رواية كاظيمة
الفصل الاخير
بقلم وسام الفرجاني
ضحكت وما ردت انوب برودها يزيد النار بية
كتلها لتعبين جهالي ديبجون احجي انتِ منو وشجابج هنا ومية الف سؤال بعد براسي تحجين لو الم المنطقة هسة كلها عليج
كالت اني روكة !
صدمتني ما اعرف شنو ارد عليها كتلها روكة !
–تعرفيني !
– شلون ما اعرفج و اسمج اول جرح نغز كلبي
– اسمي !
– اي اسمج بأول ليلة عرسنا اني والمرحوم رسول ومع العلم اخذته اجباري وماحبيته
كاطعتني من كلت اجباري
– ادري اجباري
– شمدريج
– ادري لان بالاصل هو هم خضع للأمر الواقع واستسلم لرأي امه وقرر ياخذ وحدة غيري
– شنو شنو عيدي بالله
– اهدي اهدي تريدين نتصايح هنا لو نحجي ونفتهم كلشي ؟
...عصبت اني كلشي ضجت وكلت الها
– شتحجين شنو تتفاهمين شتريدين انتِ
– زين اكعدي هسة دكعدي اربزي بالكاع خل اجطلج كل السالفة والله ما جاية هنا حتى اعاركك جيت حتى اخليك فاهمة الوضع ولو متأخرة بس انجبرت ع هالشي
– احجي شكو ليش هالمقدمات هاي
– راح احجي بس اصبري شبيج بصلتج محروكة
– هسة غير تسولف وتعوف المقدمات
– يبوية شلون لعد المرحوم يكول عنج مسكينة شو نار انتِ
– ليش شكايلج والله خبلتيني انت شجاب رسول عليج غير تفهميني ترا صار عندي خربطة وكوة لازمة لساني
– اني زوجة رسول بالسر ! 💔
ماوعيت ع نفسي الا اني فوكاها ولازمتها من زند ايدها اعضها بقوة نبتت سنوني بيدها وهي تصيح واني فوكاها شعرها ذاك السرح شلعته تشلع هلستها هلس والمشكلة هي اجهم مني واسمن ومبين اكبر مني يعني واضحة اقل شي 7 الى 10 سنين
تصيح اوكفي ماريد امد ايدي عليج والله اني احبج واعرف بحركة كلبج وعاذرتج
واني اصيح واكفش براسها وضرب وهي بالاخير شافتني ما وكفت واني صرت الهث لهث
لزمتني ودفعتني و رجدتني ع كاع ومدت ايدها ع كتوفي ودفعتهن ع كاع وكالت
– انتِ معصعصة مابيج حتى لحم وتكاونين كتلج اهدأي خليني افهمج
– وخري عني خنكتيني
– والله بيج سطرة هسة احول عيونج ماريد اضربج تكفي عليج حياتج السابقة جاية اتفاهم وياج ماعندي شي وياج
– دوخري جعصتيني لا اسحلج
– شبر ونص وتتعوص
– تحششين يعني كومي (ضربتها ع كتفها)
– اكعدي هنا بس تسوين حركات اكعدج عليج افعصج ترا ثكيلة اني اطلع مصارينج
وخرت عني يبو هسة تنفست شثكلها هاي ..
كتلها. خاص بوسام الفراجي
– والله هذا السمن مال تاكلين حتى بالريوك تمن وروبة
– ماكو احد هنا يضحكلج فزعة ترا اكعدي وخلي اتفاهم وياج
كعدت ..
واني تكول صارلي اركض ساعة كوة اسولف وهي كعدت ربعت تربيع كتلها تفضلي ..
شنو مرته شلون ايمت ..
هسة المشكلة رسول ماكو اريد اطلعه من كبره واعاتبه معيشني كل هالايام بكذبة
ردت روكة ..
– لا مو كذبة
– اكثر من انه يتزوج عليه بالسر مو كذبة
– اني ورسول نحب بعض من جنة نروح ب بلم واحد(زورق) اني وامي وامه نحش حشيش ومردي ونترس البلم الي بالشط ونرجع ..
جان يريدني واريده وامي وامه تعرف وعشت وياه احلى ايام لهسة ما انسى نظراته اليه وهو بالبلم بالروحة والردة
ولهسة ما انسى من يشوفني اتعب يجي يكلي اتركي واكعدي اني اكمل حش عنج
وشلون يدافع عني بس بأدب ويستحي مني
حبيبتي كاظمية كبل ما جيتي جنة نموت ع بعض
مرة امي تمرضت ومارحت احش لان وحدي وهو حش الهم والنا وابوي شاف الحشيش وسأل منين وامي كالتله من رسول ابن الحجي
و كلي هذا الولد مو راحة مو لله جاب هالشي ولان ابوية ماعنده ولد بس اني روكة بنته
بلغ واحد من ولد عمي يتبعني من اروح ويشوف رسول شيريد ..
اني رحت بغفلة ثاني يوم وكتله رسول ديربالك اهلي شكوا بأمرك لتبين شي ولتجي هنا الا بوجود امي ورجعت
كم يوم صار وقت الحش ورحت بدون امي طبعا لان مرضانة وطلع ابن عمي يلحكني وطلع رسول كدامي الله يسامحه مو ماخذ بسالفتي ..
الزمه ابن عمي و فجه فج براسه ورجعه لأهله مفجوج .. ومن هالنهار ابوي قفل ع رسول ..
وكذلك ابوي دائما يكول وجه وجه الشيطان يا مرة تتحمله
بعد فترة دز مشية عليه وماقبل برسول ..
كررها مرتين وثلاثة وابوي كال لو ياكلها الدود ماتصير لرسول ..
هنا رسول ما بيده بعد شي واني مابيدي شي وامي وامه يصبرون بينه ويرتبون بالوضع بالاخير ام رسول كالت هذا الطريق مقفول ولازم ندورله ع بنت اني اريد ازوجه وجانوا كبل زواج والزلم بعدها بمراهقتها
وهنا شفته اخر مرة قبل ماتزوج وكلي مجبور كلمن يشوف طريقه.. ابوج مايحبني الله لا يسامحه اذاني واذى كلبي.
خاص بوسام الفراجي
هنا بجيت بجيت حدما خلصت دموعي وغسلت وفريت اروح لاهلي
جان يكلي .. امي شافتلي بنية او جاي تشوفلي .. سامحيني من كل كلبج و ابريني الذمة حبيتج من كل كلبي لكن ابوج
كتله ادري الله يسعدكم اني مالي حظ روح شوف حياتك
(روكة تحجي واني تأثرت حيل بحيث دموعي تسيل لا ارادي وحسيت مرات تكون نصيبك ويا شخص متعلقة بي بنت قبل ما يكون نصيبج وتبجي عليه ورادته يكون نصيبها بس الظروف ما ساعدتها ولحد يكول شلون صدكتيها كبل يا بناتي وولدي مرات الانسان يسولف من عيونه ومن ملامحه)
كملت روكة كلامها وماقاطعتها حرف ..
تزوج رسول بنت يسموها كاظمية بس اني ما اعرف كاظمية ولا شايفتها صار عندي فضول منو هاي الي حظها بالسما وحصلت ع حبيب روحي وسرقت كل احلامي
منو هاي كاظمية الي هسة يكلها حبيبتي ومرتي منو هاي الي علن كدام كل اهل منطقته انها مرته
تصدكين مو حسد ابد ولا حقد جنت اعرف انتِ مالج ذنب بهالشي انتِ هم ماتدرين واصلا ماجنت اعرف انت مجبورة
ماريد اطول عليج يمكن ضجتي من سوالفي
- كتلها لا والله كملي واني بداخلي غيرة مشتعلة و انكسار انو سرقت حلم بنت ثانية وخربت قصة حب مدري مدري حسيت بشعور مخربط مدري شنو هو
– جان يمج جسد بس اما كلبه جان وياي
- كاطعتها ع كيفج لتزوديها جان يحبني
– بالبداية لا .. وانطيك معلومة خاف ناسية ورا كم يوم من عرسج صارت قصتج ويا رواء حبستج بالحمام .. من جان يدور عليج بالبداية وميعرفج وين اجه من عدنا يسأل عليج وشفته
كلت اله جملة ما اخذها مني بس بالاخير تبينت صحيح .. كتله رسول شلون ضاعت وكال طلعت ويا بنات عمي و الخ ... كتله
( رواء والله ماتعدتها هاي حية من جنت اريدك اعرفها )
بس ما اخذ بكلمتي وصار الي صار ومن رحتي لبيت اهلج ..
اجه ضايج للحشيش وكالي الي ما يحصل الي يريده مفروض ما يتزوج ويظلم بنات الناس
تكلي روكة اكلج شي وقيسي حظي شلون
ابوية مات ورى 23 يوم بالضبط من عرسكم هه
هسة راح تظنين اني مكيفة ع موته لا والله متت وراه بس علمود اوصلج الفكرة
واجه رسول للفاتحة واني ماشفته بس كالوا اجه ..
و راد يتزوج ورا ما رحتي لأهلج ومحد ينطي وجنت اتمنى ابوي مو ميت هسة والله اخذه لو بخرابة لو متزوج الف بس شيكولون عني الناس
بالتالي وكعت ايده ع حديدة واخذج وهسة يجوز مستغربة شلون عرفت كل هالتفاصيل عرفتها حجالي اياها كلها بالتفصيل !
– قاطعتها رسول يحجي بالتفصيل شعجب يمي ساكت !
– الشخص اذا ويا انسان يحبه يكون ثرثار زايد عن اللزوم خليني اكمل الج بعد كم شهر تقدم اليه واني وافقت حب حياتي هذا الي اتمناه
وامي جانت تكلي الچنة مُرة ترا كتلها اتحملها لو رابعة بس ويا رسول بس شرطت عليه تكون سرية وبدون كلشي لان ابوي ما صارله سنة مو راهمة
ووافقت اعيش وياه حتلو يوم بالاسبوع يمرلي راضية بيه اني اعشقه حيل هالانسان شسوي بعد مصيري بكلبي متعلق
اخذته وبأول ليلة انجمعت ويا بغرفة وحدة كتله توعدني تعتني بمرتك الاولى
تفاجئ شلون اوصي هيج بيها كال هاي اول مرة تصير بالتاريخ
كتله لان هي مظلومة بحبنا وبالظروف وكذلك بكرابتك الحياية
ووعدني يحبني ويحبك واذا لاحظتي بالاخير تغير جثير وصار يشمر سوالف وزين ورومنسي
هاي ورا ما اخذ حب حياته الي هو اني بس بنفس الوقت جنت اوصي بيج وجان يحجيلي كلشي
وساكنة ببيتنا يم امي بنفس البيت ومن يجي نبات بغرفتنا ..
اجه يوم من ايام كلي اشتريتلك بيت الدنيا ما اعرف شيصير بيها وامج كبيرة باجر يصير عليها شي لا سامح الله
والبيت يطير من ايدج لان وحدج وعمامج يلغفوها
سألته كتله شنو جاب هالشي ببالك كال كاظمية وكلت اضرب عصفورين بحجر اشتريلكم بنفس المكان اذا صارلي شي ملتمين سوة واوصيكم ببعض
كتله الله يبعدك عن الشرور ان شاء الله يومي قبل يومك ..
ها نسيت اكلك سفرات مالته يجيني بيها ويبات يمي هو يروح وياهم بس بالبداية ويسبح ويتونس ويجيني يبات يمي ويرجع ويا جماعته الصبح
اخر مرة اجه ما مرني لان طاب يسبح بالشط ومو طالع 💔
صارت تبجي روكة كلش بحركة واني بجيت ع بجيها ع رسول
كلت الها روكة كافي لتكملي ..
حضنتها وكلت الها اعتذر ع كلشي والله بس ماتحملت واحد يكون مرته بالسر لذلك سويت الي سويته
ابتسمت ورفعت راسها باوعتلي .. بهاللحظة صوت امجد صار عالي كلتلي هذولي التوم مو
كتلها اي
روكة : شكد تمنيت اجيب طفل يحمل اسم رسول بس ربي ما قدر
كاظمية : عندي توم هذولي ولدج نتعاون عليهن
بهاللحظة سمعت دك باب قوي لبست ع راسي حت اطلع كالتلي روكة ظلي اني اطلع
طلعت روكة واسمع صوت ركزت بي زين طلع صوت ابوية 💔
طلع عرف بمكاني واسمعه يكول لروكة وينها كاظمية والله لأسلخ جلدها
كالتله والله تمد ايدك عليها اكسرها هاي مو بنتك وانت ماتصلح تصير اب اصلا
واذا مديت ايدك عليها والله اطلع ع مركز هنا اخليهم يخيسوك بالسجن
اني من شفت الحجي صار ثخين طلعت اله
كتله شتريد يابه ؟ زواج ما اتزوج وللبيت ما ارجع ليش تركض وراي خليني اعيش انت ما تطيقني اصلا اني وجهالي شكو تريدني
ركض عليه اني مكدر اسوي شي ب اعتبار ابوية ولطخني راشدي وجم ضربة حامتني روكة وكالت الم عليك الجيران اكلهم يعتدون علينا
روكة : انسى شي اسمه بنت عندك
ابوية: بالناقص من هيج شكولات اذا تقربين لبيتي العن والد والديج ولا تجين لا بصحة ولا بموت
روكة وهو يحجي سدت الباب اني كمت ابجي وهزني كلامه وغثني
كومتني روكة وكعدنا بالبيت وراحت تسكت الجهال واباوعلها شكد حنينة هاي وبنت حلال سألتها عن عمرها طلعت اكبر مني بثمانية سنوات
حطيت ايدي بيدها وصرنا نشتغل سوة استحي اكولها الكم بس دبرنا نفسنا بيها وعشنا بيها
وكعدت امها عدنا بس انسان كبيرة وما طولت وراحت لدار حقها ..
ورتبنا البيتين ورى ما تجاوزت روكة كسرة وفاة امها
بس سكنا ببيت وحد وصرنا يوم عن يوم شغلنا الله يبارك بي ونعيش بي ونعيش الجهال بس الحلو كبل لا حفاظات 😅 ولا قواطي حليب كبل ع صدر الام ومشت الامور والحفاظات الي عايش ذاك الوكت يعرف شنو جان 😅
فقدت اخبار اهلي صار هواي ومشتاقة لأمي واخواني بس ممنوعة اشوفهم وهم هناك اكيد مشتاقيلي بس ابوي مانعهم
حدما اجاني خبر وفاة ابوية وهنا جانت صدمتي وهنا استذكرت كل العذاب الي شوفني اياه الله يرحمه ..
اريد اروح وخايفة من اي ردة فعل هناك وتشجعت ورحت ع فاتحته وطبيت اعيط واصيح واخمش بوجهي جان امي تتلكاني وكالتلي لتبجين جذب ولتشوفيني وجهج يلا انكلعي منا
تفائجت كتلها ليش هذا ابوي !
ضربتني ع كتفي روحي اكلج ارجعي لبيتج وهو وصاني لا تجي لفاتحتي ولا تعرف قبري وين
رجعت مكسورة كسرتين انوب ابوي بالقبر وما جاي يتقبلني فتت للبيت ولكيت روكة منومة الجهال وهم صايرين ما شاء الله كبرانين ومنظفة البيت وهاي شو رجعتي بسرعة
كتلها القصة وكالت خلص لا تضوجي اذا وصى هيج فلا تكسرين وصيته .. حالتي النفسية صارت صفر وتدهورت احوالي وصار عندي شوك كبير اشوف كبر ابوية وين واعرفه واقراله الفاتحة ..
الجهال جاي يكبرون بين ادية والحياة ويا روكة صارت نعمة وصرنا نعرف ندبر امورنا وشلون نشتغل سوة ونتعاون
اندك الباب .. رحت افتحه وفتحته واشوف رواء عرفتها من ملامحها ماتغيرت بس كبرانة
وياها زلمة ماعرفته كتلها حياج الله فوتي ..
فاتت والزلمة ظل برا لان ماقبل يطب لان مابي زلم البيت
طلعت الها روكة وسلمت ع رواء بس شنو روكة عيونها تجدح نار
رواء : هذا البيت مو الكم هذا البيت بيت رسول الله يرحمه ولازم يتقسم ع الورثة
روكة : و انتِ حضرة جنابج بصفة شنو جاي تسولفين هالسالفة
رواء : ابن عمي واريد حكه
روكة : وماعدهم زلم ياخذون حكهم ويدزون نسوان
رواء : هسة بدون لغوة زايدة يلا حبيباتي اطلعن
روكة تقربت ع رواء وحطت ايدها ع رقبتها وكالت الها
: والله اذا ماصرتي ادمية و جريتي عدل اخنكج هسة بيدية هاي ماعندي مانع
جان تدفعه ليورة وتكعد كعود
وتسحلها لباب البيت ويطلع الزلمة الي وياها يشوف جان تكله
صيروا زلم ولموا نسوانكم وسدت الباب بوجهم
اني بس اباوع عليها وخربت ضحك كلت الها
– ي روكة والله طلعتي زلامية
– ضحكت بصوت .. اي والله اهلنا يصيحون اليه دحام واني صغيرة هههههههه بس عند رسول اصير بزونة أليفة
– يبوية بزونة وأليفة والله اشوفها اسد
ضحكنا وكلمن راحت لشغلها .. وسام الفراجي
كبروا اسعد وامجد ..
وامجد كبل خليته يشتغل ويساعدنا بالمصرف اني ياالله يالله تكبرون حتى تشتغلون
واسعد لا هو هادئ شخصية مو مال شغل ههه صار يدرس سجلته بالمدرسة وما شاء الله عليه شاطر كلش بس حازت بروحي مكدر ادرسه وصارت روكة تدرس بي لان تعرف الحروف وصرت مجبورة اتعلم ويا اسعد الكتابة والقراءة وشوي شوي صرت اجمع الحروف وصرت الدرس ادرسه اني وابني اسعد سوة هههه والتعليم مو عيب حتلو بالكبر
روكة صارت حالتها الصحية تتراجع وهم بين الكبر عليها والشيب والجهال صاروا وكبروا واقترح علينا اسعد ابو عقل ليش البيت الثاني هيج مشمور بدون فائدة خلينا نأجرة لناس وكل شهر يجينا مصروف من عنده
جان روكة تكله ايابه كبر الفصعون وصار يفكر وينطي حلول
مايوم حسستها انهم مو ولدها ابد
وهم من جانوا صغار علمتهم يصيحون الها يمة
امجد صار يتطور بالشغل شوي شوي ومن صنعة لصنعة حدما صار عنده محل مال المنيوم وتركيب ابواب بلاستيك وشبابيك وتصنيع كاونتر ومن هالسوالف
بينما اسعد كبر ويا هالدراسة وصار اصلع وهو اسمر و صار ثلاثيني جاد ههه وكلما افاتحهم بموضوع الزواج يأجلونه حدما تدهورت صحة امهم روكة وهسة صارت طريحة فراش ولخاطرها استسلم اسعد للامر الواقع وخطبت اله بنت
و ان شاء الله تعالى زواجه بشهر التاسع بهاي السنة
اما امجد ملتهي بالشغل والفلوس
وهسة اني اعتني بروكة والله ما اعتنيت بأهلي بمرضهم هيج شايلتها بالصلاوات وحاسبتها اختي الجبيرة
واني هم مو قاصرة رجلية والكبر
وراسي ابيض من الشيب 😅
وهلكت واني اكلهم كبرنا منكدر نطبخ وننفخ ونغسل
عدت سنين هواي تعلمنا منها دروس هواي و عبر وان الاهل ممكن يكونون العدو الاول لإبنهم يحطمون احلامه واماله وافكاره
وبالتالي يصير سهل الكسر عند الباقين لان اهله هم اول الناس الي خذلوه
اكتب والنظارة الطبية هالكبرها حتى اشوف الجهاز والحمد لله الدنيا تتطور من هوش والصخول والصريفة وطبعا هالشي مو عيب بالعكس ناس كلها خير وبركة بس اقصد من هيج بيئةوعدم القراءة الى بيت وعمل وولد يخبلون
بالنهاية اشكر استاذ وسام الفراجي ع جهوده بتعديل القصة والاحرف والاخطاء الاملائية الجثيرة وهاي قصتي من اول ليلة عرسي لحد هسة واني عجوز وايدي ترجف من الزم شي الله يطول بكل اعماركم ولدي وبناتي ويحفظكم ويرزقكم النصيب الزين الي يقدسكم ويحبكم من كل كلبه ويديم الكم اهاليكم
و اخير نصيحة من امكم كاظمية وعجوز عشت سنين طويلة بظروف قاسية وحجيت بيت الله ..
تزوجوا الي تحبوهن لا تشمروهن وكلوبهن مكسورة لا تخذلوهن وهن تركن كل شباب الي شافتهم واختارتك انت ..
لا تخذل ثقة بنت اختارتك من بين العالم لان البنية من اختارتك هي واثقة بيك الف بالمية انت حتعوضها عن ابوها وامها واخوانها
ويجتمعون كلهم بشخصيتك
وانتن البنات اختارن الشاب الي يحبجن الي يغار عليجن الي يريدجن بالحلال و جاي يسعى لهالشي
مو همكم الفلوس بس والسيارة ترا والله ثم والله بس ينقفل الباب عليكم ماتظل قيمة لفستانج سواء اشتريتي بمليون دولار لو مأجرته تأجير ماتظل قيمة لفلوس المهر
القيمة الحقيقية هو اختيارك للانسان الصح لا تتعبوهم بمصاريف الزواج وهو حقكم و ع راسي بس تعيش ويا انسان تحبه هاي كنز عظيم
تمت