رواية شهر زمان
الفصل الاول1
بقلم مريم اليوسف
تصنيف القصة : مغامرة ، كوميدا ، حب ، حزن
بتبلش قصتنا مع طلوع شمس هيدا اليوم المشرق بس بالنسبة لبطلتنا ممل ويوم متلو متل غيرو
الوقت صار الضهر وهية متمددة بتختها وشاردة بالسقف
اندق الباب وحكت اتفضل ومع كلمتها اتجلست وانفتح الباب لتطل منو مرى متوسطة العمر ولابسة مريول خاص بالخدم
:صباح الخير غفران خانم
غفران:صباح النور
:اتأخرتي ما عادتك
غفران: قاعدة من زمان بس مافي شي اعمل قلت خليني بتختي
:بتحبي جهزلك القهوة ولا الفطور
غفران:لا هي ولا هي
رفعت الغطا وقامت وصارت تتمطمط
غفران:حكي شي بابا
:لا
وقفت ع الشباك ليطل عليها حديقة الفيلا وفيها حرس منتشرين حوليها
ونفخت بضجر:اوووووف
:سلامتك من الاووف، بهل العمر وعم تنفخي
غفران: رح اختنق يا خالتي ام جورج
ام جورج:طيب اطلعي غيري جو
غفران:لوحدي ... انا هون مالي رفقات
ام جورج :روحي لعند عمتك ام باسل
غفران: بتعرفي عمتي الله يساعدها مضيعةو مابتعرف حدا والروحة لعندها عم تجبلي الاكتئاب .. لك حتى كنت انزل اتسلى مع باسل بالفرع بس بابا منعني ، والشركة ماعم اقدر انزل اشتغل فيها ،هو في كتتير شغلات ممكن اعملها بس بابا مانعني عن كلشي
ام جورج : طولي بالك الا ماتفرج
غفران : لك انا بس بدي اعرف مزال مابدو يخليني اشتغل ليش بعتني لبرا لكمل تعليمي
ام جورج: اكيد رح يخليكي تشتغلي بمهنتك بس يمكن الوضع مو منيح هالفترة وبتعرفي مكانة ابوكي السابقة بالدولة ويمكن عليه عين او في شي نحنا بنجهلو
غفران : عم يقلي عم يجيه تهديدات ولهل السبب خايف علي ، بس انا طقت خلاقي هي مو عيشة ،هو ببلد وانا ببلد ،عالقليلة عم يتفسح مع مرتو بس انا شو عم اعمل هون لحالي ،
ام جورج : طيب انا فيني اعمل شي لخفف عنك
غفران: لا سلامتك فيكي تروحي على شغلك
طلعت ام جورج ومافي دقايق رجعت تدق على الباب
غفران : اتفضل
دخلت ام جورج وحكت: باسل تحت
غفران : يلله جايي شوفيه شو بدو يشرب وانا بدي قهوة لو سمحتي
ام جورج : تكرمي
(غفران&بنت رشيقة طولها متوسط بس مو قصيرة مبين تعبانة ومشتغلة على حالها لأنو الجمال بدو عناية وتعب .. وهالشي واضح من رشاقتها لنضارة بشرتها ولونها الموحد لشعرها الطويل الاسود لشفافها المرسومين وعيونها العسليات .. يعني هية حلوة واشتغلت عحالها لتصير احلى متل الممثلات والعارضات)
نزلت ع الدرج ببنطلون جينز وبلوزةرمادية ورابطة شعرها لورا والابتسامة على وجها
باسل كان عم يكبس بتلفونو ومبين انو ملتهي مع حدا
غفران:صباح الخير .. و قعدت ع الكنبة يلي مقبالو
رد عليها وحط الموبايل جنبو ومبين انو كل يوم بيلتقو وكأنو من اهل البيت
باسل : كيفك
غفران :طايرة من الفرح
باسل :حسيتك ضايجة قلت لمر عليكي قبل ماروح عشغلي
غفران :عملت منيح
باسل :وين اراضيه خالي
غفران :مابعرف
باسل : من وقت ما الله بعتلو هالمرى وكملت معها قصة التهديدات معد شفناه
غفران :... .
باسل : شبك
غفران بطفولية : ضايجة كتيير
باسل : طيب احكي مع خالي مشان شغلك بالشركة او تشتغلي باختصاصك
غفران : قال عمهل .. بس ع القليلة ادرس عند شي استاذ اتعلم الاستذة منو
باسل : معك حق، بس بتعرفي الوضع
غفران : بشرفك حاج ترجعني لنفس القصة لانو بس اسمع فيها بتنكرز لسه تهديد وخوف ومابعرف شو انا كل هاد ماني شايلة همو بس كرمال بابا عم طاوعو ،بس خلص وصلت لحدي
باسل :بدنا نزوجك هههه.
غفران(ضحكت): ههههههه ياريت والله
باسل :اذا صرلك عريس بتتزوجي
غفران : ليش لأ ،بس هو يجي وماعليه ... لك بدي اطلع من هالجو ... رح اختنق يا باسل بنام لحالي بفيق لحالي مافي حدا لا اهل لا اخوة لا رفقة
لما كنا برا البلد كان عندي رفقات بس هون وين مافي حدا اصلا ابي معد خلالي ثقة رافق حدا
باسل : ونحنا وين رحنا
غفران بتهرب: والله حاسة حالي عم تقل عليكن ... قال تقل الطحش ع امك وابوك بيكرهوك (وخجلت تقلو امك خرفانة ومرتك مابتطيقني ولابطيقها )
باسل: قومي ننزل ع الفرع نشوف شي قضية وسلمك اياها تتسلي شوي ومنو بتاخدي فكرة
غفران :ابي قلي خفف روحات لعندك
باسل ؛ومن ايمت بتسمعي كلمتو
غفران : مو هيك القصة بس والله ماالة من كلشي ... حابة اعمل شي بحياتي هيك شي مغامرة على اكشن مابعرف بس حابة كتير اعمل شي
ضحكت وحكت: باسل اطلب منك طلب
باسل :ع الموت وحياتك
غفران بسخرية: دبرلي عريس ههه
باسل : محلولة تنزلي ع ضرة
غفران :اي رووح انت لما كنت عزابي ماكنت طيقك
باسل :الله يسامحك بس
غفران : والله عم احكي جد
باسل : نزلي اعلان بالجريدة واكتبي فيه عايزة اتجوز
غفران :سيبوني ياناااس عايزة اتجوزز هههههه
باسل :هههههههه
اجت ام جورج عم تضيفن القهوة وشافتها كيف عم تضحك ومبسوطة وتغير مودها شوي
ام جورج: ماتبلى هالضحكة
غفران :تسلميلي
ام جورج:حبيبتي انا نازلة شوي ع السوق قبل الغدا بجي
غفران :اي تمام
مشت ام جورج لتوقفها غفران : ام جورج
ام جورج :اي بنتي
غفران : انا حابة انزل ع السوق معك بأثر شي
ام جورج : شو بأثر لا بالعكس والله بلاقي ونس
غفران : بس مو بالسيارة بالباص
ام جورج: ؛ولا يهمك
باسل ؛وهي لقيتي شغلة تتسلي فيها لقوم روح انا
وقف ومشي وهية مشت وراه وشاردة مبسوطة
غفران : عنجد كيف ماخطرت ع بالي .. اعمل حالي بنت عادية وام جورج امي وبركب بالباص وبفاصل اصحاب المحلات ههههه
باسل : اي بنت خالي اطلعي لانو حاسك بلشتي تجني من قعدت البيت
~~~~~~~~~~~•
ماشية بالطريق جنب ام جورج وتيابها كتير بسيطين مابيشبهو ابدا التياب يلي كانت لابستهن ومبسوطة عم تضحك
غفران : مبينين انو ام وبنتها
ام جورج : هههه ياريت عندي هيك بنت
غفران :تسلميلي وانت مافي منك ومتل امي واعز
ام جورج : الله يرحمها
غفران :آمين
ام جورج :بس مافهمت ليش ماجبتي جوالك
غفران :موبايلي حديث واذا حدا شافو مارح يصدق انو بنت متلي حاملة هيك موبايل .. انت موبايلك مو معك ؟
ام جورج :اي معي
غفران : اي تمام من وين بدنا نروح هلق
ام جورج : ع موقف الباص يلي هنيك
كانت كتير مستمتعة بهل التجربة وحاسة انو كل الناس بتعرفها متنكرة بس بالحقيقة مافي هيك شي ويمكن عم يتطلعوا فيها بأعجاب
~~~~~~~~~~~~~~~•
بعجقة الطريق راكب والعقدة بين عيونو ... اخد التلفون وحاول يرن ع رقم كان محظور منو
:وحاظرتيني كمان ... بسيطة
وقف والسيارات مسكرة الطريق من كتر الزحمة
معتصم : بس ناقصني زحمة السير والعجقة اوووف ياااه اوووف وضرب بايدو ع الدركسيون
وهو بقمة عصبيتو اخترق مسامعو صوت عم يستنجد :بتراااجاااكن ساعدونا ... اطلبو الاسعاااف ... مافي دكتووور هووون ... مافي حدا يساعدنااا
ماقدر مايلبي النداء الانساني ونزل فورا من سيارتو ليلمح جمعة ناس وقرب لعندها فوراً وشاف غفران وام جورج بس هو طبعا مابيعرفن .. ام جورج مغمى عليها وغفران عم تحاول تصحيها
غفران : خالتي ... يا خالتيي فيقي مشاان الله .. ياجماعة طلبتو الاسعااااف
:طلبناه بس بظن مايقدر يدخل بالزحمة
غفران : ياااربي وما معي تلفوون كمااان .. بترجاكن ساعدونا خلينا نأسعفها
معتصم : انا دكتور بعدو هييك
بعدو الكل بسرعة ونزل ع الارض تحسس نبضها ونفسها
معتصم : الظاهر جلطة لازم ننقلها فورا ع المشفى
غفران : شووو جلطة ياااربي
معتصم : ماوقت الحكي احملوها والحقوني ع سيارتي ولو سمحتو فتحولي الطريق
ركبو بالسيارة والناس قدر الامكان حاولو يفتحو طريق واخيرا طلع من بين العجقة وطار ع الطريق
غفران : خالتي .. ياخالتي عم تسمعيني
عم يتطلع عليها شوي بالمراية وشوي ينتبه عطريقو
~~~~~~~~~•
رايحة جاية قدام الطوارئ وعم تفرك ايدها بتوتر ... لك انا شو يلي عملتو ... ضروري اطلع بلا موبايلي ولا سيارتي وبحالتي المبهدلة هي اووف بس .. بس انا شو عرفني انو رح يصير معها هيك ... المهم هلق هية تصير منيحة وكلشي بينحل
طلع معتصم من عندها وقربت هية بلهفة لتسألو عن وضعها واول ماقربت هفت ريحة عطرها يلي ماشم بطيابتها .. مع انو كانو بنفس السيارة مع بعض بس كان الشباك مفتوح وما ميز الريحة
غفران : طمني كيفها
معتصم عم يتأملها وبنفس الوقت عم يجاوب:منيحة ... هية معها مرض بالقلب
غفران :مابعرف
معتصم : شو بتقربيا
سكتت شوي وشافت حالتها وتذكرت الكذبة يلي كانت ناوية تعملها وحكت : امي
معتصم : بس كنت تقولي خالتي
غفران :انو هية متل امي بس بالحقيقة هية خالتي.... طمني عنها هلق بترجاك
معتصم : منيحة ... بس بدها شبكة للقلب باسرع وقت
غفران : اي مو مشكلة .. بتعرف دكتور شاطر يعملها
معتصم : انا بعملها بس ماقدرتكن هيك مشفى انتو .. اذا بتاخديها ع مشفى حكومي بكون احسن
تبلكمت ماعرفت شو ترد ... وشوبدا ترد وهية بهل الحالة وبهل الشكل
غفران بقلبها : اكيد مفكرنا فقرا ومابدي جادلو رح طالعها من هون واخدها ع احسن مشفى بالبلد معارف بابا كتار والا مايدلونا عدكتور شاطر
معتصم :وين شردتي
غفران: بأثر شي اذا طالعتها هلق
معتصم : صفن فيها شوي وكأنو زعل عليها وعلى وضعها
معتصم : خلص انا رح اعملها
غفران : وضعها لهل الدرجة خطر
معتصم : مو هيك .. بس انا حابب اخدمكن
غفران : طيب ياسيدي يكتر خيرك وانا رح دبر المبلغ بأسرع وقت ماتاكل هم المصاري
ضحك ومشي وهية مشت وراه
غفران :فيني افهم ليش عم تضحك
معتصم : لا مافي شي
غفران : لا انا حابة
معتصم : تعي معي ع غرفتي
لحقتو بدون تردد
وفاتو ع مكتبو وقعد ورا طاولتو وهية قعدت قدامو ومكتوب ع مقدمة الطاولة الدكتور معتصم يوسف
معتصم : كيف مو منتبهين عحالتها
غفران: مابتحكي
معتصم : وانتو ما انتبهتو
غفران : طمني هية هلق منيحة
ابتسم وقال : منيحة منيحة لا تخافي
نفخت :اوووه طمنتني ... يعني ع الشبكة بترجع طبيعية ولا الها مضاعفات
:واحسن من اول كمان
غفران: الله يطمن بالك يا دكتور
وقفت وقالت :انا رح شوفها
معتصم : بس ماحكينا بخصوص العملية
غفران : خليني اطمن عنها بالاول وتشوفني اني جنبها وبرجع اذا ماكان عندك شغل
معتصم : ماشي
غفران : بالاذن
طلعت وبدخلة الممرضة
: دكتور ... الدكتور عمر بدو اياك
معتصم : ماشي
~~~~~~~~~~~•
نقر ع الباب ودخل ..
دكتور كبير بالعمر قاعد وبأيدو ملف عم يقراه
معتصم : اي بابا طالبني
عمر : كمان مدخل مريض اليوم على حسابك
معتصم : .....
- : ابني هي مشفى خاصة مو سبيل
معتصم :.....
-: كالعادة ساكت ... لا تنسى انو وحدة من اسباب الخلاف بينا وبين بيت عمك هية عمايلك هي ... مابشوفك غير عم تفوت ناس ببلاش يتعالجو
معتصم : بدكن تلبسوني القصة وانا اكتر واحدمضرور من هالخلاف ...وبعدين انت هيك ربيتني نساعد الناس ولا اتراجعت
_ : بس يأبني انت تقلت الحمل كتير على المشفى
معتصم : عم حاول بس ماعم اقدر
_ : لا حول ولا قوة الا بلله
معتصم : خلص انا ما الي راتب بهاد المشفى مابدي اياه
_ : هيك بهل البساطة.. والشقة يلي نتعتها ولا السيارة ولا رصيدك بالبنك كلو من ورا هالمشفى وهلق عم تقول راتب
معتصم ؛طيب مابقدر شوف حدا بدو مساعدتي وماساعدو
_: خلص لا تهتم بس لا تجي عحالك كتير
متعصم : حاضر ..
سكت شوي وبعدين حكي : عنجد بسببي صار الخلاف
ابوه بتبرير : لا بس انو انذكر هيك شي لما تقاتلت مع عمك صار يشلف حكي يمين شمال وقال من جملتهن مابكفي ابنك معتصم عامل المشفى سبيل
معتصم : طيب مابدكن تحلو هالخلاف بقى
_ : فشر بنص عينو ... وانا عرفان عشو عم تلمح على سارة مو هيك
معتصم : لا طبعا خلص انا لغيتها متل مالغتني صفت بصف ابوها وحاربنتي ليش انا شو عملتلها حتى لو انت وعمي مختلفين نحنا شو دخلنا ..
ا_ : يعني لو منعتك عنها بتسمع كلامي
معتصم : طبعا لااا ... نحنا شي وانت واخوك شي تاني بس ماتوقعت تتركني بهل السهولة حاربتني ووقفت بصف ابوها ... عند اول مشكلة عملت هيك شو خلت لبعدين بعدين لو بتفهم كانت حطت ايدها بأيدي وخليناكن تتصالحوا قد ماكبر الخلاف انتو اخوة ورح تتصالحو اكيد .... بس انا خلص معد بدي اياها ورح اتزوج واحرقلها قلبها هية واهلها
_ : روق ابني، انت هلق معصب والا ماتروق لاتنسى انها حب حياتك ،لا تستعجل اعطي الموقف وقت ورح تلاقيها عرفت غلطتها ورجعت لعندك
معتصم : والله لأتزوج .. ومابدي اعطيها لا موقف ولا غيرو ... كنت مفكرها اوعى من هيك اقسم بلله صدمتني صدمة عمري ... ومفكرة تمسكني من ايدي يلي بتوحعني بس ماحزرت ومتل ماعملت فيني رح اعمل واكتر وحياتك عندي يا بابا لأتزوج وحدة احلا منها واكسر عينها وعين يلي جابوها
وقف وطلع عمر صار ينده عليه :معتصممم .... يا معتصمممم
مارد عليه وضل طالع
_ : والله هاد مجنون بس ما بيعملها بعرفو
~~~~~~~~~~•
بغرفة ام جورج
غفران : مشان الله يا خالتي لا تواخذيني
ام جورج : شو دخلك ياعمري انت
غفران : لو بلا ما اعمل هالشي البايخ كنت انزلت انا وانت بالسيارة وكنت قدرت اتصرف
ام جورج ؛ ياعمري انا طول عمري بنزل لحالي على السوق والحمد لله انك كنتي معي وبعدين ليش شو صار الحمد لله وصلت بالوقت المناسب وليكيني صرت غير شكل
غفران ؛ماعقلبك شر
ام جورج : وشو قال الدكتور
غفران بأسف: لازمك شبكة ... بس لا تخافي مابتوجع ومابتحسي فيها ابدا المهم انت ضلي مرتاحة
ام جورج بخجل : وماعرفتيلي شقد بتكلف
غفران : ياعيب الشوم عليكي يا ام جورج ... معقول عم تحكي هيك ... وحياتك عندي لاعملك اياها بأحسن مشفى وعند احسن دكتور بالبلد كلها
ام جورج : مابتقصري الله لايحرمني لا منك ولامن الوالد
غفران : ولايحرمنا منك ... يلله انا راجعة شوف الدكتور مبين عليه شاطر وابن حلال ... اسأذنت منو وجيت لعندك مشان ماتفكري انو تركتك ورحت ههههه
ام جورج : حبيبتي انت
غفران بضحك : شو ام وبنتها ع الفاضي لكن ههههههه (قصدها ع الدور يلي كانت بدها تجربو بس مالحقت )
ام جورج : وحتى انا حبيت هالتمثلية هههه
غفران : وحياتك لنجربها مرة تانية ... يلله مابتأخر
طلغت من غرفة ام جورج وحكت لازم احكي مع حدا من البيت يجبلي اواعي وسيارتي وتلفوني حاسة حالي ضايعة بلاهن .. يلله بعد ماشوف الدكتور
دقت دقتين وسمعت صوتو من جوا قال : ادخل
دخلت ومع دخلتها دخلت معها ريحة عطرها
غفران: اسفة اتأخرت ... بس حابة استفسر اكتر عم موضوع العملية
معتصم ومبين مزعوج : رح حولكن ع مشفى حكومي ودكتور شاطر
غفران بقلبها : من شوي كنت عم قول عنو ابن حلال هه ... لو اني جيت بهيئتي الحقيقة كانو شالوني ع كفوف الراحة ... تفو عهيك زمن
شافها شاردة وماعم تحكي
معتصم : الدكتور موثوق لا تخافي
غفران : ماعليك انت بس اكتبلنا ع خروج وانا بتصرف بعدين
حسها انها زعلت وانكسر خاطرها .. وكيف بعد ماوعدهن رجع بكلامو
نفخ وقال : بتعذر تراجعت عن كلامي بس قوانين المشفى مافيني اتجاوزها
غفران : ومين طلب منك تتجاوزها .. قلتلك مو مشكلة المصاري
معتصم : مارح كذب عليكي مبين وضعكن ومستحيل تقدرو اتأمنو هيك مبلغ الحكومي افضل الكن
وقفت وقالت ببداية عصبية :طيب ممكن تكتبلها ورقة لنخرجها
مع وقفتها اتأمل طولها وجمالها المخفي بهيك لبس بس مانكر جمالها وجمال ريحتها
وكأنو خطرت عبالو فكرة سريعة
معتصم : ممكن سؤال شخصي
غفران : لا
معتصم : لوسمحتي
غفران : بسرعة
معتصم : انت مرتبطة
سكتت بصدمة
معتصم : سؤالي محرج ؟
غفران بهدوء : لا عادي
معتصم : مرتبطة ؟
غفران : لا
معتصم : كتير منيح ممكن تقعدي
بعد ماقعدت بفضول حكي : انا برجع بعرض عليكي فكرة العملية على حسابي وانا اعملها شخصيا بس بتسمحيلي زور بيت اهلك واطلب ايدك رسمي
غفران : عم تساومني
معتصم : مو هيك والله بس بصراحة انت عجبتني وبدي فوت من الباب ... وقصدي ع العملية انو خلص لاتشيلي همها
اجتها ضحكة كتمتها وبقلبها : اكيد لانو شايفني فقيرة عرض علي هالعرض لو يعرف مين انا مابيسترجي يحط عينو بعيني
غفران :مو معي بينلعب هيك لعب .. بالاذن
لفت لتطلع حكي بصوت عالي : بس حياة امك مدري خالتك بخطر ... لا تغامري فيهن
بقلبها : ومين قلك انو بدي غامر ... شو مفكرني عم العب هاد
صمتت بينا وبين حالها وقت حكت بقلبها كلمة (عم العب) مزبوط انا عم العب خليني كمل بهل اللعبة لشوف شوبدو يصير .. بتسلى وبغير جو
غيرت ملامح وجها لحزن والتفتت عليه وحكت : بدي مهلة فكر
معتصم :حقك ... وخلص انا هالمرة مارح اتراجع عن وعدي حتى لو ماوافقتي رح اعمل العملية ...وبعتذر اذا زعجتك باي حرف
غفران : لا ولايهمك ... قلي شو اعمل انا هلق بخصوص خالتي
معتصم : بكرا الصبح رح تكون بالعمليات لاتخافي ... وانت فكري منيح بالموضوع معك من هون لبكرا المسا
غفران : كيف فيني شوفك
معتصم : رح تلاقيني هون بالمشفى ناطرك
غفران : ان شاء الله بالاذن
~~~~~~~~~~~~~•
بأحد ممرات فرع الامن صوت ضحكة غفران عم يرن فيها وهالصوت طالع من احد الغرف
غفران : هاليوم مو طبيعي ... عقد ماكانت خايفة ومتوترة ع ام جورج عقد ما ضحكت بعدها ... انو معقول هاد الدكتور
باسل : اي والله بس اكيد فيه وراه شي .. لانو مافي حدا بيدخل من هالباب اولا شايفك فقيرة واكيد مابتناسبيه ... وتانيا تقدملك بطريقةما ،ضغط عليكي متل المساومة وتالتا مافي حدا بيطلب هيك طلب لوحدة شافها من شوي
غفران : قولتك معقول وراه شي عصابة
باسل : لا تستبعدي شي
غفران : اسمو صار عندك حاول تعرفلي مين هو وركزلي عحياتو الشخصية
باسل : ولايهمك حطيتو براسي ... ام جورج شو صار فيها
غفران : منيحة رح يحطوها الليلة تحت المراقبة مشان بكرا تعمل العملية
باسل : ومين عندها
غفران :سحر الخدامة بعتت وراها مشان تضل جنبها وانا رحت ع الفيلا غيرت تيابي وجيت فورا لعندك لهون
باسل : طيب انا رح اعرف تفاصيل بأسرع وقت مشان بكرا نشوف شوبدنا نتصرف
غفران : تمام ... انا رايحة ع الفيلا اتحمم ونام منيح مشان بكرا
باسل : انتبهي على حالك
غفران : لا تاكل هم
رجعت غفران ع الفيلا كانت هادية كتير ماضل غير هية والحرس تحممت حمام دافي وراحت عملت لحالها فنجان نسكافيه وطلعت ع غرفتها قعدت ع التخت وفتحت موبايلها كان ابوها باعتلها ملصق مساء الخير ردت عليه بملص تاني يسعد مساك ورمت الموبايل عجنب شربت نكسافيه بأستمتاع وهية عم تحاول تعيش الجو انو هالدكتور الحلو طلب ايدها .. وعم تحاول تتذكر تفاصيلو .. رن تلفونها وكان باسل
ردت فورا : هلا
باسل : نايمة
غفران : لا بعد
باسل : عرفت عنو شوية تفاصيل لصاحبنا
حطت فنجان النسكافيه من ايدها وركزت معو وقالت : احكيلي
باسل: بالنسبة لمهنتو دكتور كتير شاطر اختصاصو قلبية وهيك شي والمشفى الهن يعني للعيلة ... وبالنسبة لحياتو الشخصية فهو كان خاطب بنت عمو وبحبو بعض كتير بس من جديد صاير مشاكل بينهن وبين بيت عمن
غفران : يعني فسخ الخطبة
باسل : مابعرف
غفران : يعني بدو يخطب مشان يغيظها
باسل : حاليا هاد اكتر حل منطقي لطلبو
غفران : اي تمام
باسل : بكرا روحي ارمي المصاري بوجهو وعرفيه مين انت
غفران : ماشي تمام تصبح على خير
~~~~~~~~~`••
الصبح
واقفة مقبال الخزانة وكانت ناكتتها كلها عم تدور عشي تلبسو
غفران: كلو مبين تقيل وماركة ...
اندق الباب وفاتت صبية بتجايل عمرها بس لابسة مريول خدم
سحر : ست غفران هي جيتي من عند ام جورج
غفران: كيفها
سحر : ناطرين يدخلوها ع العملية ... خلي الشوفير يجهز السيارة ولا بدك تروحي لحالك
غفران : لا هي ولا هية اطلبيلي تاكسي
سحر : متأكدة
غفران: اي
سحر : بأمرك .. لفت لتطلع بس وقفتها غفران وقالت : انت ايمت بدلتي تيابك
سحر : من وصلتي بدلت وجيت لعندك في شي غفران خانم
غفران : بلاقي عندك تياب على قدي
سحر : انت تلسبي من عندي ؟!!!
غفران : اي عندك مانع
سحر بلبكة : لا طبعا كلو عسحابك بس انو مانو قد المقام
غفران: ليش هيك عم تحكي انت من يوم يومك مقامك عالي .. والتياب يلي رح اخدن رح اشتيريلك احسن منن لا تاكلي هم
سحر : والله مو مشان هيك عحسابك انا والتياب فضلكن سابق
غفران : لكن امشي عطيني شي البسو
~~~~~~~~~~~~~~~•
الوقت قريب العصر
وبغرفة ام جورج وعندها غفران جنبها وكمان سحر كانو قاعدين وهية نايمة
بدخلة باسل وتفاجئ بشكل غفران
باسل : مرحبا ؛
غفران: هلا
باسل وعيونو على غفران: شو كيف صارت
غفران : منيحة كتير بس ناطرينها تفيق
باسل : اي تمام وانت ليش هيك شكلك
غفران : شبو شكلي
باسل : تعي شوي معي لبرا
وقفت وحكت: سحر خليكي منتبهة عليها
سحر : بأمرك
طلعو لبرا وباسل حكي : انت ليش هيك شكلك
غفران : بدي فوت بهل اللعبة
باسل : انت اكيد جنيتي
غفران : لا ليش جنيت خليني فوت بهل القصة وعأساس عم يضحك علي وانا كاشفة كلشي يعني اللعبة انا يلي عم ديرها
باسل : القصة فيها خطبة وزواج
غفران : حتى لو .. هو قلبو وعقلو مع هديك يعني مشان يقهرها مو اكتر ومنو بفوت بهل الجو وبتسلى ... اما اذا عرفتو عن حالي ودفعت المصاري ورحت رح ترجع حياتي المملة خليني غامر شوي .. واصلا مابظن نتخطى مرحلة الخطبة لأنو واضحة نيتو بدو يقهرها مو اكتر
باسل : واذا صار زواج
غفران : يصير مارح اسمحلو يقرب مني اصلا و هو مابظن يطلب هالشي
باسل : انت اكيد في بعقلك شي
غفران : اي واذا ضيلت بهديك الوحدة رح يصير اكتر من هيك ... خليني فوت بجوهن خالط اهلو واتعرف عليهن غيظ خطيبتو نعيش شوية اكشن
باسل ؛وابوكي ماحسبتي حسابو
غفران: مارح يعرف بشي ... اصلا هو عطول مسافر واذا اجا رح لاقي حجة اذا كنت بعدني معو
باسل : جنان رسمي
غفران : اي ليك .. بدي هوية مزورة بأثر شي
باسل : بدك تغيري هويتك
غفران : مو كلها مثلا اسمي رح خليه غغران مشان ما خربط ... بس بدي تغيرلي اسم الاب والكنية
باسل : بعتذر
غفران : اي تصطفل مية حدا بيعملي اياها و بلا منيتك
باسل :عفكرة عم تخاطري بحالك
غفران :دخيلك انت وهالمخاطرة وبعدين هو يلي طلب هالشي .. وكان ممكن يطلبو من اي وحدة .. خليني عيش الدور مزبوط واتخيل انو عنجد ماطالع بأيدي حيلة اكيد رح اقبل خليني شوف لوين بدو يوصل ومنيح انو وقع بين ادي احسن ماتكون شي بنت بحاجة عنجد ويتمقطع فيها ... يعني اذا بدو يتمادى بحركة وحدة بوقفو عند حدو
باسل : والله مابعرف
غفران : وبركي كان رئيس شي عصابة بساعدكن بمسكو 😉
باسل : خلص عملي يلي بدك اياه بس انتبهي منيح على حالك وماتتردي بأية لحظة تتصلي فيني لو كنتي بحاجة
غفران : لا تاكل هم ..وشو نسيت انو عندي فرقة كاملة جاهزة للتدخل السريع لحمايتي بكبسة زر
باسل : اي صح .. بس انا عطول جنبك وحاولي تخلصي هالتسلاية بأسرع وقت
غفران : حسب هية ومتعتها
باسل : ياربي ع النسوان كيف بفكرو والله ولا فيوز
غفران : ههههه المهم الهوية انت بتعملها ولا خلي حدا من طرفي يعملي اياها
باسل : عندي .. شو اسم الاب والكنية يلي بدك اياهن والمواليد ......
غفران : رح اعطيك هويتي بتخلي كل التفاصيل متل ماهية متل الصفات وتاريخ الميلاظ بس اسم الاب حطو امممم لنفترض احمد والكنية جلال
باسل : ماشي ... اتدربي عليهن رح اعملها ع نفس الاسماء متل ماطلبتي ... ولاتنسي هاد الاسم مانو بالنفوس اذا حبيتي تكملي كذبتك وتتزوجيه
غفران : لا تخاف بنلاقيلها تصريفة
~~~~~~~~~~~~~~•
بشارع كبير وتقريبا فاضي لأنها حارة خاصة بالفلل ومافي عليها طريق عام عم تتمشى صبية حلوة وبكل اناقتها وعم تفرك بأيدها وشاردة وصوت بزهنها عم يردد : بتقوليلو يسجلك حصتو بالمشفى بأسمك مشان تضمني حقك وغير هيك مابترجعيلو فهمتي
انفتحت بوابة فيلا يلي هية صارت قريبة منها وطلعت منها سيارة اوودي سودة غطس وبقلبها معتصم .. ولما شافها وقف ونزل
سارة : كيفك حبيبي
معتصم بنوع من البرود : الحمد لله
سارة :ليش هيك عم تحكيني
متعصم : ليش حاظرتيني
سارة ؛ هاد بابا اخدو مني وحظرك
القى نظرة للفيلا يلي مجاورتن ورجع اتطلع فيها
سارة : معتصم لا تزعل مني ... بعدين انا شودخلني من كل هالقصة
معتصم : اذا انت يلي عم تحكي هيك شو بقول انا ... لك اخوة ببعضن متاقتلين يسطفلو
لا تخدلي علاقتنا فيهن
سارة :طيب شو اعمل
معتصم : بتركبي معي وبنروح عبيتنا
سارة :هيك بدون شي
معتصم : شي متل شو ... مزال خاطبين بنكتب كتابنا وبنتزوج
سارة : وبركي تزوجتني كم يوم ورميتني مشان تنتقم من بابا
معتصم متفاجئ: اناااا يا سارة .. ليش مابتعرفي قديش بحبك ... وبعدين شوفي بيني وبين ابوكي انا ... انا مادخلني بالقصة ... وليكي انا بترك اهلي كرمالك ماعندي مانع انت بتتركي اهلك كرمالي
سارة : وبركي ابوك مثلا اجبرك او غصبك تطلقني بعد ماتكون اخدت يلي بدك اياه
معتصم : اقسم بلله ماعم اعرفك ومستحيل هالحكي يطلع منك
سارة : ليك اسمعني شوي
معتصم : تفضلي عم اسمعك
سارة : انا حكيت مع بابا كتير وترجيتو وقال هو ماعندو مانع انو نكمل مع بعض بس قال بدو يضمنلي حقي (سكتت) ... وتسجلي حصتك بالمشفى الي
ساكت ومانطق بولا كلمة
سارة : شو
معتصم :عمي هو يلي طلب
سارة: اي وبصراحة انا ملاقية فيها وجهة نظر
معتصم : وكلشي قدمتو مابكفي ياسارة
سكتت بخجل
معتصم : البيت عم يتسجل بأسمك وفي سيارة احدث موديل هدية عرسك ورصيد بالبنك ومابدي عد لانو انا مابحب ابدا تكون العلاقات مبينة ع الماديات مابكفي تضمني حقك ... وبعدين انا بدي اكل حقك او ارميكي ما انا ماعم نام الليل لحتى تصيري الي .. وعشان المشفى بسجلك حصتي مابتغلى عليكي ... بس مو بهل الاسلوب لو تعرفي شو نزلتي من عيني .... الحب يلي حبيتو كلو ع الفاضي ... ماعملتيلو اية قيمة .. المهم بدك تضمني حقك .... ياخسارة بس
لف وركب بسيارتو ليمشي وهية حاولت تحكي بس مارد ومشي بسرعة ... ضلت واقفة محلها وحست انكب عليها مي مسقعة وكأنو غلطت غلطة عمرها وبالفعل هيك
بحياتو ماركز ع الامور المادية ومارد عنها طلب وبحبها وبيعشق الارض يلي بتمشي عليها بس تكون رضيانة ... بس بهل الشي بينتلو انو كل حبو وتضحيتو الها ع الفاضي .. وبدها تضمن حقها بامور مادية ونسيت انو بيضمنلها حقها بروحو اذا بدها
رجعت ع بيتها يلي مجاور بيت معتصم وكانت عم تبكي وابوها كان ناطرها
ابوها : شبك بنتي ليش عم تبكي .. شو قلك معتصم
سارة : ليش خليتني اعمل هيك يابابا ليييش ...
ابوها : شو مارضي يسجلك حصتو بالمشفى
سارة : بسجلي روحو ...بس مو بهل الاسلوب ... حسسني انو انا وحدة طماعة وهامنني المصاري وكل حبو مالو اي اهمية عندو
ابوها : مافهمت شو صار هلق
سارة : شلكي بلشت اخسرو (وبكت بزيادة)
ابوها: لا اطمني رح يرجع ... بعرفو بموت عليكي ومابيتخلى عنك بهل السهولة
تركتو وطلعت تبكي بغرفتها
~~~~~~~~~~~~~•
المسا بغرفة ام جورج وكانت اول مو مصحصحة
ام جورج : شقد كلفت العملية بنتي غفران
غفران : ماعيب عليكي تسألي هالسؤال وانت فنيتي عمرك بخدمتنا
ام جورج : وانتو بحياتكن ماقصرتو معي
غفران : وان شاء الله مابنقصر لا معك ولا مع غيرك
ام جورج : بس ليش لابسة هاللبس يابنتي
غفران : بصراحة عم كمل بلعبة مبارح
ام جورج: عم تحكي جد
غفران : والله
ام جورج : طيب خلي سحر عندي وانت روحي ارتاحي
غفران : لا تاكلي همي وبعدين وجودي هون جزء من اللعبة
ام جورج : عنجد كيف
غفران : رح احكيلك كلشي عن قريب لانك عنصر اساسي بهل اللعبة
اندق الباب وحكت غفران بأستعجال وهمس: مابتحكي شي غير عن صحتك ماشي
غفران : تفضل
دخل معتصم ومعو ممرضة ليفحصو ام جورج ويتطمنو عنها
وغفران لما شافتو قلبها بلش يدق بسرعة بروح المغامرة
معتصم لغفران : ممكن تنطرينا برا
هزت براسها وطلعت
بعد كم دقيقة طلعو
غفران : طمني دكتور كيفها خالتي
معتصم : منيحة كتير
غفران : الحمد لله
معتصم : فاضية نحكي شوي
رجعت خصلت شعرها لورا ادنها بخجل وحكت اي
معتصم : ناطرك بالمكتب
~~~~~~~~•
دقت الباب ودخلت
كان قاعدة وشابك اصابيعو ومبين انو ناطرها
غفران : كيفك دكتور
معتصم : الحمد لله .. تفضلي ارتاحي
قعدت وعم تتظاهر التوتر
معتصم : فكرتي بالموضوع
غفران : يعني انت كنت جدي
معتصم : اي جدي
غفران : طيب ممكن سؤال
معتصم : اتفضلي
غفران : ليش هالطلب .. بصراحة في شي خوفني من عرضك المفاجئ وانا ماصرلي شايفتك غير كم ساعة
معتصم : بصراحة عجبتني وقلت هي هية
غفران (بقلبها): هي هية يلي رح تساعدني لاخد حقي
غفران : ما اقنتعت يعني انت ماشاء الله البنات حواليلك متل النمل اكيد شايف متلي واحسن واحلى مني بمية درجة
معتصم بلش يلف ويدور وقال : يمكن بدي وحدة بسيطة وما تكون نقاقة كتير
غفران : بسس( كانت بدا تحكي بس حست انها عم تحاصرو وقررت ماتضغط عليه )
معتصم : بس شو
غفران : مافي شي ... انت عملت معنا معروف كبير كتير ومارح انسالك اياه ولرد جزء من الشي يلي عملتو معنا انا موافقة
تنهد برياحة وقال : شكرا كتير الك ...
~~~~~~~~~•
بعد اسبوع
بفيلا عائلة معتصم ... كان نازل بكامل شياكتو الوقت قريب المغرب والعيلة مجتمعة بالصالون (بعدين رح نتعرف عليهن كلن )
امو : الله الله شو هالشياكة
معتصم : طالع حلو
امو : بتجنن
ابوه بمجاملة : عريس
معتصم : وانت قلتها مين يروح معي
امو : ع وين
معتصم :تخطبولي
امو : اتفقت انت وسارة يعني ... وحتى لو رضت تجي معك فشرو دوس بيتهن
معتصم : ومين جاب سيرة سارة
ابوه : لكن مين قصدك
معتصم : وحدة تانية
امو : دخيلك انت ومزحك ... عنجد وين رايح
معتصم : والله رايح اخطب لقيت بنت منيحة وبنت عالم وناس وبسيطة واتفقنا ع الزواج واليوم رايح اطلبها
ابوه: وبنت مين بتكون
معتصم : مانن معروفين
امو : معتصم عم تحكي جد
معتصم : والله جد ومشان تسدقو قومو روحو معي
حكت الجدة : معتصم ابني انت عم تحكي جد
معتصم : كأنو هالسؤال انسأل مية مرة ... والله عم احكي جد ... وحياتك عندي يا تيتة عم احكي جد
ستو : وسارة
متعصم : سارة خلص بح ما ضللها اي مكان بحياتي
وقف ابوه وقال : انت ملاحظ انو تصرفاتك طبيعية
معتصم : يمكن اكتر مرة بكون طبيعي ... خلص انا قررت اخطب واتزوج هيك من الباب للطاقة ... شفنا الحب والعشرة شو طلع منهن
ابوه : ابني معك حق بس اتروى شوي مابصير العجلة بهيك امور
معتصم : مشي الحال استعجلت والجماعة هلق ناطرينا
وقفت امو : لك اي جماعة ومن هنن اصلا هالجماعة لك ع القليلة حطنا بالصورة
معتصم : ماصرلي مجال غير اليوم
~~~~~~~~~~~•
ببيت بسيط وبيوحي على الفقر بس كان مرتب ونضيف والاثاث حلو وانتيكا
قاعدة ام جورج على احد الكنب وصوت غفران من جوا المطبخ : خالتي وين الفناجين
قامت ام جورج لعندها وقالت : الله يوفقك يابنتي روحي انت اقعدي وانا بعمل القهوة
غفران : بس انت بعدك تعبانة
اج جورج : ولا يهمك انا صرت منيحة ومن بكرا رح ارجع ع الفيلا
غفران : الله يقويكي يارب ... طيب انت اعمليها وانا بضيفها لانو مو زيادة بعرف اعمل قهوة
ام جورج : ولا يهمك بس كم شخص بدو يجي
غفران : مابعرف بس مابظن حدا يجي معو
ام جورج : معقول
غفران : اي معقول ... يعني عيلة معروفة بالبلد والهن قدرن وقيمتهن يجو يخطبو لأبنن وحدة مو معروف اصلها من فصلها
ام جورج : طيب يابنتي ليش حطيتي حالك بهل الموقف
غفران : بدي اتسلى واطلع من هالجو ... ع القليلة ليجي بابا وشوفو خلص بدي حط حد لهل القصة لسه مافي شغل ومافي طلعة ولا فوتة انا عم اختنق وهو عم يتسرمح من مكان لمكان
ام جورج : من خوفو عليكي
غفران : خايف علي يجي يقعد معي يوجهني ... قلي خليكي بالبيت هالفترة ولاتطلعي لحتى اجي بنحكي هيك قلي اخر مرة حكيتو فيها ... وانا بعرف روحات بابا مارح يرجع قبل شهرين تلاتة ... وانا خلال شهر زمان بكون فتت بلعبة هالدكتور ومضيت وقت
~~~~~~~~~~~~•
البيت ضاجج والغانم يلي عم يعطي نصيحة ويقنع معتصم بانو الشي يلي عم يعملو غلط
معتصم : خلصتووووو
عم الهدوء والصمت
معتصم : انا رايح ... مين بحب يجي معي
محدا رد
معتصم : بالاذن
~~~~~~~~~~~~~•
عامم الصمت غفران عم تهز برجليها وام جورج ساكتة وعم تهز براسها بعدم حيلة ليقطع صمتن دقت الباب
وقامت غفران وروح المغامرة عم ترقص جواتها .. كانت لابسة فستان بسيط بتعريقة ورد خفيفة ومكياج خفيف ومناسب لاالوان الفستان
فتحت والابتسامة ع وجها وهو قابلها بابتسامة مجاملة
حكت بخجل مبتكر : اهلا وسهلا
معتصم : فيكي
القت نظرة لوراه وكان فاضي (بقلبها:توقعت محدا يجي وهالشي رح يخلي هاللعبة احلا)
غفران : لحالك ؟!
معتصم : هو بصراحة
غفران : خلص لا تكمل كلشي صار بسرعة ومن الطبيعي مايتفهمو
معتصم : شكرا لتفهمك .. بتمنى مايكون في احراج
غفران : لا تاكل هم انا وخالتي مابندور عهي الامور .. شكليات مو اكتر
دخل واعطاها البوكيه الورد يلي كان حاملو ودخلو سوى سلم ع ام جورج وقعد مرتبك ومتردد وصار ينقل نظرو ع ارجاء البيت البيسط الصغير كتير
ام جورج : اهلين دكتور .. لا تواخذنا البيت مو قد المقام
معتصم : لا ابدا ... بالعكس البيت باهلو ... بس شي جديد علي لا تواخذوني
ام جورج : ولا يهمك
معتصم : طمنيني كيف صرتي
ام جورج : بألف خير ... وكلو بفضلك بعد فضل رب العالمين
معتصم : لا تحكي هيك انا عملت واجبي
ام جورج : غفران بنتي قومي جيبي القهوة
جابت القهوة وضيفتها وقعدو شوي الصمت سيد الموقف والوضع بلش يتوتر
وأخيرا كسر الصمت معتصم وحكي : خالة انا حابب اطلب ايد غفران من حضرتك
ام جورج : غفران حكتلي القصة كاملة .. والقرار الاول والاخير الها واذا هية موافقة انا ماعندي مانع ..
غفران :(بخجل مبتكر ومع فرك ايدها ببعضن لثوني معدودة ) وانا موافقة
معتصم : بدي اعتذر منك خالة ؟؟
غفران : ريحانة
معتصم : خالة ريحانة ... بخصوص اهلي
ام جورج : بصراحة كان بدي اسألك
معتصم : صار عنا شوية ظروف وانا رح احكيها لغفران
ام جورج : ولا يهمك .. المهم انكن متفقين
هز براسو وكمان ساد الصمت
ام جورج : انا صار وقت الدوا تبعي .. ابني خود راحتك البيت بيتك واتفق انت وغفران ع التفاصيل
تركتن وفاتت ع احد الغرف
حكي معتصم وكانو تندم على هالخطوة يلي خطاها : غفران عدم جية اهلي بخلي موقفن واضح .. انا عم قلك هيك مشان لقدام ماتقولي ماقلتلك
غفران : انا بمجرد انو وافقت على عرضك وافقت على شي مجهول ومافتت بالتفاصيل لانو عرفانة انو ناطريني شغلات كتير
معتصم : غفران انا ماجبرتك ولا تعتبري العملية باب لأضغط عليكي فيه .. فيكي تنسحبي بأي وقت ونحنا لساتنا ع البر
غفران : وانا ما وافقت عشان العملية .. كان فيني دبر المبلغ من اي مكان عنا معارف كتير بس وافقت لسبب تاني
معتصم : شو هو السبب
غفران : ليك دكتور انت عندك سبب مجهول وما احكيتلي اياه لزواجك مني مزبوط ولا لأ
سكت شوي وبعدين حكي : مزبوط
غفران : وانا مارح قلك شو هو لانو انا كمان عندي سبب مجهول بخليني وافق على هالزواج
معتصم :.....
غفران: بهيك بنكون متعادلين ... انا وافقت على عرضك المجهول ومارح اسالك على اي شي يعني لا تاكل هم اي شي
اخدت فنجان القهوة قربتو من تمها وحكت: اشرب قهوتك هلق بتبرد .. واذا بتحب نحكي بالتفاصيل
ارتاح نوعا ما لحكيها ... هو مابدو يربطها فيه بشكل جدي ... كان بدو هالخطوة وبنفس الوقت كان خايف يظلمها بس طمنتو بحكيها وبنفس الوقت حسها ذكية ومتفهمة
تنهد واخد فنجان القهوة رشف منو رشفة وقال : حبيت يلي احكيته ورح احكي بكل صراحة .. انا بدي كتب الكتاب والعرس بنفس اليوم والخميس الجاي كمان
لفت رجل على رجل بثقة وردت شعراتها لورا وحكت بحفلة ولا ع الديق
معتصم : ع الديق
غفران : وانا كنت عم قول هيك
معتصم : وبخصوص المهر
غفران : اكتب يلي بدك اياه مابتهمني المصاري
غفران : بس بشرط
معتصم : شو هو
غفران :كتاب براني ومايتسجل بالمحكمة
معتصم : مستغرب بصراحة
غفران : قلتلك عندي اسبابي ... خلص شيخ وتنين شهود
معتصم : متل مابدك
غفران : وين بدنا نسكن
معتصم : عندي بيت جاهز وماناقصو شي
غفران : وبيت اهلك
معتصم ؛ كيف يعني
غفران : ببيتك لحالنا مو هيك
معتصم : اي
غفران : مابدي .. انا هربانة من الوحدة
معتصم : عفوا
غفران : قصدي خالتي بتروح ع الشغل وانا بضل لحالي وهلق رح ضل اغلب وقتي بالبيت ماهيك ... مشان هيك خلينا نسكن مع اهلك
معتصم : بس يمكن ماترتاحي ،من شوي عم احكيلك انو يمكن مايوافقو
غفران: ولا يهمك بدبر حالي بس لحالي مابسكن .. بدي شوف ناس واقعد معن
معتصم : طيب ماشي .. بس ماسالتك خالتك شو بتشتغل
غفران : خدامة
معتصم تشردق بالقهوة : عنجد
غفران :هههه صحة دكتور ، اي عنجد
معتصم :وانت
غفران : اوقات بروح بساعدها ..
معتصم : عند حدا معين ولا حسب وين في شغل
غفران : لا عند عيلة وحدة .. جماعة مهمين وعندن بيت كبير ايام بروح معها وايام بضل هون بشتغل بالبيت
معتصم : عفكرة انا ماتعرفت عليكي مزبوط ولا بعرف قصتك
غفران : عفكرة وانا كمان
معتصم : طيب بلشي من عندك
غفران : اممم ....... انا ماما توفت ومن انا صغيرة وخالتي ربتني واهتمت فيني
قاطعها وقال :وابوكي
غفران: بابا عايش بس مابيثبت بشغلة وين بلاقي شغل بروح عليه ومابشوفو غير بالسنة كم مرة
معتصم : وبيصرف عليكي
غفران : اوقات
معتصم : طيب كيف بدك تتزوجي بدون علمو .. انا فكرت ماعندك اب
غفران : لحتى لاقيه بخبرو لا تاكل هم مابيزعل
معتصم : عيلة غريبة
غفران : ههههه
معتصم : شو دارسة
غفران : مادرست ... وصلت للتاسع ووقفت
معتصم : لي ماكملتي
غفران : مابعرف .. ماحبيت الدراسة ومحدا شجعني كمل
معتصم: ممكن سؤال
غفران : اكيد
معتصم : حلوة ريحة العطر من وين جايبتيها
غفران : بنت الجماعة يلي بتشتغل عندن خالتي عطتني اياه
معتصم : انا قلت هيك ريحة ما ممكن تكون بالسوق .. اكيد مستوردة
غفران : اي معك حق كل عطوراتها من برا
شوي حسها فهمانة وشوي تاني حسها انو بتفرق عنو كتير .. هية خدامة وهو دكتور ... مامعها شهادات وهو معو دكتورا ... حس انو عيلتها متفكك وهو عيلة متماسكة وكلن ايد وحدة غير بيت عمو طبعا
غفران : وين شردت
معتصم : ااااه
غفران : احكيلي عنك
رفع ايدو وشاف الساعة وقال : انا اتأخرت عندي مناوبة ... خلص بتبقي بتتعرفي علي لما تصيري عندي
غفران : مو مشكلة
معتصم : فاضية بكرا
غفران : لي
معتصم : ننزل ع السوق نجيب شوية غراض الك .. يعني كنوع من الجهاز
غفران : اذا بدك انا بنزل لحالي
معتصم : اااه لا ... بكرا بننزل لعند محل كتير مرتب امي واختي بجيبو من عندو
ضحكت بداخلها وقالت : ماعاجبو لباسي هه
غفران : بنبقى على اتصال
معتصم : بالاذن
طلع وهو مشتت حاسس بالندم والعجلة .. وبنفس الوقت بدو هي الخطوة لحتى يقهر سارة
فاتت ع ام جورج لقتها قاعدة على تختها وعم تتجهز للنوم
ارتكت على الباب وكتفت اديها : اسمعتي
ام جورج : اسمعت
غفران : حسيتو متردد
ام جورج : يمكن حس انو استعجل
غفران : لو حكي كنت نهيت هي القصة يعني حسيتو بحاحة هالخطوة ومن ناحية تانية يمكن ماني عاجبتو معقول ؟
ام جورج : يصحلو
غفران : هلق انا عم احكي عن غفران الخدامة
ام جورج : طيب بعدين بدك تعرفيه عن حالك
غفران : مابعرف .. انعديت منو وصرت متشتتة
ام جورج : هههههه
غفران : انا رايحة عالفيلا تجي معي
ام جورج : لا رح نام اليوم ببيتي وبكرا باذن الله بتلاقيني عم فيقك لحتى تفطري
غفران : ما انحرم منك يارب ... رح خلي شوفير مع سيارة تحت واذا احتجتي شي بأتصال بكون عندك
ام جورج : ان شاء الله مابحتاج شي غير سلامتك
طلعت من بيتها الارضي بداخل بناية قديمة وركبت سيارتها المراسيدس السودة وانطلقت فيها
~~~~~~~~~~~•
دخل على بيتو وكان الكل بحالة استنفار وبانتظارو
واول مادخل اجت عينو بعين امو يلي قاعدة عم تهز برجلها
معتصم : مسالخير
امو : وين كنت
معتصم : ماقلتلكن وين كنت
صبية ومبين انها اختو : عنجد كنت عم تخطب.
معتصم :والله .. بشو احلفلكن لحتى تصدقو
ابوه : انت واعي على حالك
معتصم : لأيمت بدي ضل عم انطر سارة خانم ... او انطرك انت واخوك لحتى تتصالحو .. انا خلص معد بدي حدا من العيلة وبدي وحدة ولابعرفها ولابتعرفني ... ومقطوعة من شجرة .. لايكون الها ام ولا اب مشان ماتجبلي مشاكل
امو : يعني هي يلي خطبتها لا الها لا ام ولا اب
معتصم : هيك شي ..
امو : يعني انت ناوي تجلطني
معتصم : بعيد الشر عنك .. بس خلص بدي عيش حياتي بعيد عن الضغوط
ستو : بس يا حبيبي انت بتحبا لسارة .. لا تظلم حالك وتظلمها وتظلم بنت الناس
معتصم : معلش ستي انا موافق خلينا نتوجع لنفيق ... في اوقات ناس بيغما عليها وبتوقع بتعرفي كيف بفيقوها لما بيضربوها على وجها وهي نحنا خلينا نتوجع لنوعى على حالنا ... وعفكرة انا حاولت كتير مع سارة بس هية لاحقة ابوها .. وخليها لاحقتو لشوف شو رح يفيدها ... انا الموضوع عند انتهى ولا حدا يرجع يفتحلي سوالف قديمة لف ليطلع على الدرج بس وقف عند اول درجة : الخميس الجاي كتب كتابي والعرس بنفس الوقت .. واذا بدكن لاتحضرو لأنو مارح اعمل شي ع الديق انا واياها والشيخ وتنين شهود
امو : لك مين هي لحتى قبلت بهيك شروط .. اكيد جايبها من الشاارع
مارد عليهن وضل مكمل عغرفتو وترك وراه ضوضاء عارمة بين المصدق والي مو مصدق والي عم يهدد ويلي عم يتأسف
~~~~~~~~~~~~~•
الوقت المسا
صوت طلقات نارية متفرقة ... طالعة من ارجاء الفيلا عند غفران
كانت لابسة بنطلون جيشي وكنزة سودة نص كم وبأيد وحدة عم تقوس على عبواة فاضية قدامها والحرس حواليها بطريقة غير مباشرة ... كانت عم تقوس بمهارة وبدون تصويب مباشر وكانت تجيب الطلقة بنص الهدف وبأيد وحدة يعني في قوة بدنية .. وهاد بدل على تدريب مكرس وقديم
حست بصوت حدها عم يحكيها
: بنت ابوكي
التفتت عليه وكان باسل
مدت المسدس لحدا واجا واحد من الحرس اخدو وتراجع
باسل : شو وين صرتي بلعبتك
غفران : ماشية متل الرصاص
باسل : كيف يعني
غفران : الخميس كتب الكتاب والعرس
باسل : عم تحكي جد
غفران : والله
باسل : ما عأساس تلاقيلها تصريفة
غفران : قلتلو كتاب براني
باسل : غفران هاد زواج مو ولد وبنت عن يلعبو عريس وعروس
غفران : قصدك بس يتسكر الباب علينا
باسل بمسخرة وطعجة لسان : ايي بس يتسكر الباب عليكن ....
غفران : لك الزلمة شوي تانية رح يبطل ... مبين عقلو مو عندي خالص ... وخلص لا تاكل هم اذا حاول يتمادى بفرجيه قيمتو
باسل :هههههه شو التهمة عم يتحرش بمرتو
غفران : لك مارح يصير شي ... مانو هيك
باسل : والله مابعرف وين بدو يودينا جنانك ... الله يستر ومايعرف خالي
غفران : انت لا تفتح تمك مابيعرف
باسل : بس لحطك بالصورة انو انت حتى لو زورتي هويتك بيوقع الزواج
غفران : عنجد
باسل : والله لأنو الشغلة شفهة وسمعية يعني اذا قلك هل تقبلين الزواج مني وانت رديتي انا قبلت.. فتصيري مرتو بشرع ربنا
غفران : يعني ؟؟
باسل : يعني بتصير عزمتو .. ولا تنسي لما تخلصي لعبتك خليه ينطق الطلاق
غفران : مممم ... تشرب شي
باسل : اي تهربي ... قهوة
غفران : بتعرف تعمل
باسل : كنت شربتها مع مرتي
غفران: لكن انقلع لعندها
باسل : تصبحي على خير
غفران : وانت من اهلو
راح باسل وهية ندهت لواحد من الحرس :روح ع اقرب ماركت جبلي ايس كوفي (قهوة باردة)
الحارس : حاضر
~~~~~~~~~~~~~•
تاني يوم الوقت قريب الضهر
باحدى المولات فاتو معتصم وغفران لأحد المحلات الكبيرة للملابس وبنفس الوقت مافي عليه زحمة
معتصم : هون بتلاقي كل طلباتك
تركتو وبخطوات هادية دخلت تتفقد التياب المعلقين ... كانو حلوين وانيقين ومابيختلفو ابدا عن تيابها بالحقيقة... اخدت كم فستان والتفتت حواليها ندهت لبنت تجي تحملن عنها ومشت ... والبنت مشت وراها
وهو شارد فيها ومبين من حركاتها وميشيتها مانها هديك البنت الفقيرة... بس مجرد شكوك ما اكتر ترك المحل وطلع يستريح بكافيه جنب المحل
غفران عم تحكي حالها : اول مرة بتسوق هون بالبلد طول عمري جيب تيابي من برا ... بس والله في شغلات حلوة
البنت يلي وراها بتهكم وبصوت واطي : اي واضح (نظرا لتيابها )
وفي حدا الي بيشتغلو من المحل شب ولما شاف معتصم طلع قرب منها
الشب : يا انسة الشب تركك وطلع انت متأكدة انك جاي معو
غفران : نعمم
الشب: يا اما هو مانو معك بالاساس يا اما تركك وطلع ... وبالحالتين هاد المحل ماقدرتك تلبسي منو
غفران : انت هلق شوبدك
الشب :تتركي كلشي من ايدك واذا بدك تكملي تروحي تندهيلو
غفران : مشكلتك الدفع يعني
الشب : اي طبعا وبنفس الوقت هاد المحل الو اسمو الكبير بالسوق .. ولما تجي وحدة من سيدات المجتمع المخملي عم تشوف وحدة بهيك لبس عم تشتري من هون مارح تقبل وتترك المحل وتطلع
بقبض وحدة كانت ماسكة رقبتو وقلبتو ع الطاولة يلي وراه
غفران : رجاع سمعني شو قلت
خنق ووجهو احمر وعم يحاول يفلت حالو من قبضتها .. وتجمعوا يلي كانو بالمحل بس ولا واحد قدر يفلت عنقو من قبضتها
بس بالاخير تركتو وقعد بالارض ياخد نفس
غفران : ان شاء الله بتفكر انو انا بنزل مستوايي وفوت عهيك محلات ... دخلو شبين لابسين اسود بأسود ووقفو وراها
شو القصة ستنا
غفران : انتو شو عم تعملوو هون
: حسينا في مشكلة
غفران : لا لا انتو شو عم تعملو ورايي
: نحنا موصينا المعلم مانفارق ظلك ولا لحظة
قطعت عمال المحل وراحت معن عجنب وحكتن: ومن ايمت انتو بترافقوني
: على طول بس مابتنتبهي علينا
غفران : ويلي عم اعملو عم يوصل لبابا
: لسه ماخبارناه بشي
غفران : لكن مابتخبروه ... انتو شغلتكن تحموني ماتنقلو اخباري صح
: هزو براسن
غفران : لكن روحو قبل مايجي الدكتور ويشوفكن
هزو براسن وتراجعوا وطلعو من المحل وهية كملت تبضع واشترت كتير شغلات ولما اجا ع المحاسبة حكت : هاد ماعطاني مصاري مشان حاسب ... يلله رح حاسب من كرتي
حاسبت وفاتت ع كافتيرا ودخلت ع الحمام فورا بدلت تيابها لبنطلون اسود وفوقو قميص بلون البيج حرير ونوعو فضفاض شوي ورفعت شعرها بربطة شعر بلون القميص وسكربينة عالية سودة ورجعت لستايلها الاساسي مع جزدان اسود جلد وطلعت تتمختر وانظار الكل توجهت عليها كانت حلوة وملفتة كانت ناوية تطلع من المحل بس انتبهت انو معتصم موجود بنفس المكان قاعد عم يشرب قهوتو وعم يتصفح موبايلو
قربت منو مع ابتسامة وقالت بتسمحلي اقعد
رفع نظرو وتفاجئ فيها
معتصم : هي انت ؟
غفران: حبيت البس شي من يلي اشتريتو .. عفكرة المحل يلي اخدتني عليه عندو كتير شغلات حلوة
معتصم : وحتى انت زوقك حلو
غفران : شكرا هاد من زوقك
معتصم : تشربي شي
غفران: قهوة اذا بتريد
~~~~~~~~~~~~•
بعد يومين
كان نازل مستعجل وبايدو مفاتيح سيارتو ليوقفو ابوه
عمر : معتصم
وقف وانتبهلو نزل وراه
معتصم : صباح الخير بابا
عمر : صباح النور ... اليوم اعمل حسابك تجي بكير ع العشا
معتصم : في شي
_ : انا وعمك خالد تصالحنا واليوم العشا عشرف هالمناسبة
معتصم انصدم نوعا ما بس سرعان ماحكي : اي مبروك ... ان شاء الله بجي بكير
_: عم خبرك مشان تنهي مهزلتك وترجع لحياتك ولخطيبتك
معتصم : انا لعبة بين اديكن وقت بدكن اترك ووقت بدكن ارجع لحياتي طبيعي
_ : شو يعني حكيك
معتصم : انا فكرت كتير منيح بموضع سارة وخلص ... كان لازم تترك الكل وتوقف جنبي بس خيبت ظني كتير فيها ومستحيل ترجع علاقتنا متل اول
_: اذا عشان حصتك بالمشفى فهاد كان اختبار الك من عمك
معتصم : بلله شوو لأنو انا مبارح تعرفو علي لحتى عم يختبرني .. ماني ابن اخوه يلي ربي بيناتكن ... بس هو واحد طماع وكل هالمشاكل سببها طمعو وجشعو
ا_: معتصم خرااااس ... لا تنسى انو اخي
معتصم :اي الله لايفرقكن بس انا خلص لا حدا يقرب مني
_ : وبنت عمك وخطيبتك
معتصم : ماصار شي بنفسخ
_ : بنت عمك من زمان محجوزة الك هيك بدك تتركها .. مين بدو ياخدها وهية معك ومن انتو صغار
معتصم : مو شغلتي
احمد : معتصممم
معتصم : لسه دوبك عم تهدد معتصم ومعتصم ... خليني اخد موقف وفرجيكن انو انا عم احكي جد ومو مزحة او لعبة .. حاج حاطيني ع الرف وحياتي ومشاعري اخر اهتمامتكن ... من كم يوم كان بدك اياني تركها واليوم صارت بنت عمي ومكتوبي على اسمي
ترك ابوه وطلع .. كان عندو علم بموضوع الصلحة كانت امو تلملحو مبارح .. وهي الليلة ما نام وقضاها تفكير ووصل لقرار انو لازم يعمل خطوة جدية ويفرجيهن انو بيقدر يحدد حياتو .. حاج قضى عمرو مسالم وما يزعلن .. اندعس على قلبو اكتر من مرة بسبب المشاكل يلي بين ابوه وعمو يلي عطول دايرة
~~~~~~~~~~~•
واقف عشباك عيادتو واديه بجيابو وقال : هي هية كل القصة
صوت من وراه : لحد هون كتير تمام عملت كتير منيح ... ويمكن لو ماعملت هيك كانو استمرو بالخلاف ... بس نصيحة الي ارجع عن قرارك .. وارجع لسارة وكمل حياتك اكيد عرفت شو عملت ماهيك
معتصم : اي وهرتني اتصالات ورسائل ع هية ندامة وبتحبني وكتير حكي
رفيقو : شايف ... خلص صارو يحسبولك حساب ... ارجع وكمل مع حب حياتك ... وشوبدك بهيك فوتة تتزوج وحدة مانو معروف عنها شي ولا من مستواك وعحسب ماحكيتلي انها غريبة شوي .. وبقلك المتل يلي بتعرفو احسن من يلي بتتعرف عليه ... مانك قد هالفوتة ولساتك بالاول احسن ماتتورط ... يعني وحدة غريبة ورح تفوتها عبيتك .. ياريت عبيتك لأ عبيت العيلة
معتصم : خلص وانت قلتلا رح اتصل فيها وانهي هالقصة من اولها ... بس سارة بدي ربيها عمهلي
: اعمل يلي بريحك المهم تخلص من الورطة يلي انت فيها
رن تلفونو وكانت امو
معتصم : الو
امو : كيفك حبيبي
معتصم : الحمد لله
امو : امي بدك تجي ع العشا اليوم
معتصم : مابعرف عم فكر
امو : الله يرضى عليك تعال وخلينا ننسى كل القصص القديمة ونفتح صفحة جديدة
معتصم : خلص متل مابدك بصير .. مابتكوني غير رضيانة
امو : الله يرضى عليك .. يلله مابدي عطلك
معتصم : لا مافي شي عندي رأفت
امو : اي منيح سلميلي عليه
معتصم : وصل
سكر الموبايل ورماه ع الطاولة وقال: بتسلم عليك
رأفت : الله يسلمك ويسلمها .. يلله انا صار لازم روح
معتصم : ماشي الله معك
~~~~~~~~~~~•
عم تتفتل بالفيلا والملل رح يقتلها ... ومعها التلفون كل شوي تتفقدو ... صرلو يومين ماحكاها ... معقول تراجع ومعد بدو اياها ... بس هية لا حبتو ولا تعلقت فيه بس بدها تعيش شوية مغامرة ... نفخت بضجر ليرن تلفونها
قربتو لقدام وجها فورا .. لتنزرع علامات الخيبة على وجها
غفران : اهلين بابا
اشرف : كيفك حبيبتي
غفران : رح طق من الملل .. باباب بترجاك تعا طالعني من الحالة يلي انا فيها والله رح افقع
اشرف : ماعم تطلعي تتسلي
غفران : وين بدي اطلع وانا مابعرف حدا غير عمتي وابنها ومرتو ...
اشرف : خلص هانت انا رح اجي عن قريب
غفران : شقد يعني قريب
اشرف : والله مابعرف ... بنتي انا وضعي صعب هالفترة
غفران : طيب حطني بالصورة ... لاتخليني اتخبط بالمجهول
اشرف : والله حاسس فيكي وانك حابة تشتغلي بس هلق الاوضاع مو ظابطة
غفران : قلي شو هية
اشرف : نفس قصة الرسائل
غفران: اجا شي غيرهن
اشرف :لا ... بس الاحتياط واجب
اشرف : عم دبرلك سفرة برات البلد ومانرجع عليها ابدا بس عم خطط لشي وان شاء الله يظبط
غفران : طيب ماشي الله يسمع منك
اشرف : وهلق بتوصيني بشي
غفران : لا سلم ع طنط
اشرف : بيوصل ... الله معك حبيبتي
سكرت من ابوها بحيرة وافكار جديدة صارت تتخبط براسها ليرن التلفون وهالمرة من معتصم
غفران : الو
معتصم : كيفك
غفران : الحمد لله
معتصم : فاضية عند العصر
غفران : في شي
معتصم : اي شي مهم
غفران : ماشي حدد المكان وابعتلي
سكرت وراحت قعدت على الكنبة وقالت : هه رح يخلص هالمسلسل قبل مايبلش .... يلله احسن ماكنت مرتاحة لكل هالسالفة
~~~~~~~~~~~~~•
قاعدة بالكافيه وعم تقلب بموبايلها ركزت بالساعة وحكت : هاد كتير اتأخر
سمعت حدا عم يبسبس جنبها .. رفعت نظرها لمكان الصوت وكانو تنين شباب عم يبسبسو
: بست ياحلوو ... شو ليش لحالك
طنشت وماردت
: يا قمرر ... لك كيف مخلي هالحلو ينطر ... اكيد واحد بلا زوق
بلشت تعصب وتهز برجلها منو من التاخير ومابتحب الانتظار ومنو من الازعاج يلي عم يجيها من هدول الشبين
: والله بيلبقلك التقل
: والله مابصير تضلي كل هالوقت لحالك تعي شاركينا ومابتندمي
: ااااخ لو اعرف مين ناطرة ... بس مين ماكان والله قليل زووق
غفران وصلت معها للحد وحكت : محدا قليل زووق غيركن بدك تسكر تمك انت واياه ولا اجي وانا سكرن
: اذا بشي بوسة ليش لأ تعي ياعمري وماتاكليه للهم عقولت الجبل
ضربت اديها على الطاولة ووقفت ،في عكل طاولة منفضة سجاير بتجي من الرخام .. حملتها وصوبتها على اول واحد ونسفتو فيها ... وهية سيد من صوب كانت جاي بنص جبهتو .. مالحق التاني يقوم الا كانت شايلة كرسي وضربتو ع راسو من ورا نزل طب على الطاولة
صارو يتلوى من الوجع
غفران : شو معد سمعتلكن حس ... كملوو شو كنتو تقولو تجمعو كلشي بالكافيه عليهن وصاحب المحل عم يسأل شوفيي شووو صاااير
غفران : ناس وسخة وبدهاا تربااية
صاحب المحل : اتصلوو بالشرطة ... انا بدي حصل حقي وحق الاضرار
غفران : حصلو منهن لهل الزعران
صاحب المحل : اذا هنن زعراان انت شوو
غفران : كسارة روسن .. اتصلو بالشرطة شوو ناطريين
صوت معتصم : انا بدفع الاضرار
التفتت عليه لتتفاجئ
معتصم يلقي نظرة على الشباب يلي بالارض ونظرة عليها ومصدوم وبنفس الوقت بدو يطلعو من هالجو
غفران : مافهمت ليش لحتى تدفع انت ... هنن وغصب عنن بدن يدفعو
معتصم : خلصينا انا بدفع وخلينا نطلع من هون
غفران : اذا بتدفع ماتلوم الا حالك ... وبعدين وين الاضرار عم تكذب انت التاني كلها منفضة وكرسي
صاحب المحل : والناس يلي طلعت بدون ماتدفع
غفران : لما بدك تلفي مين ماكان عمحلك المحترم هيك بدا تكون النتايج
معتصم : انا بدفع وخلينا نطلع من هالسالفة
غفران : انت لا تدخل .. بعدين كل الحق عليك لو مانطرتك كل هالوقت ماكانو انقبرو تمادو معي
معتصم ؛ وانت ماقصرتي خلينا نطلع من هون اذا سمحتي
سبقتو ومعتصم حط مبلغ بأيد صاحب المحل وطلعو لبرا
كانت سابقتو وعم تمشي وعم تبربر اااخ لو تركوني عليهن كنت ربيت البلد فيهن
معتصم : غفراان ... ياغفرااان
كتفت اديها وبرمت لعندو : نعمم
معتصم : ممكن تهدي
غفران : بعدين انت ليش لهل الدرجة مسالم .. مانك مجبور تدفع لحداا
معتصم : شوبدك يعني روح اضربن ليش مخلي فيهن شي صاغ .. وبعدين ما كلشي بينحل بالعصبية في شغلات بتنحل بالعقل ومابدي نتجرص عشي تافه
غفران : بتقوم بتدفع انت
معتصم : اي بدفع وبطلع بكامل رتابتي
غفران : اي بنعتذر حضرة الدكتور عكل حال رح رجعلك المصاري يلي دفعتن
معتصم : مو محرزين لا تفكري فيهن
غفران : حتى والو .. مانك مجبور انا يلي خربت وانا يلي بصلح
معتصم : خلصنا بقا سكري ع السيري .. وبعدين من وين بدك تدفعي
غفران : بلله شوو ... ما تسأل حالك هالسؤال لما فوتتني ع ارقى محلات السوق لأشتري شي يليق بعائلتك الكريمة ورحت مين دفع يا حزرك
معتصم مصدوم وماحكي
غفران : ماني عم قلك مشان المصاري بس مشان تعرف انو ماني بحاجة مصاريك .. صح وضعنا عقدو بس بعمل حساب لكلشي
معتصم : والله راح عن بالي حقك علي وكلو رح يرجعلك... عنجد لا تواخذيني ... طيب انت ماتحكي
غفران : خلص انسى القصة.. انا ماعم قلك كرمال المصاري ... واصلا انا توترت شوي وهدول كملوها معي وجيت انت تصرفت بهدوء ... مابحب انا هيك
معصتم : لك لحظة شوي انت كيف قتلتيهن لهودل
غفران : كمان منيح انك تذكرت تسأل
معتصم : ههههه والله انك غريبة الاطوار وكل يوم عم اتفاجئ فيكي بشغلات ماكنت متخيلها
غفران: عكل حال انت ليش طلبت تشوفني ... بدك ننهي هالقصة مو هيك
معتصم رجع لطبيعتو : شو يلي خلاكي تحكي هالحكي
غفران : احساسي
معتصم : عنجد انك غريبة
غفران : لا تغير الموضوع ..شو قلي
معتصم : ..