رواية عذراء الرعد كامله بقلم بسمه ) جميع الفصول حتى الاخير الخاتمه

رواية غمرني بحبه الفصل الخامس5والسادس6 بقلم سحر السحرتي

صرخت سهر :مستر نبيل اسفه ما كانش قصدي انت كويس حد يلحقنا دكتور الشركه فين 

*وهي تنظر له نظره تحدي بانه لو لديه من الشجاعه قطره  يخبر احد انها فعلتها وهي تقصد 

: حدث هذا تحت  نظر كريم الذي لم يستطع نجدتها من تحرش نبيل لانه اراد ان يرى كيف ستوقفه عند حده كما فعلت اول مره وكان يتجنب ملاحظة أحد لما يكنه لها من مشاعر حتى لا تسوء سمعتها

*لم يتوقع رد الفعل هذا منها لكنه شعر بسعاده من فعلتها فقد راى امراه قويه تستطيع الحفاظ على نفسها اسرع كريم لنجده نبيل 

:الف سلامه عليك لا شكلها بسيط مش تخلي بالك يا انسه سهر خلاص حصل خير 

:اسفه يا مستر كريم مش عارفه ازاي المج وقع مني على دماغه 

*نظر لها بفخر من فعلتها فهمتها بذكائها

:خلاص اتفضلي على مكتبك بلاش تنهاري كده الدكتور هيعالجه نص ساعه وهاتي لي الاوراق اللي انت شغاله عليها لانه اكيد هيروح مش هيعرف يشتغل كده وهو متعور

*توعد نبيل لسهر وكان يستشيط غضبا لفشل خطته ولضرب سهر له بالكوب فوق راسه لانه عرف انها تعمدت ذلك 

*بعد نصف ساعه توجهت سهر الى مكتب كريم 

ايناس :سهر انت بتلعبي في عداد عمرك باين عليك

: ليه وانا عملت حاجه 

:علي انا برده ما انا شفتك كنت رايحه اعمل قهوتي انا كمان 

:يعني يرضيكي اللي عمله اسكتله عشان يسوق فيها 

:لا جدعة بس خلي بالك نبيل مش هيسكت ومش هيسيب حقه

: كسر حقه وهو كمان له عين يفكر انه له حق ....ربنا يستر من مستر كريم  هو كان عايز الملف ده 

:ادخلي هو مستنيك 

:هو مش انت اللي هتدخليه له

: لا هو اكيد عايز يتناقش معاكي فيه 

بقلمي سحر السحرتي 

*دخلت ووجدت ابتسامه على وجهه وقد ظنت انه غاضب لما حدث لابن عمه

: اتفضلي اقعدي

: اتفضل الملف 

:بلاش تضايقي نفسك اللي حصل كان مجرد حادثه 

:هو انت شايفني متضايقه حاجه حصلت غصب عني مش مقصوده هزعل ليه

: طب دمعتين حتى تضحكي علي بيهم

: ليه هكذب مش زعلانه عليه والظاهر اني مش مطوله هنا 

:ليه هو عمل لك حاجه ثاني 

*فاضطربت لا تدري ماذا تقول يبدو انه لا يعلم شيئا 

:لا قصدي ان مستر نبيل اكيد مش هيسكت وهيزعل

: بس ده حادثه اكيد مش هيعمل حاجه 

*تناقش معها وسالها عن بعض المعلومات التي في الملف 

*دخلت ايناس ومعها ايميل باللغه الصينيه 

:الشركه الصينيه بعتت الايميل ده مش عارفه ما بعتوش ليه بالانجليزي 

:خلاص ابعتيه يترجم 

*نطقت سهر : اسمحي لي انا ممكن اترجمه 

:صح انا نسيت ازاي انك معاكي لغه صينيه 

:وحضرتك هتعرف منين مستر نبيل اللي يعرف من الانترفيو اللي عمله معايا

: اصل بشوف السي في بتاع كل الموظفين الجداد 

:اه طب تحب اقراه هنا او اترجمه كتابه

: اقرايه هنا وايناس تكتب المفيد عشان ما نضيعش وقت 

*قامت بالترجمه وسط اعجاب كل من كريم وايناس وعادت الى العمل 

*بعد عده ايام قام نبيل بخصم خمسه ايام من راتب سهر لاسباب تافهه فدخلت مكتبه للاستفسار وحدثت مشاده كلاميه معهم

: لا انا كده مش هقعد في الشركه بالشكل ده ظلم وافترى

:حقك لكن مش هقبل استقالتك ولا هتاخدي شهاده خبره لو تحبي ارفدك ما فيش عندي اي مانع 

:لا  عندي موانع و في مدير وصاحب للشركه يرد عليك انا مش بشتغل وكل الشغل على دماغي والاموره اللي بره ما بتعملش حاجه وكل شويه تصرف لها مكافات ومش بتكلم لكن توصل انك تخصم خمس ايام من غير وجه حق لا بقى في ده مش هسكت

: اعلى ما في خيلك اركبيه

: تمام هنشوف  

*ذهبت لايناس وهي غاضبه وطلبت موعد لمقابله كريم

: بس هو في اجتماع اقعدي اهدي واشربي حاجه على ما يخلص

: مش عايزه حاجه

: مالك هو نبيل عمل حاجه معاكي ثاني 

:خصم خمس ايام من المرتب ومش عايز يقبل الاستقاله عايز يرفدني ومن غير شهاده خبره شفتي 

:طب اهدي عشان تعرفي تتكلمي مع مستر كريم لانك كده هتضيعي حقك 

*مرت نصف ساعه وانتهى كريم من الاجتماع وجد سهر في انتظاره

:خير يا انسه سهر مستنيه من بدري

: لا من شويه ممكن اتكلم مع حضرتك 

*كانت تقاوم دموعها ولكن بمجرد ان دخلت تساقطت بغزاره 

:اهدي بس في ايه

: اسفة حضرتك بس ممكن تقبل استقالتي من غير اسباب انا قربت على سنه وحرام امشي من غير شهاده خبره

: مين قال انك هتمشي هو نبيل عمل حاجه معاكي 

:اه 

*استشاط من الغضب 

:عمل ايه 

:خصم خمس ايام من المرتب 

*فهدا قليلا : هو ده اللي مزعلك طب ليه 

:عشان باخد 10 دقائق اصلي الظهر مش اكثر انا بحافظ على مواعيد العمل وبصلي العصر في البريك لكن ما اقدرش ااجل الظهر للبريك واظن انا قايمه بالشغل على اكمل وجه

: هي دي اسباب انك تسيبي الشغل ولة انت مخبية حاجه ثانيه طب هتكلم معاه 

:انا مش ممكن اقعد انا شايله كل الشغل والمكافات لغيري لكن مش مهم انما تعبي يتخصم  منه ده ظلم ارفضه هو ايه سر العداء معايا انا عملت شغل كثير ومنه قديم كان بايظ ملتزمه بالمواعيد عمري ما اتاخرت اجازات بيرفض يديني عايزة افهم قصرت في ايه عشان يخصم ليا

: ولما انت بتعملي كل ده اللي معاك في المكتب بتعمل ايه 

*صمتت ولم تتحدث 

:ردي عليا عايز اعرف كل حاجه 

:مش هقدر اتكلم عن حد بس حضرتك ممكن تراجع سجلات الحضور والإجازات والمكافات هتتاكد اني مظلومه 

*احترمها لعدم خوضها في سمعة زميلاتها ولكن ارادت تنبيه أنه يتم قهرها والتجبر عليها ليس أكثر 

: هو في مكتبه

: اه هناك

: تعالي معايا

بقلمي سحر السحرتي 

*ذهب معه كان المكتب مغلق ومضاء اللمبه الحمراء فانتظر معها

 *بعد عده دقائق خرجت منه زميلتها في المكتب بمنظر مقزز شفتيها مجروحه وملابسها غير مهندمه ففهم كريم وقال بنبرة حادة

: استنيني هنا 

*دخل و عينيه واضح عليهم الغضب الشديد

: اهلا باشمهندس كريم

: هو انا مش حذرتك وقلت لك اخر انذار بلاش تتعرض لسهر وسفالتك تبقى بعيد عن الشركه 

:انا عملت لها ايه هي اتاخرت خصمت لها ايه المشكله مش هعرف امشي كلامي على الموظفين مش فاهم ايه اللي مزعلك قوي كده دى اول مره تسيب مكتبك عشان حد وتجيلي هو في حاجه بينكم اول مره اشوفك متنرفز لحتة موظفه ايه عجبتك

*لم يجادل معه حتى لا يحس انه فعلا معجب بسهر

: انت اكيد شارب حاجه او مش في وعيك انا هفوت لك تفاهتك دي وسهر هنقلها من عندك بما انك مش عايز تتغير وابقى اشوف غلطه في القسم واللي بره دي تمشي والكلام الفارغ اللي بيتعمل في الشركه ده بلاش لان واضح انك مش هتطول هنا 

*خرج لسهر 

:تعالي معايا على مكتبي ولمي كل حاجاتك من هنا

: ليه

: هنقلك من هنا 

*ذهبت خلفه

: ايناس كلمي حد ينقل مكتب لسهر معاكي هنا وفهميها بتعملي ايه عشان لما تطلعي اجازه الجواز هي هتكون مكانك 

*وتوجه بالحديث لسهر

: مكانك مع ايناس هي مديره مكتبي وهتعتبر رئيستك افهمي منها شغلها اذا مناسب لك الشغل 

:شكرا بس تخصصي غيرها ما افتكرش اني  هقدر 

:انت ذكيه و تقدري تتعلمي بسرعه حاولي و ممكن تروحي النهارده وتبداي من بكره

*دخل مكتبه واغلق الباب فضحكت ايناس

: بتضحكي على ايه

: بقيت مديرتك وهتحرش براحتي 

*ضحكت سهر

: تبقي ناويه على عاهة مستديمه انت شفت اللي حصل في نبيل فتحت دماغه واخد كام غرزة منورين راسه الفاضية 

:استر يا رب ده انت شرانيه 

:خافي مني بقى ولو تحبي بقى ابقى مديرتك ما عنديش مانع 

*توالت الايام التي كانت من اسعد ايام كريم لانه كل يوم يرى سهر ويتعامل معها مباشره 

*ذات يوم طلب من سهر وايناس أن يدخلا مكتبه 

:عندي اجتماع بعد يومين مع وفد للشركه الصينيه الاجتماع مهم سهر لازم تحضري بما انك بتعرفي اللغه الصينية لو حاجه المترجم غيرها في الترجمه عرفيني لانها شركه اول مره نتعامل معاها ...ايناس هتسجلي انت اي ملاحظات خلي سهر منتبهه للترجمه وقبلها بيوم تتاكدوا من  أن غرفه الاجتماعات جاهزة

 *يوم الاجتماع 

*حضرت سهر باكرا تصطحب مها معجنات مختلفة ضيافه لاعضاء الاجتماع ووضعت لمساتها الخاصه من بعض الزهور ومعطر للجو برائحه نسيم الصباح تبعث الراحه والهدوء في النفس كانها تهتم ببيتها

بقلمي سحر السحرتي 

*دخل كريم باكرا ايضا وقد راها 

:ايه النشاط ده كله 

:حبيت اتاكد ان كل حاجه صح قبل الاجتماع 

*دخل غرفه الاجتماعات فوجد لمساتها الغير معهوده 

:احنا  كده هنمشي ايناس

: لا طبعا ده هي اللي طلبت مني اعمل كل ده 

*دخلت ايناس وقد استمعت لهم وقالت

: بلاش تكذبي لان مستر كريم عارف ان مش بتاعه الحركات دي وما تخافيش ده بيهزر قال يمشيني هو يعرف اصلا يتحرك خطوه في الشركه من غيري

: فعلا ايناس اهم مني في الشركه 

:شفتي احنا بنهزر كده بينا وبين بعض بس قدام الناس معامله رسميه بس انت بقيتي معانا بس في ريحه اكل تحفه 

:دي ضيافه عملتها

: لازم اذوقها احسن تتعب الناس مش كده يا مستر كريم 

:كده طبعا وتعبتي نفسك ليه في شركه متفقين معاها بتبعت لنا ضيافه كل اجتماع 

:حبيت اعمل شيء مختلف بما انهم اول مره يتعاملوا معانا اتفضلوا احب اسمع رايكم

: ايناس لا وحشه قوي انا هاخذها البيت لانها هتتعبهم وهم ياكلوا الحاجات الثانيه

كريم : عندك حق نص انت ونص على مكتبي

*ضحكت سهر كثيرا كان صوت ضحكتها مميز وساحر

: مش اذا خليتوا منها حاجه وانتم واقفين تأكلوها  هبقى اعمل لكم ثاني سيبوها انا متفائله خير بيها وصاحيه من بدري عشان اعملها

 كريم :خلاص يا ايناس بس رجعيها بعيد شويه يمكن ما حدش يشوفها ونبقى نقسمها سوا بعد الاجتماع 

*ضحكوا سويا كثيرا 

*دخل نبيل كان يستشيط غضبا منهم وفي عقله المريض

:  حلال ليك يا أستاذ كريم وحرام عليا

*كان خلفه والده وباقي الموظفين

 سامي: في حاجه غريبه في غرفه الاجتماعات

 ايناس: دي لمسات سهر فعلا تسلم ايديها 

*نبيل بكل حقد : عملت ايه يعني جديد 

*نهره والده بنظراته وقال

: لا بجد في جو مختلف كل يوم بيزيد اعجابي بك يا سهر

: شكرا على دعمك ليا يا مستر سامي

: يلا يا كريم ننزل نستقبل الوفد 

*صعد الوفد قبل بدايه الاجتماع بنصف ساعه بداوا في تناول الضيافه وتفاجئ كريم ان سهر تسلم بحفاوه على مترجم الوفد فسالها والغيرة تتاكله

: انت تعرفيهم

: لا بس جاكي استاذي هو اللي درس لي الكورس وعلمني اللغه الصينيه اللي بتحدثها بطلاقه ده مدرس هايل رغم صعوبه اللغه وكنت هبطل بس هو لما بدا يدرسها لينا اسلوبه سهل وحببنا فيها جدا وكان بيحفزنا بجوائز وهدايا 

جاكي: ودي مكافئتك ليا هتمشيني من الشغل وبتبداي انت ترجمه للوفد 

*ضحكت : لا استاذي انا بشتغل هنا مش بترجم 

*بدء الاجتماع كانت سهر تجلس  بجانب كريم وجاكي لان هناك بعض الكلمات بالعربيه لم يتقنها جاكي بعد كانت سهر تساعده بها 

*الى ان تفوه رئيس الوفد ببعض الكلمات عن حفل بمناسبه الشراكه بينهم ومنها ان عليهم استقبال بعض فتيات الليل في الحفل ولا مانع لديه من زوجاتهم وضحك 

*فردت سهر بالصيني بانفعال واضح لم يستطع جاكي ترجمه الكلام لانه احس ان به اهانه لكريم فهو لم يتوقع ذلك من رئيس الوفد 

: هذه وقاحه لن نقبلها واذا عرف مستر كريم ذلك سوف يوقف هذه الشراكه اذا كنت تظن انك ستنتهك اعراضنا لمجرد ان نفوز بشراكتك فتفضل انصرف 

بقلمي سحر السحرتي 

*تفاجا انها تجيد الصينيه بطلاقه واعتذر انه كان يمزح فقط مع اعضاء شركته وان بعض الشركات تتبع معه ذلك الاسلوب ليوافق على العمل معهم

: بعض الشركات مش كل الشركات ... شركه الالفي شركه محترمه ولها سمعتها وشراكتكم معها شرف لكم وانت تعلم ذلك جيدا وليس العكس

:اسف الرجاء ان تنسي ما قلته لم اكن اقصد اي اهانه

: عليك الاعتذار من مستر كريم 

:هو لا يعلم ماذا قلت

: ستعتذر  له وسوف اقول انك شككت في قدرتنا على النجاح 

*اعتذر رئيس الوفد وقد ترجم جاكي ما قالته سهر  حتى لا تفسد العلاقه بين الشركتين 

*ولكن كريم شعر ان هذا لم يكن ما حدث فطريقة كلام سهر الحادة  تدل على غير ذلك ففضل تاجيل معرفه الحقيقه بعد نهايه الاجتماع 

*وتم تحديد حفل توقيع العقود انصرف كل من كان بالاجتماع الا سهر وكريم الذي طلب منها تفسير لما حدث

هل ستقول له الحقيقة ام ستحتفظ بهذه المعلومة

غمرني بحبه 

حلقة ٦

: سهر عايز تفسير للي حصل في الاجتماع 

: ابدا ما فيش هو شكك في قدرتنا على النجاح بطريقه وقحه وفي الدراسه اللي مقدمينها وقلت له اني عامله الدراسه دي بنفسي وهو ما اقتنعش اني اقدر اعمل دراسه زي دي لاني صغيره في السن

: سهر انت مخبيه حاجه ولو عرفتها الثقه اللي بينا ممكن تتهز واكيد هعرفها انا مش صغير فيا تتكلمي يا اما هروح لحد يترجم الاجتماع ودي اسرار ما ينفعش الجأ لحد بره 

*لم تجد مفر  من ان تروي له ما حدث وتعتذر عن تدخلها وتعنيفها لرئيس الوفد وتعتذر من كذبها عليه

: اسفه ما قدرتش اقول الحقيقه

 : انت كان عندك شك ان ممكن الغي الصفقه بسبب وقاحته

: لا انا كنت متاكده انك هتلغيها وممكن تضربه كمان بس جاكي قال انه ما يقصدش وان معظم الشركات اللي بيتعامل معاها بتعمل كده وساعات بيعرضوا زوجاتهم كمان وهو اعتذر لما عرف اننا شركه محترمه 

:انا متشكر لتصرفك بس كمان لازم تتعاقبي على كذبك هصرف مكافاه طبعا على مجهودك النهارده

: ده احلى عقاب

: لا العقاب عايز لازانيا 

*ضحكت بفرحه 

:ده عقابه احلى منه انا اصلا بحب المطبخ بكره تكون عندك بس شارك اونكل عبد الله احسن ياكلها كلها منك

: اعملي حسابك تحضري الحفله 

:مش هقدر ماما بعد الحادثه منعت اي حفلات 

:حادثه ايه وبعدين وجودك مهم والمستشار عبد الله هيكون موجود 

:خلاص هكلمها يمكن تقتنع

: مش هتحكي لي عن الحادثه 

:مره ثانيه اليوم كان مجهد ويا دوب الحق اروح 

بقلمي سحر السحرتي 

*اقتنعت والدة  سهر بحضورها الحفله بعد عناء من سهر في محاوله اقناعها وحجاتها ان عبد الله صديق والدها سوف يحضر وسيوصلها بعد الحفل 

*في يوم الحفل ارتدت جمبسوت باللون الاوف وايت وعليه حجاب متناسق ومكياج مناسب للحفل 

*كانت جميله ورقيقه سحرت كريم عندما راها وحاول الابتعاد عنها كلما استطاع حتى لا يلاحظ احد اعجابه بها وخصوصا نبيل الذي لمح ان هناك شيء بينهم 

*كانت تتحدث دائما مع جاكي وزملائها وعينه تراقبها الى ان استاذن عبد الله من كريم ان يذهب لانه لا يسهر كثيرا 

:طب حضرتك اتفضل بس خلي سهر لاني ممكن احتاج حاجه 

:مش هينفع لازم اوصلها 

:هوصلها انا ما تقلقش

: انت يا كريم مش حد ثاني انا مش بثق غير فيك

: ما تقلقش سهر امانه في رقبتي 

:بلغها انت لاني مش شايفها واصلا مش شايف خالص كابس عليا النوم 

:هتعرف تسوق

: لا معايا السواق لاني بقيت اخاف اسوق بالليل

*انتهت السهره واكتشفت سهر ان كريم هو من سيوصلها كانت محرجه منه

: مالك مكسوفه ليه

: ابدا بس تعب عليك بعد السهره الطويله وانت طول الوقت واقف بتتكلم وتجامل 

*شعور غريب انتابهه انها هي ايضا كانت تراقبه وتنتبه له طوال الليل فاراد ان يقطع الصمت

: لا انا كويس طول عمري بعمل كده بس احكي لي بقى على الحادثه ندردش في الطريق ولا حاجه خاصه

 *روت له ما حدث مع خطيبها 

:يااااه داخل على سنه ولسه معاه هو انت بتحبيه قوي كده

: عايز الحق مش حب على قد ما هو اخلاص ووفاء او زي ما تقول كده رد جميل لانه كان بيتخانق عشاني ليه ما اعرفش ولما اخذني وخباني ورا ظهره حسيت انه بيحميني فمش معقول اسيبه بعد كل ده وبعدين قلت هو لو كنا اتجوزنا كان هيبقى عندي اختيار اني اسيبه

: يعني انت مش بتحبيه و ممكن تتجوزيه بس رد جميل اسمحيلي الحاجات دي انتهت من زمان 

:يمكن قلت بس لسه موجوده 

:والدتك موافقه على كده

: ماما ما تعرفش اني مش بحبه ومش عارفه ليه قلت لك كده انا عمري ما اعترفت لحد بده

: يمكن عشان عندك نفسي احساسي 

:احساس ايه

: اننا ممكن نكون اصدقاء انا كمان محتاج حد افضفض معاه اتكلم من غير قيود يفهمني ويقدر موقفي

: يسعدني طبعا بس اعتقد صعب 

:ليه عشان فرق السن 

:لا فرق السن مش كبير وعمري ما فكرت فيه بس ما فيش صداقه بين راجل وست

: انا مش هكذب عليك انا بستريح وانا بتكلم معاكي وطالما الكلام في اطار محترم يبقى اكيد ما فيش حاجه غلط

: طبعا بس مش معقول هقول لماما او اهلي اني بتكلم مع صاحبي

: لا طبعا بس احنا في وقت الفراغ هنتكلم مع بعض مواضيع خارج الشغل متضايقه من حاجه عايزه رايي في حاجه وانا نفس الشيء وقدام الناس انا مديرك بينا صداقه في اطار محترم ومن غير تجاوز

*فصمتت ولم تجيب 

:واضح انك مش مقتنعه ومحرجه ترفضي

: لا بس بفكر انا بجد بحترمك وبستريح في الكلام معاك خصوصا بعد ما وقفت جنبي ودافعت عني بعد اللي عمله مستر نبيل

: اللي عملته معاكي كنت هعمله مع اي واحده 

:ده سر احترامي ليك لان مفيش حد هيقف ضد ابن عمه عشان موظفه

: الحق ما لوش علاقه بالقرابه اللي بينا وكنت هقف ضده حتى لو مش موظفه 

بقلمي سحر السحرتي 

*بعد عده دقائق وصلت سهر الى المنزل وعاد الى منزله سعيدا يفكر بها 

*مرت الايام كانت احاديثهم في العمل وخارج العمل الى ان قامت ايناس باجازه الزواج ذهبت سهر لحضور فرح ايناس الذي دعيت اليه وايضا كريم لكنه لم يجد مبرر ان يذهب معها خصوصا عندما علم انها سوف تذهب باصطحاب والدتها فسلم عليهم وابتعد 

*كانت ملابسها جميله جعلتها دائما كالاميره 

*في نهايه الحفل عرض عليهم ان يوصلهم اعتذرت والدتها بان زوج ابنتها سوف ياتي 

*انتظر معهم من اداب الذوق لكن عادل تاخر ولم يحضر 

*اتصلت عليه سهر تليفونه مغلق اتصلت على اختها سمر

: سمر هو فين عادل ما جاش ليه لغايه دلوقتي 

: ايه ده دى نايم وقال لي اوعي تصحيني اتفقتي معاه امتى 

:طول عمره ندل وقلت لماما بلاش هو عمره ما هيطلع راجل 

:عيب يا سهر الكلام ده

: ومش عيب اثنين ستات يعتمدوا عليه وهو يستخبى زي العيال يقفل تليفونه ويقول لك اوعي تصحيني هو انا بحضر افراح كل يوم وفرح  لواحده صاحبتي كل قد ايه 

:خلاص يا سهر انا هلبس بسرعه والبس الاولاد واجيب العربيه واجي اوصلكم ما لوش لزوم التقطيم ده 

:لا خليكي مستريحه في بيتك مش معقول تصحي الاولاد وتنزلي في وقت متاخر زي ده 

:قلت خلاص جايه

: على ما توصلي هنكون مشينا واسمعي كلامي كويس خليكي مستريحه في بيتك انت وجوزك لان ماما مسافره عند خالتك هتقعد شهر 

: هتمنعيني ادخل بيت بابا

: لا  ازاي تنوري بس انا في الشغل وماما مسافره هتيجي تعملي ايه وفهميه انه خسر كثير لما بخل علينا بتوصيله

:  هو ما بخلش هو نسي 

:ماما ماكده عليه وبطلي تبرري وتخترعي له اعذار لازم يبقى لك موقف معاه مش معقول كده خليه يشيل مسؤوليه بيته الشهر ده 

بقلمي سحر السحرتي 

:مش معقول ماما تسافر شهر

: لا هتسافر اكثر من شهر هتسافر عند اخوك هو من زمان بعت لها التاشيره وبكره هحجز تذكره السفر 

:طب هبقى اجي اطبخ لك كم اكله 

:شكرا مش عايزه اتعبك اصلا باكل في الشغل انا اللي هبقى ازورك واكل عندك سلام عشان الحق اتصرف في تاكسي

*عادت الى امها بعد مكالمتها الجانبيه مع اختها كان وجهها احمر لدرجه كبيره من شده الغضب

: اتفضل يا باشمهندس روح انا هطلب تاكسي 

:عيب يا انسه سهر عشان ماما حتى

: اللي تشوفه حضرتك يلا يا ماما 

:يا بنتي نستنى عادل

: للاسف العربيه عملتها وهو دلوقتي في الشارع مش عارف يعمل ايه 

:ربنا يعينه 

 *همست :ربنا ياخده هو واللي زيه 

*سمعاها كريم وجلست والدتها في الامام بجانبه وهي بالخلف 

*من وقت لاخر ينظر لها في المراه وعندما راته قال بشفتيه دون صوت 

:معلش اهدي شويه 

*فابتسمت له فغمز لها 

*وصل وشكرته والدتها وصعدت 

*روت لها ما حدث

: اخص عليه ده انا سالته قال لي عيوني يا حماتي وعرضت عليه فلوس التوصيل قال لي عيب 

:ماما من غير نقاش ده واحد لازم يتربى وهو قاعد عندنا هو وعياله ومراته واكل شارب محلي هتسافري عند اخويا بعد يومين حضري نفسك 

:يا بنتي اختك هتتبهدل ده مش بياكلها

: هي لازم تتكلم وتاخذ موقف وهو لازم يحس اننا شايلين عنه كثير يبقى اقل شيء لو طلبنا حاجه ينفذها والجزمه على راسه 

:عيب كده يا سهر من امتى وانت بتعملي كده

: انا زهقت وتعبت كل مره بنبقى محتاجين راجل معانا الغريب هو اللي بيساعدنا مره اونكل عبد الله ومره مستر كريم شكلي ايه قدامه دلوقتي 

:انت مش قلتي قدامه ان عربيته عطلت

: ماما مستر كريم مش صغير واكيد فهم اني بكذب 

:طب خلاص ما تزعليش بس بلاش اسافر

: الكلام اللي قلته هيمشي والا همشي انا اقعد في شقتنا القديمه هيفضل لغايه امتى مستنطع واخويا كمان اتحايل عليك كثير نفسه يشوفك بقى له سنتين مش عارف ينزل اظن حقه ودي حجه كويسه

: بس مش هلحق اجهز نفسي خلال يومين

: ولا تزعلي اخر الاسبوع هحجز لك وبلاش حجج اسبوع اهو  كفايه ... اظن عداني العيب ولو هتيجي تسلم عليك قبل ما تسافري حذريها اوعي جوزها يجي معاها والا هفرج عليها امه محمد 

:معقول تعمليها 

:واعمل ابوها كفايه رميتنا في الشارع بالليل مستنيين جنابه وهو نايم نامت عليه حيطه ولو كان ينفع كنت خليت مستر كريم وصلني على بيته وكنت هفطسه وهو نايم

: انت متعصبه قوي رغم ان دي مش اول مره يستندل معانا هو في حاجه ثانيه

بقلمي سحر السحرتي 

: في القشه اللي قسمت ظهري  في اني كنت محتاجه حد يوم الحادثه وما قلتش كل مره بنحتاج ظهر مش بنلاقي وانت كل شويه انت زي ابني انا زي مامتك اخذنا منه ايه واحد زي ده قلته احسن 

:بس ربنا بيبعت اللي يقف معانا غيره 

:الحمد لله بس لازم واقفه معاه عن اذنك هروح انام 

*ذهبت واستعدت للنوم وجدت رساله من كريم 

:انا وصلت لو تحبي تتكلمي هسمعك بس بلاش تنامي وانت في الحاله دي

: شكرا مش قادره اتكلم مجهده وخلاص طلعت كل غضبي لما اخذت قرارات مهمه بلغت ماما بيها 

*ارسل لها رساله اخرى

: بكره اجازه وكنت عايز اعزم الوفد الصيني في مكان قريه شبه الريف عندنا بتقدم اكل مصري وفلاحي تيجي نشوف المكان ونفطر سوا 

:هتقعد قد ايه 

:ممكن اليوم كله لو تحبي نتفرج على البرنامج اللي هيقدموه عشان نحكم اذا كان ينفع للوفد 

*ضحكت في سرها 

:ماشي هبلغ ماما ارسل لك رساله اذا وافقت الصبح

: لا انا مستني عشان اعمل حسابي واصحى بدري ولا اكسل شويه

: هو انت من النوع اللي بيطول في النوم يوم الاجازه انا اعتقد انك برضة يوم الاجازه بتصحى بدري 

:لا مش للدرجه دي ان لبدنك  عليك حقا وانا بدي له حقه يوم الاجازه ما تتاخريش

: دقائق وارجع لك

* عادت وارسلت له رساله بالموافقه

: الساعه 9:00 هتلاقيني تحت البيت مستنيك تصبحي على خير 

:وانت من اهله 

*لم تنم كانت تفكر هل ماتفعله صحيح اقنعها عقلها انه عمل كالعاده ومن مسؤوليتها التاكد من المكان

#هل فعلا كريم يريد تفقد المكان ام يريد قضاء بعض الوقت مع سهر

                 الفصل السابع من هنا

لقراءة باقي الفصول من هنا

تعديل المقال