رواية اجهاض حب
الفصل الثالث3بقلم اميره موسي
فتحت نور عيونها براحه و بخوف كان ادهم بيغطيها وغطى عم محمود و فرش جمبهم و صلى الفجر و بعدها كمل نوم
و الصبخ بدري جه الدكتور و طمنهم و خرجوا من المستشفى و صل ادهم عم محمود ونور للبيت وروح بيته راح استحمى و غير وسلم على مامته و حكى لها اللي حصل وقالت له استنى افطر الاول وبعدين انزل لكن ادهم قالها هتاخر على الشغل وبلغها ان عازم عم محمود وبنته على الغداء نفسهم ف المحشي والبط بتاعها ونزل ادهم رايح شغله و افتكر انه نسى المفتاح عند عم محمود امبارح
نزل ادهم من بيته وراح لعم محمود و خبط على الباب ردت نور من جوه واللي كانت ف المطبخ بتعمل فطار
نور : مين ايوا جايه اهو وراحت تفتح الباب وناسيه انها بالبجامه اللي غيرتها بعد ما استحمت لما جت مع باباها من المستشفى
فتحت نور الباب لقت ادهم ف وشها : ادهم تعالى اتفضل
ادهم ببصة انبهار : هو انا دخلت الجنه بالغلط ولا اي
نور : افتكرت انها بالبجامه و قفلت الباب في وش ادهم و دخلت بسرعه تجيب الاسدالوهي بتلبسه افتكرت انها قفلت الباب ع ادهم رجعت جري بسرعه
ادهم كان واقف على الباب بيضحك و مش عارف يبطل ضحك على ردت فعلها الغريبه
نور فتحت الباب و هي مكسوفه : معلش ي اداهم انا اسفه مكنش قصدي
ادهم : ولا يهمك انا كدا اتاكدت اني مدخلتش الجنه فعلا
نور بتحدي : لا والله
عم محمود كان خارج من اوضته و شاف ادهم على الباب : ادهم تعالى ي ابني واقف عندك ليه ما يصحش تعالى ادخل
ادهم بصوت واطي سمعته نور : اومال لو تعرف ان الباب اتقفل عليا من شويه
نور ضحكت ف سرها و دخلت للمطبخ تاني تحضر الفطار
ادهم كان بيتكلم مع عم محمود وقاله : انا هصفي كل المشروبات و المنتجات اللي مقاطعه و مش هنزل الحجات دي وهجيب البدايل اللي مش مقاطعه في السوبر ماركت
عم محمود : و ماله ي ابني
ادهم : على بركة الله هستاذن انا بقى
عم محمود : لا و الله لازم تفطر معايا
نور كانت داخله بصنية الفطار وقالت : يلا يا بابا تعالوا الفطار
ادهم : انا مش جعان و الله و هتاخر على الشغل
نور بتلقائيه : شكلك كدا بتتهرب عشان الغداء
ادهم : كويس انكم فكرتوني ان شاء الله العصر تعملوا حسابكم تشرفونا نتغدى سوا
عم محمود : طيب اقعد افطر الاول عشان لو مفطرتش مش جاي .. قعد ادهم فطر معاهم ونزل شغله
و على قبل العصر قفل السوبر ماركت وروح البيت لقى مامته مجهزه كل حاجه
ورن على عم محمود اللي كان بيلبس و ردت نور
نور : الو
ادهم : اخيرا رديتوا مش يلا و لا اي الاكل هيبرد و بعدين تعالي شوفي الطبخ صح
نور بضحك : حاضر جايين اهو
و فعلا و صل عم محمود ونور بنته
نوال ام ادهم : اهلا و سهلا نورتونا الف سلامه عليك ي عم محمود اتفضلي يابنتي بسم الله ماشاء الله اي القمر ده
عم محمود : يزيد فضلك والله يسلمك ي ام ادهم
نور بكسوف : انتي اللي قمر ي طنط
ادهم : اي هنقضيها سلامات ولا اي البطه هتبرد
الجميع ضحكوا و اتوجهوا نحية السفره
و بعد غداء كان لذيذ جدا على حد وصفهم
نزل ادهم و عم محمود راحوا الشغل و فضلت نور مع ام ادهم و ساعدتها في غسيل المواعين و فضلوا يتساهروا كتير اوي نوال ام ادهم كان نفسها تخلف بنت و نور كان نفسها امها تعيش معاها اكتر و كان نوال لقيت نور ونور لقيت نوال .. وخاصه ان نوال كانت زهقت مع ادهم انه يخطب و كان رافض و حجته انه مش لاقي حد مناسب .. نور عجبت نوال اوي و فضلت نوال تكلمها عن ادهم و هزاره و غلسته و حياته وانها نفسها تفرح بيه وطبعا مين يشهد للعروسه
مرت الايام سريعا و الاسابيع سريعا وبعد مرور شهرين و كانت نور خلصت امتحاناتها و كان العائلتين بقوا اهل لبعض ونور وادهم قربوا لبعض جامد و ادهم كان كل يوم يروح بيت عم محمود الصبح عشان ياخد المفتاح و اخر اليوم يروح يودي له المفتاح رغم ان عم محمود قاله خلي المفتاح معاك واعمل نسخه بس ادهم كان بيرفض " طبعا عشان يشوف نور"
في ليله بعد رجوع ادهم من الشغل
نوال ام ادهم :ادهم تعالى عايزاك
ادهم : نعم ي ماما
نوال : غيري هدومك على ما احضر لك العشاء
ادهم : حاضر
نوال حضرت الاكل واتعشت مع ادهم
ادهم :عمل الشاي وجه قعد جمب مامته
: خير ي ماما في اي
نوال : هتفرحني بيك امتى ي ادهم
ادهم : لما الاقيها بنت الحلال
نوال : على اساس لسه ملقتهاش هتكدب على امك
ادهم بضحك : وهي مين دي بقى سعيده الحظ
نوال : لا والله انت ال سعيد الحظ اكيد نور بطل استعباط
ادهم : سيبيها لوقتها ي ماما
نوال : ماهو دا وقتها يا حبيبي مفيش وقت تاني انسب من كدا
ادهم : لما يجي الوقت المناسب يا ماما
ادهم كان مقدم في كذا شركه و كان من ضمنهم شركه في اسكندريه كان نفسه يشتغل فيها بس للاسف كالعاده قالوا له هات رقمك و هنكلمك و بقاله اسبوع منتظر يكلموه
على جانب اخر
عم محمود : نور ناويه على ايه بعد الكليه
نور : و الله يابابا لسه مش عارفه ممكن اقدم في اي شغل و ف نفس الوقت مش عايزه اسيلك لواحدك
عم محمود بضحك : ليه هو انا صغير ما بكرا تجوزي وما اشوفش وشك
نور : جواز اي بس ي بابا
عم محمود : يا بنتي عايز افرح بيكي واطمن عليكي قبل ما اقابل رب كريم
نور بزعل : ليه بس يا بابا بتقول كدا ربنا ما يحرمني منك
عم محمود : يا حبيبتي هو انا هعيشلك اكتر ما عيشت اوعديني بس انتي منين ما يجي ابن الحلال نتوكل على الله
نور بضحك : ربنا ما يحرمني منك يابابا حاضر يجي بس هو
مرت الايام سريعا و الشركه كلمت ادهم وراح عامل انترفيو وقالوا له انت بنسبه كبيره معانا و هتبدا شغل من اول السنه الجديده ١/١/٢٠٢٤ بداية شغلك و مضى ادهم معاهم عقد الشغل
رجع ادهم البيت لمامته عشان ي فرحها
ادهم : ماما ي نوووووال
نوال : نعم يا ادهم طمني عملت اي
ادهم : الحمدلله ياماما اتقبلت و هبدا شغل يوم ١/١
نوال : الف مبروك ي حبيبي بس دا لسه فاضل شهرين ونص
ادهم : كويس اكون ظبط اموري فيهم ونبيع البيت هنا و ننقل هناك احسن لنا
تاني يوم راح ادهم لعم محمود البيت و خبط فتحت له نور و كانت زعلانه ان ادهم ما جاش امبارح كالعاده وفضلت مستنياه كتير و طول اليوم كانت متعصبه وزعلانه وعم محمود عرف دا وحاسس بيها
فتحت نور الباب : اتفضل بابا جوه ادخله
ادهم : حتى وانتي مبوزه قمر يخربيت جمال امك
نور بكسوف : احترم نفسك هاه و بعدين مخصماك اصلا
عم محمود : مين يا نور
نور : يا بابا دا ادهم
عم محمود : تعالى ي ادهم
ادهم : ازيك ياعم محمود عامل اي
عم محمود : الحمدلله .. يانور هاتي شاي لادهم
حاضر يا بابا
نور : دخلت المطبخ عملت شاي لادهم و هي داخله توديه الاوضه سمعت ادهم بيكلم عم محمود و بيقوله
ادهم : الحمدلله ياعم محمود اتقبلت في شركه كبيره جدا واخيرا هشتغل بشهادتي
عم محمود : الف مبروك ي حبيبي شركة اي
ادهم : شركة استيراد وتصدير في اسكندريه و ان شاء الله هنقل انا وماما هناك و هبيع بيتنا هنا
عم محمود بزعل لانه كان بيطمن بوجود ادهم سواء في بيته او في شغله : زعلتني والله يابني انك هتعد بس فرحت اكتر لشغلك ربنا يوفقك يارب
نور : كانت واقفه على الباب وسمعت الكلام دا دخلت حطت الشاي
عم محمود : باركي لادهم يا نور اتوظف في شركه
نور وعيونها كلها قلبت دموع : مبروك وخرجت جري راحت اوضتها وفضلت تعيط .. ادهم لاحظ عنيها و دموعها و استاذن و مشي و فضل طول اليوم تفكيره فيها ..
الليل جه وراح ادهم لعم محمود البيت عشان يديله حسابه و المفتاح
خبط ادهم على الباب : نور فتحت له ووشها باين عليه الزعل و الدموع ودخلت اوضتها
ادهم : نور نور
نور : اتفضل ادخل لبابا
دخل ادهم لعم محمود وخلص معاه و نزا و مشفش نور و كان بيتقطع من جواه
تاني يوم الصبح اتكرر نفس الوضع بس نور مفتحتش
وعم محمود ال فتح له