رواية نيران الغجرية الفصل السابع والخمسون57 والثامن والخمسون58 بقلم فاطمة أحمد

الفصل السابع والخمسون  : خطوة بدون حساب

ترجل من سيارته وهي خلفه ثم دخلا الى المركز و اتجها لغرفة التحقيق ليقابلهما وائل عند الباب فسأله عمار مباشرة :

- هو جوا ؟ 

- ايوة.

هز رأسه بوعيد و تحرك ليدخل إلا أن يد وائل أوقفته وهو يردد :

- اول حاجة يا عمار انا عايزك تتمالك أعصابك و تهدا عشان نعرف نوصل لنتيجة تفيدنا انا عارف انه صعب عليكم بس لازم تعرفو ان اي حركة غلط ممكن تكلفنا كتير تمام ؟ 

ضغط عمار على أسنانه بعصبية مريرة وهو يجد نفسه عاجزا عن الدخول و خنق ذلك الوغد بل مضطرا لأن يسايره كي يدلي بإعترافه ، ثم نظر لمريم التي تمثل الهدوء ولكن اهتزاز حدقتيها و جفاف شفتيها و ضغطها على طرف ثوبها أوضح له كم هي متوترة و خائفة فحاول تمالك أعصابه من أجلها و غمغم بصلابة :

- انتي مش مضطرة تدخلي لو مش عايز...

حينها قاطعته بثبات لم يتوقعه :

- انا استنيت اللحظة ديه كتير ومستحيل افوتها. 

تنهد بحدة و دلف معها ليجدا الطبيب خائن المهنة جالسا على كرسي و يسند يديه المقيدتين على سطح الطاولة الحديدية أمامه و عندما رآه تلجلج و ظهر عليه الإرتباك فقال :

- انت مين.

- انا الراجل اللي عالجت مراته لما جبتهالك وهي بتنزف و زورت التقرير بتاعت عليا وخبيت حقيقة انها اتسممت.

رد عليه بصوت قاسٍ بعث الرجفة في أوصاله فاِرتجف مبررا :

- انا قلت كل اللي عندي سيبوني امشي. 

ابتسم عمار متمتما وقد اقترب منه :

- معقول عايزنا نسيبك بالسرعة ديه استنى لما نخلص شغلنا معاك الاول. 

ثم انقبض وجهه و تغيرت نبرة صوته وهو يهتف بقتامة :

- ازاي قدرت تزور التقارير بتاعت مراتي من غير مايكشفوك و ايه علاقتك بسليم وليه اختارك انت من بين الكل و اختفيت فين بعد موته ... انا عايز اعرف كل حاجة.

زفر الطبيب بإضطراب و تكلم :

- انا اعترفت للباشا بكل حاجة و هرجع اقول نفس الكلام ... سليم كان صديق ليا و عارف عن العمليات اللي متعود اعملها خارج اطار القانون زي الاجهاض و جه فمرة وقالي انه هيجيبلي بنت عشان تسقط و المفروض اكدب على والد الطفل و محكيلوش ان الجنين مات متأثر بالسم وخلصت القصة ع كده.

قبضت مريم على يدها وهي تشعر بغصة تحكم قلبها و تجعله ينزف فحاولت السيطرة على مشاعرها بينما أكمل الآخر مطالعا إياها :

- بس لما الست جتلي لقيت حالتها خطيرة و كان ممكن تخسر حياتها وانا عملت مجهود اضافي عشان انقذها و علشان كده اتفقت مع سليم يديلي الضعف وهو قالي انه هيكلم الريس بتاعه ف الموضوع وبالفعل بعتولي مبلغ كبير مكنتش بحلم بيه و القصة اتقفلت ع كده صدقني انا مبعرفش مين الريس بتاعه و مهتمتش اعرف اصلا لان مراتك كانت حالة عادية زي باقي الحالات و....

في اللحظة الموالية وجد الطبيب نفسه مكوما على الطاولة وقد انفجر أنفه بالدماء حين نهض عمار على حين غرة و قبض عليه من مؤخرة عنقه دافعا إياه على الطاولة بعنف ! شهقت مريم بهلع بينما اندفع وائل ليبعد عمار الذي كان يصرخ بجنون :

- الحالة العادية اللي بتتكلم عليها ديه مراتي و ابني فاهم ! ابني اللي مشافش الدنيا و مكنش عنده حظ يخلينا ناخدله حقه من ال*** اللي اتفقت معاهم.

ارتاعت مريم من شكله وهو يتنفس بقوة و عروق رقبته بارزة من شدة الإنفعال و تقاسيمه إجرامية ، ولكن رغم خوفها إلا أنها شعرت بلذة الانتقام تسري في عروقها وهي ترى ذلك الطبيب بتلك الحالة المزرية و تلك الدماء كانت مثل المياه الباردة التي ألقيت على قلبها فاِنتعشت روحها و لمعت عيناها بالحقد وهي تتمنى لو تذهب و تقطع أنفاسه ! 

أما وائل فدفع عمار هاتفا بحدة :

- انا هطلعك برا لو الموضوع ده اتكرر تاني.

- انت بتكلمني انا كده ؟

- قولتلك لازم تهدا و تتمالك أعصابك و شوف انت عملت ايه هنستفاد ايه لما تضرب الدكتور هو مبيعرفش حاجة بجد و معندوش علاقة الا بسليم اللي سابله جواب قبل ما يمشي.

تضاءلت وتيرة أنفاسه و بدأت ضربات قلبه تهدأ عندما أصبح يشهق بعمق و يزفر الهواء على دفعات ثم يعدُّ ببطء حتى خبتت ثورته ، و عند عودته لرشده جلس على الكرسي المقابل مغمغما بصلابة :

- انت كنت مختفي فين ومين ساعدك تهرب.

ازدرد لعابه و نظر لوائل يلتمس الحماية ليتمتم بتلبك :

- قبل فترة من وفاة سليم جه لعندي و ادالي جواب وقالي لو حصلي حاجة شوف طريقة عشان تبعته لعمار البحيري من غير ماتكشف نفسك وانا وافقت لانه صاحبي و بعرفه من زمان و كمان عشان ادالي مقابل مالي.

بس لما عرفت انه مات في حادث عربية حسيت انه كان مدبر و خفت قمت هربت عشان محدش يلاقيني بس مكاني اتكشف ولولا وائل باشا كانو خدوني وقتلوني.

قضب عمار حاجبيه و نظر لرفيقه الذي هتف مؤكدا :

- الدكتور كانو مراقبينه وقدرنا نوصله في اخر لحظة قبل ما يجو وياخدوه بس مع الاسف مقدرناش نعرف هما مين لانهم هربو لما شافونا.

- فين الجواب اللي بيتكلم عليه ده. 

جلب وائل الظرف و فتحه عمار بعدما اقتربت منه مريم و ركضت أعينهما على الحروف ...

" عمار بيه ... لو حضرتك بتقرا الجواب ده دلوقتي يبقى انا ميت و اتمنى فعلا كلامي يوصلك ، انا الخادم اللي كنت معتبره ايدك اليمين ووثقت فيه و أمنته على أسرارك و ساعدته في مشاكله بس انا مكنتش قد الثقة ديه.

 الظروف اللي كانت ضدي جبرتني اغلط و أخون ثقتك فيا و بعرف ان بقالك كتير شاكك فيا و تدور ورايا و شكك كان في محله ، أنا اللي اشتغلت ضدك و سممت زوجتك و ركبت  جهاز تنصت عشان اعرف حركاتك مش هنكر و ندمان جدا بس صدقني مكنتش عايز الأمور توصل لكده انا مش هقدر اجازف بحياة اللي بحبهم و اعترف بهوية الشخص اللي كنت بشتغل عنده ومش هعرف اعمل حاجة غير اني اعتذر منك عن كل حاجة عملتها.

 حضرتك ذكي جدا و بتقدر تكشف كل حاجة مش واضحة و كنت قولتلي مرة واحنا بنزرع شجرة في الحديقة أننا عشان ننجح في الزراعة لازم نهتم بالجذور كويس لأنها الأساس ولو عملناها بطريقة غلط النتيجة مش هتعجبنا و شبهت الجذور بالبيت اللي بيتربى فيه الطفل ... كان عندك حق يا عمار بيه وانا عرفت أن مسيرنا نرجع للجذور اللي ياما هربنا منها .. "

انتهى عمار من قراءة محتوى الإجابة و على عكس ما توقع فلقد ازدادت حيرته بشأن هذا الأمر و تضاعف بغضه اتجاه سليم ، قال أنه نادم و اعتذر منه ، حقا ؟ 

هل هو يرى بأن كل ما فعله له لا يستحق سوى طلب السماح وماذا سيفعل هو بإعتذاره بعدما تعاون مع عدوه فقتل طفله و أودى بحياة مريم للخطر و جعله يتهم والده و يعيش في دوامة من الحيرة.

و كيف يكتفي بالإعتذار فقط و يخبره بكل وقاحة بأنه لن يستطيع الاعتراف عن هوية رئيسه ماذا سيستفيد هو من كل هذا ! 

ام هل يعقل أن تكون كلمات الرسالة مشفرة و سليم يقصد بها شيئا آخر ، لماذا يشعر وكأنه لم يكن يود الإعتذار فقط بل هناك شيء آخر تحتويه هذه الكلمات وهو لا يستطيع فهمها.

أما مريم فشعرت بسياط من نار تجلد قلبها و تعصف بأعصابها التي كادت تنفجر بينما تطالع ذلك الوغد المشترك في جريمة قتل طفلها و تمنت لو يشنق الآن إلا أنها صدمت حين سمعت وائل يردد بصوت خفيض :

- زي ما كنا متوقعين هو مبيعرفش حاجة ومش هيقدر يفيدنا فمفيش داعي نحقق معاه اكتر يدوب نعرف منه معلومات عن العمليات غير القانونية اللي أشرف عليها خلال مسيرته و نرفع عليه دعوى بتهمة تزوير التقارير عشان يتحاسب.

زفر عمار ساخطا و في خضم صمته هتفت مريم بإستنكار غالبه الغضب :

-  احنا كده مستفدناش حاجة صح و هتسيبوه يتحاسب سنتين او تلاتة في الحبس و يطلع ؟ ممكن يبقى كداب و متفق مع الريس بتاعه و عامل نفسه مبيعرفش حد غير سليم انتو لازم تحققو معاه اكتر. 

- اهدي يا مريم هما حققو معاه ومش هيقدرو يعملو معاه اكتر من اللي عملوه اساسا

هدر عمار بتعقل وهو يمسك يدها و لكنها فاجأته عندما أزاحته عنها و صاحت بعصبية :

- يعني ايه انا هسيب حق ابني يضيع ومش هقدر اوصل للحيوان اللي عمل فيا كده انت ازاي واقف ببرود كده و عايزني اهدا كمان ولا لما اللي كان شغال عندك اعتذر منك يبقى خلاص سامحته و هتقفل القضية. 

جز عمار على أسنانه بكبت و توحشت عيناه وهو يهمس بنقمة هوجاء :

- خدي بالك من كلامك ومتنسيش ان اللي مات ابني زي ماهو ابنك متتجاوزيش حدودك ! 

أدارت وجهها عنه بنزق ولم ترد عليه ليستدعي وائل مساعده و يشير اليه كي يأخذ الطبيب من هنا فنهض الأخير بإعياء وسط الدماء التي ملأت وجهه و مر عليهما مبتسما بطرف شفته ابتسامة كانت كفيلة بجعل مريم تستعر جنونا وهي تهمس :

- و بتضحك كمان. 

كل ذلك حدث في لحظة ، لحظة كانت سبب في غفلة وائل عن الجحيم الذي اشتعل من عيني مريم !

غفلة قصيرة أحس على إثرها بسلاحه يستل من مكانه بخفة لم يجاريها ! سلاحه الذي استقر بين يديها في لحظة خاطفة صدحت فيها صرخته المنفلتة من قيود التعقل :

- انا هقتلك ! 

- عمار اتصرف معاها و خليها تسيب السلاح فورا.

نطق وائل بجدية وهو يرى بأن الأمور تخرج عن السيطرة بسبب التهور الذي شاب تلك المرأة غير المتزنة بينما حدجها الآخر بصدمة محدقا بالغجرية التي فقدت عقلها وهاهي تشهر السلاح في وجه الطبيب و تهدده بالقتل ! فاِحتدت عيناه مغمغما بحذر :

- مريم اهدي و سيبي اللي ف ايدك فورا يلا.

اهتز الطبيب الذي كان يمسك به مساعد المحقق و ازدرد لعابه برعب بينما تهز مريم رأسها رافضة الإستماع اليهم :

- لو انتو هتسيبوه يفلت فأنا مش هسمحلكم حتى لو خدت فيها اعدام الواطي ده لازم يموت هو وكل اللي اتعاون معاهم. 

زفر بحدة ورفع يده يهادنها :

- احنا مش هنسمحلهم يفلتو وكل واحد منهم هياخد جزاته صدقيني.

- ازاي واحنا كل مرة بنرجع لنقطة الصفر من تاني ؟ كل لما بنقرب خطوة بنرجع لورا ميت خطوة و مبنستفادش حاجة يبقى ايه لازمته اسكت و اصبر.

هدرت بثورة كساها القهر بينما تتابع بغصة مريرة خنقتها :

- ليه انا اللي لازم اهدأ و استنى و اسمحلهم يعيشو حريتهم ده انا غلطت كتير بسببهم خلوني اؤذي ناس بريئة و اخد حقي من الشخص الغلط.

تفجرت عيناها بالدموع و انكمش وجهها بألم متذكرة ما عاشته فاِستغل عمار الفرصة و اقترب منها ليخطف منها المسدس ويعطيه لوائل على الفور معتذرا منه ثم أخرجها من المركز و جعلها تركب قي سيارته عنوة.

بعد مدة وصلا للشقة وكانت الشمس قد غربت و بدأت النجوم تتخذ مكانا لها على السماء المزينة بالغيوم و بمجرد دخولهما  :

- ايه اللي عملتيه ده انتي اتجننتي مش عارفة عواقب الجنان ده.

- انا ابني اا...

هتفت مبررة ولكنه وضع يده على فمها يمنعها من المتابعة هامسا بعصبية :

- بس كفاية اسكتي انتي ليه مصممة تنسبي البيبي لنفسك ليه حاطة نفسك في خانة المظلومين دايما و معتبرة انك الوحيدة اللي موجوعة و مظلومة كام مرة قولتلك ان الولد المتوفي كان ابني انا كمان معقولة انتي أنانية حتى في الموضوع ده ! 

جلب كلامه الحرقة لعينيها فورا و سالت منهما الدموع مجددا فطأطأت رأسها ليتنهد عمار بإعياء و يضم وجهها بين يديه هادرا بعاطفة :

- مريم والله انا عارف كل اللي بتحسي بيه وحتى اني ممكن ابقى بعاني اكتر منك لان العدو ده مستقصدني انا بالذات و خلى الكل يخونني بس اهدي بالله عليكي و اصبري و هنحل كل حاجة ثقي فيا شويا و بطلي التسرع بتاعك. 

حينها ارتجفت مريم و شعرت بحاجتها لحضنه فلم تضيع وقتا بل رمت رأسها على صدره و لفت يديها حوله معانقة إياه ، تفاجأ عمار و بقيت يداه معلقتان في الهواء لوهلة قبل أن يضمها بدوره و يخفض رأسه لشعرها يشم رائحته بهوس ، مرت عليهما لحظات وهما هكذا حتى سمعها تهمس بتحشرج :

- انا اسفة.

- خلاص اهو حصل اللي حصل.

- لا مبقصدش ع اللي عملته من شويا ، انا بعتذر لأني ظلمتك و اتهمتك بقتل ابنك من غير ما اتأكد و سببتلك مشاكل كتير و خليت الناس تتكلم عليكم ، اسفة لأن بسبب تسرعي خسرنا سنتين من حياتنا بعرف ان كلامي مش هيصلح حاجة وانت لحد دلوقتي مش مسامحني و علاقتنا مستحيل ترجع زي الاول بس ع الاقل تعرف اني ندمانة لانك مهما غلطت فحقي مكنش ينفع انتقم بالطريقة ديه. 

مقلتيها الامعتين و رموشها المبتلة مع شفتيها المرتجفتين جعلوا مشاعره تتحرك بدون إرادة منه خاصة وهي بهذا الهدوء و الطاعة المغرية ، حرك اصبعه يمسح عبراتها هاتفا بصوت مثقل :

- و انا اسف على كل حاجة عملتهالك من لما اتجوزنا ... ع كل دمعة نزلت من عنيكي بسبب غيابي احيانا و كلامي الجارح ليكي بس صدقيني كل ده كان غصب عني انا ...

صمت غير راض بشرح دوافعه التي لم يتحدث عنها سوى لطبيبته ريماس ، و بذكرها راح يعيد ما دار بينهما في آخر جلسة ...

" - انا مش عارف لازم احس ب ايه اتجاه مريم يعني احنا مبقيناش نتخانق زي الاول و فاهمين بعض غلط بالعكس اغلب الوقت بنقعد نتناقش حتى تصدقي من يومين نمنا في نفس الاوضة وكنت حاضنها بس ... 

- حاسس انك مش فاهم طبيعة علاقتكو بتمشي ازاي و ملهاش اسم محدد ؟ 

- ايوة بالضبط يعني احيانا بنقعد نهزر و مرات بنتخانق و مرات بحسها بتغير عليا و بتضايق لو لقتني واقف مع موظفة و ببتسم معاها و احيانا بلاقيها رجعت انطوائية و بعيدة عني و انا نفس الشي مرة بتعامل معاها بتلقائية و احيانا بقعد افتكر هي عملت ايه فبحس بالغضب و ببعد عنها.

 لا انا قادر اسامحها ولا قادر اتجنبها خايف اقرب منها اكتر ولسه فقلبي حقد و شك اتجاهها فبقوم بزعلها غصب عني و بشك فيها زي الاول لاني لسه متعافيتش كويس من انعدام الثقة اللي بحسه اتجاه الناس. 

- عمار قولي حاجة انت بتحبها ؟

- ها ... يعني ... هو انا مش متعود اقول الكلمة ديه كتير بس شكلي بحب مريم اه و الا مكنتش هسكت ع كل اللي عملته.

- طيب ليه مصمم متعملش خطوة من غير ما تفكر في النتايج ... انا مش بقول انك لازم تبقى مندفع بس مش شرط تحكم عقلك مع مشاعرك دايما لان ده غلط جرب مرة تفكر بقلبك و متعملش ألف حساب و تفضل تتوقع في النتايج و العواقب لحد ما تلاقي الزمن عدى و خسرت اكتر من فرصة كانت بين ايديك.

 انت لو متأكد من حبك ناحية مريم ومن جواك عارف انك مش عايز تخسرها لازم اولا عن معيار المثالية اللي انت متمسك بيه شيل مريم من المنصة العالية اللي جبرتها تتحط فيها و اعتبرها زي الناس العادية اللي بتغلط لان مفيش حد مثالي في الدنيا ديه الكل بيرتكب أخطاء و حتى انت نفسك غلطت كتير فحقها وهي مستنتش منك اعتذار كل اللي كانت مريم عايزاه هو وجودك جمبها.

متخليش ماضيك يدمر حاضرك و مستقبلك ولو لقيت المسافة مابينكم طويلة ابدأ انت بأول خطوة ... "

حينها أفاق عمار من شروده و قربها منه أمثر هادرا بعاطفة بينما تلفح أنفاسه الحارة شفتاها :

- عارف اني غلطت فحقك كتير و خليتك تعيطي و تحسي بالنقص و انزعجتي من بعدي عنك بس انا ... هي ديه طبيعتي يا مريم انا مكنتش عارف ابقى زي ماانتي كنتي عايزة و غصب عني بدأت اضايق من الاختلافات اللي مابيننا ولو عايزاني ابقى صريح معاكي انا قلبي لسه مش صافي ناحيتك صعب انسى و اتجاوز حقيقة اتهامك ليا بقتل ابني بس طلع عندك عذر عشان تفكري فيا بالطريقة ديه لان عمري ما ...

هذه المرة هي من أوقفته عن المتابعة ولكن ليس بيدها بل بشفتها التي التصقت بخاصته في قبلة مفاجئة حملت بينهما عاطفة و شغفا إنصهرا به ، ولم ينتهِ الأمر بالإبتعاد ككل مرة لأن كلا منهما اشتاق للآخر ...

اشتاقا لتبادل الشغف بدل النظرات ، و للإحساس بأنفاس بعضهما البعض ، لرائحة شعرها و هي اشتاقت لمطالعة عيناه الزيتونيتان عن قرب وهما تقدحان برغبته التي ترضي غرور الأنثى بداخلها ...

و حينما انفصلا عن بعضهما بعد دقائق أسند عمار جبينه على خاصته بينما يحكم القيد على خصرها لاهثا بجنون :

- مريم ... انا مش عارف ايه عواقب اللي بعمله ... بس اللي عارفه ان صعب جدا اني ابعد عنك دلوقتي.

توعكت معدتها و لفحتها أدفاق من حرارة غزت برودة الجو التي شعرت بها في الخارج فأصبحت كمن تتدفق في عروقها حمما بدل الدماء ، و أغمضت عينيها لثوان قليلة لم تستطع عدها ...

تنتشي بالإحساس بكلتا ذراعيه حولها فتملأ فراغ روحها بإزدحامه ، و تصرع حناياها بإقتحامه ...

بداخلها كانت تعي جيدا مدى التخبط الذي يعايشه لأنها تعيشه هي أيضا الآن ، و تدرك كذلك ما يريده منها في هذه اللحظة فاِكتشفت بفزع أنها تحمل نفس رغبته ! 

و لهذا قررت أن تتبع قلبها هذه المرة و تستلم لما توده ، و لتدع التفكير بما سيحصل فيما بعد.

لذلك وضعت يدها على صدره الصلب و همست بلوعة :

- وانا مش عايزاك تبعد اساسا ... متبعدش عني ...

كانت إشارة صريحة أعطته الضوء الأخضر فعاد يقبلها و يخلع عنها معطفها الذي وقع على الأرضية و تبعته سترته بعد قليل ثم حملها بين ذراعيه لتدس وجهها عند وداج عنقه المختلج و تمضي معه حيث منحا لبعضهما فرصة البدأ من جديد ! 

الفصل الثامن والخمسون : جذور ...

__________________

صمتت تلتقط أنفاسها التي سحبت منها بينما يطالعها هو بذهول لكنها لم تسمح له بالتكلم لأنها هدرت بقوة سائلة إياه مباشرة :

- مين ريماس ديه يا عمار و ليه بشوفك دايما بتتصل بيها كل لما تضايق !

ثوان مرت عليه لم يستطع استوعاب ما يحدث الآن بداية من هجوم مريم عليه نهاية بسؤالها عن ريماس ... هل سمعته عندما كان يحدثها ليلة البارحة بعد ان عاش كابوسا رأى فيه والدته ثم و كأنه سمع صوت صراخ و تهديد تلاه سقوطه من مكان عالٍ.

لا يعلم كيف ولكن عمار أحس بأنه يحلم بشيء عاشه من قبل ولم يستطع لملمة خيوطه فنهض من فراشه و نظر الى مريم النائمة بحواره ثم غادر الغرفة و اتصل بريماس ليخبرها بأنه يشعر أن نوبة الهلع تعاوده مجددا بعد غياب طويل و يخاف أن يقوم الآن بفعل يؤذيه أو يؤذيها..

 فهدأته الأخرى و أملت عليه بعض الخطوات التي يجب عليه القيام بها كي يستكين وفعلا هذا ما حدث بعد دقائق فشكرها و أغلق الخط ذاهبا الى الشرفة من أجل شرب سجائره و انقضت عليه باقي الليلة بنفس الشكل و اعتقد بأن مريم لم تنتبه لما حدث غير أن كلامها هذا يدل على أنها قد انتبهت للكثير من الأشياء منذ وقت طويل !

أغمض عمار عيناه يلعن إهماله ثم دلك عنقه مغمغما بهدوء :

- مريم انتي عارفة طبيعتي واني مبحبش اتكلم فحاجة تخص عيلتي علاقتي مع والدي مبتهمكيش و مش مجبر احكيلك عنها مادام الموضوع مش متعلق بيكي شخصيا.

ثانيا انا كنت نايم و بحلم عادي طبيعي اهلوس و اجيب سيرة اي حد حلمت بيه مش قصة يعني. 

رمقته بغير اقتناع ولكنها تغاضت عن هذا الجزء لتسأله عن الأهم :

- ماشي و ريماس ديه مين.

زفر عمار بضجر و قضب حاجباه هاتفا :

- انتي بقيتي محققة و بتعملي معايا investigation ولا ايه نسيتي نفسك بتكلمي مين معقولة لسه واقفة عند قصص الخيانة و التهم الباطلة بتاعتك يا مريم ارجعي لوعيك لاني بدأت اتعصب.

- لا منسيتش بس شكلك انت اللي نسيت المشاكل اللي حصلت بيننا زمان بسبب تجاهلك لمشاعري و ديه مش اتهامات بس اعتقد بعد علاقتنا ما اتحسنت شويا بقى عندي حق اسأل الراجل اللي كان نايم جمبي و اقوله ليه روحت تكلم واحدة بنت اول ما صحيت و مين ديه اللي دايما بشوفك بتكلمها.

هدرت مريم بحدة هوجاء و طاقة مستنزفة محدقة بهذا الرجل الذي بدأ يعود لشخصيته البليدة مجددا ولكنها أقسمت على ألا تعود هي للماضي و تصبح تلك الفتاة التي تجلس في زاوية الغرفة باكية بقهر لأنها رأت زوجها يعانق امرأة أخرى غير ممتلكة الشجاعة الكافية التي تجعلها تسأله عن الصلة التي تجمعهما.

أما عمار فجز على أسنانه بعصبية وهو يرفض بداخله رفضا قاطعا على أن يخبرها بهوية طبيبته فتشدق بنبرة هادئة :

- ريماس ديه واحدة قريبتي و صديقة ليا و احنا كنا مقربين من بعض جدا يعني زي الاخوات تماما فاهماني ... ثم أضاف كاذبا :

- وهي اتصلت عليا امبارح وكانت عايزاني فشغل مهم بس انا كنسلت لاني كنت معاكي وبعد ماقلقت بليل و صحيت قلت خليني اتصل عليها و اسألها هي عاوزة ايه. 

لم يكن كل حديثه كذبا فريماس حقا اتصلت به البارحة ولكن من أجل أن تخبره بأنها ستكون مسافرة لبضعة أيام لذلك ستتأجل جلستهما وهو كان مع مريم فلم يرد عليها إلا بعدما أعاد هو الإتصال.

حدقت فيه مريم بشك و عدم اطمئنان ، و في النهاية اختارت تصديقه لأن ملامحه لا توحي بشيء سيء ألا أن هذا لم يمنعها من طرح السؤال مجددا :

- طيب شغل ايه اللي كانت عاوزاك فيه انا مسمعتش عن اسمها في الشركة من قبل هي زبونة ولا...

قاطعها عمار بصبر نافذ :

- خلاص بقى انتي مالك و مالها هنفضل نتكلم في الموضوع ده كتير خلينا في المهم ... مثلا ...

تغيرت نظراته فجأة و انخفض بصره يحدق فيها بطريقة مريبة فتوجست هي بينما يمرر الآخر اصبعه على طول ذراعها هامسا بنبرة متثاقلة :

- مثلا نتكلم ع القميص الاحمر اللي لبستيهولي ليلة امبارح و اقولك قد ايه بحب اللون ده و بشوفه لايق عليكي.

تسارعت خفقات قلبها البلهاء و تورد وجهها تأثرا بما قاله فحاولت انتشال نفسها من هذا الوضع ريثما تردد بعدم اكتراث مصطنع :

- بس انا ملبستوش علشانك مكنتش اعرف انك هتجي اصلا يعني لما شوفته ف الدولاب عجبني شكله و لبسته بس كده.

- لا والله يعني مثلا مسمعتنيش وانا بتصل بسعاد هانم و بقولها اني مش هجي للقصر الليلة ديه.  

- لا خالص انت فاكر نفسك محور الكون ولا ايه.

رفع إحدى حاجبيه و شد على خصرها يجذبها نحوه محذرا :

- لسانك طول و بدأتي تعصبيني هقصهولك.

اندهشت من قربه منها و لفت رأسها بتلقائية تتأكد من عدم وجود أحد بالجوار ثم نظرت اليه متمتمة :

- انا مقلتش حاجة غلط عشان اخاف تقصهولي وبعدين انت مقرب مني كده ليه مش هزقتني من شويا لاني مكلمتكش برسمية في الشغل رجعت في كلامك ليه. 

حينها ابتسم عمار بغرور هامسا بتلك النبرة التي تطيح بصوابها :

- انا شخصيا بعمل اللي عايزه هنا لاني المدير و الكل مجبر ينفذ أوامري حتى انتي لما اقولك قربي لازم تقربي. 

لم تستطع مريم كتم ضحكتها التي خرجت منها بخفوت ثم رفعت يدها تمررها على طول عنقه و بداية صدره مرددة بإغراء :

- بس ده اسمه تحرش يا حضرة المدير وانا ممكن اشتكي على حضرتك. 

- مادام وصلت للشكوى هنخلي الموضوع يستاهل بقى.

أنهى جملته بمكر و انحنى عليها يقبلها فأغمضت الأخرى عينيها تستقبل اندفاعه برحابة صدر و لفت يديها حول عنقه ليتعمق في قبلته و ينسيا الدنيا من حولهما ، حتى سمعا طرق الباب فاِبتعدت مريم سريعا و دخل بعدها عادل الذي وقف يطالعهما بجمود وقد اتضح من شكلهما ما كانا يفعلانه فتنفس بضيق مغمغما :

- جاي اسألك ع الميتينج اللي عملته مع ماري ووصلتو ل ايه. 

تنحنح عمار محاولا ضبط توازنه ثم أجاب :

- قدرنا نتفق شروطها كانت معقولة و هي كمان وافقت على شروطنا و هنوقع العقد اللي بيننا قريبا ... انا هبعتلك التفاصيل ع الايميل. 

رمق مريم بطرف عينه بإزدراء ليردف بمضض :

- هيبقى احسن متتأخرش. 

غادر عادل قاعة الاجتماعات وقد تملكه الحقد عليهما لأنه بعد كل ما فعل كي يفرقهما هاهما مع بعض مجددا مما يعني أن كل خططه التي رسمها في السابق حول مريم التي أراد تسييرها ضد عمار و جعلها تشتت انتباهه عن العمل لم تنفعه بشيء لأن هذا الأخير استطاع الاستيقاظ من غفلته سريعا و عاد ينجز أعماله على أكمل وجه مثلما كان يفعل في الماضي.

و لكن هذا لا يهمه بقدر ما يهتم لموضوع وصولهم الى الطبيب و سجنه لحسن الحظ أنه ذلك الأحمق لا يعلم شيئا و كذلك سليم ترك رسالة لعمار اعتذر فيها منه و قال فيها كلاما مليئا بالهراء لا بد أنه كان يدرك جيدا مدى خطورة سيده فلم يجازف بكشف الحقائق كي لا يضر أخاه الاصغر الذي تبقى له من عائلته ...

_________________

مر أسبوع آخر وسط تحقيقات وائل و عمار و هاهو اليوم موعد خطوبة وليد و هالة ...

وقفت أمام المرآة للمرة الخمسين تتأكد من مظهرها ثم تأملت نفسها وهي ترتدي فستانا أنيقا باللون الزهري ضيق من الأعلى و يتسع من بداية الخصر الى الأسفل بإتساع طفيف مع طرحة بيضاء طويلة و حذاء ذو كعب عال ، و رغم أنها لم تضع سوى بعض الكحل و ملمع شفاه خفيف لكنها كانت جميلة ببساطتها و احتشامها حتى أن مريم التي كانت بجانبها رمقتها بإعجاب متمتمة :

- طالعة قمر ماشاء الله عليكي. 

التفت اليها متسائلة بتوتر :

- شكلي حلو بجد انتي متأكدة. 

ابتسمت بعاطفة و تقدمت منها تحضنها :

- هتسحري الكل بجمالك و اولهم وليد ... انا عارفة انك بتحسي بخوف احيانا و قلق من انك تعيدي نفس التجربة مع راجل مش مناسب ليكي لكن صدقيني وليد مفيش زيه.

- يعني ده رأيك.

- ايوة سماهم على وجوههم وهو باين عليه شاب كويس اينعم انا بحسه مبيطيقنيش بس مع ذلك مشوفتش منه حاجة وحشة اتجاه حد طول فترة شغلي معاهم انتي بس اهدي و متقارنيهوش بخطيبك السابق  

انسلت هالة من حضنها و تحدثت عن مخاوفها بصدق :

- مش هكدب عليكي انا فعلا بفضل اقارن مابينهم و بوقف لوليد ع الواحده بس غصب عني خايفة احبه و يطلع كداب و عديم الشخصية زي الاولاني. 

 هدأتها مريم و بدأت بإعطاء بعض النصائح لها حتى دلفت والدتها و زوجة أخيها و رفيقاتها فإنشغلتا معهن و مر الوقت سريعا لتبدأ مراسم الخطبة.

حضر وليد و عمار مع بعض أفراد عائلتيهما و الأصدقاء المقربون فقط ليقف العريس بذهول مطالعا الملاك الرقيق الذي تقدم على استحياء تمشي بخطوات بطيئة ناحيته بإبتسامة رقيقة على محياها فتنهد شاكرا الله لأنه أطال عمره كي يعيش هذه اللحظة ، ثم همس بدون شعور منه :

- ديه قمر مش بني ادم طبيعي. 

وكزه شقيقها أحمد الذي كان واقفا بجانبه و هتف بصوت خفيض :

- لم لسانك انا واقف هنا. 

قلب وليد عيناه بملل فإبتسم عمار عليه و حدق في مريم التي كانت ترتدي فستانا مخمليا باللون البنفسجي الفاتح و صففت شعرها بعناية لتسدله على كتفها الأيسر مرفقة مع ثوبها إكسسوارات ثمينة و مساحيق حددت ملامحها ...

مرر عليها نظره من أعلى لأسفل بدون أن يظهر عليه تعبير يوضح لمريم رأيه في إطلالتها فأرجحت الى أنه لم ينل إعجابه و لكنها أقنعت نفسها بأن هذا لا يهمها...

بدأت مراسم الخطوبة و ألبسا الخواتم لبعضهما البعض ثم قدم لها شبكتها التي كانت عبارة عن طقم كامل من الألماس فتعالت التصفيقات و الزغاريت من نساء العائلة وسط استهجان من ندى التي استنكرت شعبيتهن أما مريم فرغم سعادتها بصديقتها لم تستطع منع شعور الحرقة من التسلل الى قلبها لأنها كانت تتمنى ككل فتاة أن تقيم خطوبة و زفافا مع الرجل الذي تحبه ولا يهمها أمواله و هداياه كانت ستكتفي ببساطة الخاتم و الشبكة المهم أن يكون هو معها فتعلنه ملكها أمام الجميع ...

ترقرقت عيناها بدموع التأثر محدقة في هزليات وليد وهو يمازح هالة التي داست على قدمه عندما انحنى عليها لكي يقبلها فضحكت و تمنت لهما السعادة لتلتق عيناها بخاصة ندى فجأة ...

تجهمت ملامحها فأشاحت وجهها عنها متجاهلة إياها غير أن الأخرى اقتربت منها ووقفت أمامها هاتفة :

- مبروك ديه البيست بتاعتك صح.

همهمت بإيجاب فتابعت ندى :

- غريبة صح اننا متجمعين فمكان واحد بعد اللي حصل مابيننا ... سوري بقصد بعد كل اللي انتي عملتيه فيا و فعيلتي.

- بصي انا ...

- Don't worry مش جاية اعاتبك انا طويت صفحة الماضي خلاص بس حابة اسألك ... انتي وعمار رجعتو لبعض صح. 

نظرت اليها مريم بتفاجؤ من سؤالها الذي جاءها على حين غرة و لكنها تمالكت نفسها متشدقة بمراوغة :

- مش قلتي انك طويتي صفحة الماضي يبقى بتسألي عننا ليه.

ثم استطردت موضحة :

- بصي يا ندى انا غلطت زمان اه و بعترف بغلطي و بعتذر منك مكنش ينفع استغلك عشان احقق مصلحتي ولا كان ينفع ابوظلك فرحك بس صدقيني اللي مريت انا بيه مكنش سهل خالص شفت حاجات مبتمناهاش لعدوي و الحاجات ديه خلتني مش عارفة افكر كويس و مخدتش بالي من توابع اللي بعمله انا مش ببررلك و بقاوح بس على الاقل تعرفي اني مشيت فطريق غلط بسبب حاجات وجعتني مش عشان اي سبب تاني...

 ولو حابة اعتذرلك قدام الكل معنديش مشكلة خالص بس ياريت متدخليش فعلاقتي مع عمار لان ديه حاجة بتخصنا احنا الاتنين وبس.

ضغطت ندى على يدها و اشتعلت غيظا منها ، و كم أرادت صفعها في هذه اللحظة ولكنها لم ترد أن تفسد مظهرها فتظاهرت برحابة الصدر وهي تردف :

- طيب براحتك انا مجبرتكيش ع حاجة ومش عايزة منك اعتذار كفاية انك عرفتي غلطك و الصراحة جزء مني بيحاول يعذرك لان اي واحدة بتدخل حياة عمار بتتأذى سواء خدها بالعلن زيي او في السر زيك و زي غيرك ... بس انا مش متأكدة اذا كانت ثقتك اللي باينة ع وشك ديه هتفضل كده لما ترجعي تتأذي منه ولا لأ. 

عضت مريم على شفتها من الداخل ثم اقتربت منها ورفعت حاجبيها هامسة :

- ديه حاجة مبتهمكيش كفاية انك تاخدي بالك من نفسك ومن خطيبك خاصة ان صعب تلاقي راجل زي المستر يوسف انتي محظوظة لانك مرتبطة بيه.

حينها أخرجت ندى كلماتها الساخرة :

- مش عارفة اذا لازم اقولك ميرسي كلك ذوق ولا اقلق من انك تحطي عنيكي عليه زي ماحطيتيه على عمار معروف انكم انتو الناس من الطبقة المتوسطة بتستهدفو اصحاب ال rich class.

- انتي ...

- مريم ! 

جاءها صوت عمار من خلفها فاِستدارت ليتضح له مدى انفعالها و غضبها بسبب شيء لا يعلم ماهيته ، و لكن عندما رمقته بعتاب غريب و غادرت لحق بها فورا أما ندى فرأت يوسف يقترب منها متسائلا بحذر :

- خير ايه اللي حصل ! 

- ولا حاجة.

- ايه ولا حاجة ديه اومال مريم خرجت وهي متعصبة كده ليه.

- خير انت خايف على مشاعرها ولا ايه.

اغتاظ يوسف من أسلوب كلامها فهمس منبها اياها :

- اتكلمي معايا كويس يا ندى انا شايفكم عمال تتكلمو بقالكم كتير و هي فجأة سابت المكان و مشيت ... ايه اللي حصل و كنتي بتكلميها ف ايه.

لم يكن منزعجا من إثارتها للمشاكل في خطوبة صديقه بقدر ما كان منزعجا من فكرة أن ندى واجهت مريم بسبب عمار الذي أوهمت نفسها بأنها كانت تحبه.

فهو مثل أي رجل لن يتقبل أن تظل شريكة حياته تفكر في غيره حتى لو بالسوء ، و غيرته الآن سبب في ضيقه لذلك سحبها من خصرها و أخذها لمكان منعزل فتأففت ندى بنزق و أبعدت يده قائلة :

- في ايه يا يوسف مش فاضل غيرك اللي ...

تأوهت على حين غرة حينما جذبها من ذراعها نحوه و احتد وجهه بتقاسيم مختلفة عن تلك الملامح السمحة التي كانت تراها عليه دائما ولم تكد تتكلم حتى عاجلها مغمغما بصلابة :

- ندى انتي عارفة بطبيعة جوازنا من الاول و مش هجبرك تتقبلي حاجة انتي مش عايزاها بس اوعى ... اوعى خيالك يصورلك انك بتقدري تتكلمي عن اي راجل غيري وانتي مخطوبة ليا انتي فاهمة ... ملكيش علاقة سواء بعمار او بمراته و التصرفات الوقحة اللي كانو بيسمحولك تعمليها من دلعهم ليكي تنسيها و اوعى ترجعي تكلميني بالنبرة ديه !

___________________

اندفعت خارج القاعة تتنفس بحدة و تشبع رئتيها بالهواء فجاء عمار من خلفها و أمسكها من ذراعها مغمغما بحدة :

- ايه اللي حصل ندى قالتلك ايه. 

- مفيش حاجة.

- ازاي مفيش وانا شايف وشك اتقلب فجأة و بصيتيلي ولا كأني مرتكب جريمة ؟ 

وضع يده أسفل دقنها رافعا وجهها نحوه و تابع :

- هي ضايقتك في حاجة ؟

- هتصدقني يعني لو قلت اه هي ضايقتني و هتكدب بنت عمك اللي بتعزها اوي.

- متلعبيش بأعصابي و انطقي 

مطت مريم شفتها ممتعضة وهي ترد عليه :

- اوك هي قالت كلام ملوش لازمة زي عوايدها و مهتمتش بس سألتني اذا رجعت علاقتنا انا وانت زي الاول بس مردتش عليها بس كده.

اكتفت بقول جزء من الحقيقة و تركت الجزء الآخر يداخلها لأنها لم تود أن تظهر بشكل المراهقة التي تسأل حبيبها عن ان كان لديه حبيبات غيرها أم لا ، خاصة أنه سبق وقد تهرب من الإجابة بخصوص المدعوة ريماس كما أن حديث رأفت في السابق اتضح أنه كذب اذا لماذا ستعكر صفوهما.

حدجها عمار بشك و أدرك أخيرا بأنها لا تريد الحديث عن هذا الموضوع فغيره قائلا بينما يتأمل هيأتها :

- تصدقي انك كنتي نجمة الحفلة ... البنفسجي بيجنن عليكي. 

في لحظات استطاع قلب ملامح وجهها للنقيض تماما فشاهدها وهي تقلب غضبها و انفعالها لسعادة و غرور متمتمة :

- بجد عجبتك ... بس انت مكنش باين عليك كده وشك بارد و مبقدرش افسره. 

ضحك بخفوت و هز رأسه مؤكدا :

- ايوة بس المهم انا بفكر ف ايه و الصراحة مقدرتش اشيل عينيا من عليكي حتى اني خدت بالي من شكلك لما لبس وليد الدبلة لصاحبتك ديه. 

تجهم وجه مريم مرة ثانية وهذه المرة بحزن فملس عمار على خدها هامسا :

- انتي كنتي بتتمني تتعملك خطوبة زي ديه صح ... انا حرمتك من ابسط حقوقك. 

لمست فيه الندم و تأنيب الضمير فسارعت بالقول :

- وانا كنت موافقة يعني مجبرتنيش على حاجة وبعدين القصص ديه مش بتهمني يعني الاهم علاقتهم هتمشي ازاي بعد ما يعيشو في بيت واحد و اه على فكرة قول لصاحبك ده ياخد باله و ميزعلش هالة لانها اختي ومش هرضى انها تزعل ماشي.

قلب عيناه متهكما :

- قال يعني هالة غلبانة ماهي مفترية و اكتر واحدة بتعمل فتنة وانا بقول اني اتعلمتي من مين. 

كتمت مريم ضحكتها و تظاهرت بالجدية :

- انت طبعا مبتحبهاش لانك كنت بتسمع هي بتحكي ايه عنك ساعة ما كنت بتتجسس عليا ... بس تعرف هالة اللي وقفت معايا في الحلو و الوحش و مسابتنيش لحظة يعني قبل ما التقي بخالتي وولادها كانت هي الوحيدة اللي بتساندني و تخفف عليا.

ومن وقتها وانا بقول ان علاقة الدم مش أهم حاجة يعني صحيح الانسان دايما بيدور ع جذوره في عيلته اللي اتربى وسطيها و البيت اللي عاش فيه بس كمان مش شرط الجذور ديه تبقى متينة ...

تابعت كلامها غير متيقظة لعمار الذي توقف عقله عند آخر جملة نطقت بها فهمهم بتنبه :

- انتي قولتي ايه.

- ايه !

- قولتي جذور ... و البيت ... اللي عاش فيه ...

انقلبت أساريره و اندمجت أفكاره داخل عقله ببعضها البعض متصادمة بعنف حتى بزغت من نقطة بعيدة جملة ظلت في جزء من ذاكرته ....

"حضرتك ذكي جدا و بتقدر تكشف كل حاجة مش واضحة و كنت قولتلي مرة واحنا بنزرع شجرة في الحديقة أننا عشان ننجح في الزراعة لازم نهتم بالجذور كويس لأنها الأساس ولو عملناها بطريقة غلط النتيجة مش هتعجبنا و شبهت الجذور بالبيت اللي بيتربى فيه الطفل ... كان عندك حق يا عمار بيه وانا عرفت أن مسيرنا نرجع للجذور اللي ياما هربنا منها .. "

نعم آخر فقرة من رسالة سليم والتي بقيت معلقة بباله لأنه شعر بأنها ترمي لشيء آخر غير ذلك الذي بدت عليه ... يتذكر عمار جيدا ذلك اليوم عندما كان يزرع شجرة ليمون و أخبر سليم بهذا المكان ...

و هنا انتفض عمار بصدمة دارسا كل الإحتمالات بنفس اللحظة ...شجرة ليمون ... جذور ... و البيت القديم الذي ترعرع سليم فيه !!