رواية بين شقي الرحي الفصل الخامس5والسادس6 بقلم مورو مصطفي
وصلت حياة للبيت ودخلت فوجدت آمنه تتحدث في الهاتف مع ابنتها وهي منفعله وفجاءه اغلقت الهاتف في وجه ابنتها فأقتربت منها حياة
- منرفزه نفسك ليه ياحبيبتي
- تعبت ياحياة من البنت دي لا شايفه بيتها ولا جوزها ولا ولادها وكل همها الخروج والسفر والفسح واللبس دي بقت لا تطاق ياسين لولا انه ابن ناس كان بهدلها لكن ح يفضل مستحمل لامتى ياحياة
- معلش ياماما ربنا يهديها يارب
- حياة ممكن أسألك سؤال وماتزعليش مني
- اكيد يا ماما اتفضلي حبيبتي
- بتروحي فين كل يوم ياحياة بقى لك كام يوم بتنزلي من الصبح وترجعي بعد العصر فقبلت حياة رآس آمنه
- ح اقولك ياماما النهاردة كنت كده كده ح اقولك من غير ماتسألي انا كنت بنزل بروح بيت بابا الله يرحمه بوضبه واظبطه ماما ماتزعليش مني ارجوكي واللي ح تسمعيه ياريت ماتقوليش لحد عليه ممكن
- حبيبتي قلقتيني في ايه فتنهدت حياة
- ماما انا قررت انفصل عن كرم فشهقت آمنه
- ليه يابنتي كده فأبتسمت حياة بمراره
- حضرتك عارفة ياماما وانا كمان عارفة للأسف سمعته وهو بيحكي لحضرتك حتى لما كنت عيانة سمعته بيكلمها جنبي مااهتمش ان كنت اسمعه ولا لا حتى لما كلمني وهو مسافر بيقول شغل كان معاها هو انا للدرجة دي وحشة يا امي عملت فيه ايه علشان يعمل فيا كده عملت له ايه علشان يكسرني بالطريقة دي عشت معاه وانا مستحمله انانيته في كل حاجة واهتمامه بشغله عنا كلنا وقلت معلش بيعمل كده علشان ولادنا حاولت كتير أقرب بينه وبين الاولاد واديكي شفتي حتى الاولاد مش حاسين بيه ورغم كده عمري ما اتكلمت عليه وحش أدام الاولاد دائما بشجعهم يقربوا منه وهو ولا هو هنا وفي الاخر كانت النتيجه ايه لما هو بيحبها من زمان اتجوزني ليه يا امي ليه فهميني ارجوكي وكانت آمنه تستمع لها ودموعها عليها لكن هي زي امها كلبه فلوس جريت وراء الفلوس ودلوقتي أطلقت ورجعت تلوف تاني عليه ماهو بقى عنده شركة بس لا ورحمه على ما ح يحصل الشركة دي بفلوسك فضحكت حياة من بين دموعها
- خلاص ياماما انا مش عايزه منه حاجة انا ح اروح اقعد في شقة بابا والأولاد ح يكونوا بيني وبينه بس لحد ما الاقي شغل وبعدها لو حبيتوا كلكم تبقوا معايا على راسي وجوه عيوني يا امي
- طيب وانا ياحياة انا يابنتي ح تسيبيني لمين
فأرتمت حياة في أحضانها
- ماقدرش اسيبك ياماما حضرتك امي ولو حبيتي تيجي تقعدي معايا اشيلك فوق راسي حبيبتي
- يعني مصممه على كلامك ياحياة يابنتي ممكن تكون نزوه ويرجع لبيته تاني
- ترضيها لي يا امي ترضى لي اعيش مكسورة كده ترضى لي انه يجي ويقولي انا اتجوزت او ح اتجوز مش ح اقدر يا امي مش ح اقدر
- عندك حق يابنتي خلاص اللي انتي عايزاه اعمليه وانا معاكي يابنتي بس انا مش ح اقدر اسيب الاولاد معاه لوحدهم انا ح افضل معاهم هنا
- ح تيجي معاهم تشوفيني يا ماما فقبلتها آمنه
- طبعا يانور عين امك هو انا اقدر ابعد عنك
- عن اذنك ياماما ح اقوم احضر الاكل زمان الاولاد جاعوا
............................
جلس كرم مع مي في غرفتهم بعد أن رقصوا وتناولوا طعامهم بالخارج
- اظن كفاية قوي كده يا مي قلتي يومين وادينا قعدنا خمسه مش يومين فتصنعت مي الزعل وهي تقترب بدلع عليه
- كده ياكرومتي زعلان علشان فضلنا مع بعض اكتر من يومين ده انا قلت انت اللي ح تمدهم كام يوم كمان فامسك كرم يدها واجلسها بجواره
- حبيبتي مقدرش اكتر من كده علشان الشغل وعلشان البيت كمان كفاية الموقف اللي حصل ده قلقني لغاية دلوقتي لا حياة اتكلمت فيه ولانطقت وكمان مابتتصلش بيا مع ان زمان كنت لما ابقى مسافر لازم تتصل بيا مرتين تلاته في اليوم المره دي ولا مره اتصلت ونادر مابترد عليا ولوردت بتقفل بسرعه جدا فاشتعل الغضب في مي
- في ايه يا كرم مالك عامل لها. حساب كده ليه هي ايه خلاص يعني مافيش غيرها فغضب كرم
- مي انا قلت قبل كده حذاري من كلامك عن حياة فاهمه
- كده ياكرم بتزعق لي علشانها هي بقت حبيبتك وانا لا وتصنعت البكاء فأقترب منها كرم وقبل يدها وراسها
- يا مي افهمي حياة مالهاش ذنب اتجوزتها وصانتني وصانت عيالي وربتهم احسن تربيه وشايله امي فوق رأسها وانا جيت بكل قسوة كسرتها ف لو سمحتي خليني امهد لها الموضوع
- خلاص ياحبيبي اللي انت شايفه انا اسفة حقك عليا انت عارف انا بحبك قوي وبغيير عليك مش كفاية خدتك كل السنين اللي فاتت دي مني
- مش هي اللي خدتني منك يا مي انتي اللي بعتي بس انا برضه شاريكي فأرتبكت مي قليلاً
- ياحبيبي ما انت عارف انه كان غصب عني وبابا هو السبب في كل ده الله يرحمه بقي
- خلاص يا مي قفلي كلام في الموضوع ده وحضري نفسك ح نسافر بكره كفاية كده
- خلاص اللي تشوفه حبيبي
........................
جلست حياة مع ابنتها يارا وابنها يوسف وهي تحتضن كل واحد منهم وتقبله وتضمه لصدرها بقوه
- حبايبي عايزاكم تاخدوا بالكم من مذاكرتكم قوي عايزاكم متفوقين دايما زي ماعودتوني فنظر لها يوسف
- في ايه ياماما حضرتك بتكلمي ليا كده
- أبداً حبيبي بس ح اسافر كام يوم كده وعايزاكم دايما في ايد بعض يوسف انت الكبير دايما خلي يارا في عينك وانتم الاتنين تسمعوا كلام نانا فاهمين اوعوا تزعلوها
- مامي حضرتك ح تروحي فين ومن امتى حضرتك بتروحي مكان من غيرنا ومن غير بابي
- معلش حبيبتي ده ظرف طارئ
- خلاص ياماما اجي انا مع حضرتك
- ونسيب نانا ويارا وحدهم مش لازم يكون في راجل معاهم ياخد باله منهم
- استني بابا لما يجي وهو يفضل معاهم وانا اجي مع حضرتك فقبلته حياة
- مش ح ينفع ياعمري انت.... خلاص لازم اروح بكره ودايما ح اكون معاكم على التليفون لازم تعرفوا اني بحبكم جدا بحبكم اكتر من روحي فاهمين ياولاد فارتمت يارا في أحضانها
- واحنا كمان مامي بنحبك قوي قوي اكتر من اي حد في الدنيا وضمها يوسف بقوه
- ماما حضرتك عارفه انتي امي وابويا وكل ماليا مع نانا طبعا ارجوكي خدي بالك من نفسك
- ياعمري انت ماتخافش عليا انا بس عايزاك تاخد بالك من اختك ومذاكرتها ومذاكرتك انت كمان وتاخد بالك من نانا ومواعيد دواها فاهم وانا ح ابقى افكرك دايما بالتليفون
- ماتخافيش ياماما انا حافظة مواعيد الدواء بتاع نانا فضمتهم حياة بقوة وكأنها تستمد منهم قوتها وقدرتها على التحمل
- يالا حبايبي قوموا علشان تذاكروا شوية كده وح انده لكم علشان نتعشى سوا
...........................
يجلس سليم في جناحه وهو يمسك في يده السلسال الذي في رقبته الذي به صورة محبوبته
- ياترى فيكي ايه ليه قلبي وجعني كده ليه حاسس انك بتتألمي ياترى ح افضل لغاية امتى احس بيكي حتى وانتي بعيد عني بكتير كده ياترى ح يجي يوم واقدر اصارحك بحبي اللي ملك كل حياتي حبك مخليني عايش بس عليه مش عارف حتى افتح قلبي لأي حد مهما حاولت دايما الاقي صورتك تظهر لي وكأنك بتقولي لي انت ليا انا وبس واستمع لدقات على باب جناحه فسمح بالدخول
- مساء الخير ياسليم
- مساء النور ياساره حمدلله على السلامه عملتي ايه في الميتنج
- كله تمام عيب سليم انا ساره خلصت العقد زي ما قلت انت والشركة مضت على العقد خلاص
- برافو ياسارة انتي فعلا بيزنس ومان شاطره جدا طبعا انتي عارفة انا مسافر انتي مكاني في اي قرار لو في اي حاجة كلميني على طول
- اكيد ياسليم طبعا بس تسمح لي اسئلك مالك فيك ايه انت تعبان
- قلبي وجعني ياسارة حاسس ان فيها حاجة
- يااااااااه ياسليم معقول حاسس بيها رغم البعد ده للدرجة دي قلبك حاسس بيها فوضع سليم وجهه ارضاً
- انا اسف ياساره فضحكت
- اسف على ايه ماتتصورش انا بدعي ربنا ازاي تتجمعوا في يوم حرام حبك لها ده كله و تبقى هي ماتعرفوش فأبتسم سليم
- يااااااااه تفتكري ح يحصل ده في يوم فأبتسمت ساره
- ح يحصل سليم ح يحصل وبكره تشوف وتقول ساره قالت زي مابتقولوا في مصر فضحك الاثنان معاً
- عارفه ياساره بتمنى تلاقي الراجل اللي يسعدك وتعيشي معاه في سعاده وحب تستاهليه فأبتسمت ساره
- ح تكون اول واحد يعرف ياسليم وتقولي فعلا يستاهلني ولا لا
..................................
استيقظت حياة من نومها قبل الفجر وكانت لم تنم سوا ساعتين ولكنها قامت وأخذت حمامها وتوضأت وصلت حتى موعد الفجر ثم صلت الفجر ودعت ربها ان ينير لها الطريق وبعد أن انتهت من صلاتها خرجت فوجدت آمنه مستيقظة وتقرء في مصحفها فذهبت إليها وقبلت رأسها
- صباح الخير ياماما
- صباح الفل على عيونك يابنتي
- ماما انا حاطه في الفريزر اكل جاهز على التسخين بس وكمان بانيه وبفتيك جاهز على التحمير وفي التلاجه اكل يكفي الاسبوع ده ولما يقرب الاكل يخلص حضرتك قولي لي ح اعمله ويوسف يعدي عليا ياخده انا قررت اصارحهم بس لما امشي الأول خدي بالك من نفسك ومنهم يا ماما
- في عيوني ياقلبي
- عن اذنك ياماما احضر الفطار على مايصحوا
- ح اجي اقعد معاكي عايزه اقعد معاكي لآخر لحظة حياة ح تكلميني كل يوم
- الصبح والضهر وبالليل كل شوية يا ماما مقدرش استغني عنك حبيبتي وماتخافيش طنط عنايات معايا هناك
- الحمدلله انها هنا مش عند سليم اهو ابقى مطمنه عليكي شوية دي بتحبك قوي ياحياة
- وانا كمان ياماما بحبها هي وعمو شكري الله يرحمه
- يالا حبيبتي نحضر الفطار قبل مايصحو
- يالا ياماما
وذهبت حياة مع آمنه للمطبخ وقامت حياة بتحضير كل مايحبه أولادها للإفطار وكانها تودع جمعتهم تلك وبعد أن انتهت ايقظت أولادها وجلسوا سوياً وكانت حياة تطعم أولادها الاثنان بيديها وهم يجلسون حولها حتى انتهوا وارتدوا ملابسهم للذهاب إلى المدرسة والجامعة ووقفت حياة تحتضنهم وتقبلهم ودموعها تسبقها حتى خرجوا من الباب فانهارت في البكاء واقتربت منها آمنه تحضنها
- حياة يابنتي ح تقدري
- لازم اقدر ياماما كرم فكرني ضعيفه لكن لا الا كرامتي وولادي كبار وح يقدروا يقرروا عايزين ايه
- طيب يابنتي ربنا يعملك اللي فيه الخير يارب
- انا ح اقوم البس ياماما الحق امشي انا معرفش كرم راجع امتى ومش عايزه يحصل بيني وبينه احتكاك
- ماشي يابنتي
وذهبت حياة وارتدت ملابسها وكتبت خطاب لكرم ووضعته على الكومود بجواره وفوقه دبلتها التي نزعتها من اصبعها والقت نظرة على الغرفة لأخر مره وهي تبتسم بسخرية وفتحت الباب وخرجت واتجهت الي آمنه واحتضنتها وأخذت تقبل رأسها ويدها بحب ودموعها تسبق قبلاتها وكانت آمنه تضع يدها على شعر حياة وهي تبكي ايضاً
- خلاص ياحياة
- خلاص ياماما اشوف وشك بخير حبيبتي خدي بالك من نفسك ومن دواكي ياماما وانا ح افكرك دايما بالتليفون
- ماتخافيش عليا ياقلبي خدي بالك انتي بس من نفسك وطمنيني اول ماتوصلي وخلي عونا تكلمني
- حاضر ياماما لا اله الا الله حبيبتي
- محمد رسول الله ياحبيبتي
.............................
استيقظ كرم من باكر وحاول ايقاظ مي التي تصنعت النوم حتى وقت متأخر قليلاً ثم اضطريت للقيام عندما وجدت كرم بدء في الغضب
- جري ايه يا مي بقى لي قد ايه بصحي فيكي ايه قتيل فردت عليه مي بدلع وهي تتمايل عليه
- طيب اعمل ايه يعني مش انت اللي مسهرنا للفجر بشقاوتك ماكنتش قادرة اقوم ياكرومتي فزفر كرم بقوه وهو يرجع شعره للخلف
- طيب اتفضلي قومي يالا انا جهزت من بدري خلينا نتحرك بقى فنظرت له بغنج
- طيب مش لما نفطر الأول حبيبي
- ح ناخد معانا فطار في العربية يا مي الطريق لسه طويل مش عايز اتأخر اكتر من كده فقامت مي وهي تشعر بالغضب ولكن تكتمه داخلها
- حاضر حبيبي عشر دقايق واكون جاهزه وامتدت العشر دقائق الي ساعه وتحرك كرم بها وهو يشعر بالغضب داخله بشده فمالت على يده بدلع حبيبي خلاص بقى ماتزعلش مني انت عارف اني باخد وقت في اللبس والميكاب مش علشان ابقى دايما حلوة في عيونك فنظر لها كرم
- انتي حلوة من غير حاجة يا مي بس كان لازم تصحى بدري عن كده يالا معلش أن شاء الله نوصل في وقت كويس
- هو احنا ح نروح على فين ياكرم فنظر لها باستغراب
- على بيت عمتو يا مي احنا اتكلمنا واتفقنا اني محتاج شوية وقت علشان اتكلم مع ماما وحياة فتأففت مي
- اووووووف يعني ح نرجع زي ماكنا
- مؤقتاً بس حبيبتي معلش استحملي شوية
- ماشي حبيبي خلاص ولا يهمك
..............................
يجلس سليم في الطائره تجاوره ابنتاه وهما في قمةالسعادة انهم سيصلون مصر ويقابلون جدتهم التي يعشقونها ونظرت له ايلان وهي تبتسم بسعادة
- دادي نانا عونا عارفه اننا رايحين لها
فأبتسم لها بحب ووضع يده علي شعرها
- لا ياقلبي عملها مفاجأه
فصرخت إيلي وهي تصفق بيدها
- اوووووه دي ح تتنطط من الفرحه انا مبسوطة قوي دي وحشتني خالص ونظر سليم لأبنته الأخرى وهو يبتسم
- وانتي يايويو مبسوطة
فأبتسمت له وهي تميل برأسها على يده
- ايوة دادي مبسوطة كتير نانا وحشتني كتير
- كل حاجه هناك وحشتني انا كمان
وعاد بذاكرته لسنوات مضت وهو يراقب حبيبته ويحاول ان يحافظ عليها دايما دون أن يظهر أمامها فكان ان لاحظ أحدا حاول مضايقتها كان يقوم بمعاقبته حتى لايعود لفعلته مره اخرى كان دايما مراقب لكل خطواتها من بعيد حتى يحافظ عليها ولكنها لم تشعر بحبه وتزوجت غيره ومع ذلك لازال ذلك النابض بجسده لا ينبض الا لها فقط ويشعر بألامها بشكل موجع له فتنهد وفتح عينه وعاد بالنظر الي ابنتيه التؤام التي تشبهها واحده منهم في كل طباعها حتى اسمها الذي أطلقه عليها وكأنها اكتسبت صفاتها من أسمها
البارت السادس🌹🌹🌹
ركبت حياة سيارتها واتجهت الي منزلها الجديد وصعدت للأعلى وأدخلت شنطتها الي البيت ثم ذهبت إلى جارتها عنايات ودقت الجرس ففتحت لها الباب
- قلبي ياحياة حمدلله على السلامة ياعمري خلاص يابنتي ده قرارك النهائي فأبتسمت لها حياة
- ايوة يا طنط خلاص الحياة انتهت بنا خلاص المهم انا جيت ابلغك بس اني وصلت ح اروح بقى علشان اوضب هدومي
- استني ياحبيبتي ح اجي معاكي وأخذت عنايات مفتاح شقتها وذهبت مع حياة لشقتها
- طنط عونا ماما آمنه عايزه تكلمك ثواني اطلبها لحضرتك تكلميها على ما اعمل لنا فنجانين قهوه يعدلوا دماغنا
- حبيبتي وحشتني قوي بقى لي فترة ما سمعتش صوتها
وقامت حياة بطلب آمنه وأبلغتها انها وصلت ثم أعطت الهاتف لعنايات حتى يتحدثون معا وذهبت هي وابدلت ثيابها ثم قامت بعمل القهوة وخرجت فوجدت عنايات قد اغلقت مع آمنه الهاتف
- يالا تعالي هاتي قهوتك وخلينا ندخل نوضب هدومك وربع ساعة واروح اطفي على الاكل انا طبخت مخصوص الاكل اللي بتحبيه
- تعبتي نفسك ليه بس يا طنط فامسكتها من اذنها برقه
- مش قلنا من هنا ورايح انا ماما فاهمة اه آمنه مش احسن مني علشان تقولي لها ماما وانا لا يابت فضحكت حياة بقوة
- حاضر ياماما انتي بس تؤمري حبيبتي
- مايؤمرش عليكي ظالم ياقلب امك ويهدي لك الحال ويريح بالك يارب يالا يابت ح تاخدينا في دوكه ح اروح اقفل على الاكل واجي علشان نوضب حاجتك دي
- ماشي ياماما
ومضى الوقت وانشغلت حياة في توضيب ملابسها وفرش باقي الأشياء التي احضرتها للشقة ولم تكلم أولادها حتى تقص عليهم رغبتها في الانفصال عن والدهم قبل عودته من السفر ولكن تأتي الرياح بما لاتشتهي السفن
...........................
عاد كرم الي البيت بعد أن قام بايصال مي الي منزل والدتها وفتح الباب وشعر بشئ غريب ف المكان هادئ بشكل لما يعتاده فنادي على زوجته
- حياة حياة حياة فسمعه ابنه وخرج له
- حمدلله على السلامة يابابا ماما مش هنا هو حضرتك ماتعرفش فنظر له كرم باستغراب
- ماعرفش ايه يايوسف
- ماما سافرت الصبح قالت لنا انها مسافرة فترة كده لحاجة ضروري فأنفعل كرم بشده
- يعني ايه مش فاهم يعني ايه تسافر من غير ماتقولي ايه متجوزه طرطور وهنا خرجت امه ونظرت له بتهكم
- لا طبعا طرطور ايه المفروض انها متجوزه راجل يابن بطني ثم نظرت ليوسف ادخل اوضتك يايوسف كمل مذاكرتك حبيبي فنظر لها يوسف بحزن
- حاضر يانانا عن اذنكم ودخل يوسف غرفته وأغلق الباب خلفه ونظرت آمنه لأبنها بسخرية
- حمدلله على السلامة ياراجل ياسيد الرجاله
- جري ايه يا امي هي طلبه معاكي تريقه عليا ياترى بقى حضرتك عارفه الهانم فين فنظرت له
- ادخل أوضتك يابيه وانت تعرف وياريت تكون انبسط كده
فذهب كرم سريعاً لغرفته فوجد كل شئ كماهو مكانه ولكن لفت نظره الخطاب وفوقه دبلته فاقترب منها وهو لايصدق وامسك الدبله بيده ونظر لها وكأنه لايصدق ان الطائر خرج ورفرف بجناحه بعيدا عنه وامسك الخطاب وفتحه
- كرم ماعرفش ح تشوف الجواب ده امتى لكن عايزه اقولك ان خلاص كل اللي بينا انتهى انا استحملتك كتير قوي استحملت انانيتك وحبك لنفسك عني وعن ولادنا كنت بحاول دايما افهمهم انك بتضحي بسعادتك وسطنا علشان خاطر تأمن مستقبلهم لكن للأسف طلعوا فهمين انك بتدور على مصلحتك ورغباتك وبس ياخساره ياكرم ياخساره حاولت بكل الطرق احافظ على البيت رغم اهمالك ليا ولاولادنا وقلت معلش طبعه ولازم استحمل لكن بعد اللي سمعته وانت بتكلم ماما وبتحكي لها عن حبك اللي رجع ماكانش ينفع استنى لحظة واحده معاك انت واحد غدار وخاين غدرت بيا لما حسستني انك اتجوزتني علشان بتحبني مش علشان بتهرب من اللي سبتك واتجوزت غيرك ودلوقتي اول ماشاورت لك جريت عليها وخنتني اسفه ياكرم خلاص حياتنا مع بعض بقت مستحيل عيش حياتك مع اللي اخترتها وياريت ننفصل بهدوء حياة
قرء كرم الخطاب ووقع على الفراش خلفه وهو يعيد ويعيد في قراءه الخطاب وفجاءة وقف وكور الخطاب بغضب بين يديه وخرج مندفعاً من غرفته ونادت عليه آمنه ولكنه لم يلتفت لها وخرج سريعاً مقرراً الذهاب إلى حياة في بيت ابيها والعوده بها حتى ولو غصباً كانت حياة تجلس مع عنايات يحتسون كوب من العصير بعد أن قاموا بتوضيب ملابسها وفرش البيت وفجاءه استمعت لدقات الجرس بقوة ففزعوا الاثنان وضربت عنايات على صدرها
- ياستار يارب ايه ده
وقامت حياة سريعا تفتح الباب فوجدت أمامها كرم فارتدت خطوة للخلف من المفاجأة وهي تهمس كرم
- ايوة ياهانم كرم اللي سبتي بيته وطفشتي بتستهبلي ياحياة سيبتي بيتك ليه اتفضلي يالا ادامي علشان ترجعي بيتك بلاش جنان وهنا انتبهت حياة لوضعها ونظرت له بعد أن استعادت نفسها
- كرم من فضلك حياتنا انتهت لغاية كده وكل اللي بينا خلص من ساعة ماسمعتك وانت بتكلم مامتك على حبك الوحيد عايز مني ايه تاني ٢٠ سنه عايشه معاك ومتحمله انانيتك واقول معلش يابت مشي حالك حتى ولادك اهملتهم عمرك اخدت يوسف او يارا في حضنك انت ايه يا اخي جايب جبروتك ده منين وكمان جي لي بكل جراءه تطلب مني ارجع معاك ليه فكرني معنديش كرامه امشي ياكرم من هنا ومن فضلك ورقتي توصلني وهنا لم يتحمل كرم كلامها وحاول التهجم عليها فظهرت أمامه عنايات
- أوقف مكانك ياكرم بيه والا وربنا اخلي اللي مايشتري يتفرج عليك فضحك كرم بقوة ونظر لها
- وانتي بقى ياست ياعجوزه ح تمنعيني ازاي اخد مراتي اتفضلي روحي بيتك مالكيش تدخلي بين راجل ومراته
فصرخت حياة به
- أخرس بقى يا اخي ايه خلاص بقيت أعمى القلب والعقل مش قادر تفكر كمان انا مش عايزاك ياكرم روح للي قلبك اختارها وسبني في حالي
فضحك كرم بقوه
- اروح للي قلبي اختارها اروح لها ليه وهي معايا على طول عمرها مافرقتني حتى وانتي معايا كنت بفكر فيها فاهمه ياحياة لو انتي فاكره نفسك ست تبقى غلطانه انتي شخص بارد معندوش مشاعر لكن مش انا اللي واحده زيك تسبني فاهمه انجري ادامي وفي بيتنا ح اعرف اتصرف معاكي واعلمك الأدب ولعلمك مي ح تيجي تعيش معانا وح تخدميها كمان وأما اشوف ح تعملي ايه
وجاء ليمسك يدها فوجد يد من حديد تمسك به فالتفت فوجد سليم يقف أمامه وكان جسد سليم رياضي طويل القامه ولانه مواظب دائما على رياضته فكرم أمامه كطالب بالجامعه
- ادامك دقيقة واحده وتخفي من وشي والا قسماً بالله اخليك تخرج على ضهرك ياج عر بتتهجم على حريم وبترفع صوتك على ست كبيرة ومش اي ست دي امي ياحيوان كانت حياة في أحضان عنايات وفجاءة شعرت بها يغم عليها بعد استماعها لكلامه وحولها بنات سليم فصرخت عنايات
- الحقني ياسليم فنظر اتجاهها فوجد حياة مغماً عليها فقذف كرم خارج الباب واغلقه وجرى ناحية حياة وحملها ووضعها على الأريكه الموضوعه ونظر لأمه
- ماما هاتي برفان وانتي يا إيلي هاتي لي مياة بسرعة
وذهبوا سريعاً وبقت بجوارها ابنته الأخرى وهي تربت على شعرها بحنو ونظرت لأبيها
- مين ده يا دادي ومين طنط دي شكلها طيب وكيوت قوي دادي فنظر لها وهو يشعر ان قلبه يكاد يخرج من مكانه وهو يتوعد لكرم بعد أن استمع لكلامه لها
- بعدين حبيبتي بعدين وجاءت عنايات واعطته زجاجة برفان فوضع قليلاً على يده واخذ يحرك يده أمام انفها حتى بداءت تحرك رأسها وتفتح عيناها ببطء وهو ينظر لها بحب حتى افاقت فوجدت نفسها نائمه وكلهم يقفون بجوارها اما سليم فيجلس بجوارها فحاولت الاعتدال ولكن الدوار أصابها مرة أخرى فأمسكت رأسها مره ثانية واسندها وهو يهمس لها خليكي مرتاحة انتي لسه ماسترديتيش وعيك بالكامل قام من جوارها وجلس على منضده امامها واعتدلت قليلاً ونظرت لها عنايات
- عاملة ايه دلوقتي حبيبتي فزعتيني عليكي
- الحمدلله ياماما وكان سليم شكله لم يختلف كثيرا سوا فقط الضخامه التي اكتسبها من الرياضة فنظرت له وابتسمت بخجل حمدلله على السلامة ياسليم اسفة انك وصلت على موقف زي ده فتنهد
- يااااااااه ياحياة لسه فاكرة سليم فنظرت له
- شكلك ما اختلفش ياسليم غير بس انك بقيت ضخم شوية فضحك
- علشان بلعب رياضة باستمرار وهنا لاحظت الفتاتان فنظرت له
- بناتك ياسليم فاحتضن سليم الفتاتان وابتسم
- ايوة ياحياة إيلان وحياة فنظرت له حياة وهي تشعر بالذهول والخجل ونظرت للفتاتان
- أهلاً ياحلوين انتم تؤام فردت ايلان سريعا
- ايوة انطي انا اكبر بدقيقتين صح دادي
- صح ياقلبي فنظرت يويو لحياة بغضب طفولي
- دائما كده يا انطي لازم تقول انها أكبر وهما بس دقيقتين مش سنتين فضحكوا جميعا ونظرت لهم حياة
- حمدلله على سلامتكم ونظرت لعنايات فوجدت عيونها تترقرق بالدموع فنادت حياة عليها ماما عنايات مالك حبيبتي انا عارفة المشكلة دي ماخلتكيش تستقبلي سليم كويس فنظر لها عنايات وقامت وجلست جوارها
- مش ده ياحبيبتي اللي بفكر فيه اللي سمعته وشفتةمن كرم ازاي بقى كده فضحكت حياة
- علشان الطائر اللي كان حبسوا في القفص طار من غير اذنه هو ده كرم اللي ماكنتش عرفاه واكتشفته متأخر قوي الله يسامحك يابابا غصبتني وادي النتيجه وهنا بهت سليم ووقف ونظر لها
- غصبك انتي اتجوزتي الحيوان ده مغصوبة فأبتسمت بحزن
- قعد يقولي كويس وابن صاحبة ماما وبيحبني وح يصوني ويحافظ عليا وهو خايف عليا خاصة بعد وفاه يوسف اخويا وهو في عز شبابه وكسرتهم بعده وخاف يحصلهم حاجة وأفضل وحدي وادي النتيجة عشرين سنة عايشة مع بني آدم مش شايف غير نفسه وبس فكاد سليم يشعر بالاختناق فاخذ ينزع كرافته ونظر لأمه ففهمته فورا فأخرجت مفتاحها واعطته لإيلي
- حبيباتي وحشتوني قوي قوي يالا خدوا المفتاح واسبقوا على شقتي روح معاهم ياسليم خدوا دش وغيروا هدومكم وانا شوية وح اجيب حياة ونيجي علشان ناكل كلنا سوا
- لا ياماما اتفضلي حضرتك معاهم انا كويسة صدقيني وماليش نفس كمان ح اخد دش وانام فأقتربت منها حياة الصغيرة وجلست جوارها وامسكت يدها
- حضرتك اسمك واسمي واحد وانا حاسة اني حبيتك قوي وانا مش باخد على حد بسهولة زي إيلي بليز انطي تعالي كلي معانا ممكن فابتسمت لها حياة وضمتها لصدرها بقوه وهي تقبل رأسها
- خلاص حاضر يايويو من عيوني حبيبتي فانتفضت إيلي تقف وتضع يدها في خصرها وهي تنظر لحياة
- يعني يويو حلوة انطي وانا وحشة هي حضنتيها وانا كخ فضحكوا جميعا وفتحت حياة ذراعها الاخر واحتضنتها
- ازاي يعني انتم الاتنين بنات حلوين عسولات فصفقت إيلي بيدها ونظرت لأبيها
- دادي انطي بتقول زيك فنظر سليم لحياة ونظرت له واحمرت خجلاً وشعر سليم بارتباكها
- يالا يالمضه خدي اختك وتعالي ورايا ثم نظر لأمه واقترب منها مقبلاً رأسها ويدها وحشتيني قوي يا امي محتاجك قوي ثم نظر لحياة وقرر مناغشتها كسابق عهدهم فرفع جانب شفتيه بابتسامه مهلكه هاتي البت دي معاكي ياعونا وحصلينا ولو عصلجت قولي لي وح افكرها كنت بعمل ايه فخبطت حياة قدمها أرضاً بغضب وتأففت
- اووووووف لسه زي ما انت ياسليم اوووف فابتسم لها واقترب منها
- وانتي كمان زي ما انتي لسه زي ما انتي يا يويو يالا خدي دش وفوقي وحصليني مع عونا عايز اسمعك للصبح ماشي فأبتسمت بخجل وهزت رأسها بالموافقه فتنهد بصوت خفيض وانصرف مع بناته وهم يتقافزون حوله ونظرت عنايات الي حياة
- سليم جه في وقته
- فعلا ياماما معرفش كان كرم ح يعمل ايه فيا اول مره يظهر بوشه ده يالا الحمدلله
- يالا حبيبتي ادخلي خدي دش وغيري هدومك والبسي حاجة مريحة علشان نروح ناكل سوا احنا ما اكلناش من الصبح
- حاضر ياماما ثواني مش ح اتاخر
- على ما تخلصي ح اكلم آمنه افهمها اللي حصل من ابنها
- ماشي ياماما عن اذنك انا
- اتفضلي ياقلبي
عاد كرم الي بيته وهو يشتعل غضباً مما حدث ومن تهجم سليم عليه ودخل وهو في قمه غضبه فوجد امه وأولاده أمامه فنظر لأمه بغضب
- وافقتيها تسيب بيتها يا ماما وكانت عنايات قد قصت كل شئ وكل ماقاله لها
- أخرس ماسمعش صوتك فاهم احسن انا على اخري منك فصرخ بها
- ليه ها ليه ساعدتيها ليه وكان يوسف ويارا يجلسون ولا يفهمون شيئاً ونظر يوسف لابيه
- في ايه يابابا ممكن تهدي وتفهمني فنظر له
- في أن امك سابت البيت الهانم راحت عاشت في بيت جدك وطالبه الطلاق وكل ده علشان حد وصلها اني ح اتجوز عليها
فنظر له يوسف ويارا
- والكلام ده صح يابابا فادار كرم وجهه
- لا مش صح يايوسف مش صح روحت لها علشان افهمها طردتني وكان عندها ست جارتها وراجل غريب اتهجم عليا وطردني بره الشقه فصعق الاولاد وكانت يارا تبكي
- ازاي يابابا ايه اللي حضرتك بتقوله ده ماما ماتعرفش حد انا نازل رايح لها دلوقتي
فشعر كرم انه سيخسر هكذا فاقترب من ولده ووضع يده عليه
- لا حبيبي ماما ست محترمه الراجل ده تقريباً ابن جارتها خليك دلوقتي الوقت اتأخر وبكره الصبح خد اختك وروح لها عقلها يايوسف وخليها ترجع
- حاضر يابابا حاضر وكانت آمنه تنظر له بتعجب مما يقول ولكن لم ترغب ان تنهره اكثر من هذا أمام اولاده فنظرت ليوسف ويارا
- يوسف خد اختك وادخل اوضتك انت وهي ومحدش فيكم يكلم ماما لغايه بكره فاهمين سيبوها ترتاح
- حاضر يانانا
................................
واخذ يوسف اخته وادخلها غرفتها وظل جوارها يهدهدها حتى نامت وبعد ذلك ذهب إلى غرفته وجلس، يفكر فيما يحدث ودخلت آمنه الي غرفة كرم فوجدته جالس على الفراش ويدخن بشراهه فنظرت له باحتقار شديد
- ماكنتش اعرف اني مخلفه حيوان مايمتش بصله للرجوله بقى انت رايح تتهجم عليها وتقولها انك ح تجيب الحيوانة دي هنا وكمان عايزها تخدمها فصعق لانه يعرف ان حياة لن تقول مثل هذا الكلام خوفا على آمنه
- محصلش الكلام ده محصلش هي بقت كمان بتالف كلام طيب ياحياة ان ماربيتك فصرخت آمنه
- أخرس ياحيوان حياة دي ضفرها برقبتك انت والحيوانه اللي عايز تعمل لها قيمة مش حياة اللي قالت لي علشان هي بني ادمه اصيلة اللي قالت لي عنايات صاحبة عمر فاطمة وصحبتي ياكلب اللي كنت عايز تتهجم عليها لولا وجود ابنها انا ح اسيبك كده لغاية ما ولادك يعرفوا حقيقتك المقرفه اللي للأسف ماكنتش اعرفها اخص عليك وعلى تربيتك
وتركت آمنه غرفة كرم وخرجت لغرفتها