رواية ليلة في منزل طير جارح
الفصل السادس6
بقلم ياسمين عادل
"الضحية كانت روح أرادت العيش، أما الجاني فقد كان صقرًا جارحًا عبر من فوق رأسها فقلب حياتها رأسًا على عقب."
____________________________________
كأن النار نشبت في الهشيم، فتحولت الدار كلها لجمرة من نار، تحرق كل من يلمسها. في اللحظة التي وصل فيها إخطار المحكمة بالقضية المرفوعة على "حمدي الطحان" كانت العائلة مجتمعة على مائدة الإفطار، فتشتت الجمع وهاجت الأعصاب وتمردت الأبدان على هول الخبر، هذه المرة الأولى التي يتمرد فيها أحد أفراد العائلة على كبيرها، والمرة الأولى التي تطالب فيها أنثى بحقها في الميراث الشرعي من أبيها وزوجها، رغمًا عن الأعراف والتقاليد التي تمنع تقليد النساء للأملاك والأراضي، والتي سادت في أغلب القرى الريفية والأماكن البعيدة عن العاصمة المتفتحة -من وجهة نظرهم-.
هبطت "جليلة" على صوت "حمدي" المنادي لها، فـ ارتعدت أوصالها ظنًا بأن مكروهًا قد أصاب وحيدتها، وهرعت للأسفل وهي تسأل مرتعبة :
- في إيـه ياحج؟.. إيه اللي حصل لكل ده ؟!.
أجابت "سعاد" بصياح، گالتي لم تكتفي بحالة الهياج التي أصبح عليها زوجها وابنها فأرادت إضرام النار أكثر:
- تعالي ياختي شوفي تربيتك الشوم، بنتك بتتجرأ وترفع قضية على عمها الكبير!.. هي دي أخرة المعروف اللي عملناه فيكوا؟!.
بدأت "جليلة" تهدأ نسبيًا، ومازالت دقّات قلبها گقرع الطبول المزعجة، ثم أردفت بفتور شديد لا يتناسب مع حالة الذعر التي كانت عليها منذ لحظات :
- معروف إيه ياسعاد؟ ؟.. أوعي تكوني فاكرة إنك بتاخدي من جيبك وتديني، أحنا محدش له أفضال علينا.
لم ينتظر "حمدي" نهاية الحوار الحريمي الذي لن يؤتي بالنفع، وتدخل لإنهاءه بسؤال سيطر على عقله :
- بنتك عملت كل ده لوحدها إزاي يا ست جليلة؟؟.. ولا في حد بيساعدها واحنا منعرفش!.
تدخل "حسين" بدوره وقد بدأت الشكوك تساوره :
- طبعًا في حد وراها؟.. ده في محامي وأتعاب ومشاوير رايح جاي.. مين اللي ورا رحيل يا خالة جليلة؟؟، ما تريحينا بدل ما عليا النعمة لأكون دافنها بالحيا.
لم تأبه لتهديدهِ الفارغ، معتقدة أن ابنتها في أمان ولا خوف عليها :
- اللي معاه الحق ميخافش ياحسين.. استحي وانت بتتكلم عن مرات أخوك اللي انت طمعان فيها، وأدونا حقنا خلونا نمشي من هنا من غير ضرر ولا ضرار، وإلا بنتي هتكمل في طريقها وتجيب حقها غصب عن عين التخين.
حملق "حمدي" مندهشًا من تجبرها وثقتها المبالغ فيها بإبنتها، وكأنها تعلم أن من ورائها يستطيع حمايتهم من أي بطش :
- هي بقت كده يا مرات أخويا؟؟.. طب عليا وعلى أعدائي، لما نشوف مين فينا هيكسب.
تلوت شفتي "تيسير" وقد بدأت الغيرة تشتعل بصدرها، كونها قارنت ضعفها الخائر بقوة تلك المرأة التي تطاولت على أبيها وأخيها وطالبات بحقها الشرعي في الميراث أيضًا، فـ أرادت أن تبثق سمّها بدلًا من أن يحرق حلقها إن بات مكتومًا :
- أنا مش مصدقة اللي بسمعه ده يامرات عمي.. ده بدل ما توعي بنتك وتقوليلها ملهاش غير بيتها وأهلها!.. هي يعني كان ناقصها حاجه ولا محتاجه حاجه وأبويا اتأخر عنها عشان تروح لسكة المحاكم! ولا هو أي تمرد والسلام!.
ضربت "جليلة" كفًا بكف، وانطلق سعيها لتأديب "تيسير" بدلًا من الحديث عن ابنتها والتعليق على كل أمر يخصها :
- بقولك إيه يا تيسير!.. انتي واحدة معاكي اعدادية ياحببتي، يعني عمرك ما هتفهمي زي بنتي اللي دخلت الجامعة.
ثم نظرت لـ "حمدي" لكي تذكّره بجريمته في حق ابنتها :
- لولا أبوكي كان زمان بنتي معاها شهادة جامعية!.. بس هقول إيه!، الله يرحمه حسن ملحقش ينفذ وعده معاها ويرجعها الجامعة تاني، أبوكي برضو هو اللي حرك بنتي من جوزها، فـ ميجيش دلوقتي يكمل علينا ويجوزها التاني غصب.. احنا مش زيك يا تيسير ولا عمرك هتتساوي ببنتي أبدًا.
كادت "سعاد" تتهجم عليها لولا وقوف ابنها "علي" حائلًا أمامها، وصوتها يصدح في المنزل كله من أعلى للأسفل :
- قطع لسانك ياخرفانة انتي!.. مالها بنتي يا ختي؟.. على الأقل مش دايرة على حلّ شعرها وهربانه منعرفش سكتها فين؟.
أبعد "علي" بأمه قليلًا وهو يحثّها على التوقف عن ذلك :
- كفايه ياما بقى!..
أشار "حمدي" لولده الأكبر "حسين" وهو يقول :
- تعالي ورايا يا حسين نشوف هنوصل للبت دي إزاي وسيبهم ياكلوا بعض.. أنا مش فاضي لهري الحريم ده.
لم تنتظر "جليلة" سماع كلمة أخرى، وصعدت الدرج متجاهلة صوت "سعاد" وكلماتها الجارحة وألفاظها الفظّة، غير قادرة على الإستمرار في مناوشات الكلام تلك، بينما كانت "منال" تراقب ما يحدث من الأعلى، شامتة بكل ما يحدث من مشاجرات قد تؤدي بدورها لإعاقة تلك الزيجة التي تخشاها، وحينما قابلت "جليلة" على أول الدرج همست لها تطمئنها :
- الأمانة وصلت مكانها يا خالتي.. وربنا يقدرني على فعل الخير.
أومأت "جليلة" برأسها متفهمة :
- جميلك مردود يا منال.. عن أذنك.
كانت عيني "حسين" تتطلع لتلك اللحظات التي جمعت زوجته بزوجة عمهِ، حاملة همسات لا تُسمع، مثيرة ببواطنهِ الريبة من ذلك التقارب المفاجئ بينهما، في حين أن "منال" تكره "رحيل" وأمها من قديم الأزل، وذلك التناقض هو ما زرع الريبة بأحشائه، وجعله يفكر في الأمر مليًا، قد تكون البذرة الفاسدة التي ألقت بـ "رحيل" خارج حدود الدار هي زوجته المصون، وحجتها في ذلك هو الحفاظ على زوجها!. تلاعبت الظنون برأسه وجعلته مشتتًا، منتويًا الوصول لحقيقة الأمر بأي طريقة وبأي ثمن، ولكن الوصول لذلك سيتطلب بعض الدهاء.
**************************************
كان يرمقه بنظرات منزعجة، رافضة للنهج الذي سلكهُ لتنفيذ مطامعهِ الخاصة، مما سيؤدي بحياة إنسانة لحافة الهاوية، وقد ترك كل ذلك خلفه بدون حتى أن يفكر. تركت "عبير" فناجين القهوة على المنضدة الزجاجية المستطيلة، ثم انصرفت لتتركهم منفردين بتلك الغرفة الزجاجية التي صنعها في حديقته، وما أن رأى "هاشم" ذلك الإستنكار متشكلًا على ملامحه هتف معترضًا :
- انت مضايق أوي كده ليه كأنها قريبتك مثلًا!؟.
زفر "مراد" وهو يجلس في مقعدهِ مجيبًا :
- مكنش لازم تعمل كده ياهاشم، البنت ملهاش ذنب تستخدمها وسيلة عشان تضرب حمدي الطحان!.
دهس "هاشم" سيجارتهِ بالمنفضة قبل أن تنتهي، ثم أردف بـ :
- أنا مش بضرب حد.. هي اللي فرضت عليا أمتى تقعد وامتى تمشي كأنها زريبة أبوها تدخل وتخرج وقت ما تحب!.
قطب "مراد" جبينه بغير إقتناع بتلك الحجة الواهيه:
- إنت اللي عرضت عليها مساعدتك!
- وانت فرضت عليا ضيفة كان ممكن أرفض وجودها في بيتي.
- بس انت قبلت!.
- كل حاجه ليها تمن.. حتى المساعدة.
انفعل "مراد" رغمًا عنه وقد أحس بتأنيب الضمير، جِراء ما قد يحدث لمصير تلك الفتاة من عقاب شنيع قد يودي بحياتها للهلاك حرفيًا :
- احنا مش في كندا يا هاشم!.. أهلها لو بس سمعوا باللي حصل هيقتلوها من غير ما يسمّوا عليها.. البت كده راحت في شربة ميا وانت مش حاسس.
نفخ "هاشم" بإنزعاج، مانعًا نفسه من الإنسياق وراء عاطفتهِ التي قد تجرفهُ للندم على قراره :
- ما خلاص بقى ياعم الحنين.. متقلقش أنا مش هسيبها تموت، أنا بس عايزها ترجع تاني برضاها.
ضاقت عينا "مراد" بفضول لسماع الجزء الثاني من مخططهِ اللئيم:
- ترجعلك إزاي!.
نهض "هاشم" واقفًا مستقيمًا، و دسّ كفيه في جيوبهِ وهو يجيب :
- يعني لازم تفهم إن كل مكان بعيد عني خطر عليها، مش لازم تحس بالأمان غير عندي هنا.
شبك "مراد" ذراعيهِ أمام صدره وهو يسأل بفضول أكبر :
- بأمارة إيه؟.. انت مين بالنسبالها عشان تكون الأمان الوحيد اللي هتلجأله.
كان جواب "هاشم" مثير للإستفزاز أكثر وأكثر :
- صديق مخلص.
- مخلص؟!.
أشعل "هاشم" سيجارة أخرى مفصحًا عن قلقه الأكبر :
- أنا عندي مشكلة أكبر من إني أشيل هم بنت الطحان يا مراد.. ليلى اتعلقت بيها أوي مع إنها مقعدتش معاها غير ٣ أيام بس.. أنا قولت مفيش حد غيرك هيقدر يسدّ الفراغ ده لحد ما أنزل القاهرة أشوف موضوع كاميليا.
- هي كلمتك؟.
غطت تعابير الغطرسة على وجهه وهو يجيب متباهيًا :
- طبعًا.. محدش غيري هيقدر يساعدها، أنا البطل المنقذ في نظرها دلوقتي.
- طب والشغل اللي متعطل ورانا ده مين هيركز معاه!؟.. حوار كاميليا خد مننا كتير أوي.
نظر "هاشم" في ساعة يدهِ وهو يقول :
- خلاص مش فاضل كتير.. بس انا لازم أتحرك دلوقتي عشان أرجع في نفس اليوم.
تحرك "هاشم" للخروج عبر الباب الزجاجي الذي ينفتح تلقائيًا بعد استشعار قرب أي شخص منه ومن خلفه "مراد" :
- متتأخرش.. أنا كمان محتاج أرجع النهاردة.
أشار له "هاشم" گتعبير عن إنه تلقى المعلومة بنجاح، ثم مضى في طريقهِ نحو البوابات، عقلهِ منشغلًا بكلمات "مراد" التي أصابته بقليل من القلق، فأشار لأحد الحرس الرابضين على البوابة من الداخل ليأتي إليها هرعًا، فسأله :
- إنت اتأكدت إن الهانم اللي وصلتها الصبح طلعت البيت إياه بسلام مش كده؟.
- آه ياباشا.. استنيت لحد ما طلعت فوق زي ما قولتلي.
- تروح دلوقتي وتفضل قدام البيت تراقب الوضع هناك إيه ولو في أي وضع مريب تكلمني على طول.. من الآخر كده أمان البنت دي مهمتك.
- أوامر ياباشا.
تابع "هاشم" طريقه وقد أحس ببعض الراحة، إذ إنه ضمن بذلك ألا يصيبها مكروه نتيجة فعلته، على الأقل لا يتسبب في خسارة روح أخرى من بيت آل طحان.
**************************************
كانت في غرفتها تمشط شعر صغيرتها البالغة من العمر ثلاث سنوات، حينما دخل زوجها مندفعًا وكأنه سيقتل أحدهم، ففزعت "منال" وهي تراقب تحركاته بالغرفة يبحث عن شئ ما تجهله :
- بسم الله الرحمن الرحيم.. في إيه ياحسين!!.
أخرج "حسين" سلاحهِ المدسوس بين ملابسه في الخزانة، وبدأ يفحص خزينة الرصاص إن كانت مملوءة أم لا. انقبضت "منال" من رؤية السلاح، فـ المرة الأخيرة التي أشهر فيها زوجها سلاحه كانت ليلة مقتل شقيقه "حسن". نهضت على الفور وأخرجت الصغيرة من الغرفة وهي تهتف بنبرة مفزوعة :
- انزلي يابت ألعبي مع اخواتك.. يلا.
ثم ركضت عليه تسأله بتخوف :
- إيه اللي حصل يا أخويا قلقتني! .. رايح على فين بالسلاح كده؟؟.
ملامحه تغبّرت بالشر، وعيناه تكاد تطلق شررًا محمومة وهو يجيب :
- خلاص عرفت هي فين الفـ ××××.. هروح أجيبها لحد هنا ياأما مسحولة ياأما مقتولة.
انتفضت "منال" وقد نجح "حسين" في بث الرعب في نفسها، وتلجلجت نبرتها وهي ترجوه :
- بالله يا حسين بلاش.. السلاح يطول يا خويا وانت عين الحكومة عليك من ساعة الخناقة الكبيرة.. وحياة عيالك يا شيخ.
دفعها "حسين" بقوةٍ فـ ارتدت للوراء :
- بـعدّي عني.
وخرج من الغرفة قاصدًا الشر، فهرعت "منال" من خلفهِ لتنقذ ما يمكن إنقاذه، قبل أن يصل زوجها لتلك الفتاة فتتعكر يداه بدماء جديدة قد تزجّ به طيلة حياتهِ بالسجن. توجهت على الفور لغرفة "جليلة"، فهي الوحيدة التي على تواصل مع "رحيل"، ودخلت إليها باديًا عليها الذعر وهي تقول :
- ألحقي ياأم رحيل.. حسين عرف مكان بنتك ورايح دلوقتي يجيبها.. اتصرفي بسرعة وكلميها الله لا يسيئك.
ارتعشت "جليلة" في خوف شديد، وأمسكت هاتفها بيدين مرتجفتين وهي تقول :
- طب ما تكلمي أمك يا منال خليها تنزلها بسرعة!.
- وهي أمي لو معاها تليفون كنت جيتلك!!.. أبوس إيدك كلميها بسرعة.
تجسس "حسين" على حديثهم فصدق حدسهِ، وعلم المخبأ الذي تكون فيه بخدعتهِ الصغيرة، لم يضيع الوقت بحساب زوجتهِ المتآمرة، وهبط الدرج بعجالة وهو يهمس بـ :
- أنا هربيكي يابنت الكـ ××.. بقى بتستغفليني يا منال! ورحمة أبوكي لتدفعي التمن.
لم تستطع "جليلة" الوصول لرقم ابنتها الذي حصلت عليه من "هاشم" مؤخرًا، إذ كان مغلقًا أغلب الوقت، فـ ضاق عليها صدرها وهي تهمس بـ :
- مقفول.. أكيد الشبكة وحشة عندها!.. يارب أنقذ بنتي منهم يارب.
ثم نظرت إليها تسألها :
- انتي عرفتي منين يامنال ؟.
لم تقوَ "منال" على تمالك أعصابها حتى الآن، وأجابتها وهي تجلس على طرف الأريكة :
- حسين اللي قالي إنه لقاها.. كان خارج بالسلاح ومستحلف.
توقفت "جليلة" عن محاولة الإتصال بـ ابنتها، وقد أحست بشئ ما غير منطقي بالموضوع :
- يعني حسين عرف إنها عند أهلك وسابك كده بسهولة من غير ما يحاسبك؟!.
اتسعت عينا "منال" وقد غفلت بسبب الخوف عن التفكير في ذلك :
- هـه!!
صاحت فيها "جليلة" وقد كشفت المغرز الذي وقعت فيها كلتاهما :
- هه إيـــه!!.. حسيـن رسم عليكي لعبة يا مـنال وياعالم وصل إيـه.
ضربت "منال" على صدرها ولطمت على وجهها وهي تقول :
- يالهوي يالهوي.. يعني عرف إني وراها.. يا مصيبتي الســودا.
*************************************
كان يجلس بغرفة رئيس المباحث شخصيًا، ينتظر قدومها من محبسها وقد تأجل استجوابها أمام النيابة للغد، حتى أتت إليه بكل إنكسار، في صورة لم يراها عليها من قبل أبدًا. استقبلها "هاشم" بكل مرونة، ووقف حتى أجلسها أمامه، ثم سألها بهدوءهِ الرتيب :
- طمنيني عليكي.. المحامي قالي إنك هتباتي في الحجز النهاردة؟.
كادت تنفجر من البكاء لولا إنها تماسكت أمامه قليلًا وهي تقول :
- أنا مش مصدقة اللي بيحصل ده!.
ربت على كفها وهو يقول :
- أهدي طيب.. أنا قريت المحضر وعرفت إن اللي عملت المحضر قدمت كشف طبي بيثبت إن اللي حصل في وشها ده ممكن يوصل لعاهه مستديمة.. إزاي تغلطي غلط زي ده ؟؟.
انسابت الدموع من بين جفنيها، وبدأ صوتها يتشنج وهي تقول :
- أنا مش فاهمه إزاي ده يحصل في عيادتي!.. ده انا حريصة جدًا في الحاجات دي وعمر ما في حالة اشتكت من عندنا.
مطّ "هاشم" شفتيهِ مستنكرًا مبررها :
- بس دول لقوا عندك في المركز أجهزة بمواصفات تانية غير اللي بتقنعي بيها الحالات بتاعتك وغير اللي موجودة في أعلانات صفحاتك على السوشيال ميديا.
اهتاجت "كاميليا" وهي تنهض عن جلستها فجأة تدافع عن نفسها بكل ما أوتيت من قوة :
- كــذب.. كل الأجهزة عندي جاية من برا بمواصفات عالمية وانت عارف كده كويس.. ده انت بنفسك دفعت أكتر من نص فلوس المكن ده واحنا بنجهز المركز والفواتير اللي بتثبت ده معاك.
قطب جبينهِ كأنه لم يتذكر ذلك :
- أنا ؟!.. الحقيقة مش فاكر.
جحظت عيناها بذهول مما قاله، وتحجرت الدموع في عيناها وهي تسأله :
- يعني إيه مش فاكر؟.. أنا مستقبلي المهني كله واقف على شهادتك معايا في النيابة وعلى الفواتير اللي معاك!.
كان مسترخيًا للغاية وهو يكرر نفس الكلام :
- أنا مش فاكر أي حاجه من اللي بتقوليها دي.. ومفيش معايا أي فواتير.
ثقل لسانها، واستصعبت تقبّل تلك الخيانة الصعبة :
- إنت آ... بتتخـلـى عن مراتـك!.
أشار لها لافتًا انتباهها للخطأ الذي تفوهت به :
- لأ معلش.. قصدك اللي كـانت مراتي، انتي دلوقتي طـليقتي.. ولا نسيتي!.
ضاق عليها صدرها غير مصدقة إنه سيكون غدّارًا هكذا :
- هو ده الوقت اللي تقولّي فيه الكلام ده!.. أنا أم بنتك إزاي ترضالي السجن والبهدلة وانت واقف تتفرج عليا!.
وقف عن جلستهِ ليبقى قبالتها وهو يقول :
- أرضى عادي.. كل حاجه وليها تمن يا كاميليا.. حتى الحرية، انتي طلبتي مني حريتك، ليه جايه تلزميني دلوقتي أدافع عنك وانتي بالنسبالي ولا حـاجة؟!.
رمقتهُ بإحتقار شديد، حتى إنها اقتنعت إنه أتى خصيصًا لكي يشمت بمصيبتها :
- انت مستحيل تكون إنسان سوي.. أنا ندمانة بجد إني اتجوزتك، ومستحيل أسيب بنتي معاك لحد ما تبقى شبهك.. بنتي فين عشان ماما تاخدها؟.
أعلنها صراحة، ولم يدسّ عنها الخبر أكثر من ذلك :
- مش هتاخديها، انتي أم غير صالحة لتربية طفلة.. وانا مش هآمن على ليلى معاكي.
حملقت فيه محاولة استيعاب ما يقوله، إلا إنه كان أكثر من قدرتها على الإستيعاب :
- إنت بتقول إيـه ؟.. مستحيل أقبل باللي بتقوله ده لو على جثتي.
سحب "هاشم" هاتفه ومفتاح سيارته عن سطح المكتب وهو يقول :
- وانا مسألتش انتي هتسمحي ولا لأ.. اللي عندي قولته، أنسي بنتك دي خالص، انتي دلوقتي هتبقي ردّ سجون وانا مقبلش أم بنتي تكون واحدة غشاشة زيك.
قبضت على ياقتهِ تكاد تغرز أصابعها في عنقهِ تخنقهُ وهي تصيح :
- أخـرس ياحـيوان.. هاخدها يعني هاخدها ياهاشم.. مستحيل أسيبلك بنتي مستــحيل.
دخل العسكري أثر صوت الضجيج والصراخ الذي أتى من الداخل، وحاول الفكاك بينهما ليصيح "هاشم" قائلًا :
- خدها يابني أحسن تلبس قضية قتل عمد كمان.. دي اتجننت خالص.
مازالت تصرخ حتى بعد أن سحبها العسكري عنوة :
- مش هسيبهــالك يا هـاشـم.. مش هســـيبـلك بنتـــي.
نفض "هاشم" ثيابهِ متعجرفًا، ثم همس وهو يخرج من الغرفة :
- أما نشوف هتسيبسها ولا لأ ياكوكـي.
*************************************
أخيرًا توصلت "جليلة" لابنتها لتبلغها بضرورة الهرب من المنزل الذي استضافها يوم واحد فقط، بعدما علمت بأن أمرهم قد انكشف بلعبة "حسين" عليهن، فـ لم تتأخر "رحيل" عن ارتداء حجابها والركض بسرعة على الدرج المتهالك المتكسر حتى بلغت الشارع، وقد غربت الشمس وحلّت الساعة السابعة مساءًا بظلمتها لتغطي السماء. خرجت "رحيل" من الحارة الضيقة المؤدية للشارع الرئيسي، فتفاجئت بسيارة "حسين" وهي تدنو من الشارع وقد رآها تفرّ أمامه، فصرخ بصوت وصل إلى مسامعها :
-وقفـــي يا بـت عــمـي.. وقفـي مكانك.
ركضت بأقصى قوة لديها، وسيارتهِ تركض خلفها حتى وصل بالفعل إليها، فـ انحدرت عن الطريق الرئيسي لأحد الأزقّة الضيقة التي يستحيل الدخول إليها بالسيارة، فما كان منه إلا أن يترك سيارتهِ ويركض من خلفها وهو يصيح :
- هـقـتلك يا رحــيـل.. وقفـــي بقـولك.
لم تسمع له، فالموت أهون عليها مما يتوعدون به، تكاد أنفاسها تتوقف من فرط المجهود الذي بذلته وهي تقاسي للهروب، وهو من خلفها گالأثم الذي يلتصق بجبين صاحبهِ حتى يموت، حتى قنط من محاولات اللحاق بها، فـ أخرج سلاحهِ وأطلق منه رصاصة في الهواء، قاصدًا إخافتها لتتوقف عن محاولات الهرب؛ لكنها هيهات كل تهتز، فتوقف عن الركض وهو يتناول أنفاسهِ اللاهثة بصعوبة، وصـوّب سلاحهِ بإتجاهها وهو يهمس بـ :
- يبقى انتي اللي اختارتي بقى.
أطلق عليها بدون أن يرفّ له جفن، فسقطت أرضًا أمام السيارة الفارهه التي توقفت أمامها فجأة، ليهبط "مراد" من السيارة في عجالة، وحملها بين ذراعيه بدون ذرة تفكير واحدة، ثم ألقى بها في سيارتهِ وهو يرى اقتراب "حسين" منهم :
- وقـــف ياجــدع انت.. انت مـــين يــاواد!.
استقل "مراد" السيارة وبدأ يقتادها للهرب من هنا في أقصى سرعةٍ مطلوبة، فتفاجأ بطلقة رصاص تخترق زجاج سيارتهِ الخلفي ليتهشم قطعًا صغيرة، فـ همس "مراد" من بين شفتيه :
- آه يابن الـ ×××× والله لأدفعك تمن الأزاز ده عربية كاملة.
ونجح في الفرار بها من بين فكّي الأسد، وهو لا يعلم أحـيّـةٍ هي أم مــيتــة؟!...