدلله شيلنا الزايده والعمليه نجحت
عائشه(بخوف) :ابني كويس يادكتور؟
الدكتور:كويس وزي الفل..قولي الحمدلله
عائشه(بعياط) :الحمدلله...اللهم لك الحمد والشكر
والد رشاد:هندخل نشوفه امتى يادكتور؟
الدكتور:احنا دلوقتي هننقله على أوضته وبعد نص ساعه تقدروا تشوفوه
والد رشاد:الحمدلله
<عـنـد سـامـي>
••كانت زينه لسه بتتكلم معاه في الموبايل،وكان منسجم منها اوي أكتر من داليدا••
زينه:طيب ماتوافق ايه المشكله؟
سامي:لا أوافق ايه هو انتي شايفاني لمؤاخذه؟..اصلك لسه متعرفنيش.. بكرا لما تعرفيني أكتر..هتعرفي ان سامي ميعديش اللي بيحصل كده بالساهل..لازم وقفه جامده
زينه:بس انت باين عليك قلبك أبيض..وطيب وحنين..هى بس اللي مكنتش فاهماك
سامي:عرفتي منين؟
زينه:حسيتك كده..سيب أختك تفرح علشان احنا كمان نفرح بيك قريب وانت عريس حلو كده مع اللي تستاهلك بجد
سامي:مش قابل الواد رجب ده.. مش حاسه
زينه:طب هقولك حاجه..اديله فرصه واحده بس وجرب..يمكن هو حاسس بـ غلطه فعلاً وندمان..وبعدين هو اه ميطولش يقعد معاك لانك مقامك عالي..بس لما تقعد معاه وتتنك عليه هيعرف انه جنبك ولا حاجه.. وكمان قوله شروطك امال يفكرها سايبه؟..صفاء يجيلها أحسن وأغلى حاجه.. هى مش أقل من حد..خليه زي الخاتم في صوباعك..على الأقل هيعملك ألف حساب وهيخاف يزعل صفاء ولو بنص كلمه
سامي:مش عارف يازينه..بس انا هعمل بكلامك وهجرب
زينه(بتضحك) :مش قولتلك قلبك أبيض!..ده ياريت كل الناس حلوه زيك كده
سامي(بيضحك) :انتي اللي يتكلم معاكي يعمل مزاج..ده يابخت أهلك بيكي
••وفضلوا يضحكوا هما الاتنين..لحد ما حسناء خبطت••
حسناء: يا سامي... افتح..سااامي
سامي:طب يا زوزا هكلمك بعدين
زينه:ماشي يا سماسيمو.. باي
سامي:سلام
••وقام يشوف أمه عايزه ايه••
سامي:عايزه ايه؟
حسناء:برضه لسه راكب دماغك؟
سامي:انا اعمل الحاجه بمزاجي مش بمزاج حد..وانا لما قعدت مع نفسي قولت أجرب اديله فرصه واحده..واحده بس ها!
حسناء(بتضحك) :يبقى على بركة الله...لولولولولولوي
••وطلعت تجري راحت لـ صفاء••
حسناء:ياصفاء افرحي اخوكي وافق يقعد مع العريس..ياصفاااء
صفاء:بجد والله؟
حسناء:اه والله..خليه يكلم أبوكي ياخد منه ميعاد
صفاء:لولولولولولوووي
<عـنـد ضـيـاء>
••كان كل اللي شغالين معاه، خايفين منه ومن شره..لحد ما شادي قرر يقوي قلبه ويقوله في واحده عايزاه••
شادي(بخوف) :في واحده عايزه حضرتك ياضياء بيه
ضياء:مين؟
شادي:بتقول اسمها جايده
ضياء:ااه..خليها تدخل
شادي:اوامرك
••وراح عند البوابه لـ چايده••
شادي:ادخلي
جايده:شكراً
••وراح وراها لحد مكان ضياء لاشين..ولما وصلت، مشى••
ضياء(ببرود) :انتي خرجتي ازاي؟
جايده:اهو خرجت وخلاص..مروه هى اللي لبست
ضياء(ببرود) :هربتي؟
جايده:لا طبعاً..وانا بتاعت هروب برضه؟..انا جيبت أحسن المحامين اللي عرف يخرجني..انا بقالي ٣ شهور خارجه من السجن..والتلاته التانيين كنت بغير جو في الفيلا الجديده بتاعتي.. مش انا اشتريت فيلا جديده برضه.. مفيش مبروك؟
ضياء(ببرود) :وجايه عايزه ايه؟
جايده:هفضل واقفه كتير..كده رجلي توجعني
ضياء(ببرود) :اقعدي
••قعدت جايده وحطت رجل على رجل••
جايده:انا جايه اتطمن عليك..ولا بلاش اتطمن؟
ضياء:انتي عرفتي مكاني ازاي؟
جايده:اللي يسأل ميتوهش..متخافش محدش من اللي شغالين عندك فتح بؤه بنص كلمه إكمن انا عارفاك مجنون وتعملها بعدين ماامشي..انا عرفت من الديلر بتاعك
ضياء(بصوت حاد) :وانتي عرفتي مكانه ازااي؟؟
جايده:ده صاحبي وبينا عشرة عمر..معقول هيبخل على صاحبته بمعلومه قد كده 👌🏻
ضياء:بتلفي وتدوري كتير على ايه يا جايده؟
جايده:انا عرفت مكان يوسف
••وأول ما ضياء سمع كلامها..عدل نفسه وبرق! ••
ضياء:فين؟؟
جايه:لا المعلومه دي بـ 10 مليون جنيه..هديك معلوماتي ببلاش ولا ايه؟
ضياء(بعصبيه) :انطقي بدل ماأخلص عليكي!
جايده(ببرود) :لو قتلتني مش هتعرف يوسف فين!..وهتفضل تلف وتدور..تلف وتدور كده زي النحله ههههه وبرضه مش هتعرف
ضياء(بزعيق) :انا مستعد اديكي اللي انتي عايزاه بس انطقي!
جايده:آخد الفلوس الأول..وبعدين أقولك
ضياء(بزعيق) :شاااادي....شااااااادي
••يجي شادي جري••
شادي:اوامر حضرتك ياضياء بيه
ضياء:١٠مليون جنيه من الخزنه حالاً
شادي:حاضر اوامرك
••ومشى شادي وجمع الـ١٠ مليون جنيه ورجع بعد نص ساعه••
شادي:اتفضل ياضياء بيه
••راح ضياء واخدهم..ورازعهم على الترابيزه••
ضياء:ها؟
جايده:يوسف معايا انا
ضياء:تجيبيه دلوقتي حالاً..مفهوم!
جايده:حاضر..أعد الفلوس الأول بقى
••وبدأت تعد كل رزمه، وضياء بيبصلها بـ غل••
<عـنـد دالـيـدا>
••رجع رشاد من برا وهو وشه عليه حزن الدنيا كله..وأول ماقعد على المكتب..رمى المفاتيح والموبايل بعدم استعنى..وبعدين حط ايده على راسه••
داليدا:انت كويس؟
••بصلها رشاد بحزن وهز راسه بمعنى لأ••
داليدا:ايه اللي حصل.. ممكن اعرف؟
رشاد(بحزن) :مصطفى عمل عمليه..كل مانخرج من مصيبه ندخل على الأكبر منها
داليدا(بخوف) :عملية ايه دي؟
رشاد:من كتر زعله على نفسه..الزايده انفجرت.. لولا ستر ربنا لحقناه وعمل العمليه ونجحت الحمدلله
داليدا:الحمدلله انه طلع كويس!..كل اللي بيحصل ده اختبار من ربنا ليكم!..وانتوا عديتوا من كل اللي فات وهتعدوا من دي كمان
رشاد:كل حاجه بقيت صعبه اوي يا داليدا..انا مابقتش قادر استحمل..انا هاين عليا اموت نفسي وارتاح
داليدا(بحزن) :تفتكر ده حل؟..أكيد لأ..ربنا بيديكم المشكله وهو عارف انها قد قوة تحملكم!..مستحيل يديك حاجه فوق طاقتك ابداً..زي ما اللي فات عدى ده كمان هيعدي..ارجوك يارشاد بلاش تعمل في نفسك كده!
••وفجأه بدون أي مقدمات..رشاد نزلت دموعه غصب عنه..وكان بيعيط بقهر!..ولما داليدا شافته كده مقدرتش تستحمل..وقربت نفسها ناحية المكتب وطبطبت على كتفه..ومن غير ماتحس..لمست وشه..وجابت مناديل مسحتله دموعه وهى متأثره جداً بيه••
رشاد:انا تعبت اوي ياداليدا..جيبت أخري من كل حاجه
داليدا(بحزن) :صدقني هتعدي!
رشاد:ياريت!..نفسي بجد!..يااارب انت العالم بيا!
••وغصب عن رشاد..لمس ايد داليدا..ولكن داليدا بصيتله بمعنى انها هتعدي!..وبعدين قامت من مكانها وشغلتله أغنيه بيحبها!..لأ وكمان كانت بتغني معاها..فابتسم رشاد وقال••
رشاد(بيضحك) :عرفتي منين ان انا بحبها؟
داليدا(بتضحك) :دي شغلتي..حاجه متخصكش!
••وقربت داليدا وشدته يقوم من على المكتب..وخليته يغني مع الأغنيه..رشاد مكنش سامع ولا كلمه من الأغنيه..كان بيبص لـ داليدا بـ نظرة الحب..والحنيه والراحه اللي عمره ماحس بيهم مع أي واحده غيرها!..هى الوحيده اللي غيرت فيه حاجات كتير وحسسته بمعنى الحب والأمان!..داليدا كانت دايماً له السند اللي بتسمعه وقت مشاكله..وكمان بتقدر تحطله الحلول المناسبه!..رشاد مكنش بيحكي لحد من أهله اللي بيحصله..داليدا الوحيده اللي كان بيرتاح وهو بيكلمها..وفجأه لقيت رشاد بيقولها••
رشاد:انا بحبك يا داليدا
••وفجأه داليدا فصلت من الأغنيه على كلمة انا بحبك يا داليدا..وخدت وضع الصدمه..فا سكتت••
رشاد:ايوه بحبك مستغربه ليه؟..انا بحبك من أول يوم شوفتك فيه..بس مشاكلي كانت منعاني عن حاجات كتير..داليدا انا لما بشوفك بيحصلي حاجات كتير صعب أوصفها..كفايه ان انا بكون فرحان وانا شايفك قصادي..انتي حسستيني احاسيس كتير عمري ماحسيتها مع أي حد..حتى مساعدتي ليكي كانت حب مش علشان انا بساعد أي حد
••اتحرجت داليدا وبصيت في الأرض..فا رفعلها راسها••
رشاد:اوعي توطي راسك طول مانا معاكي..انا عايزك دايماً رافعه راسك ومش خايفه من أي حاجه..عارفه انا كل يوم حبي ليكي بيزيد عن اللي قبله..انا بقيت آجي الشغل علشان بس أشوفك!..وانا عارف ان كل اللي قولته ده مش وقته المناسب..بس انا مش قادر أخبي أكتر من كده!..انا كنت دايماً مستني المشاكل تنتهي علشان آخد الخطوه المناسبه...بس هى مبتنتهيش!..وانا سواء عندي مشاكل او معنديش انا عايزك معايا دايماً..ومتبعديش عني لحظه!
••وبرغم اللي هما عايشينه..بس داليدا قلبها كان طاير من الفرحه..لانها من يوم ماعرفت رشاد وهو واقف جنبها وساندها وبيدافع عنها ضد أي عدو! ••
داليدا(بحب) :طب مانا كمان... انا كمان بحبك..ومعرفتش معنى الأمان والسند غير لما عرفتك..انا من يوم ماعرفتك وانت واقف جنبي وساندني!..بتركن مشاكلك علشان تِحل مشاكلي!..انت نسيت نفسك وفكرت فيا!..من يوم وفاة بابا وانا الدنيا كلها جايه عليا.. إلا انت.. انت الوحيد اللي كنت بتحارب علشاني..مش هنكر ان انا جالي اوقات وقولت يمكن مش بيبادلني نفس الاحساس..بس كان في احساس أقوى انك زي ويمكن أكتر!
رشاد:خليكي معايا دايماً يا داليدا..واوعدك اننا هنكبر في حياتنا ونوصل لفوق اووي..وهرجعلك حقك من أي حد أذاكي او اتسبب في دموعك!..داليدا انا مش عايز حد غيرك!
داليدا(بعياط) :انا معاك دايماً مهما يحصل..انا بحبك اوي!
••قرب رشاد منها ومسحلها دموعها..ورفع ايديها وباسها..ودخلت عليهم فريده فجأه..راح رشاد بعد عن داليدا وَاتحرج••
فريده(بإستغراب) :هو في ايه ياداليدا؟
داليدا(بتردد) :مفيش حاجه ده انا..انا
فريده:انتي ايه؟
••قربت فريده وشدت أختها ناحيتها••
فريده:ايه اللي انا شوفته ده؟
داليدا:وطي صوتك!..هفهمك بعدين
••يدخل واحد من اللي شغالين مع رشاد••
_تعالى يااستاذ رشاد علشان تتابع المبيعات
رشاد:طيب انا جايلك..روح انت دلوقت
_حاضر
فريده(بصوت واطي) :انا عايزه افهم ايه اللي شوفته ده؟؟
داليدا(منفعله) :رشاد عايز يتجوزني فهمتي!
فريده(بتضحك) :هههههه
داليدا:بتضحكي على ايه؟
فريده:هههههه
••وسابتها وخرجت برا..وداليدا مستغربه أختها بتضحك على ايه!••
<عـنـد صـفـاء>
••كانت بتكلم زينه في الموبايل وبتشكرها على اللي عملته••
صفاء:تصدقي بالله انتي طلعتي أجدع من ناس كتير عرفتهم..ده سامي ده دماغهم عامله زي الصخره..مبيسمعش كلام حد فينا مهما يحصل
زينه:قولي الحمدلله انه وافق..لولايا كان زمانك بتتحايلي عليه
صفاء:خلاص ياختي انتي هتذليني ماقولنا شكراً!
زينه:وانا اقدر برضه ده انتي أخت الغالي
صفاء(بخبث) :وهو انتي لحقتي؟
زينه(بتضحك) :لا احنا لسه في مرحلة الاعجاب..المرحله الجايه هتكون حب وجواز ان شاء الله
صفاء(بتضحك) :تستاهليها عشان بت جدعه بس..شكلنا هنحب بعض وهنبقى أول واحده ومرات أخوها يحبوا بعض في الكوكب!
زينه(بتضحك) :ان شاء الله..أما قوليلي اتفقتوا على ايه؟
صفاء:كلمت رجب وقولتله..قالي ماشي هتصل على أبوكي ونتفق نيجي بالليل نقرا الفاتحه..قولتله ماشي على بركة الله
زينه:مبروك يا صفصف ياحبيبتي.. هتعزميني ولا هتندلي؟
صفاء:هعزمك طبعاً..ده انتي أول الحاضرين
زينه(بتضحك) :حبيبتي انا قولت برضه ان انا غاليه عندك
<عـنـد ضـيـاء>
••بعد ما جايده عدت الفلوس••
جايده:كده تمام
••وخد الفلوس وقامت..راح ضياء قايمه وراها••
ضياء:انتي رايحه فين؟؟
جايده:هروح أجيبلك يوسف
ضياء(بسخريه) :هاهاها عايزه تضربي الفلوس في جيبك و َتخلعي يابنت النصابه!
جايده:ولازمته ايه الغلط ده.. مين قالك ان انا هخلع؟
ضياء(بصوت حاد) :ده انتي تبيعي أبوكي عشان الفلوس..مش هتتحركي من هنا إلا وانتي معاكي اتنين من رجالتي
جايده:والله اللي مبيعملش حاجه غلط مبيخافش وانا مش خايفه..هاتهم عادي يعني ايه اللي هيحصل
ضياء(بصوت عالي) :شاااادي...جمااااال
••جم الاتنين بسرعه••
شادي:اوامرك ياضياء بيه
ضياء:رجليكم على رجل جايده...تجيبوا يوسف وترجعوا بيه
شادي:اوامرك ياضياء بيه
••ومشوا مع جايده لحد ماوصلوا بيتها..وأول ماجايده دخلت ملقتش يوسف..راحت ضاربه ايديها على قلبها••
جايده(بصويت) :يانهار اسود يوسف راح فين؟؟؟
الفصل العشرون
شادي(بزعيق) :هو ايه اللي راح فين؟..اطلعي بالواد بدل مانخلص عليكي!!
••وراحوا مطلعين المسدسات وموجهينها في وشها••
جايده(بخوف) :والله مااعرف راح فين!!..انا كنت سايباه مربوط هنا!!...أكيد حد دخل وهو اللي عمل كل ده!
شادي(بزعيق) :الحوارات دي متدخلش علينا..فين يوسف؟؟
جايده(بصويت) :معرفش.. معرفش!!
••وكانت بتلف في البيت كله وهما وراها بالمسدسات••
جايده(بصويت) :يووسف...يووسف..يووسف!!
••ولما ملقيتهوش حسيت بإحباط وبصيت في الأرض..وفجأه لقيت مروه خارجه ويوسف في ايديها••
جايده(بصدمه) :مروه؟؟...انتي خرجتي امتى وازاي؟؟؟
مروه(بـ ثقه) :بعد ماانتي خرجتي عالطول..أصل انا خليت المحامي اللي خرجك..خرجني انا كمان..عارفه مين اللي لبس في الليله دي كلها؟
جايده(بخوف) :مين؟؟
مروه(ببرود) :انتي.. هو انتي ليه مقولتيش لـ ضياء لاشين انك هربتي؟..ضحكتي عليه صح وفهمتيه انك خرجتي عن طريق المحامي!
جايده(بزعيق) :معنى كده انك انتي كمان هربتي!..ماهو بقى تعاليلي ياحلوه مادام هى اتكشفت فا مش فارقه..قوليلي بقى خرجتي عن طريق المحامي اللي خرجني..وهو اساساً مفيش محامي!..يبقى هربتي صح!
مروه(ببرود) :نفس اللي انتي عملتيه انا عملته..الفلوس اللي في ايديكي دي تلزمني
جايده(بتضحك) :ده في خيالك..مش هتطولي منها جنيه
شادي(بزعيق) :بقولكم ايه انتوا تخلصونا من الفيلم الهندي اللي عاملينه ده..اللي معاه يوسف هو اللي هياخد الفلوس.. وسعي كده
••وسحب شنطة الفلوس من ايد جايده••
مروه(ببرود) :انا اللي معايا يوسف وانا اللي هاخد الفلوس.. سلم هتستلم
••بصلها شادي بتردد وبعدين حدفلها الشنطه..راحت سايباله يوسف..وطلعت مسدس من جيبها رفعته في وش جايده••
جايده(بزعيق) :انتي بتعملي ايه؟ انتي عبيطه؟...الفلوس دي هتتقسم مابينا وإلا هروح للشرطه ابلغ عنك
مروه(بتضحك) :هههههه لا ضحكتيني...حبيبتي انتي لو روحتي هتتاخدي.. لانهم قالبين الدنيا عليكي اصلاً فا خليها تعدي بالحب
••وبعد ما شادي خد يوسف ومشوا..فضلت مروه ترجع بضهرها ورافعه بالمسدس في وش جايده لحد ماوصلت للباب••
مروه(بتضحك) :باي باي ياروحي
••بصتلها جايده وهى مصدومه لحد مااختفت من قدامها••
<عـنـد رشـاد>
••كان واقف مع واحد يشوف المبيعات..وبيتابع شغله بمعنى أصح••
_امبارح بيعنا بحوالي 5500 جنيه..والنهارده دخل 500 ولسه في الطالع
رشاد:طيب تمام..وبالنسبه لاستهلاك المنتجات
_حاضر ثواني
••وشاف على الموبايل••
_استهلكنا منتجات بـ حوالي 7ألاف جنيه
رشاد:وبالنسبه للباقي؟
_يعني في حدود 1000 جنيه
رشاد: في خلال شهر مش كده
_بالظبط
رشاد:طيب في عربيه جايبه منتجات عايزك تستلمها وتسجل كل حاجه وتجيبلي الورقه على المكتب
_حاضر يااستاذ رشاد
••ضرب رشاد على ضهره وابتسمله ودخل المكتب..وكانت داليدا قاعده..ولكن كانت محرجه بعد اعتراف رشاد بحبه ليها..لحد ماجه ناحيتها وهو مبتسملها وقعد قصادها••
رشاد:القمر مشغول في ايه؟
داليدا(بتضحك) :ولا اي حاجه..قولي يا رشاد..مادام انت بتتعامل في الشغل مع ناس تانيه..انا كده ايه لازمتي..وباخد فلوس على ايه؟
رشاد:مين قال ان ملكيش لازمه هنا؟...امال مين اللي بيعملcheck up على المنتجات؟..ومين اللي بيتابع شغل الشيفات في المطبخ؟..ومين اللي بيقول لـ عمال النضافه انهم يهتموا بنضافة المكان أكتر من كده؟..ومين اللي بيرتب الفلوس وبينظمها؟
داليدا:انا شايفه ان كل الحاجات دي سهله وأي حد يقدر يعملها!..انا مبعملش حاجه صعبها تخليني آخد كل المبالغ دي كل شهر
رشاد:ياستي لو عايزه تاخدي المحل ذات نفسه خديه انا معنديش اي مشكله!..انتي مفيش حاجه تغلى عليكي!
داليدا:وانت بتعمل كل ده ليه؟
رشاد:علشان بحبك..ونفسي أجيبلك الدنيا كلها تحت رجلك...داليدا انتي كبيره اوي عندي!...وغاليه مش أي حد يقدر يوصلك!..انا مقدر قيمتك كويس وعارف مين هى داليدا!.. وعارف انك تستحقي أحسن من كده بكتير!
داليدا(بحب) :انا اللي بحبك اوي يا رشاد..انا عايزه أعيش طول حياتي معاك..ونفضل مع بعض للأبد!
رشاد:اوعدك افوق من المشاكل..ونتجوز ونسافر بعيد!..قوليلي عايزه تسافري فين؟
داليدا(بتفكر) :مش عارفه..بس أي مكان هروحه معاك بالنسبالي جنه
••راح رشاد رافع ايديها وباسها••
رشاد:ربنا يخليكي ليا ياداليدا وميحرمنيش منك ابداً
••جات فريده لتاني مره..وهو بيبوس ايديها! ••
فريده(بتضحك) :هو انا كل ماادخل الاقيك بتبوس ايدها؟...هو في ايه بجد؟
داليدا(بتضحك) :خلاص بقى يا فريده مانا فهمتك!
••قربت فريده منهم وهى بتضحك••
فريده:لا بقى ياحبيبي..لما تبقى مراتك وتيجي تتجوزها ابقى بوس ايديها براحتك..لكن دلوقتي مش هينفع!
رشاد(بيضحك) :صح انتي عندك حق يا فريده..انا غلطان حقك عليا
فريده:سماح المره دي بس
رشاد(بيضحك) :ماشي يافريده...مقولتوش هتاكلوا ايه؟
<عـنـد صـفـاء>
••كانت واقفه قدامي المرايا بتحط الميك اب..جه سامي ووقفلها على الباب وابتدى يتريق عليها••
سامي:ايه القرف اللي بتحطيه على وشك ده؟؟
صفاء:قرف؟..المكياج بقى قرف؟
سامي:شايفك ياختي عماله تتعايقي وتحطي الاحمر والاخضر ولا كأني خلاص وافقت...مكنتش فرصه اديتهاله والله اعلم الجوازه دي هتكمل ولالا
صفاء(بغيظ) :هتكمل..اطلع انت بس منها
سامي:مش حاسسها..انا شايف قدامي مشهد خناقه في قلب الشارع بيني وبينه هينتهي بدم مغرق الشارع ولا كأنها دبيحة عجل في العيد
صفاء:ياسلام...وليه كل ده؟ علشان ايه؟؟
سامي:علشان...
••ولسه بيكمل كلامه لقى الجرس بيرن..راح ماهر يفتح لقاه العريس وأهله••
ماهر:يااهلاً وسهلاً... اتفضلوا
رجب:الله يخليك
••ودخلوا يقعدوا على الكنبه..وسامي قعد عالطول من غير مايسلم عليهم••
متولي:احنا هنتكلم عالطول
ماهر:اتفضل ياحاج
متولي:قبل اي حاجه انا الحاج متولي..وده هاشم أخو رجب..لسه في الإعداديه..ودي الحاجه أم العريس
ماهر:يااهلاً وسهلاً بيكم.. وانا الحاج ماهر وده سامي ابني
متولي:ربنا يخليهملك وتفرح بيهم
ماهر:الله يخليك
متولي:احنا جايين نخطب الابله صفاء لابننا زينة الشباب رجب
سامي(بضحكة سخريه) :هاهاهااااي...لا حلوه زينة الشباب دي.. ههههه حلوه
رجب:في حاجه ولا ايه يااستاذ سامي؟
سامي:اه في كل خير ان شاء الله..بصوا بقى انا اختي صفاء دي ست البنات..تتشال على الراس وجوا العين..اه ماهي دي أختي الوحيده..يعني اللي عايزها يشيلها جوا حباب عيونه
رجب:واحنا قولنا غير كده؟..مااحنا عارفين الكلام ده مش محتاج تقوله
ماهر:قبل اي حاجه عرفونا عليكم..ابنك شغال ايه ياحاج..وعنده شقه ولالا؟
متولي:ابني فاتح ورشة ميكانيكا...عربيات يعني...بس ماشاء الله بتكسب دهب..وعنده شقه في بيتنا..الشقه على المحاره انتوا بس توافقوا وهنعملكم أغلى وأحسن حاجه
ماهر:ربنا يسهل الحال
سامي:لا العشم واخدك اوي.. وانت ايه ضمنك ان انا هوافق؟ مش يمكن موافقش والجوازه تبوظ؟
ماهر(بـ غل) :اسكت ياسامي متتكلمش انت..مادام ابوك قاعد يبقى تسكت والكلام كله معايا انا
سامي(بعصبيه) :يعني ايه ياحاج انت بتصغرني؟ هو ابنك لمؤاخذه عيل؟.. ده انا راجل ملو هدومي!
صفاء(جوا) :يالهوي ربنا يسترها..والله كنت مقلقه منك ياسامي
ماهر:اسكت خلينا نتكلم
متولي:وانت حد يقدر يصغرك يااستاذ سامي..انت كبير مقاماً وليك احترامك برضه
سامي:خلاص كلامكم مع ابويا..انا مش متكلم
ماهر:وابنك اتجوز قبل كده ولا أول مره؟
متولي:لا أول مره...بداية الخير ان شاء الله
ماهر:انا عن نفسي حاسسكم ناس محترمه وشبهنا كده وقلبي ارتاحلكم
سماح:ربنا يخليك ياحاج ده من زوقك.. امال أم العروسه فين؟
ماهر(بصوت عالي) :جايه اهو...ياام سااامي... ام ساااامي
••جات حسناء وفي ايديها صينية العصير••
حسناء:ياالف اهلا وسهلا منورين الدنيا كلها..ياالف مرحب
سماح:الله يخليكي ماشاءالله ام العروسه زي القمر
••قربت حسناء منها تبوسها وسلمت على اهل العريس••
حسناء:انتي اللي زي القمر..انا قولت دي أخت العريس مش أمه
سماح(بتضحك) :ههههه الله يخليكي ياحبيبتي
••وقعدت معاهم••
سماح:امال العروسه فين؟
حسناء:حاضر من عينيا اندهالك
••وندهت على صفاء••
حسناء:ياصفاااااء...تعالي سلمي على عريسك وأهله
••فتحت صفاء الباب وخرجت وهى محرجه لحد ماقربت تسلم عليهم••
صفاء:ازيك ياطنط؟
سماح:يااهلاً وسهلاً بعروستنا الحلوه..ماشاء الله عليها..طالع زي القمر لامها
حسناء:كلك زوق ياحاجه
••وبعد ما سلمت عليهم قعدت معاهم••
رجب:اوعى تكون لسه زعلان مني يااستاذ سامي!
سامي:لا ازعل ايه بقى ده احنا هنبقى نسايب حتى
رجب:وهو ده المطلوب
متولي:قولك ايه ياابو العروسه؟
ماهر:انتوا مستعجلين على ايه احنا لسه بنتعرف!
متولي:والله احنا بصراحه كلنا عشم انك توافق وتفرحنا
ماهر:خلاص على بركة الله نقرا الفاتحه
••راحوا رافعين ايديهم ••
متولي:بسم الله الرحمن الرحيم
••وبعد ماخلصوا قراءة القرآن••
حسناء:لولولولولوي مبرووك ياعروسه
صفاء:الله يبارك فيكي ياماما
<عـنـد مـصـطـفـى>
••بعد ما عمل العمليه..كان نايم تعبان واهله قاعدين حواليه••
عائشه:مبنلحقش نرتاح من المستشفيات يا ساهر..ده احنا قعدنا في المستشفى اكتر ما قعدنا في بيتنا
والد رشاد:معلش اختبار من ربنا وهنعدي منه..قولي الحمدلله
عائشه:مبقولش غيرها والله...الحمدلله
سلمى:عامل ايه يامصطفى؟
مصطفى(بتعب) :زي مانتي شايفه..تعبان
سلمى:ان شاء الله هتخف..اصل انت مسمعتش الكلام اللي الدكتور قاله
مصطفى(بتعب) :كلام ايه؟
سلمى:قال ان العمليه نجحت وعدت على خير..ولما اتصلنا بالدكتور اللي متابعين معاه حالتك قال ان حالتك فيها أمل كبير تخف وترجع تقف على رجلك من تاني
عائشه:ايوه الحمدلله..انا عايزاكي يا سلمى ترجعي البيت وتهتمي بمذاكرتك انتي ياحبيبتي في ثانويه عامه ومش عايزينك تتعطلي
سلمى:معلش ياماما مجاتش على يوم..المهم نتطمن على مصطفى
والد رشاد:مصطفى هيبقى 10/10 كمان يومين تلاته...والدكتور انا سألته ينفع مصطفى يخرج النهارده قالي اه عادي ويكمل علاجه من البيت لان بصراحه انا شايف ان جو المستشفيات يتعب الأعصاب اكتر ماهي تعبانه
عائشه:وهو هيقدر يتحرك يا ساهر.. انت مش شايف حالته عامله ازاي؟
مصطفى(بتعب) :بابا عنده حق..جو المستشفيات بيتعبني اكتر مانا تعبان
عائشه:خلاص اللي تشوفوه المهم عندنا راحتكم
••لقوا رشاد داخل ووراه داليدا وفريده أختها••
والد رشاد:يااهلاً وانا اقول المستشفى نورت ليه؟
رشاد:عامل ايه يابابا؟
••وقرب يحضنه..وداليدا حضنت عائشه وسلمى••
داليدا:ازيك ياطنط؟
عائشه:الحمدلله يا داليدا ياحبيبتي انتي عامله ايه؟
داليدا:الحمدلله..ازيك ياسلمى؟
سلمى:بخير..وحشاني يا فريده!
فريده:وانتي اكتر ياسلمى
رشاد:احنا كنا المفروض نروح..بس داليدا قالتلي لازم نعدي على مصطفى نتطمن عليه الأول
عائشه:فيكي الخير ياحبيبتي.. مبتسأليش يعني؟
داليدا:غصب عني كنت مشغوله الفتره اللي فاتت بس تتعوض ياحبيبتي
عائشه:ماشي يا داليدا..عامله ايه في الاجازه يا فريده؟
فريده:الحمدلله كله تمام
داليدا:فريده متبهدله معايا بجد..بتفضل معايا في الشغل طول اليوم لحد ما بروح.. بصراحه بخاف اسيبها لواحدها في البيت
عائشه:عديها عليا ياحبيبتي تقعد معايا تونسني...وآخر اليوم عدي خديها
داليدا:لا مش عايزين نتقل على حضرتك
عائشه:لا متقوليش كده هزعل منك.. ده انتي وفريده غاليين عليا اوي ربنا العالم
داليدا:وحضرتك غاليه علينا والله..ازي حضرتك يااستاذ مصطفى؟
مصطفى:الحمدلله
داليدا:الحمدلله..ربنا يتمم شفاه على خير
عائشه:يارب
رشاد:انا بفكر أجهز شقتي اللي فوقيكم
والد رشاد(بإستغراب) :ليه؟
رشاد:علشان انا قررت اتجوز
كلهم:تتجوز؟
••تنحت داليدا وبصيت لـ رشاد بإحراج انه اتكلم قصادهم••
رشاد:ايوه اتجوز..وعارفين مين العروسه؟
عائشه:والله يابني انا شاكه بس بكدب نفسي
رشاد:مين طيب؟
عائشه:هى بنوته زي القمر قاعده وسطنا دلوقتي
••بصيت داليدا لـ رشاد وضحكت وهما كمان ضحكوا••
والد رشاد:ماهو مفيش حد غير داليدا وفريده..ان كان على وفريده فا لسه صغيره شويه...انما داليدا على وش جواز..يبقى الاجابه داليدا هههههه
رشاد(بيضحك) :ايوه..انا قررت اتجوز داليدا..علشان انا بحبها وهى كمان بتحبني وعايزين نكمل حياتنا مع بعض!
داليدا(بإحراج) :يابني خلاص مش وقته!
سلمى:هو الصراحه مش وقته بس انا من زمان وانا شايفه انك انت وداليدا أكتر اتنين لايقين على بعض
والد رشاد:طب يابني اخوك يقوم بالسلامه وبعدين نشوف الموضوع ده
داليدا:انا قولتله كده والله يااونكل..إن ده مش الوقت المناسب
رشاد:بس انا شايف ان ده أكتر وقت مناسب!..احنا أكيد يعني مش صابحين نتجوز..بس انا مش عايز غير داليدا!..وشايف اننا لما نكون مع بعض حاجات كتير هتتحل!
عائشه:انا عن نفسي بحب داليدا ومن أول يوم شوفتها ارتاحتلها من كل قلبي..ونفسي أفرح بيكم يارشاد..وأجوزكم وأشيل عيالكم
••وفجأه بقيت عائشه بتعيط••
عائشه(بعياط) :انا اتحرمت من احساس الفرحه..كان نفسي أشوف ولادي متجوزين جوازات تفرح وأفرح بعيالهم حواليا
••قربت داليدا منها وخدتها في حضنها••
داليدا:متعيطيش ياطنط..ان شاء الله كل حاجه اتحرمتي منها..ربنا هيعوضك بالأحسن منها قريب
سلمى:خلاص ياماما..يعني رشاد جاي يقولك خبر حلو زي ده وأنتي هنا زعلانه وبتعيطي؟..ده بدل ماتفرحي
والد رشاد:وانت يااستاذ رشاد..ناوي الخطوبه تكون قد ايه؟
رشاد:انا لازم أقعد مع حد من قرايب داليدا يكون غير عمها وولاده طبعاً...لازم أهلها يعرفوا ونتفق مع بعض
داليدا:انا هكلم خالتو صابرين وجوزها..هما كويسين وهتعرفوا تتفقوا معاهم على راحتكم
والد رشاد:خلاص يابنتي شوفي هما فاضيين امتى ونقابلهم
داليدا:حاضر يااونكل
مصطفى(بتعب) : مبروك يارشاد
رشاد:الله يبارك فيك وعقبالك مع اللي تستاهلك
<عـنـد ضـيـاء>
••كان رابط يوسف..وابتدا يعيط لان عمره سنتين بس!••
ضياء(بعصبيه) :انت ياحيواااان يالي اسمك شادي
••يجي شادي بسرعه••
شادي:اوامرك ياضياء بيه
ضياء(بعصبيه) :خد المزعج ده من هنا...اربطه في أي داهيه تانيه
شادي:حاضر بس معلش ممكن أقول لحضرتك حاجه..الواد شكله جعان..خصوصاً يعني انه لسه صغير مطلعش من البيضه
ضياء(بسخريه) :هاهاها...ياكش يموت..اربطه بعيد عني..خلص بدل الصداع ده
شادي:حاضر
••وفك يوسف..وخده بعيد عن ضياء..وأول ما شاله مشاعره اتحركت ناحيته..وصعب عليه••
شادي:انا اسف والله..بس انت عارف ان ضياء ده اكتر انسان شر على وجه الأرض ولو عملت اي حاجه ضد رغبته هيخلص عليا..ده مش متزن لا نفسياً ولا عقلياً...يخربيت الحوجه اللي تخلي الواحد مذلول لـ تِعبان زي ده..حقك عليا
••وباس راس الطفل..وطبطب عليه..وربطه وهو قلبه بيتقطع..وبعدين خرج من الفيلا لقى مايا بتتصل••
شادي:الو يا مايا
مايا:ازيك ياشادي؟
شادي:الحمدلله وانتي عامله ايه؟
مايا:تمام...من ساعة مااخدنا اجازه ومابقتش أشوفك..عارفه ان انا مش هشوفك في الجامعه تاني لانك خلاص اتخرجت..بس على الأقل نشوف بعض برا!
شادي:حتى دي مش عارف...انا اه خلصت من حوار الكليه بس لسه هلبس في الجيش كمان سنه..ياعالم هشوفك تاني و َلالا
مايا:لا ياشادي متخوفنيش بجد...يعني انا مش هعرف أشوفك تاني؟
شادي:لا هتشوفيني بس مش دلوقتي انا مسحول في الشغل وحالتي حاله
مايا:طيب انت هتكون فاضي امتى؟
شادي:ممكن على بكرا ابقى اكلمك ونتفق
مايا:خلاص اوكي على اتصال
شادي:ماشي عايزه حاجه؟
مايا:لا ميرسي
شادي:سلام
••وقفل معاها وراح يجيب سيريلاك لـ يوسف من ورا ضياء••
<عـنـد صـفـاء>
••كانوا مشغلين أغاني..وبيشربوا الشربات••
ماهر:احنا بإذن الله عايزين شبكه بـ 90 ألف جنيه
متولي:بس كتير اوي
سامي(بزعيق) :مش كتير علي أختي ياعم..انا اختي مفيش حاجه تغلى عليها..دي لو طلبت نجمه من السما المفروض تجيبهالها وانت سكتم بكتم
رجب:مابراحه على أبويا ياعم سامي..ابويا مقالش حاجه غلط..ولا انتوا عايزين تعجزونا؟
حسناء:استهدوا بالله احنا مش هنختلف
سماح:براحه علينا ياابله حسناء..متدبحوناش في الشبكه
حسناء:والله دي أقل حاجه عندنا..ده انا بنتي معاها معهد لاسلكي
سماح:هى يعني كانت داكتوره
سامي:وهى لو داكتوره كانت بصيت لـ سي رجب ابنكم؟
صفاء:يا وكستي السوده
ماهر(بزعيق) :محدش يفتح بؤه..انا وأبو العريس هنتفق..محدش يتدخل
متولي:عين العقل
ماهر:احنا عايزين شبكه بـ 70 ألف جنيه...نص في الخطوبه ونص في الفرح... قولك ايه؟
متولي:متفقين ان شاء الله
ماهر:تمام..الخطوبه معروف على أهل العروسه
متولى:معلوم
ماهر:وعايزين مهر 200 ألف جنيه
سماح:كتير اوي
متولي:اصبري بس ياسماح..ربنا المعين!
ماهر:ونعم بالله..ايه رأيكم؟
متولي:خلاص موافقين.. هو احنا هنلاقي حد أحسن من صفاء بنتكم؟
سامي:شقتك فين ياسي رجب؟
رجب:شقتي في بيت أبويا وعلى المحاره..وهنعملهالكم على أعلى مستوي
سامي:حلو الكلام..بكرا هنكون عندكم بنشوف الشقه
متولي:تنورونا
حسناء وسماح:لولولولولولوي
<عـنـد مـروه>
••كانت لابسه نقاب وراحت تخبط على هدى في شقتها••
هدى:مين؟...ايوه مين!!
••وراحت تفتح لقيتها واحده منقبه..وأول مافتحت راحت داخله••
هدى:استني هنا..انتي داخله فين؟؟
••راحت مروه رافعه النقاب..وهدى ما شافتها صوتت••
هدى(بصويت) :مروه... لاالاااا
••قربت مروه بسرعه منها وحطيت ايديها على بؤها••
مروه(بخوف) :وطي صوتك...وحشتيني اوي ياماما!!
هدى(بصويت) :انتي خرجتي ازاااي!!!!...انطقي خرجتي ازاي!!!
مروه(بحزن) :مش مهم خرجت ازاي..المهم ان انا خرجت...انا موحشتكيش ياماما؟
هدى(بصدمه) :انتي هربتي يامروه؟؟..هربتي!
مروه(بحزن) :اه هربت...مقدرتش استحمل كل ده وانا لواحدي..انا كنت بموت مليون مره في الثانيه..كلكم وحشتوني اوي ومش عارفه اعيش من غيركم!
••طلعت تجري هدى ترفع سماعة التليفون وتتصل بالشرطه••
هدى(بصويت) :انتي زبااااله...حقيره..انا قلبي غضبان عليكي ومش عارفه اسامحك بعد كل اللي عملتيه!..انا بقيت بشمئز منك!...انتي بنتي انتي؟؟
مروه(بعياط) :هما اللي اضطروني لكل ده..انتي مشوفتيش دينا كانت بتتعامل معايا ازاي!.. وطول الوقت بتحسسني انها أعلى وأحسن من...
هدى(بزعيق) :انتي بتبرري خيانتك ووساختك؟؟..انتي بعد كل اللي عملتيه ده ولسه شايفه نفسك مظلومه؟..انا بنتي شيطانه!!!
مروه(بعياط) :اوعي تتصلي بيهم..انا عارفه كويس انتي عايزه تعملي ايه!..ده انا بنتك الوحيده ههون عليكي تعملي فيا كل ده؟
هدى(بصويت) :انتي خسيسه وغدااره..ايه اللي رجعك بعد ماكنت ارتاحت منك!..انتي بقيتي الفضيحه اللي بتدارى منها من كل الناس!
مروه(بعياط) :انا فضيحه ياماما؟.. انا؟
هدى(بزعيق) :اه انتي..وانا هتصل بالشرطه دلوقتي حالاً يجوا يرموكي في البوكس..ويرجعوكي مكان ما جيتي!!
••ولما مروه لقيت هدى بتتصل بالشرطه..اتجننت وفقدت أعصابها، وقربت من هدى وهى بتصرخ على آخرها••
مروه(بعياط) :لا ياماماااا لاااا... لاااا ابوس ايديكي... ياماماااا انا بنتك.. بلاااااش ابوس ايديكي...لالالااااا
هدى(بزعيق) :اخرسي لازم يعرفوا مكانك وياخدوكي..ارجعي وسط قتالين القتله والمجرمين...ده مكانك المناسب
مروه(بصويت) :لا ياماماااااا لاااااا.... لااااا
••ومسكت في هدى وخنقتها بـ ايديها بكل غل ...لحد ما هدى وقعت على الأرض وماتت!!..واول ماوقعت..بعدت مروه عنها وهى مصدومه ومش مستوعبه اللي عملته! ••
مروه(بصريخ) :اااااااه