رواية النصيب الفصل السابع7والثامن8 بقلم رحاب القاضي
_لم تكن هذه النهايه التي نستحقها، هناك بدايه جديده ستجعل قلوبنا تنبض مجدداً دون ألم
••••••••••• _ •••••••••••
ناديه
ما ترد عليا رايح فين يا ادهم؟..
ادهم بضيق
واحد صاحبي عنده مشكله وكنت عايز اروحله يعني.
ناديه راحت قعدت في الصاله وقالت
لا لا مش وقته تعالي اقعد انا عايزه اتكلم معاك في حاجه مهمه الاول...
حسام بصوت واطي
اسمع كلامها مش ناقصين مشاكل..
قفل ادهم الباب وراح قعد قدامها وحسام قال بقلق.
انا هروح اعمل لحضرتك حاجه تشربيها...
ناديه بجمود
قهوه ساده يا حسام..
حسام
كنت متأكده... اقصد حاضر من عينيا..
وتابع بصوت واطي
الله يرحمك يا صاحبي...
_و دخل حسام المطبخ وادهم كان قاعد مدايق جداً وناديه فضلت ساكته وبصاله بجمود وهو قال بأنفعال...
ادهم
يعني حضرتك معطلاني عن المشوار بتاعي عشان تبصيلي وتسكتي...
ناديه
مستغربه منك يا ادهم، هي بنتك ما بتوحشكش ما بيبقاش نفسك تشوفها او تسأل عليها..
رد عليها بهدوء وقال
بالعكس هي ديماً وحشاني ونفسي اشوفها، بس بسبب امها وجدها انا بقتش طايق اروح هناك..
ناديه
المفروض تتحمل شويه عشانها وساره مراتك مش وحشه اووي كده عشان تخليك تطفش من البلد كلها وترجع مصر وتقعد لوحدك..
ادهم
انا مرتاح هنا وبنتي هحاول اشوفها في اقرب وقت بعيد عن ساره واهلها..
ناديه
وليه ما ترجعلهاش وتبقي علي طول جنب بنتك وترجع لحياتك الطبيعيه..
ادهم بحده
دي حياتي الطبيعيه اللي انا عايشها براحتي هنا، ومش هرجع واعيش بطريقه وشخصيه غير اللي انا عايزهم عشان ترضي انتي وهي..
ناديه ببرود
انا وباباك لو سايبينك قاعد هنا بقالك سنه فعشان نفسيتك تتحسن وترجع لعقلك ولشغلك، انما هتزودها والله العظيم يا ادهم هرجعك غصب عنك..
ادهم بعصبيه
انتي ليه بتتعاملي معايا علي اني عيل صغير عايزه تمشيني بمزاجك..
ردت عليه بنفس عصبيته وقالت
ما انت فعلا عيل صغير، لما انا وباباك نرسملك طريق ونعملك حياه كويسه الف شااب غيرك يتمناها وانت تفشل فيها تبقي عيل صغير ومش قد المسؤليه..
طلع حسام من المطبخ وقال بقلق
خلاص يا ناديه هانم انا هتكلم معاه واوعدك انه هيرجع وهيعمل لحضرتك اللي عايزااه
قامت وقفت وقالت بحده
ده غصب عنه هيسمع الكلام ويرجع والا والله كل اللي هو فرحان بيه هنا ده هيبقي تراب...
_ قالت كلامها ومشيت وادهم فضل قااعد مدايق جدا وحسام قعد قدامه وقال...
حسام
ارجع عن اللي في دماغك يا ادهم، الطريقه اللي امك بتتكلم بيها دي ما فيهاش رجوع، ولو قربت من البنت اللي اسمها شهد دي تبقي بتأذيها هي كمان معاك..
ادهم بجمود
هي تقول اللي هي عايزاه وانا مش هرجع عن اللي عايزه وهتجوز شهد..
حسام بغيظ
برضو طيب وناديه هانم لو عرفت هتعمل ايه؟..
ادهم
مش هتعرف الا لو انت قولتلها يا حسام وانت اكيد مش هتعمل كده ولا ايه؟..
حسام بضيق
انت بتأذي نفسك وبتأذي البت دي معاك..
ادهم
هروح اشوفها دلوقتي واطمن عليها واللي جاي انا هعرف اتصرف فيه، يلا ولا هتبات هنا انت كمان..
قام حسام وقال
لا يا عم همشي بس فكر كويس يا ادهم في اللي هتعمله...
ــــــــــ #بقلم_الكاتبه_رحاب_القاضي ــــــــ
_ وفي المستشفي اللي فيها شهد كانت نايمه علي السرير الطبي وهي تعبانه جداً وجنبيها امها ورحمه..
رحمه
طيب روحي انتي يا طنط البيت عشان البنات لوحدهم..
فاطمه
تلاقي واحده من الجيران اخدتهم عندها، انا مش همشي واسيبها لوحدها..
شهد وهي ماسكه ايدها بألم وقالت
انتو هتبلغو عنها صح يا ماما، هتجيبولي حقي منها مش كده..
فاطمه بجمود
اللي فيه الخير يقدمه ربنا يا شهد ارتاحي انتي بس...
رحمه بحده
انتو لازم تبلغو عنها من دلوقتي دي كانت هتموتها وكسرتلها ايدها...
فاطمه بقلق
ما هو الدكتور قال ده كسر خفيف..
_ استغربت رحمه من برود فاطمه وهي شايفه بنتها في الحاله دي، والباب خبط ودخل صابر ومعاه سعيد اللي قال..
سعيد
الف سلامه عليكي يا شهد..
بصت للناحيه التانيه بدموع وفاطمه ردت عليه
الله يسلمك يا ابني، يرضيك اللي امك عملته في البت ده هو احنا كنا عملنا ايه يعني...
صابر بحده
خلاص يا فاطمه سعيد اتأسفلي وكمان دفع حساب المستشفي وبكره هيجيب المأذون ويرد مراته..
بصتله شهد بعد تصديق وقالت
لا طبعا انا مش هرجعله انت مش شايف هما عملو فيا ايه؟..
صابر بحده
اخرسي يا بت انتي واللي انا اقوله تسمعيه وانتي ساكته...
سعيد بهدوء
خلاص بقي يا شهد انا مش هخلي امي تكلمك تاني خالص وهتقعدي في شقتك ومالكيش دعوه بحد..
فاطمه
طيب الراجل عدااه العيب اهو يا شهد ما تعقديهاش بقي..
شهد ببكاء وألم
ده كداب وبيخاف من امه ومش هيقدر يحميني منها والله...
رحمه بعصبيه
لو سمحتو ممكن ما حدش يتكلم معاها دلوقتي قدرو حالتها لله دي كل حته فيها موجوعه وانتو قتعدين فوق راسها برضو ومش مبطلين كلام يحرق الدم..
فاطمه بحده
جرا ايه يا رحمه ده احنا اهلها هو انتي هتخافي عليها قدنا...
رن موبيل رحمه في الوقت ده وصابر قال بجمود
روحي يا بنتي ارجعي بيتكم عشان اهلك ما يقلقوش عليكي واحنا هناخد بالنا من بنتنا كويس كتر خيرك..
_ ادايقت رحمه من طريقتهم وقامت فعلاً مشيت وشهد فضلت قااعده ساكته وهي متابعه فرحة اهلها برجوعها لسعيد اللي مجرد وجوده معاها في مكان واحد مش قادره تتقبله..
_ واول ما نزلت رحمه تحت المسشفي لقيت ادهم مستنيها في عربيته ولما شافها نزل منها بسرعه وقالها..
ادهم
ايه يا رحمه شهد عامله ايه؟..
رحمه
كويسه يا دكتور بس في كسر في ايدها ده اللي صعب شويه، وطبعا حضرتك مش هينفع تشوفها دلوقتي..
ادهم
ليه يعني وبعدين هو مين اللي عمل فيها كده؟..
رحمه بحزن
حماتها القديمه عشان ما تخليهاش ترجع لابنها، بس الاتم برضو قاعد فوق واهلها دول استغفر الله اتنازلو عن حقها وناوين يرجعوها ليه..
ادهم بحده
ايه الكلام ده انا هروح اشوفها واتكلم مع ابوها دلوقتي..
رحمه بسرعه وقفت قدامه وقالت
يا دكتور ما ينفعش كده، بقولك طليقها فوق وابوها ده راجل فلاح ودماغه مقفله تقفليه ما يعلم بيها ربنا، بص هي هتطلع كمان شويه من المستشفي علي بالليل كده والصبح انا هروحلها البيت وهخليك تكلمها ولو عايز تتقدملها قولها وهي تقولك علي ظروفها وظبطوها سوا..
ادهم بضيق
طيب بجد يعني هي كويسه؟...
ابتسمت رحمه وقالت
ايوه والله وبكره هخلي حضرتك تكلمها..
ادهم
ماشي انا همشي وهستناكي بكره تخليني اكلمها..
رحمه
حاضر يا دكتور ان شاء الله..
ــــــــــ #بقلم_الكاتبه_رحاب_القاضي ــــــــ
_ وبالليل في بيت ام سعيد دخل البيت هو ومحمد اخوه وكانت هي قاعده قدام التلفزيون وبتاكل لب ببرود...
محمد
ده احنا طلعنا عايشين مع زعيمة عصابخ ومش عارفين يا واد يا سعيد..
ام محمد بحده
لم نفسك يا واد انت بدل ما اقوملك...
محمد بخبث
مش هتلحقي يا اما اصل اهل البت شهد ناوين يبلغو عنك ويقولو علي العلقه اللي ادتيها لبنتهم والشرطه زمانها في طريقها عشان تاخدك...
ام محمد بخوف
واد يا سعيد انت هتسيب امك يعملو فيها كده..
سكت سعيد وما ردش عليها ومحمد قال
هو يعني اللي انتي عملتيه ساهل عشان يعيد يقدر يطلعك منها....
ام محمد
طيب اتصرف انا البت كانت حارقه دمي وعايزه تاخد اخوك مني..
سعيد بضيق
ليه ما انا قولتلك انها هتبقي تحت طوعك ومش هسيبك خالص..
ام محمد
اهو اللي حصل بقي..
محمد
الحل يا امي انك تروحي تصالحيهم وابنك يرد. البت وتقعد في شقتها وانتي مالكيش دعوه بيها خالص..
ام محمد بغيظ
يعني ايه هو كل اللي عملتو ده هيجي فوق دماغي انا، وبعدين ده انا الستات اللي كانو معايا كل واحده فيهم واخده مني مبلغ كبير، هيبقي كل ده علي الفاضي..
محمد
ايوه واللي بقولهولك ده لو ما اتنفذش هيبلغو عنك وهتتحبسي علي كبر يا ام محمد..
سعيد بقلق
ها يا امي قولتي ايه؟..
ام محمد بغيظ
اتنيلو اعملو اللي انتو عايزينه بس انا لا هروحلهم ولا هعتذر لحد انتو فاهين ولا لا..
محمد.
ماشي انا هروح اعتذرلهم وبكره البت هتيجي تقعد هنا في شقتها وانتي تنزلي شقتك ومالكيش دعوه بيها خالص واللي عايزاه انا وسعيد هنجيبهولك لحد عندك بس تسيبي كل واحد فينا في حياته من غير مشاكل...
ام محمد بدموع
بقي كده يا سعيد انا بعملك مشاكل وجايب اخوك يقولي كده..
رد عليها بسرعه وقال
لا والله العظيم هو اللي جه انا ما جيبتوش..
محمد بغيظ
الله يخربيت امك يا شيخ..
ــــــــــ #بقلم_الكاتبه_رحاب_القاضي ــــــــ
_ وبعد شويه في بيت شهد كانت نايمه جنب اخواتها ودموعها مش مبطله تنزل وكل اللي حصلها من لما اتجوزت سعيد للنهارده بيتكرر قدامها، وكل ما تفتكر انها هتعيش نفس الكابوس تاني وبكره هيكون واقع الخوف بيزيد جواها..
_ وقامت بهدوء من جنب اختها ملك اللي كانت نايمه جنبيها، واخدت حجابها ولبسته بصعوبه بسبب ايدها اللي مش قادره تحركها واخدت شنطتها زحطت فيها الورق المهم بتاعها وعلاجها وطلعت بره الاوضه بس وقفت قدام الباب وبضت لاخواتها اللي نايمين وقالت بدموع..
شهد.
يارب يكون نصيبكم احسن مني وما تشفوش اللي انا شوفته...
_ ومشيت بهدوء وطلعت بره البيت ونزلت الحاره اللي كانت هاديه جداً، ومشيت بسرعه لحد ما وصلت للشارع الرئيسي وفضلت ماشيه والالم زاد عليها جداً وكان خوفها اكبر بكتير من اي الم حاسه بيه، ووقفت قدام كشك بقاله صغير وكان واقف فيه راجل كبير وقالتله..
شهد
لو سمحت ممكن اتكلم في الموبيل..
الراجل
ايوه يا بنتي اتفضلي..
شهد بأحراج
بس انا مش معايا فلوس...
ابتسم الراجل بهدوء وقالها
ولا يهمك يا بنتي خدي الموبيل اهو واستني هطلعلك كرسي تقعدي عليه..
_ وبالفعل اداها الموبيل وطلعلها كرسي قعدت عليه وكلمت ادهم علي الرقم اللي كان معاها، وهو رد عليها بعد شويه وصوته كان نايم..
ادهم
الوو..
شهد بتوتر
دكتور ادهم انا شهد....
قام بسرعه وقال
شهد انتي عامله ايه انا جيتلك والله ورحمه قالتلي ما ينفعش اشوفك..
شهد بدموع
انا في الشارع ومش عارفه اروح فين لو روحت لرحمه اكيد هيعرفو اني عندها وو..
قبل ما تكمل كلامها سألها هو
اهدي وما تخافيش قوليلي انتي فين بالظبط وانا هجيلك علي طول..
شهد
مش عارفه بس ثواني هسأل الراجل اللي بتكلم من الموبيل بتاعه..
_ وفعلاً بعد شويه جه ادهم واخدها معاه في عربيته وهي كانت خايفه جداً وهو قالها..
ادهم
بصي الاول خلينا نروح مستشفي عشان اطمن عليكي وبعدين هاخدك البيت..
شهد بقلق
بس مش هينفع اروح معاك البيت و..
ادهم
ما تخافيش يا شهد انا هوديكي بيت تاني غير بيتي، واول ما العده بتاعتك تخلص هاخدك بيتي بس وانتي مراتي..
زاد توترها اكتر وهو كمل كلامه وقال
بس في مشكله..
بصتله بقلق وهو قال
انا والدتي صعبه شويه، يعني هي عايزاني ارجع لمراتي الاولي عشان بنتي فلو اتجوزنا هيبقي جوازنا في السر شويه لحد ما اقنعهم..
شهد بعدم فهم
في السر ازاي يعني؟..
ادهم بقلق
في السر يا شهد مش هيكون جواز قدام الناس لحد ما اظبط اموري ولو سافرت حسام صاحبي هيكون واخد باله منك...
شهد بدموع
حسام مين؟..
ادهم بتوتر
صاحبي ده زي اخويا، بس احل المشاكل اللي مع ماما وكل حاجه هتتظبط مجرد وقت مش اكتر..
شهد بضيق
ممكن تجيبلي مايه عايزه اشرب..
ادهم
طبعاً دقيقه واحده...
نزل ادهم من العربيه وشهد دموعها نزلت بضعف وقالت لنفسها ببكاء.
شهد
حتي انت كمان خزلتني...
وبصتله وهو بيشتري المايه وقالت
ولازم اهرب منك انت كمان زي ما هربت من اهلي يا دكتور ادهم..
ـ قالت كلامها ونزلت من عربيته ومشيت بسرعه وهي بتعيط، وفجأه لقيت نفسها في شارع مقطوع ومش عارفه تمشي من انهي ناحيه..
شهد بخوف ونبره مهزوزه
يارب خليك معايا ياارب..
_ وفضلت ماشيه علي طول، وفجأه اتنفضت برعب اول ما ظهر قدامها تلات شباب وبيبصولها بطريقه مش كويسه..
شهد بخوف
لو سمحتو عدوني..
قرب منها واحد منهم وقال
ايه يا حلوه مين اللي عمل فيكي كده؟..
بعدت شهد عنه بسرعه وقالت بخوف
ابعد عني وسيبني امشي..
ضحكو هما التلاته وواحد منهم قال
تمشي ازاي ده انتي جيتي في وقتك..
_ جات تجري من قدامهم بس هو مسكها من ايدها المكسوره فصرخت بألم ووقعت علي الارض وافتكرت ان خلاص في اللحظه دي انها وصلت للنهايه، بس كان لقدرها رأي تاني اول ما وقف وراها موتسيكل، بصتله بسرعه بس بسبب النور بتاعه ما عرفتش تشوف مين صاحبه غير لما نزل ووقف قدامها، وكان شاب شكله وسيم وطويل جداً عنها ولبسه وهيئته بسيطه جداً..
قال واحد من الولاد اللي بيجرو وراها
اوعي يالا وخد الموتسيكل بتاعك وامشي بدل ما تمشي من غيره...
رد. عليه بجمود وقال
لا انا همشي بيه وبالانسه اللي ورايا دي وانتو هتمشو بكرامتكم ولا تحبو تمشو من غيرها..
ضحكو هما التلاته والولد قاله
وريني هتعملها ازاي..
_ وفجأه طلع الولد اللي واقف قدامها مسدس وشاور بيه علي التلاته وقال بحده..
...: هااا ما تتكلم يالا سمعني جمال صوتك يلااا...
_ جريو التلاته من قدامهم بسرعه وخوف، وهو بص لشهد اللي وقفت بصعوبه وقالتله بقلق..
شهد
شكراً جداً..
رد عليها بخوف وقال
طيب تعالي بسرعه معايا قبل ما يرجعو...
شهد بخوف
هما ممكن يرجعو تاني..
ابتسم بسخريه وقال
تلاقيهم راحو يجيبو حاجه يضربوني بيها وجايين ووقتها مش هعرف ادافع عنك ولا عن نفسي بمسدس الخرز ده..
شهد بصدمه
هو ده مسدس خرز؟!..
بصلها بقلق وقال
هو انتي لسه هتتصدمي يلا تعالي بسرعه معايا اوصلك وارجع علي شغلي..
شهد بقلق
طيب انا عمري ما ركبت موتسيكل..
رد عليها بغيظ.
خلاص خليكي مستنياهم انا ماشي..
شهد مسكت ايدها المكسوره بالم وقالت بسرعه
خلاص خلاص هاجي معاك..
_ وراح هو وركب علي الموتسيكل وهي جات تركب ورااه بس قالتله بقلق..
شهد
هو ايه الصندوق ده؟...
رد عليها وقال
بتاع الشغل مانا عامل ديلفري، اركبي يلا وامسكي فيا بأيدك السليمه عشان ما تقعيش..
_ سمعت كلامه وركبت ورااه وكانت بتتنفض من الخوف، بس ما كانش قدامها حل غير انها تثق فيه هو عشان يساعدها...
الفصل الثامن
_والله ما أخترناش البعد.. قسوتكم اللي أجبرتنا علي أختياره💔🙂
_الساعه تلاته قبل الفجر كانت واقفه شهد في شارع شبه هادي لأن الوقت متأخر، وقرب منها الولد اللي انقذها من شويه ومدلها كوباية شاي وقال..
_اتفضلي ده شاي، كنت هجيبلك نسكافيه يس طلع مقاطعه..
شهد بتوتر وهي بتاخد منه الشاي
شكراً..
_ واول ما اخدت منه الشاي وقع فجأه منها علي الارض بسبب ايدها اللي كانت بتترعش وكمان جسمها كله بخوف شديد مش عارفه تتخلص منه...
_ما تخافيش حصل خير هجيبلك غيره..
شهد بدموع
لا لا شكراً انا مش عايزه حاجه..
ابتسم وقالها
بصراحه كده انا كمان مش معايا فلوس اجيب غيره، انا كنت هجيبه علي الحساب بصي خدي اشربي من بتاعتي وانا هشرب بعدك عادي انا نفسي حلوه ومش بقرف..
ابتسمت بهدوء وردت عليه
لا لا خلاص ولا يهمك انا ماليش نفس..
بصلها بهدوء وقال
انا اسمي اكرم عندي 25 سنه خريج كلية تجاره..
شهد بجمود
ماشي..
اكرم
طيب وانتي اسمك ايه وحكايتك ايه ومين اللي عمل فيكي كده. وازاي يعني ما تعرفيش مكان بيتكم زي ما قولتيلي هو انتي فاقده الذاكره يعني؟..
نزلت دموعها بحزن وردت عليه وقالت
لا بس تقدر تعتبرني كده، ومعلش هتعبك تفضل واقف معايا لحد الدنيا ما تنور وانا همشي، بس انا خايفه اقعد لوحدي بالليل..
اكرم
طيب وهتمشي الصبح تروحي فين؟..
شهد بدموع
مش عارفه بس ربنا يسترها..
اكرم بجديه
طيب تعالي معايا..
شهد بقلق
اجي معاك فين بص انت لو عايز تعمل فيا حاجه والله العظيم هتندم عشان اللي بيجي علي حد مظلوم ربنا هينتقم منه..
اكرم
بزمتك ده منظر يخليني افكر اعمل فيكي حاجه ده انا هجيب مايه بسكر اخليها معايا احتياطي احسن تقعي من طولك وانتي ماشيه معايا..
شهد بقلق
اومال انت عايز مني ايه، وايه اللي مخليك قاعد معايا لحد دلوقتي؟..
اكرم
عشان لو سيبتك واقفه لوحدك هتيجي عيال مبرشمه زي اللي كانو من شويه ومش هيرحموكي..
شهد بدموع
طيب خلاص خلينا واقفين هنا..
اكرم
والله مش هينفع لان العيال المبرشمه دي مش في وعيهم ولو شوفناهم تاني مش هنتحرم انا وانتي والبلد مليانه بكتير زيهم..
شهد بخوف
طيب انت هتوديني فين؟..
اكرم
من غير ما تفهمي غلط انا هاخدك البيت بس انا امي هناك وباتي معاها وبكره نشوف هتعملي ايه؟..
شهد بقلق
وانا ايه اللي يخليني اصدقك...
اكرم بجديه
والله براحتك بس انا والله العظيم قصدي اساعدك ويا ستي لو جيتي ومالقتيش امي في البيت امشي..
_ سكتت شهد وكانت بتفكر تغامر وتروح معاه ولا ترفض وتفضل في الشارع، واختارت انها تروح معاه لان في امل انها تكون في امان علي عكس الشارع اللي كان كله خطر عليها..
_ وبعد شويه وصلو قدام عماره بسيطه في حاره شعبيه وقالها اكرم بهدوء..
اكرم
انزلي اقفي هنا دقيقه واحده هركن الموتسيكل جوه واجيلك..
شهد نزلت وسألته بقلق
جوه فين؟..
اكرم
جوه المحل ده عشان ما يتسرقش دقيقه واحده..
_ ودخل فعلاً بالموتسيكل جوه المحل وطلع من غيره وقالها بنبره مرحه..
اكرم
نفسك طويل ولا تحبي اشيلك؟..
شهد بحده
انت بتقول ايه احترم نفسك..
اكرم ضحك وقال
ههههه والله مش قصدي بس اصل العماره دي سبع طوابق انا بقي ساكن في التامن..
شهد بعدم فهم
ده ازاي يعني؟..
اكرم
تعالي وهتعرفي..
_ واخدها وطلعو فوق للسطوح بتاع العماره وكانت فعلا بتاخد نفسها بالعافيه علي عكسه هو اللي كأنه ما كانش بيطلع معاها السلم..
_ وبصت للمكان كان سور عالي من كل ناحيه معادا البلكونه وفي قعده بسيطه علي الارض وكمية ورد طبيعي كبيره موجوده، وفي اوضتين جنب بعض وشكلهم حلو شويه..
شهد
ده بيتك؟..
اكرم
لا مش بيتي ده بيت الحجه كوثر اللي في الاوضه اللي علي اليمين دي..
شهد
الست دي مامتك صح؟..
اكرم
لا بس هي اللي ربتني فانا بعتبرها امي انما انا يتيم ماليش اهل، علي العموم ادخلي نامي في الاوضه الفاضيه دي وانا هنام هنا..
شهد بحزن
انا اسفه بس انا الصبح همشي..
اكرم بأبتسامه بسيطه
يا ستي روحي نامي والصبح يعدلها ربنا..
شهد
ماشي تصبح علي خير..
جات تمشي بس هو قال بسرعه
لو سمحتي استني..
بصتله شهد بقلق وقالت
نعم؟..
اكرم
هو انتي اسمك ايه عشان لو حد سألني انتي مين اعرف ارد عليه من غير كدب..
شهد بهدوء
انا شهد اسمي شهد صابر..
ابتسم وقال بهدوء وقال
وانتي من اهل الخير يا شهد، روحي نامي..
_ دخلت شهد الاوضه اللي قالها عليها اكرم وبرغم شكلها البسيط الا ان فيها سرير حلو جداً ودولاب كمان شكله حلو وتلفزيون غالي وتكييف وترابيزه عليها كمبيوتر قديم شويه ومكتبه بسيطه فيها كتب كتير، وصوره متعلقه علي الحيطه لأكرم ومعاه ست كبيره شكلها حلو اووي، راحت قعدت علي السرير وقلعت الكوتشي بتاعها ونامت بحجابها لانها خافت حد يدخل عندها، واول ما حطت راسها علي المخده نسيت كل حاجه ونامت علي طول بسبب الوجع اللي حاسه بيه في جسمها بسبب اللي عملته فيها حماتها الاولي..
_ وبعد شويه بره كان اكرم واقف وبيدور علي الشاحن بتاعه عشان يشحن موبيله ومش لاقيه، فقرب من الاوضه وخبط علي الباب اكتر من مره وقال..
اكرم
شهد لو سمحتي بس عايز الشاحن لاني لازم اشغل الموبيل واكلم صاحب الشغل واقوله اني حصلت معايا ظروف ومشيت عشان ما يطردنيش..
_وفضل يخبط تاني بس ما جالوش رد وكانت شهد من تعبها وقلة نومها مش حاسه بحاجه، ففتح الباب بهدوء وهو بيحاول ما يبصش عليها وهي نايمه بس بتلقائيه عينه وقعت عليها فبصلها بشفقه وحزن علي الحاله اللي هي فيها، وراح اخد الشاحن بتاعه وطلع بسرعه من عندها..
وقال لنفسه بسخريه
يعني يوم ما اجيب بنت هنا تبقي واحده وراها مصايب زي دي يا خيبتك التقيله يا اكرم..
_ وشحن موبيله وكلم صاحب شغله واعتذرله، وراح نام وتاني يوم الصبح صحي اكرم علي صوت ست كبيره واقفه جنبيه وشكلها حلو جداً برغم سنها الكبير وقالتله..
كوثر
اكرم قوم كلمني..
اكرم
في ايه يا كوثر علي الصبح خشي نامي..
كوثر
صلاح كان هنا..
اكرم بملل
ايوه شوفته وبيسلم عليكي..
كوثر
لا انت كداب عشان انا شوفته لما كنت نايمه..
قعد اكرم وقالها
احنا اتفقنا علي ايه يا كوثر..
كوثر بدموع
اتفقنا اني لما اشوفه وانا نايمه ادعيله ربنا يرحمه، بس هو وحشني يا اكرم مشي وقالي شهر وهيرجع وما رجعش لحد دلوقتي بقاله 15 سنه غايب عني..
اكرم
تاكلي طعميه ولا نجيب بيض وجبنه وفطير من الفرن تحت..
كوثر ابتسمت وقالت
لا عايزه طعميه وعيش فينو يلا بسرعه..
جات تقوم بس اكرم مسك ايدها وقالها
استني احنا عندنا ضيفه..
كوثر
مين لتكون لقيت امك مثلا ههههههههه..
كوثر
لا لقيت صلاح واتلمي يا كوثر ما تتريقيش علي احزاني..
كوثر
خلاص ما اقصدش قولي مين الضيفه دي؟..
اكرم
بنت لقيتها في الشارع امبارح وشكلها كده هربانه من حد بس شكلها غلبان اووي..
كوثر بغيظ
وانت مالك افرض كانت وراها مصيبه؟..
اكرم
يعني كنت اسيبها لكلاب السكك ودي شكلها صغير اصلا وصعبت عليا..
كوثر
وعشان كده انت نايم كده هنا، طيب انزل هات فطار وانا هدخل اشوفها..
اكرم
طيب بلاش تجيبيلها سيرة صلاح عشان ما تخافش مننا..
كوثر بحده
انزل يا حيوان بس ادخل اغسل وشك واسنانك الاول يلاا..
_ سمع اكرم كلامها وهي دخلت الاوضه بتاعته ولقيت شهد قاعده علي السرير وبتظبط في الحجاب بتاعها ولما شافتها شهد اتنفضت بخوف، فكوثر قالتلها بهدوء..
كوثر
مالك يا بت شوفتي عفريت ولا ايه؟..
شهد بتوتر
لا لا مش قصدي والله بس اتفاجئت بحضرتك..
كوثر دخلت وقفلت الباب وقالت
انتي مين وايه اللي عمل فيكي كده؟..
شهد بدموع
النصيب..
كوثر
لا ردي كويس من غير الغاز مين اللي عمل فيكي كده؟..
شهد بخوف
حماتي..
كوثر
بقي انتي متجوزه ده انا فكرتك عيله صغيره..
شهد بهدوء
انا عندي 18 سنه ومش متجوزه انا مطلقه..
كوثر
لا ده انتي شكل حكايتك حكايه، ادخلي خدي دوش لحد ما اجيلك حاجه تلبسيها من عندي عشان تفطري وتقوليلي ايه حكايتك..
شهد بقلق
هه هو فين كريم؟..
كوثر
قصدك اكرم نزل يجيب فطار وجاي يلا قومي اسمعي الكلام..
شهد بقلق
حاضر..
_ طلعت من عندها كوثر وقامت شهد وقبل ما تدخل الحمام رجعت كوثر ومعاها فستان بسيط وتصميمه قديم وقالت..
كوثر
ده فستان من بتوعي ايام ما كنت في سنك كده بس انا كنت احلي منك طبعا واطول واجمد منك، البسيه وخلاص لحد ما تغسلي هدومك المبهدله دي واخده منك تاني وما تقلقيش ده بكم وطويل عشان الحجاب وكده..
شهد بتوتر
ماشي شكراً..
كوثر
العفو... يوووه نسيت اصحي صلاح...
_ وطلعت من عندها وشهد اخدت الهدوم اللي جابتها كوثر ودخلت الحمام...
ــــــــ
_وفي بيت اهل شهد كانت امها واخواتها قاعدين بيعيطو وصابر زعق فيهم وقال بحده..
صابر
اخرسي يا بت منك ليها خلوني اشوف هاهبب ايه في المصيبه دي..
فاطمه بدموع
طيب روح تاني لبيت البت صحبتها ممكن تلاقيها راحتلها دلوقتي..
صابر بحده
روحت وعملت مشكله ولو راحتلهم هيجيبوها والجيران والكل هناك عرف انها طفشانه من عندي وانا اديت فلوس للبواب هناك انه لو شافها عندها يقولي، احنا لازم نلاقيها قبل الليل ما يجي عشان سعيد اللي جاي يردها ده..
فاطمه ببكاء
يا اخويا ما في داهيه سعيد انا المهم عندي بنتي العيانه اللي الله واعلم فين، احنا اللي قسينا عليها وخلناها تهرب..
صابر بحده
اخرسي يا وليه انتي قسينا عليها في ايه دي قلة ادب، انا كنت برجعها لجوزها واخليها ست متستته في بيتها تقوم تهرب والله واعلم هربت مع مين..
فاطمه بقلق
وطي صوتك يا اخويا الحيطان ليها ودان ولو حد سمعك يقول ايه تحنا مش ناقصين فضايح..
صابر بغضب
هو احنا لسه هنتفضح بس الاقيها وانا والله لاعلمها الادب من اول وجديد عشان انا ما عرفتش اربي يا فاطمه...
_قال كلامه وطلع بره البيت وملك قالت وعي لتعيط لفاطمه اللي كانت خايفه جداً علي شهد..
ملك
هي شهد فين يا ماما وبابا هيعمل فيها ايه؟..
فاطمه بدموع
والله ما بقيت عارفه ادعي نلاقيها وتقع في ايد ابوكي اللي ممكن بخلص عليها ولا ادعي ما اشوفهاش تاني وتاخد نصيبها بعملتها دي بعيد.عننا..
ــــــــ
_ وفي المكان اللي موجوده فيه شهد طلعت بره الاوضه اللي بايته فيها وهي لابسه حجابها علي الفستان البسيط بتاع كوثر وكانت بتتألم من ايدها المكسوره جداً، شافها اكرم اللي كان بيحط الفطار علي الترابيزه وقال..
اكرم
الفستان ده مش غريب عليا..
ردت عليه شهد وقالت
بتاع مامتك جابتهولي لحد ما هدومي تنشف..
اكرم
هو انتي غسلتي هدومك وايدك مكسوره..
شهد
عادي غسلتهم علي الماشي بأيد واحده..
اكرم
طيب تعالي اتفضلي اقعدي عشان تفطري معانا..
شهد بتوتر
لا شكرا ممكن بس اكلم حد في الموبيل، هكلم. صحبتي عشان تيجي تاخدني..
_طلعت كوثر من اوضتها في الوقت ده وهي ماسكه طبق الفول وقالت..
كوثر
مش هتعملي حاجه غير لما تفطري الاول..
شهد
بس انا مش جعانه..
اكرم
انتي معاكي علاج ولازم تاخديه وعشان ما تتعبيش لازم تفطري تعالي اقعدي..
كوثر
اقعدي يا اختي كل يوم بيفطرني علي الارض النهارده طلع الترابيزه والكراسي..
شهد باحراج
معلش تعبتكم ما كانش ليه لزوم..
كوثر
لا ليه احنا بنحب نكرم ضيوفنا، ادخل يا اكرم صحي صلاح..
اكرم
صحيته وقال مش جعان..
كوثر
لا لازم يصحي بفطر انا هدخل اصحيه..
_ ودخلت كوثر الاوضه اللي كانت بايته فيها شند، وراح اكرم قعد ياكل وشهد قالتله بقلق...
شهد
هو مين صلاح ده اللي كان بايت في الاوضه اللي انا كنت بايته فيها..
اكرم وهو بياكل
ابنها الله يرحمه..
شهد
ااه...
وبرقت بصدمه وخوف وقالت
ايييييه؟؟؟؟...
ضحك اكرم بهدوء وقالها
انا هفهمك صلاح ده لما انا كان عندي عشر سنين كان في الجيش وكان زي اخويا الكبير والست كوثر بتعاملني زي ما بتعامله، المهم كان عندنا اجازه وراجع الجيش والمفروض ان دي اخر مره يروح هناك وقالها شهر بالظبط وهاجي ومش همشي تاني، وكان واقف علي الحدود بتاعت سينا وبالغلط جه صاروخ من بتوع اسرا*ئيل ومات وما لقيوش ليه جثه وطبعا حقه راح زي الناس اللي بتروح ضحايا للغلطات دي، وهي بقي ما صدقتش انه مات وبقيت تتوهم انه موجود. حاله نفسيه من صدمتها..
شهد بدموع
ربنا يصبرها ويشفيها..
اكرم
انتي هتعيطي ولا ايه تعالي اقعدي عشان لو جات ولقيتك واقفه هتهب فيكي...
_قعدت شهد بسرعه وبدأت تاكل وهي متوتره وكانت فعلا جعانه جداً، وطلعت كوثر وقالت بحزن..
كوثر
اكرم مالقيتش صلاح جوه هو راح فين؟..
بصتلها شهد بحزن واكرم قال ببرود وهو بياكل
نزل يجيب حاجه من تحت وجاي تعالي بقي افطري..
كوثر بحزن
ينزل من غير فطار ينفع كده..
اكرم بتغير للحوار
بقولك ايه يا كوثر انتي قولتيلي مين اللي ضرب شهد وخلاها في الحاله دي؟..
ردت عليه كوثر وقالت
بتقولي حماتها ما اعرفش بقي بتكدب ولا بتقول الحقيقه...
بص اكرم لشهد وقال بجمود
الكلام ده بجد؟..
شهد بقلق
ايوه والله العظيم بس اهلي ما عملوش فيها بلاغ وانا خوفت منها فهربت..
كوثر
انتي يا بنتي مش قولتي انك مطلقه..
شهد
ايوه وابويا وامي كانو عايزين يخلوني ارجعله وانا خوفت لانها ست وحشه اووي وابنها ضعيف ومش هيعرف يحميني منها..
كوثر بحزن
اهص عليها ست ما عندهاش رحمه ده انتي وشك بقي ولا رغيف العيش المفقفق من الكدمات اللي فيه..
اكرم
سيبك منها ما تاخديش عليها يا شهد وقوليلي انتي كام سنه يا بنتي علي البهدله دي؟...
شهد
18 سنه وكام شهر..
كوثر بحزن
يا قلبي يا بنتي واتجوزتي واطلقتي واتبهدلتي كده يخربيت ابوكي علي امك وحماتك وطليقك معاهم ايه الحزن ده..
ابتسمت شهد غصب عنهت واكرم قال
هو لو هنتقل عليكي يعني ممكن تحكيلنا حكايتك وايه اللي حصل معاكي بالظبط عندي فضول بصراحه اعرف..
_اتنهدت شهد بحزن وسابت الاكل وبدأت تحكياهم حكايتها من اول ما اتقدملها سعيد..
_ وفي شقة ادهم كان متعصب جدا وهو بيكلم حسام اللي قاعد قدامه وحاطط ايده علي خده..
ادهم
قلبت عليها الشوارع كلها ومش لاقيها..
حسام
ولو كنت لاقيتها كنت هتعمل ايه. المفروض تفهم خلاص انها رافضه تتجوزك..
ادهم بحده
هي خايفه مني انما انا مش هأذيها..
رد عليه حسام بحده وقال
لا انت بتأذيها يا ادهم، بنت صغيره اهلها رموها في جوازه منيله بنيله كانت لسه بتحاول تتعود جيت حضرتك ومليت دماغها بكلامك عن الحريه والاستقلال وخليتها اطلقت وحصلتلها مشاكل ليه كده، انت نفسك مش عارف تبقي حر هتخلي البنت اللي حياتها زي الزفت تاخد حريتها، البنت دي لو خصلها حاجه ذنبها في رقبتك انت لانها عملت كل حاجه عشان انت عشمتها بيك وفي الاخر خليت بيها وما كنتش راجل..
_قعد ادهم علي الكنبه وكل كلمه قالها حسام وجعته وجاتله علي الوجع هو فعلا من البدايه لعب في دماغ شهد وخلاها تطلق وعشمها انه هيتجوزها وفي الاخر كان جبان معاها، قعد. حسام جنبيه وقاله..
حسام
انساها سيبها تاخد نصيبها وانت عيش نصيبك وروح لاهلك وكمل حياتك زي ما كانت ماشيه..
ادهم بدموع
والله العظيم حبيتها يا حسام ما كنتش بتسليولا بضحك عليها، بس انا مش هعرف احميهت من اهلي..
حسام
يبقي سيبها وريح دماغك وخليك في اللي هما عايزينه لحد ما يتهدو بقي ويرحموك..
ادهم بسخرية
حاضر اصلا ما ينفعش اقول غير حاضر واستسلم..
ــــــــــ #بقلم_الكاتبه_رحاب_القاضي ــــــــ
_ وعلي السطوح كانت كوثر بتعيط وشهد واكرم بيحاولو يسكتوها..
اكرم
خلاص بقي يا كوثر بصوتك ده..
كوثر بصت لشهد وقالت بدموع
حياتك دي يا بت ومسلسل هندي حزين...
ضحكت شهد واكرم قال
يعني تخليها تعيط وانتي تضحكي..
شهد بأحراج
مش قصدي والله..
_طلع اكرم موبيله من جيبه وفتحه واداه لشهد وقال بجمود...
اكرم
اتفضلي كلمي صحبتك اللي قولتي عليها عشان تيجي تاخدك او تروحيلها ونخلص..
ادايقت شهد. من طريقته واخدت منه الموبيا وراحت وقفت بعيد عنهم، وكوثر زعقت فيه وقالتله..
كوثر
ايه الغلاسه دي يا اكرم كسفتها بطريقتك دي...
اكرم
كبري دماغك يا كوثر وبعدين احنا مش ناقصين مشاكل..
وكلمت شهد رحمه اللي ردت عليها وقالت
الوو..
شهد بدموع
انا شهد يا رحمه ..
رحمه. بلهفه
شهد انتي فين يا حبيبتي ده انا هموت من الخوف عليكي...
شهد بخوف
ابويا جه دور عليا عندك مش كده؟..
رحمه بحزن
ايوه جه وعمل مصيبه قدام العماره اوعي تفكري تيجي هنا لانه اكيد هيعرف انك هنا وهيجي ياخدك..
مسحت شهد دموعها وقالت
عارفه انت مش هاجي عندك بس انا مش عارفه اروح فين وادهم ده. طلع حيوان هو كمان خايف من امه وعايزني في السر....
رحمه بحزن
كلمني وسأل عليكي وقالي اللي حصل، بس انتي ليه هربتي من الاساس يا شهد انتي مش عاؤفه اهلك يعني ممكن يعملو ايه...
شهد بدموع
وكنت استني يعني لحد ما ارجع تاني عند سعيد اللي كان مش معاه حاجه غير يقولي مش طايق ومش عايزك ولا امه اللي كانت بتزلني وبتهين فيا علي كيفها وتمرمطني في البيوت، انا ما حدش كان مكاني عشان يحس بيا، ما حدش خاف ولا اتألم قدي وهي جايبه الستات وبيضربوني يا رحمه..
رحمه
طيب اهدي خلاص وقوليلي انتي فين وانا هجيلك..
شهد
هتقدري تيجي..
رحمه
بصي هاتي العنوان اللي انتي بيه وانا هحاول انزل واجيلك ونشوف هنعمل ايه..
شهد
ماشي انا هخلي الولد اللي قاعده عنده يبعتلك العنوان في رساله..
رحمه
ولد؟ انتي قاعده عند ولد يا شهد يخربيتك يا وليه..
شهد
مع امه وهو اصلا اللي ساعدني امبارح والا كان زمانك بتترحمي عليا دلوقتي او الله واعلم حصل فيا ايه..
رحمه
طيب ابعتي العنوان وانا ساعه بالكتير وهكون عندك...
_ وقفلت معاها شهد وراخت وقفت جنب اكرم اللي كان واقف عند السور القصير وبيشرب شاي وقالتله..
شهد
معلش هتعبك تبعتلها العنوان هنا في رساله وهي هتيجي تاخدني وهمشي علي طول..
اكرم بجمود
ماشي وانا هروح الشغل ومالكيش دعوه بكوثر ولا تاخدي علي كلامها..
شهد بحزن
حاضر ومعلش تقلت عليكم..
اكرم بهدوء
حصل خير مع السلامه..
_ وسابها ومشي وهي راحت قعدت علي الارض في المكان الهادي ولفت نظرها كتاب علي الارض مكتوب عليه "في قلبي أنثي عبريه"، مسكت الكتاب وفتحته وبدأت تقرأ فيه...
_ وبالليل في بيت اهل شهد كان سعيد قاعد ومعاهم محمد اخوه اللي قال..
محمد
انا كلمت معارفي في الحتت اللي جنبينا لو حد. شافها هيبلغني ونروح نجيبها، المهم يا عم صابر ما حدش يعرف ان البت طفشت..
صابر
طيب والست امكم هتقولولها ايه. ما هي مش هتسكت وهتفضل تجيب في سيرتها...
محمد
سيب الموضوع ده علينا تحنا هنقولها سافرت عند. حد. قريبكم. في البلد لحد ما نلاقيها..
فاطمه بخوف
بس والنبي يا ابني تدورو عليها بسرعه احسن تحصلها حاحه دي مشيت وهي تعبانه اصلاً...
صابر
شالله حتي تموت ونرتاح منها بس الاقيها وانا هخليها تتعب كويس...
سعبد بضيق
انا نازل يا محمد هتيجي ولا قاعد هنا..
محمد
لا نازل معاك بالاذن يا عم صابر..
صابر
اذنك معاك يا ابني اتفضل..
_ ونزل فعلا محمد ومعاه سعيد اللي كان مدايق جدا وقال بعصبيه..
سعيد
انا لازم الاقيها يا محمد البت دي مش هتبقي غير ليا..
محمد
ومدام فارقه معاك كده طلقتها ليه من الاوا..
سعيد
ما كنتش بشتغل يا محمد وامك كانت هي الي مجوزاني اصلا وما كنتش اقدر اقولها لا، ودلوقتي لما وافقت بنت الجزمه طفشت..
محمد
هنلاقيها ما تقلقش بس ما تقولش لامك حاجه احنا مش ناقصين لانها هتيجي في وشك انت كمان لان الحته ملها بقيت عارفه انك هتردها خلاص...
سعيد
ماشي يا محمد مش هجيب سيره لامي لحد. ما نلاقيها...
ــــــــــ #بقلم_الكاتبه_رحاب_القاضي ــــــــ
_وبالليل رجع اكرم من شغله وقابلته كوثر اللي قاعده علي السطوح من بره وشكلها مدايق..
اكرم
مالك يا كوثر شاياه طاجن ستك كده ليه؟..
كوثر
صعبانه عليا البت اللي جوه دي..
اكرم بحده
هي لسه جوه ده ايه الغلب ده مش قالت هتمشي..
كوثر
وطي صوتك يا واد انت والبت اللي مستنياها ما جاتش تاخدها..
طلع اكرم موبيله وقال
انا اهو بكلمها واشوفها ما جاتش ليه؟..
_ واول ما رن علي رحمه لقي الموبيل مقفول، فراح ناحية اوضته وخبط علي الباب وقال بحده..
اكرم
صاحبتك موبيلها مقغول وشكلها مش جايه حضىتك هتفضلي مشرفانا كده كتير...
طلعت شهد وقالتله بحده
انت بتعاملني كده ليه هو انا جايه اشحت منك انت اللي جيبتني هنا وانا ما كنتش عايزه اجي..
اكرم
كنت فاكر انك مظلومه يا حرام وهربانه من الموت او من حد. عايز يقتلك مش هربانه عشان واحد. واطي باعك هو كمان والله حقهم اهلك يعملو فيكي كده واكتر من كده...
نزلت دموعها وقالت بحده
مالكش دعوه اصلا، وانا ماشيه من نفسي ومش عايزه اقعد عندكم..
_ واخدت شنطتها ومشيت وهو اتنهد بضيق وقال لكوثر اللي كانت واقفه مدايقه..
اكرم
انا جايب معايا كريب يلا ناكل..
كوثر
اخص عليك يا اكرم بقي اللي عملوه اهلك فيك زمان ما اثرش فيك، ما اتعلمتش منه..
اكرم
ايه اللي انتي بتقوليه ده يا كوثر انتي عارفه اني ما بحبش السيره دي..
كوثر
لا هفكرك بيها لان ده وقتها، انت اصلا فيك. من اهلك هما بكل دم بارد رموك وانت عيل صغير في الزباله وكانت الكلاب والقطط هتاكلك لولا ستر ربنا، وانت دلوقتي شايف بنت منكسره وضعيفه ومالهاش حد وبترميها للشارع يبقي فيك من اهلك ولا لا؟..
اكرم بضيق
هي اللي جابته لنفسها في فرق بيني وبينها، وبعدين انا في حالي وماشي جنب الحيط ومش ناقص مشاكل..
كوثر
يعني مش هتنزل تجيبها، هتسيبها لوحدها في الليل كده وسط كلاب الشوارع..
اكرم بحده
هي اللي اختارت يا كوثر وهي حره..
"صدق اللي قال فااقد الشئ لا يعطيه"
ـــــــــــــــــــــــــ
_ في الوقت ده كانت شهد ماشيه في الشارع وهي حاضنه شنطتها بأيدها السليمه ودموعها نزلت بحزن وقعدت علي الرصيف وقالت بحزن..
شهد
حتي انتي كمان يا رحمه ده انا توقعت الكل يسيبني الا انتي..
_ وقررت انها خلاص هترجع تاني لاهلها وتستسلم للي يحصل واللي يعملوه فيها لان ما بقاش في ايدها اي اختيار تاني، وقامت ولسه هتمشي بسولقيت كلب لونه اسود وشكله يخوف وفي رقبته سلسه كبيره، صرخت برعب من شكله وجريت بسرعه من قدامه وهو جري وراها ووقعت فجأه علي الارض وهجم علها الكلب وقطم في كتفها وهي كانت بتصرخ والناس اتلمت، وظهر من وسطهم واحد لابس بدله شيك جدا وسحب الكلب من السلسه وشاورله بأيده فالكلب بقي هاظي وبص لشهد اللي فقدت الوعي وواحد من الناس قال بقلق..
الراجل
الحقو يا جماعه البت شكلها هتموت..
وقف واحد جنب الولد اللي ماسك الكلب وقاله
يلا نمشي يا اسر بيه مالناش دعوه..
رد عليه اسر بجمود وقال
خد توتو وروحو البيت يلااا..
_وقرب من شهد وشالها والراجل قاله
علي فين يا بيه البت لازم تروح المستشفي..
رد. عليه اسر بحده وقال
هو انا واخدها الملاهي يعني ما هوديها المستشفي..
الراجل بحده
رجلي علي رجلك انا واتنين من الرجاله دي الله واهلم ناوي تعمل ايه في البت..
_ ما ردش عليه اسر وراح ناحية العربيه والسواق فتحله الباب وهو حط شهد في الكرسي اللي جنبيه وربطلها حزام الامان وبص لكتفها اللي بينذف بقلق، وراح رمب جنبيها وفي الوقت ده ركبو تلات رجاله معاهم العربيه..
اتنهد بضيق وقال
اوكي يلا بينا للجحيم يا رجاله..
_ تفتكرو مين. ده كمان وايه حكايته، وفين نصيب شهد اصلا؟..