رواية اولاد تسعة
الفصل الرابع عشر14
بقلم جمان فريد
"البي تسعه بيت المال مرة وحده!"
نوال "صديقة ربيعه" قالت وهي تضحك بفرح..
/والله تستاهلي ياربوعه فرحتلك من قلبي..وقعدت تزغرد..
ربيعه وهي تضحك قالت..
/نجيها ياربي..
امال "صديقتها" قالت بإبتسامه..
/مبارك ياسمحه مبارك لكن هاه ردي بالك تنسينا بعد ياخدك..
نوال قالت..
/تخافي هو معاش يخليها تواصلنا..
ربيعه:لالا مستحيل نقطعكم..انتم وقفتوا معاي في ايامي الصعبه وقعدتوا شادين في صحبتي بعد سيبت القرايه وحتى بعد اللي صار فيا اني وماليا..مش قليله اصل بش ننسى العشرة يابنات..
ابتسموا صاحباتها وعيونهم مليانات دموع..
ع خشة عصمت بسفرة الضيافه وهي تقول..
/هيا خودوا خودوا..فرقت عليهم بسرعه بعدين حولت صحن الحلو وحطاته ع الطاوله وقلبت السفرة وبدت دربك وتغني..
"حصلتيه رفيع القيمه..كامل ومكمل يازينه"
ضحكت ربيعه بخجل والبنات وهما يضحكوا قعدوا يصفقوا ويغنوا وراها..
وعصمت متابعه تغني..
"حصلها ياعليك ذهيبه خير من ألف جني في جيبه"
والبنات شاشوا معاها وهما يصفقوا ويغنوا وعيون ربيعه تتأمل فيهم بإبتسامة فرح وعيونها مليانات دموع..
🌿ومن اجواء الفرح والبهجه في حوش عصمت لأجواء الغم والنكد في قصر ذهيبه..
🍃في صالون العيله..
قاعدات فريحه ونزيهه مقعمزات وكل وحده فيهم كانت سرحانه بفكرها بعيد عن التانيه..
فريحه كانت تتفكر في ايامها الحلوة مع تسعه وكلام الحب وابيات الشعر اللي يقتبسلها فيهم بعنايه،تتفكر في حنه عليها ودلاله ليها..تتفكر في هدا كله وتسأل في قلبها المجروح زعمه الايام هادي عدت لغير رجعه!
لكن ضرتها كانت تفكر كيف بيولي شكل حياتهم في وجود ربيعه..كيف بتتحمل تكون وحده زيها ضرتها وتنحط هي وياها في مكانه وحده!؟ وهمها الأكبر كلام الناس بالذات الاقربين منهم واكيد المقصود هني اختها اللي تحبها هلبه بدريه..
وهي تفكر في هدا كله كانت تحس بدمها يغلي غلي في عروقها..تبي طلع غيظها..تبي تفش غلها لكن مش عارفه كيف..
وفي هاللحظه تخش عليهم بنتها كريمه وهي رافعه ثريا في حضنها وقالت..
/ماما لقيتها تبكي..
شافتلها بغل وقالت..
/من قالك جيبيها!؟
كريمه خافت ومن خوفها رخت اختها شويه بعدين شدتها..
وتنوضلها امها وتمشيلها بإندفاع..خدت منها اختها وطاحت فيها ضرب..ع راسها ع وجهها ع ظهرها ع كتفها وهي تقول بغضب شديد..
/ياغبيه ياغبيه يافاشله ناقصاتك اني ناقصه همك الأغبر..
وتفكها منها فريحه وهي تقول بصدمه..
/نزيهه!
شافتلها نزيهه بغضب للحظات بعدين مشت بثريا وطلعت من الصالون..
التفتت فريحه ع كريمه لقتها شاده خدها وهي تبكي بالعبرة وتقول..
/شديتها ماخليتهاش طيح..
قعمزت قدامها فريحه ع ركابها وضمتها وقعدت تبكي معاها وهي تقول..
/معليشي حبيبتي معليشي..
🌿ومن جهة تانيه كانت هانيه مش متحمله تقعد في القصر بعد اللي عرفاته طلعت وركبت سيارتها وطلعت بيها لحوش مرعي..
▪▪▪▪▪▪▪▪
"مش مستوعبه يافاطمه كيف وحده زي هادي بتولي كنتنا حني"
فاطمه قالت..
/استهدي بالله ياهانيه واسمعي مني..انتي تعرفي خوك كويس..خوك هدا ماتشريش عداوته وماتخلي حد يفرق بينك وبينه..مش مطلوب منك تحبي مرته ولاتصاحبيها لكن احترميها ع خاطر خوك بس..
مسحت هانيه دموعها وقالت..
/كلامك صح لكن مش عارفه كيف بناخد بيه..
فاطمه:قتلك فكري بس في علاقتك بخوك تو تلقي روحك تلقائيا ديري مايخلي هالعلاقه الحلوة تزيد تقوا..
سكتت هانيه وهي تهز في راسها بإيجاب..
ابتسمت فاطمه وقالت..
/باهي خلينا فيك انتي مازال قاعده تفكري في موضوع اسعد..
هانيه فكرت شويه بعدين قالت..
/نبي نشوفه ونهدرز معاه وبعدين نقرر،نبيه يجيني في مكان خدمتي في الوزارة نبي نتكلم معاه ونسمع منه براحتي..
فاطمه:اعطي تسعه علم..
هانيه قالت..
/اكيد مانديرش الحاجه هادي من وراه..
ابتسمت فاطمه وقالت..
/خلاص تو نكلم مرت خوي اليوم ونبلغها ونرد عليك..
🌿وطلعت هانيه من عندها بعد مااعتذرت عن قعادها معاها للغدي..
وهي طالعه لسيارتها انفتح الباب وخشوا غزلان وسلامه وكريمه..
غزلان بفرح..
/هنو..
قرصت هانيه خدها وقالت بإبتسامه..
/غزوله شن جو ياحلوة..غزلان قالت..
/تمام..بتروحي!؟
هانيه:ايه طالعه توا..
سلامه قال..
/خليك ياكوين تغدي هني والله الجو هني خير من غادي..
رفعت حواجبها وقالت..
/فعلا بالذات الايام هادي...غمزتله وقالت..خلاص بنتغدا هني..
خدتها غزلان من يدها وقالت بحماس..
/تعالي..
وهانيه مشت معاها وهي تضحك..
هدا كله وكريم هايم معاها وخلاص ومايندريش الا بخبطه تجيه ع قفاه من سلامه اللي قاله..
/خيرك مبلم هكي!؟
ضربه ع راسه وقال..
/برا قدامي برا..
مشي سلامه وهو يضحك وكريم مشي معاه وهو مبتسم...
🌿🌿🌿🌿
"قامت قيامة يابقليس"
بلقيس وهي تكلم في امها هاتفيا قالت..
/توقعت وخفت هلبه من ردت فعل نزيهه..
"ان شاء الله يمشي عرس هدا ع خير"
بلقيس قالت..
/ان شاء الله..سمعت باب الحوش انفتح قالت..ماما محمد روح بعدين نكلمك..
"سلمي عليه..مع السلامه"
بلقيس قالت..
/يوصل ماما..مع السلامه حبيبتي..
ونهت بلقيس المكالمه وطلعت لراجلها تستقبل فيه زي عادتها بطريقتها المميز..
"روحت افنديا..روحت ياغالي عليا"
محمد وهو يحول في كندرته قال بضحكه..
/لاقاعد في الكليه..
ضحكت وقدمتله شدت ايديه ووفقت ع رووس اصابعها وسلمت عليه بالخد...
هو قال:شكله الزعيم راقد..
قالتله:راقد هو وحنته..
خداها من يدها وهو يقول..
/عاد من الفجر فايقين..
بلقيس قالت..
/من لما خش الربيع وعمتي تقعد فايقه من الفجر بش تطلع هي وعبودي للجنان ويخليها تجري وراه..
ابتسم محمد بعدين قال..
/شن غدانا؟
قالتله:المحشي حبيب قلبك..
شافلها بحب وقال..
/انت بس حبيب قلبي ياسمح..
ضرباته ع ذراعه وقالت بضحكه خجل..
/يووه يامحمد ماتكسفنيش بقى..
ضحك وضمها لقلبه وهما متوجهين لدار النوم..
وصلوا فيها وخشولها..بلقيس حولتله جاكيته وهي تقول..
/عرس خوي تسعه بعد اسبوعين..
محمد ابتسم بدهشه وهو يقول..
/ماشاء الله..
ضحكت بلقيس..
ومحمد قال بضحكه..
/نهنيه والله نهنيه وننقانه شجعني نمشي ع خطاه..
رمت بلقيس الجاكيت ع السرير وجاته..شداته من ياقة قميصه وقالت بضحكه مخيفه..
/بش بعدين نذبحك من غير قبله..
محمد قال بضحكه..
/ليش هذى كله قلت بنكفر! بالعكس بنطبق الشرع وحنكون عادل اكثر من خوك.
زادت شدت ع ياقة قميصه وهي تقول..
/خوي واخد نساوين عاقلات لكن مرتك انت حبيبي مهبوله تقتلك وتقتل روحها..
قاللها بضحكه..
/ويهون عليك عبد المتين!؟
قالتله:يقعد لماليا وماليك ويعيش احلى عيشه..
ضحك وضمها وهو يقول..
/نحبك والله نحبك..
هي قلبت عيونها وقالت..
/ماتمشوش الا بالعين الحمرا..
وهو يسمع فيها ويضحك..
🌿🌿🌿🌿🌿
ويعدوا يومين وترد ربيعه عن طريق عصمت بالموافقه ع طلب تسعه بيت المال ومجرد ماوصل ردها لتسعه طلب من امه تمشي مع مرت بوه لحوش عصمت بش يعطوا لربيعه مهرها اللي كان مبلغ وقدره..
ربيعه قسمت المبلغ..نصه بتصرف منه ع بتاتها والباقي بدسه..
وبدت عصمت تفصللها في مجموعه فساتين وبدالي ناويه تخدم عليهم من قلبها بش ترفع راس ربيعه قدام عيلة بيت المال..
🌿ومن وحدة ربي كافئها بأحلى نصيب لأنها عزت نفسها وصانت شرفها برغم قسوة الظروف اللي مرت بيها والحياة الصعبه اللي عاشتها..لوحده عاشت حياة خير من حياتها مانقصها فيها شي لكنها في سبيل غايات تافهه ومشاعر غبيه
سلمت نفسها وعقلها لشيطان تفنن في خداعها وخلاها بروحها تتحمل العواقب الوخيمه..
🍃"سافر!؟"
زميل عادل في المكتب قال..
/استقال من الخدمه وباع شقته وسافر للسويد او بمعنى اصح هاجر..
وديعه وهي في حالة صدمه قعدت واقفه تشوف للراجل..تحاول تستوعب كلامه..ولاقدرت تستوعب ولاتصدقه..لفت ومشت بسرعه للمكتب اللي تخدم فيه..
خشتله وجت للهاتف اللي علي مكتبها رفعت السماعه وضربت ع رقم شقة عادل..
وزميلاتها اللي معاها في نفس المكتب كانوا يشوفولها بإستغراب...
وهي مازال تراجي في عادل يرد عليها مع ان الخط فصل من اول مااتصلت...
"وديعه"
نزلت السماعه والتفتت ع زميلتها اللي كلمتها.
"خيرك وديعه"
سمعت صوت زميلتها بالصدى متاعه وفجأة الدنيا ظلمت في عيونها وغابت عن الوعي..
♤ممكن حتى التربيه ليها دور مرات مش ديما لأني عرفت ناس عاشوا في بيئة ماتخليهمش ناس صالحين لكن هما ربوا ارواحهم برواحهم زي صديقي المقرب "ريان البندار"..
امم..التربيه..التربيه اللي كان بوي حريص عليها حريص شديد مع صغاره بنات وولاد وكان ديما حاط بين عيونه نصيحة جدي سلامه...
🌿في حديقه القصر كان تسعه مجتمع بصغاره الواعي والفاهم منهم..
سلامه وهشام ومعاذ واشرف وكريمه..
مرر نظره عليهم وهو يقول بإبتسامه..
/بعد اسبوع ان شاء الله بتجيكم ام جديده..
سلامه قاله..
/قصدك بتاخد مراة رابعه..
رفع تسعه حواجبه وقال بإبتسامه..
/زوجه رابعه ليا اني وام رابعه ليكم انتم..
معاذ:بوي ممكن نسألك سؤال..
شافله وقال..
/اسأل..
معاذ:انت علاش عندك اكثر من مراة علاش مش زي عمي مرعي وابهات صحابي في المدرسه عندهم مراة وحده بس!.
السؤال كانت اجابته صعبه بالنسبه لتسعه من ناحيه توصيل الفكرة لطفل عمره 9سنوات..
فجأه سمع الاجابه من غيره يقول فيها..
"لأن بوي غني في كل شي في الفلوس وفي النجاح وفي الصحاب وفي النساوين وفي الصغار وحتى حني اغنياء زيه وبيولوا عندنا بدل الام اربعه"
تسعه هو يشوف لهشام كيف يجاوب بأريحيه وثقه ابتسم من قلبه..
سلامه قال بضحكه..
/جديات مافكرتش فيها هكي..مين قدنا ياعم..
ضحك تسعه..
هني كريمه تكلمت وقالت..
/باهي امي هادي طيبه زي امي فريحه؟
بإبتسامه قال تسعه..
/امك فريحه مازيها حد..
كريمه قالت بقلق وتلقائيه..
/لالا نبيها زي امي فريحه مش زي....وسكتت فجأه لما حست بيد شدت ذراعها وضغطت عليها..كانت يد هشام..
هي شافتله بضيق وسكتت وبوها قال..
/تعالي بابا تعالي..
ناضت كريمه من ع كرسيها ومشت لبوها لما وصلت فيه ضمها وقعمزها ع رجله وخوها معاذ يشوفلها بنظرات فيها شي من المكر..
ورجع تسعه يحكي في نفس الموضوع وهو يوزع في نظره عليهم..
/اللي نبي نقوله ان امكم الجديده بإذن الله لما تجيبلكم خوت نبيكم تحبوهم زي ماتحبوا بعض وماتخلوا شي يفرقكم عن بعض تفكروا ديما انكم كلكم صغار تسعه بيت المال..
كلهم هزوا رووسهم بالموافقه ع كلامه ومنهم اشرف اللي قعد مكتفي بالإستماع وهو يحاول يفهم الحديث اللي دار قدامه..
🌿🌿🌿🌿
"ماعجبنيش مافيش في شخصيته شي جذبني"
فاطمه قالت بإبتسامه..
/القبول اهم حاجه في الزواج ومدام ماعجبكش خلاص..
هانيه قالت:مازعلتيش فطومه ولا..
فاطمه قالت وهي مبتسمه..
/وعلاش بنزعل حبيبتي المسألة هادي مسألة نصيب والنصيب بيد ربي..
ابتسمت هانيه وقالت..
/هو هدا نصيب..
فاطمه قالت..
/ربي يبعتلك نصيب باهي يستاهلك..
هانيه قالت بإبتسامه..
/آمين..
وحديثهم هدا كان يسمع فيه كريم من ورا باب دار المعيشه وهو في قمة الفرح ومن قلبه قاعد يدعي..
"يارب ماتخليهاش تتزوج لين نكبر وناخدها يارب"
🌿🌿🌿🌿🌿
"بوكم في شن كان يبيكم؟"
كلهم التزموا الصمت ماعدا معاذ اللي جاوب من فوره..
/قاللنا بتجيكم ام رابعه..
رفعت نزيهه حاجبها وهي تقول بإزدراء في نفسها..
"هدا اللي ناقص"
وكمل معاذ كلامه وهو يقول..
/كريمه قالتله نبيها زي امي فريحه مش زيك..
كلهم شافوا لمعاذ بغضب وحده ماعدا كريمه اللي كان تشوف لأمها وهي تقول بخوف..
/لالا والله ماقلت هكي..
امها قالت بنرفزة وازدراء..
/خلاص اسكتي اسكتي..مررت نظرهم عليهم وقالت..خلاص بروا لدياركم..
مشوا الاولاد وقعدت كريمه اللي شافت لأمها وقالت بحزن..
/اسفه ماما..
نزيهه شافتلها شويه بعدين مشت وخلتها تبع فيها بعيونها اللي دموعهم تنزل دمعه ورا الثانيه..
🌿الدمعه اللي كانت تشد فيها حسناء وهي تسمع من تسعه كلامه عن زواجه الرابع هاتفيا..
"يبدا الاسبوع الجاي ان شاء الله وبعده حنسافر اني زوجتي فنبيك تستني عليا الفترة هادي وبإذن الله حتسمعي اخبار تفرحك"
بلعت ريقها وقالت..
/إن شاء الله..
سكت شويه بعدين قال..
"بنطلب منك طلب عارف انه مرفوض بنسبة 90% لكن قلت خل نجرب حظي"
ضحكت ونزلت دمعه من عينها وهي تقول..
/بتعزمني ع العرس صح؟
ضحك بعدين قال..
"صح"
تماسكت ع قد ماتقدر وهي تقول.
/عادي مش مشكله ع الاقل نشوفوا لون العروسه وزولها...
قال بضحكه..
"ياودي المهم تجي وتغيري جو"
ضحكت وهي تبلع في غصتها بعدين قالت..
/مبارك وربي يتمم ع خير"
"اللهم آمين..ماتبي شي"
قالت:لاشكرا..تصبح ع خير..
"قدامك كل خير"
سكرت حسناء السماعه وع وجهها بدت ملامح الحزن..
"حسناء"
شافت لخالتها شويه بعدين طاحوا دموعها وهي تقول..
/مش عارفه كيف هكي ياخالتي..مش عارفه امتى صار وكيف صار..كيف ماحسيتش اني حبيته قوليلي..
نبيهه قالت بحزن..
/من قبل ماياخدك واني حاسه بيك من كلامك عنه كان واضح ان مأثر فيك هلبه لكن انتي كنتي تهربي من مشاعرك..
حسناء قالت بألم..
/مشناه الحب كيف يخلي البنادم ضعيف وياخده من نفسه..بديت نحس في روحي نسيت نفسي نسيت من هي حسناء تاشفين وليت نبي نكون حسناء مرت تسعه بيت المال بس..
نبيه قدمتلها وهي تقول..
/وانتي مرته يابنتي هو كان يشوف منك القبول حيخليك مرته بمعنى الكلمه..
قالتلها بنبرة باكيه..
"لكن هو مايبيش"..وهربت بضعفها لدارها لمكان ماتخلي حد يشوفها فيه منهارة..المشكله ان وجع الحب من طرف واحد هو واحد من اكثر الأوجاع قهرا ومحاولة كتمه مرهقه للغايه...
🌾🌾🌾🌾🌾🌾
"ترفعني للسوق؟"
حط طاسة الشاهي وقال..
/وين تبيني نرفعك؟
فطيمه بشي من الربكه قالت..
/ولاخليني نمشي للخياطه التركيه تفصلي قفطان؟
كمال قاللها بملامح وجه معكرشة..
/تبيني نخليك تلبسي المقنط والعريان!؟
فطيمه قالت بتوتر..
/لالا نخليها تفصلي قفطان مستور..
قاللها بنرفزة وانزعاج..
/اسمعي ماتكثريش دوة وتكسريلي الراس خودي قفطان من اللي تجيب فيهم خديجه مرت الساعدي واسكتي..
سكتت وهي تشوف للتلفزيون بضيق والدمعه في عينها..
هو شافلها قال بضجر..
/نوضي نوضي اقلبي وجهك..
ناضت ومشت طلعت ودموعها ينزلوا وهو يقول..
/مراة منكده العيشه معاها تقصر العمر لولا الصغار ماخليتها تقعدلي فيه..
خدي طاسة الشاهي رشف منها لقاه برد زاد عصب وحذف الطاسه ع الحيط..
🌿🌿🌿🌿
ويعدي الاسبوع..ويبدا عرس تسعة وربيعه..
عصمت عزمت جيرانها في الشارع كلهم ومعارفها في البلاد تبي ربيعه تفرح من قلبها وتحس انها عروس بمعنى الكلمه..
حتى صاحبات ربيعه دارولها اجواء حلوة وخلوا فرحتها تزيد وهي مع هذا كله كانت تحمد الله في كل لحظه اللي رزقها نصيبها من الفرح وخلاها تعيش سعاده حقيقيه بعد عمر من العذاب..
🌿يوم عقد القران..
كان تسعه واقف مع خوه قيس ومرعي ولد عمه في جنان حوش محفوظ اللي جي بمرته مع قيس بش يحضروا الفرح..
🌱تسعه وهو يشوف للساعه قال بتذمر..
/تي وينه هدا لتوا!؟
ويطلع محفوظ وهو يمسح في العطر حوالين رقبته..
تسعه قاله بتهكم..
/نحسابوك متت داخل!
محفوظ قال بضحكه..
/ياريت درتها بش خربت عليك..
ضحكوا مرعي وقيس اما تسعه قعد يشوفله بإمتعاض..
هو ضحك وقال..
/لالا بعيد السو عليا ان شاء الله نعيش ونحضرلك الاعراس.. ضيق عيونه وقال..لالاغير دقيقه الخانات كلها تعبت ولا!؟
قدمله تسعه وشده من قفاه وقعد يجر فيه للباب..
محفوظ قال بضحكه..
/بالشويه عليا مرتي مازال تبيني..
ويوصل تسعه للباب ويفتحه ويدف محفوظ برا ويطلع وراه ويلحقوهم مرعي وقيس وهما يضحكوا بدموعهم...
🌿ويستمر محفوظ في مناشبته لتسعه لبعد قران زغرطله اربعه زغاريط وخلا الحاضرين يضحكوا وتسعه اولهم..
🌵اما عند ربيعه بعد ماوصلهم الخبر عن طريق واحد من رجال الشارع كان حاضر عقد القران..صاحباتها قاموا الدنيا بالزغاريد والاهازيج ورقصوا ربيعه اللي كانت تخفي في فرحتها بملامح ابتسامة خجل..
▪▪▪▪▪▪
"محضر!!؟"
هانيه قالت بتهكم..
/اي ياحنه بيديرلها محضر بنت الباشا..
نزيهه وهي مصدومه قالت..
/من قالك؟
هانيه قالت..
/تي توا كنت مع ماما في قاعة في الاحتفالات سمعتها وهي تحكي مع مهندسه الديكور قالتلها نبيك تخدمي ليوم الحفله ويوم المحضر..
شافت نزيهه لفريحه وهي تقول بضحكه صدمه..
/العدل باين من اولها!
هانيه قالت..
/اني هدا اللي قهرني انتم مايندارلكمش محضر ويندار لهالشلافطيه!!راهو هدا مؤشر خطير ردوا بالكم تسعه متغير هلبه..
فريحه وجهت نظرها للفراغ وعيونها مليانات حزن اما نزيهه قالت..
/ورب العزه ماني مخليتها طول معاه..
هانيه:لكن بالعقل وبالهدوء يانوزي..ولفت ومشت طلعت من حداهم..
نزيهه بعد ماكانت تشوفلها غيرت نظرها لفريحه لما شافت حالتها تنهدت وقالت..
/صدقيني يافريحه الفرخه هادي مش اكثر من نزوة لتسعه وتو تجي لكلامي..
ابتسمت فريحه بألم وقالت..
/نزوة يدير ع خاطرها هدا كله يانزيهه!
سكتت نزيهه وهي تشوفلها بضيق..
فريحه وهي تفرك في ايديها ببعض قالت بألم..
/خلاص اني تقبلت ورضيت بالامر الواقع بعد ماصدقت ان مافيش حب يقعد العمر كله..تو نتخطى حنتخطى ونعيش لنفسي وصغاري ومعاش بنراجي منه شي..
نزيهه:غلط يافريحه..انتي هكي سلمتي فيه لهديكا الوضيعه..
فريحه:زي ماهو دار يانزيهه..
نزيهه:انتي اللي هجرتيه..
فريحه قالت بإبتسامة تهكم..
/ع اساس فرقت معاه..تنهدت..هيا سلم وخيتي خل نطلعوا نقعمزوا مع الناس ..
ومشت فريحه ونزيهه طلعت وراها وهي مضايقه ع خاطرها وفي نفس الوقت غلها ع ربيعه زاد كبر..
🌿🌿🌿🌿
وتجي لربيعة كسوة اسطوريه جابوها امه ومرت بوه واخته بلقيس ونساوين عمامه وبعض من النساء الكبار في عيلته..
ربيعه من اللي جابوه ماهمها شي اللي همها واللي فرحها هو القدر اللي دارهولها تسعه بين ناسه وناس الألف والخمسين وكل ماله قلبها يزيد ينشغل بيه اكثر واكثر..
🌿في الليل بعد ماحنوها باتت حداها عصمت وهي تهدرز عليها في هدرزة خلت ربيعه تشوف فيها صورة امها..
🌱"ربي عطاك نعمه كبيره لما خلاك تكسبي قلب راجل زي البي تسعة وخلاه من نصيبك..ردي بالك يابنتي تخلي حد يخسرك هالنعمه حتى طبعك الحاد لازم تغيري منه وتكوني مرنه وتعرفي كيف تتصرفي بالعقل وماتخلي حد يشد عليك شي مهما حاول يستفزك..شغلي دماغك وخليك ديما باهيه وجيبي في صفك عزوزتك والناس الباهيه في عيلة راجلك بش ماتعطي لحد فرصه يخليك منبوذه ويستفرد بيك..فاهمه عليا..
ربيعه وهي مبتسمه قالت..
/كويس..
ابتسمت عصمت وقالت..
/خليك ديما متفكرة ان هدا حوش وخيتك الكبيره بابه مفتوحلك في كل وقت..
نزلوا دموع ربيعه وهي تقول..
/سبحان اللي لما ياخد يعطي احسن من اللي خداه..الله يرحم امي ووبيي ويسامحهم ولايحرمني منك ولامن تسعه..
ضحكت عصمت من بين دموعها وهي تقول..
/تسعه صار!
ربيعه قالت بإبتسامه خجل..
/شني مش ولى راجلي خلاص معناها..
ضحكت عصمت وهي تقول..
/ايه ياللا ربيعه..
ربيعه قالت..
/للا ع الكل الاانتي..
قرصتها عصمت من خدها وقالت بإبتسامه..
/ربي يهنيك...
🌿🌿🌿🌿🌿
وجي يوم المنتظر..
يوم حفلة الدخول..وحتى هي دار فيها تسعه عرض خيول بحضور عيله البندار وع راسهم كمال اللي كان خاطر في باله يحي شي من ذكريات الماضي..
🌺وقاعة الاحتفال الخاصه بالنساء كانت معبيه بالمعازيم اللي قاتلهم الفضول يشوفوا مرت تسعه الجديده اللي تنتمي للطبقه الكادحه..
لكن وهما يستنوا خشت عليهم زوجته الثالثه اللي خلت العيون تنبهر بيها..بشكلها وبطلتها وب"الهيدبيس" اللولو المزين شعرها الذهبي..
استقبلتهم هي وخالتها هانيه وعرفت عليهم اهم المعازيم بعدين رفعتهم لطاولتهم..
🌱"جمالها اوروبي"
رقيه قالت:زواريه حتى هي..
عاتكه قالت..
/لكن مش عارفه علاش مادارلهاش عرس زعمه ع خاطر ارمله!
رقيه قالت..
/ميه في الميه..
ع جية وحده من المعازيم سلمت عليهم وقالت..
/خيرهم امكم ووديعه ماوش..
عاتكه:امي مريضه شويه ووديعه قعدت معاها..
المراة قالت بعدم اقتناع..
/اها..لاباس عليها..ومشت من حداهم..
رقيه بإزدراء:مثقل دمها..
عاتكه:جايه تقصقص اشبح شن سامعه..
رقيه:قتلكم مافي شي يدرق في الألف وخمسين..
🍃وديعه اللي داره فيها عادل دخلها في حالة صدمه واهلها وع راسهم بوها فهموا انها معيونه او مسحورة وقعد يتعاملوا مع وضعها ع هالأساس🍃
🌱🌱🌱🌱
"ماشاء الله القاعه تقول في فندق"
حسناء قالت..
/فعلا كبيره هلبه..جاني فضول نشوف القصر من داخل..
نبيهه قالت..
/حتى اني..
ركزت حسناء بنظرها ع ضرايرها..شافت نزيهه متجهمه لكن فريحه برغم جمال طلتها كان باين الحزن في عيونها..
تنهدت بضيق وعيونها تعبوا دموع وخالتها تشوفلها بأسف..
🌿وبعد ساعة من حضور حسناء مشوا قيس وبلقيس ومعاهم فاطمه مرت مرعي بش يجيبوا ربيعه..
تبعهم موكب سيارات داره تسعه للعروسه بش يلف بيها في اهم شوارع الالف والخمسين..
وخدوا العروس من حوش عصمت وعصمت لحقتهم في سيارة من سيارات الموكب..
وبعد ماداروا دورتهم توجهوا لقصر ذهيبه..
🍃فريحه اول ماسمعت منبهات السيارات حست بقلبها بيوقف اما نزيهه كانت في حالة من الغضب المكبوت..
لكن حسناء مع شعور الغيره المؤلم كان عندها فضول شديد تشوف البنت اللي خدت عقل تسعه وخلاته يدير ع خاطرها مادار..
🌸وطل العروس الجميله ربيعه اللي جذبت كل الحاضرات ليها مش بس بجمال شكلها ولافستان زفافها حتى حضورها الطاغي..
فعلا كانت وكأنها بنت باشا ياهانيه معتزة بنفسها مش بإسم بوها وخوتها ولافلوس عيلتها..
وهالشي لفت انتباه عبير مرت محفوظ وخلا حسناء تعجب بيها برغم غيرتها منها..
🌸وصلت للكوشه بعد مازفوها الزمزامات وقعمزت بمساعدة بلقيس وعصمت..
🌱نبيهة:صغيره..
حسناء قالت وهي تشوف لربيعه..
/ايه تبان في بداية العشرينات..
وربيعه وهي مقعمزة ع الكوشه كانت تبع بنظرها في عصمت اللي مشت وقعمزت ع وحده من الطاولات غيرت نظرها عنها جو عيونها في عيون فريحه اللي كانت تشوفلها بنظرة غيره كلها حزن..غيرت ربيعه نظرها عنها وهي مضايقه ع خاطرها وتشوف لنزيهه اللي كانت تشوفلها بنظرات باين فيهم الحقد بكل برود غيرت عيونها عنها جو ع كريمه اللي كانت واقفه بعيد شويه تتفرج عليها..
ابتسمت ربيعه وكريمه ردتلها الابتسامه وامها تشوفلها بغل..
🌾الغل اللي كان مع السنين يكبر في قلب كمال اتجاه تسعه اللي قاعد ينجح في نجاحات عظيمه متواصله هو ماقدرش يحقق ربعها..وع قد مايحاول ينغص عليه كان تسعه يتخطى فيه ويكمل في طريقه...
وبش يبرد ع قلبه شويه اختار يعيد اللي داره قبل اكثر من 13عام في هالليله المهم يعلم ع تسعة وينغص عليه..
🌾"عريس"
الحضور وجهوا انظارهم لكمال البندار لما خاطب تسعه وتسعه رد عليه يقول..
/إي نعم..
كمال بإبتسامه عجرفة قال..
/مذكر شن صار في مناسبه زي هادي قبل 13عام..
مرعي ومحفوظ قعدوا يشوفوله بإمتعاض اما قيس مع باقي الحضور كانوا يراجو في رد تسعه اللي قال..
/ومن ينسى هداكا اليوم اللي ولى فيه كمال البندار الفارس الأول في الألف وخمسين..
ابتسم قيس ابتسامه جانبيه وولاد عمامه ضحكوا ضحكات خفيفه اما باقي الحضور كان بين المغتاظ من تسعه اللي هما البنداريه..وبين المستمتع بالجو اللي قاعد يصير..
ضيق كمال عيونه وقال بإبتسامه..
/شن رايك نجددوا الماضي ونشوفوا السنين شن دارت فينا؟
تسعه قال بإبتسامه..
/لامعليش اعفيني مانخشش منافسات نعرف روحي بنخسر فيها..مايطلعلناش معاكم في الفروسيه هي ليكم وانتم ليها..
ويعلا صوت تصفيق جمال ع كلام تسعه،كلهم وجهوا انظارهم ليه بعدين بدوا يصفقوا ولاد عمام تسعه وخوه وتبعوهم باقي افراد عيلة بيت المال لعند ماانتقلت عدوى التصفيق لكل الحضور ووصلت للبنداريه ولقي روحه كمال يصفق غصب عنه وهو مبتسم ابتسامه تخفي غيظه وتسعه يبادل فيه بإبتسامه ظاهرها عادي لكنها في حقيقتها كانت مستفزة..
♤اللي داره بوي وقتها اني نسمي فيه فن التعامل مع اصحاب العقول الفارغه بحكمه..ماتعطيش الفرصه لشخص سفيه انه يستفزك بش يطلع اسوء مافيك خوده ع قد عقله هكي تقلب سحره عليه..
🌿وفي قاعة الاحتفالات الخاصة بالنساء كانت مرت كمال تتفرج ع زوجات تسعه الاربعه تشوف اللي ناقصها فيهم ماكانتش مهتمه لكونهم ضراير وهي تشوف في اللي فاقداته عندهم بس وهي تتأمل فيهم قارنت بين زوجاته الثلاثه الاولات وبين العروس..ربيعه تبان اصغرهم سنا لكن مش اكثرهم جمالا وغير هكي الفروق الطبقيه بينهم معروفه هما بنات عز ومتعلمات وربيعه بين عيله بسيطه وشبه معدمه ومش متعلمه ع حسب ماسمعت عنها،لما فكرت في هدا كله حست بالشفقه عليها وخافت من عدم استمرارية زواجها بتسعه..
"عمتي بنمشي نسلم ع العروسه"
عزوزتها قالت /بري بنتي بري..
ناضت فطيمه ومشت بإتجاه العروسه وعيون الحاضرات تشوفلها بإستهزاء وهما يعلقوا عليها في تعليقات ساخره...
وهي كانت حاسه لكن حاولت تتجاهل لعند ماوصلت لربيعه..
مدت يدها وقالت بإبتسامه..
/مبروك عليك..
صافحتها ربيعه وهي تقول بإبتسامه..
/الله يبارك فيك..
فطيمه قالت..
/اني مرت كمال البندار اسمي فطيمه..
ربيعه قالت بإبتسامه..
/بالجودة..
فطيمه قالت..
/بيك اجود..ربي يهنيك ويسعدك..
ربيعه ردت وهي مبتسمه..
/تسلمي..بارك الله فيك..
قالتلها..
/فيك بارك الله..بعدين طلقت يدها ولفت ورجعت لمكانها وربيعه معاها بعيونها..
وعيون نزيهه وفريحه عليهم ع جية هانيه اللي قالت..
/تعرف مرت البندار!؟
نزيهه وهي تشوف لربيعه برفعة حاجب قالت..
/الله اعلم..بس الحركه هادي ينحط تحتها الف خط..
هانيه:صح حتى اني حسيت بشي مش مزبوط..
وفريحه تسمع فيهم بصمت وهي تسرق في النظر لربيعه شويه شافت عبير مرت محفوظ ماشيلتها وحتى نزيهه وهانيه انتبهوا معاهم..
🌱"مرحبا"
ربيعه صافحتها وقالت..
/اهلا..
عبير:انا زوجة محفوظ ابن عمه لزوجك تسعه..
ربيعه ابتسمت وهي تقول..
/تشرفت بيك..
ابتسمت عبير وقالت.
/طالعه كثير حلوة يخزي العين..
ربيعه قالت بإبتسامة خجل..
/شويه من اللي عندك ماشاء الله عليك..
عبير قالت بضحكه..
/تسلمي حبيبتي..الف مبروك والله يهنيكي..
قالتلها:تسلمي والله يبارك فيك..
ومشت عبير ولت لمكانها وعيون نزيهه وفريحه وهانيه معاها..
🌿وشويه ويحيوا الزمزامات الحفله والحاضرات تحمسوا مع اجوائهم...
بعدين مشت بلقيس للعروس ونوضتها وقعدت ترقص هي وياها وربيعه كانت اغلب الوقت تضحك وهي متحشمه
"هلي حازك ياتفاحه..حاز البنك مع مفتاحه"
"اللي حاز ربوعه مرتاح..تاج ذهب في حجره طاح"
بلقيس قالت بضحكه..
/عصمت تعطي في الابيات للزمزامه..
شافت ربيعه للزمزامات لقت عصمت واقفه حداهم تكلم فيه ومعاها زكيه اللي كانت مبتسمه..
ضحكت ربيعه وعيونها تعبوا دموع لكن نزيهه وهانيه هالمرة طارتلهم من عصمت وحطوها مع ربيعه في القايمة السودا..
🌸🌸🌸
وعدت احلى الساعات ع ربيعه اللي مازالت حاسه روحها قاعده وسط من احلامها حتفيق منه لحظه اجتماعها بتسعة..
وهاللحظه قربت منها بعد مارفعوها بلقيس وفاطمه مرت مرعي لجناحها وخلوها بروحها عايشه حالة توتر ورهبه وهي تسمع في المولد..
🥀وفريحه وهي تسمع فيه كانت حاسه بقلبها يتقطع لأجزاء مجزئة..هي حاليا في صالون العيله مع ضرايرها وحمواتها وعزوزتها وضرة عزوزتها ومعاهم نبيهه..
بعد تم المولد..قلب فريحه بدي يدق بقوة من الخوف..خوف ان تسعه يخش عليهم بش يسلم ع أمه وياخد مباركتها ودعواتها زي ماتعود يدير قبل..
"أمي"
هي وضرايرها وجهوا انظارهم للباب وزكيه ناضت بش تطلعله شويه ناضت حسناء وقالت..
/بنطلع معاك بش نباركله..
شافتله زكيه شويه بعدين قالت بإبتسامه..
/تعالي..
ومشت زكيه وحسناء لحقتها وعيون فريحه معاها وهي تقول في نفسها بحزن..
"سعدودك مش فارق معاك"
وحتى نزيهه زيها حسدت حسناء ع اللامبالاة والبرود اللي بدالها منها...
🌿قدام صالون العيله..
طلعت زكيه ومعاها حسناء اللي لما شافت تسعه بالعربي انطمست فيه..
لكن هو لما شافها قال بضحكه..
/اووو..افوكاتو..نورتي..
ضحكت امه..
وحسناء قالت بضحكه ولمعة الدمعه باينه في عيونها..
/اليوم مافي حد منور غيرك ياعريس..مدت يدها وقالت..مبروك..
صافحها وقال...
/الله يبارك فيك..سحب يده وهو يقول..كيف حالك وكيف حال خالتي نبيهة..
حطت ايديها ع بعض وشدت ع اليد اللي صافحاته بيها وهي تقول..
/الحمد لله..حتى هي تسلم عليك وتباركلك..
قال:الله يبارك فيها..سلميلي عليها..
قالت:يوصل..
امه قالت:خيرك ماخشيتش؟
هو وجه نظره يمينه بعدين رد نظره ليها..ابتسم وقرب منها خدي يدها وكب عليها..
هي ابتسمت وقالتله..
/مبارك عليك ولدي وبالذريه الصالحه..
رفع راسه وقال..
/ربي يطول في عمرك ويحفظك..تصبحوا ع خير..ومشي طول..
امه وهي تبع فيه بعيونها قالت بإبتسامه..
/مايبيش فريحه تشوفه..التفتت ع حسناء لقتها تلحق فيه بنظرها والدموع معبيات عيونها بعد اختفي عن انظارها بلعت ريقها وقالت..
/عطلنا خلاص مفروض نروحوا توا...ومشت خشت للصالون..
زكيه ابتسمت بأسف وخشت وراها..
🌸🌸🌸🌸🌸
ويوصل تسعه لجناح ربيعه..
فتح الباب الخارجي وخش ومنه توجه للباب الدخلاني لما وصل فيه..خدي نفس وفتحه بعدين خش وسكره وراه..
ويمشي خطوة ورا التانيه لعند ماوصل للدار لقي ربيعه واقفه ومنزله عيونها للأرض..
ابتسم من قلبه وقال..
/السلام عليكم..
ردت:وعليكم السلام..
بإبتسامه قال..
/ربيعه قيمي راسك..
قامت راسها ولما شافاته كيف طالع بالعربي تفكرت هداكا اليوم وخطرت عليها ردت فعلها وتبدا تضحك..
عقد حواجبه بإستغراب وهو مبتسم..
ربيعه بضحكه ووجهها محمر خجلا قالت..
/اسفه..بس خطر عليا هداكا اليوم...
هو فهم قصدها ضحك ضحكه خفيفه بعدين قدملها لين وصل فيها وقال بإبتسامه..
/واني في كل وقت نفكر في هداكا اليوم..حط يده في جيب فرملته وطلع منه زر فستانها وخلاها تشوفه..
بدت ع وجهها ملامح المفاجأه وهي تسمع فيه يقول..
/عندك علم من لما خديتها ماخليتهاش تفارقني؟
رفعت عيونها فيه وهي تشوفله بنظره حلوة..
تأمل عيونها وبإبتسامه قال..
/نظره عيونك شن ماكانت..حزينه..فرحانه..غضبانه تبان فيها القوة..اعظم انواع القوة..لاهي قوة مال والاسلطة.. قوة عزة النفس..عزة النفس الآبيه اللي قال سيدنا علي ابن ابي طالب أنها تُضاهي جاه الملوك..
تعبوا عيونها بالدمع ونبضات قلبها تسارعت من تأثير كلامه عليها..
حط يده ورا راسها وطبع قبله ع جبينها خلتها تحس بشعور حلو بالمرة..غمضت عيونها وهي تقول في نفسها..
"توا بنفتحهم وبنفيق خلاص"
بعد عنها تسعه لقاها مغمضه عيونها..
ضحك وقال..
/ربيعه..
فتحت عيونها جو في عيونه ابتسمت من وسط قلبها وقالت بتلقائيه..
/محلاك ياتسعه..
رفع حواجبه وهو مبتسم ووجه احمر لونه..اول مرة يخجل من كلمه حلوة يسمعها..
وربيعه بعد استاقظت لنفسها شن قالت توسعوا عيونها بصدمه..نزلتهم طول وقالت من قوة الاحراج والخجل..
/آسفه مش قصدي..
وتخليه يضحك من قلبه وهي قعدت تضحك معاه بخجل وقلبها طاير بمشاعره الحلوة...
🌿🌿
واللي عاشاته نزيهه قبل 13عام رجعت عاشاته مرة تانيه لكن مش بروحها..
فريحه كانت في جناحها ساجده لله في صلاتها وهي تشكي وتبكي بالعبرة..
وحسناء بللت وسادتها بدموعها وطيفه ماباش يفارق خيالها..
🌿🌿🌿🌿
"فيها إشي مميز خلاني اشوفها مختلفه عن نزيهه وفريحه وكمان حسناء"
محفوظ وهو مبتسم قال..
/حسيتها الوحيده اللي خشت خاطرك..
رفعت شعرها من ع عيونها ووخراته للخلف وهي تقول بضحكه..
/مابعرف..بس هي الشغله شغلة تآلف ارواح وانا حسيت اني ارتحتلها اكثر منهم بس بنفس الوقت خفت عليها..
محفوظ:من الضراير..
قالتله:مو بس منهم كمان من العيله انا لاحظت ان اغلبيه عيلتك تفكيرهم طبقي مثل اختو هانيه ومرت عمك منصور الله يرحمه وناس تانيه من قرايبكم بعتقد انها رح تتعب كثير..
محفوظ:ممكن..لكن مش عارف علاش حسيت تسعه المرة هادي سعيد بزياده هالحاجه بينتلي ان مرته هادي حيكون ليها مكانه خاصه عنده..
عبير وهي تفكر قالت..
/ممكن..
شافلها بطرف عينه بعدين قال بضحكه..
/لكن والله يشوق الواحد يدير زيه..
شافتله شويه بعدين قال..
/نام حبيبي نام..جبدت المخده وضرباته بيها وهي تقول..احسن مااخنقك بهالمخده..
وهو يتلقى في الضرب ويضحك عليها..
🌿🌿🌿🌿🌿
ويطل تاني يوم وتسعه مافارقش جناح ربيعه الا للخروج للصلوات في الجامع ومنهم صلاة جمعه وخلاهم يبعتولهم الفطور والغدي للجناح..
الحركه هادي مادارهاش قبل لافي زواجه من نزيهه ولافريحه..
🌱"نقطع ذراعي كان مش مدايرتله شي هالشلافطيه"
بلقيس قالت بإنزعاج:وطي صوتك..
هانيه:عاجبك وضعه تشوفي فيه طبيعي!؟
قالتلها:اني ماليش الحق نقيم وضعه وتصرفاته مدام نساوينه راضيات مانقول شي..
قالت هانيه:ياهبله..الاشكال اللي زي ربيعه معروف تفكيرهم كويس لما تشم ريحة الفلوس وتعيش الدلال بعد الفقر والعازة يولوا زي الوحوش مايشبعهم شي ويبوا كل شي يولي تحت ايديهم..
بلقيس:مش باين عليها هكي بكل..
هانيه قالت بنرفزة..
/ماك هبله..
ع خشة فاطمه وهي تقول..
/هيا نوضوا وتوا ارواحكم وقت ع المحضر..
ناضت هانيه وقالت بتهكم..
/ايه وقت ع محضر بنت الباشا...ومشت طلعت وهي معصبه..
فاطمه قالت..
/ربي يهديها كان بتحط راسها براس المراة مرات تخسر خوها..
ناضت بلقيس وهي تقول..
/هادي هانيه ماتقدريش تغيري اللي في عقلها مهما ديريلها..
ومشت طلعت من الصالون وفاطمه طلعت وراها وهي تحرك في راسها يمين ويسار آسفا..
🌸🌸🌸🌸🌸
"بالصحة عليك يااللا"
ربيعه وهي تشوف لروحها في المرايه قالت بإبتسامه..
/سلمك..وحتى انتي عطيك الصحه..
المزينه بعد لمت حاجاتها طلعت وخلت ربيعه تتأمل في طلتها..كانت لابسة فستان كبير لونه اخضر غامق مطرز بالعدس في جهات محدده جاها مع الكسوة وماتعرفش انه صناعة ماركه مشهورة عالميا..
وهي تشوفله قعدت تفكر شن تلبس عليه من مجوهرات..
مررت نظرها ع اطقم الذهب اللي قدامها وقالت بتفكير..
/زعمه اما واحد يطلع ع القفطان ؟
ويدق الباب هي قالت..
/تفضل..
سمعاته انفتح وتسكر وثواني بان عليها تسعه حتى المرة هادي كان لابس عربي لكن كاط طويل ابتسمت بإعجاب شديد لما شافاته وهو اللي مرر نظره ع طلتها قال..
/ماشاء الله ماشاء الله تبارك الرحمن..
قالتله بإبتسامه بخجل..
/ماشاء الله عليك حتى انت..
قاللها بإبتسامه..
/تسلمي ياللا..
ضحكت بعدين قالت..
/باهي اللي جيت بش ناخد رايك..ترا شوفلي اما طاكم يمشي مع القفطان؟
ابتسم وقال..
/تو نقولك..
ومشي لدولابه فتحه وطلع منه علبه بعد سكره جاها بيه لعند ماوقف قدامها..فتحها وقال..
/شن رايك
ربيعه قالت بإبتسامه..
/حلو..
رفع حواجبه وقال..
/حق ولاتجاملي..
قالت بضحكه..
/والله قنين..
ردة فعلها اللي بانت عاديه خلاته بحس انه ماعجبهاش وجهه ليه وهو يشوفله قال..
/قولي رايك بصراحه لو ماعجبكش نخدملك واحد احسن منه..
هي قالت بإبتسامه..
/قتلك قنين وعجبني هلبه..
شافلها وقال..
/خدمت عليه اربعين يوم بلياليهم بدون انقطاع اول مرة نخدم ع حاجه هكي توقعت النتيجه تكون غير..ضحك وقال..هادي مشكلتي مرات نوثق في نفسي زياده عن اللزوم..
وهي مندهشة قالت..
/قصدك انت درته بإيديك ليا اني!؟
ابتسم وهز راسه بإيجاب...
تعبوا عيونها بالدموع وهي تقول بإبتسامه حلوة...
/يهبل يهبل..
ضحك بفرح بعدين قال..
/غير راك تقولي اسفه مش قصدي..
ضحكت وقالت..
/لامش قايلتها..
ابتسم وقال..
/شن غير رايك من قنين ليهبل يهبل!؟
قالتله وهي مبتسمه بخجل..
/مازهاش في عيني الا لما عرفت انك دايره بإيديك ع خاطري..
قعد يتأمل في عيونها بنظرات حلوة زادت خجلها..
تنهد بإبتسامه بعدين قال..
/ربي يحفظك ياربيعه..
قالت بإبتسامه بخجل..
/ويحفظك ويخليك ليا..
ضحك بعدين مشي للزيانه حط عليها العلبه وخدي العقد بعدين رجعلها وقف وراها ولبسهولها وهو يقول
/العقد من الالماس والحجر اللي فيه زمرد شديدة الخضرة وهدا اجود واصفى جوهر..ويقولوا زمان ان اهداء الحبيب زمردة يقربه منك ويخليه أكثر تفاني وإخلاص في حبه ليك..
ربيعه كانت تسمعله وهي تشوفله من المراية بهويام..
هو بعد مالبسها شافلها من المرايه وقال بإبتسامه..
/ع فكرة الزمرد سيد الاحجار الكريمه..
التفتت وشافتله وع وجهها نفس الأبتسامه..
هو قرب منها وطبع قبلة ع راسها وقال..
/خل نشوفوا شن يطلع عليه..
قدم لسيت خواتم خدي واحد الماس يمشي مع العقد حطه ع جهه..بعدين جي لسيت الخراص"الاقراط" شافله شويه بعدين خدي زوج منهم..وختمها بإنسيال وكلهم كانوا الماس لبسهم لربيعه اللي ماقدرتش تشوف شي يبهرها ولايعجبها غيره..
بعد كمل قال بإبتسامه..
/مش هانم..سلطانة السلطنات..
ضحكت بخجل وهو شد يدها وقال بإبتسامه..
/هيا تعالي..
وطلعها من الجناح بعدين خلاها تتعنق ذراعه وهو ماشي بيها للباب اللي يرفع لقاعة الاحتفالات..
دق الباب فتحاته بلقيس لما شافتهم قالت بإبتسامه..
/الله يبارك..
هو قال بإبتسامه..
/سلمتك الأمانة يابلقيس ردوا بالكم..
ابتسمت ربيعه بخجل وبلقيس قالت بضحكه..
/في حفظ والصون ياسلطان..
ضحك بعدين شاف لربيعه بنظرة حلوة ومشي وخدي قلبه معاها...
■■■■■■■■■■■■■■■■■■■■
🌿 والعَادةُ عندي أنَّ طب القلوبِ في رؤيا الحَبيب، وحيث إن القلب مستقر الحبيب والعين رفيقه.. فمتى حَلَّ في النفس شكلُ المحبوب وهيئته؛ فصُورته مطبوعةٌ على حاشِية القلب وحَدَق العين لاتكتمل الصورة إلا بكمال حضورهما.🌿
•••••••••••••••••••••••••••••••••••••••••••••••••••••••••
في قاعة الاحتفالات النسائيه..
كان الانظار كلها متوجهة للعقد اللي لابساته العروس يتكلموا عليه وهما مبنهرين ونفس الوقت بدوا يتكهنوا بالمكانه اللي حتكون لربيعة عند تسعة بيت المال..
🌱"مش عارفه شن شايف فيها اشين وحده في نساوينه ماتنحطش حدا وحده فيهم"
قالت الكلام هدا وحده من نساوين عيلة الهاشمي ردت عليها وحده تانيه من نساوين احدى العائلات المعروفه في الألف والخمسين..
/صدقتي ماتجي شي حداهم لافي الزين ولافي الأصل ولا في المال مش عارفه وين عقله لما خداها عليهم..
=اشبح شن باخه عليه راهو مش بلاش..
=هو هدا ع اللي دايره ع خاطرها وهي ماتسوى شي..
🌿هادي كانت وجهة نظر جزء من الحاضرات بينما في غيرهم شاف ان ربيعه فيها شي يميزها خلا تسعه بيت المال يطيح فيها ويدير ع خاطرها هدا كله..
لكن اللي كانوا متأكدين منه فريحه ونزيهه ان ربيعه حتاخد منهم تسعه ممكن طول العمر،ووسط هدا كله كانت ربيعه عايشه فرحتها وعايشه مشاعر تانيه حلوة باديه تسيطر عليها،بدت تحس ان اعجابها بتسعه بدي يتطور لمشاعر تانيه اكثر عمق لأنها طول ماهي موجوده وسط زحمه هالناس كان عقلها عنده وقلبها مليان شوق ليه وتراجي امتى تنتهي الحفله بش تلاقيه مرة تانيه..
🌿وهو في قاعة الاحتفالات الرجاليه..
كان باين هالمرة بشكل مختلف..منطلق اكثر وفرحته باينه في كل شي فيه مش بس عيونه..
🌱"محفوظ"
التفت محفوظ لقيس وقاله..
/نعم..
قيس وهو يشوف لخوه قال..
/مش ملاحظ ان تسعه فيه حاجه متغيره؟
محفوظ شاف لتسعه بإبتسامه وقال..
/قلتها كأنه اول مرة يتزوج..
قيس بضحكه:حتى اني هدا اللي حسيته..
محفوظ شافله وقال..
/باهي وانت امتى تنوى؟
وجه قيس نظره لمرعي اللي كان يهدرز مع محمد راجل اخته وقال بإبتسامه..
/بعد خمسه سنين ان شاء الله..
محفوظ شاف وين يشبح بعدين رفع حاجبه وقال..
/وعلاش خمسه سنين تحديدا؟
قيس رفع حواجبه وقال..
/وانت مالك ياأخي..
ضحك محفوظ..
🌿🌿🌿🌿
"لامازال بنتي قاعده صغيره"
هدا رد فاطمه ع وحده من المعازيم بعد كلمتها عن موضوع خطوبه لبنتها غزلان..
غزلان اللي وصلت لسن الصبا وولت محط الأنظار بجمالها وادبها هلت عليها مواضيع الخطوبه في هالليله وفي من فكر فيها بدون مايتكلم عنها..
🌱"لالا شن بوعجيله حرام عليك"
رقيه قالت:خل ياخد ويلهى علينا..
عاتكه قالت..
/لالا يارقيه بوعجيله لا اكبر منها بهلبه ومايصلحش بيها..قولي عبد الحافظ مازال اعقل منه ويمشي معاها..
رقيه قالت..
/عبد الحافظ معقد ومنطوي مستحيل يفكر في الزواج..
عاتكه:حني نقولوا لأمي وهي تكلمه..
تنهدت رقيه بحسرة وقالت..
/حتى غزلان بدوا يخطبوا فيها وحني قاعدات زي مالقيات العزي..
بدت ع وجه عاتكه ملامح الضيق وقعدت ساكته..
🌿🌿🌿
ويطلعوا العروس ويرفعوا لجناحها بش تلبس فستان تاني وهالمرة كان من تفصيل عصمت لونه وردي وموديله موضه جديده في هداكا الزمان بعد مالبساته ربيعه غيرت المجوهرات حتى هما بطقم ذهب يمشي مع القفطان اخر شي ساوتلها بلقيس مكياجها بعدين ولت بيها لقاعة الاحتفالات هالمرة طلتها عطتها عمرها وكانت طالعه فيها ناعمه وجذابه جدا..
🌸🌸🌸🌸🌸
"اني نحب نقرا شعر وحافظ قصايد طويله لكن مش عارف علاش وين نبي نقولك شي منهم مانقدرش"
ربيعه وهي مبتسمه بإستغراب قالت..
/علاش..
وهو يشوفلها بنظرات ضيقه مع ابتسامه..
/ماحسيش ان في شي من اللي حافظه يناسبك..
ضحكت بخجل..
وهو يتأمل فيها قال..
/بجديات ربيعه انتي حالة خاصه مخليتيني مش عارف حتى كيف نعبر عن شعوري جيهتك..
قالتله بضحكه..
/واني مانعرفش نرد عليك كلامك حلو هلبه وتقول فيه بأسلوب احلى..اسلوبك هو اللي زايد كلامك حلاوة..
ضحك بإحراج بعد مسح ع لحيته وقعد يضحك..
ربيعه بضحكه قالت..
/خيرك؟
رفع حواجبه وقال بإبتسامه..
/تحشمت..
حطت ربيعه يدها ع فمها وقعدت تضحك من جدها..
وهو يتأمل فيها ويضحك معاها..
🌿وتعدي عليهم ليلة تانيه من اجمل ليالي العمر..
هالليله اللي شافت فيها آسيا منام حلو بالمرة تمنت ماتفيقش منه..
🌠شافت نفسها مقعمزه في مكان فاضي تستنى في حد وبعد انتظار جاها اللي كانت تراجي فيه..
سلامه..شافاته في سن الشباب لابس ابيض وطالع وسيم بزيادة وقف عليها وقال..
/تمشي معاي؟
ناضت وهي تقول بفرح..
/ايه..
خدي يدها ومشي بيها لمكان كان جميل للغايه اول ماخشتله رجعت لسن الشباب حتى هي وكملت طريقها مع سلامه في هداكا المكان..
🌠فاقت من نومها وهي مبتسمه وفي داخلها شعور سعاده لايوصف..التفتت للساعه اللي كانت ع الكامدينو حداها خدتها وشافتها لقت مازال ساعه ع آذان الفجر..
دق باب دارها وسمعت صوت ضرتها ..
"آسيا"
ناضت قعمزت وهي تقول بإبتسامه..
/فايقه زكيه فايقه..
🌷من بعد موت سلامة تعودوا يفيقوا بعض كل ليله لصلاة القيام 🌷
🌿🌿🌿🌿🌿
صباحا..
في حديقه الفيلا..
كانوا صغار تسعه كلهم واقفين قدام ربيعه وبوهم يعرف فيهم على بعض..
تسعة:هدا الكبير سلامه...
سلامه ابتسم وقال..
/سلامه بيت المال..نقرا اولى اعدادي ديما الاول في كل شي في القرايه في الكورة تنس وسله مانحبش كورة القدم..وجوي ديما فوق الريح..
ضحكوا تسعه وربيعه اللي بعدين قالت..
/الله يبارك عليك..
ابتسملها سلامه..
تسعه جي لهشام وقال..
/وهدا يجي بعده هشام..
هشام ابتسم وقال..
/نقرا صف سادس ويقولوا شاطر في قرايتي ونحب القرايه هلبه..قصدي قراية الكتب..
ربيعه قالت بإبتسامه..
/ثقافه..
هشام ضحك وقال..
/صح..
ابتسم تسعه وهو يشوف لربيعه اللي قالت..
/ربي يحفظك ويبارك فيك..
قاللها هشام..
/شكرا..
ويمشي تسعه لكريمه وهو يقول..
/وهادي اللا بوها كريمه..
كريمه ابتسمت..
ربيعه بإبتسامه قالت..
/تهبل الله يبارك عليها اما سنه تقري ياكريمه..
"معاودة صف رابع"
كلهم وجهوا انظارهم لمعاذ ونظرات بوه كانت حاده..
ربيعه ردت نظرها لكريمه لقتها منزله راسها وهي منحرجه ابتسمت وقالت..
/لما خشيت المدرسه قرت معاي بنيه زمان كانت معاودة صف اول تعرفي ياكريمه البنيه هادي توا وين؟
كريمه شافتلها وقالت..
/ وين؟
ربيعه قالت..
/توا تقرا في الطب وشاطرة هلبه حتى انتي تو تولي زيها واحسن منها
كريمه قالت..
/لكن اني نبي نولي ابله..
ابتسمت ربيعه وقالت..
/وهو في احسن من الابله اللي طلعت المهندس والدكتور والمحامي ورجل الاعمال زي بوك توا..اقري وشدي وانجحي بش تولي ابله وطلعي هادم كلهم..
كريمه حست بشعور حلو هلبه وهي تسمع وتتخيل في كلام ربيعه اما خوتها عجبهم كلام ربيعه هلبه ماعدا معاذ..
ضحكت كريمه وقالت..
/باهي..
ربيعه بضحكه..
/سلمها ياربي..قامت عيونها في تسعه لقاته يشوفلها بنظرة احرجتها..
سلامه بضحكه قال..
/تو نكملك اني..اللي كلمك توا اسمه معاذ يقرا صف رابع حتى هو شاطر لكن لسانه اطول منه..
ضحكوا وربيعه قالت بإبتسامه..
/ربي يحفظه..
حمحم تسعه وقال بإبتسامه..
/اللي بعده اشرف..
اشرف قال..
/علاش ماقلتيش الشرطي مع الدكتور والمهندس والمحامي وبوي!!
ضحكوا وهي قالت بضحكه..
/نسيت..انت تبي تولي شرطي؟
هز راسه وقال..
/ايه..
ربيعه:الله يبارك..تقرا صف ثالث؟
هز راسه وقال..
/ايه..
ابتسمت وقالت..
/ربي يحفظك وان شاء الله تولي ضابط شرطه كبير وبعدين يقولوا لبوك اهوا بو الضابط اشرف بيت المال..
ابتسم اشرف وهو يتخيل في كلامها بعدين قال..
/شكرا..
هي قالت:العفو..وشافت لفاضل..وانت؟.
فاضل قال..
/فاضل تسعه سلامه بيت المال..نقرا صف اول وتو نجيب الترتيب الأول..انتي امي الجديده؟
ضحكت من قلبها بعدين قالت..
/سلمه ياربي..ايه..اني امكم الجديده
فاضل قالت..
/احلى من القديمات..
تباعد تسعه شويه وهو يضحك بصوت عالي..
والصغار يضحكوا معاه ماعدا معاذ اللي كان يمرر في نظرات المكر ع خوته..
ربيعه وهي تضحك قالت..
/تسعه!
وتسعه مازال يضحك ومش قادر يهدي..
🍃وعيون فريحه ونزيهه عليه وهما مقعمزات تحت المظله كل وحده كانت شاده دموعها بالسيف وهما يسمعوا في زكيه تقول بضحكه..
/شن يسكته توا!..
آسيا بضحكه..
/اخد ضحكة بلقيس..
ع جية بلقيس ووراها هانيه كانوا يشوفوا لخوهم كيف وقف ع ربيعه وهو يضحك وهي شدت ذراعه تكلم فيه والصغار معاهم..
بلقيس بضحكه..
/نسمعوا في ضحكته من داخل..
امها قالت..
/هادي ضحكتك بس رجاليه..
وتضحك بلقيس ضحكتها المعروفه خلت امها ومرت بوها يضحكوامعاها لكن نزيهه وهانيه وفريحه بين الغيظ والغيرة والحزن مابالهم في ضحك..
🌿"والفلوسه هادي اروى"
ربيعه قرصت خد اروى بخفه وقالت..
/الله يبارك عليها..
شافت اروى لبوها وقالت..
/هادي عروسة..
ضحكت ربيعة وتسعه قال بضحكه..
/ايه..غمزلها وقال..حلوة؟
ربيعه بخجل قالت..
/تسعه..
اروى هزت راسها بإيجاب وقالت..
/حلوة..
تسعه شاف لربيعه وقال بإبتسامه..
/هلبه..
وهي بذوب من الخجل..
🌿ويجي وقت الفطور الصغار مشوا يفطروا في الجهة الخلفيه من الحديقه وبرنيه معاهم..
والكبار كانوا ناويين يفطروا تحت المظلة تعويضه بعد حطت الفطور ع الطاوله مشت لتسعه وربيعه بش تناديهم زي ماطلبت منها زكيه..
🌱تسعه وهو يشوف من بعيد لنزيهه وهانيه قال..
/جيبيلنا هني اني وربيعه ..
هي قالت..
/حاضر..ومشت..
ربيعه بعد ماشافتها تباعدت قالت..
/علاش ماتبيناش نقعمزوا معاهم؟
شافلها بإبتسامه بعدين قال..
/مانبي حد يشاركني فطوري غيرك..
🌿🌿
"شن رايك ماما!؟"
زكيه قالت بنبره حاده..
/افطري واسكتي..
خدت هانيه طاسه العصير وشربت منها بعصبيه..
والباقي التزموا الصمت وهما يفطروا..
حال فريحه معروف..لكن نزيهه كل مالهم غضبها وكرهها اتجاه ربيعه يزيدوا..
🌸🌸🌸
وتجيبلهم تعويضه الفطور لمكان حلو في الحديقه بين الشجر..
ربيعه وهي تاكل مررت نظرها ع المكان وقالت..
/الله يبارك الحديقه مساحتها كبيره تقول بلاد ونظامها حلو هلبه..
قاللها:تنسيقها كان تحت اشراف مهندس بريطاني..
ربيعه رفعت حواجبها ونزلتهم بعدين قالت..
/والقصر؟
قاللها:تصميم زوز مهندسين كبار اصولهم عراقيه عايشين في امريكا..
ابتسمت وقالت..
/واضح فيه بصمه شرقيه..
ابتسم وقال..
/ربيعه انتي تقري؟
تنهدت بإبتسامه بعدين هزت راسها بإيجاب وقالت..
/عندي صاحبه من المدرسه اسمها امال عيلتها ناس مثقفين ومتعلمين..بوها صحفي وامها استاذه في الجامعه عندهم في حوشهم مكتبه شفتها مرة عجبتني هلبه وخديت منها كتاب وقتها ع قد عمري وقريته كان قصة اطفال..ضحكت بعدين قالت والدمعه في عينها..بعد سيبت المدرسه قعدت نطلب من صاحبتي هادي في الكتابات وهي تجيبلي فيهم نقراهم لين نكملهم ونردهم..ومرة..ضحكت وقالت..مرة دارتلي عيد ميلاد مفاجأه في حوشهم وامها عطتني مجموعه روايات هديه احلى هديه جتني قريتهم كلهم..
تسعه كان متفاجئ جدا من اللي يسمع فيه وكل ماله يزيد ينجذب لربيعه اكثر واكثر،بس وهو يسمع فيها خطر ع باله سؤال..
"علاش سيبتي القرايه"
بإبتسامه قالت..
/انت عارف عني كل شي اكيد مش غايبه عنك الحاجه هادي..
قاللها:نبي نسمع منك..
غرقوا عيونها بالدموع وهي تقول بإبتسامه..
/واني نقرا خامس بوي ضرباته سيارة وبسبب الحادث ولى طريح الفراش،مع السنين ولت معاناته صعبه ع امي من الخدمه..انجبرت نسيب القرايه بش نساعدها..
🍃مابتش تقوله ان امها خلتها تسيب القرايه بش تخدم لأنه هكي حيفهم انهم كانوا عايشين ع المساعدات والصدقات قبل والحاجه هدا حتى لو كان هو يعرفها لايمكن تحكيهاله🍃
وهو عارفها كويس ابتسم وقال..
/باهي..انتي عندك رغبه تكملي تعليم؟
قعدت تشوفله بإبتسامه لهفه وهي ساكته..
قاللها:تكلمي ربيعه قولي اللي في خاطرك كله حوليها الحواجز اللي قاعده حاطيها بيني وبينك..
ضحكت بعدين قالت..
/ايه نبي لكن نبي ناخد شهاده مش مجرد تعليم وخلاص..
بإبتسامه قال..
/اللي تبيه يصير يا اللا..
وهي ضحكت بخجل ومن داخلها بطير من الفرح..
🌿وبعد الفطور ركبت ربيعه لجناحها بش تجهز نفسها للسفر
جتها تعويضه بش تساعدها في تنزيل الشنطه ونزلوا مع بعض عن طريق المصعد..
🌱"تعويضه خيره وجهك اصفر"
ابتسمت وقالت..
/من الوحم يااللا..
ربيعه بإبتسامه..
/حامل ماشاء الله..تحلي عويناتك ع خير.
تعويضه قالت بإبتسامه..
/تسلمي يااللا..
وصلوا للطابق الارضي وانفتح الباب..
خدت ربيعه الشنطه قالتلها تعويضه..
/عنك يااللا.
ربيعه قالت..
/صحيتي ياتعويضه تقدري تمشي..
ع جية تسعه قال..
/هيا يااللا وقت
ربيعه وهي مبتسمه قالت..
/هيا..
جاها وخدي منها الشنطه وهو يقول..
/علاش قايمتيها بروحك.
قالتله:وشن بينقص مني كان قمتها بروحي..بعدين تعويضه تعبانه شويه كان تخليها ترتاح اليوم..
تعويضه قالت..
/لالا يااللا حالي باهي..
ربيعه قالت..
/لامش باهي وجهك اصفر قباله شويه تانيه ويغمى عليك..
تسعه وهو مبتسم قال..
/اسمعي الكلام ياتعويضه..
ابتسمت تعويضه وهي محرجه بعدين قالت..
/حاضر ياللا..عن اذنكم..ومشت وخلتهم..
ربيعه قالت..
/اعطيهم علم انك عطيتها راحه..
شد يدها وقال بإبتسامه..
/حاضر يااللا..
ضحكت ربيعه بخجل وهو خداها ومشي بيها لصالون العيله اللي كانوا مجتمعين فيه بش يسلموا عليهم..
اول ماوصلوا غادي طلق يدها وحط الشنطه بعدين خشوا مع بعض..
فريحه مابتش تشوفلهم نهائي عكس نزيهه وهانيه اللي كانت نظراتهم تقطع في ربيعه تقطيع..
وربيعه مشت طول لعزوزتها سلمت عليها وكبت ع راسها ودارت نفس الشي مع آسيا بعدين ووخرت ووقفت جنب راجلها..
هانيه ونزيهه شافوا لبعض وهما رافعات حواجبهم وهي متجاهله وجودهم تماما ومركزة مع زكيه اللي كانت تقول..
/ردوا بالكم مصر الايام هادي صايره فيها مشاكل..
ابتسم وقال..
/عارف هدا علاش غيرت الوجهة لدبي..
نزيهه وهانيه توسعت عيونهم ع الآخر من الصدمه..
وزكيه قالت..
/احسن هكي خير..
مسح ع لحيته وقال..
/بنقعدوا غادي اسبوعين ومنها لبريطانيا في حفل انطلاق مشروع جديد لينا غادي لازم نكون موجود فيه..
ربيعه ماكانش عندها علم بشي من هدا كله اللي كانت تعرفه انها حتسافر لمصر هو بروحه وصللها المعلومه هادي من بعد ماخطبها عن طريق اهله برغم انه قال سبب تغييره لوجهة السفر لكن قعدت مستغربه علاش ماخبرهاش..
وهي تشوفله كيف يتكلم غيرت نظرها طول لهانيه لما سمعتها قالت..
"برطعي يااللا ربيعه برطعي مدام خديتي خوي حينسيك كل اللي عشتيه من قبله"
ساد الصمت المكان..كلهم قعدوا يمرروا في انظارهم بين هانيه وتسعه اللي كان يشوف لهانيه بنظره ظاهرها هادي لكن تبان للي يعرفها مخيفه..
"صدقتي ياهانيه اللي تاخد تسعه تولي للة اللات"
كلهم وجهوا انظارهم لربيعه بعد ماقالت كلامها حتى فريحه شافتلها..
تسعه ابتسم بعدين غير نظره لأمه وقال..
/هيا يام استودعناكم..
زكيه قالت:في أمان الله ولدي ربي يحفظكم.
ربيعه قالت..
/بالسلامه..
ردوا عليها زكيه وآسيا وبلقيس..
"بالسلامه..في أمان الله"..
وهو ماشي وقف والتفت لأمه وقال..
/ايه..اللا ربيعه عطت اجازة لتعويضه اليوم..
ربيعه قالت لزكيه..
/المراة تعبانه شويه ياعمتي.
بلقيس:صح حتى اني لاحظتها
زكيه قالت..
/تو نخليها ترتاح اليومين هادم..
ربيعه ابتسمت وهي تقول..
/ربي يحفظك ويطول في عمرك..
زكيه قالت بإبتسامه..
/تسلمي بنتي..
فريحه وهما يتكلموا عن تعويضه ركزت ع تسعه كيف يشوف لربيعه نظرة عينه كانت معبرة هلبه وباين فيها الاعجاب.
نزلت عيونها وشدت دموعهم بقوة..
"هيا يااللا عطلنا"
ربيعه ابتسمت بخجل وقالت..
/السلام عليكم..
وهو كذلك سلم ولما جي طالع شاف لهانيه بنظرة غضب هي خافت منها..
غير نظره عنها وطلع وربيعه طلعت بدون ماتشوف لحد منهم والنظرات الكارهه من نزيهه وهانيه تلحق فيها...
♤وسافرت أمي لأول مرة في حياتها ووجهة سفرها لبلاد هلبه يحلموا يمشولها قالتلي كنت خايفه ندير موقف نحرج بيه روحي قدام بوك لكن بوك بمعاملته طيبه خلاني نحس روحي عشت عمري كله في السفر..ديما نقول فيها بوي تربى تربية عز العز الحقاني اللي خلاه يتعامل مع الناس كلها بطيبه وتواضع..
🌿عاشت ربيعه احلى ايامها في دبي وفي أخر ايام بقائهم فيها جو مرعي وفاطمه بش يحضروا حفل افتتاح فرع مجوهرات بيت المال في احد اهم الصروح التجاريه غادي..
وبرفقه زوجاتهم قصوا شريط الافتتاح امام عدسات الكاميرات..
ربيعه وفاطمه اول مرة يحضروا مناسبه زي هادي بس اللي يشوف ربيعه يقول العكس..
كانت تتفرج وتشوف للمكان بنظرات راكزه وكذلك تشوف لراجلها وتعامله مع الحاضرين اللي اغلبهم كانوا من جنسيات مختلفه..لاحظت عليه قوة الحضور والهيبه الغير مصطنعة ولاحظت كيف اغلب اللي حواليه يتوددوله..
مجرد ماتتفكر ان راجل زي هدا راجلها تزيد تعتز بنفسها اكثر ويولي عندها دافع يخليها تشتغل ع نفسها بش تكون لايقه بيه..
🌱"شني ياللا"
التفتت ربيعه وقالت بإبتسامه..
/توا هدا كله تصميمك انت؟
ضيق عيونه وقال..
/لا..منهم لولد عمي..
بضحكه قالت..
/واضح الاختلاف..
ابتسم وقال..
/ترا كيف لاحظتيه؟
ربيعه وهي تشوف للقطع والأطقم قدامها قالت..
/اللي ليك انت تحسه فيه ابداع اكثر..
توسعت ابتسامته وقال..
/امم..حلو..باهي قوليلي في حاجه عجباتك وجي خاطرك فيها..
ابتسمت وقالت..
/الخاتم هداكا اللي فيه زمرد..ضيقت عيونها وقالت..
/زمرد صح؟
هز راسه بإيجاب وهو مبتسم ..
بعدين قدم للخاتم خداه ورجعلها..
خدي يدها اليمين ولبسهولها بعدين قام عيونه وقال..
/ردي بالك تحوليه..
قالتله بإبتسامه مع رفعة حاجب..
/هدا علاش خديته..
ضحك وشد ع يدها بقوة وهي ابتسمت بخجل..
🌱"واخده عقله رسمي"
مرعي قال..
/حتى اني ملاحظه وضعه معاها مختلف..
فاطمه قالت بضيق..
/هي الحق تبان كويسه ومحترمه لكن والله ماهاينه عليا فريحه حالها يقطع القلب..
مرعي:من الاول عارفه ومدام رضت تتحمل نتيجه اختيارها زي ماتحملت بنت الزايدي..
فاطمه قالت..
/عندك الحق لكن هو تحسه تغير في لقطات دارهم مافيهمش عدل..زي المحضر اللي دارهولها وشهر العسل علاش مارفعهاش لمصر زي الاولات..
مرعي قال..
/حتى اني استغربت في حركته هادي قبل العرس قالي بنعبى عليك انت في حفل الافتتاح فجاه غير رايه..
فاطمه شافتلهم وقالت بضيق ممزوج بالقلق..
/ان شاء الله عقابها خير..
🌿تغيير وجهة تسعه في سفرة شهر العسل قعدت ربيعه حاطه عليها اشارة استفهام وترددت هلبه في سؤال تسعه عنه لعند ماجي يوم السفرة من دبي للندن عاصمة بريطانيا..
في الطيارة..
بعد ماسكرت ربيعه حزامها شافت لتسعة اللي قال..
/تسكر زين؟
قالتله:ايه..تسعه؟
بإبتسامه قال..
/نعم ياللا؟
ابتسمت وقالت..
/في عقلي سؤال ليا مدة نبي نقوله..
قاللها:قولي..
عقدت حواجبها وقالت..
/تو انت مش كنت ناوي ترفعني لمصر؟ علاش لما غيرت رايك ماخبرتنيش؟
ابتسم وقال..
/نبي نفاجئك..
سكتت شويه بعدين قالت..
/مفاجأه حلوة ..
رفع حاجبه وقال..
/زي صاحبها..
ضحكت ربيعه وهو ضحك معاها وعقله يفكر في السبب اللي خلاه يغير خطة شهر العسل في أخر لحظه..
🍃القرار هدا خداه في يوم عقد القران تحديدا في الليل كان ماشي بإتجاه جناح صغاره بش يشوفهم قبل ليرقد..
وهو ماشي بإتجاه دار البنات سمع اصوات هدرزة وين وصل في الباب خشت لمسامعه جمله وقفاته..
"هالشلافطيه ماناقصها كان محضر "
نزيهه بتهكم:كان جت ع المحضر عادي غير ان شاء الله مايسفرهاش لأوروبا في شهر العسل..
هانيه ضحكت وقالت..
/ضحكتيني..لالا ماما قالت بيرفعها لمصر زيكم..تي حتى مصر هلبه فيها هالشلافطيه..
نزيهه قالت بقهر..
/ااه الله يسامحك ياتسعه ع اللي درته فينا..
هانيه:صدقيني خوي مش واعي لروحه،ياهي اشبح شن دايرتله يااما ماشيه معاه بالجو هداكا عرفتيه؟..
هزت نزيهة راسها بإيجاب..
هانيه تابعت تقول..
/وهو عاد راجل والراجل من كان يكون يضعف قدام رغبته ولأن خوي يخاف ربي و مايديرش حرام قالك ناخدها وخلاص بعدين لما يستاقظ لروحه يتلفها بشلاتيتها اللي جت بيهم..
هو بعد اللي سمعه تخيل روحه خش لهانيه عطاها طريحة تربيها من أول وجديد..لكن حكمته اللي غلبت خلاته يفكر يتبع طريقه تانيه يأدبها بيها..ومشي طول طلع من جناح البنات ونزل للدور الأول وتوجه لمكتبه وغادي دار اتصال بجمال عطاه امر فيه انه يلغي السفرة لمصر ويحجز لدبي..
🌿🌿🌿🌿🌿🌿
"الاعمال الارهابيه اللي صارت غادي داروها جماعه ليهم خلايا موجوده في البلاد.."
الكلام هدا كان لقائد عسكري مجتمع بضباط كبار اجتماع مهم
ومن ضمن هالضباط محمد راجل بلقيس..
القائد وقف وخدي عصا والضباط وقفوا معاه..
قاللهم:الخلايا هادم موجودين هني وهني..وهني..وهو يتكلم اشر بعصاه ع مناطق معينه في خريطه البلاد الموجوده ع الطاوله.
رفع عيونه وقال..
/لازم نحطوا خطه للهجوم عليهم تكون دقيقه جدا وسريه الجماعات هادي لو ماقضيناش عليها في اقرب وقت حتبدا بتنفيد عمليات ارهابيه في مناطق حساسه في البلاد..
محمد قال..
/هجوم زي هدا يبي دعم وتمويل الجماعات هادي اكيد حتكون محصنه نفسها تحصين كبير..
القائد قاله..
/من الناحيه هادي ماتفكرش بكل ياافندي محمد وزارة الدفاع جاهزة لكل شي..
هز محمد راسه بإيجاب بعدين نزل نظره للخريطه وهو يفكر..
🌿🌿🌿🌿🌿
"شن حال اماليك؟"
فاطمه:الحمد لله كويسين شن حال ماليك انتي..
فريحه قالت..
/الحمد لله..شن مالا عزوزتك ماجتش؟..
فاطمه قال:العشيه بيجيبها مرعي من حوش حماتي نعيمه..
هزت فريحه راسها وقعدت ساكته للحظات بعدين قالت..
/فاطمه..ضيقت عيونها اللي تعبوا دموع وقالت..شن الجو غادي؟
ابتسمت فاطمه وقالت..
/عادي..
نزلوا دموعها وقالت بنبرة ألم..
/قولي يافاطمه قولي اني بديت نتقبل في الوضع الجديد خلاص..
تنهدت فاطمه بعدين قالت..
/عارفه الوضع اللي انتي فيه صعب هلبه مانبيش نقولك الكلام اللي اكيد ياما سمعتيه من غيري..لكن نبي نحكيلك عن مراة عاشت الحاله اللي انتي عايشتيها توا مرات ومرات..السيده عائشة رضي الله عنها..مش هي احب زوجة للرسول عليه الصلاة والسلام؟ يخي هي احب الناس ليه في الدنيا كلها لكنه تزوج بعدها واسباب زواجه كانت مختلفه، كانت تشوف فيه يعامل في كل وحده ياخدها معامله تحسس فيها انه حبهم اكثر منها الغيره اللي عندنا كلنا حني النساء ماخلتهاش تشوف عدله في معاملته ليهم كلهم لكن في اخر ايامه وهو مريض استأذنهم يقعد عندها هي وهما رضوا لأنهم عارفين انها احبهم ليه..الشاهد من هدا كله يافريحه ان زواج تسعه عليك مايعنيش انه معاش يحبك او انه حبه ليك معاش ولى زي قبل بالعكس..والمراة الذكيه هي اللي تعرف تحافظ ع مكانتها في قلب زوجها وتزيد تقوي حبه ليها اكثر واكثر..زوجك راجل يخاف الله ويعامل فيكم احسن معامله ردي بالك تخسريه لأي سبب كان ولاتخلي حد يخسرك فيه يافريحه..
فريحه وهي تبكي..
/كلامك صح لكن صعب هلبه يافاطمه..
فاطمه قالت..
/عارفه والله عارفه..لكن لازم تعرفي ان كل صعب مع الله يهون كل وجع تحسي بيه طبيبه الله سبحانه وتعالى استعيني بيه عن طريق الصلاه وقرايه القرآن والدعاء ثم الدعاء ثم الدعاء..صدقيني حيتغير حالك للأحسن حتحسي بثلج قاعد ينزل ع قلبك يطفي ناره ويبرده..والله يافريحه القرب من الله يخليك عايشه جنه تهون عليك كل مصيبه وكل هم..
غمضت فريحه عيونها وقالت من وسط قلبها الموجوع
/يارب..
ابتسمت فاطمه وهي تشوفلها بود...
♤لما حكتلي امي عن سفرتها الاولى لبريطانيا قالت انها هدا وين خشت لعالم تاني كل شي غادي مختلف الشوارع المباني الناس لبسهم طريقه كلامهم حتى مشيتهم حتى نظراتهم مختلفه هلبه بس اكثر شي حبيته في اللي حكتهولي عن هديكا السفرة هو اللي صارلها يوم حفله المشروع قالت كنت خايفه هلبه بنشوف ناس مايشبهوني في شي حتى كلام لسانهم مش زي كلام لساني لكن لما فكرت كيف بوك قالي نبيك تمشي معاي وهو عارف اني مرات نحرجه لأني مانعرف شي حسيت انه مش مهتم لهدا كله المهم نكون معاه والحاجه هادي خلتني نحول الخوف والحشم ع تركينه ونقحم نفسي في كل شي جديد عليا بش نتعلم..البنادم اكثر شي يتعلم منه في الحياة هادي المخالطه والاحتكاك بالناس من كل المستويات والعاقل هو اللي ياخد الباهي ويعرف الشين ويخليه..درر ياللة اللات درر..المهم قالت الحفله كان فيها محفوظ لأنه عنده اسهم في الشركه هادي وزوجته عمتي عبير حضرت معاه قالت امي طلبت منها تساعدني وترجملي كلام الناس غادي وهي وافقت طول..عمتي عبير كانت مراة متواضعة وامي تعز عليها هلبه..
♧ماما بطبعها كانت متواضعه هلبه عمرها ماشافت نفسها ع حد لابأهلها وفلوسهم ولابعلمها ولابجمالها كنت ديما نشوف فيها بسيطه هلبه في التعامل وروحها سمحه هلبه..دارت في حياتها هلبه اصدقاء بس عمتي ربيعه كانت الأقرب ليها..
🌿"هادول كتب وكاسيتات بتساعدك تتعلمي اسياسيات اللغه وكمان تابعي افلام ناطقه باللغه الانجليزيه مو الامريكيه"
ربيعه قالت..
/علاش في فرق بين الانجليزيه والامريكيه؟.
عبير قالت بإبتسامه..
/ايه في اختلاف بينهم انا بعتبر الامريكان بيحكوا بلغه مثل الهجين لأن سكانها من اعراق مختلفه هما مش السكان الأصليين لأمريكا..
ربيعه قالت..
/ع قولتنا مخلطين..
عبير قالت بضحكه..
/ايوه هيك..بصراحه انا مابحبها ابدا البلد الوحيد اللي بخلي محفوظ يسافرلها لحاله..
ربيعه قالت..
/صح ع اللي داراته ماتنحبش لكن تلقي الكل يدور في رضاها ويحلم يعيش فيها..
عبير ابتسمت بتهكم وقالت..
/معك حق..
هزت ربيعه راسها بعدين قالت..
/عبير بنسألك سؤال وسامحيني لو ادخلت في خصوصيتك..
عبير قالت بإبتسامه..
/اسألي حبيبتي..
ربيعه قالت..
/علاش مادرتيش صغار لتوا..
قالت عبير بإبتسامه..
/اتفقنا انا ومحفوظ نأجل موضوع الخلفه لبعد مااخد الماجستير وان شاء الله بخلصوا اخر السنه..
ابتسمت ربيعه وقالت..
/بالنجاح ان شاء الله..
عبير قالت بإبتسامه..
/آمين..
🌿وبعد يومين روحوا تسعة وربيعه لليبيا لأرض حتكون مليانه بالمعارك والصراعات والاحداث الصعبه...