رواية منتصف العمر
الفصل السادس عشر16
بقلم جمانه السعيدي
مختار.....شكد سعيد بهذا الحب بس محرج من تصرفاتي احس نفسي جاي اتخبط
مااعرف اتصرف المفروض اني احجي وياها كبل
بلا سوالف المراهقين هاي
اكله اني اربد اتقدملج توافقين لولا
هذا أصح شي حتى هي راح تحترمني اذا هيج اتصرفت
ايجوز هي ماتريده تزوج ليش ابقى معلك هيج
مااعرف راسي من رجليه
قبل من جانت مدرستي بعيده كنت اطلع من وكت
حتى الحك اوصل لان مرات مالكه سياره تاخذني
بس هسه من انقلت هنا
اطلع قبل الجرص بربع ساعه لان المدرسه قريبه داخل المجمع
طلعت الصبح ماشفتها حتى ما سمعت صوت داخل الشقه
قررت من ارجع احاول افتح وياها موضوع الخطبه والزواج
خلص الدوام ورجعت شفت من مسافه قريبه قبل لا ادخل العماره اكو واحد دخل للعماره شكله عصبي ويمشي بسرعه
الي لفت انتباهي مشيته السريعه ومبين عصبي
دخل للعماره ماشفته جوا بلطابق الاول بس سمعته يدك باب شقه فوك
صعدت شفته يدك باب شقة نسمه
بطئت خطوتي لان شكله قلقني اريد اعرف شيريد
ولد شاب معضل ونافخ نفسه
جمانه السعيدي
بس فتحت الباب نسمه راسا لزمها من شعرها وهي عاطت
مثل الي تفاجئت بي
اني سمعتها عاطت واني ركضت كل قوتي
كان داخل للشقه ولازمه من شعرها وكاعد يضرب راسها بلحايط
اني بدون اي نقاش ولا وكفت ولا سئلته ليش كبل ضربته
على ضهرها كل قوتي
هو التفت عليه بس ماعاف شعرها بقه لاز مه
مختار .عوفها عوفها حيوان
مجرد ملتفت عليه انطيته بوكس بخشمه حتى يفقد توازنه
عافها ولزم خشمه كام ينزف
حاول يضربني اني صديت ايده
ضربني بايده الثانيه بوكس على وجهي
حسيت نفسي دخت
نسمه بس عافها حضنت بتها الي كاعده تبجي وراحت ركض دخلت للغرفه وقفلت عليها الباب
ضربه اله وضربه اليه الناس صعدت على صوت العياط الي صار الناس أدخلت وفكت العركه
نزل من الدرج لان الناس كامت تصيح اتصلو بلشرطه
مختار....وجهي يوجعني من كل مكان ملابسي تبهذلت
صحت من الباب نسمه نسمه انتي زينه
ردت عليه من ورا الباب اي زينه
مختار...تعاي نروح نشتكي علي منو هذا
نسمه....ماكو داعي شكرا لان ادخلت
مختار....ليش تكولين هيج تعاي نشتكي علي حتى لا يعيدها
مره ثانيه
نسمه.... مااكدر مااكدر
جمانه السعيدي
مختار...طلعت من الشقه وطبكت الباب مااريد اللح عليها اكثر لان اني مااعرف هذا منو وليش ضربها
اسمعها منهاره ووتبجي خطيه
خليها تهدء ونرجع نحجي بهذا الموضوع
دخلت شقتي ووجهي صاير خريطه من الضرب
بدلت ملابسي ودخلت الحمام سبحت وطلعت
حضرت الاكل واكلت
اخذت حبايه مهدء لان مو بس وجهي يوجعني حتى ايدي هم توجعني هلكد ما ضربته ايدي كامت توجعني
اني مااعرف شلون ضربته
منيين اجتني هاي القوه بعمري ما متعارك هيج عركه
النوب هو بكدي مره ونص زين وكدرت اضربه
لو ما الناس فكتنا جان موتني خلاص
اريد انام اندكت الباب فتحته شفته نسمه
نسمه...شلونك استاذ مختار اتاذيت
مختار....لا شي ما يسوه
نسمه....شكرا لو ماانت جان ذبحني
مختار...منو هذا
نسمه ...طليقي
مختار...طليقج وليش يضربج
نسمه....اتاخر بدفع النفقه ورحت اشتكيت علي
مختار...ليش ماقبلتي تشتكين اخذي حقج منه بلقانون
نسمه....عنده جماعه ساندي كلما اشتكي علي يطلع من الشغله بكل سهوله
اذا اشتكي علي يشد وياي اكثر
اخر مره هددني اذا اشتكي علي ياخذ مني لمار بتي
اجيت هنا شارده منه ومن ضلمه
هاي الشقه الاختي اشترتها واني كعدت بيها كلت بعيده مراح يعرف مكاني
اجا وراي مااعرف شلون اكدر اخلص منه
هذا بلوه ووكعت على راسي
صار ٣ اشهر مادافع نفقه الهاي الطفله
البارحه رحت اشتكيت علي ألبوم اجاني يريد يموتني
مختار.. ولو ما لازم تستكتين
نسمه.....ماعندي سند يحميني منه مجرم ماكو رحمه بكلبه
اجيت هنا حتى انهزم منه مااعرف شلون عرف مكاني عنده علاقات تعبني مااعرف شلون اكدر اخلص منه الله ياخذه واخلص منه تعبني حيل
مختار....شنو محد يكدر علي
نسمه...اني مالي احد عندي اخ وحيد وعايش بستراليا
واخت وحده ارمله ماعندي احد يوكف بوجها
تعرف هو مهددني اذا ازوجت ياخذ لمار وبقتلني خلاص
مختار....شنو هو بكيفه لازم يوكف عد حده
نسمه...اسفه اتاذيت بسببي لازم اشوفلي صرفه ويااا
مختار...ماعنده اب اخ واحد جبير نحجي وياااا
نسمه....ارعن ومتهور ماعنده حكمه بلتصرف ايده والضرب كبل
حتى اهله متبرين منه مابنقبل ابد
مختار...شلون ازوجتي ما سئلتي علي
نسمه....غرني بكلام الحب الناعم ضل يركض وراي
صدكته عبالي ادمي طلع حيوان حشاك
مختار....لازم اكو حل
نسمه...من رخصتك دوختك بقصتي ارجع البيتي بتي بقت وحدها
مختار...لا تفتحين الباب قبل لا تتاكدين منو الي ورا الباب
نسمه...شكرا مره ثانيه اسفه على الازعاج
مختار...طبكت الباب
تمددت على الجربايه ولله خطيه مسكينه صدك الناس
كل واحد همه شكل
نمت للمغرب يله كعدت
بليل اتصل عليه علي
علي....هااا ابو الحب اليوم ماكوووو
مختار....اليوم ابو الحب حصل كتله
علي...لا تحجي صدك منو يقرب عليك واني موجود
مختار.. هاك افتح كامره
علي.. هاي صدك هسه اجيك البغداد الي مد ايده عليك
امسحه من الكره الارضيه
مختار....اليوم طليق نسمه اجا وعتدا عليها ضربها
اني بس شفته فقدت اعصابي
نزلت علي ضرب يضربني واضربه ولك مو ولد عبالك ثور مااعرف شنو ياكل
اني هم ماقصرت وياي خربطت وجها
علي.. اجي اخذك للمستشفى
مختار...لا ما تسوه اجت نسمه تعتذر من كلامها صرت احسن
علي....يابويه تحملت كل هذا الضرب ومن حجت وياك صرت احسن
مختار...اي بشرفي كلامها مثل السحر
هسه شلون اريد حل هذا زوجها واكف بلعومي مثل العظم
مهدده اذا تزوج ياخذ منها البنيه
علي. هااا عدها بنيه
مختار.. اي لمار أربع سنوات
علي....خل اتصل بكم واحد وإنشاء الله راح نلكه حل
لا تخاف محد ياخذها غيرك
مختار. عفيه وليدي انتضر منك خبر
علي...بس اريد معلومات عنه واسمه الثلاثي
ووين ساكن بيا منطقه
مختار....سهله باجر اجيبلك كل المعلومات الي تخصه
علي...خاف يوجعك شي هسه اجي البغداد اخذك للمستشفى
مختار....مو كلنا صرت احسن لان نسمه طيبت خاطري
علي...الله يطيب خاطرك دوووم
مختار.. انشاء الله اسمع إذا اني كدرت الكالها حل تخلص منه راح اكدر ازوجها بس انقذها منه وتخلص
ازوجها
علي...انشاء الله خير