رواية عروسة مريم
الفصل الاول1
بقلم محمد امام
العروسه
مشكلة عضو
انا يوم الجمعه اللي فاتت نزلت سوق الجمعه ببنتي الصغيره مريم ، مريم بنتي بالمناسبه عندها تلت سنين عشان اجبلها عصفورتين كوكتيل زي اللي شافتهم عند الجيران دخلت السوق وبعد اما مشيت شويه لقيت بياع واقف بعيد شويه عن الزحمه وشايل علي كتفو العاب اطفال وكنت بتفرج انا علي الحجات اللي في السوق فمدتهوش اهميه مع انه كان شكله غريب شويه كان لابس لبس مهرج بس شكل عينه يخوف وكمان ضخم جدا غير الشكل اللي اتعودت عليه للمهرجين اللي ببكونو في اغلب الاوقات رفيعين ومتوسطين الطول وسرحت شويه في الوان العصافير وفي تفاصيلها وببص ملقتش مريم واقفه جمبي قلبي وقع في رجلي في ساعتها وفضلت ادور علي البنت وانا بعيط واتوترت لحد اما لقيتها واقفه علي جمب كده لوحدها بتعيط اخدتها في حضني وبعد اما انتبهت لمريم لقيت في فأيدها عروسه شكلها غريب شويه قولتلها حبيبتي انتي جبتي دي منين قالت عمو اللي واقف هناك ده ادهالي بصيت مكان اما البنت شاورت لكن ملقتش حد واقف اعدت ادور عليه شمال ويمين لكن فص ملح وداب قولتلها مريم ياحبيبتي احنا مينفعش ناخد حاجه من حد ، ارمي العروسه دي وانا هجبلك واحده غيرها اما نروح لكن البنت رفضت بشده وفضلت تعيط وشبطت فيها جامد ودي كانت اول مره تكسر كلامي وصممت انها تاخدها وطول ما احنا مشيين فضلت ماسكاها في حضنها ومش عاوزه تسيبها العروسه كان شكلها غريب جدا متوسخه وعنيها شفافه وكمان في اثار دم علي رجلها وكانت عروسه من القطن رغم انها كان شكلها مش حلو لكن اضطريت اوافق علشان مريم متزعلش وكملنا مشوار السوق لحد اما لقيت عصفورتين شكلهم لذيذ اشترتهم بالقفص اللي كانو فيه ولما روحت فتحنا باب الشقه ودخلنا لقيت جوزي جه من الشغل سلم عليا وشال مريم باسها وقالها ايه ياحبيبي اللي فإيدك دى ردت مريم وقالت دي عروسه الراجل اللي في السوق ادهالي وقالي خديها واوعي ترميها وقالي كمان ان اسمها صوفيا كنت دخلت الاوضه عشان اغير هدومي دخل جوزي ورايا وقالي سلمى حمدلله علي
السلامه جبتو العصافير قولتلو اه وشكلهم جميل بص ازاي، بص جوزي علي العصافير وقالي ايه موضوع العروسه اللي في ايد مريم دي دي شكلها وحش اوي ومش نظيفه انتي ازاي تدفعي فلوس في حاجه زي كده قولتلو انا مدفعتش فيها حاجه قالي مدفعتيش فيها حاجه ازاي يعني قولتلو انا هحكيلك بس من غير شخط ولا غضب قال اتفضلي قولتلو علي اللي حصل قالي وانتي ازاي تسيبي البنت من ايدك افرضي كانت تاهت قولتلو الحمد لله هي متاهتش بس بقا موضوع العروسه دي أنا متضايقه منها ومش عارفه اخدها من ايدها متحاول تاخدها من ايدها ونرميها وانا هنزل اجيبلها واحده من اي محل تحت قالي ما هو انتي عارفه بنتك مش هتسيبها بسهوله قولتلو بس حاول كده قالي طب انا هحاول وخرجت انا حسام جوزي عشان يحاول يقنعها لكننا ملقناش البنت في الصاله فضلنا ندور عليها في الشقه وننادي عليها لكن مفيش فايده