رواية ذئاب لا تعرف الحب الجزء الثاني2الفصل التاسع والاربعون49والخمسون50بقلم نجمه براقه
بجاد
خدتها من البيت واتجهنا لناحية البحر علشان نقضي الساعة اللي اتفقنا عليها ف قالت في وسط الكلام وهي بتوريني السلسلة اللي جبتهالها
_ إيه رايك
_ زادت حلاوة لما لبستيها
وقالت بعد ما فتحتها
_ حلوين قوي الصورتين دول ، عجبتني، وحبيتها ، و مش هقلعها نهائي
_ خليها عشان تفضلي فكراني
_ بيها من غيرها انت متتنسيش
_ وبعدين عدي يومك احنا في الشارع
_ So?
_ سو ايه بقولك احنا في الشارع
_ والمعني
_ لما نكون لوحدنا هقولك
_ هههههه
قولت بإبتسامة
_ كمان بتضحكي ، ياه علي تعب الاعصاب ، انتي عايزة تجننيني
_ هههههههه ليه
_ مش عارف ليه.. انا هقدر اصبر ازاي لسنة قدام ضحكتك ومعاكستك وصلحك ليه ، انتي قلبك هيجيبك تصبري لسنة
_ ولا لدقيقة بس نعمل ايه مضطرين
_ مش مضطرين ولا حاجه انتي اللي محبكاها
_ هرجع اقولك نفس الكلام تاني
_ لا خلاص .. يلا ربنا يعجل وتنتهي بسرعة وامري لله
كملت بعد ما عيني وقعت علي السلسلة المفتوحة
_ السلسلة مفتوحة.. خلي بالك
_ بتتفتح لوحدها
_ لا خلي بالك صورتك فيها
قالت وهي بتقفلها
_ حاضر
_ طيب فكرتيني بحاجة عاوز اقولهالك قبل ما نبدء اختلاط بناس
_ إيه
_ هو طلب وليكي الحرية في اي تصرف انا عارف انك مش بتغلطي
_ قول عاوز ايه
_ عاوزك تحاولي تقللي دايرة اصدقائك وزمايلك في الجامعة
_ ليه
_ الاختلاط الزيادة مش حلو مبحبهوش بيجيب المشاكل والصداع
_ انا كدة كدة مليش في الاختلاط من زمان.. ف اوكي ، وايه تاني
_ و مهما حصل ولو شوفتي ولد او معيد ان شاءلله عميد الجامعه بيموت قدامك ملكيش دعوة بيه و وشك ميتشافش
_ هههههه ليه
_ كدة
_ اوكي بس لية
_ انتي ناسية عملتي فيه ايه لما شوفتك اول مره
_ مش واخده بالي عملت ايه
_ لما نكون لوحدنا هقولك
ضحكت وقالت
_ مش هنكون لوحدنا تاني أبداً اللي حصل قبل كده مش هيتكرر قبل الجواز
_ ومين اللي حكم بكدة
_ انا
_ انتي؟
_ اه انا
_ اوكي نشوف الكلام ده بعدين.. يلا نمشي هنتأخر
#مليكة
روحت الجامعة مخصوص علشان اشوف البنات واستعيد ذكرياتي معاهم وبعد وقت جت هاجر ف سيبت اللي كنت واقفة معاهم وروحتلها وقولت
_ هاجر!!!
_ اهلت بالواااطية اللي نسيتني لما لقت غيري
قولت بضحك
_ ولا مليون يشغلوا مكانك.. كل سنه وانتي طيبة ياروحي
_ وانتي طيبة اخر سنة ليكي اهو وهترتاحي
قولت وانا بخمس في وشها
_ الله واكبر
_ بتخمسي في وشي ده انا اللي اخمس في وشك لسة قاعدة شويه انما انتي اللي هتفارقينا وهتتحرمي من العيشة الحلوة دي
_ اه والله انا بصبر نفسي طول الوقت
_ طيب ايه موركيش محاضرات
_ لا لسة شويه انا جاية بدري استعيد الذكريات ويمكن محضرش النهاردة
_ وانا بفكر محضرش بس بابا هيعلقني هو وبجاد
_ الله هو فين صحيح
_ مش عارفة شكله جوه
قولت بعد ما شوفته نازل من العربيه هو وفاطمة
_ اوعاااا وشك جايب فاطمة معاه .. هههههههه احنا نوقف ونتفرج خدي ساتر بس
_ ليه
_ بجاد جاي مع فاطمة مرااااته الجامعة كلها هتفرمه النهاردة
_ هههههههه صح ده هي هتدرس معانا ده انا نسيت .. يلا خلينا نتفرج
وقفنا نبص عليهم وعلي طلاب الجامعة وهما متتبعينه بعنيهم هو وفاطمة لغيت ما وصلوا عندنا وقال
_ هي ايه الحكاية بيبصولنا كده ليه
قالت هاجر
_ يعني مش عارف.. حضرتك متجوز منتقبة يعني الحفلة عليك السنه دي
كملت موجهة كلامها لفاطمة
_ اصل بجاد معروف بكره المنتقبات وانتقاده ليهم ف تخيلي اللي هيحصل
قالت بضحك
_ واخده بالي.. ايه رأيك منقولش ان في بينا حاجه
_ لا بقا هنقول..
كمل بصوت مسموع
_ يلا يا حبيبتي هسيبك مع البنات لما تخلصي رنيلي
قولت بهمس
_ كياد
ردت عليه بنفس النبرة وقالت
_ يتفاتله بلدين وحارة ابن عمي وعرفاه هههههههه
قال
_ بتتدودو علي ايه انتي وهي
قولت
_ مواضيع بنات يا دكتور اتفضل
كمل وهو بيمرر عينه علي الطلاب
_ خلوا بالكم منها شكلهم هيكلوها... وانتي لو في حاجة رنيلي
_ متشغلش بالك
قال بزهق
_ لا هشغل السلسلة اتفتح تاني خبيها
قالت وهي بتخبيها في هدومها
_ ههههه انت اللي جايبها بتتفتح اعملك ايه
_ نغيرها او بلاش منها
_ لا اديني مخبياها
قال بإبتسامة
_ I love you
قالت هاجر بقرف
_ اااي لاف يوووو... الله يرحمهولك
قال بقرف
_ الله ياخدك.. باي يا بطتي
_ بطتك... كاك كاك كاك
_ هاهاها زريفة زريفة
_ هاهاها لتيف لتيف... امشي
_ ماشي... بطة متتعامليش مع البنت دي.. يلا اتاخرت
مشي وفجأه اتجمعوا مجموعة من البنات يتعرفوا عليها وهي كان كلامها قليل جداً وبسرعة نهت الكلام معاهم وقالتلنا يلا وبصدفة عرفت ان هي في نفس الكلية بتاعتي وده خلاني مبسوطه قوي ولما روحت وقولت لماما اتعصبت وقالت
_ تاني هتشبكينا مع العيلة دي انتي عاوزة تجننيني
_ يا ماما البنت كويسة ومحترمه انتي خايفة ليه
_ من قلت المحترمين رايحة لدول انتي عاوزة تعملي فيه ايه عايزة تموتيني ناقصة عمر ، دول مجرمين
_ كلامك ده بناء علي اي هو انتي تعرفيهم
_ مش محتاجة اعرفهم كفاية عرفت عاداتهم الهباب.. جوز خالتك حكالي بلاوي عن حيات الناس دي
_ وهو انكل احمد يعرفهم
_ يعرف اصحاب العادات دي مش هما
قولت بعد ما افتكرت كلام ابو فاطمة
_ طيب وهو يعرف اصحاب العادات دي منين.. علي فكرة ابو فاطمة يعرفه ، لما روحنا عرفه من شبه ايسل ، أكيد يعرفهم معرفه شخصية
_ هو احنا في معرفته الشخصيه دلوقتي ولا في عاداتهم
_ يا ماما انا برد علي نقطة ان انكل احمد يعرفهم مش أكتر وبعدين لو انتي مش مرتاحة تقدري تيجي معايا اعرفك عليهم والله هتعرفي اني كان عندي حق وهتحبيهم
_ مش عاوزه اعرف حد ، اديني بحذرك بعد كده هروح اشتمهم في بيتهم
_ يا ماما حرام عليكي تشتمي إيه.. خلاص ياماما مش رايحة تاني بس فاطمة معايا في الكلية اقوللهم خرجوها دي ماما مش عاوزاني اقعد معاها
_ الكلية ليها ظروفها بس مفيش سبب يوديكي بيوتهم
_ حاضر يا ماما مش رايحة .. اديني قاعده
قولتها ودخلت اوضتي وانا هطق من الغيظ وكنت بفكر احظر جويرية بس بعدين تراجعت وبعد شويه وصلني رساله من بدر تفاجأت بيها مكنتش عارفه ايه السبب اللي مخلية يبعتلي تاني ف فتحتها لقيته بيقولي
_ مش من عادتي اعتذر لحد بس حسيت اني كنت رخم معاكي اخر مره ، ف متزعليش
_ قصدك علي ايه بالظبط ما انت كنت رخم طول الوقت اخر مره
_ لما جيبت سيرة باباكي واخواتك وقولتلك مفيش حد يقولك رايحه فين وجاية منين وسيبينك علي حل شعرك وكدة يعني
_ انت كده بتعتذر ؟
_ اه بس بفكرك بعتذر عن ايه بالظبط علشان متتلخبطيش
_ لا عادي مزعلتش وانا عارفه انك اهبل بتتكلم وخلاص
_ انا أهبل؟
_ اه طبعاً هو في حد عاقل يقول اللي قولته لازم يكون متخلف عشان يقول كدة
_ متشكرين ، انا الغلطان اني عبرتك
_ ياخي ياريتك ما عبرتني وسيبتني اتفلق
_خلاص اتفلقي احنا فيها
_ فلقة لما تفلق نافوخك ، و ارتاح مش هتشوفني تاني
_ ليه هتموتي
_ ان شاءلله انت ، لا مش هموت ، بس من نبرك ماما حذرتني اروح عندكم تاني
_ ليه حد قالها ان احنا فاتحين كبارية
_ ما انا بقولك من نبرك.. لما رجعت من عندك لقيتها في وشي ومن غير مقدمات حلفت ما اروح عندكم تاني قولت يا ساتر يارب ده اية العين الوحشه اللي رشقت في حياتنا دي ف افتكرتك
_ هههههههه امك بتفهم... ربنا يباركلها هتريحنا من شوفتك
_ عيدك انت لما متشوفنيش
_ لا عادي علي فكره انا بهزر معاكي مش أكتر وانتي مش بتيجي عندنا اصلا
_ ده هزار ده ، والله انت لسانك بيحدف دبش
_ ما خلاص يا حجة هتظيطي فيها عرفنا اني دبش.. بس ليه بجد امك منعتك تيجي
_ الصراحه الصراحه
_ ايوه
_ من وقت ما سمعت عن عاداتكم وحياتكم اللي كانت في الصعيد وهي خايفه عليه منكم
_ ليه بنعض ولا بنمشي نقتل في الناس
_ اه هي متخيلة كدة
_ طيب ما تجيبيها وتيجي تتعرف علينا علشان تطمن وتعرف ان احنا ناس أليفة مبنعضش
_ انت بتجمع نفسك معاهم ليه.. انت مش اليف ولا شوفته
_انتي هتلبخي ، عنك ما تيجي
_ هنيجي الجنة ياخيي
_ ايوه احنا النار متجيش يا ستي.. امشي ومتبعتيش تاني
_ انت اللي بعت علي فكرة
_ متبقيش تردي
استلمت الرساله ومردتش ف قالي
_ مبترديش ليه؟ عميتي ولا صوابعك اتكسرت
عملت اضحكني ومردتش ف قال
_ ههههه ماشي باي
قفل وانا بقيت قاعدة بفكر هو طبيعي كدة ولا اهبل
#زيد
_ بتكلم مين
قالهالي بشر وانا بنهي مكالمة مع حالة جديدة ف سيبت التليفون وقولت
_ شغل.. جاي ليه في حاجه
_ جاي اطمن عليك
_ تسلم
_ عامله ايه دلوقتي
_ تمام
_ نمت كويس
_ اه نمت كويس يا بشر.. ليه
_ مش عارف بس حسيت انه مش هيجيلك نوم
_ لا خالص نمت زي القتيل
_ طيب والله كويس انك نمت
قولت بزهق
_ عاوز ايه يعني
_ هههه بطمن عليك اصلك مكنتش مركز وانت بتفطر معانا
_ لا انا تمام
_ طيب كلمتها ولا لا
_ تؤ
_ ليه
_ مالك يابشر قالب علي بنت ليه النهارده
_ هههههههه ده جزائي اني حاسس بيك
_ وحاسس بيه ازاي شايفني مقطع شاريني
_ شايفك بتعاند مع نفسك
_ صح انا بعاند مع نفسي.. وصح منمتش
كملت بتنهيدة
_ مش علشان حب وكلام فاضي بس انا قولتلها كام كلمة دمهم تقيل قوي.. لو هي مش هبلة وغلبانه والله ما هتسامحني فيهم
_ قولتلها إيه
_ قولت اللي قولته ومش عارف اسكت وبكدة اكون بنيت بيني وبينها سد ولا اكلمها ونرجع تاني زي الاول
_ كلمها وسيب نفسك بلاش التعقيد دة.. متجوزهاش عيش احساسك معاها وخلاص
_ طيب وانت عارف احساسي شكله ازاي يا بشر
_ زي احساسي تجاه هاجر
_ اممم وعلي كده بتعيش احساسك مع هاجر
_ هههههههه مش كله مخلي شوية لبعد الجواز
_ والله انت طلعت سافل.. وبتعيش نص احساسك في اي داهيه افرض حد قفشك
_ ياسيدي يقفشونا عادي هتجوزها واصلح غلطتي.. كلمها انت بس
_ يابني انت اتجننت يعني مش عاوزها وهكلمها اعيش احساسي
_ ايوه
_ اتسلي بيها يعني
_ ايوه اتسلا.. احلي حاجه في الدنيا السلاوة مع حد بتحبه
_ الله يقطعك علي الافلام العربي اللي بتسمعها.. حب ايه وقرف ايه.. مش ممكن.. مش هكلمممممها يعني مش هكلمها لا سلاوة ولا لعب واطلع بره ورايا جلسة
#إسلام
بعد اللي عمله معايا من وقت ما شوفته اول مره حلفت لا اربيه وكمان أبعده عن طريقي لأنه شكله حططني في دماغه اوي ومش هيسكت غير لما يخلي خلود تنهي الحوار اللي بيني وبينها ف اشتريت تليفون من حرامي موبيلات وكلمت بت بتشتغل في البطال وطلبت منها تعمل خدمه وبعدين كلمتها أسالها
_ عملتي ايه
قالتلي
_ كلمته وحجزت معاه معاد بس لسه بعد يومين
_ ليه يومين والنهاردة قال ايه
_ بيقولي اقرب معاد بعد يومين
_ ميضرش نصبر يومين بس عاوزك تحبكي الحكاية
_ ماشي بس مش ناوي تقولي انت مين ومين مديك رقمي
_ قصدك مين مدنيش رقمك.. انجزي وليكي باقي حسابك عندي هيوصل لما تخلصي
_ طيب بس تبعتلي نص اللي باقيلي قبل ما ابدء
_ نعماااات... كفاية اللي خدتيه يا عسل ، لما تخلصي هبعتلك
_ طيب بس متزقش.. هخلص وهرنلك
_ ماشي مستنيكي
#خلود
كنت لوحدي وفي الوقت وصلني اتصال من إسلام مردتش ولا كنت طايقة ارد عليه ولا طيقاه هو بسبب اللي حصل ف بعتلي رساله يقولي فيها
_ عامله اية دلوقتي يا فنانة
مفتحتهاش وتجاهلته و دخلت حساب اسيل اشوف زيد منزل إيه جديد او فاتح ولا لا وبعد ما فتحت بدقيقتين تقريباً وصلتني رساله منه ساعتها قلبي انتفض بشدة لما لمحتها في الاشعارات وحسيت جسمي كله نمل ف سحبت الشاشه وعرضت الرساله كامله من غير ما افتح ف لقيته بيقولي
_ كويس انك فتحتي، انا مكنتش لاقي طريقة تاني اوصلك بيها.
اول حاجه انا مش عارف اقولك ايه ولا اعتذرلك ازاي ، بس انا مشوش الفترة دي لدرجة اني بعمل وبقول حاجات انا مبكونش قاصدها ولا ناويها.. وعمري ما تخيلت ان الحال يوصل بيه اني اقولك الكلام اللي قولته ولا اني اعمل اللي عملته في العيادة.. هو ضغط الشغل والحالات وتأثري بيها عامل فيه كده.. انا اسف اتمني انك تقدري تنسي اللي قولته ، ومش بطلب منك نرجع زي الاول ، اكيد مش هنقدر ، بس انا من وقت ما رجعت البيت وانا متضايق بسبب اللي قولته ومش حابب ان نفسك تشيل مني قوي كدة..
اخدت وقت وانا بعيد قرات الرساله ودموعي بتسيل علي خدي كنت حاسه روحي بتتسحب مني ومش عارفه اعمل ايه ارد واهين نفسي تاني ولا اسكت واحفظ الباقي ولكن كالعادة مقدرتش ده زيد اللي للاسف قدامه مبقدرش اكون قوية وبالفعل رديت وقولت
_ مش بقولك مش عارف عاوز ايه ، انت كل حاجة وعكسها
_ مش هعترض.. انا فعلاً مبقتش عارف بعمل ايه بس اللي انا عارفه اني مع كل اللي بقوله مش بكون عاوز اجرحك ومبكنش مخطط لكدة ف معلش حاولي تتجنبي اي نقاش بيني وبينك الفترة دي
قولت ولسة دموعي بتسيل
_ انت كويس مع الكل الا انا.. إيه الذنب اللي انا عملته علشان تعاملني كدة.. معقول علشان بظهر علي النت.. طيب وده يضايقك في ايه
_ انتي حرة يا خلود.. لو كنت قبل كده بعتبرك واحده مننا ف انا من دلوقتي مش هتدخل.. المهم اني انا مكلمك اعتذرلك عن اللي قولته.. ياريت متزعليش.
مردتش عليه تاني وخرجت من الشات ورجعت ارد علي إسلام علشان مسيبش دماغي تودي وتجيب من ناحيته ولا اسمح لنفسي اضعف تاني قدامه .
_ الحمدلله احسن متشكرة يا إسلام
جاني رده علي طول بيقولي
_ انا روحتلك المستشفي ملقتكش انتي فين
_ في بيت عمي شبل
_ مين عمك شبل ده؟
_ اخو عمي عبيده اللي قابلته
_ طيب ومروحتيش بيتكم ليه او بيت جدتك
_ مليش غير بيت جدتي وزي مانت عارف اللي حصل
_ هو انتي ابوكي فين
_ معرفش.. مش عارفه اذا عايش ولا ميت.. رميني وعايشه في بيت فيه سبع رجاله من صغري
قولتها بقصد انه ممكن يحل عني بس فاجئني رده لما قال
_ ولا يهمك دلوقتي نتجوز ويكونلك بيت لوحدك
_ متضايقتش؟
_ اتضايقت بس اعمل ايه.. انتي لو هتوافقي تعيشي في شقتي يكون اتجوزنا مفيش اي مشكله
_ اعيش في شقتك؟
_ لا ما انا هسيبهالك لغيت ما نتجوز
_ هو انت عايش مع مين هنا يا إسلام
_ لوحدي في اوضه في منطقة هنا.. قاعد فيها علشان الشغل يعني
_ المنطقة دي اللي فيها البنت اللي ضربتني
_ اه هي دي
_ وكل اللي في المنطقه دي شبها هي واللي معاها
_لا مش كلهم دي بس اللي بت شمال سمعتها وسخة
_ إسلام انا قولتلك بلاش الكلام ده
_ اقول عنها ايه يعني غير كده دي كانت بتيجيلي وعاوزاني اعمل معاها حاجات استغفر الله العظيم يعني بس انا بخاف ربنا ومرضاش أبداً بالغلط علشان ربنا يسترها علي اختي وبنتي
قولت وانا حاسه بالقرف منه
_ ماشي بس في الفاظ احسن من كده
_ حقك علي راسي مش هضايقك تاني
نهيت معاه الكلام ومن كتر عصبيتي منه وتوتري بسبب زيد كنت حاسه نفسي بتخنق ف طلعت وقفت علي البلكونة وبعد وقت وانا علي نفس الوقفة شوفت زيد نازل وبيركب عربيته ويمشي كان واضح انه رايح العيادة بس قبل معاده بساعتين تقريبا كده مجبش سكرتيرة جديدة لسة
#جويرية
وانا راجعه مع ماما وعند الڤيلا اللي بتبتعد مسافة صغيرة عن المدرسة بصيت هناك اشوف لو ريان موجود ولا لا ولكن للاسف مشفتهوش وحمدت ربنا اني مشفتهوش علشان ماما متاخدش بالها ورجعنا البيت ملقتش بجاد لسة رجع ف دخلت اوضتي وغيرت وبعد وقت اتصلت علي مليكة مردتش ولا ردت علي رسايلي ، كنت عايزة اقولها اللي حصل ، مش عارفه ليه كنت خايفة من نفسي ومحتاجة اتكلم مع حد مخافش يكون في عقاب ولا شد في كلامه بخصوص الموضوع ده ومكنش في احسن من مليكة بس للأسف مردتش وبعد وقت جه بجاد ودخل عندي قالي
_ بتعملي ايه
_ ولا حاجه
قال وهو بيقعد قدامي
_ طيب نقدر نتكلم دلوقتي
_ اتفضل
_ اتفضلي انتي احكي عاوز اسمع كل حاجة
_ انا قولتلك كل اللي حصل مخبتش عنك حرف
_ اكيد في حاجه متحكتش
_ حاجة إيه
_ السبب اللي خلاكي تخبي مثلا
_ ما انا قولت
_ السبب الحقيقي يا جويرية
_ إيه هو السبب الحقيقي
_ انا بسالك عنه
_ مفيش اي أسباب غير الخوف
_ الخوف من ولا علي
_ يعني ايه
_ يعني خوفتي عليه علشان كدة محكتيش
_ قصدك ايه
_ خوفتي عليه ولا لا
_ لا مخبتش خوف عليه انا يومها بقيت اصرخ ولو حد سمعني كان اتقتل
_ وبعد كدة
_ وبعد كدة مكنش هيكون ليه فايدة إني اقول
_ جويرية!!
_ إيه
_ انا بتكلم معاكي براحه من غير شد ولا عصبية احكي كل حاجه مفيش داعي تخبي
_ عاوزني اقول ايه يعني ما انا حكيتلك كل حاجه
_ لا دي مش كل حاجه احنا كل شويه بنكتشف عنك حاجة جديدة.. ليه خبيتي وحصل إيه تاني احنا منعرفهوش
_ طيب وحيات المصحف ده ما في حاجه تاني حصلت ازيد من كدة
_...
_ بتبصلي كدة ليه مش مصدقني
_ بس انا بسأل ليه خبيتي.. كل ده لو كنتي قولتيه مكنش في حاجه هتحصل
_ عايز توصل ل إية
_ لسبب الحقيقي اللي خلاكي تخبي
اتنهدت بعمق وقولت
_ شوف يا بجاد انت مش هتفهم اللي كنت حاسة بيه بس هديك مثال صغير ، لو في يوم انت اتحولت وعملت حاجة غير اللي انا متعودة عليها منك وكانت صدمة بنسبالي وبعدين اختفيت من غير توضيح للي عملته ف انا اكيد هصبر علشان افهم دي كل الحكاية.. هو مكنش كدة واحنا نعرفه من صغرنا وكلنا كنا عارفين انه مش وحش وكمان بيتكسف وانت شوفت بنفسك كنت تتخيل للحظة ان هو يعمل حاجة زي دي
_ لا
_ ولا انا ف انا كنت ساكته علشان كان في حاجه غلط
_ اممم
_ إيه
_ ماشي ولو انك بتلفي وتدوري
_ هو ده اللي حصل اقول ايه تاني
_ طيب طيب.. انا سؤالي دلوقتي في أي كلام اتقال بعيد عن القصص
_ لا والرسالة اللي شوفتها بتثبلك ان مفيش اي كلام اتقال
_ الرساله اللي شوفتها بيقولك فيها انه ميقصدش حب وكلام فاضي .. لو مفيش حاجه ايه هيخليه يقول كده
_ انت مش مصدق ان مفيش حاجه
_ انا مصدق ان في حاجه كبيرة قوي.. والا مكنتيش خبيتي حتي لو محصلش بينكم كلام صريح بس في حاجه يا جويرية
_...
_ يعني في حاجه اهو
_ لا مفيش
كملت وانا بفرك في ايديه بتوتر
_ مفيش غير اني حسيت بكلامه عن القصة اللي هكون انا بطلتها انه هيقول فيها حاجه مهمة
_ إيه هي الحاجة المهمة دي ، انتي قريتي القصة صح
_ قريتها
_ كاتب ايه
_ ...
_ يبقي الحاجه المهمة اتكتبت
_....
_ كانت إيه احكي؟
_ تكون اللي تكونه المهم اني متدخلتش في كتابتها
_ لا متكونش اللي تكونه انا عايز اعرف كتب ايه.. قولي انا مش هلومك علي حاجه هو كتبها.. احكي انا بتكلم معاكي ك صديق اي حاجة حصلت ف خلاص عدت ومش هعاقبك عليها مهما كانت
قولت بعد تردد
_ كان بيتكلم عن اللي حصل في وقت سفرة
_ وايه تاني
_ وعني انا
_ وفي الاخر حصل ايه
_ مكملتهاش للاخر
_ جويرية!! حصل ايه في الاخر
_ ى...
_ قولتلك مش هلومك علي حاجه هو كتبها احكي
قولت بتردد
_ القصة بتتكلم عن...
_ عن ايه كملي
_ عن حياته من اول ما بدء الكتابه وادمانه للمخدرات لغيت ما سافر السعودية وحاول كتير انه يشتغل ويخرج من السجن اللي حاطط نفسه فيه وعني انا وعن نجاحي وانا هنا في مصر لغيت ما بيرجع و....
_ قبل و... كتب شويه تفاصيل عنك قبل سفره لسعودية صح
_ صح
_ ايه هي التفاصيل دي
_ كانت عن الوقت اللي بستعير منه القصص لغيت حفلة عيد ميلادي
_ وايه تاني
_ بس كده مفيش اي حاجة حصلت يتكلم عنها
_ متكلمش عن مشاعر
_....
_ يبقي اتكلم .. طيب وبعد ما رجع ايه اللي حصل
_ كلها حاجات عادية
_ زي إيه
_ زي انه اتقدم اكتر من مره واترفض علشان عاداتنا
_ طيب وفي النهاية اتقبل ولا لا
_ اتقبل بس بعد مشاكل كتير
_ اممم
_ هو ده كل اللي مكتوب وانا مش مسؤله علي حرف منه
_ طيب وانتي كان احساسك ايه لما قريتي القصة
نزلت جفوني من غير رد ف قال
_ قولي
_ انا حكتلك اللي حصل مفيش حاجه احكيها تاني
_ حكيتي اللي حصل منه محكتليش انتي رايك ايه
_ رايي في ايه
_ في القصة وفي اللي حصل كله وفي احساسك تجاه
سكت شويه استجمع نفسي وبعدين خدت نفس عميق وقولت
_ اللي حصل والقصة واحساسي كلهم سبب في التعب اللي انا حاسه بيه.. ايوه يا بجاد زي مانت بتحاول تقول بالظبط.. انا...
_...
_ انا بحب ريان.. ودي حاجه مش بأيدي
كملت وانا ببصله ودموعه معلقة في طرف عيني
_ اديني قولتلك شوف لو هتقول لبابا وعمامي وتاخدوني النجع تنفذوا فيه الحكم
شيحت بعيني عنه بعد ما عجزت عن اتي اتماسك وانسابت دموعي علي خدي ف قال بتنهيدة
_ المشكلة مش في عادات وتقاليد المشكلة ان هو انسان فاشل لا بيشتغل ولا فلح في تعليم ، و دمر حياتك ، وكمان اطحن هنا علي ايدي انا وبدر والاهم من ده كله ان هو مقالش حاجة.. مقالش عاوزك واكيد احنا مش هنخطبهولك.. اخر حاجه ممكن نفكر فيها هي عادات وتقاليد ريان هو نفسه المشكلة
_ وزيد عليهم انه فقد الذاكرة
_ ايه
_ ايوه لقيوه فاقد الذاكرة وناسي كل حاجه
_ وانتي عرفتي منين
_ مليكة قالتلي
_ طيب واهو مشكله تانية ودي هي القاضية
_...
_ ملهاش حل يا جويرية.. مقدمكش غير تنسي وتركزي في مستقبلك انتي لسة صغيرة وقدامك كتير علشان تبدائي حياتك ، وشوية وهتعرفي انك كنتي موهومه
سكت مقدرتش اتكلم تاني واعبر اكتر عن اللي جوايا لانه مهما كان سمعلي ومتصرفش تصرف وحش معايا ف هو اخويا
#ريان
جه تاني يوم في نفس المعاد اللي شوفتها فيه مع بجاد اول مره و وقفت عند البوابة وانا علي بالي انها مجرد صدفة مش هتتكرر بس كانت المفاجأة لما شوفت العربيه جايه تاني وهي فيها ف حطيت ايدي جنب وشي اخفيه عنها وبعد ما عدت وقفت في نص الشارع اتبعهم بعنيه لغيت ما شوفتهم بيحوجوا الناحية التانية بس مفهمتش اي سبب جيتهم من هنا بس اي ان كان السبب ف انا محظوظ علشان شوفتها مرتين ورا بعض.
_ يا طاهطيل
قالهالي عاصم او عصام من خلفي ف بصيتله واستنيت اتأكد هو مين فيهم ف قالي
_ بتبص علي ايه
_ ولا حاجه
_ كنت شايفك بتبص علي عربية ماشية فكرتك بحاجة ولا ايه
_ يعني حسيت اني شوفتها قبل كده
_ يعني بدات تفتكر
_ لا انا شبهت بس
_ اها.. اوووكي افتحلي بقا علشان هعدي
_ تمام
دخلت فتحت البوابه وهو رجع جاب العربيه ومشي وبعد حوالي خمس دقايق بعتلي صوره ل جويرية وبجاد علي الواتس وهما واقفين بيتكلموا قدام المدرسة وقالي
_ تعرفهم
_ مالهم دول
_ دول اللي كانوا في العربية وانا معدي شوفتهم واقفين ف صورتهم البنت شكلها مس في المدرسة اللي معاها وصلها وسابها هناك
قولت لنفسي
_ مس؟ مس ازاي هي مخلصتش اعدادي
رجعت اكتبله واقول
_ لا مش عارفهم
_ اوكي انا قولت يمكن تكون عارفهم ف تفتكرهم
_ لا شكراً يا عصام
_ عرفت ازاي اني عصام
_ علشان رقمك مش متسجل عندي زي عاصم
_ اه اوكي ، باي يا طهطول هههههههه
_ هههه باي
قفلت معاه وبعد دقايق جت خديجة وباباها هي فضلت واقفة معايا وباباها دخل وبعد ما بعد بصتلها بحماس وهميت اني اتكلم عن جويرية ولكن تراجعت لما لقيت شكلها مجهد وزعلانة وقولت
_ مالك؟
ابتسمت ابتسامه متعبة وقالت
_ مفيش حاجه
_ يابنتي مالك شكلك تعبانه
ابتسمت بصعوبة ولمعت دموعها وهي بتهز دماغها بنفي ف قولت وانا بمسكها واقعدها قدامي
_ اقعدي.. مالك احكيلي انتي كويسة.. خديجة مالك؟
قالت بصوت متحشرج
_ تعبانه
_ حاسة ب أية
قالت ببكاء
_ من كام يوم عملت تحليل بعد ما بقيت كل شويه ادوخ ف طلع انه...
قولت بترقب
_ انه إيه
_ طلع انه الكانسر رجع تاني وانتشر بشكل كبير في جسمي وفي مرحلة متأخّرة.. يعني انا هموت
قولت بعد ما ظهرت دموعي
_ بتقولي ايه ولا هتموتي ولا حاجه.. التحليل غلط اكيد دكتور حمار اللي عمل التحليل ده .. انتي كويسة وهتعيشي
قالت ببكاء
_ انا كنت عارفة انه رجع وكنت خايفه اعمل التحليل لا اتاكد.. انا مش عاوزه اموت انا بخاف من الموت قوي.. انا مش عايزة اموت يا ريان
زادت دموعي وانا بربت علي كتفها واقول
_ مش هتموتي يابنتي .. ياما ناس جالهم وخفت.. اهدي بطلي عياط
زادت في بكاها ف قولت وانا بقرب منها وحط ايديه الاتنين عليها
_ خديجة اهدي والله مش هتموتي دلوقتي .. خديجة!! يابنتي متخافيش مالك
استمرت في بكاها بشكل هستيري ف ضمتها ليه وبقيت اهديها وفجأه سكتت واغمي عليها سندتها علي دراعي وضربت بخفة علي وشها علشان تفوق ولكن مفيش فايده ف ريحتها علي الكنبه وطلعت انادي علي عاصم بصوت عالي وبعد ثواني لقيت الكل جاين يجروا بما فيهم ابوها وابو عاصم وبعدها انا رجعتلها وعاصم جه قبلهم وقال
_ مالها
_ لازم تروح المستشفي دلوقتي
جه ابوها وقال
_ خديجة!! بنتي مالها
قولت وانا بشيلها انا وعاصم ناحية العربية
_ تعبانه ولازم تروح المستشفي .. انت ازاي مخليها تطلع لشغل في حالتها دي
دخلناها العربيه ف وقفني وقال
_ مالها حالتها هي كانت كويسه.. بنتي مالها
_ هي لسه قيلالي انها عملت تحليل ولقت ان الكانسر انتشر في جسمها.
كلمتي كانت زي السهم اللي صاب قلبه ورجليه خانته لولا ان رشدي لحقه وسنده ف قال وهو بيقبض علي قلبه
_ بنتي يا رشدي.. بنتي هتموت
_ متخافش.. شد حيلك خلينا نوديها المستشفي... عاصم اطلع بالعربية بسرعه علي المستشفي وانا هجيبه وجاي.. روح معاه يا ادم
_ حاضر
طلعنا بالعربية وروحنا باقصي سرعة علي المستشفي وفي الطريق فاقت بس مكنتش قادره تقوم ف قولت وانا بمسك ايدها
_ انتي كويسة
تمسكت بأيدي وقالت بتعب
_ بابا فين
_ جاي ورانا
كملنا طريقنا للمستشفي وهناك شيلتها ودخلت بيها وقبل ما نوصل للاستقبال قالت بصوت خافت ومتعب
_ مش عاوزه اموت.. مش عاوزه يغمي عليه.. متسبنيش أغمض مهما حصل
مجرد ما نهت جملتها مسكوها مني حطوها علي سرير ولكن هي فضلت ماسكة في ايدي وقالت واحنا بنجري بيها
_ متسبونيش لوحدي
_ مش هنسيبك متخافيش احنا معاكي
قال عاصم
_ هتخفي وتكوني كويسة يا ديجا وكلنا معاكي مش هنسيبك
الممرضة فلتت ايدها مني ودخلوها في غرفة الطوارئ وعاصم وقف قدام الباب وقال ببكاء
_ خديجة هتموت يا ريان
_ متقولش كده هي هتخف وتكون كويسة ادعيلها انت بس
#فاطمة
صحيت متأخر من نومي بسبب السهر اللي سهرته بالليل ولما طلعت من الاوضه ملقتش بابا في الصالون ف دخلت اوضته لقيته نايم قربت منه وقولت
_ بابا
فتح عينيه بصعوبة وقالي وهو بينهج
_ ايه يا فاطمة
_ حضرتك كويس
_ اه كويس.. عاوز انام بس .. مروحتيش الكلية ليه
_ لسة باقي نص ساعة.. مالك انت.. انت تعبان
_ لا مش تعبان نعسان بس روحي اجهزي عشان متتأخريش انا نعسان يلا
_ متاكد
_ ايوه امشي عاوز انام
_ حاضر
طلعت من عنده اتصلت ب بجاد وفطرت وبعدين جهزت وهو جه فتحتله ف دخل وقال وهو بيبص حولية
_ امال فين خالي
_ نايم جوه
_ لسة مصحيش
_ لا
قولت كده وفجأه مسكني وشدني لحضنه وقال
_ احسن خليه مرتاح شويه
قولت وانا بحاول ابعده
_ طيب ابعد افرض خرج.. ابعد يا بجاد
بعد عني حاجه بسيطة وقال وهو بيتأمل وشي
_ خليه.. هقوله مقدرتش اقاوم مش عاجبك جوزنا واستر علينا
_ انت زودتها ودي اخر مره هسمحلك تقربلي
_ تاني هتقولي اخر مره انتي مبتحرميش
قولت وانا ببعده
_ هههههه طيب والله اخر مره..
حاول يقربلي ف قولت بتحذير
_ خليك مكانك هزعق واصحي بابا واقوله عاوز تعمل ايه
ضيق عينيه وقال
_ بقا كده
_ اها كدة... هطمن علي بابا واجيلك
قولتها ودخلت جوه لقيت بابا نايم ومتغطي ف قفلت الباب ومشيت
#وفاء
كنت في المستشفي لما اتصل بيه بجاد ولما فتحت لقيته بيلهث وبيتكلم بصعوبة وبيقولي
_ وفاء تعاليلي بسرعه
_ مالك يا بجاد
_ بموت... تعاليلي بسرعه
_ حاضر حاضر
قولتها وقفلت الخط وجريت بلغتهم في الاستقبال يبعتو عربية اسعاف علي عنوانه وانا سبقتهم بالعربية علي هناك بقيت اخبط كتير وانادي زي المجنونة لغيت ما فتحلي و وقع قدامي وشوفت الدم بينزف من بوقه شيلت دماغه علي دراعي وقولت بصوت مختلط بصراخ
_ بجاد!!
قال بجهد
_ عاوز اقولك حاجه مهمه
_طيب طيب ، بس متتكلمش دلوقتي الاسعاف جايه
_ اسمعيني مش وقته...
الفصل الخمسون
50
#وفاء
ضاق نفسه تماماً و وشه إزرق وهو بيعسل ولحظات مرت وهو بيصارع الموت وفي نفس الوقت مبطلش محاولة انه يقول اللي كان عاوز يقوله وبعد دقايق وانا مش قادره اعمل حاجه من الخوف والتوتر اللي سببته ليه حالته دي وصلت الإسعاف وخدوه وهو فاقد الوعي وهناك الدكتور عمله صدمات كهربائيّة بعد ما عجزت عن اني اتحرك من مكاني وانا بشاهد اللي بيحصل وفضل الدكتور يكرر العملية دي لغيت ما رجع فتح عينيه ويتنفس ساعتها قومت من مكاني وقولت ببكاء وانا بمسك ايده
_ بجاد حبيبي خوفتني عليك
حاول يتكلم ف قولت
_ متتكلمش انت تعبان.. علشان خاطري متتكلمش
زعقت في السواق
_ أسرع شوية مش شايفه تعبان ازاي
بعد وقت وصلنا المستشفي ودخلناه غرفة العنايه ودخل معانا دكتور قلب ولما لقوني منهارة خرجوني بالعافية وبعد شوية طلع الدكتور وقالي بأسف
_ انا آسف يا دكتورة ، حالته خطيرة جداً ولازم عمليه
قولت ببكاء
_ طيب وهيستحملها
_ املنا في ربنا كبير لو عملها هيكون في احتمال انه يعيش ولو معملهاش للأسف هيموت
_ طيب وتفتكر ممكن يعيش قد ايه لو معملهاش
_ مش كتير ممكن في اي وقت نلاقية ميت الادوية مش هتجيب نتيجة نهائي بعد كدة
مسحت دموعي وقولت
_ طيب انا عاوزه اشوفه.. هو صاحي
_ اه بس خمس دقايق بالكتير وبلاش يجهد نفسه بالكلام
_ حاضر
دخلت عنده وهو نايم والاقطاب علي صدره وجهاز التنفس محطوط علي وشه ف قعدت جنبه وقولت
_ الف سلامة عليك يا حبيبي
حرك قزحيته وبصلي ولما حاول يتكلم وقفته وقولت
_ الكلام هيتعبك اجل اي حاجه هتقولها لبعدين.. المهم دلوقتي انت لازم تعمل العملية ومتقولش لا
قال بجهد
_ لا
_ يا بجاد انت تعبان
_ لا
_ ليه ، انا هجبلك احسن الدكاترة ومتخافش هتعدي
_ قولت لا يعني لا مش مسامحك لو خلتيهم يعملوهالي
زادت دموعي وانا بقول
_ ليه؟! هي حياتك رخيصة قوي كده عندك.. طيب وانا وبنتك
قاطع كلامنا دخول جميلة علينا وهي بتقول
_ السلام عليكم.. الف سلامة عليك يا أستاذ بجاد
قولت
_ الله يسلمك..
كملت موجهه كلامي ل بجاد
_ هسيبك ترتاح بس علشان خاطري فكر
_ مش هعملها ومش هسامحك لو خليتي حد يعملهالي اديني بقولك اهو
_ ليييه يا بجاد ليه حرام عليك ازاي نفسك رخيصة عندك قوي كدة.. طيب فكر فيه انا وفاطمة
قالت جميلة وهي بتاخدني من عنده
_ مينفعش يا وفاء كدة غلط عليه تعالي
#ريان
مشي عاصم بعد ما ابوه خلاه يروح الكلية علشان المحاضرة بتاعته وبعد وقت طلع الدكتور وقال لازم نعملها رنين مغناطيسي وبعدها طلعت مع الممرضة اللي ماسكة ايدها وفي وسط قلق ابوها عليها وعتابه ليها انها خبت استقرت عينيها عليه للحظات بنظرات مش مفهومة امتنان ولا كانت بتحاول توصلي انها عاوزة تقول حاجة مفهمتش ف كان رد فعلي اني ابتسمتلها وقولت
_ الف سلامة عليكي يا انسة خديجة
قالت بتعب
_ الله يسلمك يا ر.... الله يسلمك يا ادم متشكرة
قالتها ومشيت مع الممرضة وابوها ف قالي رشدي بيه
_ ارجع الفيلا
_ حاضر يافندم.. لو احتجت حاجه كلمني
_ تسلم يا ادم
_ الله يسلمك يافندم
ومشيت علي رجلية من غير مواصلات وطول الطريق فاتح التليفون وبدور في الاخبار واشوف إيه الجديد وبعد مسافة كبيرة وقفت مكاني لما سمعت صوت بنت بيناديني ، وخدت وقت قبل ما ابصلها علشان استوعب الصوت ده وانا بقول في نفسي مش معقول تكون هي اكيد واحده تانية ولما استدرت كانت المفاجأة ان طلعت هي جويرية واقفة قدام المدرسة وشكلها متوترة جداً وقفت للحظات ابصلها قبل ما اتحرك ناحيتها واقول متدعي النسيان
_ بتندهيني انا
#جويرية
كل العيال مشيوا وحتي المدرسين كمان وانا واقفة بره مستنية ماما اللي مبطلتش رن عليها انها تيجي تاخدني وبعد وقت وانا علي نفس الحالة عقلي قالي اتمشي شوية يمكن اقابلهم في الطريق او يمكن اشوف ريان واهي تكون صدفة وبعد ما استجمعت شجاعتي قومت من مكاني وقبل ما اتحرك قلبي انتفض وحسيت اني هقع من الخضة لما لمحته جاي من الناحية التانية بيلعب في التليفون ومشغول بيه ف وقفت وكنت شيفاه معدي من غير ما يبصلي وبعد ما تجاوزني بخطوات تجرأت وناديت عليه وقولت
_ ريان!
وقف للحظات من غير ما يستدير ليه وبعدين بصلي وقال بعد ما جه عندي
_ بتندهيني انا
قولت بربكة
_ ايوه
ازدرد لعابه وقال
_ انتي تعرفيني
_ اه .. انت
_...
_ انت مش فاكر حاجه قال
قال بعد سكوت
_ اه..
كمل بتوتر
_انتي مين ، وتعرفيني منين
حسيت من توتره انه مش ناسي ف قولت
_ انت مش فاكر
_ لا اشمعنا انتي هفتكرك
_ انا بسأل في العموم
_ اه مش فاكر.. بس انتي مين
_...
قال بنظرات ترقب لإجابتي
_ قولي! ، انتي مين ، وايه علاقتنا ببعض
اخفضت جفوني بتوتر وقولت
_ ولا حاجه
_ امال عرفتيني ازاي
_ مش مهم
_ ماشي..، عاوزة حاجة
هزيت دماغي بنفي ف قال
_ عن اذنك
قال كده ومشي تبعته بعنيه وانا حاسه بتوتر شديد لغيت ما رجع يبصلي ويقول بتردد
_ هو انتي بتعملي ايه هنا
_ بدرس
سكنت تعابير وشه وقال
_ بس دي اعدادي
_ ايوه انا بدرس في تالته
_...
_ كملت بعد ما غيبت سنين عن التعليم
ابتسم ابتسامة خفيفة وقال
_ اها.. بتوفيق.. يا؟
_ جويرية
_ جويرية؟
_ اه
_ اسمك حلو
_...
_ احم ، بتوفيق.. سلام
قال كده ومشي وانا بقيت واقفة مكاني اتبعه بعنيه وانا بفكر وعقلي بيقولي انه مش ناسي ،دي مش طريقة ولا نظرات واحد مش عارفني واول مرة يشوفني وبعد وقت وانا علي نفس الوقفة وصلت عربية ماما بس مكنتش هي اللي سيقاها واللي سايقها واحد شغال معاها وقف قدامي وقالي
_ اتفضلي ، دكتورة وفاء بعتتني اوصلك للبيت علشان هي مشغولة شويه
اومات ايجابا ودخلت ومشي بينا من طريق تانية غير طريق ريان وبعد ما وصلت البيت ملقتش حد هناك ف بقيت اتصل علي مليكة كتير ومكنتش ترد ف اتصلت ب هاجر اسألهل عنها ، ردت عليه وقالت
_ ايوه ياعمي.. ايوه يا طنط ، ايوه يا اي حد غير جويرية
_ هههه لا انا
_ انتي مين ، جويرية مبتتصلش بحد يا نصابة انطقي وقولي وديتيها فين
_ ههههه مودتهاش اهي موجودة
_ يابنتي انتي مين وربنا بجد في حاجه غلط.. انتي مين قولي
_ انا جويرية
_ طلعت جويرية بجد وده رقمها فعلاً ، في ايه طيب قلقتيني
_ مفيش اي حاجة بتصل بس علي مليكة مبتردش ف كنت عاوزه اعرف لو هي كويسة
_ ايووه قولي كدة.. علي العموم مليكة كويسة بس انا مشوفتهاش النهاردة بصراحه
_ شوفتيها امتي
_ امبارح في حاجه ولا ايه
_ مفيش بقولك بتصل بيها مبتردش
_ طيب انا هحاول اكلمها او لو جت الكلية النهاردة هقولها
_ متشكرة يا هاجر
_ وكمان بتشكريني لا والله في حاجه غلط انتي كويسة
_ كويسة والله
#بدر
كنت طالع من البيت لقيت اسراء جاية ناحيتي تجري وبتنادي عليه وقفت في انتظارها ف قالت بعد ما وصلتني
_ متعرفش اوصل ل ريان ازاي
_ ليه هو مشي
_ مشي من يومها ومقالش رايح فين
_ ليه كدة
_ علشان زعلان
_ زعلان من ايه.. دول بيقولوا فقد الذاكرة ولا محدش قالكم
_ قالوا بس كدب ريان فاكر كل حاجه ودي حجة علشان ميرجعش
_ معقول
_ انت مشكتش انهم يكونوا بيكدبوا ومش ناسي فعلاً
_ مشكتش في حاجه.. بس ممكن ليه لا.. يمكن لقاها حجة علشان يكون بعيد
_ هو ده اللي حصل ، طيب تعرف اوصله ازاي
_ معرفش غير رقم البنت اللي كانت معاه للاسف
_ طيب ما تدهوني
_ لا انا هكلمها واشوف مكانه واقولك
_ تمام بس ضروري ونبي
_ حاضر
سيبتها ومشيت وفي طريقي اتصلت بالرقم ف جاني رد بصوت ست ف قولت
_ ايوة ، خديجة معايا
_لا مش هي بس ده تليفونها ، انت مين علشان اقولها ؟
_ قوليلها بدر.. صاحب ريان او ادم
_ ريان وادم.. قصدك مين
_ قوليلها كده هي هتعرفني
_ لحظة لو سمحت يعني انت تعرف ادم
_ ايوه انا صاحبه
_ صاحبه من امتي
_ من زمان
_ مش معقول.. لحظة
سمعتها بتوجه كلامها لحد جنبها وبعدين قالتلي
_ انت تعرفه منين
_ بقولك صاحبه هو انتي مين وفين صاحبة التليفون
_ صاحبة التليفون تعبانه شوية وتليفونها معايا
_ الف سلامة.. طيب وانتي تعرفي ادم منين
_ انا صاحبة البيت اللي هو عايش فيه بس اول مره اعرف ان ظهرله صاحب ، لحظة انا بعتله وهيجيلك
_ استني لو سمحتي ممكن العنوان
_ ليه
_ عاوز اجيله ، هو شكله مش مصدق اني صاحبه عشان مش فاكرني ف هيتعبني علشان اوصله
_...
_ لو سمحتي انا مش هضره وانا فعلاً صاحبه وممكن ابعتلك صورة لينا مع بعض علشان تصدقي
_ طيب طيب
خدت منها العنوان ومجرد ما انتهت قالتلي
_اهو معاك
سمعت صوته وهو بيقول
_ مين
_ بيقول صاحبك قال... امال معرفتناش انك لقيت صاحب ليك
_ آسف يا فندم ، بس لسة مش متأكد من كلامه..لحظة
وجه كلامه ليه وقال
_ مين
_ انا بدر.. كدة متدناش عنوان ولا رقم تليفون
_ انا معرفكش عشان اديك حاجه
_ ياعم ساهله انا هجبلك مليون اثبات يثبتلك اني اعرفك.. يلا شويه وجاي
قفلت معاه وروحت علي طول وهناك لقيته واقف عند البوابه بلبس امن وبيبصلي بضجر وبيقول
_ انت إيه جابك هنا ، كدة هتعملي مشاكل في شغلي
_ شغل إيه يا راجل ، بقا كاتب كبير زيك يشتغل فرد أمن
_ انا مش فاكر حاجه لا فاكر اني كنت كاتب ، ولا فاكر صاحب ولا حتي اهل امشي وسيبني في حالي
_ امشي ازاي يا جدع ، ما انا جاي عشان افكرك واساعدك.. شوف! ، انا اسمي بدر جارك وصاحبك وكنا مع بعض في المدرسة من ابتدائي لغيت ثانوي ، انا سافرت كملت تعليمي بره وانت سيبت التعليم وسافرت السعودية مع اهلك ورجعنا نتقابل تاني بعد اكتر من خمس سنين.. ورجعنا صحاب زي الاول واكتر كمان
_....
_ مش مصدقني
_ انت عايز ايه من الآخر
_ هكون عايز ايه .. يابني انت صاحبي واكتر من اخويا و واجبي اساعدك وافكرك الله
كملت بنبرة فيها خبث ملحوظ
_تحب افكرك بأخر لقاء بينا يا ريان
زم شفتيه وضم ايديه لبعض وقال
_ اها ، فكرني ، اتفضل
_ اوكي ، مانت صاحبي واخويا .. اسمع ياسيدي ، احنا اخر لقاء بينا كان فسحة طويلة ، اتفسحنا واتعشينا مع بعض وسهرنا لصبح ودي كانت احلي فسحة اعملها في حياتي.. علمت معايا جامد وعلمت معاك انت اكتر
تجمع غضبه في عينيه وهو مثبته نظراته ليه ف قولت بإبتسامة
_ مالك زعلت ليه ، هو ده اللي حصل بالظبط في اخر مره افتكرت ولا لا
_ افتكرت يا بدر
قولت بذهول مصطنع
_ يعني الذاكرة رجعتلك
قال بحنق
_ انت بتلف وبتدور علي ايه فهمني
_ انا بلف و ادور ، بتقول كده ليه يا صاحبي
_ بدر انا علي اخري هتقول عايز ايه ولا لا
_ هكون عايز ايه في رأيك
_ معرفش بس اكيد مبتدورش عليه لله في لله.. عاوز مني إيه بعد اللي عملته انت وابن عمك
_ يعني فاكر مفقدتش الذاكرة اهو
_ انت عارف من الاول اني مش ناسي بتستعبط معايا ليه
_ ايوه كنت عارف ، بس انت كنت بتكدب ومعترفتش انك مش ناسي ف كنت هقولك إيه
_ واديني اعترفت احكي ، عاوز مني إيه تاني مش كفاية اللي حصل ولا مكتفتش وجاي تكمل
_ لا لو كده ف انت اللي مفروض تحكي انا كل حاجه عملتها معروف سببها انت بقا اللي كنت بتدس ومخبي كتير.. حبيت بنت عمي واتقربتلها بقصصك وبعدين حاولت تكلمها وهي خطيبتي وطلعت لسة محتفظ بالقصة الرومانسيه الدرامية اللي كتبتها وكنتوا انتوا الاتنين ابطالها.. فهمني إيه اللي بيحصل يا صاحبي
_ مسمهاش تقربتلها انا كلامي معاها كان عادي جداً وقدام اسراء وماما ، المرة الوحيدة اللي اتكلمنا ومحدش سمعنا كان في حفلة عيد ميلادها قدام عين الكل وكلامي معاها حتي لو فيه شويه تلميح بسيط ف هو متعداش حدود الاحترام بيني وبينها ، وده اللي انا اتحاسب عليه وهو كلامي معاها ، مش علي قصة من تأليفي ولا عن حاجة انا لغيت دلوقتي مش فاكرها واتضربت وكنت هموت عشانها
_ وانا كل ده ميهمنيش بعد ما عرفت اللي حصل ، انا اللي يهمني حاجة واحدة بس وهي محاولتك انك تكلمها ودخلتك عندها الحمام في القاعه وتخبيطك علي شباكها.. الحاجتين دول عملتهم وانت في وعيك وانت عارف انها كانت خطيبتي.. يعني في خيانه وقلت أصل
_ ممكن بس انا مكنتش قاصد خيانتك ، مكنتش قاصد افتح معاها حوارات ، انا كنت عاوز اعرف ايه هي الحاجه اللي مش هتسامحني عليها وليه هفضل شايل ذنبها زي ما قالت ل اسراء ، لو مكنتش عارف ف اسراء لما راحتلها طردتها وقالتلها ان ذنبها في رقبتي .. انا مكنتش عارف هي بتتكلم عن ايه وكنت قلقان كلمه زي دي تتنتور هنا او هنا.. انا كنت عايز افهم وبس
_ طيب ولما انت عارف انك مغلطتش مجتش قولتلي ليه بدل ما تدور حوليها
_ كنت هقولك ازاي وانا مش عارف هي قصدها ايه
_ انت لو واثق انك مغلطتش كنت جيت قولتلي بس انت كنت متأكد انك بتغلط
_ لا مغلطتش.. او اللي انا فاكره اني مكنتش غلطت
_ امال خوفت الكلام يتنتور ليه لو مغلطتش ايه اللي تخيلت تقوله
_....
_ مش عارف تقول ايه
_ اه مش عارف ، انت عايز ايه مش خلاص ضربتني وخدت حقك.. عاوز ايه تاني
_ كنت عاوز اسمع هتقول ايه وهتبرر موقفك ازاي
_ واديني قولتلك اني مغلطتش واللي حصل يوم عيد ميلادها انا مش فاكره ويمكن مكنتش صدقته لو اهلي متكلموش عن بقعة الدم اللي في هدومي وكلامها عن اني دخلت عندها وجرحتها ولا كلامي معاها قبل كده حصل فيه تجاوز
_ تاني هقولك ان اللي يهمني هو محاولاتك انك تكلمها لما كانت خطيبتي مش اللي حصل قبل كده
قال بنرفزة
_ قولتلك حاولت اكلمها علشان افهم واخليها تسكت عشان منخسرش بعض انا وانت.. انا وقتها كنت خايف اخسرك وبس.. انت بعد ما قولتلي انك عاوزها مع اني كنت طالب اقابلك علشان افتح معاك الموضوع واقولك طالب ايدها بس انا ركنت عواطفي ومشاعري والقصة اللي كتبتها في سنين عشانك.. خبيتها عشان متوقعش في ايدها لما حسيت انها عاوزاها مع ان لو قارتها كانت فهمت ان اللي حصل اتشطب من ذاكرتي وكانت عرفت اني مقصدتش أآزيها
_ ايوة يعني المفروض دلوقتي اقولك حصل خير ونبكي وكدة ولا ايه
_ ولا نبكي ولا نضحك، انا قولتلك اللي عندي وانت حر تصدق ولا متصدقش اصلا بعد ضربك ليه من غير ما تسألني كل حاجه انتهت واديني مشيت وسيبتلكم الدنيا كلها مبقاش في فرصة حتي نتقابل صدفة
_ تمام، تمام، فرصه سعيدة
قولت كدة ومشيت وانا حاسس بالندم اني روحتله ، كنت متخيل انه هيعمل اي حاجه تبينلي انه متمسك بصداقتنا او حتي احس منه بالندم بس لا ده اختار ينهي كل حاجة
#ريان
كان همي الاول في روحتي ليها هو عدم خسارته.. انا فكرت فيه وهو مع انه عارفني كويس من زمان مأحسنش الظن فيه ومفكرش يعاتبني قبل ما يعمل اللي عمله ، كان هيقتلني حتي بعد ما قولت اني مكنتش في وعيي هو اللي باع الاول وانا بعد اللي مريت بيه مبقتش حابب اتمسك بحد وبسهوله بفلت ايدي افتكر ان الفترة الجاية اي حد هيكون في حياتي هيكون بفضله هو هو اللي عاوز يكون جزء من حياتي وبيتمسك بيه كفاية علشان مبعدش عنه
#إسلام
بعد طلوع الروح وافقوا يخلوني اقابل نيرة بعد ما حولولها من القسم لسجن النسا وهناك كانت الدنيا زحمة ومفيش فرصة اني اقربلها بأي شكل ف كانت القعدة كلها هادية من الناحية دي وبعد ما قعدنا قالت
_ ده انا قولت نسيتني ومش هتيجي تاني
_ كلام إيه ده انا حاولت كتير بس مقدرتش اقابلك
_ طيب وعملت أيه في الحوار اياه ولا شيلته من دماغك
_ لا اشيله إيه تارك هو تاري يابت ، انا طلبت ايدها و وافقوا
_ نااااعم يا عنيا هي مين دي اللي طلبت ايدها
قولت وانا بمرر عيني حوليه
_ بتشرديني ليييه اقفلي بوقك
_ يعني ايه طلبت ايدها
_ يابت افهمي انا ملقتش طريقة تانية البت مكنتش هتيجي كدة من غير حاجه.. ده حتي لما طلبت ايدها حاسس انها معصلجه مبتفتحش كلام وباين اني مش نازلها من زور
_ انت هتصيع عليه ولما انت مش نازلها من زور وافقت ليه ياخويا
_ يابت وطي صوتك الناس بتتفرج علينا وهشرف جنبك
_ لا ما انت تفهمني ايه اللي بيحصل ورا ضهري
_ يابت افهمي !! هي وافقت علشان تضايق الواد بتاعها بتغيظه بيه يعني
_ ومين الواد بتاعها ده
_ الدكتور المعفن اللي حكتيلي عنه
_ وانت مين قالك الحوار ده.. دي كانت بتكرهه
_ كانت بس أكيد حبته بعد ماعمل بطل قدامها.. لا والاحلي ان هو كمان شكله واقع والاتنين بيستكردوني
_ اااالله واية كمان
_ كل ما يشوفني تطلع زرابينه ويقل ادبه لغيت ما كراسته اتملت معايا وجبت اخري منه
_طيب ما تشوفله مصيبة هو التاني ساكت عليه ليه
_هه اسكت.. ده انا اسلام وانتي عارفاني الدبور اللي بيزن فوق نافوخي بفعصم اللي جابوه بالشبشب ، ومن غير ما تقولي المصيبه هتروحله بكرة وهيشرف في السجن وشغله يضيع منه كمان
_ جدع يلا.. بس هتعمل ايه قولي
_ هجرس اهله قدام الناس كلها واخلي اللي ما يشتري يتفرج وكمان نكره فيه البت اكيد بعد الحركة دي مش هتبص في وشه تاني ومش هتلاقي صدر حنين غيري
#مليكة
طول الوقت التليفون سايلنت علشان اتصالات جويرية ورسايلها واللي زاد عليهم اتصالات هاجر اللي جت فجأة من غير سبب ف بقيت طول الوقت ابص لتليفون لما ينور واقلبه علي وشه واسيبه قدام نظرات ماما اللي بقت تسألني كل شوية مين وانا اقولها زمايلي وصحابي وبعد ما زاد شكها فيه مسكت التليفون وفتحت السجل لقت اتصالات كتير من جويرية و هاجر ف بصتلي وقالت
_ مبترديش عليهم ليه
_ مبردش؟
_ اه مبترديش ليه
_ انا مبقتش فهماكي ، انتي عاوزة ايه بالظبط يا ماما اكلمهم ولا مكلمهمش
_ تكلميهم وتقوليلهم مش عايزة اعرفكم تاني
_ كدة من غير سبب
_ وانتي عاوزة اسباب ايه اكتر من اللي هما فيه
_ يعني هقولهم متكلمونيش ده انتوا جدودكم كانت عاداتهم وحشة ومش عاجبه ماما
_ بلاش اعملي بلوك
_ ياماما انتي عاوزه تحرجيني وخلاص طيب ولما اعمل بلوك وهاجر تقابلني في الجامعه اقولها أيه
_ متقوليش مش مطلوب منك تقولي اسباب
قولت بعصبية وانا بحطهم في البلوك
_ اهووو يا ماما اهوو.. عملتلهم بلوك.. حلو كده ... واهو التليفون مش عاوزاه
قولتها وانا برمية علي الكنبه وبعدين دخلت الاوضه وسيبتها ف جت ورايا تقولي
_ بتعلي صوتك عليه يا مليكة
_...
_ ردي عليه بكلمك
_ متأسفة يا ماما
_ ماشي يا مليكة براحتك.. خدي
قالتها ورمتلي التليفون علي السرير ومشيت وزي عادتي وعادات ناس كتير لقيتني بنزل ستوري يعبر عن الحالة اللي انا فيها وبعد ما نزلتها وهديت شويه رجعت علشان احذفها ف لقيت بدر باعتلي عليها وبيقولي
_ اول مره اشوف حد عنده الحرية الكامله انه يروح ويجي ومحدش يقوله رايح فين وجاي منين ويكون عنده أسباب يزعل
_ قبل ما اعرفك مكنتش بزعل بس في ناس كده قدمها شؤم
_ عندك حق انا كمان من وقت ما سمعت صوتك في التليفون وانا من مشكله لمشكلة
_ وبعدين في جر الشكل ده
_ مش جر شكل قوي.. مالك قلباها نكد ليه
_؟؟؟
_ ايه هو ده .. هو انتي من بتوع انت ازاي تسمح لنفسك تدخل وكدة اوعي هعملك بلوك وربي
_ هههه هو انت حد في عيلتك اهبل
_لا لا الا العيلة دي فيها جلد دي
_ ومين بقا اللي هيجلديني
_ اللي يجلد بقا .. ارغي قولي مالك
_ ارغي؟
_ اااه ارغي كُري الخيط.. انجزي
_ طيب والله في حد في عيلتك اهبل
_ بت انتي والله انا علي اخري وما طايق كلمة من حد هتقولي ولا تغوري
_....
_ يعني هتغوري طيب غوري ربنا ياخد البنات كلها هما اوس المصايب
_ هههههههه انت عبيط يابني لا بجد انت عبيط
عمل اضحكني وقال
_ احياناً
_ متاكد انه أحيانا بس
_ بطلي لوك لوك.. قولي بقا في ايه
_ انت مين فهمك اني ممكن احكيلك ايه اللي مضايقني.. انت ليه عشري قوي كده
_ انتي لو مكنتيش عاوزه تحكي اللي مضايقك مكنتيش نزلتي ستوري هبله تعرفي الناس انك زعلانه
_ طيب يمكن قاصده صحابي
_ طالما مخفتهاش عني ورقمي مسجل عندك ف انا من ضمن صحابك دول او من ضمن الناس المسموح ليها تدخل
_ ههههه طيب والله في حد في عيلتك عبيط
_ انتي هترغي ولا اقفل
_ اقفل
استلمها ومردش لدقايق وخلف ظني بانه هيبعت تاني ف بعتله انا وقولت
_ طلعت بتحس
رد عليه بعد دقايق وقالي
_ ولا فرق معايا بس انا مش هحايل فيكي علشان تتكلمي
_ هههههههه طيب والله عبيط
_ وبعدين!!
_ ماشي هقولك
_ هاااا
_ بصراحه شديت مع ماما بسببكم
_ مش عاوزاكي تعرفينا بردو
_ اه وعملت بلوك ل هاجر و جويرية عشانها
_ وانا
_ وانت إيه
_ سيباني ولا هي متعرفش اني بكلمك
_ لا مجتش مناسبة اقول وبعدين ايه بكلمك دي.. احنا مش صحاب علشان تقول الكلمه دي
_ اها
_ اها ايه كلمني زي ما بكلمك
_ اوكي اوكي انا فاهم انه مش سهل تقولي لمامتك انك بتتكلمي مع شباب ف عادي
_ شباب ايه؟ لعلمك انا اول مره اكلم حد كده انا كل اللي براسلهم بنات او شباب في شات الكلية بطل تخلف متقفلنيش منك
_ يعني ايه
_ إيه
_ ولا حاجه وحتي لو كلمتي ما تكلمي هو انتي كنتي خطيبتي
_ انت انسان متخلف
_ متزودهاش لحسن والله اجيب رقم امك واقولها بتكلمني
_....
_ ايوه كده هاتي ورا
_....
_ الخوف حلو
_....
_ انتي ، روحتي فين
_...
_ الوووو
_....
_ مليكة
_....
_ طيب اتقفشتي ولا ايه طمنيني اجيب الكفن طيب هههههههه
_...
_ علي فكره انا بهزر معاكي عارف ان طريقي رخمة شوية بس انا كدة.. ردي انا اسف
_ انت مش اسف انت متخلف
_ خلاص بقا سوري
_ ماشي.. مع السلامه
_ يا زفتة استني.. انا بجد بهزر دي طريقتي في الهزار
_ طريقة مستفزة
_ خلاص بقا انتي هتظيطي فيها
_ مانت بتضايقني
_ انا اسف و اسمعي انا هقولك تعملي ايه مع امك
_ قول
_ استعطفيها
_ يعني ايه
_ يعني استغلي انك وحيدة وحزينة ومنكسرة وحسسيها انها بتحرمك من ناس بتحسي معاهم بالراحة
_ لا طبعاً
_ ليه دي طريقة كويسة قوي لو امك من النوع الحنين
_ حنينة بس هي خايفة عليه
_ وانتي شايفة ان خوفها في محلة ، ايه الخوف في تواصلك مع هاجر و جويرية
_ هي علي عاداتكم وبصراحه انا حكتلها اللي حصل مع ريان وتصرفكم معاه
_...
_ انا متأسفة بس انا مبعرفش اخبي عنها حاجة
_ عادي.. علي فكره قابلته تاني النهاردة
_ طيب وحصل إيه
_ اتعاتبنا وتقريبا كل حاجه انتهت
_ مش فاهمه يعني ايه اتعاتبتوا وهو فاكر حاجه عشان تتعابتوا
_ هو منسيش أصلا.. كان بيتهرب من اي كلام ممكن يتقال
_ يعني كان بيخدعنا
_ مسمهاش خداع هو لقي ان دي طريقة كويسة يبعد بيها من غير ما يتكلم بس منجحتش واتكشف بسرعة
_ طيب واية اللي حصل خلاك تقول ان كل حاجه انتهت
_ الكلام والشرخ اللي حصل بينا.. حتي لو انا تجاوزت اللي حصل هو مش هيقدر ينسا ضربنا ليه.. في حاجه اتكسرت مفتكرش ممكن تتصلح
_ ممكن لو انتوا حابينها تتصلح
_لو بقا.. المهم انتي جربي الحيلة اللي قولتلك عليها وهتنجح.. يلا انا لازم اقفل ورايا شغل
#فاطمة
رجعت البيت بعد ما زوغت ساعة مع بجاد ولما دورت علي بابا ملقتهوش مكنش في غير تليفونه علي الكوميدينوا وبعد ما مسكته وخرجت من الاوضه وانا بتصل ب بجاد من تليفوني شوفت بوقعة دم قدام الباب قربت منها وفي اللحظة دي رد بجاد ف قولت بقلق
_ بجاد
_ وحشتك ولا ايه
_ بابا مش في البيت وفي دم علي الارض
_ يعني ايه الكلام ده
_ معرفش انا قلقانه ليكون حصله حاجه
_ طيب هكلمك تاني
قال كده وقفل معايا وبعد شوية رجع يتصل وقالي
_ ايوه يا فاطمة
_ عرفت حاجه
_ ايوه ، هو تعب شوية واتصل ب ماما تيجي تكشفلة ف خدته المستشفي علشان محتاج تحاليل
_ تعبان ازاي .. ماله بابا
_ نفس التعب بتاع المرة اللي فاتت متقلقيش هيكون كويس
_ طيب انا عاوزه اروحله
_ طيب هجيلك
_ متتأخرش عليه
استنيته لغيت ما جه وروحنا علي المستشفي وهناك وقفني قبل ما ادخل اوضته وقالي
_ استني ، هو نايم دلوقتي بصي عليه من غير ما تدخلي
_ ليه هو عنده ايه بالظبط
_ ما انا قولتلك نفس تعب المرة اللي فاتت
_ في ايه يا بجاد انت مخبي عني حاجه
_ هخبي عنك إيه بقولك تعبان شويه.. ضغطه اتلخبط
_ بجاد
_ يابنتي مفيش مالك
_ مفيش ازاي.. واللي ضغط ملخبط ينزل منه دم ليه
_ عادي بتحصل يا فاطمة.. روحي بصي عليه وتعالي بس متدخليش هما قالوا خليه يرتاح
دخلت عنده وانا حاسه ان في حاجه اكبر من لخبطت الضغط واتاكدت لما دخلت عنده لقيت صدره مكشوف وعليه اقطاب وجهاز التنفس علي وشه قربت منه ف مسك بجاد ايدي وقال
_ رايحة فين هو نايم
قولت بصوت مختنق
_ بابا حصله إيه.. ده مش ضغط.. الضغط مش بيعملوله كدة انا مش غبية لدرجة دي يا بجاد
_ طيب اسألي ماما والدكاترة كلهم وهما يقولوك
_ لا انا بقولك في حاجه تاني غير الضغط.. وسع
قولتها وانا بشد ايدي منه ف قال وهو بيرجعني
_ يا فاطمة بقولك الدكاترة قالوا محدش يدخل لما يصحا ابقي شوفية
خدني بره رغم اعتراضي و وقتها شوفت الدكتور جاي وبيقول
_ مين سمحلكم تدخلوا عنده
قولت بتلهف
_ بابا عامل ايه يا دكتور
_ انتي بنته
تقدم بجاد وقال
_ طمنها يا دكتور هي مش راضيه تصدق انه ضغطه مش متظبط... انا ابن الدكتورة وفاء واكون ابن اخته
وزع نظراته بينا وقال
_ اهلا وسهلا.. اطمني يا انسة هو كويس شوية وتقدري تشوفيه.. عن اذنكم
قال كده ومشي ف رجع بجاد يقولي
_ اطمنتي دلوقتي اهو قالك انه كويس
قولت بعد ما نزلت دموعي
_ انت نبهته علشان ميقولش عنده إيه.. بابا تعبان وانتوا مخبين عني انا دلوقتي عرفت سبب طلبه مني اني مسبهوش
_ هيخف صدقيني.. ماما وكل الدكاترة جمبه لغيت ما يخف بس انتي اهدي لازم تكوني قوية قدام
قولت ببكاء
_ طيب قولي عنده إيه
_...
_ قول
_ عنده تعب في القلب
#زيد
من وقت ما مشيت خلود من العيادة وانا بشتغل لوحدي وطبعًا الموضوع ده مأثر سلباً علي شغلي والجلسات ف كلمت واحد يشوفلي حد جديد يقعد مكانها ..
ولأن مكنش لسة لقي حد اضطريت كل يوم اروح العيادة قبل معادي بساعتين اظبط المواعيد وبعد ما روحت ورتبت المكان هناك واستقبلت التليفونات وشوفت تسجيلات الكاميرا لقيت واحده داخله عليه
جسمها مليان شوية ولابسة عباية ضيقة جداً مفتوحة علي الصدر وحاطة مكياج بشكل مبالغ فيه وريحة بارفانها قوية وبتمشي تتمايل وتنعم في صوتها وهي بتقولي
_ السلام عليكم
قولت وانا حاسس بالاشمئزاز منها
_ وعليكم السلام.. مين حضرتك
_ نعمات عبدالله ، انا حاجزة مع حضرتك علي النهاردة
_ اه.. تمام اتفضلي
خدتها ودخلنا جوه ف قولت وانا بفسحلها الطريق علشان تعدي بعد ما حسيت انها قاصده تنهي اي مسافة بينا
_ اتفضلي ، اقعدي علي الشزلونج اللي هناك ده
استدارت ليه وقالت بدلال وهي بتشاور عليه
_ هنا
_ اه
_ طيب
دخلت وهي بتمشي بدلع وبحركات بتزيد توضيح مفاتنها وقعدت علي الشزلونج وعشان ترفع رجليها رفعت العباية عنهم واظهرتهم لفوق الركبة قبل ما ترجع تداريهم تاني وتتمدد باسلوب فيه اغراء .. ساعتها فهمت مشكلتها من غير ما تتكلم كان باين قوي هي عايزة ايه ومع كدة جبت الدفتر والقلم وقعدت زي ما بقعد مع اي زبون مكنتش اعرف ان دي غيرهم وكان لازم امنعها تدخل من اول ما شوفت لبسها والمكياج اللي حطاه في وشها
#بشر
رجعت من الشغل لقيت زيد واقف في البلكونة ف روحت عنده وقولت
_ مروحتش الشغل النهارده ولا ايه
ازدرد لعابة وقال وهو بيشيح بنظره عني
_ لأ
_ ليه
_ كدة
قولت بعد ما لمحت اثر روج علي رقبته
_ اية ده يا زيد
_ إيه
روحت جبت منديل من الصالون ورجعت مسحت الروج من علي رقبته وقولت وانا بوريهوله
_ آيه ده؟.. روج؟
قال وهو بيمسح رقبته بتوتر
_ إيه ده
_ انا اللي بسألك ايه ده.. ايه اللي بيحصل احنا منعرفهوش
_ يابني مفيش ، دي...
بتر كلمته لما سمع صوت جرس الباب وتخبيط شديد وقتها الكل خرج من الاوض وانا روحت افتح وهو ورايا ف لقيت ظابط و وراه اربع عساكر وبيقول بعد ما عينه استقرت علي زيد
_ انت زيد
قولت
_ في ايه يافندم
_ ااانت زيد
قال
_ اه يافندم انا.. في ايه
_ هاتوه
قولت
_ هاتوه ايه يافندم هو عمل ايه
قال زيد
_ ايه تهمتي علشان تاخدوني
_ هتعرف كل حاجه في القسم .. هاتو يابني