رواية عذراء الرعد كامله بقلم بسمه ) جميع الفصول حتى الاخير الخاتمه

 رواية ضوء القمر الفصل الاول1الثاني2 بقلم سحر السحرتي 

دخلت مدرج الجامعة تقابلت اعينهم وجدته يقف بدل دكتور المادة 

:آسفة دخلت مدرج غلط كان قصدي محاضرة دكتور حمدي

*نظر لها بعيون كلها شوق ومحبة 

: اه هنا بس انا دكتور المادة دلوقت ممكن اعرف اتاخرتي ليه

:آسفة يا دكتور اصل طلوع السلم صعب على شوية وكان عندي محاضرة في المبنى التاني لو حضرتك رافض تدخلني مفيش مشكلة 

:لا ادخلي سجلي اسمك هنا واستريحي بس بلاش بعد كدة تأخير لان مش بسمح لحد يدخل بعدي 

*تتمتم: لو اعرف انك انت اللي هنا مكنتش جيت ومش هحضر تاني خلاص

*اعطاها ورقة توقيع الحضور وثنى جسده ليشير لها مكان التوقيع وهمس بجانب اذنها

:وحشتيني قوي 

*ثم ارتفع صوته : اسمك ايه

*وهو يقراء ما كتبته حتى لا ينتبه أحد الطلبة انه يعرفها 

:تولين الحريري اسم جديد اول مرة اعرفه يا ترى له معنى

*ردت بصرامة : لا ملوش اي معنى ممكن ادخل 

: اتفضلي 

*جلست وبدأ في شرح المحاضرة كانت عينيه تنظر إليها باستمرار لكنها تعمدت الا تنظر إليه وتظاهرت بكتابة المحاضرة حتى تهرب من نظراته

بقلمي سحر السحرتي 

*انتهت المحاضرة كانت اول المنصرفين حتى لا يلحق بها أو يوجه لها اي كلام

*في اليوم التالي كان موعد نفس المحاضرة فتوجه بنظره يبحث عنها وقال بكل صرامة وحدة

: أحب اعرف انسة تولين اللي اتأخرت امبارح احترمت المحاضرة وجت بدري 

*إجابته إحدى الطالبات : لا يا دكتور واضح انها اتأخرت وحضرتك قلت مفيش حد بيدخل بعدك وهي لها ظروف خاصة مش بتقدر تمشي بسرعة 

*تحدث بعكس ما يختلج بداخل قلبه من غضب لعدم رؤيتها

: تمام المحاضرة الجاية امتحان وبلغوا زمايلكم ان عليه درجات هتضاف لأعمال السنة 

*انتهى من المحاضرة وفي طريقه إلى سيارته استمع لغنائها في ساحة الجامعة ويلتف حولها زملائها يستمعون لها فوقف أيضا ليستمع كانت تغني وصوتها ممتلئ بالحزن والشجن وتكاد الدموع تسقط من عينيها

$قول رجعت ليه يا حبيبي &قصدي يا اللي كنت حبيبي 

$ ضعت بعدي & كرهت بعدي & وجيت ندمان خلاص

$مفتكرش اني افتكر لك اللي بيه ارجع لذلك & هعتبر  

 اللي قلته كلام قلته وخلاص

$كل ده ومعرفتش اني خلاص نسيت &جاي ليه وباي حق تقول يا ريت

$كنت فين وانا قلبي كان محتاج هواك &بقولك ايه ارجع ياريت لمكان ما جيت 

*احس أن كلمات الأغنية موجهة له بعد ما حدث بينهم وهو شارد في صوتها واذ بيد توضع على كتفه فقال مرحبا

:دكتور حمدي اهلا

:دكتور زياد ازيك صوتها حلو مش كده 

:اه هي دي طالبة عندنا 

: اه دي تولين سباحة الجامعة ومطربة كمان بتدخل مسابقات للجامعة وبتفوز بالمركز الأول دايما

: تولين انا سمعت الاسم ده

*تظاهر أنه لا يعرفها وانه تذكر شيئا ما

:اه امبارح دخلت متاخر وسمحت لها تدخل لكن النهاردة غابت عن المحاضرة 

:يمكن اتكسفت منك لأنها اكيد اتأخرت انا بسمح لها تدخل متاخر لان السلم بيتعب رجلها للأسف عندها إعاقة بس هي ملتزمة وبتحاول تتعامل زي باقي زمايلها ارجوك تراعي ده وتسمح لها تدخل

:اكيد اصل ما كنتش اعرف ظروفها هي ما قالتش

  : ولا عمرها هتقول دى نفسها عزيزة عليها جدا استئذنك عندي موعد

: اتفضل 

بقلمي سحر السحرتي

*عاد وسرح في صوتها انتهت من غنائها وقامت لتنصرف  ورأته يقف فاخذت الاتجاه الاخر وركبت الاسكوتر الخاص بها ورحلت وهي في طريقها للمنزل بدأت في تذكر الماضي وكيف التقت به و أسباب  ابتعادها عنه

*عودة للماضي

 *منذ عدة سنوات قبل التحاقها بالجامعة 

*تولين  فتاة شابة فائقة الجمال ذات شعر اسود كالحرير وعينان ذات لون ازرق صافي كلون السماء والبشرة بيضاء كالبدر من شدة جمالها أسماها والدها تولين اي ضوء القمر 

*ولد معها أخيها التؤام اسماه والده يوسف لجماله هو ايضا

*ولدت تولين ذات اعاقة في قدمها فلديها قدم اقصر من الاخرى بفارق بسيط

*عند المسبح تعلو صرخات الجماهير بالنداء باسم تولة ... تولة (كان هذا اسم شهرتها ودلعها الذي أطلقه عليها والدها  )

*تفوز تولين بالمركز الأول في مسابقة الجمهورية للسباحة ... تتسلم تولين الكأس وتقدم الشكر لكل من ساندها والمدربين وتخص بالشكر والدتها هدى

هدى : مبروك يا حبيبتي 

تولين: انت صاحبة الفضل بعد ربنا 

يوسف : لا طبعا الفضل لي لولا اني زقيتك في المية واحنا صغيرين كنا هنعرف من أين انك سمكة وبتعومي بسرعة والمدربين خطفوك خطف

تولين : يا بجاحتك وبتعترف كمان من غير اول قلم وفخور بنفسك جدا 

يوسف : ما انت بتشكري ماما والمدربين ولا كلمة حلوة لتوءام روحك

بقلمي سحر السحرتي

تولين :الشكر الحقيقي لما تساعدني في امتحانات الثانوية 

: تدفعي كام 

:انت مادي قوي

: انت عايزه تاخدي مجهودي على الفاضي

: مش الندالة بتاعتك خلتك سبقتني بسنة لما طبقت وامتحنت سنتين مع بعض 

: انت عايزاني اعملك ايه ده مجهودي وذكائي 

: انت اخدت كل الذكاء اختك توءامك شاركني خدني معاك في الامتحانات 

:اسف صعب ادي مجهودي لحد

: وانا اي حد عموما انا هعتمد على نفسي بس ركز معايا في مادتين رخمين 

: إن كان على مادتين ماشي بس انا ما صدقت اخلص من ثانوية عامة 

هدى : هنبات في النادي واختكم ولاء تعبانة في البيت 

تولين : خير ما قلتيش ليه

: عشان تلعبي من غير قلق بس هو دور برد

:طب يلا يا يوسف ناولني العكاز(  العصا التي تستند عليها)

: اتفضلي ما جبتيش جهاز رجلك ليه 

:مش بحب اقلعه قدام الناس وهتفضل شايله العكاز اسهل عليك

 : هو انا كنت اشتكيت لك

: انا مستريحة كدة يلا بينا

*اتجهوا إلى المنزل واسرعت لتطمئن على اختها 

: لولو حبيبتي سلامتك 

ولاء : ما تقلقيش ده دور برد عملتي ايه فرحيني 

: عيب عليك المركز الأول لدولفين الماء 

: مبروك يا حبيبتي 

: هروح اعملك حاجة سخنة

: استريحي انت ماما هتعملي

: كام مرة اقولكم عاملوني طبيعي هركب الجهاز وهمشي طبيعي 

: ما تزعليش يا حبيبتى بما انك مصرة اعملي فراخ مع شوربة خضار 

: اااه رجلي انا غير طبيعية بالمرة ايه الاستغلال ده كان قصدي ينسون او ليمون طمعتي قوي و داخلة على غداء 

: الله مش بعاملك طبيعي وزعلتي اتحملي بقى

: أحلى شوربة هخلي ماما تعملها ههههه 

: عمرك ما هتنفعي في المطبخ

: لو المطبخ في حمام سباحة احلى اكل هتاكليه من ايدي

: انت معقولة بتعشقي السباحة كدة 

: قوي قوي لما بنزل المية واعوم بسرعة بحس اني طبيعية السباحة خلتني ابطل ازعل لما البنت ريهام الصفراء بنت الجيران كانت بتحب تجري وتسبقني ودايما تستفزني ادخل معاها في سباق جري وهي عارفة ومتأكدة اني مش هقدر 

*حضنتها: يا حبيبتي كنتم اطفال وهي مش مستوعبة بس لما كبرت بطلت 

:انت طيبة قوي هي بطلت لما كنت بكسب ميداليات  دهب في السباحة  وهي مش عارفة تكسب ميدالية بلي ههههه

:ربنا يعوضك آمال يوسف فين 

: اكيد نزل يتسرمح قبل ما يرجع الكلية ويتحبس الحمد لله المسابقة كانت يوم إجازته عشان يحضر والا من غيرك انت وهو كان ممكن اخسر

: ما تتعوديش انك تعتمدي على حد لان ظروف الحياة ممكن تمنعنا  نحضر المرة دي انا تعبانة وهو كان ممكن يكون في الكلية وانت عارفة هي صعبة قد ايه والمرة الجاية ممكن نكون في اشغالنا

: يعني هو كان لازم يدخل كلية هندسة في الحربية بنشوفه بس خميس وجمعه واوقات بيتحبس ههههه 

بقلمي سحر السحرتي

*ولاء أخت تولين من آلام أكبر منها ب ٤ سنوات جميلة رشيقة لكن تولين تعتبر الاجمل طيبة القلب لأبعد الحدود تسميها امها الهبلة من شدة طيبتها دكتورة صيدلانية

*دخلت هدى تحمل صينية الطعام لتولين وولاء

:ليه كده يا ماما كنت هقوم اعمل لولاء الاكل  يا خسارة كان نفسي ادوقها عمايل ايدي

: اه يا ماما كانت لسة بتقول 

:أنتم الإتنين تعبانين واحدة مريضة والثانية من التمرين كلوا وانت بالذات يا تولين عشان تذاكري وتشدي حيلك عندك امتحانات ثانوية عامة وعايزة مجموع كويس 

:مفكرة هجيب مجموع كبير زي يوسف وادخل كلية زي بتاعته عاملة زي المدرسة تحبسه لو غلط

: اخوك تعب واجتهد لحد ما  كليته اتحايلت عليه لانه ذكي ونجح في امتحاناتهم بتفوق 

: يا عيني عليا زي ما يكون كان بينقي جوة بطنك اخد الطول وكل الذكاء وسابلي الغباء مش عارفة هعدي الثانوية دي ازاي 

: الحاجات دي بتاعة ربنا رزق كل واحد وما تنسيس ان ربنا انعم عليك بجمال الشكل جوة وبارة وجمال الصوت وكمان بطلة جمهورية في السباحة عموما شدي  حيلك لان كذا جامعة خاصة كلموني في المسابقة عيزينك تدخلي عندهم

: هو احنا قد مصاريفهم 

: لا هتاخدي منحة مجانية في اي جامعة يجيبها مجموعك بس تنضمي للفريق الرياضي بتاعهم يا رب تجيبي مجموع محترم كلي وذاكري بقى

: لا هلعب جيتار الاول 

: هو ده وقته

: انت عارفة الجيتار بيفتح نفسي على المذاكرة التقيلة على قلبي دي 

: الحاجة الوحيدة اللي مطلعة عيني فيها غير كدة انت فلة

:يا امي كفاية يوسف انا مواهبي أكبر من كدة سمكة في الماء وكروان في الهواء بس يا هدهد لو توافقي اغني على النت 

: اما تخلصي ثانوية وتجيبي مجموع عدل 

: بس كدة اوعدك مش هقل عن ٧٠ % 

: عوض عليا عوض الصابرين هو ده المجموع الحلو 

يوسف: على قد مخها التخين أحمدي ربنا لو جابتهم 

هدى : انت شرفت كنت فين

*همست تولين في اذن يوسف

تولين: ام مخ تخين هتقول

يوسف: اوعي مش هساعدك في الامتحانات 

تولين: كان في غرفته يا ماما بيعمل اختراع

هدى : ايوة عشان مصلحتك اوعى تساعدها من غشنا فليس منا

تولين : ما انا كدة مش هعدي اصلا عشان خاطري هما مادتين بس.....

: لا مش موافقة

: ماشي طب ابقي قوليلي طمنيني على يوسف

هدى : قلبي بيوجعني عليه وهو بعيد ومش مسموح ياخد موبايل معاه كدة 

: وافقي يا دودو مادتين بس واوعدك هذاكر واعمل اللي عليا بس انت عارفة مخي بيقف في حاجات كتير 

: يعني تاخدي مجهود غيرك

: مجهود ايه هو انا هترتب على الجمهورية زيه... دى حتى انت بتقولي الجامعات الخاصة بتقطع نفسها عليا يعني مش هاخد مكان حد في الجامعة الحكومية

: ربنا يسامحنا بس لولا اني عارفة انك بتحاولي لكن مش بتقدري دى قدرات 

: حبيبتي يا دودو وانا حتى لو جبت مجموع حلو هدخل إدارة أعمال انجليزي 

: بس هاتي مجموعها وانت اصلا مش بتنجحي بالعافية 

:يا رافعة من معنوياتي 

:برضة ذاكري احتياط لان ممكن يكون عنده امتحان وانت بتمتحني

: انت بتقفليها وسامعة دعوتك وانت بتقولي يا رب يبقى عنده امتحان

: انا راضية بتفقوقك الرياضي وصوتك اللي يجنن هطمع عشان خاطري انجحي بمجهودك وانا هدعيلك تنجحي 

: يعني مفيش امل توافقي

: لا 

: شكرا يا احن ام

يوسف : خلاص هذاكر معاك المادتين الصعبين

:كثر خيرك تتعب نفسك ليه

 ولاء : خلاص بقى يا تولة ما تزعليش انت عارفة انه حرام وماما عمرها ما هتوافق وان شاء الله هتنجحي 

قالت بسخرية : أنتم شايفين كدة يبقى مفيش حل قدامي غير اني اذاكر واعد الجمايل بتاعتكم 

هدى : انت بتهددينا 

: أبدا يا ست الكل انا هشحتفك شوية عليه وهو يدور على اللي يداري على عمايله

يوسف:ماما كدة تهديد صريح 

*امسكتها هدى من اذنها

: ابقى اعمليها الجيتار بتاعك ده هبيعه لبتاع الروبابيكيا 

: ابوس ايدك ده اللي بابا جابهولي ربنا يرجعه بالسلامة الا ده خودي روحي

: ايوة كدة اتعدلي 

ولاء : يا دودو يا جامد هي الشدة اللي تنفع مع الأشكال دي 

: انت كمان كلي كويس لاني اتصلت على الشغل والمدير مضايق من غيابك وانت يا استاذ يوسف بطل خروجات مع اصحابك الصيع انا ما صدقت تروح كلية تربيك 

: حاضر بس انا مابقصرش وبنجح بتفوق 

: عارفة بس اصحابك دول مش كويسين وما صدقت اقدر ابعدك عنهم نفسي باباك لما يرجع يبقى فخور بيكم كلكم 

*قبل يدها : عارف ومقدر وبحاول اخد بالي من تصرفاتي وارفع راسك انت تعبتي قوي عشانا من ساعة بابا ما سافر واتقطعت اخباره وانا اول ما اتخرج هشيل معاك 

*حضنته. 

ضوء القمر 

حلقة ٢

حضنت هدى يوسف وقالت 

: ولاء شايلة معايا من اول ما اتخرجت وهي بتشتغل وتحط مرتبها في البيت وباباك كان عامل لكل واحد فيكم شهادات بنصرف فوائدها كل شهر على الكام درس اللي بديهم واهي هانت تولين هتتخرج من الثانوية وتدخل جامعة ومصاريفها تقل 

تولين: أنتم قلبتوها دراما ليه هغنيلكم حاجة بدل النكد ده 

*أحضرت الجيتار الخاص بها وبدأت في الغناء بصوتها العذب 

*مرت الأيام وامتحنت تولين وظهرت النتيجة واوفت بوعدها وتفوقت على نفسها كما تقول 

هدى: انت مفكرة مجموعك ده تفوق 

:انا وعدتك بكام 

: ٧٠%

: ولما اجيب ٧٥ % يبقى تفوق ولة لا فكري فيها كدة يا هدهد

: دي تبقى خيبة تقيلة

: ليه بس هو انا كان متوقع مني اشيل مادتين ما بتحمديش ربنا أبدا 

: عندك حق الحمد لله 

يوسف: طبعا بمساعدتي ومذاكرتي لك تنكري

هدى : يوسف اوعى تكون غششتها 

: يا ماما لو كنت غششتها كانت قفلت انا زي ما وعدتك شرحتلها بس

: الحمد لله ريحت قلبي تعالى يا تولين نشوف اي جامعة هتختاري 

:طبعا اللي قريبة من البيت بلاش حاجة بعيدة ولازم يكون عندهم مسرح عشان اغني فيه

:هو ده اللي همك 

: ماما انت وعدتيني هعمل صفحة على النت واغني عليها لو جبت مجموع

: انا خايفة عليك من الحاجات دي 

: ما كله هيبقى تحت اشرافك مش بابا معودنا نمارس هوايتنا

: توعديني مفيش غلط وما تنزليش حاجة ليك مع بابا احسن جدك يعرف مكانا واحنا بنتقي شره

بقلمي سحر السحرتي

: هو اصلا يعرف ان بابا مخلف منك

: ما اعرفش الاحتياط واجب كل اللي اعرفه ان باباك اتجوزني وكان مخبي عليه  وهو كان صاحب ابو ولاء وكان بيحبه قوي   وحب يشيل مسؤوليتها معايا وكنا متفقين مفيش خلفة بس قضاء ربنا وفرح قوي لما اتولدتوا 

: هو انت كنت عارفة انه مخبي على جدو

: لا كان قايل انه اختلف معاه لانه رافض جوازه من أرملة و معاها بنت وقالي انه هيتجوزني غصب عنه وانه راجل مش بنت يفرض عليه رأيه ففكرته مقاطعه وكل اما اكلمه نروح نصالحه يرفض بحجة أن جدك قاسي بس جدتك كانت موافقة وبتكلمني وعارفة بوجودكم لكن صعب أنها تيجي تشوفكم ولما جدك عرف انه متجوزني من وراه اضطر يسافر يدور على الرزق بارة في هجرة غير شرعية لان جدك وقفله كل الشغل هنا

: يعني احنا ما نقدرش نعرف عنه حاجة 

: هو في نظر الحكومة لسة هنا وفي نظر الدولة اللي راحها ما دخلش وما اعرفش حد من اللي سافر معاه وانت كل شوية تسأليني ما انت عارفة كل التفاصيل 

: يا ماما بسأل لاني كبرت يمكن تفصيلة ما اخدتش بالي منها وانا صغيرة اخد بالي وانا كبيرة هو انت متأكدة انه وصل

: اه لانه راسلني بعد ما وصل وقعد سنة يبعت فلوس وجوابات وبعدها خلاص اتقطعت اخباره 

: وحشني قوي يا ماما وحشنا كلنا حتى ولاء متعلقة بيه رغم انه مش ابوها 

بقلمي سحر السحرتي

يوسف : انت خلصتي ومش هتبطلي تقرري ماما في القصة دي

: بدل ما احنا مش مستفادين حاجة من الكلية بتاعتك دي تقدر تعرف عنه حاجة 

: يا بنتي كلمت القائد عندي وبيحاول بس الموضوع صعب لانه هجرة غير شرعية 

*نظرت له هدى بنظرة فهمها وطمئنها بنظرة منه ... أكملت تولين أسئلتها

:طب انت ما شكتيش انه مخبي على جدي

يوسف: انت المفروض تدخلي حقوق مش إدارة أعمال وتبقي وكيل نيابة 

تولين : بس يا غلس معلش جاوبي على ده وخلاص

هدى : لا ما شكيتش لان شغله كله سفر وكان بيقعد معانا يومين في الأسبوع وساعات كل اسبوعين والكلام ده من قبل ما اتجوزه ايام ما كان مصاحب ابو ولاء خلاص بقى روحي هاتيلي كوباية مايه نشفتي ريقي

*بعد ما خرجت تحدثت بهمس مع يوسف

: قائد ايه اللي انت كلمته 

: يا ماما بقول لها كدة بنيمها ما انا عارف الحقيقة 

: انت عارف اني مش قادرة اقول لها لأنها متعلقة بيه جدا وولاء كلامها كثير انا قلت لك انت لأنك راجل البيت وعاقل وحضرت الأحداث اللي حصلت 

: ما تخافيش يا ماما الخوف بس لا جدي يعرف انه مخلف منك

: لا مش خايفة من كدة هو لو عرف هياخدك انت ويسبها لانه بيحب الصبيان لكن البنات لا وخصوصا حالة اختك ممكن يدبحها بكلامه انا كل يوم بحلم بالكلمتين اللي قالهم ليا من يوم ما عرف والحمد لله وقتها كنتم في مدراسكم غير اللي عمله فيا وانت عارفه

: وهنفضل لغاية امتى ساكتين على الظلم ده 

: لغاية اختك ما تخلص جامعتها او هو يموت بعدها كل اولاده هيستريحوا من ظلمه

تولين: هو مين اللي يموت اتفضلي الماية 

:دى مسلسل كنت بحكي ليوسف عليه

:وهو من امتى يوسف بيسمع التركي بتاعك

: لا دي حتة كدة جت على بالي اعملي حسابك بكرة هننزل نشتري هدوم جديدة للجامعة

: طب ما توفري فلوس اللبس وتجبيلي اسكوتر اروح بيه الجامعة واترحم من المواصلات 

يوسف: يا جماله اسكوتر ايه ده

: ده زي الموتوسيكل بس صغير 

: وحضرتك عايزة تركبيه والناس كلها تعاكسك 

: يوسف لو سمحت اقنع ماما الدروس كانت جمب البيت وبروح مشي انما الجامعة هبقى مضطرة اركب ميكروباص او اتوبيس ورجلي بتوجعني وانا طالعة السلم بتاعهم الاسكوتر ده منتشر دلوقت للبنات 

: بس اخاف عليك 

: اكيد هاخد بالي ومش مستغنية عن نفسي بس هيريحني

: خلاص يا ماما نجيبه لو هيريحها 

هدى: من أين بس

تولين: ده مش غالي

يوسف : انا هاخد مكافأة تفوق كويسة من الجامعة وهي النادي هيصرف لها مكافأة للفوز ولو ما كفاش نشتريه قسط ونعتبر أنها لسة بتاخد دروس

ولاء : وانا كمان ممكن اخد سلفة من الشغل بس أنتم متأكدين أنها عايزاه عشان رجلها مش عشان تعرف تاخد الجيتار معاها

*نظر لها الجميع بدهشة الا تولين نظرت بغضب لافسادها ما تخطط له وتحدثت بعصبية 

: لا طبعا ما انا ممكن اخده معايا في المواصلات بس هروح تدريب السباحة ازاي في الجامعة والمبنى بتاع المحاضرات بعيد عن الملاعب وهو انا رايحة اتعلم ولة اغني 

يوسف: خلاص ما تزعليش هنجيبه بس مش هتعمليلنا تامر حسني بالجيتار في الجامعة 

: لا هعمل تولين الحريري هاه بايخ هو كل واحد فيكم بكلمة خلاص مش عايزة هشتغل واجيبه

هدى: خلاص هنجيبه  بطلي قفشتك دي وايه حكاية الشغل وناوية تشتغلي ايه بقى 

:بصراحة كنت محتاجة افاتحكم في الموضوع ده واحدة صاحبتي هتعمل حفلة عيد ميلادها وطلبت مني اغني في الحفلة بفلوس ففكرت وقلت ليه لا حفلات الخطوبة وعيد الميلاد النهارية عشان ما تقوليش هترجعي متاخر ايه رايك

هدى: اه وتسيبي مذاكرتك

يوسف: لا طبعا ما اسمحش لاختي تشتغل مطربة

بقلمي سحر السحرتي 

تولين: يا ماما الجامعة مش صعبة تخصص سهل ولك عندي انجح وتقدير معقول عشان أحلامك ما تعلاش وانت يا سي يوسف الغنا مش عيب طالما في أماكن محترمة وهبلغ ماما بالتفاصيل قبل ما اوافق على اي حاجة وفي نفس الوقت بمارس هوايتي واطلع مصروفي الشخصي انا هبقى في جامعة خاصة 

هدى: خلاص تغني في جناين مفتوحة لكن شقق لا ولو فيلا تغني في الجنينة دخول جوة لا ويبقى معايا كل تحركاتك 

يوسف:ماما انت هتوافقي على الهبل ده 

هدى: مفيهاش حاجه لما تمارس هوايتها وهي صوتها فعلا حلو بس اي تقصير في دراستك همنعك تغني تاني

تولين: احبك يا احلى ام في الدنيا 

*وأخرجت لسانها ليوسف وولاء

             ____________________________________ 

 *في بيت عماد السيوفي يستيقظ ابنه زياد شاب في العشرين من عمره وسيم ذو جسم رياضي في الفرقة الرابعة إدارة أعمال نفس الجامعة التي سوف تلتحق بها تولين 

بقلمي سحر السحرتي

*بدأ في ممارسة الرياضة الصباحية فهو ايضا سباح ويحصد الميداليات لكن ليست دائما ذهبية فهو مهتم بدراسته أكثر متفوق فيها يحاول الاجتهاد أكثر هذه السنة الأخيرة لانه يريد أن يتم تعينه معيد في الجامعة لتفوقه المستمر طوال أعوام دراسته 

*انتهى من رياضته الصباحية دخل الحمام ليستحم ويرتدي ثيابه ونزل لتناول طعام الإفطار مع والدته مديحة السيوفي فهي ابنة عم زوجها 

*يعيشون في فيلا متوسطة المساحة بداخل كمبوند راقي فهي اخر ما يمتلكون بعد أن خسر والد زياد معظم أمواله في صفقة فاشلة فكانت حياتهم مهددة بالافلاس اذا حدث ذلك مرة أخرى لذلك تحرص مديحة على أن تقرب ابنها زياد من ابنة عمه مهيتاب لأنها وحيدة والدها وهو الآن أكثر ثراء من زوجها 

زياد : صباح الخير يا ماما 

مديحة : صباح الخير افطر بسرعة والحق مهيتاب في النادي قبل تدريبك 

: اسف انا يادوب افطر والحق التدريب عندي بطولة قريب ولازم اركز و مهيتاب بتحب تتكلم كثير وحفلات وسفر ولازم اركز قوي السنة دي عشان اتعين في الجامعة والبطولة هتضيف لي درجات للتقدير بسبب التفوق الرياضي

: كان نفسي اقولك اتخرج وامسك الشركات مع باباك بس الحال اتغير وبقت شركة واحدة حاول تقرب من مهيتاب وتخطبها قبل ما اي حد يضحك عليها ويشغلها وهي لسة صغيرة 

: اه صغيرة وطايشة وفاشلة في الدراسة ما جابتش مجموع حتى تدخل بيها جامعة خاصة وعشان تريح نفسها دخلت معهد سنتين بتشتري شهادة النجاح حتى مش بتحضر امتحانات وبتنجح وهتتخرج  معايا 

: هي مش محتاجة لاي شهادة كفاية فلوس ابوها هتعمل ايه يعني بالشهادة 

: ماما انا مش فاضي كل يوم اجادل معاك في نفس الموضوع انا متاخر 

: طب خلينا نخطبها نحجزها واتجوز وقت ما تحب 

: اتجوز اللي احبها واكيد مهيتاب بارة حساباتي سلام 

بقلمي سحر السحرتي

*نادته بأعلى صوتها لكنه اسرع للحاق بموعده في ذلك الوقت نزل عماد والده 

: في ايه يا مديحة صوتك عالي ليه على الصبح كدة 

: شوف ابنك رافض موضوع مهيتاب مش مقدر المصيبة اللي احنا فيها والشركات اللي راحت ومستوانا اللي نزل

: مصيبة ايه الشركات اقدر ارجعها زي ما عملتها ولو ما قدرتش عندنا اللي يكفينا

 : اه يكفينا مش قادر تقول وزيادة حتة الفيلا الصغيرة بعد ما كان قصر حتى فيلا الساحل بقت شاليه صغير ما بقتش بقدر اروح النادي لان هدومي زي ما هي بطلت اشتري جديد 

: أحمدي ربنا اننا ما خسرناش كل حاجة لسة عندك اللي يخدمك ولسة بتلاقي اكل وشرب 

: الحياة كلها في نظرك اكل وشرب 

: لا الحياة انك زي ما عشتي معايا حياة رخاء تعيشي معايا ايامي الصعبة وبطلي تغصبي على ابنك انا مش هجوزه غصب وكفاية انه مهتم بمستقبله و بيسعى يكون دكتور في الجامعة ومش كل يوم هنعيد نفس الاسطوانة سلام انا ماشي بقت عيشة تخنق

: صح بقت عيشة تخنق لكن لو كنت اتجوزت السنكوحة بتاعتك كان زمانك عايش في الجنة 

*عاد إليها ثانية بعد أن كان متجها إلى الباب 

: اسطوانتك ما بتتغيرش وبلاش تغلطي فيها لاني سبتها واتجوزتك وياريتك كنت تستاهلي

: وكملت معايا ليه

: انت عارفة ليه عشان الاولاد ولأنها كانت خلاص ضاعت مني فما بقتش فارقة انت من غيرك زي بعض 

*وتركها تشتعل من الغيظ والغضب بسبب كلامه المستفز الدائم عن حبيبته الأولى 

يتبع                

                 الفصل الثالث من هنا

لقراءة باقي الفصول اضغط هنا

تعديل المقال