لا، عندك!!! انا مهندس محترم مسمحلكش تسخري مني، الستر هنا مش مقصود بيه الجسم وبس ، ستر البنت مش بالهدوم بس يا انسة .. انا اقصد ان جوازي منها ولمها في بيتي ستر من العنوسة ومعايرة الناس ليها وانتشالها من الضياع وارتكاب الفواحش والخطيئة والمشي في الطريق البطال.. احنا اللي بنستركم وانتوا ضلع اعوج والنار زحمة بيكم بسبب طريقتكم دي.. وعشان انا ابن ناس ومحترم مش هرد علي غلطك
قولت بنرفزة
_ مين ده اللي ابن ناس ومحترم ، قصدك ابن كـ... ولا بلاش انا مش هرد علي واحد زيك ولا هعملك قيمة
مط بوقة وقال بتريقة
_ محدش قالك تعمليلي قيمة انا مهندس وعاملها لنفسي روحي شوفي العريس اللي ربنا بيحبه وسموه احمد كرم من ربنا عشان لما يتقدم لواحدة زيك يترفض وتعيشي محرومة من الجواز .. ولعلمك محدش هيتقدملك بعد كده بعد ما كملتي ال ستتتتة وعشررررين سنة
_ 26 عفريت يتنططوا فوق دماغك ، انت اكيد اهلك قضوا حياتهم في تجميع الفلوس ونسيوا يربوك.. شوفت اديني بنتقي الفظي في تهزيقك ازاي بس كلمة تاني وهقولك كلام انا تربيتي متسمحليش اقوله.. شايف نفسك علي إيه ياشيخ جك وكسة.. وعلي فكرة بقا حمدي الوزير احلي منك
_ ضايقك قوي مواجهتك بالحقيقة ان الراجل هو اللي بيستركم انتوا كدة ناقصات عقل ودين وعمركم ما هتفهموا
قولت بانفعال وصوت عالي مقدرتش اتحكم فيه
_ مين دي اللي ناقصة عقل ودين يلااا ، والله هخبطك في وشك اجيب اجلك ، انت طايق نفسك ازاي.. يابني انت المستور بيك عريان .. يا بايخ يا رزل يا عرة المهندسين.. قال يسترونا قال حبيبي احنا بنفضل متسترين محدش بيشوف ضافرنا لغيت ما نوافق عليكم وبعد كدة من اول يوم جـواز وهاتك يا....
ضميت بوقي وغمضت عيني اخد نفسي عشان اتمالك اعصابي بعد ما كنت خلاص هقول كلام ميصحش يتقال وبعدين فتحت لقيته بيضحك ف سحبت شنطتي علي كتفي ونزلت من المترو رجعت البيت وطول الطريق وانا بلعن في المترو اللي جمعني ب واحد زيه ولما وصلت البيت وانا مش قادرة اهدا وحاسة اني كان لازم ارجع واقوله الكلام اللي جمعته في السكة لقيت ماما طالعه من المطبخ بالمريلة ومغرفة في كل ايد ولما لقتني مجبتش الموز صوتت بعلو صوتها وقالت
_ ياااااختي !!! مجبتيش الموز
قولت بحنق
_ مجبتش يا ماما.. موز ايه اللي اجيبه قالت ايه المانجة ، ايه الفال الوحش ده.. ده يوم باين من اوله... شوفي!!! انا مش موافقة كلميهم قوليلهم يرجعوا مش هتجوز
قالت وهي بتتقدم ناحيتي بالمغرفة
_ لا لا لا انا هفتح دماغك واشوف فيها ايه
كملت وهي بتجري ورايا
_ جاية دلوقتي وهما مبقلهمش نص ساعة ويوصلوا وتقولي قوليلهم يرجعوا... ده انا هفكك مفاصلك من بعضها
وقفت ورا السفرة وقولت وانا بتفادا اي ضربة ممكن تجيني
_خلاص يا ماما خليهم يجوا وانا هنزل اجيب موز وانا اللي هحاسب بس سيبي دي وحياة بابا لو جت فيه هتفتحلي دماغي
_ما انا عاوزه افتحها امال بجري وراكي ليه، غوووري دقيقتين والاقيكي هنا بالموز وتيجي تدخلي تجهزي وتقابلي الناس بأدبك مترفعيش عينك في العريس.. اعملي نفسك مؤدبه في مرة يمكن تكمل واخلص منك
_ حااااضر حاضر رايحة اهو بس ابعدي شوية
بعدت وقالت
_ قواااام
_ حاضر
قولتها وطلعت اجري علي محل عم عبدة وانا بتمتم بعصبية و وقفت قدام المحل وانا بنهج من التعب وقولت
_ عم عبدة اتنين كيلو موز وبسررررعة
_ مالك يا هنا يابنتي حد بيجري وراكي ولا ايه
قولت وانا لسة بنهج
_ لا بس ماما عاوزة موز تعمل ضيوف للعصير .. يييية.. اقصد عصير لضيوف
_ باين عليهم ضيوف من اياهم.. انا كنت شايف ابوكي لابس البدلة السودة من شوية
_ ايوة هما
_ ربنا يتمم علي خير بس ازاي هتعملولهم عصير موز وده ينفع يابنتي
_ والله قولت كده ياعم عبده.. قولتلها الموز ده يستقبلوا بيه قرد مش عريس وهي محكمة رأيها ، بس انا مالي كدة كدة هيترفض ، بسرعة الله يكرمك هتنفخني لو اتاخرت اكتر من كدة
_ طيب بس خدي نفس يكون جبتلك
_ ماشي..
دخل يوزنلي الموز وانا مسكت عنقود عنب اتسلي بيه يكون جه ف جاني صوت من ورايا بيقول
_ تلاتة كيلو مانجة يا حج
التفت ليه بتفاجيء وقولت
_ انت!
_ هو انتي!!!
_ اه انا.. اية جايبك هنا
_ وانتي مالك هو انا داخل محل ابوكي
_ ابوكي!!!
شديته من ياقة قميصة وقولت وانا مضيقة عنيه
_ ولااا انت هنا في منطقتي وانا مبقوقة منك وعلي اخري ومن ساعة ما سبتك وانا بقول يارب اشوفك تاني علشان اطلع كمية قهري منك ، ولو سيبت نفسي لاحساسي دلوقتي وصرخت وقولت انك بتضايقني هتتعجن عجن واطرافك هيتحوجوا وهيتعملوا علي شكل حرف اكس ومش هنلاقيلك سمكري يظبطك من الحوجة دي ولا هتلاقي كلبة جربانة تقبل بواحد زيك ستر ليها ف اتلم كدة وعدي يومك
_ الله الله الله انتي قد المسكة دي
_ مكنتش مسكتها يا خفيف
بعد ايدي عنه وهندم نفسه وقال بتوعد
_ ماشي...
ميل عليه وقال
_ مسيرك يا ملوخية تيجي تحت المخرطة
_ طيب يا مخرطة
ابتسم بخبث وقال
_ طيب يا ملوخية
اتسعت عيني لاخرهم وانا شايفة المكر في عينه وتلميحاته المنحلة ف رزعته برجلي في رجله وقولت
_ منحط
_ انتي قد الضربة دي
_ مكنتش ضربتهالك
_ اوكي اوكي... خليكي فاكره
_انت اللي خليك فاكرة... بسرعة ياعم عبده
_ براحتك ياعم عبده في كل تأخيرة نجاة لواحد غلبان هيتدبس النهاردة
_ شنقيط!!!
قال عمي عبدة
_ اتفضلي ياست البنات بالهنا علي اللي هياكلهم
قال هو معلق علي كلمتي
_ شنقيط؟! ... طيب يا شجرة الدر خدي الموز وامشي عاوز اخد المانجة من غير ما اتلخبط بينكم
ضحك عمي عبدة وانا عقدت حواجبي بعدم فهم وقولت
_ اية
_ بقولك امشي
_ اممم شكلك مش حابب تمشي من هنا سليم.. شكرا يا عم عبدة
_ سلميلي علي ابوكي
_ يوصل
مشيت وطول الطريق وانا بحاول افهم قصده اية بأخر جملة.. هل قصده غلط ولا معاكسة ولا سخرية ورجعت البيت وانا هتجنن وهموت وارجع افهم هو يقصد اية بالظبط ولغيت ما جهزت علشان الضيوف وانا لسه بفكر في الكلمة دي وبعد وقت جت ماما وقالت
_ انتي قاعدة لسة قومي الناس جم ، هاتي العصير من المطبخ وتعالي سلمي
_ مليش نفس قوليلهم مش موافقة
_ يجيكي مصيبة يابنت بطني طيب مش تشوفيهم حتي عشان نقدر نقول مش موافقة ... قومي لا افش غلبي كله فيكي قووومي
_ قررف ده بقا جايه جايه روحي
_ لا قومي هاتي العصير هدخل معاكي
_ يارب بقا يااارب.. هو مفيش بنات غيري.. حاضر هروح علشان اخلص من الليلة السودة دي
دخلت المطبخ وانا بتمتم بغيظ زي عادتي وهناك شوفت علبة جاتوة ومانجة ف قولت وانا بمسك مانجاية منهم
_ ده مين اللي عنده نظر وجاب دول.. هو ده اللي يتعمل عصير مش تعملي موز بلبن.. بس احسن يمكن يطفش ونرتاح من الخناق شهر بسبب رفضي... يارب تطفش يا أحمد الغبرة انت كمان.. يقطع كل الاحميد من الدنيا كلها
_ انتي بتبرطمي تقولي اية.. شهلي عيب كدة
_ جاية اهووو في ايه ده مش عريس اللي مهزقاني عشانه من يوم ما عرفتي بيه ده
_ يختتتي بس شوفيه.. راجل طول بعرض وحلو لا وشغال في بنك وهموت واعرف من اللي بيكرهه ودله عليكي... امشي ومثلي انك مكسوفة في مرة بلاش بجاحة
قولت بزهق
_ حاضر همثلك اني متزفته.. قال اتكسف قال لية جيبنلي توم كروز بروح امه.. امشي يا حجة هو يوم باين من اولة
مشيت وراها وانا خافضة جفوني مش كسوف زي ما قالت بس مكنش لية نفس اشوفه حطيت العصير وسلمت عليهم وانا لسة خافضة جفوني وبعدين قعدت وبعد ثواني جاني صوت ست بتقول
_ ما شاءلله عليها قمر زي ما حكولنا عنها بالظبط
قالت ماما
_ ونبي انتي اللي قمر واحنا زارنا النبي النهاردة.. ومتأخذوناش هي بس خجولة شوية عشان كده تحسيها كامشة في نفسها
نغزتني وقالت بلطف مصطنع
_ يابت بطلي كسوف في ايه... ونبي هي كده لو نطق الحجر هي ما تنطق وما عارفه اعملها ايه علشان تدردح وتاخد وتدي زي باقي البنات
بعد ما قالت الكلمة دي سمعت ضحكة ف رفعت عيني اشوف مين ده اللي مش مصدقها غيري ف توسعت عيني للحظات وانا بستوعب اللي انا شوفته.. مهندس الغبرة قاعد قدامي وبيسعل بتصنع علشان يغطي علي ضحكته ولما هميت اني اقوم وازعق حد من نظرته و وجه عينه ناحية بابا بما معناها انه هيقوله ف رجعت قعدت وقولت لما نشوف حكايته وهيقول اية لبابا وبعد وقت من كلام اهلي واهله وشوش اخته بحاجة ف قامت وقالت نسيبهم مع بعض شويه ومشيوا كلهم ف قومت وقفت قدامه وقولت
_ انت اية جابك هنا
_ شكلك لسة مش مستوعبة ان انا القرد
_ طيب قول والمصحف.. يعني مقابلتنا مكنتش صدفة
_ المفروض تكوني فهمتي كدة من اول ما شوفتيني عند الفكهاني
_ ايوة ايوة ايوة...طيب واية اللي خلاك تيجي بعد عدم تفاهمنا في المترو وبعد اللي حصل تحت.. ولا ده ابتزاز من نوع جديد
_ اقعدي طيب علشان نعرف نتكلم
قعدت جنبه وقولت
_ اديني قعدت.. اشجيني يااا بشمهندس
ابتسم وقال
_ شكلي هحبك علشان قولتي بشمهندس دي... والحكاية بسيطة وهي ان لشهرين كاملين وانا سايب شغلي وحياتي وبتابعك وماشي وراكي من الشغل للبيت ومن البيت لشغل وعرفت عنك كل حاجة ، مين صحابك ، وبتتعاملي مع الناس ازاي.. واية مؤهلاتك واية هواياتك.. حتي اصدقائك علي النت عرفتهم بالواحد وشوفتك وانتي بتمشي تتكلمي مع نفسك لما بتزعلي من حد بتمشي تشتمي فيه بتمتمة زي ما شتمتي عليه بعد ما نزلتي من المترو وبعد ما مشيتي من عند الفكهاني.. الا كنتي بتقولي اية بالحق
لاحت ابتسامتي علي وشي وقولت
_ لا والله؟!
_ اه والله
_ بس انا اول مره اشوفك النهاردة
_ ايوون عارف ، وده علشان انا حويط شويه وكمان انتي مبتهتميش بالناس اللي في الشارع ف منتبهتليش
_ بردو مفهمتش ايه جابك بعد اللي حصل.. ميتهيأليش انك حابب تسترني بعد اللي حصل ، ولا جاي علشان تترفض وتبقي جت مننا
_ لا.. شوفي انا هقولك الحكاية كلها .. بعيد عن الكلام اللي قولته ده كله واني كنت حابب استفزك واضايقك شوية بس انا بعد ما استقر رأيي عليكي واقتنعت بيكي بكل الهبل بتاعك وقولت هي دي طلبت منكم معاد.. وحتي اللي حصل تحت وفي المترو ده انا متفاجئتش منه لأني عارفك طاقة شويه لا شوية اية دة انتي طاقة لدرجة انك ملقتيش غير دكتور التجميل نص راجل ونص ست اللي تحكيلي عنه
ضحكت وقولت
_ ماهو الوحيد اللي اسمه احمد
_ ولو مكنش ينفع تحكي عنه انا اتكسفتلك وعملت عبيط
قولت بحرج
_ انا كنت بتكلم بحسن نية وبعدين انت متقوليش اقول ايه ومقولش ايه انت مرفوض اساسا
_ والجاتو اللي جبتوا
_ انت جايب الجاتو وحاطط عينك عليه.. ما احنا جبنا موز باللبن نعايرك بيه دلوقتي
_ انا مبحبش الموز باللبن وعشان كدة جبت مانجة لما سمعت ان امك قالتلك هاتي موز كنت فاكركم هتعملولي منها بس شكلكم هتاكلوها لوحدكم.. ها موافقه ولا اخد المانجة والجاتوة وامشي . ولو نقصوا حاجة هوديكم في ستين داهيه ومش هقبل بأي تعويض
_ طيب بس بس.. محدش قربلهم زي ماهما في المطبخ خدهم ومش موافقة
قال وهو بيستعرض نفسه
_ ده منظر واحد يترفض ليه عميتي
ضحكت وقولت
_ اه ده منظر واحد يترفض علشان الكلمة دي بذات انا هرفض
_ ضحكتي يبقا من ورا قلبك وعاوزاني احايلك
استعرض نفسه مره تانيه وقال
_ بس ده منظر واحد يحايل
_ امممم
_ اية بتفكري تفكري
_ هههههه حد قالك انك مجنون
_ كتير
_ اممم طيب بصراحه كل اللي اتقدمتلهم ورفضوك عملت معاهم كدة
_ ده منظر واحد يترفض.. انا ولا مرة اترفضت
_ ياسلام
_ اقسملك ، لا انا مترفضش
_ ايييية الغرور دة كله براحة علي نفسك لا يطقلك عرق
_ مش غرور دي ثقة في النفس وكمان انا مستحيل اتقدم لواحدة مكنش واثق مليون لمية انها مش هترفضني .. اصل شوفي هقولك حاجة
_ قول
_ انا بشمممهندس وحطي تحت بشمهندس دي عشرين خط علشان تكون المقامات محفوظة بينا ،بشمهندس فاهم و واعي بعمل تحريات زي كده من قبل ما افكر اخد معاد مع حد وبعد فترة من التحريات بيبان البنت دي تنفع ولا لا.. يعني ليها علاقات بحد ولا لا.. ماشيها بطال ولا لا.. حالتها اعلي مني ولا لا.. والخمسة اللي عملت عليهم التحريات دي مفهمش واحده خدت معاد مع اهلها غيرك ومش هسمح اني اترفض
_ لا واالله امال اللي قولته في المترو ده كان اية.. فتي؟!
_ مش كله فتي الجزء الخاص بالتحريات حقيقي..الجزء الخاص ب اني بترفض عشان اسمي ولا علشان الحركة اللي بعملها كدب
_ والمقلب بتاع اختك
_ لا دي حقيقة ، المقلب ده كان قبلك علي طول بعد ما اختي وجوزها اتخنقوا مني بسبب التحريات اللي بعملها وشروطي الزيادة اللي حاططها في اختيار البنت المناسبة.. بس كمان افورت في سردها ليكي.. مكنش في غير بنت واحده عاملة عفريته وماغماش عليه ولا حاجه بس الصراحه كنت بصوت وبشد في الشباك علشان اهرب واللي وقفني هما اختي وجوزها لما طلعولي من جوه وقولولي ده علشان تبطل اللي بتعمله مع كل واحده نجبهالك
_يخربيت الف والدوران.. لية كل ده.. كان هيجرا ايه لو جيتلي دوغري
ابتسم وقال
_ حبيت اشوف رد فعلك علي اللي هقوله
_ بس انا صدقتك
_ ايوه ما انا بعرف احبكها
_...
_ اية موافقة ولا تقومي تجيبي الجاتوة والمانجة
_ هههههه يادي الجاتوة والمانجة.. ماشي سيبني افكر
_ ايوة هو ده الكلام السليم.. فكري بس في الاخر تقولي موافقه مش هقبل بالرفض انتي فاهمة ولا لا.. ده مش منظر واحد يترفض
_ هههههه موافقة بشرط
_ اية
_ لو ادتني وعد انك تبطل الحركة والكلمة دي
_ اوووكي نبطلهم
كمل وهو بيستعرض نفسه
_ بس بأمانة ده منظر واحد يتشرطوا عليه..ده انا لو منك هوافق علية وانا مغمض ده كفاية اني مهندس هي البنات لاقية وزير ولا رئيس دولة حتي لما تتشرط علي مهندس
_ هههههه يارب تطلع الهندسة دي كدبة بالله عليك تطلع بتكدب في دي كمان
_ الا دي انا ممكن اكدب في اي حاجة الا إني مهندس.. سوري بس اللي جرب يبقي مهندس ميعرفش يكون انسان عادي
_ اممم وياترا مهندس في ايه
_ لا من فضلك متغيريش الموضوع
_ لا بجد اصلهم قالولي ان اللي جاي شغال في بنك
_ هما قالوا كدة
_ اه
_ ناس ميتبلعش في بوقها فولة
_ ميتبلش في بوقها فولة
_ ايني واي ميتبلعش ميتبلش المهم ان في فول وبصراحه اه انا خريج تجارة بس كان نفسي اكون مهندس لكن مجموع الثانويه مجبش هندسة
ضيقت عينيه ف قال
_ دبلوم تجارة مش بكالريوس
_ وشغال في بنك اية بدبلوم ده
_ احم انا فرض امن علي البنك
_ اممم
_ بس المدير بيحبني وبيعتبرني زي ابنه
_....
_ واحيانا بيديني فلوس ، مش بنك ومليان فلوس
_....
_ آية
_ بتتكلم بجد
_ ايوة بجد مش انتي بتحبيني يبقي تقبليني زي ما انا ان شاءلله اكون عامل نظافة.. الحب فوق كل شيء يا هنا
_....
_ مااالك
_ انت مين قالك اني بحبك هو انا اعرفك يابني وبعدين آية الافلمه اللي بتأفلمها عليه من الصبح دي... انت ازاي كدة يخربيتك
ضحك وقال
_ بصي بصي انا هجبلك الخلاصة
_ هاتلي الخلاصة شكلها هتخلصنا كلنا الخلاصة دي
ضحك وقال
_ انا خريج هندسة وشغال مهندس بس قولتلهم يقولوا شغال في بنك علشان لما تلاقيني مهندس تحسي انك نولتي اكتر من احلامك اللي حلمتي بيها في حياتك كلها
_ ده اخر كلام
_ اه اخر كلام واتأكدي بنفسك
_ طيب انا مش موافقة.. عارف لو طلعت عامل نظافة كنت وافقت.. امشي اطلع بره هي مفقوعة لوحدها
_ ده منظر واحد....
شديت ايده وقولت
_ اه ده منظر واحد يترفض اطلع بره معندناش بنات لجواز
_ امال انتي ايه استني بس هههههه
شد ايده مني وقال
_ انا اسف.. انا كده مبحبش اكون جد وكل ده هزار مش معني اني مهندس اني هفضل اتعالا عليكي واحسسك انك صعلوقة جنبي ما المهندس والدكتور والرئيس كلهم بني ادمين لا فرق بينهم الا بالتقوي
_ هههههه الصبر يارب.. ارحمني .. اقعد هنده بابا
_ يعني موافقة
_ لاموافقة اية دلوقتي دي لازملها تفكير وصلاة استخارة انا مش مطمنة
_ ده منظر...
قولت بمقاطعة
_ اه دي منظر ميطمنوش لية ويصلوا علشانه صلاة استخارة
_ غريبة مع اني مهندس
_ ياعم ارحمني قفلتني من كل المهندسين ومن كل اللي اسمهم احمد النهاردة
_ طيب قوليلي بصراحه
_ افندم
_ ده منظرك الطبيعي ولا روحتي للكوافير يعملك معجزة زي ما عملتي مع الدكتور اللي مش معروف نوعه
_ انت مش شوفتني وانا راجعة من الشغل بنفس المنظر.. في حاجه اتغيرت ولا هي مضايقة وخلاص.. وبعدين تعاله هنا انت مش من شويه معايرني اني كملت ال 26
_قولتلك كنت بستفزك .. وحتي لو كملتي ال 27 ياستي انا نشنت عليكي وراضي بيكي بوجع مفاصلاك وهشاشة عظامك.. روحي بقا اعمليلي عصير مانجة من اللي جبتها ، انا مبشربش اللبن خليكي عارفه المعلومة دي وهاتي جاتوة انا جايب لكل واحد مننا حتة بس في حتة زايدة كنت عامل حسابي انها هتكون لاخوكي وبما اني مش شايفه موجود ف قسميها علي باقي الاطباق لو سمحتي
قولت بحنق
_ ياعم اطلع بره انا مش هتجوز.. عرفاك من ساعتين وهموت بسببك امال لو اتجوزتك هيحصلي إيه.. اطلع من هنا وربنا لا انت طالع
« بعد شهر»
_ هنا!!! هنونتي.. يلا يا حبيبي اصحي الفطار جاهز
فتحت عيني وبصتله وانا لسة مفوقتش بشكل كامل وقولت
_ صباح الخير
_ صباح الهنا، صباح السعادة علي اجمل عروسة.. قومي جهزتلك فطار هتاكلي صوابعك وراه.. جبنة ولنشون ومربي وعيش وعسل.. ومش هتصدقي معاهم اية... بييييض
_ ياااه تعبت نفسك ليه بتجهيز كل ده، طيب وياترا البيض مسلوق ولا مقلي ولا جايبة ني
_ لا ده جابته اختي امبارح كان مسلوق جاهز يلا علشان تاكلي وتقوليلي ايه رأيك
_ ههههههه من قبل ما ادوق حلوين تسلم ايدك
_ لا والله لازم تدوقي والا هحس انك بتجامليني
🌹 🌹🌹🌹🌹🌹🌹🌹🌹🌹🌹🌹🌹🌹 💚 مرحبا بكم ضيوفنا الكرام 💚هنا في كرنفال الروايات ستجد كل ما هوا جديد حصري ورومانسى وشيق فقط ابحث من جوجل باسم الروايه علي مدوانة كرنفال الروايات وايضاء اشتركو في قناتنا👈علي التليجرام من هنا يصلك اشعار بكل ما هوه جديد من اللينك الظاهر امامك
🌹🌹🌹🌹 🌹🌹🌹🌹🌹🌹🌹🌹🌹
تمت بحمد الله
🌹 🌹🌹🌹🌹🌹🌹🌹🌹🌹🌹🌹🌹🌹
💚 مرحبا بكم ضيوفنا الكرام 💚
هنا في كرنفال الروايات ستجد كل ما هوا جديد
حصري ورومانسى وشيق فقط ابحث من جوجل باسم
الروايه علي مدوانة كرنفال الروايات وايضاء اشتركو في قناتنا👈علي التليجرام من هنا يصلك اشعار
بكل ما هوه جديد من اللينك الظاهر امامك
🌹🌹🌹🌹 🌹🌹🌹🌹🌹🌹🌹🌹🌹
تمت بحمد الله