رواية اولاد تسعة
الفصل الاول1
بقلم جمان فريد
المقدمة
انفتح باب حديدي من طرف واحد..
طلع منه وهو يمرر في نظره ع المكان لعند ماجو عيونه عليها..
مع ان الاسود اللي كان مغطيها مش مبين منها شي لكن عيونه العاشقه كانوا يشوفوا في الجمانه الغاليه اللي مدرقها هالسواد..
بدت ع وجهه ابتسامه حب خفيفه حلوة وقلبه بدي يقود في رجليه اللي رفعوه ليها لين وصل في مكانها..
قعمز مقابلها ومازال عيونه عليها بنفس النظرات اللي كان ماليها الشوق وقعد ملتزم الصمت..
"السلام عليكم"
بإبتسامة رد..
/وعليك السلام..
سمع صوت ضحكتها اللي كان خفيف بعدين حطت ايديها ع الطاوله وقدمتله شويه وقالت..
/ I miss you so much
تنهد وقال..
/اني شن قلت ع الجية هني!؟
بعصبيه مصطنعة قالت..
/قتلك ميس يو سو ماتش ياعديم الرومانسية..
نزل عيونه وهو يضحك بعدين قامهم فيها وقال..
/شن حالك؟
تنهدت وقالت..
/الحمد لله رب العالمين في خير ونعمة من الله..
قال:اموركم تمام ما ناقصكم شي؟
قالت:ناقصنا انت بس..
هز راسه وهو يوزع في نظره ع المكان..
شويه هي وخرت وشافت جنبها ع الكرسي خدت حاجه وحطتها ع الطاوله وقربتهاله..
هو لما شاف الحاجه هادي بدت ع وجهه ملامح المفاجأه..
ابتسمت لما شافتهم وقالت..
/من لما وصلتني المسودة اللي انت كاتبها واني نقرا فيها ممكن قريتها عشرة مرات،بعدين الهمني ربي لفكرة كتابة رواية جمعت فيها احداث قصتك مع قصتي ودرتها بنفس الاسم"ولاد تسعة" وطبعت منها نسخة وحده بس..
سكتت وهي تشوفله كيف مازال قاعد مركز بنظره ع الرواية بعدين تابعت تقول..
/جبتهالك بش تقراها كان عجباتك نبيك تعطيني اذن بنشرها..كان ماتبيش بندير منها نسخة تانيه ويقعدوا عندي اني وياك بس مايقراها حد غيرنا
رفع عيونه وقال وهو مندهش..
/مش عارف شن نقول..ضحك بعدين قال..فاجئتيني..فرحتيني..مسح بيده ع شعره للخلف بعدين قال..تعرفي ديما نحس فيك نفسي التانيه تعرفي اللي نفكر فيه ونحس بيه من قبل مانقوله..
قالتله:لااني مش نفسك التانيه اني انت..لاني نصك ولانك نصي
كمل يقول معاها وهو يضحك..
"اني كلك وانتي كلي"
ضحكوا مع بعض بعدين هو قال..
/مانبيش نقولك غير كلمه وحده بس..اول حرف فيها يبدا بإسم حاجه ولعت في قلبي اول ماريتك واخر حرف فيها يبدا بكلي ياكلي انتي،ومابيناتهم شعور عمري ماحسيته الا لما عرفتك..
ضحكت وهي تقول..
/حتى اني يامشاكس
نزل عيونه وقعد يضحك بعدين رفعهم فيها وقال..
/ارفعي نقابك..ماتباني ع حد غيري..
حطت يدها المغطيه ع الخمار ورفعاته..
بدت ع وجهه ملامح الحزن لما شاف تفاصيل وجهها اللي يعشق تأمله غارقه في الدموع..
قاللها بنبرة بان فيها شي من الألم..
/صبا
مسحت دموعها بسرعه وهي تضحك قالت..
/خلاص خلاص..رشفت وقالت..خل نقولك نكته..مرة في واحد يصلح لصاحبه في راديو لما فكه طلع منه زقرلو "صرصور" قاله صاحبه الحق الحق راغب علامه هرب..
قعد يضحك من قلبه ع النكته وهي تضحك معاه بتعجب وتقول..
/غريبه اول مرة تضحك عليها!
هدا ضحك وقال والدموع في عيونه..
/I miss you so much
》》》》》》》》》》》》》》》》》》》》》》》》》》》》》》
🌱ماشي في ممر طويل وفي يده الروايه اللي كان يتامل في اسمها..ولاد تسعه..
♤ولاد تسعة..كلنا في الدنيا هادي تساوينا في هالحاجه كلنا ولاد تسعة..عشنا في ارحام امهاتنا تسعة شهور كلنا مرينا بنفس المراحل..حتى اللي يطلع قبل التسعة شهور يقعد فترة تحت العنايه والرعايه التامه لعند مايكمل التسعة الشهور بش يولي كامل وجاهز يخوض تجربته في الحياة..
كلنا ولاد تسعة صح لكن..اقدارنا ونصيبنا وقسمتنا في الدنيا مش وحده وكل حد فينا ليه طريق يمشي فيه..
مفروص علينا النصيب والقسم لكن الطريق اللي نمشوا فيه من اختيارنا حني بس...
..اني خضر تسعة سلامه خضر بيت المال..او آدم..
قصتي بدت من قبل مانجي ع الدنيا..لا مش من قبل مانجي ع الدنيا..من قبل مايجي بوي ع الدنيا..
من زمان..من زمان بعيد هلبه قبل اكثر من سبعين عام..
في مكان بعيد هلبه..مدينه عمرها مئات السنين ياما مر عليها وياما شافت..لكن اللي مرت بيه ع ايام جدي الخضر كان اشدها..
صراعات وحروب ودم وموت والسبب واحد،الدنيا ومافيها من زينه تخلي العقول تهيم فيها وتجري وراها وتسفك الدم وتزهق الارواح ع خاطرها...
رسول الله صلى عليه وسلم قال في اخر حجة ليه...
" أيّها النّاس..
واللّٰهِ ما الفَقر أَخشى علَيكم؛ ولَكنّي أخشَى عَليكُم الدُنيا أنْ تُنافسوها كَما تَنافسها الّذين مِنْ قبلكم، فتُهلككُم كما أهلكَتهم"
كان عارف وهو اللي مايقولش كلام الا من وحي ان الدنيا حتاخدنا من دينا وتخلينا نهيموا فيها ونجروا في جرتها جري الوحوش ونتقاتلوا ع خاطرها ومصيرنا في النهايه الهلاك..
لكن في ناس زي جدي "خضر" راجل يعرف ربي ومن الاقوياء والصالحين المصلحين كان وقتها شاب صغير لكن بكبر عقله وذكائه وقوته البدنيه وروحه القياديه والاهم من هدا كله علاقته القويه بالله سبحانه وتعالى قدر بهدا كله ينهي هالصراعات ويوقف حمام الدم ويحط قواعد للسلام خلت مدينة "الالف وخمسين" تعيش سنين طويله في استقرار وسلام..
ايه المدينه هدا اسمها"الألف وخمسين" سموها ع مساحتها ماقدروش اهلها يتفقوا ع اسم وجدي بش يحل هالمعضله اقترح هالاسم وهما وافقوا عليه وتم الصلح ووضعت الحرب اوزارها...
ومع مرور الزمن ولى جدي "خضر" كبير الالف وخمسين واغنى اغنيائها ويملك منها النص وباقي المدينه مقسمه بين باقي العائلات اكبرهم عائلة "البندار" اللي كانت تملك ربع المدينه..
عيلة "البندار"كانت اكثر عائله معاديه لعايلتنا عيلة "بيت المال" وع ايام الحرب ياما تقاتلنا وولى بيناتنا ثارات لكن بعد الصلح تناسينا هالثارات هادي وقعدت علاقتنا ببعض عاديه يشوبها بعض الحذر...
لعيلة البندار قصة طويله حيجي الكلام عنها بعدين لكن توا نبي نحكي عن قصة عايلتنا عيلة "بيت المال"..
جدي الخضر كان الولد الوحيد ع بنات..تزوج وجاب خمسة ابناء ذكور دار ناحيتهم واجبه هو وزوجته اللي هي جدتي وربوهم تربيه حسنة..
جدي الخضر في تربيته ليهم كان مركز ع حاجه وحده..
ع علاقتهم ببعض..علاقة الاخوه كان يبيها تكون متينه وقويه تخليهم يرخصوا ارواحهم لبعض..
لهذا ع حياة عينه قسم بينهم الورث زي ماقال الشرع وكل حد خدي نصيبه ودار فيه اللي يعجبه...
كلهم اشتغلوا ع اللي عندهم بدون مايفكروا يطوروا ولايكبروا شي ماعدا اكبرهم...جدي "سلامة"
جدي هدا كان نابغه دماغه مليح زي مانقولوا فالح وعنده طموح كبير..قدر خلال فترة من الزمن يكبر ويولي اغنى اغنياء مدينة"الالف وخمسين" وواحد من اهم الاغنياء في البلاد...
بعد موت بوه استلم السياده عنه وولى ليه قدره وقيمته في "الالف وخمسين"..
لكن...
خوته اللي مفروض يفرحوا باللي داره واللي وصله صار معاهم العكس ونبتت في قلوبهم بذرة الحسد اللي خلتهم ينسوا انه خوهم مرة وحده..واللي عاش سنين يبني فيه جدي الخضر انهد كله وصار مابين ولاده اللي صار بين يوسف وخوته وبين قابيل وهابيل...
🌿🌿🌿🌿🌿🌿
"تزوج ثلاثه مرات ياحاجه المراة الاولى حملت مرتين وحملها مايفوتش الستة شهور العيل يموت في بطنها ولدي رفعها تعالج لكن بلا فايده قعدت عام معاش حملت طلقها وخدي غيرها والتانيه حملت تلاته مرات وكانت ترمي من اول شهور الحمل وحتى هي عالجها لكن من غير فايده حملت بعد العلاج واجهضت في الرابع بعد هكي طلقها وخدي غيرها هادي قعدت معاه عامين ماحملتش ماخلا وين رفعها بش تعاين الدكاترة كلهم قالوا ماعندهاش مشكله وراهو حتى ولدي ماعنداش مشاكل لكن بعد اللي صار مع المراة الاخيره زبط ان العلة فيه هو..علة تانيه مالهاش علاقه بصحته وحتى حني فكرنا هكي لكن ماعرفناش شن هي هالعلة بالزبط"
هادي ذهيبة جت لمراة مكشوف عنها الحجاب زي مايقولوا حكتلها ع حالة ولدها "سلامة" متأمله انها تعرف العله اللي هما ماقدروش يعرفوها..
وهالمراة هادي بعد ماسمعت من ذهيبه قالت..
/ولدك صايباته عين قويه لازم ديروله حضرة بش تتحول منه..
ذهيبه بقلق وتساؤل قالت..
/حضرة!؟
قالتلها..
/ايه ومافيش غيرها تحول عن ولدك العين القويه اللي صايباته..
🌿وروحت ذهيبه المراة البسيطه اللي ع قدر قليل من العلم الديني والدنيوي للحوش تجري بهالحل لولدها اللي بعد ماسمعه منها قال بهدوء ولطف..
/يام اني الموضوع هدا مانبيش نفكر فيه توا نبي ننساه شويه ونريح راسي منه ونلهى بالزرق بعدين نولي نفكر فيه..
ذهيبه هزت راسها وهي تقول بضيق..
/ع راحتك وليدي ع راحتك..
🌿وقعد "سلامة" مسخر وقته لرزقه ورزق خوته اللي كان يعامل فيهم وكأنهم ولاده لأنه اكبرهم كان مستعد يعطيهم روحه مش بس وقته وماله همه كله يشوفوهم مرتاحين وناجحين ومستقرين في حياتهم حتى صغارهم كان يحبهم زي صغاره وعمره ماحس اتجاههم بشي من الغيره لانهم حايزين نعم عظيمه هو ماقدرش يحوز منهم شي نعمة الزوجه والذريه..
🌿🌿🌿
"انت كان تقنعه يسلمك المصنع يامنصور "
خش منصور السرير وهو يقول..
/اني قاعد نلمح بالحاجه هادي لكن هو مش عارف كيف يايدير في روحه مش فاهم يامايبيش يفهم..
مرته مشت وقفت ع المرايه وهي تفك في شعرها وتقول..
/شن بينقص من اللي عنده كان عطاك هالمصنع!؟ اللي عنده مايكمله شي..
منصور قال..
/قولي الله يبارك هدا بعدين بيولي رزقنا حني..
ضحكت وقالت..
/الله يبارك الله يبارك..
************
"خوك منصور يجري ع المصنع ياعبد الهادي"
وهو يتعشى حط الكاشيك وقال..
/عارفه عارفه..اساسا حني متفاهمين بينات بعضنا كان صار ماصار نقسموا بينا كل شي بالعدل..
قالتله:وامتى بيصير منه؟
هز راسه وقال..
/كل شي في وقته حلو...ورجع ياكل مرة تانيه..
🌱وهذا كان حال باقي خوتهم كلهم كانوا مخططين مع بعض لهدف واحد هو السيطرة ع ثروة خوهم سلامه اللي حاليا ماعنداش وريث غيرهم هما وامهم..
الخطه متاعهم كان ليها خطوات..اولها يحرموا خوهم من الذريه وتانيهم وهي اخرهم القضاء عليه مرة وحده بس طبعا بطريقه تخلي موته يبان طبيعي وهدا كله وسلامه غافل ولاخاطر في باله ولاتخيل في يوم ان خوته اللي من بوه وامه اللي كانوا عنده ولاده مش خوته يضمروله كل هالحقد والشر في قلوبهم اللي يخليهم يسعوا لموته بش يستولوا ع ماعنده من متاع الدنيا الزائل اللي كان عندهم اغلى منه ومن رابطة الدم والاخوة اللي تجمعهم...
..
الفصل الاول
♤ويمر عام وعمام بوي قاعدين يطبخوا في طبختهم ع نار هاديه...
قدام الناس كانوا يديروا كل اللي يطلع بإيديهم بش يبانوا الخوت الباهيين اللي ساندين خوهم وواقفين جنبه ووراه وقدامه،خلوا الناس تحسد جدي ع خوتهم خلوهم يقولوا ياريت كل الخوت زي خوت سلامة بيت المال..
ومن ورا الناس كانوا يسعوا بكل جهدهم بش ينفدوا خطتهم بعيدة المدى واللي كانوا متأكدين انها حتنجح مع يقينهم التام انهم حيعيشوا لهداكا اليوم واللي بعده..
وياه ع حظ جدي سلامة اللي مانتمناش لأعدائي..
🌿🌿🌿🌿🌿
قدام واحد من مساجد مدينة "الألف وخمسين" كان واقف سلامه مع "مسعود" اقرب اصدقائه صديق طفولته ومراهقته وشبابه وكان عنده اكثر من اخ..
وهما واقفين يستنوا ولد اخ سلامه يطلع من المسجد كان يدور بينهم حديث عن..
..مسعود:والله ماريت خوت زي خوتك ياراجل ربي يديمهم عليك..
سلامه وهو مبتسم قال..
/والله ديما نحمد في ربي عليهم نعمة ماتتقدرش بثمن...
مسعود وهو يشوف لباب المسجد قال..
/الله يرحم من ربى..
هز سلامه راسه وقال..
/الله يرحمه ويغفرله..وترتسم ع وجهه ابتسامه حلوة لما شاف ولد خوه طالع من الجامع بعد ماتم درسه في "الكتاب"
الولد لما شاف عمه فرح فرحه عارمه ومشاله يجري لين وصل فيه رفعه سلامه في حضنه وقال..
/هاشن ياشيخ مرعي ماعطاكش فلقة الشيخ اليوم؟
مرعي بإبتسامه..
/لالا ولامرة كليت فلقه من الشيخ بوي هو اللي يعطي فيا فلقه بس..
ابتسم سلامة بأسف وقال..
/ربي يهديه..المهم ياشيخ خدينا من بوك اذن بش نرفعك ندهور بيك وناخدلك حاجات سمحة..
ابتسم مرعي بفرح وسلامه باسه من خده بعدين قال لصاحبه..
/هي ياشيخ مسعود عطينا الاذن..
مسعود بضحكه..
/عطيتكم..
سلامه وهو مبتسم قال..
/السلام عليكم..
ومشي بولد خوه لسيارته وصديقه مسعود قعد معاهم بنظره لعند ماركبوا السيارة وتحرك بيها سلامه..
بعدين مشي لسيارته ركبها وشغلها وتحرك بيها لوجهة خارج المدينه..
بعد ماقطع مسافة لاباس بيها وصل لأكبر مصنع رخام في شمال افريقيا..
لما خشله توجه طول لمكتب الادارة اللي كان موجود فيه "منصور" اخ سلامة الاوسط..
🌿مسعود:خليته مع ولدك قال بيرفعه يدهور بيه..
منصور طلع من جيب قميصه السواك وقال..
/ايه قال بيرفعه مش عارف وين..وبدي يحك في سنونه بالسواك..
مسعود:باهي قولي شن صار في الكلمه اللي عطيتهالي!؟ ليك توا سته شهور شاد المصنع،لولا تزكيتي اني مانلتها..
نزل منصور السواك وطلع من جيب جاكيته شيك وحطه قدام مسعود..
خداه مسعود وهو يسمع في منصور يقول..
/خليك متفكر مازال عندك هلبه حاجات القدام ديرها ومع كل خدمه تنفدها يضاعف المبلغ..
مسعود حط الشيك في جيبه وقال..
/حتى انت خليك متفكرني بعد ماتوصلوا للي تبوه انت وخوتك..
منصور:ريح بالك اني ماننساش..
هز مسعود راسه بعدين ناض وهو يقول..
/السلام عليكم..ومشي بيطلع..
ومنصور قعد معاه بنظره وهو يرد عليه في السلام..
🌿🌿🌿🌿🌿🌿
بعد اسبوعين..
كانوا الولاد ملتمين في حوش بوهم ماعدا سلامه كان عنده سفرة لطرابلس بسبب بعض الاشغال اللي عنده فيها..
وامه "ذهيبه" اللي ديما حامله همه جربت هالمرة تشارك ولادها هالهم لعلها تتفق هيا وياهم يقنعوه يرجع يجرب حظه في الزواج مجددا..
🌿عبد الهادي:يام ولدك نفسيته تعبت هلبه من الموضوع هدا..
منصور:خليه يام ع راحته بالله عليك واقتنعي ان هدا قسمه في الدنيا ربك مش كاتبله يدير ذرية..
ذهيبه نزلوا دموعها وهي تقول..
/علاش هالفال اللي مش باهي يامنصور! اني العام اللي فات مشيت للحاجه "سليمه" وحكيتلها عن اللي صار معاه قالتلي ولدك صايباته عين قويه مفروض نديروله حضرة..
منصور غمض عيونه بنفاذ صبر وقال..
/الله يهديك يام الله يهديك..
واحد من خوته قال..
/فكك من الدوة هادي يام..ولدك سلامة كيف ماقالك منصور ربك مش قاسمله الذريه..بدال المرة تزوج تلاته مرات واللي ياخدها ياترمي ياعيلها يموت يامتحملش بكل..تفكري يام كيف ولت نفسية ولدك في جرة اللي صار معاه..
منصور:اني توا همي الوحيد يقعد مرتاح نفسيا معاش نبيه يولي للهم والكدر مرة تانيه..
عبد الهادي:وبعدين يام حني خلينا صغارنا صغاره تي بناويتي يحبوه اكثر مني..
منصور:والله حتى اني مرعي والبنيات يفرحوا بخشته اكثر من خشتي..
واحد من خوتهم الصغار..
/وحتى حني ان شاء الله بعد ناخدوا بنخلوا صغارناصغاره
مسحت ذهيبه دموعها وهي تقول..
/الله لايحرمكم من بعض ولايفرق بينكم..
بأصوات متقطعه قالوا..
"آمين"
ومنصور قال:خلاص يام معاش تخممي في حال سلامه حني معاه..
هزت ذهيبه راسها بالموافقه ع كلام ولدها مسايرة ومن داخل قلبها زاد انوجع ع حال ولدها الكبير..
♤"ويمكرون ويمكر الله والله خير الماكرين"..
جدي "سلامة" في مشيته لطرابلس صار معاه شي ماكانش متوقعه..زي مايقولوا قسمك ونصيبك يجيك لعندك ومرات يجيبك لعنده..
🌿في حوش الراجل اللي حل عليه ضيف غادي بعد الغدي طلع هو وياه يدهور في سانيته..
وفي عز انسجامه مع حديث الراجل اللي كان يحكي ع سانيته ومافيها بانوا عليه صبايا في بداية ربيع عمرهم كانوا يلقطوا في اللوز من الشجر..
من بينهم كلهم ماجوش عيونه الا ع وحده شاف فيها جمال الصورة والاخلاق..كانت جدا جميله مع انها محجبه ومحتشمه لكن جمال وجهها وبسمتها اللي كانت تكبر وهي تحكي مع اللي معاها سلبوا عقله..
التفت للراجل لما سمعه يقول..
/هادم بنات ولادي ربي يهديهم كل عشيه يغافلوني ويقطفوا من اللوز...علا الصوت وهو ينادي...يازكيه..
التفتت البنت اللي خدت عقل سلامه وعيونها يجوا في عيونه هو ابتسم من قلبه لما شاف جمال عيونها..
اما هي من خوفها من جدها وحشمتها من ضيفه لوحت ماعندها من لوز وهربت والبنات داروا مادارت ولحقوها..
ضحك سلامه وجدها قال بضحكه..
/ربي يهديهم ويصلحهم..
♤ويروح جدي من طرابلس وخلا عقله وقلبه فيها لكن ماقدرش يخليهم غادي اكثر من اسبوعين ولى من جديد لطرابلس بش يفتح موضوع ام العيون اللوزيه جداي "زكيه"..
🌿سلامه:بنجيك بالدغري ياحاج ومن غير لف ودوران اني يوم اللي ريت حفيداتك طاحت عيني ع اللي ضبحت عليها ونبيها ع سنة الله ورسوله..
الراجل قال:زكيه!؟
وهو منزل عيونه حرك راسه بإيجاب..
قاله:والله شن بنقولك مانلقاش خير منك ياولدي ياسلامه لكن لازم نرد الشيرة ع ماليها ونرد عليك..
سلامه:قداش بتاخد منك وقت هالشيرة؟
ابتسم الراجل وقال..
/في حدود الحفظة..
رفع عيونه فيه وقال..
/اهم شي نبيك تحكيلهم عن وضعي كله مادرق عليهم شي..
هز راسه وقال..
/اكيد ياولدي اكيد..
♤وعاد في حد بعقله يرفض يناسب سلامة بيت المال اللي عنده الهيل والهيلمان!؟
مع ان جدي كان اكبر من حناي وقتها ب17عام لكن عطوهاله وحناي بروحها بعدين صرحت ان جدي عجبها من اول ماراته هو جدي كان دون خوته كان صاحب حضور قوي ووسامة اقوى..
وعاد بعد خدي الموافقه روح طول بلغ امه اللي طارت من فرحتها لكن خوته قريب ماتوا من صدمتهم..فوق غضبهم خافوا وكان اكبر سبب لخوفهم ان المراة اللي بياخدها من اختياره هو مش اختيار امه...
وطبعا قدامه وقدام امهم داروا رواحهم فرحانين اكثر منها ومشوا مع جاهه من مدينه "الالف وخمسين" بش يخطبوهاله وفي الفضانيه تحدد موعد العرس بعد شهر..
🌿"بيصير فيها زي ماصار في اللي قبلها"
عبد الهادي:لكن بالعقل ياهووه بالعقل ماديروا شي يفتح علينا العين..
منصور وهو يحك في سنونه بالسواك قال..
/اكيد بالعقل..ولازم نزيدوا ع صبرنا صبر
واحد من خوته الصغار قال بضحكه..
/من حظنا عرسنا بيجي مع عرسه معناها كل شي عليه..
ضحكوا ومنصور قال..
/اضحك الله سنك..هكي ولاهكي كل شي عليه..
ضحكوا ع كلامه وهو هدا ضحك وقال..
/خليكم هاديين وتبعوا كلامي وكيف ماقلت من قبل اصبروا اخر الصبر ديما حلوة..
♤اني بعد ماسمعت بقصة جدي سلامه وخوته احترت هلبه في امر خوه منصور بالذات،راجل متدين حافظ القرآن يصلي بالناس كيف قدر يحلل لنفسه اللي داره مع خوه بشن برر افعاله الشيطانيه هادي!؟ لكن بعدين وين تفكرت قصة ابليس مع سيدنا آدم في الجنه فهمت كيف كان يفكر وبشن ممكن يكون برر اللي كان يدير فيه لخوه الكبير..
ع فكرة منصور هدا كان عنده صديق زيه حتى هو زي مايقولوا"شيخ زلحة" اسمه بوعجيله البدري حتى هو قصته قصة حنجوها في وقتها...
🌿وتزوج "سلامه" من "زكية" وعاش معاها في حوش في بوه مع امه..بعد الزواج تفاجئ جدا في شخصيتها عمرها بس 16عام..لكن عقلها كان كبير ولسانها ينقط عسل وتعامل في امه احلى معامله وقايمه بمسؤولية الحوش ع اكمل وجه واللي زاد اعجابه بيها انها كانت متعلمه تقرا وتكتب كانت تحب تقراله الجريده وهو اللي كان متعلم تعليم عالي كان يحب يسمع اخبار الجريده بأسلوبها وصوتها المميزين..
🌿"والله ماني عارف نركز في الخبر ولانهيم مع صوتك"
ضحكت زكيه بخجل..
ابتسم وقال:ماشاء الله عليك يازكيه ع صغر سنك فيك هلبه حاجات تخليك فارقه عن بنات جيلك يرحم من رباك
بإبتسامة خجل قالت..
/ويرحم والديك..
قاللها وهو يتأمل في ملامحها الحلوة..
/عندك رغبه تكملي تعليمك؟
فتحت عيونها ع وسعهم بمفاجأة..
ابتسم وقال..
/نجيبلك اساتذة هني يعلموك كل شي..
نزلت عيونها وهي تقول بفرح..
/قداش فرحتني ياسي سلامه..فرحتني هلبه..
قاللها بحب..
/واني هدا مانبي نفرحك وبس..
♤وعلم جداي الزكية الرياضيات والعلوم واللغة الانجليزيه وهي كان دماغها مليح تتعلم بسرعه..
وحالها هدا كان مخلي الحسد يكبر في قلوب سلفاتها عليها زي مازاد كبر في قلوب خوته عليه اللي حصل مراة صغيره وجميله ومتعلمة ومقومه ع قولتنا يعني كامله مكمله..وهالحسد وصل لدرجة خلت واحد منهم يحط عينه ع جداي زكيه ويخطط ياخدها بعد ماينهوا حياة جدي سلامة..
🌿طالعة ذهيبه بكناينها من الحوش بش يمشوا زيارة لوحده من الجارات..
وهما طالعات شافوا سلامه واقف مع واحد من خوته الصغار ومعاهم عبد الهادي اللي عيونه من ورا النظارات كانوا يتأملوا في زكيه..
زكيه وين تشوفه كانت تتمنى تطلق عليه الموت..ملاحظه نظراته ليها ومن لما جتهم ماارتاحتش لولا واحد من خوت سلامة..
ومش بس زكيه اللي كانت ملاحظه نظرات عبد الهادي حتى مرت عبد الهادي بدت تحس بيه خصوصا انه تغير عليها من بعد زواج سلامه بزكيه وكذا مرة قارن بينها وبين زكيه بطريقة غير مباشرة..
غيرت نظراتها الحاقدة عن راجلها لخوه لما سمعاته قال..
/عينك ع اللي لينا يام..
نزلت زكيه راسها وهي مبتسمه بخجل..
وذهيبه قالت بضحكه..
/كلهم في عيوني..
وسلفات زكيه كان يرمقوا فيها بنظرات حسد ماعدا مرت عبد الهادي اللي شافت نظرات الكره والغيره واضحه في عيون راجلها لخوه...
♤كانت جداي زكيه حامل وخبر الحمل ماكانش يعلم بيه حد غير جدي وامه وبس وهالشي كان بطلب امه خوف من العين..
وقعد هالخبر مدرق لعند ماقرب موعد الولادة..
🌿"مش قلتلكم حامل وانتم تقولولي لا سمن"
مرت عبد الهادي قالت..
/انتي سمعتي عمتك وين نشدناها شن قالت..
مرت منصور قالت بغيظ وهي رافعة حاجبها..
/حتى هي جحدتها..لكن باهي..باهي
♤وجابت جداي زكيه ولد وجداه ذهيبه جابت "الزغرادات" يزغردوا عليه وجدي سلامه ع سبوعه دارله مهرجان حكت بيه "الالف وخمسين" شهور..وقعد هالولد يكبر قدام عيون جدي وجداي وهما فرحانين بيه لكن مش اكثر من فرحة ام جدي "ذهيبه" اللي بدون ماتشعر دارت الفرق بينه وبين باقي الصغار وهي هكي زادت نفخت ع نار الحسد المستعرة في قلوب خوته وحتى نساوينهم..
زي النار اللي ولعت في قلب مرت عبد الهادي لما تأكدت ان راجلها راغب مرت خوه..!
🌿كانت ضم في خزانة ملابسه زي ماتعودت دير هالعاده كل اسبوع..وهي طلع في الملابس عترت في صورة وين شافتها عقلها قريب طار من راسها..كانت صورة لزكيه..صورة شخصيه مش معروف كيف عتر عليها...
♤وعقول جداتي زكيه وذهيبه قريب طارت من روسهم لما شافوا ولد جدي سلامه اللي كيف سكر العام وقتها في عز ماهو يلعب طاح من طوله ومعاش ناض بعدها..
ايه مات..وامه وحناه قريب ماتوا بعده وجدي سلامه جاته صدمه قريب قتلاته..
قالت جداي زكيه ان هديكا الفترة كانت اصعب فترة تفوت عليها في حياتها غرقوا في حزنهم شهور وماطلعوش منه الا برحمة ربي ووقفة خوته جنبه..ايه هالوقفه اللي كانت تلخصها المقوله اللي تقول..
"يقتلوا القتيل ويمشوا لجنازته.."
رجعت الحياة بعدين لطبيعتها وجدي سلامه زي العاده سلم احكامه لله ورجاه يصبره ع ماقضاله..لكن جداي زكيه اللي كانت فطينه وعقلها ديما فايق بدت تفكر في كل شي صار مع جدي سلامه قبلها واللي صارله بعدين معاها..حال خوته اللي برغم انهم كانوا يبانوا قدامها يحبوه حب عمره صار لكن ولامرة صدقت مظاهر هالحب..
وللأسف ماقدرتش تشارك راجلها اللي تفكر فيه لانها كانت واثقه ومتأكده انه مش حيصدق فيهم شي وحتطلع هي اللي ماتنفعش في نظره ومش بعيد يطلقها مرة وحده..هدا علاش قعدت تفكر في طريقه تفتح فيها عيون راجلها ع خوته بدون ماتبان في الصورة وطلبت من الله بإلحاح يساعدها..
🌿من بعد موت ولد سلامه بفترة حملت زكيه تاني واجهضت وخبر الاجهاض هدا قعد مدرق بطلب من زكيه..
"علاش!؟"
زكيه بشي من التعب..
/اني شاكه ان في حد دايرلك حاجه ياسي سلامه..
عقد حواجبه وقال..
/مني!؟
هي قالت:مانعرفش ياسي سلامه واني هدا علاش مانبيك ماتقول لحد اني رميت بش يبان..
هو قال:باهي علاش هكي فكرتي!!؟
بلعت ريقها وقالت..
/ياسي سلامه فكر فيها شويه..كل اللي يصير معاك يصير في الذرية وكأن في حد مايبيكش دير الصغار..
هو قال..
/علاش!؟
شافتله شويه وقالت..
/نعرفوا علاش بعد مانعرفوا من اللي يدير هكي..
قاللها:بالك غير تتخيلي وتتوهمي يازكيه..
قالت زكيه..
/قتلك فكر فيها ياسي سلامه..
غير نظره عنها وقعد يفكر للحظات بعدين مشي طلع لامه يطلب منها ماطلباته زكيه وتفاجئه امه لما تقول..
/حتى اني مانبي حد يعرف لاقريب ولابعيد..
بانو الدموع في عيونه وهو يقول..
/في شن تفكري يام!؟
امه قالت بضيق..
/نبي نعرف من اللي قاعد يدير فيك هكي ياولدي من اللي كارهك هالكره هدا كله..
♤جداي قالت ان ذهيبه فكرت في كناينها او وحده من بنات العيله تكون حاطه عينها ع سلامه وحتى فكرت في عماته وخالاته..لكن جداي مامشتش في تفكيرها لاهني ولاغادي كانت واثقه ومتأكده ان خوته ورا كل شي قاعد يصير معاه في حكاية الصغار وقالت حست ان جدي حتى هو كان يفكر في الحاجه هادي بينه وبين نفسه لكن مايبيش يصدقها لعند مافي ليلة شاف حلم حرم عليه النوم ليالي،حكاه لجداي وهي دلاته ع شيخ دين في طرابلس عالم بتفسير الاحلام حيلقى تفسير حلمه عنده...
🌿"شن شفت ياولدي"
سلامه وهو مقعمزة ع ركابه اللي كان ثانيهم بدي يحكي في حلمه للشيخ..
/ياشيخ شفت روحي نقيم في شوالات كبار مش عارف كان قمح ولاشعير رفعتهم وحطيتهم في مكان واحد،وبعد حطيتهم بديت نعد فيهم،الشوال اللي نعده تبلعه الوطا لعند ماوصلت للتاسع قبل لنعده مشيتله تغمرته وشديته بقوة بش ماتبلعاش الوطا واللي صار بعدها ان في جذور طلعوا من الشوال هدا انغرسوا في الوطا وهالشوال ولى شجرة كبيره ورقها اخضر كبير ومضلل والارض تحته ولت تابته وكلها خضرا..
الشيخ هز راسه بعدين قالت..
/عندك صغار؟
بحزن قال..
/ربي ماكتبليش تزوجت اربعه مرات ولعند توا ماتولي تمانيه صغار منهم اللي ماطلعش من امه ومنهم اللي ماتكونش مازال وواحد فيهم بعد الولادة قعد عام وتوفى بسكته قلبيه..
ضم الشيخ شفايفه بأسف بعدين قال..
/انت في حد مدايرلك شي ياولدي..وهالحد هدا قريب عليك هلبه.
تعبوا عيونه بالدموع وقال..
/مني ياشيخ؟
قاله:كان دور ع المستفيد تعرف..
نزل عيونه بعدين غمضهم بشده وضم ايديه في بعض والشيخ يشوفله بعدين قاله..
/لتفسير المنام تتمه ياولدي..
فتح عيونه وقامهم فيه..
الشيخ قاله..
/الشوالات اللي حلمت بيهم هادم صغارك اللي حكيت عنهم واخرهم هدا مولود ذكر حيجيك قريب بإذن الله حيكون ليه شأن عظيم وحيطلع من نسله ذريه كلهم في صلاح إن شاء الله..
بدت ع وجه سلامه ابتسامة استبشار..
الشيخ:لكن عندي ليك نصيحه ياولدي..ولدك هدا كان جاك ماتبالغش في فرحك بيه واعرف كيف تربيه واختارله اسم مايخليشي يزهى في عين كل من يعرفه..
تبدلت ملامح وجهه للإستغراب الشديد..
والشيخ متابع يقوله..
"سميه تسعه"
هو بنفس الملامح قال..
/تسعه!؟
هز الشيخ راسه ايجابا بصمت..
♤سميه تسعة..لتوا مش قادر نفهم قصد الشيخ هدا من هالطلب..مرات نقول لدفع العين يعني الناس وين تسمع اسمه يتفكروا اللي صار في خوته من قبله ويفكروا انه مرات يلحقهم وهكي بدال مايحلوا عيونهم فيه يوجعهم حاله ولايخافوا من مصيره اللي مرات يكون زي مصير خوته من بعده..غالبا..غالبا هدا قصده..لكن العدو الحقاني لجدي سلامه ماكانش عيون الناس...
🌿بعد شهر..
في حوش منصور..
كانوا مجتمعين الخوت في مربوعته واجتماعهم هدا كان لحسم امرهم اتجاه خوهم.
عبد الهادي:معاش فيها صبر اكثر من هكي..
منصور وهو يحك في سنونه بالسواك قعد ساكت وهو يفكر..
واحد من خوتهم قال..
/في طريقه تخلينا نخلصوا منه ع الهادي..
خوه التاني قال..
/وهي في غيرها الطريقه اللي تفاهمنا عليها!؟ نسمموه
قاله:ايه لكن اني عدلت فيها شوي لان السم مرات يبان في دمه وينفضح اللي هناك لكن اني نبيه يتسمم بدوا هالدواء يقعد يقتل فيه وحده وحده لعند ماينهيه مرة وحده ويبان بعدين سبب الموت سكته قلبيه.
حول منصور السواك من فمه وقال..
/عارف من وين تجيبه وكيف تجيبه؟مانبوا حد يشهد علينا غير مسعود..
قاله؛كون هاني مرتب الوضع كويس..
عبد الهادي:خلاص مالا ابدوا نفدوا بسرعه..
شافله منصور بشك بعدين قال..
/انت فيك شي تاني..
خوته قعدوا يشوفوا لعبد الهادي بصمت وهو بكل جرأة بل وقاحه قال..
/من الاخير ماحد فيكم يفكر يرد زكيه من بعده..زكيه اني نبيها..
منصور رفع حواجبه وهو مندهش..
اما خوته التانيين نظرتهم ليه كانت نظرة استنكار..
وهو بكل كبر قال..
/واهو العلم وصلكم..
🌿والعلم وصل حتى لمرتك ياعبد الهادي اللي كانت تسمع في حديثكم من ورا الباب وانت هكي عطيتها دفعة قويه للإنتقام منك ورفعك للهاويه انت وخوتك معاك..
♤بعد فاتت مده لابأس بيها حملت جداي زكيه وجدي مجرد ماعرف بحملها رفعها لطرابلس خلاها عند اهلها وروح لأمه اللي فجعها لما قال..
🌿"بنطلقها خلاص"
ذهيبه بصدمه:شن تقول!؟
هو بعصبيه مصطنعه قال..
/هدا اخر كلام عندي يام وبالله عليك معاش تفتحيلي موضوع الزواج مرة التانيه..
ومشي طلع من حداها وخلاها تبكي ع فراق زكيه وع حظ ولدها..
وانتشر خبر طلاقه لزكية الخبر اللي صدم خوته وخلا خوه عبد الهادي قريب يهبل هكي حيصعب عليه الوصول لزكيه ومن كثر ماكانت مسيطرة علي تفكيره سيطرة تامه معاش اهتم لشي تاني غيرها لامال ولاجاه..
اما خوته بعدين بدوا في تنفيد خطتهم واجرولها وحده من الخدم في حوش بوهم..
كانوا يبوها تحط شي من الدواء في طاسة الشاهي الاخضر اللي كان يفضل يشربه سلامه بعد الغدي..
♤وفي يوم من الايام لم جدي خوته في حوش بوه وقاللهم انه ناوي يدير زردة في مدينة "القاره بولي" كان عندهم فيها مزرعة كبيره تقول بلاد وقاللهم يبيها زردة رجاله بس..
🌿"وفي شن تاني نبي نبلغكم بيه غادي..قرار فكرت فيه هلبه وخديته بعد ماتأكدت ان فيه مصلحة الكل"
منصور بإستغراب..
/قرار شني؟
تنهد وقال..
/تو تعرفوه في وقته..حط يده ع صدره وتنفس بقوة..
قاله عبد الهادي..
/خيرك!؟
خدي نفس وزفر بعدين قال بإبتسامه ألم..
/نحس في روحي من الهم معاش عندي صحة خلاص..خلاص
منصور عقد حواجبه وقال..
/خيرك ياسلامه!؟.
بنفس الابتسامه قال..
/ماخيرني شي مافي شي..ناض وهو يقول..نبيكم غدوة تسبقوني للمزرعه عندي كم حاجه بنديرها بعدين نلحقكم..عطوني الاذن بنخش نرقد نحس في روحي تاعب شويه..
عبد الهادي قال..
/لاباس عليك
رفع يده وحياه ومشي خش داخل وهما بعيونهم معاه..
لما خش منصور قال..
/تشوفوا في اللي نشوف فيه!؟
واحد من خوته قال..
/الدوا بادي ياخد في مفعوله بالكثير شهر ويتوكل..
منصور:تتوقعوا اللي يبي يلمنا ع خاطره في المزرعة هو الموضوع اللي في بالي!؟
ضحك خوهم الصغير وقال..
/كان هكي جتنا ع الطبطاب..
♤باهي علاش هالحقد هدا كله شن دارلهم شن شافوا منه! اياه ياخضر حتى انت..يعني خوت سيدنا يوسف شن شافوا منه لما قرروا يقتلوه ولايلوحوه في البير ولاهابيل شن دار لقابيل بش يقتله!؟الحسد ياخضر الحسد نار تاكل كل شي يجي في طريقها..جدي سلامه وقتها كان عارف ومتأكد وبالادله الدامغه اللي داروه فيه خوته طول هالسنين واللي ناويينله عليه..في مرة كان جاي بيطلع من الحوش شاف ورقه مطبقه في كرسي سيارته هالورقه كان مكتوب فيها كل شي وبالاسماء حتى اسم مسعود انذكر وحتى اسم السحارة اللي كانت تمشيلها مرت منصور بش دير السحر لجدي ونساوينه واسم الشغاله اللي يبوها تحطله الدوا اللي يبوا يقتلوه بيه وطبعا هو بش زاد تأكد خلا الشغاله تعترف مش بس هي حتى صاحبه مسعود اللي زاده صدمه ع صدمته..
"حتى انت يابروتس" تعرفوا قصتها العبارة هادي اللي قالها يوليوس قيصر لأقرب صحابه لما تعاون مع رفاقه اللي خططوا لإغتياله بالطعن؟ كلهم طعنوه في مرة وحده لكن الطعنه اللي قتلاته كانت اللي جاته من صديق عمره..
لكن جدي سلامه ماخلاش الطعنات الغادرة هادي تقتله وخلا العكس هو اللي يصير..
🌿"اسمع يامنصور من توا نبوك ديرلنا عصبان"
ركب منصور السيارة وقال بضحكه..
/ياودي حاضر..حاضر...
سكر باب السيارة وشغلها وتحرك بخوته لمدينة القاره بولي..
حط في راديو السيارة شريط قرآن شغله وعلا الصوت..
عبد الهادي اللي كان مقعمز جنبه شافله بطرف عينه بعدين رد نظره القدام وابتسم تهكما..
وخوته اللي كانوا مقعمزين في الخلف اللي هدا غمض عيونه ورقد..
وقطعوا مسافة لابأس بيها والصمت سائد ومافيش صوت مسموع غير صوت قارئ القرآن اللي كان يتلوا في سورة الحديد وبعد ماوصل في الآية هادي...
"وَلَكِنَّكُمْ فَتَنتُمْ أَنفُسَكُمْ وَتَرَبَّصْتُمْ وَارْتَبْتُمْ وَغَرَّتْكُمُ الأَمَانِيُّ حَتَّى جَاءَ أَمْرُ اللَّهِ وَغَرَّكُم بِاللَّهِ الْغَرُورُ."
هالآيه كل كلمة فيها لو عقلتها الجبال لتصدعت وانهارت لكن قلوبهم اللي كانت اشد قسوة من الحجارة ماتحرك فيها شي..
زي مكابح السيارة اللي مابتش تتحرك لما قعد يضغط عليها منصور برجله..
بفزع قال وهو موجه سؤاله للمكابح..
/خيركم..خيركم!؟
استاقظ عبد الهادي اللي كيف بدت تاخده غفوة وخوته فاقوا وهما مفجوعين..
انتبهوا للي قاعد يصير بدوا يصرخوا بفجعه وهما ينادوا بإسم منصور اللي كان يشوف في الموت بعيونه..
الموت اللي جاباته شاحنة لما طلعت عليهم فجأة حاول منصور يتفداها لما هرب منها لطريق التانيه رفعت السيارة لجرف وطاحت منه وهي تتقلب في الهواء وكل مرة تنخبط في صخرة من صخور الجرف لعند ماجت ع ظهرها ارضا وانفجرت...