رواية سمرة
الفصل التاسع 9
بقلم وسام الفراجي
جان انزل والزم صينية بيها عصاير واخذها وافوت عليهم ..
فتت بالفستان والحذاء والمكياج الهادئ وانصدموا الكل بية وامي وايناس ملتهيات يضحكن ويا رشا جان يشوفني وهنا صارت الصدمة ..
الكل انصدم من طبيت العائلة كلها مو من جمالي لا احجيلكم الصراحة غير لا جمال ولا بطيخ ..
لكن انصدم منيلي هاللبسة الهادئة ومنين جبت الحذاء وشلون رتبت نفسي وهن مايدرن ..
طبيت صرت اقدملهن وهن يباوعن عليه ..
ويبتسمن الي كاعدات من الغرابة يعني صار خوش وكت بالحنة منين اني مستغربين الناس الي ماتعرفني لكن الجيران يعرفوني اكيد .
مرت جيرانة كالتلي فدوة لهالسمار مدري تطيب خاطر مدري صحيح ..
بس اكو عجوز من نطيتها العصير كالت مكدر والله يضرني بس صلاوات شلون محافظة ع شعرج الطويل هيج الله يستر عليج بنيتي ..
استحيت وكملت فريتهم كلهم .. باوعت لأمي تأشرلي بحاجبها اطلعي وتفتح بعيونها يعني مو عاجبها الوضع وتريدني اطلع ..
كملت توزيع وطبيت بنصهن هلهلت بصوت عالي بس ماركصت لان اصلا ما اعرف ..
ظليت شوي و طلعت ..
جان تلحكني امي وتكلي ..
ـ منين شاحذة الفستان ؟
ـ من ملابسي القديمة
ـ هو ملابسج كلها من البالة عشيرتج كلها ماعدها هيج فستان
ـ يمة هسة عندي هالفستان يعني جريمة البس شي حلو
ـ لتطبين بعد اصعدي فوك واني اعلمج على الي سويتي
كملت الحنة ..
ومن اجيت اشيل العصير الفارغ و صحون قطع الكيك السفري وانظف المكان شوي من الهوسة وحدة من النسوان هيج تقريبا عمرها اربعين اكثر شوي
كالتلي .. انتِ متزوجة ؟ كتلها لا خالة كالت صلاوات سبعة ونظيفة اني خالتج ام مؤيد ساكنة يم المدرسة الفلانية جيران احنه والمدرسة حايط ع حايط..
كتلها هلا بيج خالة كل الهلا ..
ضحكتلها وسحبت روحي عنها لان امي انتبهت علينه ..
كملت الحنة وراحن كل النسوان وصعدت ابدل لكيت امي لاحكتني وبيدها سجـ/ينة !
بصراحة صارت عندي ردة فعل وخفت
ـ ها يمة شكو شنو هذا البيدج !
- بدلي فستانج دقيقتين وجاية
بدلت بس كلبي يطب شبيها شنو تطور التعذيب عدها
ـ انطيني فستاج
ـ هاج بس ليش ؟
ـ انطيني اكلج مرة ثانية اسمعي كلامي
لزمته و شككته كله بالسجـ/ ينة كطعته تكطع ههه
بصراحة غالي عليه شكد ما تتوقعون يعني شي مو طبيعي بحيث ماحجيت حرف خليتها ترعطه رعط وبعدين من راحت بجيت عليه بجي مو طبيعي بس بيني وبين نفسي ..
واخذت قطعة منه ضميته يمي والباقي شمرته حتى امي تشوفه مشكك وشمرته بالحاوية ..
عباس من ينزل من شغله يخلصها ويا جماعته دايح لتالي الليل مانحس بي الا شايل علاكته بيده ورايح لغرفته بدون لا حس ولا نس
يومين بالضبط ورا الحنة الدنيا عصر اندك الباب وامي جانت قريبة عالباب .. فتحت الباب اسمع صوت امي تسلم وهلا بيج وصاحتني امي سمممررة سوينا جاي ..
رحت سويت جاي كالعادة ..
ورا شوي طلعت امي للمطبخ كالتلي عوفي الجاي ولتطبين هنا خلي منى تطبب الجاي تفاجئت اول مرة تسوي هيج شنو الي تغير..
طبت منى ورا شوي اجت تمشي سريع شاورتني كالتلي من حطيت الجاي واخذته اسمعها تكول لامي اريدها لإبني بنتج السمراوية
اني انصدمت ممتوقعة احد يباوعلي من كدما يتنمرون عليه اهلي يعني محسبة حساب محد يباوع بوجهي ..
وكذلك خفت لان عندي مشاعر لخالد مو طبيعية وامنية من امنياتي يكون خالد من نصيبي ليش اجذب يعني هيج مفكرة ولو مستبعدة خالد يحبني ..
كلت الها اشش ما اتزوج اني خلي الموضوع بيناتنه كأنما ما ادري ..
راحت منى وصحتها كلت الها اوكفي اوكفي هسة فهمت ليش ماخلتني اني اجيب الجاي حتى متشوفني وماتريد احد يتقدملي
كالت منى ما ادري والله رايحة هسة ..
امي شافتني وانتظرتها تفتح الموضوع ومافتحته ابد ..
بعدين عرفت هي ماتريدني اعرف تقدملي احد وتريدني اظل اخدمها وتريد تزوج البنات قبلي اذا جان العريس زين واذا بي عاهة او شي مايعجبها تشمره عليه ..
بعد ساعة تقريبا اجت منى وكالتلي اريد اكلج شي بس لا تزعلين امانة ..
كتلها احجي ..
كالت امي كالت الي اكعدي هنا حتى تشوفج ام مؤيد بلكي تشوفج احلى وتغير رايها وتتقدملج انتِ ..
واني والله ما ادري يعني مفاجئة صارت ..
بس بعدين كايلة الها اريد السمراوية حبيتها هي وتراسيمها وامي كالت مانزوجها قبل خواتها الاكبر منها ..
ضحكت اني وكلت رب ضارة نافعة اني ماريد هالنصيب
كالت منى خوش ناس والولد زين ومقتدر كلت الها ماريد
شلون افهمهم انتظر خالد وخالد مايحس بية ..
كوة متحملة تعامل امي ..
كلت احسن حل لازم اوصل خبر لعمو رباح من يجي يزور ابوية انو اجوني خطابة اكيد راح يحجي لخالد وخالد اذا بداخله شي راح يبين ..
وصحيح بالليل اجه وصاحني وكعدت وياهم شوي وابوي متعوب كلش بعدين حجيت لعمو السالفة بيناتنه وفرحلي هواي وكال لازم ابشر عمتج وخالد الصبح وهنا كلت هيج نجحت الخطة لان اذا بكلبه شي عليه راح يتصرف
كلت لعمو ليش الصبح خوب من ترجع ..
كلي لان هسة من اطلع منكم رايح لجماعتي ..
عرفت رايح لمكانهم ذاك ونفس العمايل ذيج وكتله عمو ماتترك هالشغلة ..
كلي خليها بالكلب ترا امج من سنين اني وياها متخاوين
كتله ليش عمو كال سالفة طويلة يجي يوم تنحجي ..
ابوية كال شبيكم جاي تخططون عليه شي
ضحك عمو رباح وكال بنتك الاحبها جاي تدلع ع عمها
تشاقينه شوي وصاحتني امي ..
ـ حتلو عمج هذا اثكلي شوي خليج رزينة
ـ ليش شسويت يمة ؟
ـ اثكلي حطيلج حجارتين بجيبج تثكلج
ـ امنية حياتي اضحكلي شوي وما تجين تخربيها
ـ اسكتي لج امشي اغسلي هدومي وهدوم البنات عالسريعز
ـ هههه كلما احجيلي كلمتين عقوبتي اغسل هدوم البنات يلا رايحة رايحة بس اريد اسألج سؤال شعدها العجوز الي اجت العصر ؟
ـ اجت تشوف منى وكلت الها ماكو نصيب
ـ اهاا تمام
عفتها ورحت اغسل ملابسهن بس افكر هوااااي يعني شنو يضرها اذا تزوجت ولد ابن اوادم ؟ زين و اذا تزوجت قبل البنات ؟ ليش هيج متحسسة زايد بالموضوع ما اعرف ليش هيج الموضوع عدها جبير جدّا ..
ساعة 6 الصبح ابوية تخربط وصارت حالته مو زينة ..
امي كعدتني كومي وياي نروح للمستشفى كلت الها عادي اخذي وحدة من البنات وياي كالت نايمات
واليوم خطيب رشا يجي لرشا زيارة ولازم يظلن بالبيت
ضحكت ع تفكيرها مو ماكلة هم ابوية بكد خطيب رشا ..
كمت بدلت عالسريع واخذت ابوية ورحت اني وامي عالمستشفى المركزية و وشدوله مغذيات وحطوله اوكسجين وكالوا ميطلع اليوم يبات عدنا ..
جنت اتمنى اروح للمستشفى الي رحت عليها سابقا واشوف دكتورة ريم وابوسها بين عيونها بس صارت بعد لان هاي المركزية اضبط واكبر واحسن فلازم نروحلها ..
تقريبا الساعة 11 جان امي تكول ابوج زين ع الاوكسجين الي انطوه اياه وهسة وضعه مستقر راح اروح للبيت محد بي و انتِ ظلي هنا ويا ابوج مفهوم ؟
تمام يمة ..
هو متمدد فدوة ونذر اروحله واني بسده كاعدة ..
صارت الساعة فوك الـ 1 الظهر وجاي افكر شلون هيج شلون ممكن اوصل فكرة لخالد اخاف اكله ويكلب عليه ويفكر غلط بية
واني افكر بي طب خالد للغرفة الي بيها ابوية باوعتله وصفنت شجابك كلي وصلني الخبر ويا ابن جيرانكم واجهته بالسوك وكلي ترا عمك شفته ماخذينه عالمستشفى
اجيت للبيت اكعد ابوي نايم ميكعد جان سهران الليل كله الله يسامحه ويهديه ..
اجيت جبت غداكم سفري بس جنت محسبت وياج امج والبنات!
- الخطيب اهم!
- الله يسعدهم خطية رشا جبيرة وحقها تفرح القطار شبه تعداها
- اي الله يزوج كل محبين بالحلال
- اميين
- ايمت تزوج مو طولتها ؟
ـ خلي اجيب الغدة هسة يبرد
ـ تمام
فشلت وندمت سألته لان تهرب من السؤال ..
ومن كال ابوية بعده نايم عرفته بعده ما يدري اجوني خطابة حتلو امي رفضتهم بس ردت اشوف ردة فعله ..
صرت افكر اكله لو لا اكله لو لا ..
اجه جاب غدة وهواي مال 4 نفرات كتله شدعوة كال عبالي اهلج وياج ..
كلي راح اكعد يم عمي و انتِ روحي تغدي ع راحتج وتعالي ..
اكلت شوي ورجعتله لان مالي نفس منا ابوية ومنا خالد شوي شوي يثبتلي هو باله مو يمي ابد وهالحقيقة مؤمنة بيها بس كلبي النذل مجاي يقتنع
كلب الانسان مرات هو يذله ويسحله سحل ..
جان يكلي ..
ـ شنو بطن عصفور شبعتي بسرعة!
ـ الحمد لله الله يزيدكم ويكثر خيركم
ـ بيج شي شو احس ثكل وجهج عليه
ـ ليش يثكل ماكو شي يستاهل اثكل وجهي
ـ ان شاء الله دومج زينة
دمي يغلي ع خالد اريده اكله اكل شهالبرود الي بي يربي
كعدت شوي واني مترددة اكله او لا
كتله ...
ـ خالد !
- ها
ـ البارحة اجوني خطابة
ـ ايي! بيها الخير
ـ الخير يصيبك! شنو ماعندك فضول تعرف منو وشنو موقفي
ـ منو وشنو كلتيلهم
ـ بيت ابو مؤيد لابنهم مؤيد
ـ اها خوش ولد وافقتي ؟
ـ بعدني افكر
ـ تمام فكري
غثني غثثثثني غثثثني باااارد اي ردة فعل ماعنده ولا مفكر بية اصلا ولا بباله ليش لازكة عليه اني ما ادري احسن شي بعد ما افتح الموضوع ..
سكتت رحت كعدت يم ابوية نايم ..
جان يجي يوكف يمي ويكلي
صدك تحجين لو تشاقين ع هالقصة ؟
كتله والله مو مال شقة هالقصة كلي جيد فكري زين هذا زواج عمر مو يوم ويومين وعافني وراح ..
ظليت ويا بابا للعصر ..
اجه عمو رباح يزور بابا وكالوله زين ما شاء الله وهسة عادي تكدرون تطلعوه بس يكمل المغذي بالبيت كلهم ميخالف
اخذني واخذ ابوية بالسيارة ووصلنا لبيتنا فوت بابا ونومه وشدله مغذي وراح
وامي والبنات مالهم صوت .. عمو كال اترخص عندي شغيلات عود اكملهن واجي. ...
دورت الاهل لكيتهن وحدة تباوع للثانية ومبولزات ووحدة تعاتب الثانية ليش حجيتي هالحجاية وراح تخربين بيتج و رشا تكول لماما الا هالشرط يروح هو يجي الف مكانه ..
طبيت اني جان تكول ايناس هاي هي الفكر من طبت للحنة فكرتها كلها كتلها شبيج ايناس ؟
طلعت جاي الولد و رشا شارطة متزف الا ببيت وحدها ماتعيش ويا اهله والولد رافض وكايللهم حدزلكم امي والنسوان ونتفاصل اني ماعوف اهلي ..
امي مو راضية ع تصرفات رشا
ورشا قافلة الا بيت وحدها
والولد بعد مايريدها وانسحب وتفاصلوا وكلمن اخذ حقه وانفسخوا
وامي تكلي كلها من وراج انتِ فكر بنت فكر حطيتي عينج ع رشا الما خربتيها للشغلة ..
مارديت لان بكل الاحوال اني براسي المشكلة ..
صار الليل و سويتلهم عشا وشديت المغذي لابوية وتعشينا وكملنا وغسلت مواعين جان يندك الباب ..
امي صاحتني افتح الباب ..
رحت افتحه ودشداشتي مبللة مي من المواعين ومخبوصة
فتحته ولكيت عمو رباح وخالد لابسين دشاديش بيض ومرتبين عالاخير وكاشخين واجوا
بصراحة عسى ماغير خالد يلبس دشداشة ذاك الزلمة الرزن وتلوكله وطالع بيها يخبل ..
سلموا عليه ورديت واني بالي عند خالد شلون حلوة عليه الدشداشة ..
طبوا ع ابوية وسلموا عليه وكعدوا بعدين عمو رباح كلي صيحي امج ..
صحت امي وجانت ماعاجبها تجي بس ابوي سمع عمو يريدها واجت ..
اجت رشا ومنى سلمن ع عمو رباح ..
جان يكول عمو رباح عندك العافية ابو رشا ماتشوف شر ان شاء الله اجينه نسلم عليك ونشوفك والله ونشوف البنات ماعندي شي ثاني ..
جان يكول خالد من رخصة ابوية كلامه ع راسي بس اني عندي شي ثاني ..
كالت امي شنو الشي
كال الكل يسمع وكلكم ع راسي ولوما احترمكم واعرف عمي ابو رشا شنو ما راح احجي هالحجاية ..
وهالشي ظامه بصدري ما طلعته وحجيته لنفسي ابد ومشيت ع جملة "اقضوا حوائجكم بالكتمان"
ابوي كاعد وعمي ابو رشا يسمع وعمتي تسمعين وهاي البنات
اني رايد سهام ع سنة الله ورسوله ! .