رواية مواجهة القدر كاملة الجزء الثاني2 ترويض ملوك العشق جميع الفصول مكتملة حتي الاخير الخاتمه بقلم لادو غنيم

 

رواية سمرة

الفصل السابع 7

بقلم وسام الفراجي

جان يلزم عودة بيده ويخطط بالكاع اخذ نفس وباوعلي حتى يحجي..

كلبي صار طبل اريده بس ينطق ..كلي

ـ ليش تكرهج امج ؟! 

ـ كل عقلك هيج سؤالك صار ساعة عبالي فد سؤال حياة او موت 

"صدمني السؤال لان اني افكر وين وحضرت نفسي للسؤال وكلبي فرفح وهو وين يسولف فضجت الصراحة لأن تيقنت الي افكر بي مو بباله اصلا فجاوبته بضوجة "

ـ و اني شمدريني يا خالد 

ـ بعد چلاوي خالد ليش هيج ضايجة الدنيا ماتسوة و هاي امج لو هي امي من زمان شويت هالشحم الزايد بيها وسويته غدة للصراصر 

ـ كافي خالد 

ـ مم بيج شي شو تغيرتي بلحظة اكو شي ضوجج اذا آني لان حجيت ع امج خلص اسحب كلامي 

ـ لا مو انتَ اسفة اذا حجيت وياك بطريقة مو زينة رايحة شوي اريح نفسي وراي طلاك وروحة ورجعة وخبصة 

ـ تمام سهومة ديربالج ع الخنصر والبنصر 

ـ يعني شنو ؟ 

ـ يعني ديربالج ع نفسج بس 

ـ شدخل الخنصر والبنصر ؟

ـ غير اصابع ايدج يعني ديربالج ع نفسج من ضمنها ايدج

ـ تمام خالد ..

رحت اعتزلت بغرفة وحدي وراجعت نفسي ليش حجيت هيج بهالطريقة ويا خالد وليش ضجت منه وهو مو مسويلي شي ولا سمعني شي ولا أملني بشي ..

غلط اكبر غلط بينت اله اني ضجت من كلامه وبينت نقطة ضعفي وهو ذكي اكيد فهم ليش ضجت .. 

امداني شكد ثولة وما افتهم .. 

لازم اصلح موقفي اله بأي طريقة ماريد يتندم على الي سواه الي .. 

بعد شوي اندك باب الغرفة 

ـ منو ؟ 

ـ اني خالد 

ـ شعندك خالد

ـ عندي شغيلة صغيرونة بالغرفة نسيت اسويها بيها مجال ؟

ـ تمام لحظة البس الشال ..

ـ هاا اطب ؟

ـ طب 

فات راح ع جرّار لزمه عدّل بي اوراق ما انتبهت نوع الاوراق هاي شنو بس لاحظته يحط ظهره علمود يغطي الي بي وبعدين قفله ..

ما اجذب عليكم مليار الفضول صار شنو هذا الجرار وليش قفله غير عن باقي الجرارات وشنو هاي الاوراق .. 

كمّل وكالي اعتذر خاف ازعجتج بس نسيت اقفله بي اوراق احبها ومهمة عندي لهالسبب بس 

ـ عادي الغرفة غرفتك وسوي اليعجبك

ـ الغرفة غرفتج انتِ

بهاللحظة فات عمو رباح بالاستقبال وشافنه سوة جان يكول ..

ـ خالد مو نطيت الغرفة لسهام ليش هنا امشي اصعد يلا يلا

ـ هههههه يابه انتَ كل الطريق تكول النا تطبخ وتطبخ وتالي نطيت الغرفة حتى تكون قريبة عالمطبخ وماسوت النه بس جاي 

كتله .. كوم يلا جيبلي ورق عنب وبيدنجان وبتيتة وخيار وشجر ..

جان يكول ماريد بطلت اول مرة اشوف دولمة بمليون تكلف

كتله شبيك ابو نجيب هي 15 الف 

ضحك عمو رباح وكله روح شتريد سهام جيبلها عالسريع

كله خالد والله يابه العشة مو مال دولمة تسوي كرش 

كله عمو كوم جيبلها فضها جوعانين ..

فعلا راح اشترى مسواك كامل وجاب ضلوع وياه 

وكعدت احفر بالشجر والبيدنجان جان عمتي ام خالد صاحتني تعالي يمي اساعدج مكدر اوكف ع رجلي خليني احفر وياج اضيع وقت اسلي نفسي ..

عمو جان يسگي بالزيتونة برا و حط الصوندة على الثيلة واجه ..

شافنه جان يكول من زمان ناقصني عزبة بالبيت جان يصيح خاالد تعال اشتغل عن امك تعبانة

عمتي : لا عوفني اشتغل احرك ايدي شوي تعبت من الكعود 

خالد : ششتغل يابه غير مااعرف اسوي شي وبعدين اريد اشوف طبخ سهام زين لا خبصتنا اطبخ واطبخ ...

كتله طباخة وفنانة بعد بالطبخ كلت اشد حيلي واسويلهم دولمة لاجعة اخليهم يطعمون بيها سنة

واني والله كل طبخ اهلنا عليه ..

سويتها وحشيتهن وكملتهن وحطيتهن ع النار ..

وعمو كل شوي يكلي ها كملت دولمتج جوعانين ..

واكله انتظر انتظر .. 

استوت جان ردت اشيلها وانزلها وحارة جان يطب خالد ع المطبخ ويكول 

دفضيها يمعودة لو مسوية طماطة حمس وشبعانين ولا هالانتظار هذا ..

كتله الانتظار يسوة باوع شلون صارت دولمة ..

كلي ابعدي شوي شالها وكلبها والدخان يصعد منها والريحة تجنن راد ياخذ كتله ابعد ايييدك والله ماتضوك الا عالصينية

ـ اهووو ذكرتيني ب امي كبل تتخبل احد يطب المطبخ واني كدما اجي ع المطبخ تكلي امي بزون المطبخ 

ـ ههههه روح اكعد يم عمو وهي تجيك الصينية .. 

حطيت بلم دولمة وطرشي وترتيبات الهم 

وحطيت ثاني الي ولعمتي ام خالد لان ماتكدر تكوم 

كملت صينيتهم واجيت لكيت عمتي تباوعلي ها عمة شلونها كالت ضوكيها ..

ضكتها طلعت #فاهية ماتنجرع ابد يبووو ناسية املحها واخبطها شلون فشلة هاي .. 

مارحت عليهم ظليت ويا عمتي اكلت منها غصبن عني حشيت بطني لان ميت جوع ..

ورا شوي عبر خالد من الغرفة واني وعمتي دناكل جان يمد راسه من الباب و جسمه برا وكال 

ـ شلونك شيف بوراك! 

مارديت اله صرت اكل من المغثة اكلت هواي حان اغص 

ركض خالد جاب كلاص مي كلي تفضلي يمكن صعد عندج الضغط من كثرة الملح !

كتله عوفني ماريد اسولف ..

هو شسولف اصلا شكد غبية جان لازم انتبه ناسية الملح شيخلصني عاد من لسان خالد ..

اخذت المواعين اغسلهن اجه عمو فات للمطبخ اني سويت نفسي اججججلف حتى ميحجي عالدولمة 

جان يضرب ع جتفي وكلي ..

طيبة الدولمة بنيتي عاشت ايدج .. يبو فشلت جاي يقنع بية وهي اني ماكلتها ..

صار الليل اندك الباب .. 

راح خالد فتح الباب واسمعه يصيح استريحوا حياكم الله 

باوعت من الشباك الظاهر عليهم ناس سادة وشيوخ دين

وكعدوا ورادوا عمو رباح وصحناه ودخل الهم وسلم عليهم 

واجه خالد كلي..

ـ امي وين ؟

ـ مريضة شوي راسها يوجعها ليش ؟ 

ـ سوينه جاي عفية سهومة 

ـ تمام تأمر منو ذولي وشيريدون ؟

ـ والله مدري بعدهم توة كالوا بسم الله شعرف عنهم

ـ تمام رايحة اسوي الجاي

ـ ديربالج ع الخنصر والبنصر لا ينحركن 

ابتسمت وباوعتله ونطيته ظهري ورحت للمطبخ .. 

هو راح كعد وياهم ورا شوي طلع واجه عليه 

ـ ها كمل الجاي ؟ 

ـ قابل اصير نار بمكان الطباخ اصبر شوي بصلتك محروكة

ـ تنحرك بصلتي احسن ما ينحرك الخنصر 

ـ اهو شجلبت بهالسالفة خالد احجيلي شنو يريدون ؟

ـ شيوخ سادة اصلاح ذات البين يعني اجوا يكولون الطلاق ابغض الحلال وكالوا البنت تريد وميصير تجبروها وهي بعدها مو داخل بيها ومن هالسوالف 

ـ اي وشكاللهم عمو رباح ؟

ـ كاللهم مجبورة البنت ع الولد وهي منهزمة بالاصل وماتريد 

ـ والله كفو من عمو وشراح يسوون ؟

ـ سهومة كاعد بمحكمة شكد تسألين ؟ 

صفنت اني شكد نفسية ونرجسي هذا خالد فشلني 

الي يكلبه ع لسانه ميعرف يجمّل كلامه يحجي كبل

سكتت .. عفته ورحت لغرفتي ..

حايرة شلون اطلك بدون ما اشوف ام حودي او احد من اهلي ماريد اشوف اي احد ما اطيق سوالفهم وسخريتهم عليه ..

راح الضيوف الي جايين ع عمو رباح كتله 

ـ عمو شصار

ـ ما صار شي لتخافين اني شوي احس نفسي مو زين راح انام اذا كعدت مو زين هم الصبح خلي خالد ياخذج وتروحين وياه تكملين اجراءات الطلاك .. 

خالد : مو الا تروح هي ترا يكدر يرمي يمين الطلاك واكو شهود واهلها الشفية راح يجون واذا حيل حيل محامي وافض الشغلة ليش تروح 

عمو رباح : بس باجر خاف يحتاجونها اخذها وياك واذا تمشي الامور بدونها بالايام الجاية لا تاخذها 

خالد : تمام يابه 

عمو رباح : شفتي اخوج خالد شلون يدافعلج

ـ مو اخوية ابن عمي !

باوعلي خالد يريد يتلافى الموضوع يمكن وكلي ..

ـ النقاب الي اجيتي بي لابسته بوكت المشكلة تلبسي باجر .. 

ـ شنو ؟ بإعتبارك شنو تلبسني نقاب ؟

ـ بإعتبارج احلى بي وهم ستر حتى ما يشوفوج هذولي 

ـ ما البسه 

ـ البسي و ضمي الخنصر والبنصر بالجف واسمعي الكلام اني مو حودي 

ـ ما البسه لو تطك براسك نخلة

ـ استغفر الله اني والعناد ويا النسوان شنو .. البسي الي يعجبج 

عافنه وراح ..

صحت عمو رباح كتله عمو رايدتك بشغلة ولو مريض بس شغلة صغيرة تجيبلي اياها 

عمو رباح : اي بنيتي اطلبي وادزلك خالد يجيبها ركض

ـ لا عمو اني ماريد خالد يجيبها اريد انتَ حصرا وماريد يشوفها

ـ ويلي ويلي شهالشغلة هاي .. 

خطية وهو راسه يوجعه راح جاب الي طلبته واجه بهالليل ..

اول شي عاتبت نفسي ليش عاندته البارحة بعدين كلت ميخالف خلي شخصيتي شوي قوية مو يفرض عليه سوالفه و آراءه وانوب يتدخل بشنو ألبس ..

صار الصبح هو ينتظرني بالحديقة وعمتي شوي مصحصحة ومسويتله ريوك .. 

نزلت من النوم جان يكلي .. 

نزلتج مال وحدة وراها حفلة مو مال وحدة تريد تطلك يلا فضيها يا سهومة..

ـ ع كيفك يمعود بس أشربلي استكان جاي والبس ماطول دقيقتين خبصتني .. 

شربت جاي ع السريع ورحت بدلت وكملت ونزلت لابسة نقاب كامل بيجي لونه 💔 خاص ب 

شافني خالد وجنت انتظر منه يعلق ع لبستي وظل ساكت .. 

ركبت بالسيارة وياه وكلي اكعدي بالكرسي الورة ميصير من كدام وياي زحمة اهلج يشوفوج هيج

فتحت الباب ونزلت كعدت ورا بس شنو اغلي غليان من خالد وكلت الله ماينلام بية البارحة لساني شطوله وشخصية وما البس بكيفك وبالاخير دزيت عمو يشتريلي نقاب كامل غير الاسود .. 

واصلا ما كلف نفسه وكلي مبارك او لبسه حلوة او نطق بحرف مثلا ليش بارحة عاندتي وهسة لبستي جنت انتظر منه سالفة تبرد كلبي وهو باررررد شافني وعادي عنده ولا كأنما لابسة نقاب .. 

تندمت لان لبسته بس شيفيد الندم حرك كلبي هالبارد .. 

تعصبت حيل جان اكله .. #وسام_الفراجي 

ـ خالد انتَ ليش بارد ؟

ـ رايحين نطلكج من ذمة زلمة يمكن مو وكت هالسؤال ..

ـ ليش تغيرت طريقة كلامك وياي هيج ؟

ـ ماتغيرت جاي ارد ع قدر السؤال سهومة ليش احسج تتحسسين زايد من كلامي

ـ انتَ جدي هواي حتى ماتضحك كلامك كوة اسحبه من حلكك

ـ سهومة ماحب الجدال خلي نكمل شغلنا ..

سديت حلكي وكلت ما احجي شي الا هو يحجي بعناده ..

وصلنا المحكمة ونزلت من السيارة ونزل خالد .. 

رفعت راسي اشوف المحكمة 

لكيت عباس واكف ورى ايناس وشافنه سوة .. 

                       الفصل الثامن من هنا

لقراءة باقي الفصول من هنا

تعديل المقال