رواية امتحان الحب
الفصل الثامن8
بقلم جمانه السعيدي
#البارت__8
#امتحان الحب
#البارت الثامن
جمانه السعيدي
مسك...سنتين واني كاعده بلبيت
شبه مقاطعه الدنيا
مااختلط ولا اطلع ولا اجامل احد
اشتغل بلبيت واطبخ الحد مايرجعن امي وخالتي من الشغل اتصفح النت
واتابع مسلسلات افلام
الوحيده الي ازورني دائما حنيين
اني الصراحه مااروح الها هي تجيني كل اسبوع
او عشر ايام او اسبوعين تجيني
نكعد نسولف شويه وتروح
شكد امي تتوسل بيه اطلع اشوف الناس
ابد مالي خلك ومااحب اي تجمعات
ومااحب اختلط بااحد عايشه بعالمي الخاص وحدي
سنتين واني حابسه نفسي بلبيت
محد اتقدملي يطلبني للزواج بهاي الفتره
وحتلو تقدملي احد أرفض ماعندي استعداد للزواج مره ثانيه كرهت الرجال
انصدمت صدمت عمري بعد ماعندي ثقه بااي احد
جمانه السعيدي
شعري نزل على كتفي
صار يخيل احلى من قبل الف مره
بس اصبغه دائما بسبب العلاجات الي اخذتها يطلع بي شيب
كنت أصبغه دائما
جسمي رجع مثل قبل واحلى
وأهم شي خدودي رجعن حمر
كل ست اشهر اروح للمستشفى اسوي فحص شامل
الوظائف الجسم واتأكد اني صحتي تمام
كل مره الدكتور يطمني ويكول كلشي تمام
بس امشي على نفس هذا النظام الغذائي وانت مايرجع عليج المرض ابد
طبعا خالتي وامي ياكلن وياي خضروات وفواكه
مره بلاسبوع دجاج شوي ومره سمج شوي
امي تكول شلون احنا ناكل وانتي تباوعين علينا
ناكل نفس اكلج
امي هاي نعمه ماكو مثلها بكل الدنيا
كلما اشوفها تدعيلي احمد ربي الف مره واشكره
اني استعاديت حياتي بفضل رب العالمين وفضلها
جمانه السعيدي
بهاي الفتره وزارة التربيه طلقت التعيينات المجانيه
كل الناس محتفله بهذا الخبر اله اني عبالك الشغله مو يمي
امي...خل نقدم على هاي التعيينات
مسك....مجانيه يعني بس تعب
خالتي....حبيبتي حتلو بدون فلوس اهم شي اطلعين تشتغلين تشوفين الناس
حابسه نفسج بلبيت ليش ايجوز بعدين يثبتونكم
مسك...مالي خلك عليمن متعبه نفسي
امي...لا لازم تحاولين تبدين من جديد انتي شخسرانه
اطلعي واشتغلي بلكت تتوضفين صدك
بلكت تجيج قسمه وتزوجين
مسك...ازوج اني ازوج شمالني تحجين صدك
بعد للموت ماازوج
مستحيل اعيد هاي التجربه مره ثانيه
خالتي...عوفي الزواج اشتغلي تحركي شوفي الناس
ترا هاي مو حياة كل النهار بلبيت
امي...اني باجر اخذ اوراقج واقدملج
قدمت امي اوراقي بعده بكم شهر وماكو ماطلع اسمي اتوقعت مراح يطلع ابد
بس المفاجئه طلع اسمي بعد ٣ اشهر اواكثر شويه
بس المدرسه بعيده
ومنطقه شعبيه
ادرس ابتدائيه يعني مو متوسطه او اعداديه نفس تخصصي
مسك...بعيده مااروح ومعلمه مااريد لو مدرسه لو ماادرس اريد مدرسه مو معلمه
امي...اني اشوف خط يوصلج ويرجعج على حسابي
بس اطلعي الخاطر الله
ثبتي نفسج وبعدين اني احاول انقلج الاي متوسطه
بس ثبتي نفسج لا يروح اسمج
اخذتني امي جبت ملابس جديده علمود الدوام
وحجابات وجنط واحذيه
تريد تحفزني حتى اشتغل بس اني ابد ماعندي واهس
فقدت الشغف
فقدت اي احساس حلو بهاي الدنيا
جمانه السعيدي
اول يوم رحت بتكسي حتى اثبت نفسي
واتعرف على الكادر واشوف المدرسه
وصلت مدرسه قديمه والحي الي بي المدرسه كلش شعبي
الكادر نص معلمين ونص معلمات
طبعا المعلمات القديمات ضاجن منا عبالك راح ناخذ رواتبهن
احنا الجدد ٣ بنات وكاتبات ثنيين
من اول يوم انطنا حصصهن حتى ندرس وهنا كاعدات بلاداره
المدرسه بيها مدير مو مديره
المعلمين بغرفه وحدهم والمعلمات وحدهن
اني من اول يوم عازله نفسي
بس البنات الي وياي يسولف ويضحكن واني كاعده وساكته
بس اباوع بعيوني اريد الدوام يخلص وارجع للبيت
تعبت لان صار هواي ما طالعه
تعبت وتمللت بسرعه
اخذت حصه صف رابع بعدين
دخلت صف خامس حصة انكليزي
اكو بنيه من دخلت بس تبجي
مسك...ليش تبجين
هاله....بطني توجعني
مسك...تعاي روحي للاداره اخذي اجازه واطلعي
هاله...مايقبلون ينطوني اجازه
البنات...ست استاذ حمزه المعاون حباب بس يعرف هي مريضه
يطلعها بس استاذ قيس المدير مايقبل
مسك...منو تروح تشوف استاذ حمزه وين
لو انتي ترحين علي حبيبتي
هاله....اخاف لان كاعد وياا المدير
مسك....منو تروح تحجي وياا استاذ حمزه يجي يشوف هاله
كل البنات سكتن
مسك...زين لا طلعون صوت اني راح احجي وياا المدير
طلعت رحت للاداره
دكيت الباب المدير كاعد وكاعد وياا معلم
شكله مرتب لا بس قاط زيتوني ونضاره
جان مدنك بيده أوراق يقرا ويصحح
مسك....صباح الخير
المدير صباح الخير
حمزه...صباح الخير رفعت راسي هاي شنو شكد حلوه
جمانه السعيدي
مسك...اكو طالبه مريضه ممكن تطلع للبيت
المدير....شلون تطلع لازم اهلها يجون ياخذوها
مسك...اي اتصلو على اهلها خطيه
المدير....من رخصتك استاذ حمزه روح شوف شنو السالفه
مو طالبات ضيم شكد يتحججن
كل يوم حجه شكل
حمزه...تفضلي كدامي من رخصتج اي شعبه هي
مسك...الخامس ب
مشيت وهو طلع قبلي وصل للصف
دخل كل الطالبات وكفت
حمزه....منو المريضه
وكفت الطالبه هاله
حمزه...اهووو هم هاله شبيج ست هاله
هاله...بطني توجعني
حمزه....من الصبح لو هسه كامت توجعج
هاله....لا هسه كامت توجعني
حمزه...خاف جوعانه
هاله.. لا
حمزه...اطلعين للبيت
هاله....اي اريد اطلع
حمزه.... يله تعاي عندج رقم ابوج
هاله...ابوي بلشغل وامي ماتكدر تجي اخوي زغير ويبجي
حمزه.. تعاي اني اوصلج
مسك...التفت عليه وكال اسف ست أخذنا من وقتج
مسك...لا ماكو مشكله
انتهى الدوام ورجعنا اني وبنيه ثانيه وبأي بتكسي للبيت
وصلت ميته تعب
ماصدكت اكل لكمه وانام على وجهي من التعب
اليوم الي بعدا من دخلت للمدرسه دخل استاذ حمزه وياي
حمزه...صباح الخير
مسك... صباح الخير
حمزه....ترا بعدج ما شفتي شي من الطلاب والطالبات
صدكي شعر راسج يشيب
مسك.... خير انشاء الله
الدرس الثالث كان عندي حصه واكو طلاب طلعو عدهم رياضه المدرس عافهم ودخل
راسا تعاركو بينهم اجا استاذ حمزه ومعلم الرياضه
كوه فضو هاي العركه
اني كنت واكفه باب للصف واباوع عليهم اني وكم معلمه
من فضت العركه
رفع راسه استاذ حمزه شافني واكفه وعيني عليهم
ابتسم ورفع ايده عود فضت
اني مادرت بال دخلت للصف وكملت حصتي
اليوم الي بعده من اجيت للدوام شفته واكف برا
منتضرني او منتضر غيري مااعرف
بس وصلت سلم عليه ودخلنا سوا للمدرسه
حمزه....صباح الخير
مسك...صباح الخير
حمزه....شلونج بلدوام تعودتي
مسك...تمام الحمد لله مااريد الحديث يطول بينا
من رخصتك استاذ
حمزه...تفضلي
الحصه الرابعه اجا يدور عليه بلصفوف
لان احنا بعد حصلنا مخربطه مرات ناخذ حصص المعلمات
شافني واكفه على صف رابع
حمزه....ادور عليج جبتلج جاي
مسك...شكرا مااشرب جاي هيج وكت
حمزه...هلمره اخذي لان اني جبته
مسك...شكرا جزيلا
اخذته منه
كل يوم ينتضرني من ادخل للمدرسه حتى يصبح عليه
ومرات يخلق حجه حتى يحجي وياي
واغلب الوقت اشوفه يراقبني من بعيد
بس اني مجاهلته ماعندي اي دافع للكلام ويااا
بلعكس اتهرب من نضراته اليه
لا احجي وياا ولا وياا غيره كلامي بحدود
كملت شهر واني اداوم بهاي المدرسه وشبه اتعودت على الدوام وعلى هوسه الطلاب
الحد مايوم تفاجئت بي بنتضرني من خلصت الدرس
حمزه...ممكن احجي وياج بموضوع مهم
مسك...تفضل
حمزه...هنا نحجي
مسك....اي هنا ووين لعد
حمزه...هوسه الطلاب كلشي مراح نفتهم
مسك....لا افتهم احجي اذا موضوع مهم
حمزه...ممكن رقم تليفونج
مسك.. نعم
حمزه...لاتفهميني غلط اني ماعندي هاي السوالف
وانتي انسانه محترمه
اني كلش معجب بيج وبااخلاقج
واذا ماعندج مانع اريد اتقدم اطلب ايدج للزواج
اذا ماعندج مانع
ردت احجي وياج بهذا الموضوع
مسك....اسفه طلبك مرفوض
مااعرف ليش صرت عصبيه من حجا وياي
حمزه...شكرا
عافني وراح واني كلش ضجت ليش مااعرف
اي واحد يحجي وياي بموضوع الزواج
اضوج
رجعت للبيت ضايجه
من كعدنا ناكل امي حست اني ضايجه
امي...شكو اليوم مغيمه الدنيا لا حجيتلينا عن الطلاب اليوم ولا عن مشاكلهم
مسك....اليوم معاون المدرسه طلبني للزواج
امي....يالله اي هاي الاخبار الحلوه
مسك... رفضت
خالتي....ياا ليش شبي سمعته موحلوه لو شكله مو حلو
مسك....هيج بدون سبب رغم هو انسان محترم
وكل المدرسه تحبه
امي...ليش حبيبتي انطي النفسج مجال مو كل الزلم
مثل مازن هو شاف حياته انتي هم شوفي حياتج
مسك....مااكدر مااكدر نفسيتي ما تتقبل اي احد
امي...والى متى
مسك....انتي ضايجه مني ترديني ازوج حتى تخلصين مني
امي....لا ا ريدج تزوجين وافرح بيج واشوف جهالج
اشوفج سعيده وياا الانسان الي يستاهلج
حبيبتي الدنيا ماتوكف على احد عيشي حياتج
لاتبقين مضيعه نفسج بلماضي
مسك....مااحب احجي بهذا الموضوع ابد
امي....انطي للولد فرصه تعرفي علي اذا حسيتي نفسج مرتاحه ويااا
اتوكلي على الله
مسك....الانسان الي حبيته عشر سنوات وثقت بي خاني
شلون اثق بواحد صار شهر من عرفته
امي...مو كل اصابيعج سوا ولا كل الزلم نفس الشي
اختبري وادرسي اخلاقه
وبعدين قرري لا تستعجلين بهيج قرار ابد
بس حاولي لا تبقين واكفه بمكانج وتعوفين العمر يضيع منح