رواية حب والم الفصل الخامس عشر15والسادس عشر16بقلم الكاتبة المجهولة
بعد ما الفرح خلص مسك آدم ايد فريده عشان يطلعوا الفيلا بس اصحابها واصحابه قعدوا يقولوا بصوت عالي:
شيلها.. شيلها..شيلها
وقبل ما فريده تقول لأ كان آدم شالها بين ايده وابتدى يطلع بيها السلالم وهي كانت هتموت من الكسوف و فتح آدم الباب وهو شايلها ودخلوا جوه وقفل الباب برجله وفضل باصصلها ونزلها براحه وقالها:
آدم:كان شكلك زي القمر
فريده:شكرا
آدم:انا هغير في الليفنج خدي راحتك
و راح آدم يقعد في الليفنج وفريده فضلت قاعده عالسرير مش عارفه تعمل ايه وكان الفستان كبير وكله فيونكات شرايط من ورا وهي مش عارفه تفكه لوحدها وات ربع ساعه ودخل آدم عليها عشان ياخد هدومه من الدولاب فلقيها لسه بالفستان فقالها:
آدم:مغيرتيش ليه يا فريده؟
فريده:اصل ……..
آدم:انتي تعبانه؟
فريده:لأ … بس… محتاجه حد يساعدني
آدم:قولي محتاجه ايه؟
فريده وهي هتموت من الكسوف : اصلي مش عارفه افك الفستان من ورا
آدم:بس كده تعالي افكهولك
و وقفت فريده وقرب منها آدم وبعد الطرحه وحطت ايديها على صدر الفستان و آدم لقي الشرايط لغاية آخر ظهرها فوشه احمر وابتدى يفك الشرايط وفريده كانت حاسه بايديه الدافيه على ظهرها و لما خلص قال بصوت متغير:
آدم:انا فكيته كله
فريده وصوتها بيترعش:شكرا
وخرج آدم وخد بيجامته معاه وساب فريده لوحدها ولما اتأكدت انه خرج شالت ايديها والفستان وقع على الارض فدخلت الحمام وفضلت تشيل الميك اب و تفك شعرها وخرجت فتحت الدولاب ولبست بيجاما ساتان بكم بيضا وفردت شعرها و علقت الفستان ودخلت عالسرير واتغطت لغاية دقنها وفضلت تفكر ليه ميكنش ده يوم فرحهم الحقيقي وفضلت صاحيه كتير بس نامت في الآخر قبل ما آدم يجي وبعد ساعه دخل آدم الاوضه لقي النور مطفي ما عدا الاباجورات ولقي فريده نايمه زي الملايكه وشعرها مفرود عالمخده وقرب من السرير ودخل وقعد يبصلها وقعد يدعي ربنا انها تحبه وتنسى مراد وهو باصصلها لقاها بتتحرك ولقي الدموع بتنزل من عينيها وهي نايمه فقرب منها وطبطب عليها راحت لفت ودخلت في حضنه ونامت وهو حضنها ونام , فريده كانت بتحلم انها في حضن آدم وحست انها هتنام نوم عميق لأول مره من مده طويله………………………….
فريده حست ان في تقل عليها ففتحت عينيها بالراحه لقيت آدم نايم و دراعه حواليها فاتكسفت ومعرفتش تبعد دراعه فعملت نفسها نايمهبس كانت خايفه ومكسوف وابتدى آدم يتحرك وراح حضن فريده جامد وفريده كتمت نفسها خالص وبعدين حست ان آدم فتح عينيه لانه بعد دراعه عنها بسرعه وقام من السرير وراح الحمام وفريده اخيرا عرفت تتنفس وفضلت مغمضه عينيها وخرج آدم من الحمام ففريده فتحت عينيها لقيته بيبصلها وهو لابس البرنس:
آدم:صباح الخير
فريده:صباح الخير
آدم:انا هخليهم يطلعوا الفطار تحبي تشربي ايه؟
فريده:نيسكافيه
آدم:كلم الشغاله في المطبخ وطلب الفطار
وآدم بيتكلم قامت فريده دخلت الحمام وخدت شاور وخرجت لابسه البرنس ولافه شعرها بفوطه كبيره وقعدت على كرسي التسريحه وابتدت تنشف شعرها الطويل وجه آدم من وراها :
آدم:ممكن اسرحهولك
فريده استغربت :بتعرف؟
آدم وهو بيضحك:هتعلم
ومسك آدم المشط وابتدى يسرح شعرها وهي غمضت ايديها وسرحت بعيد………….
آدم:شعرك جميل اوي
فريده:بس نفسي اقصره
آدم:اوعي تعملي كده ابدا
فريده:ليه ما هو هيطول تاني؟
آدم:اوعديني عمرك ما هتقصيه
فريده:طيب حاضر اوعدك
و خبط الباب وخد آدم العربيه اللي عليها الفطارودخلها و راح لبس تيشيرت ابيض وشورت كاروهات اسود في ابيض وفريده لبست فستان قصير لونه بينك كات وسابت شعرها مفرود وقعدوا يفطروا مع بعض:
آدم:انا اخدت اجازه اسبوع تحبي تسافري فين؟
فريده:انت عمرك ما اخدت اجازه؟
آدم بسخريه :مش انا عريس ولا ايه؟
فريده وشها احمر:آه صحيح
آدم:ايه رأيك نسافر فرنسا؟
فريده:اوكيه
آدم:خلاص هحجز بكره الصبح على اول طياره
فريده:طب و طنط؟
آدم:اكيد ماما هتفرح لما نسافر اسبوع عسل ولا ايه؟
فريده اتكسفت ومردتش عليه
بعد ما خلصوا فطار الباب خبط فتح آدم كانت سلوى:
سلوى:صباح الخير يا حبيبي مبروك , الف مبروك يا فريده
آدم:الله يبارك فيكي
فريده:شكرا يا طنط
سلوى:انا جبتلك هدية الجواز
كان مع سلوى علبه لونها اسود فيها خاتم سوليتير شيك اوي وقدمته لفريده
فريده:ده حلو اوي يا طنط متشكره
سلوى:ده كان هدية بابا آدم يوم فرحي
فريده:بس ده ذكرى من انكل الله يرحمه خليه مع حضرتك
سلوى:وانا عندي اعز منك يا حببتي
وحضنوا بعض , وبعدين آدم قال لمامته انهم هيسافروا فرنسا اسبوع وهي اتبسطت جدا ونزلت سلوى وسابتهم لوحدهم تاني………..
آدم:ايه رأيك ننزل البيسين سوا
فريده:فكره حلوه
آدم:طيب روحي غيري وانا هستناكي تحت
وخرج آدم وساب فريده تغير هدومها ونزل هو غير عند البيسين ولبس مايوه لونه اصفر فوق الركبه ونزل عقبال ما فريده تنزل وبعد ربع ساعه بص آدم لقي فريده جايه بس مكنش مصدق عينيه……………
-------------------------------------------------------------------
قصة حب وألم
الحلقة السادسة عشر
آدم بص لقي فريده لابسه مايوه بيكيني احمر وعليه كاش مايوه لونه اسود جميل وقربت من البيسين وقلعت الكاش مايوه ونزلت المايه
وراحت تعوم جنب آدم اللي ملقيش حاجه يقولها و ابتدوا يتسابقوا وهما بيضحكوا وفريده كانت مصره تكسبه و هو سابها تسابقه شويه وبعدين سبقها ففريده حاولت تكسبه بس جالها شد عضلي و آدم افتكرها بتهزر بس لقيها بتحاول تخرج من المايه ومش عارفه راح آدم نده عليها و رجعلها بسرعه و راح شالها وخرجها بره الميه وقعدها على الشيزلونج وقعد يدلك رجليها وعملها تمرين عشان الشد العضلي يروح وفضل جنبها لغاية ما بقت كويسه :
آدم:ها احسن دلوقتي
فريده وهي بتكح:احسن الحمد لله
آدم:مكنش فيه داعي تعومي بسرعه
فريده:كان نفسي اسبقك
آدم:خلاص المره اللي جايه هخليكي تسبقيني
فريده ضحكت وهو ضحك كمان وبعدين بصوا لبعض وسكتوا وراح آدم قام فجأه وقالها يلا عشان نطلع نغير هدومنا عشان متبرديش
قامت فريده وهي مش عارفه مالها وطلعوا سوا دخل آدم الحمام الاول خد شاور ولبس شورت نبيتي وتيشيرت بيج وخرج وفضل يستنى في الليفنج لغاية ما فريده تخلص, دخلت فريده الحمام وملت البانيو بالبابل باث و قعدت في المايه وغمضت عينيها وحست بدموع سخنه بتنزل من عينيها من غير ما تعرف ايه آخرت اللي بيحصلها ده وغمضت عينيها ونامت…………………….
حس آدم ان فريده اتأخرت فالحمام فراح يطمن عليها فخبط مردتش عليه فقلق عليها وخبط جامد بس مسمعتش وراح فتح الباب بكتفه لقي فريده نايمه فراح صحاها وهو بيزعق:
آدم:ايه يا فريده؟ بقالي كتير بخبط
فريده اتخضت وقالت:في ايه يا آدم؟
آدم:انتي كان ممكن تغرقي لو كنتي لوحدك
فريده ابتدت تعيط بصوت عالي
آدم:متعيطيش
فريده كملت عياط
آدم:عشان خاطري خلاص بقى
فريده:طب .. ممكن .. تطلع بره
آدم:طيب انا هستناكي بره
وخرج آدم وطلعت فريده من البانيو ولبست البرنس ونشفت شعرها وخرجت لقيت آدم بيقولها:
آدم:يلا عشان نخرج نتغدى بره
فريده:مش عايزه اخرج
آدم :عشان خاطري
فريده:لا
آدم:واهون عليكي
فريده ضحكت وقالت:لا متهنش عليه
آدم وهو بيضحك:طيب يلا البسي
وراح آدم يستناها في الليفنج عقبال ما تلبس……………