رواية اولاد تسعة الفصل الواحد والعشرون21بقلم جمان فريد

الليل في عزه...

واهل القصر كلهم فايقين ماعدا الاطفال الرضع..

في الصالون النساوين كلهم موجودات الخوف مسيطر عليهم وقلوبهم ع نار..

بلقيس الوحيده فيهم اللي كانت خايفه على ربيعه لكن الباقي خوفهم كان من تسعه..

🍃وفي كوجينة القصر..

الخدم مجتمعين يفكروا في اللي صار واللي مازال بيصير..

..هنادي بقلق قالت..

/مش حنرقد الليله لين نعرف شن صار في اللا ربيعه..

برنية بقلق وحزن..

/ياخوفي دير في روحها زي مادارت امها..

هنادي قالت بخوف..

/لا ياربي ان شاء الله لا..

زهره بتساؤل..

/شن دارت امها؟

هنادي قالت بخوف..

/شنقت روحها..

بدت ع وجه زهره ملامح الوجع وهي تقول..

/لاحول ولاقوة الا بالله..

مجيده وهي تاكل في المكسرات قالت..

/نقولوا امها كانت في عازة وفقر بش دارت هكي لكن هي شن ناقصها!؟؟

برنيه شافتلها بحده اما هنادي انفجرت فيها وقالت..

/كان عندك كلمه باهيه قوليها كان ماعندكش سكوتك بركه..

مجيده فنصت عيونها وهي تقول..

/هيه هيه ياماما شن هو اللي قلته بش تكلميني هكي!؟ كذبت ولاتبليت كل شي صار الناس شاهده عليه..اشرت ع برنيه وقالت..وابله برنيه اولهم..

برنيه بنرفزة قالت..

/خلاص اسكتي انتي وياها سكروا فامكم..

سكتوا وهما يتبادلوا في نظرات الكره وزهره تشوفلهم..

فجأة..

سمعوا دق ع باب الكوجينه الخارجي قالت هنادي..

/مني!؟

جاها صوت خوها وهو يقول..

"البي روح "

كلهم بدت ع وجوههم ملامح الصدمه مع الخوف وهنادي قالت..

/مش مفروض يروح نهار الاحد!؟

برنيه ناضت بسرعه ومشت طلعت بش تخبر اللات وهما يلحقوا فيها بأنظارهم..

▪▪▪▪▪▪▪▪▪▪

"خليك عاديه ياعمتي حني مادرناش غلط الغلط راكبها هي بس"

زكيه قعدت تفرك في ايديها ببعض وهي متوترة..

هانيه قالت..

/نزيهه عندها حق ماما كل شي ضدها هي حتى حركتها هادي والحمد لله في شهود ع عملتها..وشافت لبرنيه اللي غيرت نظرها طول لزكيه..

🍃في هالاثناء..

خش تسعه للقصر ومعاه حسناء وهما ماشيين طلعت قدامهم مجيده اللي قالت..

/الحمد لله ع سلامتكم يابيي ويا اللا..

وقفوا وهما يردوا عليها..

"الله يسلمك"

مجيده:اللا الكبيرة تبيك في الصالون يابيي.. 

طول مشي بإتجاه الصالون وحسناء بعد ماشافت لمجيده بنظره جانبيه لحقاته..

مجيده قالت بكره همسا..

/هالصفرا الحقيرة..غيرت نظرها للباب الرئيسي بعدين ابتسمت وقالت..خل نمشي نشوف جمال..مشت بسرعه وهي تقول..قداش استاحشته..

🍃وجمال برا واقف ع بلعيد اللي خبره بكل اللي صار..

جمال بخوف..

/كيف طلعت من الصبح وماتعرفوش وينها لتوا!؟

بلعيد بقلق قال..

/ماخلينا وين دورنا ومن سألنا مالهاش اثر بكل الشرطه بس اللي ماخبرنهاش خوف من الفضايح..

تباعد عنه جمال وهو يفكر في اللي سمعه..

🍃اللي قاعد تسعه يسمع فيه حاليا من امه،الوحيده اللي كانت موجوده معاه في الصالون..

🍃زكيه وهي تظاهر بالثبات قالت..

/اني قلتلها شدي جناحك ماتطلعيش منه لين يجي راجلك لكن هي من خوفها من عملتها هربت..

تسعه وهو واقف وحاط ايديه ورا ظهره قال بنبره هاديه يتخللها غضب باين في كل ملامح وجهه..

/قسما بالله العلي العظيم قسما بالله العلي العظيم اللي صار هدا ماني معديه والله ماني معديه وتوا ادعوا ريي ادعوا ربي ان نلقاها سليمه مافيها شي..اقسملك بالله يام لو تصير في ربيعه حاجه القصر هدا نهده ع رووسكم..

ع خشة برنيه وهي ترعش قالت..

/توا اتصلت جارة عصمت قالت الشرطه خشوا لحوش عصمت بعد وصلهم بلاغ ان في جريمه قتل صارت غادي..

زكيه جمدت من الصدمه..

وتسعه قال بخوف..

/عصمت روحت من تركيا؟

برنيه قالت بخوف..

/لا يابيي..لكن..شافت لزكيه بخوف وسكتت..

وتسعه سألها بصوت غاضب زي الرعد..

"لكن شني..قولي"

برنيه انفزعت وقالت..

/توا زهره قالت ان عصمت قبل لتسافر عطت مفتاح الحوش لللا ربيعه..

تسعه بعد سمع اللي قالاته عقله طار من راسه مشي بسرعه وطلع من الصالون..

زكيه وهي خايفه قالت..

/علاش هدا وين تكلمت المدعيه اللي ينقاللها زهره..

برنيه وهي متوتره وخايفه قالت..

/قالت هدا وين تفكرت..

ضمت زكيه شفايفها لداخل بغضب وفرائسها مرتعده من الخوف..

ع خشة كناينها ومعاهم بنتها..

هانيه سألت..

/شن صار؟

زكيه شافتلها بخوف وقالت..

/توا اتصلت جارة عصمت وقالت صارت في حوشها جريمة قتل وهديكا شكلها مشت غادي..

فريحه بصدمه..

/من هي!؟

زكيه قالت بنرفزة من الخوف..

/ربيعه..

نزيهه وهي مصدومه قالت..

/مش جارتها هادي قالت ماجي حد لحوش عصمت!؟

زكيه بعصبيه قالت..

/الرزيه زهرة هدا وين تفكرت تقول ان عصمت عطت مفتاح حوشها لربيعه قبل لتسافر..

خبطت فريحه بيدها ع خدها قالت..

/ياغبارة مغبرة كان هي اللي لقوها مقتوله!!؟..

نزيهه ارتخت وقالت..

/هدا اكبر اثبات ع ان اسمها ربيعه هادي وراها شي كبير شكلها مدايرة عصابه وبعد ماانكشفت وهربت من القصر جماعتها قتلوها..

لما سمعوا كلام نزيهه اقتنعوا بيه ع الفور مش لأنه مقنع بل لأنهم يبوا يشدوا في قشة تنقذهم من طوفان غضب تسعه..

🍃وتسعه كان مع جمال في السيارة هو بنفسه كان يسوق فيها بسرعه جنونيه لو يلقى يحولها لطيارة بش يوصل في حوش عصمت..

ولما وصل غادي شافو سيارات الشرطه معبيه الشارع ومعاهم سيارة اسعاف نزل يجري وخلا السيارةوالعه ومفتوحه وجمال نزل وراه ع طول..

شافوا الباريلا طالعه بالجثة واثر الدماء باين ع الغطاء الابيض اللي مغطيها..

قدملها تسعه يجري ووقفها وحول الغطا وقلبه من قوة الدق يكاد من مكانه..

جمال اللي كان معاه لما شاف ملامح القتيله تنفس بإرتياح ماكانتش ربيعه..

"بيي تسعه"

شاف تسعه للضابط اللي كلمه والضابط قاله..

/لو سمحت وخر وخليهم يشوفوا شغلهم..

وخر تسعه وهو يبلع في ريقه..

الممرض رجع غطا الجثه وكمل طريقه بالباريلا لسيارة الاسعاف بمساعده زملائه..

قدم جمال للضابط وقال..

/نقدر نعرف شن صار بالزبط؟

الضابط قاله..

/وصلنا بلاغ من مجهول عن جريمة قتل صارت في الحوش هدا ولما جينا واقتحمناه وفتشنا فيه لقينا جثه البنت هادي ع سرير في غرفة نوم متعرضه للطعن في اماكن متفرقه من جسمها..

جمال قال..

/كانت متغطيه!؟

تسعه ركز ع سؤال جمال والضابط جاوبه عليه وهو يقول..

/ايه متغطيه وفي مروحه مفتوحه مقابلها

قدم تسعه وقال..

/ماعرفتوش من تكون؟

الضابط قال..

/الجيران قالوا البنت اللي تخدم عند صاحبة الحوش..علاش تسألوا في الاسئله هادي يابيي!؟

جمال جاوبه..

/صاحبة الحوش قريبه لعيال البيي

الضابط هز راسه ايجابا بعدين قال..

/كان تبي تعرفوا معلومات اكثر تعالوا للمركز..عن اذنكم يابيي..

ومشي الضابط بعناصره ركبوا سياراتهم..

تسعه وهو يشوفلهم قال بخوف..

/ربيعه وين ياجمال!؟

جمال شافله بقلق واسف ماعرفش بشن يجاوبه..

مسح تسعه بإيديه ع وجهه بعدين وخر ولف ومشي للسيارة وجمال لحقه وعيون ناس من الشارع معاهم..

لما ركبوا السياره سكروا البيبان لكن تسعه ماتحركش كان حاس بفشل في جسمه وداخليا كان منهار...

جمال وهو يفكر قال..

/ممكن تكون موجوده في مكان مايعرفه حد غيرها..

تسعه لما سمع كلامه ذاكرته جابتله موقف صار فيه شي اثر فيه هلبه وقتها..

▶️في وقت سابق..

كان خاش لجناحها في الليله اللي يكون الدور عليها فيها..

سمعها تتكلم هاتفيا مع عصمت..

..ربيعه:ابله عصمت راك تنسي ديري طلة ع الحوش غدوة.....ضحكت وقالت..باهي باهي..خلاص نخليك ترقدي تصبحي ع خير....بالسلامه..

نزلت السماعه وسكرت الخط بعدين شافت للباب لقت تسعه خاش وهو مبتسم قاللها..

/كنتي تكلمي في عصمت.

ربيعه وهي مبتسمه قالت..

/تعرفها مكالمه كل ليله..

قعمز مقابلها ع السرير وقال..

/ عارفها عارف..لكن حوش شني اللي وصيتيها طل عليه؟

تعبوا عيونها بالدموع وهي تقول بإبتسامه..

/حوش بوي وامي..

عقد حواجبه وقال..

/ماقلتيش قبل ان قاعده دوري فيه ومهتمه بيه!

ربيعه قالت..

/ماهو انت تعرف ان عندي هالحوش ولالإنه شبه تريله تحسابني نسيته ولابننساه؟..هدا الحوش اللي نولدت فيه وكبرت فيه...فيه ريحة بوي وامي وايامهم وايام اول عمري مستحيل ننساه ولانهمله..

ابتسم وقال..

/اسف لو وصلك من كلامي معنى ضايقك..لكن اني نبيك تنسي كل شي وجعك وتعبك في حياتك..

ابتسمت وقالت..

/حتى لو زي ماقلت عشت فهالحوش هدا اغلب ايام عمري وجع وتعب يقعد حوشي ومكاني...مرة قريت كلام للكاتب ياربي اسمه صعب ينقال..كيف علماتك حسناء تقوليه ياربيعه!...ايه..دوستو يفسكي..ضحكت لما ضحك هو بعدين كملت تقول..المهم الراجل هدا قال كلام من كثر مااثر فيا حفظته حفظ..

" إن المَرء ليَشعُر بالطمَأنينَة وَالرَّاحة في المَكان، الذي أَلِفَ العيش بين أركانَه: ذلِك أنّه مَهما لقِي فيه مِن التَّعاسة وَالشّقاء، فإنَّه يَشعر فيه مَع ذلِك بالتَّوازن وَالطّمَأنينَة ". 

واني مهما عشت في قصور من بعده مش حنحس بالأمان كان فيه لانه حوشي المكان اللي ننتميله..

بإيتسامه وهو متأثر جدا بكلامها قال..

/ومع هذا انتي توا مكانك مكاني وانتمائك ليا اني ولكل مكان يخصني حقك تحافظي ع حوش اهلك وتمشي تشوفيه امتى ماتبي..لكن خلي في بالك ديما ان مكانك الاول والاخير هني..وحط يده ع صدره..

هي ضحكت وقربتله وخشت في حضنه وهو ضمها وقعد يمسح ع شعرها وهو مبتسم...

◀️في الوقت الحاضر..

بسرعه شغل تسعه السياره وتحرك طول..

جمال قاله..

/وين؟

تسعه وهو يسوق بسرعه قال..

/تو تعرف..تو تعرف...

🍃في نفس الوقت..

كانت حسناء واقفه مع بلقيس في احد ممرات القصرتسمع منها..

...بلقيس:واضحه زي الشمس دبارة ومكيده..

حسناء وهي عاقده حواجبها سألت سؤال مبطن..

/معقوله تكون عمتي اللي مدبرتها؟

بلقيس:لالا مستحيل..صح هي واعرة شويه ومرات تبان شايفه نفسها لكن مستحيل دير حاجه زي هادي..اصلا هي قبل كانت تحب ربيعه ولما قال تسعه يبي ياخدها ماعارضتش بكل بالعكس فرحت بيها..هي ماتغيرتش عليها كان بعدين يعد مالادوا عليها وعبولها راسها..

حسناء:ياريت تكوني واضحه وصريحه يابلقيس ..

بلقيس قالت بضيق..

/للأسف نزيهه كانت اكثر حد معارض زواج تسعه من ربيعه بعد هانيه لدرجة انها كانت تحلف وتقول مش حنخليها طول معاه ونزيهه معروفه كان حطت حاجه في راسها لازم توصلها وكان حطت حد في راسها عليه السلام..

حسناء قالت..

/باين عليها..

بلقيس قالت بضيق..

/خسارة زمان ماكانتش هكي لما خدي تسعه فريحه كانت جدا راضيه وبعد خداها ولت زي اختها الكبيره لما حملت كانت تعاني فيها تي كانت تصالح بينها وبين تسعه لما يتعاركوا مافيش مرة حسيتها حاقده عليها ولاكارهتها بكل..كانت هاديه وحبابه هلبه وعقلها كبير لكن مع السنين اطباعها وشخصيتها تغيروا هلبه..

حسناء قالت..

/ماتغيرتش يابلقيس هي من البدايه هكي غير انتي مالاحظيتش فيها كان الحاجات الحلوة..

بلقيس بأسف..

/ممكن..لكن حقدها ع ربيعه مش لاقيتله مبرر لما تسعه قال انه بيتزوجك مااعترضتش نهائي وماريتش منها اي تصرف فيه كريهه او قلة احترام جيهتك..معقوله لأن ربيعه من عيله ع قد حالها ومش مستوانا زي مايقولوا..معقوله نزيهه تكون صاحبة نظره فوقيه لهالدرجه..!

حسناء:لاالحكايه مش حكايه فرق مستويات بس يابلقيس..

بلقيس قالت بإستغراب..

/مالا شنو!؟

ع خشة سلامه وهشام ومعاهم كريمه..

سلامه بصوت يرجف قال..

/قالوا لقوا امي ربيعه مقتوله في حوش عصمت الخياطه.

شهقت بلقيس بصدمه..

وحسناء قالت بفجعه..

/شني!؟

هشام وهو يمسح في دموعه اللي ينزلوا قال..

/سمعت مجيده تقول في الكلام هدا لهنادي..

كريمه وهي تبكي قالت بغضب..

/مجيده الشريرة الشيطانه ان شاء الله تموت..

شافولها بإستغراب وهما مفجوعين..

كريمه شافت لحسناء وهي تقول بالعبرة..

/اني شفتها الشيطانه تفتش في شكارة الحوايج شفتها بعيوني...

🌿🌿🌿🌿🌿

ويوصل تسعه بسيارته لحوش اهل ربيعه..

نزل من السيارة وتوجه لباب الحوش مافكرش يدق عليه طول خلعه بكتفه وخش بسرعه وجمال قعد واقف ع الباب وهو يمرر في نظره ع الشارع..

🍃وتسعه وهو خاش داخل لما وصل في وسط الحوش وقف في مكانه وين شاف ربيعه راقده ع الفراش وهي متكمشه في بعضها...

●●●●قبل ساعات●●●●

الساعه الحادية عشر قبل الظهر..

وقفت حافله في بداية الشارع..

نزلت منها ربيعه ومشت خشت الشارع..

ماكانتش حاسه بشي غير الانطفاء..

حست ان كل شي في داخلها مات ومافيش شعور يتحرك في داخلها غير الرغبه في الخلاص من الحياة..

قعدت تمشي وتمشي بدون ماتشوف لنظرات اهل الشارع ليها كلها كانت نظرات استغراب..

وصلت في الحوش وقفت قدامه وطلعت من شنطتها المفتاح بعدين فتحاته وخشت وسكرت الباب وراها..

ومجرد ماوجهت نظرها لداخل الحوش هبت عليها عاصفة ذكريات..

منها المؤلم لحد الموت ومنها الحلو ببساطه..

رفعوها رجليها لوسطه..اول ماوصلت فيه جي بين عيونها مشهد انتحار امها..نزلوا دموعها وتفكرت كيف كانت حالتها قبل موتها انسانه مطفيه تماما انسانه تستنى في الموت حرفيا..

حولت كندرتها ومشت بإتجاه الفراش اللي كان يقعد عليه بوها..

تمشي وهي تبكي بالعبره..وصلت فيه ونزلت تمددت عليه وهي تسمع في صوت بوها يقول..

"ندادك توا لاهيين بقرايتهم"

"قعادي معاك يابوي خير من الدنيا ومافيها"

"سامحيني يابنتي مني اني انحرمتي تعيشي زي ندادك"

"الله يربحك يابوي معاش تقوله الكلام هدا خلاص..غير شوف شوف..شريتلك حاجه قداش ليك تقول خاطري فيها.."

"سفنز!"

"ايه سفنز بالدحي لكن مش حتاكله كله مش باهي ليك بنقسم اني وياك"

"باهي باهي غير اقسمي وهاتي هي"

حطت ايديها ع عيونها وهي تقول ببكاء..

/اااه يابوي محلا ايامك محلاها من ايام...

..ويخطر عليها اخر حديث دار بينها بين وبوها قبل موته..

"كله مني كله مني اني طحت وطيحتكم معاي مني اني امك صار فيها هكي ياربيعه مني اني قاعده تعاني يابنتي ياريتني متت هداكا اليوم ياريتني متت"

"بالله عليك يابوي ماديرش في روحك هكي ماتزيدهاش عليا تربح"

"سامحيني يابنتي سامحوني انتي وامك"

الجمله هادي قعدت تتردد ع مسامعها بنبرة صوت بوها المرتجفه والباكيه..

وهي تسمع فيها و تبكي بالعبرة...

وفي عز بكاها جي لمسامعها صوت امها وهي تغني في تهويده النوم..

"نني نني نني واني عليك نغني

نني نني نني يجعل نومك متهني 

نني نني ياقليبي ياقطعه مني..

هوها ياهوها وبنيتي سلم بوها"

وبدت تغني معاها بصوتها المتعب وطيف بنتها جي بين عيونها وهني تفكرت اكثر شي صار امس فتت قلبها اللحظه اللي خدت فيها زكيه فداء بقوة وبعدتها عنها..

غمضت عيونها ورجعت تبكي بألم وتطلع منها آهة قهرة تشق القلب...

بس في لحظه هدت شويه عن البكي لما جي في مسامعها صوت تحبه وتحب صاحبه هلبه بالذات لما يغنيلها..

"آصل الغيه..من القلب ولاالعين آصل الغيه..

من القلب ولا العين ولاالعين آصل الغيه.."

بدت ع وجههل ابتسامه تصارعت ملامحها مع ملامح البكاء وهي مازال تسمع في صوت حبيب قلبها لعند مانزل عليها  النعاس وراحت في نوم عميق...

🍃🍃🍃🍃🍃

فتح جمال الباب الخلفي للسياره..

ركب تسعه ربيعه وقعمز جنبها بعدين حط راسها ع رجله وهو يقول بقلق وتوتر..

/للمستشفى ياجمال بسرعه..

جمال سكر الباب ومشي ركب القدام وتحرك بالسيارة من فوره...

🍃هدا كله وحال اهل القصر بالويل..

الصغار كانوا يبكوا ع ربيعه بالذات كريمه اللي مافارقتش حضن بلقيس اللي حتى هي كانت تبكي عليها..

وفي حديقه القصر سلامه وهشام كل واحد منهم واخد ركن يبكي فيه بروحه..

زي ماكانت تبكي هنادي بعبرتها وزهره وبرنيه يدمعوا معاها..

لكن حال مجيده مختلف عنهم كانت خايفه ومتوتره..

وحالها هدا من حال باقي اهل القصر اللي يراجو شن مازال بيصير لو خبر موت ربيعه طلع حقيقي..

اما حسناء كان حالها عكسهم كلهم..في داخلها احساس قوي رافض يصدق موت ربيعه وفي نفس الوقت كانت تبي طلع برائتها في كل الاحوال..

وهي مقعمزة بيناتهم كانت تراقب في ملامح الكل وتركيزها الاكبر كان ع نزيهه..

🍃ويخش تسعه للمشفى وهو رافع ربيعه بين ايديه جوه ممرضين ودكاترة ومعاهم باريلا حط ربيعه عليها بهدوء ومشي معاهم وهما يرفعوا فيها وجمال يمشي وراهم بمسافه..

شويه خطر عليه يعطي خبر لأهل القصر اللي اكيد توا في حالة يرثى لها بسبب الخبر المغلوط اللي سمعوه..

▪▪▪▪▪▪▪

"الحمد لله ياربي الحمد لله"

هادي هنادي تحضن في برنيه وهي تبكي وتضحك في نفس الوقت وبرنيه اللي كانت دمع وهي مبتسمه براحه قالت..

/ايه والله الحمد لله..

تباعدت هنادي وقالت..

/خل نطلع نخبر الولاد..

برنيه:بري بري..انا ماشيه نعطي خبر للات..

وكل وحده فيهم مشت طلعت من جهة وخلوا مجيده تقول بتسخط..

"عطيها سحيقه قط بسبعه ارواح"

🌸"هشومه سلومه..ياهشومه ياسلومه'

كل واحد جي لهنادي يجري بعد ماسمعها تنادي فيه..

وصلوا فيها وهما يقولوا بلهفه..

"شني!؟..خيرك!؟"

هنادي بفرح..

/اللا ربيعه قاعده حيه ماماتش..

الزوز مع بعض قالوا..

"حقه!"

هي بضحكه قالت..

/والله العظيم توا توا الافندي جمال اتصل وقالها..

الزوز صاحوا بفرح بعدين ضموا بعض بقوة وهما ينقزوا وهنادي تتفرج عليهم وهي تضحك وتمسح في دموعها..

🌸ويافرحة كريمه حتى هي لما سمعت قعدت تقول بفرح..

"شكرا ياربي الحمد لله"

وبلقيس تحضن فيها وتضحك بفرح من بين دموعها..

لكن غيرهم  وجوههم ولت عليها غبرة ترهقها قترة...

لما سمعوا وين كانت ربيعه وكيف لقاها تسعه دب في قلوبهم رعب وقعدوا يستنوا في نتيجة اللي صار بخوف اشد من اللي كانوا عليه...

🌿🌿🌿🌿🌿

في مستشفى "ابن البيطار" اللي يخص تسعه داروا الفحوصات والتحاليل اللازمة لربيعه وركبولها تغديه..

وبعد طلعت التحاليل جت الطبيبه بسرعه لتسعه بش تخبره عن نتجيتهم او تبشره..

🌿"حامل!؟"

الطبيبه وهي مبتسمه..

/ايه حامل يابيي..

اجتاح صدر تسعه شعور سعاده عجيب اول مرة يحسه شعور زيه وهالشعور خلاه يتوقع ان ربيعه هالمرة حامل بالمولود المنتظر..

♤ايه سيداتي سادتي واخيرا جي دوري ترتيبي السابع بين خوتي الولاد وفي خوتي كلهم ترتيبي12..زيدوا السبعه ل12 واللي يطلع منهم زيدوه تسعه والناتج خلوه في عقولكم وردوا بالكم تنسوه...

🌿بعد سمع تسعه الخبر خش لحجرة ربيعه وقعمز قريب عليها..

قعد يتأمل في ملامح وجهها وهو متألم بعدين طلع من جيب جاكيته مصحف صغير معاه وين مايمشي في حله وترحاله كل مايحصل فرصه يقرا منه..

فتحه وحط ع السورة اللي كان واقف عندها...

كانت سورة "ص" قراها كامله وبدي بالسورة اللي بعدها"الزمر" وقعد يقرا لعند ماوصل في الآيه العاشرة..

﴿ قُل يٰعِبادِ الَّذينَ ءامَنُوا اتَّقوا رَبَّكُم لِلَّذينَ أَحسَنوا فى هٰذِهِ الدُّنيا حَسَنَةٌ وَأَرضُ اللَّهِ وٰسِعَةٌ إِنَّما يُوَفَّى الصّٰبِرونَ أَجرَهُم بِغَيرِ حِسابٍ ﴾

بعد ماسمعت ربيعه الآيه هادي فتحت عيونها..

قعدت تشوف لجهة وحده وهي تسترجع في وعيها ومازال تسمع في صوت تسعه يتلى في القرآن..

ابتسمت من وسط قلبها لما ميزت الصوت بعد ماوعت تماما حركت عيونها للمصدر متاعه ولما شافاته تبتتهم عليه وقعدت تتأمل فيه وهو يقرا وتسمع في الآيات..

{أَلَيْسَ اللَّهُ بِكَافٍ عَبْدَهُ وَيُخَوِّفُونَكَ بِالَّذِينَ مِنْ دُونِهِ وَمَنْ يُضْلِلْ اللَّهُ فَمَا لَهُ مِنْ هَادٍ}..

عقدت حواجبها لما سمعت الآيه هادي وقعدت تدبر فيها..

وهو في هالوقت كمل تلاوة بعدين سكر المصحف وقام عيونه فيها لقاها فايقه وتشبح في الفراغ..

بلهفه قال..

"ربيعه"

شافتله بعدين ابتسمت وقالت..

/تسعه

ناض من مكانه حط المصحف علي الكامدينو بعدين قربلها طبس عليها طبع قبله ع جبينها وقال..

/شن حالك توا؟

نزلوا دموع عيونها وهي تجاوب فيه..

/بشوفتك ديما في احسن حال..

ابتسم من قلبه بعدين رجع طبع قبله ع جبينها..

هي قالت..

/امتى روحت؟

قاللها:مش عارف..

تبدلت نظره عيونها للألم والدموع نزلوا سيل من عيونها..

حط يده ع خدها وقال..

/غاليتي..عندك علم انك حامل؟!

تبدلت ملامح وجهها للمفاجأة..

هو بإبتسامه قال..

/شكلك ماحسيتيش بروحك بكل..

ربيعه وهي متفاجئه قالت..

/بالله حق حامل!

ضحك وقال..

/والله العظيم..

ضحكت بفرح ودموعها مازالوا ينزلوا وهو رجع طبع قبله ع جبينها...

🌿وبعد شويه ترجع ربيعه ترقد مرة تانيه وهو قعد حداها سرحان يفكر في اللي صار كله وبرغم فرحه بخبر حمل ربيعه لكن الغضب قعد مسيطر عليه..

🌿🌿🌿🌿

ويطلع تاني يوم..

وقت الزيارة في الصبح خشوا لغرفه ربيعه سلامه وهشام وكريمه برفقة حسناء وبلقيس..

"ماما"

ربيعه بفرح والدموع في عيونها قالت..

/حبيبتي..

ساعدت بلقيس كريمه تركب ع السرير وع طول كريمه بعد ركبت ضمت ربيعه وربيعه تحضن فيها بقوة..

سلامه وهو مبتسم قال..

/لاباس عليك امي..

شافتله وقالت بإبتسامه..

/لايوريك باس امي..

هشام وهو منزل عيونه قال..

/لاباس عليك امي..

قالتله:هشومه اشبحلي..

قام عيونها وشافلها بشي من الاحراج..

ابتسمت بحب وقالت..

/لايوريك باس ولدي..

تسعه قعد يشوف لحال هشام وهو مبتسم بأسف..

"لاباس عليك ربوعه"

ربيعه قالت بإبتسامه..

/لايوريك باس حسنا وحمد لله ع سلامتك..

حسناء وهي مبتسمه قالت..

/الله يسلمك..

بلقيس:مرت خوي الباهيه لاباس عليك ياسموحه..

ضحكوا وربيعه قالت بإبتسامه..

/لايوريك ياقشطه بالعسل..

بلقيس بضحكه..

/والله احسن مرت خو في الكون هي باهي..

ضحكوا وتسعه قال..

/كيف خلوا الصغار يخشوا؟

سلامه:حني صحاب المستشفى نخشوا ونطلعوا زي مانبوا..

تسعه قال..

/عيني وعين عينك..

سلامه وهو محرج قال..

/ الله يسامحك ياكينج ضيعت الهيبه..

ضحكوا عليه..

وتسعه قال بإبتسامه..

/المرة هادي استثناء ع خاطر امكم ربيعه بس..

بلقيس:ايوه هو هدا ياكينج..

🌿وكملوا هدرزتهم اللطيفه بعدين تسعه طلع من حسناء برا الحجره..

🍃"حكتلي بلقيس اللي صار اظن الوضع واضح مش محتاج نشرحلك.."

هز راسه وقال بغضب..

/واضح واضح..

حسناء:بنطلب منك ماتروح للقصر الا بعد المغرب..

بإستغراب قال..

/علاش؟

قالتله:انت عندك ثقه فيا ولا؟

قال:اكيد..

قالت:خلاص خليني نتصرف بطريقتي وبعدين نوضحلك كل شي..

هز تسعه راسه موافقا لكلامها وهو يفكر فيه..

🍃وتروح حسناء بالصغار وتخلي بلقيس مرافقه لربيعه وكذلك يطلع تسعه مع جمال من المستشفى ويتوجهوا لمركز الشرطه بش يعرفوا اخر المستجدات في جريمه قتل مساعدة عصمت..

🌿🌿🌿🌿

في القصر..

بعد صلاة العصر..

كانت زكيه في جناحها مقعمزه ع صلايتها تسبح بالسبحه وهي تخمم..

سمعت باب جناحها يدق تنهدت بخوف بعدين ناضت ومشت طلعت من دارها وقفت في بابها وهي تشوف لباب الجناح بعدين قال..

/خش..

انفتح الباب وخشت حسناء بعدين سكراته وراها..

زكيه قعدت تشوفلها بإستغراب..

قدمت حسناء لعند ماوصلت فيها وقفت وقالت..

/جاياتك واني متأمله العدل والحكمه اللي عندك يغلبوا كل شعور سلبي تحسي بيه اتجاه ربيعه..

تجهمت زكيه وهي تشوفلها..

حسناء قالت..

/اسمعي مني صدقيني بعدين الندم متاعك مش حيكون اكبر من الندم اللي حتحسي بيه بعد يروح تسعه ويفصل في اللي صار كله..

تنهدت زكيه بعدين قالت..

/تعالي..

ومشت خشت للصالون وحسناء لحقتها..

▪▪▪▪▪▪▪

في كوجينة القصر اللي ماكان فيها حدغير مجيده وهي تشرب في القهوة وتسمع اغاني من الراديو..

خشت عليها حسناء وقالت..

/سكري الراديو..

مجيده لما شافتها خاشه عليها خافت بعدين ناضت ومشت سكرت الراديو وقالت..

/خير ياللا!..

ربعت حسناء ايديها وقالت..

/من قالك حطي حاجات عمتي في كياس هدايا ربيعه لصاحبتها..

مجيده تظاهرت بالصدمه وهي تقول..

/شني!.

حسناء قالت بحزم..

/سمعتيني كويس...جاوبي..

مجيده بنفس الحال قالت..

/ع شن بنجاوبك يا اللا!؟

حسناء قالت..

/عندك علم ان في حد شافك وهالحد مستحيل يتبلى ولايفتري عليك تعرفي لو الشخص هدا مشي قال للبيي تسعه تحسابيه بيلزك بس!؟ اللي بيديره فيك وقتها عقلك مايقدرش يتخيله..

مجيده وهي ترجف قالت..

/حرام عليك يااللا حرام والله مادرت حاجه..

هزت حسناء راسها وقالت..

/تمام زي ماتبي..تفكري انك انتي اللي جبتيه لروحك..

وكيف جت حسناء بتمشي قالت مجيده وهي تبكي..

/مش مني يااللا والله مامني اني هني خدامه ندير اللي يقولولي عليه اسيادي من فم ساكت مانقدرش نعارضهم في شي..

حسناء قالت..

/من تقصدي؟

مجيده وهي خايفه قالت..

/عليا الامان كان قلت؟ سيدي تسعه مايديرلي شي!؟

حسناء:اني نشفعلك عنده لأنك زي ماقلتي درتي اللي درتيه بأوامر مش من كيفك..

مجيده ضمت ايديها في بعض بقوة وقالت بخوف..

"اللا نزيهه..هي قالتلي ديري هكي"

حسناء قالت..

/متأكده؟.

مجيده قالت:والله العظيم ونترزى في صحتي ياللا..خلتني نراقب اللا ربيعه ونشوف وين تحط في كياس الهدايا لما تجي صاحبتها كان ديما هو نفس المكان دار قريبه من دار القرايه واول امس جتني بشكاره كحلا وقالتلي حطيها فيهم وبعدين قالتلي تعالي للصالون وقولي انك شفتي ربيعه واخده شي من جناح اللا الكبيره وحطاته في كياس هدايا صاحبتها واني نفذت اللي قالتلي عليه بالحرف..والله هدا اللي صار ياللا والله مازدت كان النفس..

هزت حسناء راسها بصمت ووراها بالزبط ورا حيط مدخل الكوجينه كانت زكيه واقفه تسمع في كل شي وهي في قمة الصدمه..

▪▪▪▪▪▪▪

"خلاص انتي اطلعي منها اني تو نتصرف"

حسناء قالت بإبتسامه..

/بطلعي نزيهه منها قدام تسعه ولا.؟

زكيه بحده..

/ماتتماديش ياحسناء..

حسناء قالت..

/سامحيني ياعمتي اني مش حنسكت ولاندرق ع وحده زي نزيهه وخلي نقولك مدارتك عليها وهي ظالمه في نفس الوقت اللي كنتي تبيي تفضحي فيه ربيعه قدام تسعه وهي بريئة هدا قمة الظلم وانتي مراة تعرفي ربي وحاجه بيت الله الظلم ظلمات راهو خافي من اللي ماعنداش وكيل غير ربي هادم بالذات ربي ياخدلهم حقهم تالت ومثلت..

وبعد ماقالت حسناء اللي عندها خلت زكيه تختلي بنفسها وتفكر في كلامها كويس..كلام يخلي اي قلب فيه ذرة خوف من الله يرجف رجف..

🌿🌿🌿🌿🌿

بعد المغرب..

في مكتب تسعه اللي كان فيه مع امه وحسناء..

🌱حسناء:كريمه هي اللي شافت مجيده تفتش في الكياس..

تسعه بغضب مكتوم..

/وعلاش ماتكلمتش؟

حسناء:خافت من امها لأنها شافت مجيده قبلها واقفه معاها وتكلم فيها..وكريمه مش صغيره عمرها 11سنه تفهم وتزبط وهي عارفه ان امها حاقده ع ربيعه من اللي تشوف فيه،ومش غير هي بس حتى سلامه وهشام راهو الزوز كانوا يبوا يحكولك عن هلبه تصرفات ظالمه تصدر من نزيهه وغيرها اتجاه ربيعه شافوها بعيونهم ومعاش قدروا يسكتوا عنها بعد اللي صار لكن اني قلتلهم خلوني نوصل اللي تبوه لبوكم مانبيش نحطهم في موقف صعب زي هدا..

تسعه نزل نظره للمكتب بعدين هز راسه وقال..

/كان ماعندك شي غيره تقوليه تقدري تطلعي

ناضت وهي تقول..

/مانبي شي غير انك تحقق العدل وتحط حد للجبروت والظلم..

تسعه هز راسه بصمت...

وهي بعدين مشت طلعت من المكتب بدون ماتشوف لزكيه..

تسعه قام عيونه فيها وقال..

/للمرة التانيه تخذليني وتخيبي املي يام للمرة التانيه..للمرة التانيه نكتشف ان ماليش عندك قدر ولاقيمه..

هي بصدمه قالت..

/شن تقول!؟

تسعه قال..

/ايه يام ايه..لوكان ليا قدر راك حافظتي ع امانتي ودرتي اللي وصيتك عليه..ربيعه هادي زوجتي يام يعني اني والكلام هدا قلتهولك في السابق اللي يغلط فيها يغلط فيا اني اللي يقلل منها يقلل مني اني اللي يظلمها يظلمني اني..يام اللي درتيه في ربيعه حسيته اكثر منها راك وجعتيني هلبه لما وجعتيها وجعتيني هلبه يام..

نزلوا دموع زكيه وهي تقول..

/ربيعه هادي مش زي ماانت شايفها راهو الشي اللي سمعته عنها انت ماتعرفاش..

عقد حواجبه وقال..

/ترا شن هو قولي!؟

رشفت وقالت..

/ماضيها ياولدي ماينفعش برا انشد واحد اسمه صلاح..

ومالحقتش تكمل كلامها الا وهي منتفضه من الفجعه بعد ماسمعت خبطة يده القويه ع الطاوله..

تسعه وهو يفور ويغلي من الغضب قال..

/تتوقعي يام ندخل ذمتي وحده بنخليها ام صغاري وجده لأحفادي وجزء من عيلتي من غير مانعرف عنها كل صغيره وكبيره!؟ من غير مانعرف اصلها وفصلها وتاريخ عيلتها كامل! تتوقعي ندخل تحت جناحي مراة مشكوك في ربايتها واخلاقها!!..ضيق عيونه وقال..ولا لأنها مش بنت ناس مبسوطه وماعندها حد التهمه اللي تخطر بالكم ترموها بيها!؟

تي..تي مش هادي ربيعه اللي كانوا عاجبينك اخلاقها وشخصيتها وقلتي عليها زي بنات العز!؟ ولا لما عطيتي وذنك لبنات العز ومشيتي ورا كلامهم بديتي تشوفيلها بنظرة دونيه وطاحت من عينك!

زكيه قالت بحده ودموعها ينزلوا..

/راك تكلم في امك...

بحرقه قال..

/هدا اللي قاهرني..مش مصدق انك نفسها امي المراة الطيبه الحكيمه الرحيمه العادله اللي ربتني احسن تربيه..شن جاك يام مش عارف..قاعده تصدمي فيا وخلاص..

زكيه قالت بألم..

/توا طلعت ماننفعش!؟

قاللها:ارجوك يام ارجوك فكيني منه الكلام هدا..وارجوك قعمزي مع نفسك لحظه صفاء وفكري في كل اللي صار السنتين الاخيرات وراجعي نفسك كويس..

ناضت وهي تقول..

/ع العموم سامحني مادرت اللي درته الا ع خاطرك وخاطرنا لاقاصده نهينك ولانوجعك..

قاللها:يام..خليك متفكره هادم مرتين راهم مرتين..انتي امي وحقك عليا كبير ومن حقك عليا لو شفتك ظلمتي حد نردك ع ظلمك لأني خايف عليك من غضب الله سبحانه وتعالى..

هزت راسها وهي مخنوقه بعدين لفت بتمشي لكن هو وقفها لما قال..

"قولي لهانيه تروح وتشد حوشها وماتجيش الا لما اني نقوللها"

التفتت امه وقالت..

/لامعليشي ولدي هدا قصر بوها ماتقدرش تمنعها عنه..

قاللها:القصر هدا يحكم فيه كبيره واني توا كبيره يام الا اذا انتي شايفه غير هكي..

نزلت امها عيونها وقالت بضيق..

/زي ماتبي..

"فداء تقعد هني"

امه قالت بألم..

/لاامي الا هادي ولدي حرام عليك وخيتك..

ابتسم بأسف وقال..

/ومش حرام اللي اندار في ربيعه اللي فوق ماانها سلمتها بنتها ورضت تخليها عندها دير فيها اللي داراته..هانيه يام مافيش فايده فيها مهما يصير فيها ماتبيش تتغير..خل توا تجرب تحس اللي حست بيه ربيعه لعل وعسى يصحى ضميرها شويه وتتحشم ع وجهها..

لفت زكيه ومشت طلعت وهي تبكي..

خدي تسعه نفس بعدين قال..

/انتم اللي جبرتوني..

غير نظره لهاتفه ع المكتب رفع السماعه وضغط ع زر فيه وبعد لحظات قال..

/برنيه ناديلي اللات نزيهه وفريحه...

♧عمي راجل عقلاني هلبه مايخليش العواطف تحكم فيه نهائي بالذات في المسائل الكبيره يحط كل شي ع جنب ومايفكرش غير في احقاق الحق بس..يعني في هديكا الفترة من حياته كان هكي تماما..

🌿ويخشوا نزيهه وفريحه للمكتب..

وجه فريحه كان اصفر من الخوف اما نزيهه فمازالت تظاهر بالقوة والثبات عكس مافي داخلها..

وقفوا قدام مكتبه خلاهم واقفات وهو يشوفلهم بنظرات مخيفه الغضب يتناثر منها..

تنهد بعدين قال..

/قبل عامين لما جبتكم هني متفكرين باش ذكرتكم وشن خيرتكم!؟..

ذكرتكم اني لما خطبت كل وحده فيكم عطيتها انها اني بنعدد وخيرتكم في الاخير قلت اللي تعرف ان وضع زي هدا معاش يساعدها نسرحها بإحسان ونعطيها كل حقوقها..

شاف لنزيهه وقال..وحضرتك يالللا كنتي راضيه تمام الرضا وماسمعتش منك جملة اعتراض الموضوع كان عندك عادي جدا لعند ماعرفتي ان حتنزوج ربيعه بعدين انقبلتي 180درجة ودرتي حاجات ماخطرش ع بالي حتى تهلويس انك ممكن ديريهم..انتي نزيهه المراة العاقله الفاهمه اللي كانت ليا نعم الزوجه!قوليلي يانزيهه اني في شن غلطت معاك!؟ في أني قدرتك في اني درتلك شان كبير..في إني خليتك المراة الاولى في القصر بعد امي وفي الالف والخمسين..في اني دعمتك ووخليتك تحققي احلامك وطموحاتك واللي تطلبيه مني نقولك عليه حاضر بدون تردد..غلطت لما درت هكي!؟..ايه صح غلطت..وغلطت هلبه كان لازم نحطك تحت الف اختبار قبل لنعطيك المكانه هادي اللي غيراتك وخلاتك انسانه متغطرسه متجبره وظالمه..

بلعت ريقها وقالت..

/شن درت بش تقولي الكلام هدا!؟

قاللها بحده..

/نزيهه ماتستغبنيش يانزيهه..ماتزيديش طيحي من عيني اكثر من هكي..

سكتت وهي شاده دموعها بقوة ومن داخلها كانت تبكي دم وفريحه تشوفلها بضيق..

هو قال؛تعرفي لولا الصغار..ولولا بوك الله يرحمه اللي وصاني عليك اخر ايامه..

"كنت طلقتك"

شافتله فريحه بخوف..

وهو متابع يقول..

/لكن حتى المرة هادي بنخليك انتي صاحبة القرار..بنعطيك اسبوعين تقعدي فيهم في حوش اهلك بطولك..تفكري ع اقل من مهلك وتشوفي نفسك هل تقدري تكلمي حياتك معاي بما يرضي الله وترجعي نزيهه الاولى الزوجه الصالحه ولا تمشي في حالك وتعيشي حياتك زي ماتبي..نفسهم..شاف لفريحه وقال..الاسبوعين اللي بتقعد فيهم فريحه في حوش ماليها بطولها..

فريحه بفزع:علاش شن ردت!؟

قاللها :سكاتك عنها ورضاك ع اللي داراته ودير فيه يخليك شريكه ليها في كل ذنوبها يافريحه..وحالك هدا معاش قادر نقبله بكل..ياترجعي كيف مانعرفك مراة صاحبة نيه صافيه وقلب كبير ياإما..عفس ع قلبها بقوة وهو يقول..نخليك في حالك تعيشي حياتك بالطريقه اللي تعجبك..

بدت فريحه تبكي وهو تجاهلها زي ماتجاهل قلبه وقال..

/وتوا اطلعوا وتوا ارواحكم نراجي فيكم برا

🌿ويرفعهم تسعه بنفسه لحياش اهاليهم.

طول الطريق وفريحه تبكي كانت تحاول تأثر فيه ببكاها ودموعها لكن هو هالمرة قسى قلبه عليها هلبه..

اما نزيهه اللي كانت مقعمزه جنبه مابتش تنزل دمعه..

وصل تسعه فريحه هي الاولى لحوش اهلها حطها ورجاها لين خشت بعدين تحرك لحوش اهل نزيهه اللي كان في مدينه مجاورة وصل بيها غادي وحتى هي حطها وراجاها لين خشت ومشي وطبعا جمال مع قوة الحمايه كانوا مرافقين ليه طول الطريق..

🌿🌿🌿🌿🌿

تاني يوم في المشفى...

جي تسعه زياره لربيعه وجاب معاه فداء اللي لما شافتها امها طارت من الفرح.. وغرفتها بالقبل والاحضان..

🌱"لاسامحني مش مروحه للقصر"

قاللها:بنطلع بيك للمزرعه بنقعدوا غادي شهر وبعد شهر نروحوا للقصر..

قالت بضيق..

/المهم مانروحش قبل نزيهه وفريحه..

قعد يشوفلها بتعجب..

هي فهمت نظرته وقالت..

/ع خاطر الصغار..مهما كان هادوا امهاتهم لما يشوفوني اني قاعده في القصر وهما مهناش طبيعي جدا يضايقوا مني ويكرهوني حتى الكره..

قاللها:مازلتي ماتعرفي قدرك عندكم..

قالتله:مش حنولي اغلى من امهاتهم ياتسعه..

ابتسم بصمت..

هي قالت..

/باك تحسابني بنسامحهم ع اللي داروا فيا مستحيل بالذات نزيهه مالهاش عذر عندي بكل..لكن فريحه نعذرها شويه لأتها تحبك بصدق وتبي تحافظ ع حبها في قلبك ايه صح تصرفت غلط لكن مبررها يشفعلها لو كنت مكانها ونعرف اني مالكه قلبك نفتح جبهة حرب علنيه يخي مش من تحت لتحت زيها.

ضحك وقال..

/راك حتى انتي واخده مكان في قلبي..

قالت:مكين ع قدي سادني وراضيه بيه المهم نكون معاك..

قاللها بإبتسامه..

/تي اني نفتح ع خاطرك جبهه حرب لو مازال ريت دمعه وجع في عيونك..

نزلت عيونها لبنتها وهي مبتسمه بخجل..

وهو ضحك عليها بعدين بدي يغني..

"آصل الغيه في القلب ولاالعين اصل الغيه..

في القلب ولاالعين آصل الغيه"

وهي تسمع وتتأمل فيه وقلبها يفيض منه حبه اللي تعبا بيه...

♤فيكمش من يعرف يرد عليا في القلب ولاالعين آصل الغيه..ياودي اني الغيه اللي جتني خدتني بكل فيا..

♧حتى اني صبا بنت محفوظ صهينت ع قلبك تصهيين زي مادرت فيا...ااه قداش نحبك..