رواية شهر زمان
الفصل الثامن8
بقلم مريم اليوسف
بعد عدة ايام
طالعة غفران من غرفتها ومجهزة حالها للطلعة
ابوها لما شافها قام لعندها وفتحلا ايديه وهية ضمتو وتغلغلت بحضنو
اشرف: وين رايحة بنتي الحلوة
غفران ؛ شوف امور الشركة مع زياد
اشرف: مابدك تحكيلي شو كان صاير معك
غفران : ليش ماعم تصدق انو مافيني شي
اشرف ؛ احساسي مابخيب اتجاهك
غفران ؛ ياعمري انت الله لايحرمني منك
طلعت فادية من المطبخ معها صينية عليها قهوة كانت حالتها تعبانة والاسود بكل لباسها
لما شافتن ضامين بعض ماعجبها وكملت على الصالون
فادية ؛ حبيبي تشرب قهوة
اشرف: بدي روح اشربها مع اختي
فادية ؛ اي ماشي وانت غفران
غفران ؛ طالعة صحة وهنا ،بابا وصلك بطريقي
اشرف : لا الشوفير رح يكون معي
فادية : اشرف مافي اخبار عن اخي
اشرف: للأسف لأ ،انت ماعرفتي من مرتو شي
فادية ؛ مابتعرف شي خطفوها يومين وتركوها وقال عاملوها احسن معاملة بس لا عرفت مين هدول ولا شوبدن منها
غفران : حتى باسل ماقدر يعرف شي او يوصل لأي شي
اشرف ؛ بس ليش خطفوهن وتركوهن
غفران : الله اعلم .. يلا انا سلاام
~~~~~~~~~~•
داخل من باب المشفى ومعو شنتو الطبية ليتلقى برأفت عند الرسبشن
رأفت مستغرب : معتصم !! شو عم تعمل هون
معتصم ؛ جاي على شغلي
رأفت ؛ مارحت شهر عسل
معتصم ؛ لا سارة عندها امتحانات ومافينا نسافر حالياً،بعدين هيك شو هالاستقبال
قرب منو وضمو وقال : والله نور المشفى
معتصم ؛ منور بوجودك تسلم
رأفت ؛ قبل ماتغوص بالشغل تعا نشرب قهوة
معتصم : اوك
راحو على الكافيه يلي بالمشفى وطلبو قهوة
رأفت : طيب ليش ما اجلتو العرس لشي اجازة
معتصم :اهلنا استعجلوا خافوا يصير شي وتتفركش
رأفت ؛ فيها وجهة نظر ، هات احكيلي ايو احلى ايام العزوبية ولا القفص الزوجي
معتصم بضحكة جانبية : كلو اضرب من بعضو
رأفت : لا ولوو
معتصم صفن شوي وبعدها حكي بغصة : ماني مرتاح .. وكأنو مكتوب علي ما ارتاح
رأفت بلهفة على رفيقو : احكيلي شبك
معتصم : مابعرف مخنوق كتتير ،في شي كابس على صدري
رأفت : بسم الله عليك,طيب مابتعرف من شو
مارد
رافت : معتصم احكي اي شي انا رفيقك بفديك بروحي
معتصم : غفران
رأفت : شبها
معتصم : ماعم تروح عن بالي ،مابتمرق ثانية والا انا عم فكر فيها
رأفت : ليش
معتصم : ندمان عكلشي عملتو فيها ، مقهور عليها كتير
رأفت ؛ انت من الاول غلطت لما تزوجتها
معتصم : معك حق ، ويلي زاد الطين بله جيتها على العرس خربطتني
رأفت : اجت على العرس ؟؟
معتصم : اي اجت وباركلتي ،مدت ايدها سلمت علي ،بتعرف انو هي المرة التانية او التالتة يلي بلمس فيها ايدها ، برودة ايديها ورجفتهن وصلو لقلبي ، عم تتظاهر بالقوة ،بس شفت كسرة بعيونها ومتأكد انا سببها
عم يتسمع على رفيقو وزعلان عليه
معتصم : في شي خايف احكيه او اعترف فيه بس معد قادر اكتم هالشي بدي احكي لاي حدا بدي حدا يفهمني
رأفت ؛ احكيلي عم اسمعك
معتصم : انا بحبها
ضحك رأفت لانو فهم وضع صديقو
رأفت ؛ وسارة
معتصم : عم دور على الحب القديم بس ماعم لاقيه ، ومع سارة ولا مرة وصلت لهي المرحلة ، مو قادر حط عيني بعينها ماعم اقدر قرب عليها في حاجز كبير ،عكس غفران يلي بكلشي كنت انجذب الها ،وقت غفران كنت قاوم ماقرب منها وخلي مسافة، وهلق مع سارة عم قاوم لأقدر قرب منها
رأفت : يعني بفهم من حكيك انت وسارة مانكن منسجمين
معتصم : هلأ الوضع هادي بس مانا متل اي زوجين ، يمكن هية حاسة علي وتاركتني على راحتي
رأفت : وهيك بدو يستمر هالوضع
معتصم : عم حاول رجع حب سارة لقلبي ونبلش من جديد ماعندي غير هالخيار
رأفت : الله يهدي قلبك يا صاحبي
معتصم : تسلم ، وشكرا لانك سمعتني
رأفت : ولو يا رجل ،انا جنبك ايمت ما احتجتني
~~~~~~~~~~~•
سمير مربوط على الكرسي وتعبان بشكل كبيير
عم يحكي بيأس : مشاان الله مين انتو وشو بدكن مني
غفران عم تشوفو من فوق وكأنو شفقت على حالتو ،اتطلعت جنبها وحكت للشب نفذ يلي اتفقنا عليه
~~~~~~~~~~•
زياد بالشركة واقف مع بعض الموظفين عم يتفرجو على الشرطة كيف ساحبة كم واحد من الموظفين يلي ثبتت عليهن تهمة الاحتيال والسرقة بالاضافة لسمير يلي لساتهن عم يدورو عليه
رجع على مكتبو واتصل فيها
زياد : جاهزة تسمعي الاخبار الحلوة
غفران : هات شو عندك
زياد : خلص التحقيق وانمسك كل المشتركين بالجريمة ، بس لسه سمير
غفران ؛ يلا كلها كم ساعة وبكون عندن
زياد : شو يعني
غفران : عرفت وين مكانو ورح بلغ عنو
زياد : برافو عليكي
~~~~~~~~~~~•
قاعدة فادية لحالها بالبيت وشاردة كالعادة
اجت لعندها ام جورج : بتحبي حضرلك شي فادية خانم
فادية : لا مابدي شي
رن موبايلها مسج فتحتو واتفاجأت : بالمكتوب جهزي حالك لتلحقي اخوكي
فادية : شووو ... ياربي لا لا .. اتصلي فورا بأشرف
ام جورج : خير ياخانم شوفي
فادية بحالة هستيرية : قتلو اخي وبدن يقتلوني ...
ام جورج : طولي بالك .. واهدي
فادية ؛مابدي اهدى .. رح يقتلوني بسرعة اتصلي بأشرف
راحت ام جورج تتصل بس اشرف كان راجع من مشوارو ولما شافتو فادية ركضت عليه وضمتو
اشرف : شوفي شو القصة
فادية ؛ قتلوه لسمير وهلق بدن يقتلوني
اشرف : مافي هيك شي طوولي بالك
فادية : والله والله .. ليك الرسالة هلق بعتولي اياها
اشرف : مارح اسمح لحدا يمس شعرة منك ،رح كتر الحراسة انت بس اهدي
فادية ؛ واخي ، وينو قتلوه
اشرف ؛ مافي شي مؤكد يمكن عم يخوفكن
فادية : مين هدول وشو بدن منا
غفران : كنا نقول نفس الشي لما تجينا تهديدات ،مين هدول وشو بدن مننا
اتطلعو تنيناتن بغفران يلي دخلت ورا ابوها
غفران : لك صح نحنا مين يلي كان يهددنا يا بابا
اشرف : مو وقتو هالحكي غفران ، بدنا نعرف شو صار بسمير
غفران : سمير عند الشرطة
فادية :لقوه
غفران : لا قبضو عليه
فادية : ليش شو عامل
غفران : سرقة ونهب من الشركة
فادية ؛ لا لا اخي مابيعملها
غفران : اي لحالو مابيعملها ،بس انت واياه كتير وراد
فادية بخوف : انت انت شو عم تخبصي
غفران : ياريت يكون تخبيص بس هي الحقيقة
اشرف : شو القصة غفران
غفران : القصة يا بابا يلي كان يبعتلنا تهديدات هية طنط واخوها
فادية : لا هااد جنان نظامي
غفران : مو حكيي حكي اخوكي
فتحت موبايلها على مقطع فيديو وشغلتو
كان سمير على قعدتو وعم يعترف
سمير : اختي ورا كلشي .. هية اقنعتني ادخل على الشركة وصير اسرق منها ونحط بحسابنا
الشخص يلي عم يستجبو: كيف بدكن تسرقو بدون محدا يحس عليكن
سمير : لانو مافي حدا من اصحاب الشركة موجود
:- السبب
سمير : كانت تجيهن تهديدات وكانو مسافرين
:-مين كان يبعتلن التهديدات
سكت ومارد لاجاه كف على وجهو
سمير : نحنا نحنا
:- مين انتو
سمير: انا واختي
:- بدي تفهمني اكتر
سمير : صرنا نبعت تهديدات لأشرف ونهددو ببنتو .. وهو مشان يحميها ومحد يعرف شي عنها سافر وبعد عنها وهية منعها تقرب على الشركة مشان ماتنعرف والساحة تكون فاضية النا
:-وشو كمان
سمير :بس هيك
كمان ضربو بوكس تاني
سمير : ومشان اختي تكون هية وجوزها لحالن مابدا بنتو تكون جنبو
:-شو السبب
سمير : مابعرف .. يمكن غيرة نسوان
:-وين مخبين المصاري المسروق وشقد صار الحساب فيها
سمير: حوالي ١٠ مليون دولار .. حساب بالبنك باسم زوجي وحساب بأسمي
-: بس ليش عملت هيك اختك مزال كل مصاري اشرف تحت تصرفها
سمير : لانو اذا مات مارح تورث كلشي وكلشي رح يروح لبنتو
-: ليش ضمنانة هية انو يموت
سمير : كانت ناوية لما توصل للمبلغ يلي بدا اياه تحطلو سم وتقتلو
-: العما شووو انكن ولاد حرام
سكرت غفران الفيديو واتطلعت بفادية يلي مخطوف لونها
واشرف مصدوم وعيونو على التلفون مع انو مطفي
غفران : تفضلي طنط عندك شي تقوليه
فادية : كذذب .. والله كذذب .. اكيد تحت التعذيب خلوه يحكي هيك
غفران : بس انا فتحت تحقيق بالشركة واكتشفت انو سمير طول هالفترة عم يتلاعب ويسرق وحتى الو شركاء ،وكمان لقينا بحساب مرتو البنكي المبلغ المذكور
فادية : كذب .. هي لعبة علينا
غفران : طيب الارقام يلي كانت تجي منها الرسائل انعرف موقعها وكانت من بيت سمير
فادية ؛ كذب .. اشرف لا تصدق والله كذب .. اكيد حدا مفبرك كل القصة
تركتهن غفران وراحت فتحت الباب وكان باسل ومعو عناصر امن
ودخلت هية واياهن وقالت : بتحكي هالحكي عندن
فادية :اشرف بترجاااك اسمعني .. كذبب .. كلوو كذب .. اشرف لاتخليهن ياخدوني
قربو عناصر الامن ليجروها بس وقفن اشرف
اشرف : وقفوو
وقفو واتطلعو فيه مصدومين
اشرف ؛ اتركوها
تركوها
اشرف : احكي الحقيقة مابخليهن ياخدوكي
فادية ؛ كذب .. والله كذب
اشرف ؛ خدوها
فادية :خلص خلص بحكي
اشرف: تفضلي
قعدت ع اول كرسي منهارة ورجليها معد حملوها من الرعبة وصارت تحكي بوسط دموعها : لما تقدمتلي كنت طمعانة بالمصاري مابكذب عليك ومن الاول فايتة لحتى اقتلك واخد ورتك .. بس بوقت الخطبة بتفاجئ انو عندك بنت ورح تشاركتي بالورتة
غفران : غريب ليش مافكرتي تقتليني
فادية : فكرت .. بس اذا متي انت وابوكي ورا بعض كان ممكن فتح العين علي .. فقررت دخل سمير على الشركة ...وكان بدنا خطة نبعدكن عنها لمرة حكي اشرف انو كان يجيكن تهديدات وخطرت عبالي الفكرة .. منو بسافر وبدور العالم .. وانت بعيدة عننا وعن الشركة
غفران ؛ وكنتِ عنجد ناوية تقتلي بابا
فادية ؛ بالاول اي .. بس والله بعدين حبيتو
غفران : هاه .. والمصاري يلي عم تسرقوها
فادية : كنت حاطة احتمال انو يموت بالفعل
غفران : ماعم صدق ،لك انت مافيكي رحمة لك انت شيطاان .. طول هالسنين معيشتنا برعب .. محرومة من بابا كل هالمدة وبشوفو بالسرقة .... عم تسرقينا ... وبدك تقتلي بابا .. لك انت شووو ... اااه
انفعلت غفران وصارت تصررخ .. انت شوووو
قرب باسل وحاول يهديها
باسل : غفران اهديي
غفران : لك انا كان لازم اقتلكن وقليل يلي عملتو فيكن
باسل : ليش شو عملتي ؟؟
غفران ؛ انا يلي خطفتو لسمير لحتى لوع قلب اختو عليه متل ماكانت تعمل فينا .. وخطفت عيلتو لحتى هو يخاف عليهن .. كنت عم دوقهن من نفس الكاس يلي دوقونا منو كل هالسنين بس شو ماعملت فيهن قليل .. كان لازم اقتلن ليشفى غليلي
اشرف قعد ع اول كرسي منهار مو مصدق كلشي عم يسمعو ...
باسل : خالي شو بتأمرنا
اشرف : خدوها من وجهي
باسل : خدوها
فادية : اشررف لااا ... لااا يا اشرف
شحطوها وهية عم تستنجد
اشرف بشرود : انا اشرف عطالله ينضحك علي كل هالسنين
غفران نزلت لعندو ومسكت اديه وقالت : هنن مكارين وشياطين .. مو ذنبك .. مو ذنبك اذا كنت عم تفكر بقلبك
اشرف : سامحيني بنتي
باست راحة كفو وقالت : على شو
اشرف : انا السبب .. انا السبب يلي دخلتها على حياتنا
غفران : لا تحكي هيك .. انا مو زعلانة منك ... انا متلك كنت حبها
قام يتسند على الحيط والكنب يلي بطريقو مبين مهدود حيلو ،وغفران خافت عليه ومشت لتسندو
غفران : بابا انت منيح
اشرف : بدي ابقى لحالي
غفران ؛ بخليك لحالك بس قلي انت منيح
اشرف: منيح .. منيح
تركها ودخل على غرفة وسكر وراه
غفران : خايفة عليه
باسل ؛ مو سهل ابدا الشي يلي عرفو .. وانو انضحك عليه وهو كان من اكبر قضاة البلد
غفران: معك حق
وقف باسل قدامها واتطلع فيها بعتب : انت يلي كنت خاطفتيه
غفران : اي ، ومو ندمانة ابدا
باسل :بتعرفي هي شو جرمها
غفران ؛ مابهمني .. هي انا قدامك تفضل اعتقلني
باسل ؛ مجنونة انت .. خلص سكري على السيرة رح نكتب الخاطف ضد مجهول
غفران : وبركي فادية حكت
باسل : هية تلتهي بحالها
غفران : بدي ينزل فيهن اشد عقاب
باسل : وكلي محامي شاطر
غفران بثقة : ليش انا من شو بشكي
باسل :مابتشكي من شي، يلا انا لازم روح انتبهي على خالي
غفران : ولايهمك ..
~~~~~~~~~•
كانت متمددة على الكنبة وعم تقلب بالفيس بوك لطلع قدامها اقتراحات صداقة زياد الاشعر
لما شافتو رجف قلبها دخلت على صفتحو وصارت تتأملو كان منزل صور الو بالمحكمة وبالقصر العدل ، وبمكتبو ، حتى بصورو مبين شي مهم وناجح بعملو
ولاحظت اخر بوست كان منزلو على بروفايلو
ثُمَّ عُدتُ إلى بدايةِ الطّريق ولملَمتُ شتاتي وبقايا خَيباتي ، وعاهدتُ نَفسي لنْ أثق مجدداً 🖤.
تملكها حزن كبير ، حزن ماعم يتركها بحالها وماعم تعرف سببو ،حكت وهية عم تقنع نفسها : كمان انا كسرت قلب حدا حبني من كل قلبو اكيد ماني بلا قلب لهل الدرجة لأقدر اتخطى
اتذكرت كيف ماكان يضيع فرصة ليتقرب منها وليعبرلها عن حبو عكس معتصم يلي فوق برودو صاير بارد اكتر
نقزت ع فتحت الباب ووقع الموبايل من ايدها وفورا نزلت جابتو وطلعت فورا من بروفايل زياد وقامت تستقبل معتصم بما انو اليوم الاول الو بالشغل بعد الزواج
سارة : اهلين حبيبي (وصارت تساعدو بشلح جاكيتو واخدت الشنتة منو )
معتصم : كيفك
سارة ؛ الحمد لله
معتصم : ايمت جيتي من الجامعة
سارة : ع الضهر ، وجهزت الغدا جوعان
معتصم : اي والله
سارة : لكن غسل لبين ما اسكب الاكل
~~~~~~~~~•
عم تدق الباب
غفران : بابا ممكن ادخل
اشرف : بابا حبيبتي اتركيني لحالي
غفران : انت منيح
اشرف : اي منيح ، بس حابب ضل شوي لحالي
غفران : اوك .. بس بدي قلك انو انا يلي رح رافع عليهن ورح خليهن يتختخوا بالحبوس وانا بنتك ،ولاتزعل ع شي مضى ،المهم المستقبل نكون مع بعض مرتاحين البال انا وانت وبس ومافي حدا عم يهددنا ، انت شوف الامور من الناحية الايجابية
اشرف : رح شوفها من كل الجوانب (، خفت نبرتو ) رح شوفها من كل الجوانب
~~~~~~~~~•
عم ياكلو بهدوء
سارة ؛ عجبك الاكل
معتصم : طيب يسلم هالايدين
رجعو للصمت وبعد شوية وقت حكي معتصم
: شو اخبار زياد
لما سمعت اسمو تشردقت وصارت تسعل
معتصم : صحة صحة ، خدي اشربي مي
ناولها كاسة المي وشربت وعيونها عليه بخوف
سارة : شكرا
معتصم : العفو .. انتبهي وانت عم تاكلي
سارة : اي ، ليش عم تسأل عن زياد
معتصم ؛ كان اخر فترة ماعم يفارقك
سارة ؛ من يوم اجا ابوك لعنا وحددنا موعد العرس انتهى كلشي ومن يومها ماعد شفتو
معتصم : علاقتكن مع بعض كانت حقيقة ولا كنتو عم تمثلو علي
سارة : شو ذكرك بهل التفاصيل
معتصم : سارة ماعم اقدر اتقدم ولا خطوة في حواجز كتير عم تمنعي قرب ومنهن زياد
(عم يدور على حجج ليرمي الحق عليها )
سارة : انا سألتك شو صار بينك وبين غفران ، انا وزياد كانت علاقتنا سطحية بس انتو كنتو تنامو بنفس الغرفة وتحت سقف واحد
معتصم : ما تسألي ؟ ، اسألي حسسيني انو غرتي علي حسسيني انو انا مهم عندك
سارة : حسيت انو طلعنا بهل اللعبة تعادل انت كنت مع غفران وانا مع زياد ماكان بدي نفتح قصص مالها داعي
معتصم : كيف مالها داعي وانا كل مابحاول قرب منك عم شوفو بعيونك
سارة بدافع :لا مو صح انت المتردد
معتصم ؛ لأنو عم شوفو بعيونك
سارة : لا مو صح انا ماعم فكر فيه بالمرة بس انت الله اعلم مين في بعيونك
معتصم : مين قصدك
سارة ؛ غفران خانم مين غيرها
معتصم : لو بدي ضل معها ماكنت تركتها
بلشت تعلى اصواتهن
سارة ؛ ليش حاسستك ندمان لانك طلقتها
معتصم ؛ لأ مو ندمان ، بس عم حاول قارن بينك وبينها ، هية حاولت بكل طرقها لترضيني ،انت شو عم تعملي
سارة ؛ بدك اياني انرمي تحت رجلك لترضى معتصم بيك
معتصم : اي مو انا زوجك ،ولازم تكسبي رضاتي
سارة ؛ بالله شوو مصدق حالك والله
معتصم : ليش لأ انا رجل شرقي وبحب الاهتمام
سارة : وانا كمان بحب الاهتمام ، بادر بالاهتمام لتشوف مني اهتمام بعمرك ماشفتو
معتصم : شو هالحياة يلي لازم تدفع فيها لتاخد ,كلشي عندك بالمقابل ماتغيرتي
سارة : هلق انا هيك ؟؟
معتصم : اي هيك ونص
سارة ؛ بتعرف شو انا شبعت كول لحالك لانو مالي نفس جادلك
قامت على الغرفة وسكرت وراها وحكت : سأالله ايامك يا زياد كان بس بدو رضايي ، بقدملي روحو بدون ما اطلب ،مو هون عم يتشرط علي بدو اهتمام معتصم افندي
وعند معتصم عم يتحسر على ايام غفران : كانت تعمل حركات جنونية لتخليه يضحك ، وضلت تحاول ومايأست انها تتغير لتصير متل مابدي
~~~~~~~~~•
قدرت واخيرا غفران اتطالع ابوها من الغرفة وام جورج جهزتلن العشا
قاعدة جنبو وعم تطعميه بايدها وعم تبتسم بوجهو وعم تحاول ماتحسسو بأي شي وانو كلشي مرق ،بس الخيبة يلي متعرضلها مو قليلة
غفران : يلا ابو غفران افردها بقا والله ماحلو وانت مكشر ، بدنا نرجع على الفيلا هنيك الهوا احلى والحديقة بترد الروح ،مو هيك ام جورج
ام جورج : اي والله هنيك الجو احلى والقعدة بهل الوقت بالحديقة قدام المسبح بتنسى كل همومك
هز براسو وقال : بنروح بعد العشا
غفران عم تفتح احاديث : كيف لقيت عمتي
اشرف : متل ماهية ماعم تعرف حدا
غفران ؛ الله يكون بعونها
هز براسو
غفران : شو رأيك نطلع على البحر ،ولا قلك ننزل على النادي ، بتتذكر لما كنت تفيقني من الساعة خمسة لحتى اتمرن قبل ماروح على المدرسة ، بتعرف انو اكتر من خمس زلم مابيقدرو يوقفو قدامي ، هديك المرة في واحد لطنشي بالمطعم ومبين عنو شي كبير وعندو حراس مالك علي يمين شطحتن كلن بالارض وبعدها قمت وهربت هههه
وصارت تطلع بقصة وتفوت بقصة وهو عم يحاول ينسجم معها بس كان موجوع والوجع ماعم يقدر يلتفت لشي تاني
اشرف : دايمة
ووقف
غفران ؛ بدنا نروح على الفيلا
اشرف : لبكرا لبكرا
انسحب على الغرفة يلي كان فيها وحكت غفران : خايفة عليه كتتير
ام جورج : لاتخافي رح يتعدى هالمرحلة
غفران ؛ يااارب
شردت قدامها واتذكر يلي جرحلها قلبها وانسحبت فورا على غرفتها يمكن لتبكي براحتها
~~~~~~~~~~•
تاني يوم
معتصم بالمشفى عم يفكر بطريقة ،يبعد هالحواجز بينو وبين سارة ، مقهور لانو حط الحق عليها وعم يرمي ذنبو عليها
معتصم ؛ ماقدامي غير هالحل
اخدو ورقة من دفتر الوصفات الطبية وكتب اسم دوا عليها وختم بالختم الخاص فيه
ضب الورقة بجيبتو واخد موبايلو وبعت رسالة لسارة : كيفك حبيبتي ، بعتذر عن الشي يلي صار مبارح ،خلينا نفتح صفحة جديد من اليوم ، جهزي حالك رح نطلع نتغدا برا وبعدها رح نسهر سهرة حلوة 😘
سارة ؛ اهلين حبيبي ،اوك 😘
نفخ الهوا يلي بصدرو وقام ليشوف شغلو
~~~~~~~~~•
غفران ؛ ام جورج كلشي جاهز
ام جورج ؛ اي يابنتي خلي حدا من الشباب يجي ياخد التياب
كانو التياب مجهزين بشنتين سفر عند الباب
غفران : بابا اتأخر بالحمام ،انا رايحة شوفو
تقدمت ناح الباب وصارت تدق : بابا .. يا بابا صرنا جاهزين للأنطلاق ، خلصت ، باباا .. تغيرت نبرتها لخوف : بابااا .. باااباااا
فتحت الباب بسرعة وخوف وكان مفتوح .. فتحتو اكتر لتشوف ابوها مرمي على الارض
غفران بصوت مفزوع رج كل ارجاء المكان بااااااابااااااااااا
~~~~~~~~~•
وصل لصيدلية المشفى ومد الوصفة الطبية للصيدلانية
اتطلعت بالوصفة باستنكار
معتصم : في مشكلة
-:مافي اسم مريض
رجع سحبها وطلع قلم من جيبتو وكتب اسمو وقال : هيك منيح
-: بعتذر دكتور على التدخل بس ليش واصف لحالك هالدوا
معتصم ؛ بظن شي مابخصك
-: بس من واجبي حذرك من اعراضو ، بيعمل ادمان ،ومفعولو متل مفعول المخدرات
معتصم ؛ اوك شكرا على المعلومة وهلق ممكن تصرفيلي الدوا
-: حاضر
دخلت لجوا وطالعتو ظرف دوا وعطتو اياه
حطو بجيبة مريولو ومشي وهو عم يحكي حالو : حلو الواحد يطير شوي بهل العالم
صوت مكبرات الصوت : بدنا دكتور قلبية فورا على الطوارئ
اتطلع ع الساعة كان خالص دوامو وما اكترث للأمر لأنو في اكتر من دكتور بالمشفى قلبية
ضل مكمل على مكتبو .. بس المكبرات لساتها عم تنده : دكتور قلبية على الطورائ
ماقدر مايلبي النداء ولف بأرض وركض على الاصنصير
وصل على الطوارئ وشاف الوضع بحالة فوضى ويلي زاد الفوضى هية الحراسة
وقف وحكى ممرضة : وين المريض
الممرضة : الدكتور رأفت عندو
معتصم : شي مسؤول ؟
الممرضة : هيك الظاهر
هز براسو ولف ليرجع بس وقفو صوتها
: بااابااا ... بدي فووت لعند بابا مشان الله طمنوني عنو .. يااربي ... ياااربيي
ليتفت متل المذهول وصار يقطع بين الزحام وكأنو بغير عالم بس عم يلحق الصوت يلي انحفر بقبلو
واخيرا وصل لضالتو
كانت بحالة هستيرية رايحة جاي وتوقف على الباب الرجفة بصوتها وتصرخ بدي بااباا .. ساعدو بابا بترجاااكن
نطق بأسمها ومو مصدق عيونو : غفراان
هية كمان التفتت لما سمعت اسمها من صوتو ،لما شافتو ركضت عليه ومسكت بأيديه بتجري ، معتصم بابا .. بترجااك يا معتصم لاتخليه يموت
كان صافن فيها وحاسس قلبو مقسوم نصين عليها وعلى حالتها جسمها يلي عم ينتفض رجفة دقنها ،تلعثم حروفها ،استغاثتها فيه
غفران ؛ بترجاك يا معتصم
بعد عنها وركض فورا على الغرفة المتجمهرين قدامها
كان رأفت عم يعمل الاسعافات الاولية
والممرضين عم يزرعو اجهزة القلب على صدرو
معتصم : شو وضعو
رأفت ؛ ازمة قلبية
معتصم : عايش ؟
رأفت : اي عايش .. بس فرص الحياة كتير قليلة
قرب معتصم وبلش يساعد رأفت وفوراً جهز ابرة وحقنو اياها بالوريد باليد اليسرى
~~~~~~~~~•
شوي وطلع معتصم وقامت تعلقت فيه متل الولد الصغير
غفران : طمني عنو بترجاك .. عايش
معتصم قد ما هو متأثر بحالتها متمني يضمها ويطمنها وحكي بنبرة حنونة : اي عايش الحمد لله ،انت اهدي وروقي
اتنهدت بس ماهدت رجفتها ولاوقفو دموعها : شو وضعو ؟ هو منيح
معتصم : رح ننقلو على العناية ورح يضل تحت المراقبة ٢٤ ساعة
غفران : شو فرص النجاة
معتصم : خلي املك برب العالمين كبير
غفران بصوت مكسور : ياااارب
معتصم : امشي معي لترتاحي شوي
غفران : لا بدي ضل عند بابا
معتصم : نقلوه على العناية من الباب التاني
غفران : بدي شوفو
معتصم : تعي معي
~~~~~~•
اول ما صلو على مكتب وقفت مستنكرة : انا بدي شوفو
معتصم ؛ عم يجهزولو وضعو بالعناية ومافيكي تشوفيه فورا ، هلق بترتاحي شوي وبنقوم بنشوفو
رضخت لكلامو ودخلت معو على مكتبو
قعدة وغطت وجهها بأيدها وكملت بكا : انا السبب .. انا السبب
قعد جنبها ومرر ايدو على ضهرها عم يحاول يخفف عنها وهو لو بيطلع بأيدو ليخبيها بين اضلاعو بس عم يحاول يخلي مسافة بيناتن
معتصم : غفران اهدي ، هاد قضاء رب العالمين انت اكيد مالك سبب
غفران لساتها على وضعها : مبلى انا السبب ، ياريت ماخبرتو
كان بدو يسألها على شو واندق الباب ودخلت ممرضة ومعها ملف طبي : دكتور هاد ملف المريض
اخدو منها وراحت
اتطلع بالاسم وحكي مستغرب : اشرف عطالله بكون ابوكي ؟؟
سكنت لمدة ثواني وبعدها رفعت عيونها عليه وكأنو وعت على حالها
كرر السؤال مرة تانية : اشرف عطالله ابوكي ؟
هزت راسها بوسط دموعها
معتصم : لكن غفران احمد جلال مين ؟
غفران : كمان انا
معتصم : كيف هيك
حكت وهية شاردة قدامها : كنت عم اتسلى ، بوسط مللي وضيق خلقي عرضت علي فرصة لغوص مغامرة جنونية ، وانا قلبت عملت هوية مزورة وصار يلي صار
معتصم : ضحكتي علي ؟؟؟
غفران ؛ عأساس انت كنت صادق معي ، انت كان كل غايتك تقهر سارة وانا من اول يوم بعرف شو القصة كلها بس قلت خليني هبل بحالي ،بعدين ماوقت العتب شي مضى وراح وانت وصلت للي بدك اياه، المهم انا عندي هلق صحة بابا
وقفت لتطلع بس فجأة حست الدنيا فتلت فيها وقبل ماتوقع كان معتصم ماسكها نيمها على الكنبة ورفعلها رجليها
معتصم : غفراان .. غفراان عم تسمعيني
كانت غايبة عن الوعي
تحسس نبضها وقام بسرعة على التلفون رفعو وطلب: مي وسكر بسرعة عمكتبي
~~~~~~~~•
بلشت تفتح عيونها شوي شوي وشافتو قدامها عم يضربها ضربات خفيفة على وجها
وتوقف لما شافها فتحت عيونها
معتصم : كيفك هلق
ماردت بس كانت صافنة فيه ،
معتصم : عم تسمعيني
غمضت عيونها ورجعت فتحتهن وكانو عم تتأكد انو هو نفسو يلي قدامها
مد ايدو على خدها وحكي : غفران عم تسمعيني
هزت راسها ،بقت ايدو على خدها وابتسم لأنها ردت
معتصم : كيف ملاقية حالك
غفران : احسن
بعدت وجها عن ايدو وهو فورا سحبها واتجلست وهو ساعدها
غفران : بدي شوف بابا
معتصم : بنروح بس نتأكد انك منيحة
غفران : منيحة ،منيحة
عطاها كاسة المي والسكر شربتهن
غفران ؛ صرت منيحة بدي شوف بابا
معتصم : تفضلي معي
طلعو من المكتب وهو بكل خطوة يلتفت عليها ويرجع يتنبه قدامو
معتصم : اسمك الحقيقي غفران ؟
غفران : اي
وصلو لمكان وفيه حائط زجاجي ، وخلف الحائط ابوها نايم والاجهزة على جسمو بكل مكان والاوكسجين على وجهو
ماقدر تمنع دموعها ، صارت تلمس الزجاج بأيدها وكأنو عم تحاول تلمس ابوها وتبكي
معتصم : رح يصير منيح حاج تبكي
غفران : ماعم اقدر ، خايفة عليه كتتير ، ماضللي غيرو بهل الحياة ، خايفة اخسرو
معتصم ؛ ان شاء الله بصير منيح
رن موبايلو اخدو وشاف الاسم سكرو ورجعو على جيبتو ، بس رجع يرن
غفران بعدت عنو لياخد راحتو ويرد
~~~~~~~~~~•
قاعدة قدام المراية مخلصة لبس وناطرتو
والموبايل على ادنها لاجاها الرد : الو
سارة ؛ وينك اتأخرت
معتصم ؛ صار حالة مستعجلة
سارة ؛ طيب ايمت جاي
معتصم : يمكن ما اجي اليوم
سارة : انا رايحة لعند اهلي
معتصم : اوك
سكرت وقالت : ريحتني
قامت واخدت مفاتيحها وطلعت
~~~~~~~~~•
سكرت والتفت عليها لقاها بحضن شخص غريب ، ماتحمل المشهد وقرب لعندها بدو استفسار
غفران : حاليا منيح عم يقولو
باسل ؛ ان شاء الله بضل منيح وبصير احسن
غفران ببراءة : معقول انا السبب
باسل : لا تحكي هيك ، انت ماعملتي اي غلط هن يلي عملوا ويلي خدعوه وهو ماتحمل الخداع والهزيمة وصار يلي صار ، بس متأكد خالي رح يطلع منها من يوم يومو قوي
غفران : يااارب
معتصم : مرحبا
اتطلع باسل فيه بأستنكار وقال : اهلا
ورجع اتطلع بغفران وكانو عم يسألها شو عم تعملي هون
غفران فهمت نظراتو وحكت لتبرر : لما صار يلي صار اتصلنا بالاسعاف وجابونا لهون
معتصم مافهم عشو عم تحكي غفران وحكي : حضرتك شو بتقربو للمريض
باسل : ابن اختو ،وحضرتك الدكتور يلي عم اتابع حالتو ماهيك
معتصم ماعجبو نبرة باسل ورد : اي اذا ماعندك مانع
باسل : بصراحة اي بدنا دكتور تاني يتابع حالتو لو سمحت
معتصم : حالة المريض مابتسمح كل شوي نحطلو دكتور ،وضعو مستقر وبس يصير منيح تكرم منحط دكتور تاني ،بس مافهمت شو مشكلتك معي وانت لابتعرفني ولابعرفك
باسل : انت مابتعرفني ممكن بس انا بعرفك كتير منيح ولو سمحت تضل بعيد
غفران : باسل ماوقتو هالحكي ،بترجاك نحنا هون كرمال بابا وبس
باسل : ماشي
فهم معتصم انو باسل بيعرف بكل القصة مشان هيك قرر ينسحب
معتصم ؛ غفران انا مناوب اذا احتجتي اي شي
هزت راسها بمسايرة وراح
غفران : ليش هالانفعال عليه
باسل ؛ مابدي اياه يقرب منك بالمرة مابنسى حالتك لما جيتي من عندو ، ولا هلق لما عرف انت بنت مين قرر يهتم
غفران : لا معتصم مو هيك
باسل : اي دافعي عنو دافعي
غفران ؛ ليش هيك فهمان القصة بعدين خلص كلشي انتهى وهو عندو حياتو ،وواقف جنبي ك دكتور مو اكتر
باسل : بصير خير
اتجاهلتو وقربت اكتر من الزجاج وضمت ايدها على بعضن وهية عم تشوف ابوها يلي غايب عن الدنيا كلها
~~~~~~~~~~•
راكبة سيارتها وماشية بين العجقة لتوصل لعند اشارة وتوقف التفتت عيمينها وشافتو ، للولهة الاولى شوفتو عملتلها متل الصاعقة وبعدها صارت رجفة بكل جسمها ،
كان متريس سيارتو بكل غرور ويلي بشوفو مابقول هاد نفسو يلي لاحقها وبدو رضاها
ضلت شاردة فيه بأسف ندم ،
ضوت الاشارة خضرا وتحرك من قدام عيونها وانطلق بسيارتو وهية كمان دعست على البنزين وانطلقت
~~~~~~~•
وصلت على البيت ومالقت غير امها
ضمتها ضمة طويلة بتعب
ام سارة ؛ اهلين بالعروس
سارة ؛ هه
بعدت بنتها عنها واتطلعت فيها وقالت : شبك بنتي مانك على طبيعتك
سارة ؛ وينو بابا
امها ؛ مو هون .. تعي احكيلي شبك
سارة ؛ ماما ماني مرتاحة ،مخنوقة مكتئبة
امها : سلامتك ياعمري من شو
سارة ؛ مابعرف ، مافي شي عم يريحني كلو عم يخنقني
امها : ياعمري انا امك احكيلي فضفضي
قعدت واخدت مخدة من جنبها وضمتها بحزن وقالت : حاسة عندي فجوة كبيرة بحياتي ماما انا تعبانة
امها ؛ طيب من شو ،معتصم مو منيح معك
سارة ؛ عادي
امها : كيف يعني عادي
سارة ؛ والله مابعرف ، انو هاد هو معتصم من يوم يومو بارد
امها ؛ مزال بتعرفيه شو المشكلة
سارة ؛ ماما معتصم مابيهتم ماببادر بشي ، عم قارن بينو وبين زياد في فرق كبير
امها : هلق عرفنا شو القصة ,زياد ؟؟؟
سارة : ماعم اقدر شيلو من راسي عم فكر فيه عطول ، زعلانة عليه
امها : بس هالشي غلط ، انتبهي لحياتك مع جوزك وحب حياتك
سارة : حتى الحب يلي كنت حبو اياه عم شك فيه
امها : انت من الاول غلطتي لما اسمعتي كلام ابوكي محدا خرب حياتك الا ابوكي خسرتي معتصم اول مرة وتاني مرة لما دخل زياد على حياتك خسرتيه.. لا قادرة تكملي مع معتصم ولا قادرة تنسي زياد مو هيك
سارة : ماما شو عرفك بشو عم حس
امها : انا امك يابنتي وبفهمك من النظرة صح كنتي تحبي معتصم وهالشي كان باين عليكي بس هلق يلي بقلبك هو زياد ، كنت بدي حذرك قبل ماتتزوجي بس فكرت انها مشاعر مؤقتة اتجاهو وانت كان بدك ترجعي لمعتصم مشان هيك ماحكيت
سارة :ياريتك حكيتي يا ماما ياريت
~~~~~~~•
كانت بالاستراحة بالمشفى قاعدة بأيدها كوب قهوة ودبلانة وشاردة لبعيد وجنبها حارس
دخل زياد ولما شافها وقف شوي اتأمل حالتها كانت متغيرة كتتير بهل كم ساعة قرب وقعد جنبها : سلامتو
رفعت راسها واتطلعت عليه وقال: شكرا
زياد : ان شاء الله رح يطلع منها
غفران : ياارب
زياد : خبرني باسل كرمال مرت ابوكي واخوها قلي انت يمكن ماتقدري تاخدي القضية
غغران : اي انا خبرتو يخبرك ، كان بدي رافع قدام البابا ويشوف حالو فيني بس البابا هلق مو صحيان على شي وانا مابدي اتركو مشان هيك وكلتك هالقضية الك وانا ثقتي فيك كبيرة انك رح تجبلي حقي وحق بابا من هالمجرمين
زياد : خلص ولا يهمك رح حط كل تقلي فيها
غفران : مو عارفة كيف ردلك معروفك معي
زياد : معروف شو هاد مو نحنا شركا ولا بدك تفضي الشراكة
خلاها تبتسم غصب عنها وقالت : هه مالي غنى عنك
زياد : لكن بلاه هالعلاك ،انا قايم جيب شي ناكلو
غفران : مالي نفس لشي
زياد : لازم تاكلي وتصيري قوية مشان ابوكي لما يفيق يشوفك قدامو وانت بأحسن حالاتك
غفران : طيب هلق بعد شووي بننزل على الكافيه بنطلب شي ، هلق مالي نفس اتحرك
زياد : طيب وهي قعدة ، احكيلي شو قالو الدكاترة
غفران : بدنا ننطر ٢٤ ساعة وبعدها ببين معو
زياد : ان شاء الله رح يتخطاها انا متأكد
غفران : ياارب ، (سكتت شوي وبعدها حكت )
احزر مين دكتورو
زياد : معتصم ؟؟
هزت براسها : شو عرفك
زياد : ليكيه جاي
رفعت راسها وشافتو جاي لعندها ومعو صينية عليها كروسان وشاي ولما قرب اتفاجئ بزياد
معتصم : زياد ؟
وقفلو زياد وزورو وقال : اي . كيفك
معتصم : الحمد لله انت كيفك
زياد : بنشكر الله
معتصم : غفران جبتلك شي تاكليه
اخدت من ايدو بخجل وقالت: ليش عذبت حالك ماكان في داعي
معتصم : من اول ماجيتي ما اكلتي شي ،لازم تاكل وتضلي قوية
زياد ببرود: بتصدق كنت عم قلا نفس الشي
قعدو تلاتتهن جنب بعض غفران بالنص وزياد عيمينها ومعتصم عشمالها
معتصم : شو شايفك عنا زياد
زياد : اي جاي اطمن على شريكتي وعلى ابو شريكتي
معتصم : وعشو متشاركين
زياد : تنين محاميين في كتير شغلات يتشاركو فيها
معتصم : مين التنين ؟ غفران محامية ؟؟!!!
حست حالها بدا تضحك وقالت : اي محامية
معتصم : انو مالازم استغرب بعد كلشي صار
غفران : لازم ،في اخبار عن بابا
معتصم : وضعو مستقر ،يلا خدي كلي
ناولها كروسانة مع كاسة شاي كان عم يتعامل معها بكل رقة ولطف وزياد عم يراقبهن ويراقب غفران كيف عيونها معلقين عليه بحب
ابتسم بسخرية وماعلق
~~~~~~~~~•
عسفرة العشا
عم تتعشى سارة مع اهلها بهدوء
خالد اكل لقمة وحط الشوكة من ايدو وقال: سارة شو عم تعملي عنا
سارة ؛ بابا معتصم مناوب
خالد : كيفك انت واياه
سارة ؛ مناح الحمد لله
خالد : ماعم تحكو شي عن المشفى
سارة ؛ شي متل شو ؟؟
خالد : انو بشكل عام
سارة ؛ لا معتصم مابيفتح مواضيع الشغل بالبيت
ام سارة :في شي عم تلمحلو خالد
خالد : شي متل شو
مرتو ؛ القصص القديمة كرمال المشفى ،وحصتك بالمشفى
خالد ؛ حاليا مابدي شي ،بكفي يلي صار ،لا انا عم حصل شي ولا هن عم يتنازلو عن شي ،خلص المهم سارة مبسوطة هاد كل يلي بهمني
مرتو : منيح يلي اقتنعت
زورها ومارد
~~~~~~~~~•
قاعدة مكتفة اديها وغفيانة على قعدتها
قرب منها وصار يصحيها
معتصم: غفراان... غفران
فاقت مفزوعة : اي شووفي .. بابا منيح
معتصم : اي منيح ،ليش نايمة هون
غفران ؛ مرتاحة
معتصم : قومي جهزتلك غرفة تنامي فيها بما انك رافضة تروحي ترتاحي بالبيت
غفران : خلص لاتهكل همي مرتاحة
معتصم ؛ انت شو عم تحكي ، هم مين بدي اهكل اذا ماهكلت همك
صفنت فيه شوي وعم تحلل الحكي يلي قالو
ابتسم وقال : وين صافنة
طردت هالافكار من راسها : لا تتعلقي بالسراب يا غفران هو ماعم يفكر فيكي اصلا
غفران :ولا شي هون مرتاحة مو حابة نام بغرفة المرضى مابحس حالي رح ارتاح فيها
معتصم : طيب قومي ارتاحي بمكتبي
غفران : لا لا ، انت روح أرتاح من الصبح تعبان معنا وانا هون صدقني مرتاحة
معتصم : مارح ارتاح لشوفك مرتاحة قومي معي
غفران : خلص لكن باخد غرفة
معتصم : لا رح تنامي بالمكتب بترتاحي على الكنبة
غفران ؛ وانت
معتصم : انا عندي شغل يعني محدا رح يضايقك
غفران ؛ والله مافي داعي
معتصم : لا في داعي ، قومي يلا
قامت معو ومع قومتها مسكت راسها
معتصم : انت منيحة
غفران : دايخة شوي يمكن من النعس
معتصم : يجوز ،وكمان لاتنسي ما اكلتي الا شي خفيف اليوم
غفران : بركي بكرا بقدر اكل بعد ما اطمن عن بابا
معتصم : ان شاء الله
وصلو ع مكتبو وهية قعدت على الكنبة
معتصم : ارتاح لاتخجلي مني ولا نسيتي انو تشاركنا غرفة وحدة
فتح الخزانة وطلع منها غطا رقيق
تمددت بخجل وهو غطاها
معتصم : انا مناوب بالطوارئ فيكي ترتاحي
قرب من الضو وسكرو وقال : تصبحي على خير
غفران : وانت بخير
طلع وسكر وراه وهية نزلت دمعة غصب عنها من عيونها ،يمكن حب وحنين ، او يمكن لانو عم يهتم فيها اهتمام مؤقت .
وبعدهامن التعب راحت بنوم عميق
~~~~~~~~`•
عم تتقلب بتختها وعم تفكر شوي بمعتصم وشوي بزياد شوفتو اليوم اكدتلها مشاعرها ،بس هية متزوجة ومافيها تخون زوجها
:خلص سارة ركزي على حياتك وعلى جوزك زياد صار ذكرى مو اكتر اذا ضليت واقفة بالنص مارح اقدر كمل ،لازم ركز على حياتي المتوفرة ... خلص بكرا الصبح رح شوف معتصم وافتح صفحة جديدة وانسى كل الماضي ،كمان هو الو حق علي
~~~~~~~•
كانو الدكاترة المناوبين قاعدين بصالة بالطوارئ وقدمهن شوية نقرشات وفواكه وعصير
انضم الهن معتصم سلم وقعد جنب رأفت يلي اتفاجئ بوجودو
رأفت : انت شو عم تعمل هون
معتصم : عم ناوب
رأفت : بس ما الك مناوبة اليوم
معتصم : بعرف ، بس كيف بدك اياني اتركها وروح
رأفت : لمين للمشفى
معتصم : لاا طبعا ،لغفران
رأفت : لي غفران هون ؟ مريضة يعني
معتصم : لاا ماشفتها اليوم لما كانت جاي مع ابوها
رأفت ؛ ايمت ذكرني
معتصم : يلي جايتو ازمة قلبية
رأفت : ابوهااا؟؟؟
معتصم : اي غفران بتكون بنت اشرف عطالله قاضي ومستشار قضائي سابقاً
رأفت ؛ ما انتبهت مين معو من العجقة والحرس
صفن شوي وبعدها حكي : اييي يعني الها معرفة مع الوزير لما اجت هديك المرة على العرس
معتصم : بعد ماعرفت شخصيتها كلو صار يتوضح قدامي
رأفت : وينها هلق
معتصم : نايمة عندي بالمكتب ، مالي قلب فارقها بعد مالقيتها ، قلي شو اعمل
رأفت : والله مابعرف حالتك صعبة
معتصم : المهم كيف شفتلي صحة ابوها
رأفت : عأساس مابتعرف
معتصم : المشكلة بعرف بس عم حاول ازرع الامل ، خايف عليها اذا مات مبينة وحيدة ومالها حدا
رأفت : مافيك تغير شي هاد قضاء رب العالمين
معتصم : معك حق
رأفت : خلينا ننطر هال٢٤ ساعة ونشوف بركي بيتجابو على الاجهزة
معتصم : خايف من بكرا يجي لانو عارف فرص النجاة كتتير قليلة
وقف ليمشي
رأفت : ع وين
معتصم : طل عليها وراجعلك
رأفت ؛ انا ناطرك هاا
معتصم : هههه
~~~~~~~•
فتح الباب بهدوء ودخل .. كانت نايمة بعمق
نزل لمستوها وسرح فيها
معتصم ؛ يا الله يا غفران شو ندامان عكل لحظة كنت قريبة مني وما استغليتها .. ياريت مارحتي هداك اليوم ، بس الحق علي انا جرحتك كتير .. يمكن للحظة تخيلت انك بلامشاعر ... انا كيف فكرت انو وحدة متلك ممكن تكون بلا مشاعر وبلا احاسيس
محدا غيرك زرعلي الضحكة على وجهي .. معك عشت شغلاات كتير مختلفة بعيدة عن حياتي الروتينة بعيد عن كلشي
كنت اجي متلهف لأعرف شو مخبيتلي كل يوم من مفاجئات ، لك حتى لما كنتي تتهبلي واعمل حالي مزعوج بالعكس كنت فرحان من نص قلبي ... ليش صار فينا هيك ... ياريت تعرفنا على بعض بغير هي الظروف ،قوليلي شوبدي اعمل بعد ماتروحي ياترى رح ارجع شوفك
معتصم :غفران ... عم تسمعيني
ماردت ومبين انها بنوم عميق من التعب
اتشجع وقرب باسها من جبيها وتغللت ريحة شعرها بانفو
ابتسم ورجع يتأملها ماعم يقدر يبعد .. مد ايدو وتحسس خدودها لوصل ابهامو على شفافها مررو بلطف واتنهد تنهيدة مرتجفة وقام بعد وقعد على الكنبة يلي قبالها حط ايدو تحت خدو وبعدو عم يتأملها
~~~~~~~~~~•