رواية سما
الفصل السابع 7 والاخير
بقلم وسام الفراجي
صاحني مصطفى من الحديقة شعندج برا ..
والولد اجه واني رجعت للبيت وكلي فوتي جوة ..
وطلع هو عالباب وكلبي وكف يمكن الولد الصغير راح يسلم الورقة لمصطفى !
اسمع صياح ايهاب عالولد تعال هاك تعال هاك ..
يحاول يلفت انتباه الولد الصغير ..
اني داخل ما اعرف الولد وين متجه ..
اذا لمصطفى فاليوم يكطعوني ..
واذا رجع فهاي فرصة اليه اعيد نفسي لان صايرة خفيفة الى درجة مو طبيعية ..
باوعلي مصطفى ..
وكفتج هنا مو راحة
كتله ليش يابه مو راحة ..
كلي ما ادري ما مستنظف وكفتج .. فوتي جوة فوتي ..
فتت جوة وسد الباب مصطفى ..
و صرت اريد اعرف المكتوب بالورقة شنو ؟
ولازم اشوفلي طريقة اعرف بيها المكتوب!
ظليت ساكتة لثاني يوم ..
الصبح طلعت لكيت خالي مو رايح للشغل سلمت عليه وكعدت يمه جان يكلي البارحة مريت ع بيت عمامج و بس اني الي شوي غريب بيهم وكعدوا ولد العم بس ..
و اتفقوا بالاخير الموضوع خطير وراح يجيبلنا سمعة مو زينة كلما كبر والتحرش اله فصل محدد والضربة هاي الها فصل محدد ..
واذا فصلنا العالم راح تكول شالسبب ..
واحنه نريد نطمطم السالفة ..
هم مو حلوة بحق عنتر وابنه واولاد ابنه المستقبليين يكولون ابوه او جده متحرش بمحارمه ..
ف صارت سالفة منا واعتراض منا بالاخير صارت السالفة سد بسد يعني تحرشه بضربته انسدت بس لازم انتم تشيلون من الديرة وتبيعون بيتكم وهذا الفصل مالت عينه الي راحت ..
وابوج وافق يبيع ويطلع ..
وعرض بيتكم للبيع وجاي يدورلكم ع بيت ..
اني كمت ابجي شصار بينا وشصار بـ ابوي خطية تبهذل وماسمعني كلمة زايدة ..
لزمني خالي وحضني ..
وطبطب ع ظهري كلي ميخالف بنت الحياة دروس ..
كتله زين و زوبع شسوة ؟
كلي مموجود بالدورة الوضع صاير مو زين حيل ويريدون يجهزون اكبر عدد ممكن ..
كتله خالو اريد اكلك ع شغلة ومستحية كلي شنو
كتله
ـ اريد اشوفك ورقة تقرالي اياها
ـ ورقة مالت شنو يعني
ـ ورقة لكيتها بالشارع وشلتها ..
ـ ههههه يلا جيبيها
جبتها ومترددة شنو ممكن يكون بيها خاف حجي مينكال وخالي يسويلي سالفة ..
كتله خالي مدري وينها ضيعتها ..
ضحك هو وكلي من تلكيها عود ..
اندك الباب طلع خالي عليه .. فتح الباب شفت هاي البنت الي تصير اخت ايهاب عالباب ..
شوي وباوعلي خالي كلي تصيحج #رقية ..
الله شحلو اسمها! رحتلها سلمت عليها
هلا حبيبتي شلونج شخبارج ..
يوكتها رنا نايمة ..
كتلها فوتي كالت لا والله مستعجلة ..
بس ردت اسألج سؤال صغيروني ..
ـ انتِ مرتبطة محجوزة لأحد من كرايبكم؟
ـ شهالسؤال المفاجئ هذا هههه
ـ والله ادري مو راهمة شغلتي عالباب واكفة واسأل هيج سؤال بس مكلفة بي يا ام شامة بالايد ..
ـ هههه شمدريج شامة بالايد
ـ تريدين صراحة ؟ ممم
ـ اييييي اكو احلى منها
ـ اني ميخلوني اطلع اصلا بس ايهاب كلي استفسري من هالبنت الجديدة وكلي بيها شامة بيدها صغيرة انوب اشوفها انوب لا
ـ عن شنو تستفسرين ؟
ـ متزوجة عمامج يريدوج لان هو ناوي يتقدملج ويريد بنت صغيرة يربيها ع ايده
اني كلبي فرفرح معقولة راح اصير ببيت هيج مثقفين وناس حضر ومحترمين! كلت الها
ـ لا ممحجوزة بس يعني خاف مينطوني اهلي لان صغيرة خصوصا ابوية
ـ ينتظرج بوية غير مخبلة ابنه
ـ ههههه دفوتي اكعدي والله حبيتج
ـ بعد روحي مكدر اطول يلا من رخصتج وعود نتفاهم
رجعت للبيت اريد اطير الكاع متشيلني ..
صعدت لغرفتي لكيت رنا نايمة بعدها ..
كعدتها كلت الها اريد اسولفلج سالفة ..
كلتي ولي خل انام عود من اكعد ..
باوعت جوة مخدتها ورقة مكتوب بيها غير ورقتي ..
سحبتها و سوت الورقة صوت هي فزت ولزمت الورقة اخذتها
من ايدي ..
عقلي صار ميستوعب شجاي يصير ..
هي كعدت وكلتلي طيرتي حتى النومة شبيج ..
اجت امي كالت وحدة منجن تروح للمحل بلكي تلاكي بيض عدهم ..
زمن خلانه نشتري بيض واحنه جنة نوزع بيض للعالم
كلت الها اني اروح ..
رنا كعدت هي وشعرها منفوش وكالت
لا اني حروح
كالت امي امشي اثنينجن يلا بسرعة ..
غسلت رنا وعدلت ملابسها ورحنا اثنينه عليه ..
طبينا للمحل وهو جان عنده زبائن جاي يبيعهم ..
من شافنا صفن علينا اخذله خوش صفنة ورجع يوزن للزبائن وكل شوي ينطينه نظرة المتفاجئ ويرجع يوزن ..
ظلينا واكفين اني و رنا سوة
حدما خلص جان يباوعلنا!
- انتم توم!
- اي ليش؟
- ما ادري تخربطت الافكار براسي
ـ شبيك ايهاب ؟
ـ ما بية ما بية انسي السالفة
ـ احجي شكو
ـ ماكو شي بس المفروض منبهيني انتم توم واني احسبجن واحد
ـ وشنو الي يتغير يعني اذا توم او لا
ـ يتغير هواي
ـ شلون ؟
ـ بعدين تعرفين هالكم يوم هاي كوليلي هسة شرايدة
ـ بيض
ـ شو الثانية متحجي شي ..
رنا : لأن اني فهمت الي جاي يصير ..
ايهاب : شلون فهمتي !
رنا : انطيني البيض خليني اروح
ايهاب : احجي شبيج
رنا : يلا سما نروح
ايهاب : سما! لعد انتِ شسمج
كتله اسمها رنا
ايهاب: رنا وسما و توم! لعد اني لصت الدنيا والله ..
شو رنا سحبتني كالت امشي يلا ..
كتلها اوكفي نفتهم منه كالت امشي اكلج ..
مشيت وهو بحلكه حجي..
طلعنا برا كلت الها شبيج تخبلتي الزلمة جاي يسولف
كالت من نوصل افهمج!
وصلنا وامي كالت طكوا البيض وسووا ريوك ..
وتريكنا وكملنا وغسلت المواعين ..
جان تصيحني رنا وتكلي تعالي اكعدي احجيلج ..
رحتله اكثر من مرة و حسيته يعرفني وهو كلامه ثكيل و رزن
وتفاجئت من سلمني ورقة مكتوبة بخط ايده .. وكلي لا تفتحيها حدما توصلين البيت ..
رغم جنت مارايدة اخذها بس صار فضول اعرف شنو هالورقة المهم لح عليه واخذتها ..
وفتحتها قبل ما اطب البيت حتى محد يشوفني ..
كاتبلي بيها
" ماعندي الجرأة الي تخليني احجيلج اريد اعرفج احد من كرابتج محاجي عليج لو اتقدم !"
اني ما رديتله اي رد وارتبكت من قريتها شنو اتقدم شمعرفك بية وضميته اول ما طبيت الباب ..
وصرت من اروحله بحلكه حجي يريد يعرف ردي ..
كتلها اوكفي لحظة
كمت رحت كالت وين كتلها اصبري ..
طلعت الها الورقة كالت شنو هاي كتلها هاي نطاني اياها ..
فتحتها وجان تقراها
" اذا ما رايدة عادي كولي واسحب نفسي شو مرة تجين شايلة ابتسامة ومرة مبولزة خبلتيني مثلما خبلتني شامة ايدج مرة اشوفها ومرة ما اميزها "
كلت لرنا مافهمت شي كالت اني فهمت!
هو يريد يتقدم وميعرفنا توم فمتوهم بينا مرة انتِ تروحيله وعندج ابتسامة عرييييضة!
ومرة اني المبولزة ..
ـ زين هو رايد منو ؟
ـ رايدج يا ام شامة! اذا ابوية قبل يزوجج هالوكت ..
ـ شمدريج رايدني ؟
ـ هو يدورلج ام شامة الي بيدج واني يتوهم بية يحسبني انتِ اذا الله تمم ع خير خوش نصيب لتضيعينه ..
ـ كل عقلج جاي تحجين ؟
ـ اي والله لو متقدملي ما ارفضه
عفتها واخذت صفنة معقولة راح تفرج واخذلي واحد يعوضني عن كلشي صار بيه من تحرش واتهامات ..
صاحتني رنا لتصفنين ولتطلعين لعد برا
خلي هو يتفقدج ..
صارت امي من تدزنا هي تروح تكلي اثگلي ..
وخلي يفتقدج
وتجي تكلي يسأل عليج واني اكيف كلش ..
مر اسبوع كامل على هالوضعية
حدما تقريبا الساعة 5 العصر ..
اندك بابنا و رنا فتحت الباب ..
وفاتت عجوز لابسة عباية وبنت باوعلتها زين لكيتها اخت ايهاب ..
اني كلبي صار يدك بسرعة و صارت افكاري يمين يسار معقولة سواها ؟
كعدن وشربن جاي جان تصيح وينها ام شامة البيدها كالت امي شنو هالانتباه هذا
كتلها نعم خالة اني ..
كالتلي تعاي يمي حياتي شهالجمال كتكوتة صغيرة .
اني خجلت من سوالفها وكالتلي امي روحن انتِ ورنا فوك ..
نص ساعة واني كاعدة ع نار حدما صعدت امي وسدت الباب وكعدت عدنا كالت ..
جارتنا اجت تمشي ع سما ومتخبلة عليجن وين شايفتجن ؟
كتلها ابنها ابو المحل
كالت اها واني اكول وين شايفتجن
لزمتني من اذاني وكالتلي خوما جاي تلعبين بذيلج ؟
كتلها يمة شسالفة هو اشتري منهم واجي بعدين انتِ
شكلتي الها ..
كالت شكوللها يعني ابوها مو هنا هو الي يقرر بس اعتقد مايزوجها هسة لان صغيرة ..
كلتلها تراني جبيرة ليش صغيرة ..
ردتلي اشش لج اثكلي صايرة عوبة كل حيلج ..
سكتت اني ..
رنا كالتلي
ـ زين اذا تقدملي اني مو انتِ ترضين ؟
ـ بس هو تقدملي هسة!
- فرضًا جاي احجي شبيج اكلتيني
- اي الله يسعدكم ليش اوكف بنصيبكم
- زين ليش ياخذج انتِ مو اني
- اهو جاي اكلج لنفترض يعني مجرد خيال
- تمام تمام بس هو تقدملي وخصص الي شامة ب جف ايدها ..
ـ اي الله يسعدج ..
حسيت رنا بداخلي حجي وماجاي تطلعه بخصوص هالموضوع ..
ظلينا يومين واجه ابوية علينا وسلم علينا وباسنه وكعد شوي وكال لكيت بيت بمنطقة ثانية بس ايجار ..
وهالكم يوم نتحول عليه وسألته امي ع الي صار بالجديد كال البيت راح يشتري هلال احسن ما ياخذه غريب
بس فلوسه مو كاملة ..
واني مجبور اخذ ايجار لان ماعندي فلوس اشتري بيت حاليا من غير الصرف الي صرفناه ع عنتر ..
جان يكول صدك زوبع مفقود صار 6 ايام ومحد يعرف عنه شي ..
وجاي ندورله بكل مكان ..
اني مكدر اطول عينج عالبنات ..
راد يكوم صاحته امي كالتله اعرفك مستعجل اجتك مشية عالبنات
كلها بالله عليج وكت مشيات هسة واعراس متشوفيني مخبوص خبص ..
جهال ذني جهاااال افهمي ..
عاف امي وراح بعدما رزلها ..
امي زعلت لان صيح عليها كدامنا وكدام خالتي وهو راح ..
ماكو ساعة ساعتين ورجع للبيت كاللها ما ارتاحيت الا رجعتلج ..
صيحت عليج من عصبيتي لان اني وين وانتم وين ..
منو الي تقدملهن ؟ واثنينهن او وحدة ؟
كالت جيرانة هنا ناس واعيين ومثقفين
ويريدون سما
فر راسه وباوعلي نزلت راسي بالكاع اني
حط ايده ع شعري وكلي اذا تريدينه وامج راضية بي رديلهم موافقين!
بس اسألوا عنهم اول لان اكيد راح يسألون عنكم هم
اني متت من الفرح بس مكدرت اعبر عن فرحي يروح يلطشني بالكاع ..
واخييييرا راح افرح ويتحققلي شي زين بحياتي ..
باوعت لرنا ضاجت كلش وكالتلي مبارك من خشمها وزعلانة وضحكتها مو من داخلها ..
خالتي تريد بس تخلص من عدنا ..
اجه مصطفى للبيت وتلكاني وكلي سمعت اخبار جديدة اليوم!
ـ اي شنو بيها !
ـ يعرف ماضيج!
ـ تلم حلكك لا الم عليك البيت كله ترا
ـ هههه مكرود هالولد اله الظاهر بس خوش عندج ركبة والله ريحتها تخبل
ـ ليش ما تحترم نفسك وتخلي لنفسك قيمة احسن!
- والله شبيج ذيج الليلة ما انساها بحياتي ماتخيلت هيج حضنج طيب وتالي الليل افف ذبت بذوبان بيج
ـ انتَ الي سواها ذيج الليلة! يا قذر
ـ ههههه خطية ايهاب ميدري قبله 3 حاضنينها هاي اذا طلعت بكر
متحملته ضربته راشدي وكتله انتَ انسان ساقط ..
باوعت للباب لكيت رنا عالباب!
ماسوت اي ردة فعل لفت ظهرها وصعدت فوك ..
عفته ولحكت رنا ..
وكفت كبالها شبيج ؟
ضربتني راشدي وكلتلي انتِ سافلة شنو هالحجي الي حجاه مصطفى
كتلها افهمي واحكمي ..
حجيتلها الي صار بس ما اقتنعت بية لأول مرة مدري شنو تغير وليش هيج صار تعاملها ورا ما تقدملي ايهاب ..
بعد يومين بالتمام اندك الباب العصريات وطلعت الحجية ام ايهاب ..
وفتحت موضوعي اني وايهاب واني واكفة عالباب اتجسس ع حجيهم وفرحانة
وامي كالتلها احنه موافقين بعدما سألنا عليكم وادري بيكم تنتظرون جواب ..
جان تردلها ام ايهاب لحظة شوي ما فهمتيني ليش جاية خليني اكمل ..
اني اجيتج ع وحدة من بناتج وتعرفين لازم واحد يسأل عنها ورحنا سألنا لمنطقتكم والصراحة حجولنا حجي يوكف شعر الراس لذلك اني وايهاب قررنا نترك الموضوع واني كلش خجلانة منكم بس تعرفين هاي عمر مو يوم ويومين
وايهاب من سمع الحجي الي عليها والتحرش والقصص من اكثر من شخص طلعت من عينه وكلي اذا ينطونه اختها راضي بيها حتى ميكولون تراجعنا لان بالعكس احنه ردنا بحلال الله بس تكون شوي ماعليها حجي!
وبكيفكم بعد!
اني روحي صارت تنسحب مني ودم ما ظل بية
طبيت عالباب واكفة وكتلهم
ليش شبية اني وشنو ناقصني واذا تحرشوا بية قابل برضاتي !
غصب عني صارت كل هالامور حسبي الله ع كل واحد يخرب ببنات العالم حسبي الله
جان تلزمني رنا وتكلي امشي اصعدي
طلعتني وصعدت فوك انهاريت ابجي ودموعي تمطر مطر ..
جان تكلي رنا العمر كدامج ترا بعدنا صغار ولوما هالقصة الي صارت وابوي صار يريد بس الستر ما يزوجنا لهيج عمر ابد ..
كلت الها ..
ـ انتِ موافقة ع ايهاب؟
ـ ليش شناقصه خوش ولد
ـ بس هذا بنفسي جان
ـ ميخالف يتغير كلشي مع الوقت
ـ رنا شبيج جاي اكلج اني اريده
ـ لتخبصين هواي مايريدج ورفضج من ورا الكلام الي طلع عليج فلا تخربين قسمتج وقسمة اختج وياج لان اني شنو ذنبي هم اريد اتزوج انسان زين
ـ روحي تزوجي الله يسعدج ..
متت قهر ليش هيج حظي وكلها من وره ناس تركض ورا شهوتها وتتحرش وتروح وتظل البنت هي الضحية ..
ضحية اذا صار شي وانكشف
وضحية الخوف والذاكرة الي تظل براسها حتلو ما انكشف
اجه ابوية للبيت ثاني يوم
وكلنا يلا حضروا نفسكم لكيت بيت ..
وكلنا اله القصة وكال ماكو فرق بين رنا وسما المهم نصيب زين ..
الوكت هذا مو زين والواحد يستر ع بنته ويخلص من ذمتها
امي راحت ع بيت ام ايهاب وبلغتهم حنشيل لغير بيت ونطيتهم المكان الي وصفه ابوية علمود يكملون الاجراءات ..
اخذنا غراضنا وطلعنا للبيت الجديد واني مكسورة واهس والحياة طافية بعيني ..
وتحملت سوء نية الي يتحرشون لاني سكتت عنهم ولو حاجية ما صار الي صار وصرت اتعير من كل واحد يتقدملي ..
المهم الشخص الي اختصرت احلامي كلها بي صار لأختي .. و اختي ما راعت شعوري ورادت ايهاب هواي .
وابوي تفهم الامر واعتيادي والكل فرحان وطبيعي الا اني احس بغصة ويا كل شغلة تصير بالبيت الجديد ..
حدما اجت المشية الي تمنيتها المشية اليه ..
وصارت الكعدة واتفقوا ع كلشي بسلاسة وسهولة سبحان الله لو اني الف عثرة تصير بيها
تريدون الصراحة جنت اتمنى ما تاخذه حتلو اختي ..
تزوجت رنا!
ههه اي تزوجت رنا ايهاب وصارت مرته
حسيت بفراغ جبير بالبيت بس اني و رنا الي جانت وياي بكلشي راحت
راااااحت ههههه
بعد ماكو رنا
تزوجت واختصرت خطوبتها وزواجها ب اسبوعين ..
بعد عرس رنا بشهر اجر خبر استشهاد زوبع بعدما جان مخطوف هو و 2 وياه ..
صارت فاتحته واحنه مارحنا لان ممنوعين بس ابوي راح ..
شنو استفاد هسة وراح يتحاسب ع كل كلمة واعتداء سواها بية ..
ظليت وحيدة بالبيت اني والحيطان وافكاري ..
حاولت اتجاوز هاي الفترة ومشوا عليه تقريبا 5 ولد وللنص ويهربون من يسألون عني بمنطقتنا ..
رنا تزوجت ومشى العمر ..
مشى العمر
مشى العمر
حدما اجتي سنة 2020 يعني بعد زواجها ب 6 سنوات اتذكر لهسة الدنيا باردة ثلج وحاطة بطانية ع جتفي وجانت وقتها كورونا طاشة ..
اني صار عمري 20 سنة ..
وكل شخص يجيني من يسأل عني يبطل عبالك بنت ليل ..
حطت راسها ع جتفي جان تكلي صار 6 سنين متزوجة وكلشي سويت حتى يجيني طفل وماصار ..
ظليت افكر واسأل حدما سألت عن هالشي كالوا ممكن اكو احد داعي عليج او مأذيتها او مسويتلها شي خليها تسامحج خاف هي الي معترضة لحملج ..
وفكرت هواي مالكيت غيرج انتِ
كتلها انييييي ليش شمسويتلي ما اظن مسوية شي ..
كالتلي من مشوا عليج تقريبا نهاية 2013 قبل وفاة زوبع من جانت بداية الاحداث الي بالعراق مو زينة ..
اني الي حجيت لأخت ايهاب عن قصة التحرش واني الي خربت الشغلة مالتج لان جنت رايدته لايهاب من كل كلبي وردت بأي وسيلة اخذه ومالكيت غير هالشي هذا وسويته بدون وعي وانسحب من عرف شصاير بيج ..
وجاية هسة بعد هالسنين اريدج تسامحيني عن كلشي وتبريني الذمة
ضحكت ضحكة قوية اني وكلت الها ما اسامحج لا دنيا ولا اخرة لان اول شي سرقتي نصيبي مني سابقا مو هسة لان هسة ماريده لو يمشيني ع ذهب ..
وثاني شي طعنتي بشرفي و انتِ اختي تعرفين شنو اختي بس علمود تاخذين ايهاب ..
روحي ان شاء الله ماتشوفين طفل ولا تشمين ريحته ..
صارت تبجي كالتلي لا احلف بالله لتعدين هيج والله ميتة روحي اشم ريحة طفل صار 6 سنين انتظره
كتلها والله ما اسامحج لا دنيا ولا اخرة
نصيبي توقف وصرت علج بحلك اليسوة والما يسوة بسبب اهلي عمي وابن عمي وابن خالي وبالاخير اختي هههه اختي يا ناس يا عالم احد يصدك هالشي!
ومشت السنين وهسة وصلنا 2024 وصار عمري 24 سنة وكل الي تقدمولي رفضوني بسبب السمعة والماضي الاسود هههه وهسة قررت اعنس ميحتاج اتزوج
اصير سند لنفسي بنفسي ..
ديربالكم تسكتون عالتحرش خصوصا المتكرر من نفس الشخص !
اوكفه عند حده لان سكوتكم راح يحسس المتحرش انج سهلة الوصول وراح يستغلج وممكن تصير حالتج مثل حالتي وهاي نصيحتي الكم جميعا ..
تمت بحمد الله
بكل ما هوه جديد من اللينك الظاهر امامك
🌹🌹🌹🌹 🌹🌹🌹🌹🌹🌹🌹🌹🌹🌹🌹