رواية كبرياء ابنة الخادمة الفصل الثاني عشر12والثالث عشر13بقلم سحر السحرتي
يوم الحفله بابا قدمني للناس قال اني بنته من والدتي بجواز شرعي ولظروف خاصه كان مجموعه قليله هي اللي تعرف
*كانت خالتي واولادها موجودين و فرحانين ليا
*بدات احتفال خطوبه سامح من صافي كانت فرحانه بوجودي و بترقص معايا بفرحه حسيتها من قلبها
: تصدقي انا كنت بموت انك هتنامي مع سامح في نفس الغرفه وانت مش اخته وكنت جايه لك حسب اتفاقنا عشان نغيظهم فرحت قوي لما حكيتي لي اللي حصل
:عارفه يا حبيبتي ولما قالي الحفله نعمل الخطوبه فيها فرحت لك شدي حيلك وعجلي الجواز عشان نذاكر مع بعض
: لا انا متفقه معاه ناجل شويه
:براحتك بس مش قوي احسن يستوي منك
*بدات الرقصه الهاديه بين كل اثنين .... هنا عشان تغظني مسكت ايد ادم و رقصت معاه وهي بتبص لي ....... بقيت ابتسم لاني شايفه فرحه سامح لقيته بيشدني من ايدي و بيرقص معايا
:تسمحي لي بالرقصه دي اصل خطيبتي رفضت تيجي معايا وانا وحيد ومكسوف اقف لوحدي
: هههههه حظابط ازيك مبروك انت خطبت
:اه لسه عريس طازه سبقت اخوكي بشهرين
:كان نفسي اشوفك عشان اشكرك كويس انك جيت
:تشكريني على ايه
: بصراحه الدكتور اللي ودتني عنده كان شاطر جدا و عالجني و خلاني اقوى
: انت اخت صاحبي يعني اختي وما فيش بين الاخوات شكر ... بس لو تديني برفان من اللي راشش منه سامح اكون انا اللي شاكر لك
: بس كده واحد ليك وواحد لخطيبتك كمان اتفضل معايا في الملحق هناك كل حاجه بتاعتي وتقدر تختار منهم
بقلمي سحر السحرتي
*بعد الرقصه اتجهنا للملحق دخل واختار .... كان عايز لخطيبته نفس النوع اللي بحطه اعتذرت انه خاص بيا مش ببيع او اهادي به اي حد أتفهم ده وما زعلش .... بس اخترت له حاجه احسن
*دخلت هنا وهي جايبه بابا يشوف بنته المحترمه وهي مدخله راجل الملحق اللي قاعده فيه والناس كلها مشغوله .... بعد ما شافتنا بنرقص مع بعض وبعدها بنمشي زي ما وصفت بنتسحب ..... بمعنى آخر مقرطساهم
*بابا بص لها بغضب
: هنا انت قلتي تعالى يا بابا لكن لو اعرف من الاول انك عايزه تتهمي اختك الاتهام ده كنت وقفتك عند حدك انا بثق في حلا جدا وعارف فاديه مربياها ازاي
:انت مش شايفها لوحدها مع راجل ما تصدق انها تربيه خدامين
*ابتسمت بطريقه مستفزه
:لو مفكره انك بتهنيني قدام يوسف فهو يعرف كل حاجه عني ...... وخاطب لو فاهمه ان في حاجه بينا ..... اخرجي يا هنا بلاش تحرجي نفسك اكتر من كده ... لاني مش لوحدي في الملحق على فكره
*خرجت خالتي من جوه كانت بتريح من صوت الحفله سمعت هنا
:في ايه يا حلا
*ابتسمت بسخرية
:مفيش يا خالتو هنا كانت عايزه شويه عطور من عندي و عايزه تدفع فلوسها قلت لها عيب احنا اخوات
بقلمي سحر السحرتي
*بصيت لبابا بحب
:معلش يا بابا روح شوف الضيوف وانا هخلص مع يوسف و جايه قاعده معانا يا هنا ولا هتمشي مع بابا
*يوسف بص باحراج وكان عايز يمشي
:استنى يا يوسف تفتكر انا جايباك هنا عشان تختار ولا عشان اجر رجلك وتبقى عميل عندي انت و خطيبتك .... سيبك من الهبل اللي حصل واخده عليهم و متوقعه اكثر من كده ما انت عارف القصة انت ما بقتش غريب يا راجل هههههه
:اتغيرت كثير عن من سنه
: البركه في الدكتور بتاعك شاطر وبعدين اللي حصل ده بيحسسني اني سندريلا وهنا ومامتها زوجت الاب الشريره وبنتها هههههه بس لسه ما قابلتش الأمير ..... هاه شوف هتختار ايه كمان ادبسك فيه
: هههههه انت مشكله كل مره بكتشف فيكي حاجه جديده بحترمك اكتر
:اهم من الاحترام تصرف اكتر وقريب قوي هتسمع اخبار حلوه عني
: خير ينفع اخذ فكره
:مش خساره فيك ... هعمل براند للمنتجات بتاعتي و هتشاركني صافي بمبلغ صغير هنبدا شركه صغيره وسامح واولاد خالتي هيدخلوا معايا كمان
:ينفع ادخل بمبلغ صغير انا كمان
:هسال شركائي بس اكيد مش هيرفضوا بعد اللي عملته معايا
*رجعنا الحفله ورقصت وكنت فرحانه لان يوسف اتفق معايا انه هياخد هديه عيد ميلاد خطيبته من عندي و خلاني اختار لها حاجه على ذوقي و ابعتها في اليوم والعنوان اللي ادهولي
بقلمي سحر السحرتي
*لقيت ادم بيشاورلي انه عايز يتكلم معايا رحت
: ازيك يا ادم عامل ايه
:مبروك انا فرحان عشانك بس ارجوك تسامحيني
: سامحتك من يومها لانك قبل ما تكون حبيب كنت صديق غالي عليا .... بس الصدمه هي اللي خلتني اقول كلامي ده لاني كنت متوقعه منك تصارحني ... عارفه ان الحب مش بايدينا وفي لحظه والثانيه القلوب بتتغير
: يعني نقدر نرجع اصحاب و نتمرن تاني مع بعض
: نقدر بس تفتكر مامتك و خطيبتك هيوافقوا
: انا كبرت خلاص وما فيش حد له سلطه علي من سنه كنت صغير لكن كل ما بكبر بفهم و بستوعب واحتمال ما اكملش انا وهنا
: ليه دي بتحبك
: لا واضح اني كنت عاجبها بس تصدقي لغايه دلوقتي بكتب لها انا عايز ايه لسه ما اتعلمت لغتي
:ما تبصش اني اتعلمته بسرعه يمكن صعب عليها وما تقارنش حد بحد ثاني
: مش بقارن غير تصرفاتها معايا في الاول عن دلوقتي
:فكر كويس وحط في اعتبارك انك لو سبتها انا مش بديل واللي بينا انتهى خلاص
:متاكد اني ضيعتك من ايدي بس سيبيها للظروف
:انا بحاول افهمك اني نسيتك خلاص و اتخطيت المرحله دي
:فكري يا حلا ارجوكي
: مفيش امل يا ادم كل شيء نصيب
*جت هنا و لقيتنا بنتكلم وكانت هتطق لانها كمان مش فاهمه حاجه
: خير يا حلا احلو في عينك دلوقتي وقلت تجربي حظك معاه بما ان بابا اعترف بيكي
*كان نفسي ابرر لها بس قلت ما تستاهلش تعرف حاجه وقلت ادبسها فيه اكثر وتتمسك بيه
:تصدقي فكره ما فكرتش فيها فعلا المشكله اللي بينا اتحلت خلي بالك منه بقى احسن يرجع لي
*سبتها هتولع فيه لقيت يوسف جه وقف جنبي وقال لي
: هو ده ادم اللي كنت بتحبيه
: اه اللي كنت
:وكان عايز ايه
:الظاهر احلويت في عينه لما بابا اعترف بيا
:وانت ايه رايك
:اللي ما يقبلش بيا ويفتخر ان بنت الداده ما يستاهلنيش وانا بنت البيه وعموما هو بقى حاجه قديمه بس احنا كنا اصحاب جدا كام سنه قبل ما يعترف بحبه ليا و هنرجع نتمرن مع بعض بس هو كان عشمان في اكثر من كده حبيت اوضح له يلم عشمه
: ربنا يرزقك باللي احسن منه انت جدعه و تستاهلي
:انا لسه بدري ااسس شركتي وانتبه لمستقبلي الاول ماما كان نفسها في كده
: لو احتاجتي حاجه ما تتكسفيش معاكي رقمي ما تنسيش توصلي حاجتي احسن فسخ الخطوبه يبقى على ايدك هههههه
:احلى حاجه هتوصل لها وتمسك فيك بزياده
*انتهت الحفله و بدأت اجراءات تاسيس الشركه .... بابا حاول يساعدني بس رفضت لكن اخذت منه فلوس سلف
*يوسف بعث لي رساله بيشكر في المنتجات عجبت خطيبته وادى لها رقمي عشان تطلب براحتها هي واصحابها و وصاني على الخصم بتاعهم
*الشركه لسه صغيره بس مكسبها مرضي و بيتوزع علينا وكلنا فرحانين بيه
*مرت سنه ونجحت وتفوقت وكمان فزت بكام ميداليه ذهبيه وده طبعا خلى الساحره الشريره وبنتها يحطوني اكثر في دماغهم و يضايقوني بكل الطرق
*فكرت كثير قبل ما اخذ القرار و اسيب الفيلا لان القاعده معاهم منهكه نفسيا خصوصا انهم بداوا في تنفيذ خطط قذره منهم مره جابوا لي تسمم
: بابا لو سمحت عايزه ارجع شقتنا عند خالتي
: ليه يا حلا
:بصراحه مش مبسوطه هنا الجو كل يوم مشاحنات مع هنا و مامتها .... البيت اتقسم احزاب ضد بعض انا وانت وسامح ضد هنا و مامتها .... انا كده هبقى مستريحه وانتم كمان هترجع حياتكم الطبيعيه انت وهما
: طب اشتري فيلا تقعدي فيها
:لوحدي لا انا متعوده على الحاره بس هطلب منك ان انت اللي تزورني لو تقدر
:للدرجه دي مش عايزه تدخلي هنا
: انا حسبتها بكل الطرق كده اريح للجميع لو سمحت
بقلمي سحر السحرتي
: زي ما تحبي يا حبيبتي اهم حاجه عندي راحتك
*رجعت فعلا الحاره لقيت هناك نفسي بابا بيزورني باستمرار لانه بيستمتع باكل خالتي لانه من ريحه ماما .... وسامح كمان كان بيجي معاه
*الشركه الصغيره كبرت شويه صغيره كمان لاني مع التمرين والدراسه مش متفرغه لها بس ماشيه
*ادم خلاص اعترف انه خسرني وما فيش فرصه نرجع .... ورجعنا أصحاب زي الاول ... وهنا كمان اتاكدت من ده بس لسه مرتبطين كل واحد بيحاول يصارح الثاني لكن بيتردد في اخر لحظه
*الفتره دي بدا مؤيد يقرب مني ده لاعب كره قدم متميز وله مستقبل وكل البنات هتتهبل عليه
*اللي ما حدش يعرفه غيري ان مؤيد ساكن معانا في نفس الحاره ونبه عليا ما حدش يعرف نفذت طلبه هو حر
:بس المفروض تخلي الناس تقبلك زي ما انت
: انا غيرك يا حلا انت عندك قوه غريبه معقول تسيبي الفيلا و ترجعي الحاره بارادتك
: انا مستريحه كده فقريه تقول ايه
: هههههه طول عمرك عشان كده انا معجب بيكي
*فهمت هو بيلمح لايه حبيت احط النقط على الحروف
:خلينا اصحاب احسن يا مؤيد بصراحه انا مش ناويه ارتبط دلوقتي غير انك وكل اولاد الحاره اللي كنت بلعب معاهم اخواتي
:شكرا على صراحتك الناقصه حته انك هتبقي دكتوره وانا مجرد واحد معاه دبلوم
: مؤيد انت عارفني كويس لو كنت اقصد كده كنت قلته لساني مش ناقص حته ..... وبعدين ما يهمنيش الحاجات دي المهم الشخص وانت عارف كده كويس ..... بصراحه اكثر عشان عارفاك و مواصفاتك ما فيهاش فتى احلامي
: ليه
:مؤيد انت عينك زايغه و علاقاتك كثير وعمري ما هاثق فيك
:ده بس اللي منعك
: ده اكثر شيء غير ان مشاعري ناحيتك مش اكثر من اخ لو كانت اكثر من كده ما كانش همني وكنت ارتبطت بيك
: ماشي يا اختي اروح اشوف مزه اقعد معاها
: هههههه اه يا ندل رمتني من اول محطه
: هههههه ما انت عارفه طبعي بقى لازم واحده في حياتي وكنت ناوي اتوب على ايدك لما ادور على واحده تتوبني
*هنا جت واحنا بنضحك
:مش تعرفيني يا حلا جو جديد ده
:مؤيد هنا اختي وده مؤيد صديق قديم ولاعب كره قدم لسه منقول النادي جديد
:معقول يا حلا القمر دي اختك
:اه اختي من بابا يا دوب تلحق تشوف كنت بتدور على ايه
: لقيته خلاص يا حلا عندك مانع
:هنا مخطوبه يا مؤيد وعموما ما تنفعوش بعض
:تسمحيلي يا هنا نبقى اصحاب
*سلم عليها وباس ايديها من باب الذوق و المعاكسه
*ضحكت: الحركه دي خلصت من ايام الابيض واسود
الفصل الثالث عشر
طبعا بيشاور وهي مش فاهمه حاجه ... هنا اتكلمت من غير ما تحرك شفايفها عشان ما يسمعش
:ترجمي وخليه يهدى احسن انا جبت اخري و هزعله قدام الناس
:في ايه يا ادم مالك متضايق كده ليه
:الهانم كام مره اقول لها ما تقفش مع رجاله غريبه وكمان يبوس ايديها
:ده صديق قديم ليا و بيسلم عليها بلاش تحبكها و عديها
*ادم استغل انها مش فاهمه هو بيقول ايه
:بلغيها ان كل شيء قسمه ونصيب
*رديت عليه بلغه الاشاره من غير ما اتكلم
:ادم معلش اتلكك في حاجه ثانيه انت بتسبب لي مشكله كده هتقول ان خطوبتها اتفسخت بسببي وانت عارف العلاقه بيننا لطيفه قد ايه ارجوك بحكم الصداقه اللي بينا بلاش تفسخ الخطوبه دلوقتي كفايه كلامهم اللي بيقولوه عليا
: حاضر عشان خاطرك بس خليها تلم نفسها
:مؤيد لو سمحت اعتذر لادم لانه اتضايق انك بوست ايد خطيبته وبلاش تسبب مشكله بينهم
بقلمي سحر السحرتي
:و هيفهمني ازاي
:اتكلم عادي وهو بيفهم حركه الشفايف
*اعتذر مؤيد ومرت الايام كان بيحب يقعد معايا كتير ... هنا لاحظت ده وفكرت ان في بينا حاجه ... اتلككت لادم و فسخت الخطوبه
*بدات هنا تتحجج و تقعد معانا وتحاول تشد مؤيد لها ... حاولت انصحها لكن فكرتني بحبه
:هنا بلاش مؤيد ما ينفعكيش اذا كنت بتدوري على علاقه دايمة
:ليه بقى ما ينفعنيش اظن ينفعك انت
:مؤيد علاقاته كثير وروحي اسالي النادي اللي كان فيه لو بتكذبيني
:مش محتاجه اسال اكيد انا مختلفه بالنسبه له
:هو انت لحقتي تنسي ادم بالسرعه دي
: انا اصلا كنت معجبه بيه بس ما كانش حب ولما قربت منه لقيته مش فارس احلامي
:ومؤيد هو فارس احلامك انا نصحتك وانت حره احنا رغم كل شيء اخوات
:اه متاكده طبعا انك خايفه عليا متشكره خافي على نفسك لانه هيختارني قريب و يسيبك انت
:انا مش معاه عشان يسيبني واذا ده هيخليك مستريحه ومبسوطه اه كان نفسي يرتبط بيا بس للاسف فضلك عليا زي ادم كلهم بيسيبوني و يختاروكي بس افتكري اني قلت لك بلاش مؤيد
: اكيد و هفكرك اني مختلفه بالنسبه له
*مرت سنه كمان وبقيت في اخر سنه
بقلمي سحر السحرتي
*هنا بتنجح بالعافيه ومعاها ماده او اثنين وده قاهر مرات ابويا وانا بنجح بتفوق غير البطولات
*سافرت اصيف مع خالتي في راس البر اللي بموت فيها و عودت بابا وسامح كمان اللي حبوها جدا حتى صافي جت معانا واخذنا شقتين حطينا الرجاله في واحده و الستات في واحده رفضت الفندق لان المصيف له اكلات مخصوص من ايد خالتي
*حبيت اقعد على الصخور مكاني المفضل عند اللسان طبعا ممنوع الجلسة فوق الصخور بس انا مش بسمع الكلام .....لقيت كام شاب غلسوا علي طبعا لساني و ايدي اتمدت و روحنا القسم اتفاجئت ان يوسف هناك
: العيال دي عاكستني عايزه اعمل فيهم محضر
:انا شايف انهم مشلفطين فمش عارف مين يعمل محضر في مين
*العيال اتشجعت : احنا اللي عايزين نعمل محضر يا باشا
:الاول قبل ما تعملوا محضر عارفين انها اختي تحبوا نعمل لكل واحد محضر ولا محضر جماعي
:لا خلاص يا باشا اخت حضرتك سلام عليكم
*و جريوا من قدامه زي الفئران
:ازيك يا حالظابط
:مش هتبطلي حالضابط دي انا حتى من يوم خطوبه اخوكي ما قابلتكيش
: بس بتشتري مني باستمرار ومتابعه طلبياتك بنفسي عشان توصل لك احسن حاجه انت و خطيبتك ولا اتجوزت وما عزمتنيش
:لا ما حصلش نصيب
*من جوايا اتبسطت مش فاهمه ليه تفتكروا بقيت شريرة
: معلش خيرها في غيرها بس كده سامح هيسبقك
: لا خيرها ولا غيرها
:ما تقولش كده ايه اللي حصل بس
:هحكي لك باره تعالي نقعد في اي كافيه اطمن عليك وتحكي لي اخر اخبارك
:لا تعالي اتغدى معانا الاول وسلم على سامح ..... خالتو عامله ملوخيه بالجمبري تجنن
: هو سامح هنا ابن الاكابر ساب الساحل وجاي هنا طب انت مش مستغرب انما هو
:من زمان جرجرته على هنا البلد جميله وفيها حاجات تبسط عن الساحل مش كده بذمتك
:طب بينا شوقتيني للملوخيه
*زارنا في البيت و اتغدى معانا وكانت قاعده حلوه ونزلنا نتمشى بعد المغرب ....سامح مشي مع صافي وانا اتمشيت مع يوسف اللي كان الكلام معاه سهل ومريح
: احكي لي بقى اخبارك ايه
: مفيش جديد نفس اخر مره تقدير وبطولات و الشركه اه كمان رجعت الحاره
: نعم سبت الفيلا ورجعت الحاره
:اه انا بحب الحياه البسيطه من زمان الجيران داخلين خارجين على خالتي في ونس انما الفيلا تحسها حته مقطوعه .... انت بقى سبت خطيبتك ليه دي كانت لطيفه في التعامل ولو سر تحب تحتفظ بيه بلاش انا قلت ندردش
*دردشه ايه طبعا انا هموت واعرف
: ابدا لما اتنقلت هنا عشان ما ليش واسطه تمنع النقل وكنا هنجهز للجواز جت شافت شقق الظباط ما عجبتهاش .... طلبت شقه تانيه تمليك او ممكن ايجار ما عندهاش مانع تتنازل شويه وتقعد في شقه ايجار بس على مستوى عالي
:هو انت مش عندك شقه في القاهره
:عندي كبيره و تمليك وقلت لها هنا وضعه مؤقت على مرجع نجهز شقه الظابط على قدنا رفضت
: ليه
:هي حابه تعيش في مستوى معين وانا مش معقول هصرف كل امكانياتي على الشقق اللي بتنقل لها او اضيع المرتب على ايجار شقه بالمواصفات بتاعتها
:طب ليه ما فهمتهاش ان مسيرك ترجع القاهره
: فهمتها وهي طلبت تسكن في القاهره وانزل اجازات
بقلمي سحر السحرتي
: ده حل كويس طب ليه ما وافقتش
:انا متجوز عشان استقر مراتي تبقى معايا مكان ما اروح مش عايز يبقى جواز ترانزيت اشوفها مرة في الأسبوع أو كل اسبوعين
: يمكن صعب عليها تسيب حياتها اللي اتاقلمت عليها اعذرها
:من اول ما خطبتها و فهمتها ظروفي ووضع شغلي يظهر بقى لما لقت اننا هندخل في الجد وما كانتش متوقعه اني اتنقل بلد زي هنا نطت من المركب قبل الرحله ما تبدا
: معلش ربنا يعوضك بس كده اظن احسن من غير جواز وعيال الانفصال بيكون اسهل وانتم على البر
: انا فكرت كده برده بس ما اعتقدش هلاقي واحده ترضى بظروفي
: لا اكيد هتلاقي البلد هنا جميله جدا
:بس انا ممكن اتنقل الصعيد مثلا
: هههههه اجدع ناس اصبر واخره الصبر الفرج في بنات كثير ممكن تقبل وضعك مش صعب قوي
*رن تليفوني كان علاء ابن خالتي
:ايوه يا زفت اتغديت وجريت لما عرفت ان عادل جاب نتيجتك ... شايل ماده و مستنيين يباركوا لك و محضرين لك هديه نجاح انما ايه ...سينما ايه وانت هتاكل علقه لوز .... هي دي اللي بتعرض كذا فيلم و نقعد فيها لمتاخر و نتهزق ... معاك يا ريس انا اقدر افوتها
*وضحكت و قفلت
:مجنون تخيل بيحملني مسؤوليه اني شال الماده
: ليه
:اصله اخويا في الرضاعه بيقول اني كنت بخلص اللبن المفيد و بيتبقى له شويه شرش كده اثر على ذكائه هههههه
*حسيت بغيرة من طريقته وهو بيسأل
:سينما ايه اللي بتخلص اخر الليل انت رايحه بجد
: اه تيجي معانا احنا متعودين عليها تجنن ونفضل طول الليل نحول اكل و فشار ولب ونرجع نتضرب من خالتي وجوزها
: بتتاخري بره البيت كده
*يا خبر هو حمش كده ولة بيتهيقلي ولة عشان ظابط دي طريقته المعتادة
: ده بس هنا البلد صاحيه 24 ساعه وعادل اخوه الكبير جاي وسامح وصافي هاتيجي
*وافق و علمناه يسهر واتاخر على شغله تاني يوم
*قضينا مع بعض اسبوع لذيذ بنخرج و نتفسح كلنا مع بعض وكنا هنرجع ... حسيت اني عايزه اقعد شويه فطلبت من بابا احجز في فندق كام يوم كمان فوافق وطلب سامح من يوسف يخلي باله مني طلبت من علاء يقعد معايا خالتي رفضت
: هنديله مكافاه على الماده اللي شايلها والسنه دي اخر سنه له لا كويس انه كمل الاسبوع معانا الواد ده طول عمره واجع قلبي
:خلاص يا علاء انت اللي جبته لنفسك ما تقطعش الجوابات
:طيب يا ندله اكيد هتزهقي و ترجعي تقولي المصيف من غيرك ما لوش طعم
: اكيد وانا اقدر استغنى عنك بس انت شايف خالتو لما بتربس ما فيش كلمه ترجعها
*وشوشني : يومين و اجيلك ماشي
:ماشي
بابا :هترجعي امتى
:لما ازهق رغم ان البحر هنا ما يزهقش
:لو احتاجتي حاجه يوسف موجود ما تتكسفيش هو وسامح اصحاب من زمان
:حاضر يا بابا مع السلامه
*مش عارفه ليه حسيت ان بابا فاهمني و بيحاول يسهل الامور .... او يمكن عادي ... بس اللي مش عادي ان عايزه اقعد شويه كمان مع يوسف اللي لما عرف اني لوحدي اخذ اجازه يومين و قضاهم معايا ...ما كناش بنام يمكن غير اربع او خمس ساعات
*في يوم يوسف سالني
:حلا هو انت ممكن تتجوزي حد من الحاره
: طبعا لو حبيته اه ليه لا
:يعني بما ان اسمك رجع و باباك اعترف بيكي وبقيتي من الأغنياء
:انت عاشرتني فتره صغيره حسيت انه فرق معايا ده انا سبت الفيلا ورجعت الحاره ولسه لبسي بسيط زي ما هو مش برندات ولا حاجه
: ما ده اللي مستغربه
:اصلي فقريه زي اخواتي ما بيقولوا
:ليه بيقولوا لك كده
:بلاقي السعاده في ابسط الاشياء بعيدا عن الفلوس
: انا لاحظت كده فعلا
: وبعدين انت بتسال السؤال ده ليه حد اتقدم لك من الحاره هو اصلا ما فيش حد من الحاره او غيرها هيتقدملي
:ليه عليك احكام هههههه
:مين هينسى اني بنت الداداه اللي ابوها كان مستعر يعرف الناس بيها و يتجوزني غير لو حد طمعان في فلوسه
: انت مقلله من قيمه نفسك
:قصدك عارفه حقيقه نفسي
: اسمحيلي انت دكتوره بطله اي نعم تنس طاوله اللي ما حدش بيشوفها
: هههههه كثر خيرك
:غير ان ليك شركه اينعم لسه مبتدئه بس بكره تكبر
: اه انا ناويه اكبرها لما اتخرج و اتفرغ لها و معروض عليا اسافر دبي افتح فرع صغنن فيها
: انت بجد ممكن تسافري
:اه بس لو في حاجه تقعدني اكيد هقعد
:حاجه زي ايه
*في عقلي هو انت مش فاهم ولا بتستعبط
:يعني لو بابا او سامح رفضوا مش هقدر ازعلهم مهما كان دول اهلي
: بابا بس هو اللي ممكن يخليك تغيري رايك
بقلمي سحر السحرتي
*اتكسفت قوي لما فهمت هو يقصد ايه وغيرت الموضوع
:تيجي نركب عجل
*بص لي بنظره انه فهم
: تعالي
*اخذنا عجلتين و اتسابقنا ... وصلنا مكان بعيد اقترح نريح شويه و نقعد على البحر لانه تعب ... ومن غير ما اخد بالي او اخذت بالي وعملت عبيطه بوظ العجله بتاعتي
*لما جينا نمشي اتفاجئ يا سبحان الله ان عجلتي بايظه
: ايه ده مش هقدر امشي المسافه دي كلها
:خلاص تعالي اركبي قدامي ونقول للراجل يجي يستلم عجله البايظ
*طبعا كنت هرقص من الفرحه بس لازم ارفض و يتحايل عليا
: لا كده هتتعب واحنا الاثنين على العجله همشي وخلاص وانت سوق بالراحه
: لو تعبت هبقى اريح تعالي احسن نتاخر
*فعلا ركبت كنت مبسوطه قوي كنت حاسة اني جوة حضنه بس هو كان محترم
:انت هترجعي القاهره امتى
:مش عارفه لسه بس اكيد مش هزود عن عشره ايام لان عندي بطوله هي مش مهمه بس بسلي نفسي في الاجازه وبعدين انت اكيد عندك شغل ومش عايزه اعطلك و الندل علاء قال يومين وجاي ... اكيد خالتي نفضته و خايفه ازهق لوحدي
:انت عجباك البلد هنا
: اه بفكر اخلي بابا يشتري شقه هنا و اقعد طول الصيف
: لو جات لك فرصه تقعدي هنا توافقي
:حسب الظروف اوافق
:ظروف ايه
:هقعد مع مين لاني مش بحب الوحده بحب الناس
*لفيت له وانا متحمسه احكي له
:عارف خالتي كانت بتطلعني من الشارع بالعافيه
*فجاه لقيت اننا قريبين من بعض قوي اتكسفت و بصيت قدام
:مش كفايه عليك كده باقي جزء صغير اقدر امشي
: زي ما تحبي
*يا ترى هو عمل كده لانه حس نفس الاحساس خايفه اكون انا بس اللي حاسه وهو احساسه ناحيتي اني مجرد اخت صاحبه قررت ان لازم اعرف و احط النقط على الحروف ما افضلش معلقه نفسي على السلم
*ثاني يوم رفضت اخرج معاه بحجه ان حاسة بدور برد
:طب انزلي نكشف
: لا مش قادره
:ما انت لازم تنزلي اطمن عليك مش هينفع اطلع
:لا اطمن انا بعت اشتريت دواء وهبقى كويسه بس انام واستريح
بقلمي سحر السحرتي
:طب انا همشي وهكلمك كل شويه اطمن عليك
*مش عارفه ليه قفلت التليفون ونزلت اتمشى على البحر مكان ما بحب اقعد
قعدت افكر وجريت الدموع من عيني لقيت اللي بيطبطب علي كتفي و بيقول لي