رواية ذئاب لا تعرف الحب الجزء الثاني2الفصل الحادي والعشرون21بقلم نجمه براقه
بيجاد
مصدقتش ان خالي مريض بالقلب زي ما قال بابا وافتكرته بيقول كدة عشان اوافق إني اتجوز فاطمة ومهتمتش قوي بكلامه دة ولا حاولت اتأكد منه وكملت قعدة في اوضتي بعيد عنهم ، قعدة شبه احتاجاجية علي قرارهم دة لغيت ما جت ماما عندي وانا بذاكر قعدت علي السرير وقالت
_ انت مخصامنا ولا ايه
_ لأ ، ليه
_ امال حابس نفسك في اوضتك لا بتاكل ولا بتشرب معانا ولا حتي سألت عن خطوبة اختك
_ لا ما انا عارف انها يوم السبت وهحضر
_ هتحضر
_ اه ولا مش معزوم
_ بتتريق
_ عاوزة إيه يا ماما... جاية تفتحي موضوع بنت اخوكي تاني
_ جايه اطمن عليك
_ انا كنت كويس قبل ما تقرروا تجوزوهاني من غير ما تاخدوا رأيي حتي
_ ومالها فاطمة شوفت منها حاجة غلط
_ مش لازم اشوف علشان ارفض او اقبل انها تكون مراتي
_ طيب في واحده تانية
_ مفيش
_ طيب مدام مفيش ما تجرب تشوفها مش يمكن تعجبك.. انا هوريك صورتها لو معجبتكش بلاش
_ لااا مش هشوفها وحتي لو شوفتها وطلعت حلوة بردو مش هتجوزها شيلوا الموضوع دة من دماغكم
_ ولا حتي علشان خالك اللي بيموت
_ خالي مش هيموت يا ماما انتوا بتقولوا كدة عشان اوافق
_ لا يا شيخ... هو انت مش عارف ان ابوك وامك مبيكدبوش ولو كدبوا ميكدبوش في حاجة زي دي وبذات انا ... انت ناسي اننا لحقناه من الموت وانت بنفسك اللي انقذته ، خالك تعبان وهيموت
_
_ مش مصدق؟
قولت بتنهيدة
_ ماشي مصدق بس في شرع مين اتبلي ببنته وانا مش عاوزها.. هو احنا هنرميها يعني لو مات
_ لا بس هتعيش لوحدها
_ ياستي هتوها هنا وانا اقعد في الشقة التانية وبعدين مش يمكن انا اموت قبل ابوها
_ بعد الشر عنك انت وهو... بس والله يا حبيبي ما تشوفها مره مستحيل ترفضها ، البنت جميلة قوي وهدية ولطيفة جداً .. يعني انا لو مش متاكده انك هتحبها وهترتاح معاها هقولك اتجوزها
_ يا ماما...
_ فكر بس... علشان خاطري.. لو بتحبني فكر و وافق تشوفها
قولت بزهق
_ ماشي يا ماما بس بشرط مش هقول اتجوزها غير لو لقدر الله خالي مات
_ ماشي وانا موافقة
قولت بنرفزة
_ طيب... قرف بقا.... يااااارب يطول في عمرك يا خالي ويجعل يومي قبل يومك
قالت وهي بتقوم وتبوسني
_ هههههههه بعد الشر عنكم انتوا الاتنين
_ بتدلعي ياوفاء علشان عارفة اني بحبك
_ هههههههه عارفة بس لو تحترمني هحبك انا كمان
_ مش كفاية وافقت اتبلي ببنت اخوكي كمان هحترمك
_ مش عاوزة اعضك تاني
_ لا عضي وكمليها ، والله لا انتي عضاني شكلك جعانة
_ لا بلاش هحمر بطاطس احسن
_ يا سلام... امهات اخر زمن... روحي يا ماما .. وحمريلي معاكي بطاطس جعان
وافقت علشان للأسف مبقدرش ارفضلها طلب وهي بتستغل حبي ليها في كل مره.. وبعد ما كنت خلاص مقرر اني هشوف صاحبة الطرحة واتقدملها ورسمت احلامي معاها طلعتلي ست فاطمة مش عارف من اي داهية.. وعلشان يزيد الامر سؤ جت ماما تاني يوم تقولي روح لخالك اديله الدعوة
#فاطمة
دخلت المطبخ اجهز اكل لبابا وكعادتي في البيت بكون بشعري من غير نقاب ولا حتي طرحة وبعد ما بدات اجهز الجرس ضرب غسلت ايدي وطلعت علشان البس وافتح ولكن الصدمة اني لقيت بابا فتح وشوفت بيجاد واقف ولكن ملحقش يشوفني ورجعت جري واستخبيت قبل ما يلمحني وبعد دقايق بابا نده عليه شكله نسي اني بشعري ومن غير النقاب ف قولت بتوتر
_ ايوة يابابا
_ تعالي سلمي علي بيجاد
سكت مردتش ف رجع ينده تاني
_ في ايه يا فاطمة
_ ممكن تيجي لحظة
جه ولما لقاني من غير طرحة ولا نقاب قال
_ نسيت والله يابنتي دقيقة هجبهملك
_ غسلتهم
_ كمان.. طيب خليكي هنا
_ طيب
طلع وبعد دقايق رجع يقولي
_ مشي
_ هو كان جاي ليه
_ جاي يديلنا دعوة خطوبة جويرية
_ وهنروح
_ طبعاً
_ بس انت تعبان
_ نروح شوية ونيجي مينفعش منروحش
_ طيب بس...
_ بس اية
_ هينفع اروح بالنقاب
_ ومينفعش ليه.. بس نروح نشتري نقاب يناسب المناسبة بلاش كواتم
_ طيب ، اية رأيك في الابيض هيكون حلو
_ ماشي ابيض
#مليكة
روحت ل جويرية وقبل ما ادخل العمارة شوفت ريان جاي من الجهة التانية وبدر معاه وقفت للحظات علشان اسلم عليهم مع اني لسه متضايقة منه واللي حصل ضايقني منه اكتر لما تجاهل وجودي ودخل بيتهم في الوقت اللي بدر جه يسلم عليه ويقول
_ عاملة اية
_ الحمدلله...
كملت بتذمر
_ امال مال صاحبك مضيقاه ليه
_ لا خالص هو بس كدة مع الناس اللي ميعرفهمش ، وكمان مبيعرفش يتكلم مع بنات بيتكسف شوية
_ دة مش كسوف دي قلة ذوق
_ هههه متزعليش
_ مش مهم... عن اذنك
سيبته روحت ل جويرية ف ردت من ورا الباب ولما سمعت صوتي فتحت وفي اللحظة دي مر بدر من ورايا و وجهت عينها ناحيتة ولما رجعت ابصله لقيته مبتسم ومبسوط بشوفتها كان واضح انه بيحبها قوي ف قولت بمكر
_ طيب هفضل واقفة علي الباب كتير
_ اتفضلي
قرب مننا وقال
_ ازيك يا جويرية
_ الحمدلله
_ عمي و مراته مش هنا
_ لا
_ طيب لو احتجتوا حاجة رنيلي
_ طيب
مشي وانا وهي دخلنا ف قولت بإبتسامة
_ واضح انه بيحبك قوي
_....
_ وانتي بتحبيه ولا ايه؟
_....
_ رغاية وبتدخل في اللي مليش فيه صح
_ عادي
_ طيب ما تحكيلي قصتكم مع بعض نفسي قوي اسمع قصص من النوع ده
_ مكنش في قصص ، اتقدملي وبس
_ متقوليش انه جواز تقليدي واضح قوي أنه بيحبك
_ مشافش مني حاجة علشان يحبني
_ يعني ايه
_ يعني هو حابب يقربلي لنفس السبب اللي انتي حابة تقربيلي عشانه ، دائماً الشيء الغامض بيجذب ويخلي في فضول لاكتشافه
_ معاكي حق بس هو هيتجوزك مظنش هيتجوزك علشان يكتشف غموضك
_ الحب مبيدومش من غير ما يكون في حاجة تنميه ، حتي لو كان ده حب مش فضول ف هو مش هيكمل ، مين هيفضل عندة شغف تجاة اي حاجة صامتة زي الجماد حتي لو كان تمثال دهب
_ لا يا جويرية انتي مش تمثال انتي بتحسي وبتفهمي وبدليل كلامك دة ، انتي بس قافله علي نفسك مش عاوزة تتفاعلي مع العالم حوليكي
رجعت تاني لسكوتها ف قولت
_ صدعتك انا عارفة ، وانا مش هزن كتير بس انا مبسوطه انك فتحتيلي قلبك حتي لو شوية صغيرين
_ دة لانك غريبة
قولت باستفهام
_ يعني ايه
_.....
_ جويرية انا حاسة والله واعلم واحساسي زاد بعد كلمتك دي ان في حاجة خايفة تقوليها لحد من اللي حوليكي... هو ممكن يكون في حاجة حصلت خايفة تقوليها لأهلك... ممكن يكون حد من عيلتك ازاكي و وصلك للحالة دي
_ مش من عيلتي
_ يعني في حد ازاكي فعلاً
سكتت ودارت وشها عني ف قولت باهتمام
_ عمل ايه
طال سكوتها قبل ما تقول
_ تشربي شاي ولا عصير
محبتش اضغط عليها لأني كنت عارفة انها مدام اتكلمت ف هتكمل وتقول اللي عندها مع الوقت
#هاجر
الوقت بيعدي وباقي ساعات علي خطوبة بشر ، وللحقيقة طول الوقت دة بفكر بأناينة شديدة وهو ازاي اقوله بحبك وازاي هيفشكل خطوبتة قبل ما تم حتي ومفكرتش في اسراء واحساسها ، مكنش في دماغي غير اني اقوله ونكون لبعض وبس وبعد تفكير وراتباك وسعادة وشوق ولخبطة بعتله بعد ما الكل نام وقولت
_ صاحي ولا نايم
_ عاوزة إيه
_ عاوزة اتخانق معاك
_ ليه
_ مزاجي كدة
_ طيب اتفضلي اتخانقي مع اني مخنوق منك وبفكر ارميكي في المنفي
_ هههههههه طيب ومبترمنيش ليه
_ معنديش دم
_ هههههههه بردو ليه
_ قولتلك معنديش دم
_ قولتيلي.. صحيح يا بشر هو لو حد غيري عمل اللي انا بعمله معاك هتستحمله
_ لأ
_ واشمعنا انا مستحملني
_ علشان معنديش دم
_ هههههههه تاني
_ ايوه ، قولي عاوزة إيه
_ ولا حاجة ، رغي بلا هدف
_ مكلماني في الوقت ده علشان ترغي رغي بلا هدف
_ لقيت نفسي فاضيه ، انت بقا ايه مصحيك في وقت زي دة ، ايه بتفكر في اخت صاحبك؟
_ للأسف اه
_ وبتفكر فيها ازاي بقا
_ بفكر انها تكون قدامي دلوقتي واخدها في حضني ، مش حضن رومانسي لا ده حضن قتل هدوس علي نفسها لغيت ما روحها تطلع
_ هههههههه ليييه
_ ما انا قولتلك غبية
_ طيب ما تجرب تقولها مرة بصراحه
_ مش هتفهم
_ مش يمكن فهمت وعاوزة تسمعها منك بصراحه من غير لف ودوران ومن غير تلميح
_ مين
_ اخت صاحبك اللي اتولدت وانت في سته ابتدائي اللي متعلقة بيك
طال سكوته ف قولت بإبتسامة
_ بس مقولتليش صحيح مين صاحبك احنا كلنا عارفين انك ملكش صحاب غير كريم وكريم ملوش اخوات
_ بردو مش هستنتج اي حاجة من كلامك
قولت بإبتسامة
_ ليه خايف يكون كلامي ليه اكتر من معني بردو
_ في ايه يا هاجر
_ في اني عاوزه اشوفك الصبح
_ ليه
_ هقولك حاجة
_ قولي دلوقتي.. دقيقة هتصل
قال كده واتصل فوراً ف جاني صوته ملهوف ومتوتر وهو بيقولي
_ قولي
_ لما اشوفك
_ طيب عن ايه
_ عن...
_ عن إيه اخلصي!!!
_ ههههه ماشي هقولك متنرفز لية
_ طيب قولي بقا
_ انا قولتلك قبل كدة انا مش عارفه انا عاوزه اية وقولتلك عندي مشكله في تغيير مكان حاجة كبيرة وانت قولتلي اسال حد واقولك وصلت لأية ، بس انا فهمت من غير ما اسأل .. وفهمت حكاية اخت صاحبك فهمت كل حاجه
قال بتوتر
_ هاجر!... انا قولتلك مش حمل صدمات.. قولي في ايه
_ هقول وانت قدامي
_ ليه
_ عاوزة اشوف تعبير وشك
قال بتوتر
_ وانا كمان لازم اشوف تعابير وشك.. بس ياريت نتكلم في مكان اعرف اقتلك فيه لو صدمتيني ، عند البحر مثلا عشان اغرقك ولا بلاش خلينا فوق علشان ارميكي من هناك
_ هههههههه ماشي لو صدمتك المرة دي اقتلني
_ ماشي ، والله هعملها بجد ما هزار يا هاجر
قولتل بإبتسامة مرتبكة
_ ماشي
_ اووف... ماشي ماشي هنشوف
_ هههههه ، طيب يلا نام والصبح نتقابل
_ مفيش نوم
_ اوكي بس لازم اقفل
_ هتنامي؟
_ مظنش هنام دلوقتي
_ طيب ما تخليكي
_ تؤ... هقفل وهحاول انام ، علشان عاوزة اصحي فايق واعرف اتكلم
_ ماشي... بس افتكري اني قولتلك هقتلك
_ هههههه اوكي وانا مش همنعك
قفلت وحاولت انام ولكن مقدرتش وبقيت بفكر اقولهاله ازاي ، كنت حاسه بارتباك شديد وانا بتخيله قدامي ومش عارفه ازاي هتجراء واقوله اللي حساه دة وهو طول عمره اخويا وبعد ساعات قضيتها في التفكير والتحضير للي هقوله قومت اول ما طلع النهار وبعد ما بابا وماما راحوا شغلهم ساعة قبل معاد الخطوبة طلعت فوق سطح الدور الرابع وبقيت مستنياه يجي نص ساعة ومجاش ولما اتصلت بيه مردش ف روحت عندهم وعرفت انه في اوضته وبعد ما سلمت عليهم وجيت استأذن علشان ادخلة لقيت زيد بيقولي
_ هاجر عندك نت
_ اه ليه
_ الشبكه وقفت وانا محتاج ارد علي حد ضروري ممكن دقيقة اعمل توصيلة من عندك
_ اه ماشي خد
_ متشكر روحي بشر جوة
سيبتله التليفون وخبطت علي بشر وانا حاسه بنفسي بيروح من كتر التوتر ف قالي
_ ادخل
فتحت الباب لقيته بيربط رباط الجزمة ولما شافني اعتدل وبصلي بجمود من غير اي تعابير لفرحة او توتر ف قولت بربكة
_ مجتش
_ كنت بلبس الجزمة وجايلك... روحي استنيني هناك
_ مالك
_ مفيش حاجه... روحي وانا هاجي وراكي
وقفت شوية ابص لشكله اللي دخل القلق لقلبي ف قالي
_ روحي يلا
_ اوكي
سيبته وروحت عند زيد قولتله
_ خلصت
_ خمسة بس وهجيبهولك .. ادخلي لخلود يكون خلصت
_ لأ انا شويه وهاجي اخده
_ تمام
#بشر
بعد ما قفلت معاها بالليل جاني زيد وقالي
_ سمعت صوتك ف جيت ، بتعمل ايه
قولت بسعادة مقدرتش اخفيها
_ ولا حاجة
_ بتكلم مين
_ هاجر
قال وهو بيتقدم ناحيتي ويقعد علي الكنبة
_ هاجر بتكلمك في الوقت دة
_ اه عادي بنتكلم
_ اول مره اسمع صوتك بالليل
_ بنتكلم مراسلة
_ علي اي تطبيق
قالت باستغراب
_ اي الاسئله دي في ايه
_ بتكلمك علي اي تطبيق
_ واتساب.. ليه
_ اه
_ في ايه يا زيد
_ في انك مخدوع ومش حاسس باللي بيحصل
فهمت انه هيرجع يتكلم عنها بطريقة مش كويسة ف قولت بزهق
_ زيد! اتكلم علي طول
طلع التليفون من جيبة وقال
_ اول حاجة انا عاوزك تعرف اني مكنتش اعرف انها هي لغيت ما بصدفة في الوقت اللي كنت هترميها من فوق نسيت تليفونها وشوفت الحساب عندها
_ حساب ايه... انت بتتكلم عن ايه
_ واحده من فترة كلمتني علي انها بتعاني من مشكلة بقينا نتكلم فترة والامر تطور من دكتور ومريضة لصداقة.. وبعدين لحب... حب قبل ما اعرف هي مين انا مش بقولك دلوقتي علشان تبعد عنها عشاني لا انا بحذرك عشان هي مـ.....
قاطعت كلامه بنرفزة
_ ادخل في الموضوع علي طول ، مالها هاجر
_ هاجر هي نفسها البنت دي
_ يعني ايه هي نفسها... اكيد في حاجه غلط
_مفيش غلط غير تصرفها ، انا بقولك شوفت الحساب عندها... واهو شوف بنفسك ده كلامنا مع بعض
مسكت التليفون وانا بتمني انه يطلع غلطان او بيفتري عليها ، او فاهم غلط .. وجبت الشات من اولة لاخرة وشوفت كلامهم وحبهم في بعض ، ف قولت بإنكار
_ لا دي مش هاجر... هاجر متعرفش تقول الكلام دة ولا تفهمه.. دي اكيد واحدة تانية.. دي مش طريقة هاجر.. لا مش هي انا بقولك مش هي
_ لا هي ، ولأنها مفضوحة وربنا اراد يكشفها قبل ما توقعنا كلنا في بعض كانت بتلمح وتتلأم وتقولي حضرتك مع انها مكنتش بتقولها قبل كدة.. ومرة تانية تتذاكا عليه وتقولي بتكلم مين طول الوقت علي الاب توب وحاسة ان في واحدة ، مع انا بقالي سنين طول الوقت علي الاب توب لشغل ، ايه خلاها تشك اني بكلم بنت.. ومرة تانيه ببعتلها وهي قاعدة جنبي وتليفونها وصله رسايل ف ارتبكت وبقت تخبي التليفون وجريت... هي يا بشر... والله هي
تجمعت دموعي وانا بقول
_ ده مش دليل
_ وايه الدليل اللي انت عاوزه
_ معرفش بس هاجر متعملهاش... حتي لو حبت تشتغلك مش هتوصل للكلام ده... متعملهاش يا زيد.، انا عارفها
_ طيب ولو وريتلك الحساب عندها ، هتصدقني
_.....
_ ماشي استني لصبح وانا هحاول اخد منها التليفون ولو ربنا بيحبني هتنسي تشيلة بس لغيت ما اجيبه ياريت متجبلهاش سيرة ولا تكلمها
مردتش بكلمة وبقيت مستني ساعات لغيت ما جت ومشيت علشان تستناني فوق وبعدها هو دخل عندي وتليفونها في ايده وبيقولي
_ للاسف ملقتش الحساب علي مسنجر ولا علي الفيس
اترسمت ابتسامتي ولمعت دموعي قبل ما يصدمني ويقول
_ بس لقيته علي الاحتياطي اهو
وراني الشاشة لقيت الحساب علي مسنجر وقتها حسيت كأنها حالفة تدبحني بكذا طريقة بس عمري ما كنت اتوقع ولا يجي علي بالي انها فكرت في الطريقة دي بذات وهي انها تعشمني وفي نفس الوقت تحاول مع اخواتي الاتنين... كنت فاكرها غبية مبتفهمش طلعت بتفهم وانا اللي غبي.. وبعد ما طال سكوتي بعيون شاخصة بتتفحص شكل حسابها اللي انا اول مره اشوفه
قال زيد وهو بيقرب علشان يحضني
_ متزعلش نفسك هي مريضة متستاهلش
زقيت ايده عني وقولت
_ محدش مريض غيري انا.. انا اللي كنت مصمم اعمل في نفسي كده من الاول
_ انت طيب وعمرك ما كنت هتفهم السودوية اللي هي فيها دة مش ذنبك
_ انا اهبل مش طيب... انا اللي نسيت نفسي وجريت ورا واحدة متناسبنيش ، دي غلطتي وانا هصلحها
قولت كده وطلعتلها فوق بعد ما استجمعت نفسي.
كان ممكن مطلعش وانهي الموضوع قبل ما تقول اللي عاوزة تقوله ، بس لو طلعت وقالت اللي فهمته واللي هو انها بتحبني هكون انا اللي فزت عليها ومش هنولها اللي في بالها ولا هتوصل للي هي عاوزاه ولما وصلت لقيتها واقفة مستنياني ف قولت بعد ما وقفت قدامها
_ اتأخرت عليكي
قالت بارتباك
_ شوية
_ كنت بشوف هتستنيني قد إيه
_ انا كنت نزلالك تاني لما اتأخرت
_ اديني جيت... في اية بقا كنتي عايزة تقولي ايه
قالت بإبتسامة مرتبكة
_ قول انت الاول
_ اقول ايه
_ اللي دايما بتحاول توصلهولي
_ لا لا ، انا مبقتش ضامنك... اكيد مش هتفهميني زي كل مرة ، قولي انتي ، شوقتيني قوي اعرف اللي هتقولية
قالت بتوتر
_ ماشي هقول ، انا فهمت اني كنت مطلعة عينك وفعلا كنت غبية... بس قبل ما اقول ، كنت عاوزة اقولك الاول ان انا...
_ ايوووة انتي ايه كملي علي طول
نفخت بتوتر وقالت بإبتسامة وهو بتفرك ايديها
_ان انا اكتشفت اني عمري ما حبيت بدر.. انا بس كنت عاوزه اعيش الاحاسيس اللي البنات بتتكلم عنها ، انما لا حبيته ولا اي حاجة
_ ايوة
_ واني...
_ انك اية كملي علي طول نشفتي دمي
_ انا متوترة شوية بس انا...
مسكت ايديها وقولت
_ خدي نفس واهدي
تنفست بعمق وبعدين قالت
_ فهمت اني محبتش حد....
سكتت شوية تجمع نفسها وقالت
_غيرك انت .. بس مكنتش فاهمه لان المفروض اننا اخوات... بس بعدين عرفت ان لا مش اخوات... بشر... انااا
_ ايوووة ، انتي ايه.. كملي علي طول متوقفيش
نفخت بتوتر وقالت
_ انا.... بحبك..
لمعت عيونها وهي بصالي مستنية ردي ف قولت باستفهام
_ قولتي ايه؟
_ قولت بحبك
_ بتحبيني؟! ، حب من بتاع الحبيبه والمتجوزين
ضحكت بتوتر
_ هههههه ايوه ، مالك هتعملي زيي مش بتفهم الكلام الصريح ولا ايه
وقفت للحظات باصصلها من غير ولا كلمة وكلامها مع زيد بيمر زي الشريط قدام عيني بالإضافة لاهتمامها ب بدر وحبها ليه بقالها سنين واستغلالها ليه طول الوقت ، كنت حاسس ببركان بيغلي جوايا بسببها وبتمني اقتلها في اللحظة دي وبعد ما طالت نظرتي ليها من غير كلام قربت خطوة وقالت بربكة
_ مالك.. مفهمتش ولا بتتقل ولا بترديلي غبائي ولا ايه
_ قولتي بتحبيني
_ ايوه
_ بتحبي عمك... شرعاً لا يجوز... وحراااام
قولتها وانا بضربها بالقلم بكل ما فيه وقعت علي الأرض من شدته وداخت وبقت علي الحال ده لثواني بتحاول تفتح عينيها لغيت ما اخيراً قدرت ورجعت تبصلي وهي حاطة ايدها علي خدها وبتحاول تتكلم بس تقريباً كانت لسة دايخة ومصدومة وصوتها مش مساعدها ف قولت بعد ما جثوت علي ركبي قدامها
_ بتحبي عمك واخوكي الكبير.. بلاش دول.. طيب جاية دلوقتي وانا خطوبتي بعد كام ساعة تقولي الكلمة دي.. مفكرتيش في اللي ممكن يحصل وفي احساس اسراء
ارتجفت شفايفها ودموعها سالت بغزارة وهي بصالي ف كملت وقولت
_ في حياتي كلها ما شوفت احقر ولا اوطي منك.. مع انك صغيرة بس حقيرة قوي يا هاجر
سقطت دموعي غصب عني وانا بقول بصوت مخنوق
_ انتي كسرتيني .. عيييلة كسرتني انا الشحط اكبر ابن في العيلة واللي الكل بيحلف بعقله
قالت ببكاء
_ بشر!.. في ايه.. انت مش بتحبني؟
_ حبيتك بس علي انك اختي الصغيرة... معلش بقا منجحتيش في انك تحببيني فيكي زي بردو ما فشلتي مع بدر... زيد بقا اللي طلع حمار شوفي يمكن تقدري عليه
قولت كدة ونزلت وانا مش شايف الطريق بوضوح بسبب الدموع اللي في عيني وفي طريقي وانا ماشي بسرعة خبطت في زيد ف مسك فيه وقال
_ بشر! رايح فين
زقيته عني وكملت طريقي من غير ما احدد وجهة
#زيد
انجرح بسبب اللي عرفه بس دة احسنله كان لازم يعرف قبل ما تقدر تضحك عليه وبعد ما مشي من عندها طلعتلها علشان اوجها ، كنت عاوز اعرف هتقول إيه وهتبصلي ازاي بعد ما اتكشفت قدامي بس لما وصلت لقيتها بتعيط ومنهارة من العياط كانت بتقبض علي قلبها ودموعها مالية وشها
ولما لقيتها في الحالة دي قررت أآجل شوية الكلام معاها ف قولت وانا برفعها عن الأرض
_ قومي
وقفتها قدامي وقولت وانا بثبتها لانها مكنتش قادره تصلب طولها
_ اثبتي!!! .. هاجر!!!
فضلت قابضة علي قلبها وبتبكي بحرقة وبشكل متواصل ف قولت وانا لسه بحاول تثبيتها
_ في ايه بطلي!! هاااجر!!
موقفتش بكا لحظة واحدة وفي الاخر رجليها ارتخوا و وقعت فاقدة للوعي ف ريحتها علي الأرض واتصلت ب خلود قولتلها تجيني فوق بشوية مية من غير ما حد ياخد باله وجت بعد دقايق لما لقيتها كدة شهقت بصوت عالي وجريت عليها وقالت وهي جاثية علي ركبها وبتضرب علي وشها
_ هاجر!!! .. ايه اللي حصلها مالها.. هاجر ردي عليه
مردتش عليها وبدات افوقها بالمية لغيت ما فاقت ولما شافت خلود اترمت في حضنها ورجعت تبكي ف ضمتها وبقت تمسح علي رأسها وتقول
_ حبيبتي اهدي مالك
بصتلي وقالت
_ ايه اللي حصل
قولت بجمود
_ معرفش.. بس هي لازم تهدي بلاش حد يشوفها بالحالة دي.. خليكي معاها ولما تهدي هتيها وتعالوا
_ حاضر
#خلود
افتكرت انه عمل حاجة علشان يصدها ف وصلت للحالة دي بس لما هديت وسألتها مالها قالتلي اللي حصل مع بشر ف قولت محدثة نفسي باستفهام
_ ايه الكلام دة ، يعني هي دلوقتي عاوزة زيد ولا بشر ولا بدر.. يكون زيد فهم غلط... اكيد فهمت غلط
رجعت اكلمها واقول
_ طيب ليه هو عمل معاكي كدة... دة زيد بيقول انه بيحبك
_ معرفش عمل معايا كدة ليه... ليه فاكرني اني بحاول اخدعه.. انا قولتله اني فهمت اني محبتش بدر... معقول يكون فاكرني قولتله بحبك علشان اخلص من اسراء.. معقول شايفني وحشة قوي كدة
_ يمكن هو دة السبب... متزعليش هو الخسران
قالت ببكاء
_ انا اللي خسرت مش هو.. كان لازم استني يكون هو اللي قالي مستعجلش وافهم علي مزاجي
_ معلش متزعليش واهدي... يلا هننزل زمانهم بيدوروا علينا
بقيت اهدي فيها لغيت ما تماسكت ونزلنا دخلتها شقتهم ورجعت لقيت زيد قاعد في الصالة ف قالي
_ خلود
قولت وانا بتقدم ناحيته
_ نعم
_ جيبتيها!
_ اه
_ قالتلك في ايه
_ قالتلي
_ قالتلك ايه
_ قالتلي انها لما اعترفت ل استاذ بشر انها بتحبه ضربها... يعني مطلعش بيحبها اهو زي ما....
توترت لما خدت بالي من كلامي وقولت
_ زي ماهي كانت متخيلة
قال بنبرة ساخرة
_ وهي بتحبه بجد يعني
_ افتكر كده والا مكنتش قالتله
_ وده دليلك انها بتحبه
_ لا بس انا عارفه انها بتحبه وقولتلها قبل كدة بس هي بقا مكنتش فاهمة
_ لا يا شيخة... واية عرفك بقا
_ عرفت
_ هي قالتلك
_ لا هاجر عمرها ما قالتلي انها معجبة بحد حتي بس انا فهمت
_ فهيمة قوي انتي يا خلود وذكية... طيب وعلي كدة باين عليه اني بحب
_ معرفش
_ اشمعنا فهمتي هاجر
_ علشان هاجر صحبتي
_ تصدقي بالله انتي عبيطة وهتفضلي عبيطه وعمرك ما هتتعلمي من دروسك اذا كان بتحكمي علي الناس باحساسك... احساسك تجاه القريبين منك غلط.. محتاجة كام قرصة كمان علشان تتعلمي
قولت بإبتسامة
_ علي فكرة انا من اول ما صاحبت نيرة وانا ملاحظة نفسنتها مني ومش بتخدع بسهولة في اللي قدامي ، يمكن عبيطه فعلاً بس كنت عبيطة لما تخيلت ان مش كل اللي يكرهني يقدر وضميرة يسمحله أنه يأذيني من غير وجه حق ، بس بردو انا مش عبيطة قوي لدرجة مفهمش اللي قدامي... انت بقا اللي محتاج تتعلم تبطل تسخر من اللي حوليك.. انت مش نبي ومش معصوم من الغلط ولا صعب ان حد يخدعك
_ اها صح عندك حق ، انا فعلاً سهل انه يتضحك عليه ومش ناصح زي مانتي بتقولي ...
_ تريقة دي؟
_ لا خالص انتي صح انا متفق معاكي في الكلام دة
_ طيب الحمدلله اول مرة نتفق
قال بإبتسامة
_ فعلاً... عارفة
_ اية
_ انتي بنت ذكية جداً جدعة ومؤدبة بعيد عن انك عنادية معايا بس افتكر لو كملتي دراستك هيكونلك مستقبل كويس في مجال الطب النفسي
قولت بإبتسامة
_ بلاش خليك تاكل عيش
_ هههههههه ربك مبينساش حد كملي انتي بس واهو ندخل في مناسفة حقيقية وعادلة
قولت بإبتسامة
_ حاضر عنيه اول ما الاقي الكنز هكمل
_ كملي وانا هتكفل بمصاريفك
_ ده إيه الكرم دة كله ، انت كويس
قال بإبتسامة
_ ولو مش كويس
_ ادخل واسيبك
_ طيب ما تدخلي تعمليلي قهوة احسن
قولت بإبتسامة
_ حاضر
قولتها ودخلت عملتله قهوة وكنت ناوية ارجع اوضتي اكلمه بس هو ساب الاب توب والبيت اتزحم عشان معاد الخطوبة قرب ف قولت خليها بعدين
او لما هو يبعتلي... بس مبعتش تاني خالص لغيت ما انا بعتله قبل حدوث اللي كنت خايفة منه