رواية كبرياء ابنة الخادمة الفصل الاول1والثاني2 بقلم سحر السحرتي

*انا بنت الخدامه اللي بيدلعوا الاسم بيقولوا بنت الداده او بنت المربيه بس الحقيقيه المره اللي لما حد بيحاول يشتمني او يضايقني بيقول لي يا بنت الخدامه فوقي لنفسك 

*الحكايه بدات لما والدي اتجوز واحده شخصيتها قويه جدا مسيطره عليه حب يخرج الكبت اللي عنده و يطلعه على حد فدور على واحده يتجوزها تكون شخصيتها اضعف من شخصيته ...  واحده عايزه تعيش بالمعنى الصريح اللي قالوا ليها لما تقدم لها تقول حاضر وطيب وبس وما تتناقش او تجادل غير كده هيطلقوا ....  وعشان تنفذ كل طلباته كان لازم تكون غلبانه و فقيره عشان لما يرمي لها لقمه يبقى عمل الواجب وزياده 

*فعلا امي  حبته و بسطته و حققت كل احلامه بالحرف .....  لحد ما جه اليوم اللي شمسه غابت والليل سواده بقى غامق وامي حملت فيا 

*اتضربت حته علقه من الللي وصى عليها في الكتاب  .... العلقه دي كانت كفيله انها تموتني وتقضي على اي امل انها تحمل مره ثانيه ....  لكن عيب  كنت متبته في الدنيا من جمالها  .... كان نفسي اعرف ايه اللي حببني في الدنيا عشان امسك فيها بالشكل ده حد يسيب فرصه من دهب انه يستريح من الدنيا هتعرفوا بعدين ليه بقول كده 

*بس ما تفتكروش اني بقول كده عشان طلعت لقيت امي خدامه دي مهنه شريفه وعمري ما زعلت او استعريت منها لكن اللي حصل لي كان فوق طاقتي

بقلمي سحر السحرتي 

*نرجع لامي اللي كانت هتموت في ايده لما حس انه افترى عليها شويه ...  مش بزياده ولا حاجه يظهر طمن ضميره انه حقه او ان ايده تقلت حبتين 

*المهم قال لها بحده و صرامه 

:اللي في بطنك لازم ينزل

: لا يا سي محمد انا قلت حاضر في كل حاجه فاتت و هقول في اي حاجه جايه انما ده سيبني احس بالامومه اللي كل ست بتحلم بيها و بتتمناها 

:بس انا عندي ولد ما احبش يكون لي اولاد منك وانت فاهمه كويس ليه

 :فاهمه اعتبر الطفل ده مش موجود 

:ازاي هتنزليه

 :لا وقت ما تكون جاي هوديه عند اختي واهي شقتها قدامي  ومش هيعرفك ولا هيشوفك  ولو عايز اكتبه باسم حد ثاني موافقه 

:يعني مش هيبقى لي علاقه بيه او اشوفه

: وكمان هشتغل و اصرف عليه 

:لا مصاريفه عندي بس يا ويلك يعرف عني حاجه

 :اللي تؤمر بيه 

*حنين يا حماده هتصرف عليه كريم قوي وربنا

*امي ولدتني وهو شافني وقلبه حن عليا شويه فكتبني على اسمه بس ثلاثي من غير لقب العيله ولحسن حظه كان اسمه له تشابه مع مصر كلها .....  اسمه محمد احمد مصطفى النهري  .... بقى اسمي حلا محمد احمد مصطفى 

*اه ماما سمتني حلا لان بولادتي حليت ايامها

 *مش بقول لكم ست طيبه قوي ده انا هحليها حلاوه ما حصلتش 

*نسيت اقول لكم ان زوجته الاولى ولدت بنت هي كمان بعد ما اتولدت بثلاث شهور

 *بابا قال لماما طول ما انا لسه صغيره وما اقدرش اتكلم تخليني معاها ما فيش لزوم توديني عند خالتي 

*كريم ربنا يحميه لو بايدي كنت غيرت اسمه لكريم ... تصدقوا كان بيشيلني و يلعبني وكان مبسوط بيا قوي وماما قالت اني ما كنتش بسيب حضنه 

*مراته رفضت ترضع خايفه على جسمها بابا دور على مربيه تربي البنت و ترضعها  ....  الطيبه عرضت تروح هي عشان اكبر قدامه  واخويا لو شافني ما يفكرش يتجوزني لاني هبقى اخته في الرضاعه 

*اقتراح هايل عجب بابا واهو هنبقى معاه وقدام عينيه 

*هو هيجهز الفيلا الجديده يعمل لنا ملحق نقعد فيه و هيعمل فيه غرفه سريه يقدر يدخلها من مكتبه ما حدش يعرف عنها حاجه غيره هو وامي  وهي تدخلها من الملحق عشان يتقابلوا بدل المشوار

*و اتنقلت الفيلا الاولى على ما الجديده تخلص 

*كنت طفله هاديه بس مراته ما حبتنيش لاني كنت احلى من بنتها وبابا كان كل فتره يشلني و يلاعبني فطلبت منه يا اما يغير المربيه او ماما تشوف مكان ثاني توديني فيه 

*طبعا كانت مشكله وبابا كان حابب وجود ماما معاه وهي عشان طيبه طلبت منه يخليني لما اكمل ست شهور و هتوديني عند خالتي

*اه ماما ما كانش عندها مانع تخدم جوزها ومراته وعياله فيها ايه يعني الست تكون مكان ما يقعد جوزها واهي حست بالامومه و هتشوفني في الاجازه الاسبوعيه وخالتي هتطلع لها بقرشين يساعدوها على المعيشه كله هيستفيد الا انا مش مهم عادي يعني 

*شاهنده هانم مرات بابا وافقت ان يوم الاجازه ماما تجيبني اقضيه معاها بس حذرت بابا ان يشيل بنت الخدامه و يلعبها وينزل لمستواها 

بقلمي سحر السحرتي 

*كان بيلاعبني وهي مش موجوده شجاع قوي 

*ماما كانت بتناديه محمد بيه بدل سي محمد مراته مدام شاهنده اما بقى اخويا فكان سامح بيه 

*سامح شخصيته كانت قويه وكان بيلاعبني رغم رفض امه واعتراضها وكانت بتقوله

: ما تلاعب اختك بدل بنت الخدامه

 :اختي بتعيط و زنانه انما حلا  بتضحك على اي حاجه و بتسكت وبعدين حلا اختي هي كمان

:ايه الكلام الفارغ ده مش عايزه اسمعه اختك هنا وبس انما حلا بنت الداده فاهمني يا سامح .....   انا عارفه ان راسك ناشفه بس لو قلت ان حلا اختك هقول لمامتها تبطل تجيبها 

:حاضر يا ماما

 *ذهبت لتفرغ غضبها على والدي 

:يا استاذ محمد شفت اخره افكارك سامح بيقول على حلا اخته هتحل المصيبه دي ازاي

: ما حلا فعلا اخته في الرضاعه 

:عايزه افهم سبب اصرارك ان فاديه ترضع  هنا طبيعي ما الصناعي كان موجود 

:انت نسيتي ان الصناعي كان هيموت البنت والدكتور اللي قال لازم ترضع طبيعي وحضرتك رفضتي عشان جسمك ما يبظش كان في ايدي اعمل ايه

: كنت جبت واحده مش معاها اولاد 

:ازاي ترضعها ما هو لازم يكون معاها طفل وسنه قريب من سن بنتك عشان اللبن يكون مغذي مش ده كلام الدكتور برده ولا انا بفتي من نفسي

 :طب هنعمل ايه في كلام سامح ما فكرتش فيه ليه

: ما عرفتش غير لما فاديه قالت قدامي حتى لو كنت اعرف كان ايه الحل اللي عند جنابك

: يوه هو الواحد ما يعرفش يتكلم معاك اتفضل تطلع دلوقتي تتكلم مع ابنك ينسى خالص ان حلا اخته يا اما همشيهم واجيب غيرهم

 *زعق اخيرا  حمش قوي وقال لها 

:لا مش هيمشوا

 *برقت له رجع خطوتين لورا ورجع لعقله أيوة كدة العقل زينة وقال بهدوء 

:قصدي هنجيب غيرها هيبقى له اخوات غير حلا في الرضاعه كفايه علينا واحده 

*فكرت كده مع نفسها وقالت له

 :عندك حق المره دي 

*عدت الايام وكنت بقعد عند خالتي طول الاسبوع ويوم الاجازه بزور امي و الرضاعه شويه امي وشويه خالتي

 *بقى عندي اخوات في الرضاعه من الجانبين قد ايه بحسد نفسي على الحظ الحلو ده

 *هنا اختي كانت ضعيفه وكانت متعلقه بماما فقرروا بعد ما اتفطمت تفضل ماما الداده بتاعتها وده كان حل هايل اسعد بابا جدا 

*عدت سنين وداخله المدرسه ماما قدمت ورقي بس لازم شهاده وفاه للاب او طلاق رجعت لبابا

 :وبعدين في المشكله اللي ما فكرناش فيها انا مش هقدر اظهر واقدم لها ورقها في المدرسه

: يعني هسيبها من غير تعليم 

:وفيها ايه

: يا محمد بيه انا ما قصرتش معاك بقالي 10 سنين بس دي بنتي الوحيده مش عايزاها تطلع زيي جاهلة

:والحل عندك حل

: معارفك كثير يا اما  تزور لنا شهاده وفاه 

:عايزه تموتيني وانا عايش وتبقى بنتي يتيمه

*المرة دى الست نطقت بس يا ويلها

 :هي اصلا يتيمه وانت عايش هي تعرف انك ابوها حتى الحضن واللعب معاها بتعمله لانك البيه اللي بشتغل عنده مش بصفتك ابوها 

*صفعها على وجهها بقوه وجذبها من شعرها مش بقولكم حمش

:نبره صوتك عليت وبقيتي كمان بتردي وايه كمان ناويه تعمليه

 :ابوس ايدك اعمل اللي تعمله بس بلاش تحرمها من التعليم كفايه محرومه تشيل اسمك و تترمي في حضنك وتقول لك يا بابا 

*الحج الحقيقه قلبه رق وحس فعلا ان عندها حق قال لها

 :خلاص هشوف حد يعمل الورقه بس ما فيش طلبات ثاني 

:عيوني يا محمد بيه و اتسجلت في المدرسه الحكومي طبعا  .... وكنت بقضي وقتي في الشارع بلعب مع العيال بس كنت شاطره و بنجح واطلع من الاوائل كمان خالتي 

:بتعمليها ازاي دي يا قرده 

:الله يا خالتي هتقري علي ولا ايه 

:ام سعيد بتشتكي منك و ناويه لما امك تيجي تقول لها 

:اللي يعرف ابويا يروح يقول له كل ده ليه عشان ابنها عبيط بكسب منه البلي بتاعه 

:انت  بنت بتلعبي بلي خليتي ايه للولاد 

: ما عيالك اللي علموني 

:و بتجيبي فلوس منين تشتري بيها البيلي

: لما رحت عند ماما المره اللي فاتت محمد بيه اداني 10 جنيه اشتريت شويه والباقي بكسبه وارجع ابيعه لعيال الحاره تاني 

:ادالك 10 جنيه حته واحده 

:لا حتتين

 :ازاي حتتين 

:يعني خمسه وخمسه 

:كده بتخمسي في وشي ....  تعالي هنا باقي معاكي كام 

:اظن ما انت عايزه تاخديهم زي كل مره لا هو قال لي دي بتاعتك لما قلت له كثير وخالتي هتاخدها 

:انت قلتي له 

:اه وقال لي كمان ان ماما بتدي لك فلوس شغلها وطلب مني احافظ على فلوسي و احوشها 

:ماشي يا حلا زعلانه منك هو عشان بستلف منك كم جنيه تقومي تقولي  للبيه اللي امك بتشتغل عنده

: انت دايما سلف سلف ما فيش سداد ابدا وبعدين هو اللي سالني لما رفضت اخدها منه عموما ما تزعليش خدي 5 جنيه كسبتها و هنزل العب بينج بونج مع عيالك

: استني دي لعب صبيان

 :هو انا لقيت بنات تلعب معايا وقلت لا انت اللي خلفتي ولدين سلام

بقلمي سحر السحرتي 

*كنت بلعب مع ولاد خالتي لغايه ما صاحب الطرابيزه لقاني بلعب حلو ....  اتفق معايا ان كل ما هكسب حد من عيال الحاره هيديني نسبه من ايجارهم للطرابيزه و بدأت اول بيزنس ليا وانا في رابعه ابتدائي وكنت بكسب العيال 

*وصلت للصف السادس وطلعت الثالثه على المدرسه وعملوا حفله اتكرمت فيها وماما حضرت وكانت فرحانه قوي 

*بس ما كانش اسعد يوم في حياتي لانها بلغتني اني هروح اعيش معاها في الفيلا على طول 

كبرياء ابنة الخادمة 

حلقة ٢

*اتصدمت لما ماما قالت لي ان لازم اعيش معاها لان هنا بنت محمد بيه حالتها النفسيه وحشه لان اصحابها في المدرسه اتنمروا عليها لان جسمها ضعيف وتركيزها قليل وده من زمان الدكتور نصحهم بحد يقعد معاها يكون بيحبها وهي بتحبه فالطيبة اقترحت على بابا مين تخيلوا

:يا ماما شاهنده هانم مش بتحبني وكنت بقضي معاكي يوم الاجازه بالعافيه

: يا بنتي محمد بيه هيدخلك مع بنته نفس المدرسه ونفس الفصل وهي بتحبك و بتستريح معاكي دي فرصه تدخلي مدرسه خاصه بدل الحكوميه وتاكلي و تلبسي حلو 

:انا بحب الحاره و القعده عند خالتي انما القعده عندكم ممله وكل حاجه ممنوعه بامر شاهنده  هانم

: انت في جميع الاحوال هتبطلي تنزلي الشارع انت كبرتي خلاص انت بنت وعيب لعب في الشارع في سنك ده 

:برده القعده عند خالتي احسن

 :اسمعي لو ما وافقتيش هيمشوني هصرف عليك منين 

:ما تشتغلي عند اي حد ثاني

 :يا بنتي انا مش معايا شهاده مين هيشغلني وهم اخذوا علينا واحنا عرفناهم والراتب بتاعهم كبير بقدر اساعد خالتك في مصاريفها 

:حاضر يا امي امري لله بس خايفه الست شاهنده تطول لسانها عليا وانت عارفاني

 :لا يا حلا عشان خاطري فوتي و طنشي

: ربنا يستر انا خايفه قطع عيشك يبقى على ايدي

بقلمي سحر السحرتي 

 *فعلا عشت معاهم كنت بنام في الملحق اللي بابا بناه بصراحه الحاج كان صارف ومكلف ونظام حياتي اختلف تماما طول اليوم بقعد مع هنا نلعب ونتكلم ....  وحالتها النفسيه بقت احسن مامتها لحظت ده فحسنت معاملتها معايا شويه ..... لكن اللي خلاها تتعامل معايا بشكل افضل بكثير اول يوم مدرسه لما جالهم استدعاء ولي امر ليا انا وهنا

محمد: اهدي بس يا شاهي لما نعرف ايه اللي حصل 

:بنت الداده اول يوم في المدرسه اللي انت اصريت تدخلها مع بنتك اللي ما كانتش تحلم تعدي من قدامها عملت مشاكل وجابت استدعاء لينا 

*دخلت عند المديره وهي في قمه غضبها بعد ما مسحت بكرامه بابا الارض

 المديره :احكي يا حلا عملت ايه 

*طبعا بكل شجاعه وطوله لسان 

:ما عملتش حاجه كان في بنت قليله الادب ربتها 

شاهنده :اخرسي المدرسه هنا كلهم بنات عائلات 

*امسك محمد يدها  :اهدي وخليها تكمل حلا احكي من غير ما تغلطي في حد 

: ماشية انا وهنا في الفسحه البنت شدت شعر هنا و كعبلتها وقعتها على الارض اسكت جبتها من شعرها و رميتها في الارض وقعدت عليها وخليت هنا اخذت حقها

 المديره: وانت بتدخلي ليه احنا كنا هنحل الموضوع ونعاقب البنت 

*اسكت طبعا استحاله 

:انا وفرت عليك تعب طول السنه تعاقبي في البنت 

محمد: ازاي يا حلا

: هنا كانت قالتلي انها من ابتدائي كانت دائما طول السنه   بتضرب من البنت دي واصحابها و المديره بتعاقبها عقاب قاسي جدا تقعدها في الركن النوتي 10 دقائق وطبعا ده طول السنين اللي فاتت فاللي عملته هيخليها تفكر بعد كده 1000 مره قبل ما تمد ايديها على هنا ابقى وفرت على المديره مشاكل طول السنه تعاقب في البنت غلطت بقى 

المديره :شفت حضرتك اتحايلت عليا عشان اقبلها وهي مش من مستوى باقي البنات وده اللي حصل في اول يوم

 *المره دي مدام شاهنده هي اللي ردت و بغضب

: بس هي عندها حق بقلنا سنين بنشتكي والبنت نفسيا اتدمرت و عقابك عمره ما منع عنها الاذيه هنشوف المره دي هيتعرضوا لها ولا انتهينا من المشكله دي نهائيا 

المديره :بس المشاكل عمرها ما بتتحل بالطريقه الهمجيه دي واهل البنت اشتكوا وجايين 

:قعدي حلا في ركن النوتي 10 دقائق اقول لك خليه ربع ساعه احنا راضيين 

:بس هم زعلهم وحش قوي 

:واحنا بقى لنا سنين بنتنا بتضرب يربوا بنتهم وما تنسيش اننا بنتبرع لمدرستكم بمبلغ كبير واي كلمه هتتوجه لحلا تزعلها هاخذها هي وهنا من هنا على مدرسه ثانيه يلا يا محمد يلا يا حلا

  *لا قوية يا مرات ابويا 

*خرجت شاهنده وعلى وجهها ابتسامه انتصار وحضنت هنا اللي بدورها كانت خايفه من رد فعلهم

: ما تخافيش يا حبيبتي المديره مش هتعمل لك حاجه

 *في السياره كانت هنا سعيده جدا و بتحكي كانها كانت في معركه وانتصرت

: البنت شدت شعري و شنكلتني على الارض راحت حلا قومتني ونفضت هدومي ..   وقالت لها مش تحاسبي الثانيه بصيت لها من فوق لتحت ...   لقيت حلا اتحولت ولفت شعرها على ايديها وفي حركه سريعه البنت بقت في الارض ....  وحلا قاعده على ظهرها و زعقت فيا وقالت تعالي خدي حقك  ..... بصراحه اتشجعت ونزلت اديتها كام قلم و شديت شعرها و خبطت راسها في الارض  ..... اصحابها جم يدافعوا عنها حلا  قالت لهم اللي عايز ينزل جنبها يقرب و بدات تتني كم القميص ولسه هتقلع الشوز بعدوا  و سابوا صاحبتهم لوحدها  ..... بعدين يا خساره المديره جت

 شاهنده: انت مبسوطه قوي كده  ما ضربتيهمش من زمان ليه 

:بصراحه يا مامي ما حدش كان هيقف معايا بس وجود حلا شجعني وقلت حتى لو  هنضرب منهم هنبقى سوا  .....  تعرف يا بابي احسن حاجه عملتها انك جبت حلا معايا في البيت و المدرسه 

محمد: طب يا حبيبتي بلاش في المدرسه تقولي انها بنت الداده قولي انها بنت قريبنا من بعيد احسن حد يقول لها كلمه تزعلها 

بقلمي سحر السحرتي 

*رديت هو انا هسكت 

:يا محمد بيه انا ما عنديش مشكله لما يعرفوا اني بنت الداده و هعرف ارد على اي حد واخذ حقي شغل امي مش عيب وبابا لو كان عايش كان زمانها متستته وقاعده في البيت

*كلامي دبحه من غير ما اقصد حس قد ايه هو ظالمنا لما شغل مراته خدامه وبنته مفكراه ميت بس ما عملش حاجه 

*وصلنا وهنا في اليوم ده اكلت بشهيه مفتوحه لاحظتها امها وفرحت من التقدم اللي وصلت ليه بنتها 

*عدت اولى اعدادي ونجحنا .....  انا طلعت الثانيه على المدرسه وهنا الخامسه .... شاهي فرحت بتقدم بنتها في الدراسه بس اتضايقت ازاي انا اتفوق عليها .... ما انا متفوقه على المدرسه كلها مش بس بنتك ومن قبل ما ادخل بيتكم

*الغيرة اكلتها قوي 

*امرت بابا انه يرجعني مدرسه حكومي وكفايه عليا كده عملت شغلي والمطلوب مني وممكن افضل قاعده مع ماما عشان هنا مش عشاني 

*الحج ما قدرش يخالف الاوامر وفعلا نقلني ...  فاتشجعت وطلبت منه

: ممكن ارجع عند خالتي

 :انت زعلتي اني نقلتك مدرسه ثانيه 

:لا ابدا بس بستريح مع خالتي واولادها وبحب الحاره واظن هنا بقت كويسه 

*شاهي سمعتنا و امرت وكلنا نفذنا

: انت مفكره من دماغك ترجعي احنا هنا اللي نقول تقعدي او لا

: بس امي هي اللي بتشتغل عندكم  مش انا والسبب اللي جيت عشانه خلاص اتحل 

:ما تحمدي ربنا على النعمه اللي انت فيها هو انت كنت تطولي تقعدي في  فيلا تاكلي و تلبسي احسن حاجه احنا بنشتري لك زي هنا رغم ان المفروض تاخدي لبسها القديم

: انا لو هدومي مقطعه عمري ما هلبس لبس حد و متشكره على النعمه اللي كرمتوني بيها بس عايزه اعفيكم و اشيل من على كتافكم لانكم متكلفين مصاريف زيادة 

:انت يا حيوانه مش عاجبك و بتتريقي كمان على كلامي 

*بصيت لها بكل كبرياء وكرامة 

:لو سمحت انا مش حيوانه ومش هسمح لاي حد يهني انا مش شحاته ولا بطلب حسنه انا عايزه اسيب هنا انا حره

 *رفعت ايديها وادتني قلم خلت شفايفي نزلت دم .... وكانت لسه هتضربني الثاني لقيت ايد بتمنعها و اخذني في حضنه و طبطب عليا و زعق 

*طبعا مش الحاج ابويا وادي آخرة الكبرياء والكرامة 

 :ماما انت مش من حقك تضربيها

: لا من حقي ....  انت بتمسك ايدي و بتمنعني اضربها دي مجرد خدامه بتشتغل عندي 

:حتى لو ...  هي مش عبده وحلا مش بتشتغل عندك وما تنسيش انها اختي

: انا قلت لك كام مره ما تقولش الكلام ده 

:مش بقوله قدام حد غريب بس حقيقه مش هنقدر ننكرها 

بقلمي سحر السحرتي 

*بصلي ومسح دموعي 

:معلش يا حلا ما تزعليش

 :لو كان بابا عايش كان رد عليها انا ماشيه ولو ماما هتسيب الشغل و نترمي في الشارع ارحم من الذل و الاهانه 

:ولو قلت لك عشان خاطري خليكي لان فنجان القهوه اللي بتعمليه لي الصبح قبل ما اروح الجامعه بيظبط يومي هتحرميني منه

 *وقام حضني وبكيت بشده في حضنه

: ادخلي دلوقتي و بالليل عازمك على سينما انت وهنا 

*ضحكت وقلت له :فيلم اكشن 

:انت شرانيه ليه فكرتك بنوته رقيقه حتقولي فيلم رومانسي 

*شاهنده شافته مهتم بيا و بزعلي قامت من الجنينه طلعت وهي هتطق لانها مش بتقدر عليه لكن هتطلعه على الحاج كمان شويه 

*مشيت ودخلت غرفتي اكمل بكا .....  وسامح اتكلم مع بابا وعاتب عليه ان كان المفروض هو اللي دافع عني لانه صاحب اقتراح اني عشت معاهم

: كمان يا بابا ليه تسمع كلام ماما و ترجعها مدرسه حكومي

: يا سامح ماما لما بتزعل زعلها وحش قوي مش بقدر عليها 

:خلاص فهمها ان حلا مسؤوله مني وبلاش تكلمها او تتعرض لها باي اهانه

: لا يا سامح فهمها انت لا تفكر انه كلامي 

*ماما وهنا اتفرجوا من بعيد على اهانتي و ضربي وما حدش اتكلم كانهم ما يعرفوش 

*فضلت فتره تعاملي مع هنا متغير لغايه لما قلت وهي ذنبها ايه ورجعنا عادي زي الاول 

*المدرسه بدات والبنات اللي كانوا بيضايقوا هنا لما لقوني مشيت حاولوا يضايقوها ثاني لكن هنا ما سكتتش وضربتهم كلهم  ..... ورجعت حكيت لمامتها قدامنا بس لسه خايفه منهم  .... فانا قلت لها 

:خلاص يا هنا مش هروح المدرسه بكره و جايه معاك المدرسه الصبح 

شاهنده  :هتروحي باي صفه المدرسه هتمنعك تدخلي

 :مش هدخل هكلمهم من على الباب بتاع المدرسه واي حاجه تحصل هتبقى بعيد عن اداره المدرسه

يتبع 

                  الفصل الثالث من هنا

لقراءة باقي الفصول من هنا