الفصل الاول
والثاني
بقلم ناهد خالد
وجع الهوى 💔
_انا خلاص يابابا قررت اتجوز أن شاء الله
قالها بسعاده باينه على وشه وابتسامه عريضة ظاهره
بوضوح بتبين هو قد اي متحمس لقراره.. حسيت بقلبي بيتنفض وحرارة
جسمي بقت فوق الأربعين وبتنميل في وشي من كتر ماكنت محرجه ومش عارفه هيبقى اي رد فعلي لما يسالوه عن العروسه ويشارولهم عليا.. هعمل
اي ساعتها.. هتحرج واقوم أجري علي الاوضه وهيقولوا اني مكسوفه والسكوت علامه الرضا ويجوزونا بقى.. أي ده لا ده جو قديم اووي... ممكن اتحرج اه بس هقوله اللي تشوفه ياعمي... قطعت تفكيري
الساذج ورفعت عيني ابص عليه.. أسر قلبي ده... ايوه هو أسمه أسر وهو أسر فعلا...أسر قلبي من أول ما بدأت اعرف يعني اي حب ويعني اي تعلق.. هو ابن
عمي واحنا عيله مترابطة كلنا عايشين مع بعض.. اصلا مليش غير عمي وعمتي... أسر عنده ٢٨ سنة دلوقتي بيشتغل مع والده في شركه العيله اللي متقسمه علي بابا وعمي وعمتي لكل واحد منهم جزء...
علاقتي بأسر دايما كانت كويسه اوي هو اصلا اللي يعتبر مربيني.. بحكيله كل حاجه عني وهو كمان وبنخرج ونضحك وكل حاجه حلوه بنعملها سوا بيهتم
بأدق تفاصيلي.. محدش يقدر يرفع صوته عليا في وجوده أو يزعلني.. دايما بيناديني ب "أميرتي" هو الأمان والسند وكل حاجه ليا ... بزمتكوا دي مش أسباب كافيه تخليني أقع في حبه واتهوس بيه
"*صحيح أنا أميره عندي ٢١ سنه دلوقتي في بداية آخر سنه ليا بكلية الحقوق. .. انا مكنش مجموعي قليل بالعكس انا كنت جايبه مجموع يدخلني هندسة بس انا اللي بحب المجال ده ومن زمان اوي نفسي ابقي محامية... بابا متوفي من وانا عندي ٤ سنين عشان كده قولت ان أسر هو اللي مربيني يعتبر...
_بجد يا أسر ده خبر حلو اوي ده.. قالتها ماما وهي مبسوطه وبتبصلي بصيتلها وحطيت وشي في الأرض محروجه.. ماما عارفه
من زمان حبي لأسر وكانت شايفه علاقتنا وعارفه اننا هنكون لبعض.. مش هي بس هي وطنط ليلي مامت أسر وعمي كمان...
عمي : ها ي أسر مين سعيدة الحظ دي
أسر بفرحة : سارة بنت عمتو هدي
خبر صاعق بكل المقاييس.. صدمه نزلت علينا كلنا.. رفعت راسي بصدمة وعيني مليانه دموع بس في نفس الوقت ملامحي كلها متجمده... مش قادره اخد نفسي انا فاكره أن قبل ما يقول جملته.. كان في نفس خرج مني... طب هو لي مرجعش؟؟!
_كلهم كانوا مصدومين لأنهم متوقعوش ده ابدا
ليلي : حبيبي انت بتقول اي... ساره.. بس انت عمرك ما لمحت لحاجة نحيتها
_عارف ياماما بس حقيقي هي مشاعري ليها اتطورت اوي.. وانا محبتش أبين اي حاجه غير لما اكون واثق في قراري..
.
*ياربي نفسي يرجعلي بقي... انا بتخنق بجد.. حاسه ببداية دوامة سودا بتسحبني جواها... انا... انا عاوزه اقوم.. ايوه مش هسمع
اكتر من كده... انا.. انا لي مش قادره أقف مفيش اي جزء في جسمي بيستجيب ليا.. "ياااارب" صرخت بيها جوايا مهو مفيش غيرة هيساعدني.. لاقيت نفسي
بعدها بقف ببطء شويه بس بقف.. اي ده!!!! انا رايحه فين... لا انا المفروض امشي اهرب.. انا لي ماشيه تجاهه.. لاقيت نفسي بدون وعي مني بقرب له
وبابتسم وبقول : الف مبروك يا أسر ربنا يتمم بخير فرحت اوي بقرارك حقيقي
ابتسم ابتسامه ساحرة وقال: الله يبارك فيكي عقبالك يا أميرتي
*مش قولتلكوا بيقولي دايما اني اميرته.. اومال اي اللي حصل..." واضح اني فسرت غلط"
ابتسمت :شكرا.. عن اذنكوا في واحده صحبتي هدخل اكلمها
حرفيا كنت بستند علي الحيطان اول ما اختفيت من قدامهم... دموعي نازله زي الشلال... لكن مفيش اي صوت ليا... دخلت أوضتي ورميت جسمي كله علي سريري ونمت... نمت وكأني دخلت في غيبوبة........
نمت حوالي ١٨ ساعه كاملين.... كتير ماما جت تصحيني وانا رافضه تماما اقوم... بهرب. ايوه بهرب.. بس مهما هربت هييجي وقت وهصحي وفعلا صحيت.. تخيلوا مين اللي صحاني..اها... هو لاقيته جانبي عمال يصحي فيا كالعاده لما برفض اصحي هو بييجي ليا ويفضل يرخم لحد ما اصحى.. أوقات كان بيشلني يحط رأسي تحت الحنفية لحد ما افوق... فتحت عيني أول ما ريحه البرفيوم بتاعته شميتها وسمعت صوته بينادي عليا... بصيتله لفتره بعدين اتعدلت.. "نعم يا أسر"
أسر :نعم؟ اي يا أميرتي كل ده نوم
بس.. بس مش عاوزه اسمعها تاني مش عاوزه.. اتمنيت لو اصرخ بيها في وشه بس للأسف مينفعش
_معلش يا أسر تعبانه
شويه بس مش قادره اقوم
أسر وبقت تعابير وشه كلها خوف وقلق واضح : تعبانه.. مالك ياحبيبي انتي كويسه.. مالك حاسه ب اي.. تحبي اجيب لك دكتور
*طيب يعني قولوا انتوا ده اسمه اي ده بقي؟ لا واضح تاني اني "كنت بفسر غلط" .. هو بيعتبرني اخته الصغيره اللي مربيها مش اكتر
_متقلقش يا أسر انا كويسه دايخه بس شويه.. ممكن بس تطلع وتقفل الباب وراك
أسر:هتنامي تاني!؟!!!
_لا هقوم اخد شاور
حط ايده علي شعري ومسح علي راسي وقال :ماشي يا أميرتي الف سلامه عليكي
خرج وقفل الباب خدت شاور ورجعت نمت ومتحركتش.. 5 ايام بتهرب منه بكل الطرق.. بتحجج اني ورايا مذاكره كتير واخر سنه وعاوزه اجيب امتياز.. عرفت انهم هيتقدموا لبنت عمتي بعد يومين.. مش هقدر اكون موجوده ولا هينفع اكون موجوده اصلا... فجت فكره في بالي قررت انفذها فكره مش هتبعدني يوم لا دي هتبعدني سنه كامله عنه....
كنا قاعدين على السفرة بنفطر قطعت الصمت وقلت لعمي : عمي لو سمحت عاوزة حضرتك في موضوع مهم بعد الفطار
عمي: حاضر يا اميره خلصي وتعاليلي علي المكتب... وقام
أسر : اي يا أميره موضوع اي ده
رديت من غير ما ابصله : موضوع خاص بيا
الدهشة ظهرت علي وشه بوضوح وبصلي فتره وكأنه مستغربني: اميرتي..
من أمتي وفي موضوع يخصك انا معرفوش.. بعدين دايما كنتي بتقوليلي وانا اقول لبابا اي اللي اتغير
_اني مبقتش صغيرة ده اللي اتغير... اني كبيره كفايه عشان محتجش واسطه عشان اخد الأذن من عمي في حاجه
أسر بدهشه اكبر: واسطه!!!
قومت من علي السفره من غير كلام ودخلت المكتب
أسر وهو بيكلم والدته ومرات عمه : هي اميره مالها بقالها كام يوم مش طبيعية
ردت والده اميره /:أسر متشغلش بالك ب اميره وسيبها في حالها
أسر بحدة :وده من أمتي أن شاء الله
ردت ليلي :من النهارده يا أسر سمعت
أسر وهو يقف بعصبيه : انا مش فاهم انتوا جرالكوا اي.. وسابهم ومشى وهم بصوا له بحسره وحزن
في المكتب*
_اي الكلام ده يا اميره... عاوزه تروحي تقعدي عند خالتك في إسكندرية.. لي
_زي ما قلتلك ياعمي.. انا محتاجه في آخر سنة ليا اني اتدرب في مكتب محاماة واخد خبره.. مش هلاقي احسن من جوز خالتي يدربني كمان مكتبة من أكبر مكاتب المحاماة في مصر
_انتي بتهربي!! قالها عمي وهو بيبص في عيني
_اه.... قولتها وانا برضو ببص في عينه وبكل وضوح اتفاجا هو بيه... كملت..
. _مفيهاش حاجه ياعمي لما اهرب... اهرب من وجوده في حياتي... يمكن انسي
_روحي يا أميرة روحي... أنتي بنتي وانا حاسس بوجعك... أنتي عارفه لو
انا عارف ان الحل في أني اغصب عليه يتجوزك كنت عملتها.. لكن وجعك دلوقتى أهون من وجعك وانتى معاه وهو مغصوب عليكي
_صح ياعمي... شكرا انا همشي بكره
_علي طول كده؟
_الوجع بيزيد كل يوم عن اللي قبله وانتوا بعد بكره هتروحوا تتقدموا.. مش هقدر ابقي موجوده
قام من علي الكرسي وجه حضني جامد... وانا فعلا كنت محتاجه الحضن ده اوي
______________&___________
_نعم؟!... أي اللي بتقولوه ده.. حضرتك موافقها علي الجنان ده يابابا؟... قالها أسر بعد ما بلغوه بموضوع سفري.. من وقتها وهو
عامل زي المجنون ومتعصب لأقصى درجه عينة محمره وملامحه مخيفه وعضلات جسمه كلها مشدوده لعصبيته
_اه موافق اي المانع؟
رد أسر بصراخ :مانع.. انا مش مصدق انتوا بجد موافقين.. حتي لو انتوا موافقين انا بقي مش موافق
رديت عليه بكل هدوء خارجي : معلش يا أسر بس عمي موافق وانا يهمني رأي عمي وبس
أتلفت ليا وبصلي بنظره
عمري ماهنساها نظره كلها وجع علي استغراب علي صدمه ورد بصدمة :معقول.. انتي يا اميره.. انتي اللي
عمرك ما اهتميتي برأي حد غيري.. ودايما تقوليلي انت المهم عندي... دلوقتي رأيي مش مهم...
. سكت شويه وبعدين رجع صوته يعلي تاني وقال: مش من حقك.. ولا من حق أي حد انه ياخد قرار في حياتك غيري انا.. انا وبس يا... يااميرتي.. انا اللي مربيكي.. انتي بنتي فاهمه يعني اي... يعني انا بس اللي أقرر في حياتك.... ومفيش زفت سفر ولا هتروحي في حته....
قالها ومشى بكل عصبيه من قدامنا وساب البيت كله وخرج.... دمعه وحيده زي حالتي تمام نزلت على خدي مسحتها بسرعه وقلت لعمي :انا هسافر
عمي : هتسافري.. متقلقيش بس لازم ميكنش موجود
*ابتسمت بسخريه... "بنته "... كل الحكاية انه حاسس بمسئوليه تجاهي..' بس انا اللي فسرت غلط "
________________
"بعدت وكنت هعمل ايه مين اختار غربته بايديه لكن حبك دا منستهوش وعاش ليا"
وكأن السواق بيشاركني احزاني عشان يشغل اغنيه زي دي دلوقتي... كان السواق الي بعته جوز خالتي بعربيته عشان ياخدني..
شردت في الطريق وانا بسأل نفسي ياترى وانا راجعه على نفس الطريق بعد سنه هيكون اي احساسي هكون نسيته؟!
______________________
" سافرت... يعني اي " قالها أسر بصدمة وتوهان زي طفل تاه من أمه في مكان زحمه ومش عارف هترجعله ازاي
والده :يعني سافرت يا اسر تشوف حياتها وطريقها
_طب وانا! ازاي تسافر وهي عارفه اني مش موافق ومش راضي... ازاي تسافر من غير ماتودعني
أسر كان بيتكلم بهذيان زي المريض اللي الحمي صابته ومبقاش عارف هو بيقول اي
_انت مشيت والعربيه جت وانت مش هنا.. المفروض اي نستناك
أسر *
دخلت اوضتي من غير ما انطق بحرف... حاسس بنقص.. وجع رهيب بيحتل
صدري... حاسس بحاجه ماسكاني من رقابتي خنقاني... ودموع متحجره في عيني رفضت النزول
الفصل الثاني
( الهروب)
وقفت قدام الباب بقدم رجل واخر عشرة خايفه يكون جوة واقابله بس ده أمر واقع مش هقدر اهرب منه هيحصل هيحصل وانا عارفه انا هعمل اي... رنيت الجرس
والباب فتح واخر حاجه توقعتها انه هو اللي يفتح الباب... وكأن حظي النحس ملازمني...
*أسر
آخر حاجه كنت اتوقعها أني افتح الباب والاقي أميرة قدامي بعد سنه كامله ملمحتش طيفها ولا سمعت صوتها حتي حفلة التخرج بتاعتها كلهم راحوا وانا رفضت وهي برضو مفكرتش تتصل تطلب مني اروح.. ياااه قد اي الاشتياق حاجه بشعه.. كنت عارف اني مشتاق ليها ولكل حاجه كنا بنعملها سوا.. بس مكنتش اعرف اني مشتقالها للدرجه دى غير لما شوفتها قدامي... اتغيرت.. تسريحه شعرها اتغيرت بقت عاملاه علي شكل فورمه مش سايباه مفورد زي الاول... خست شويه.. حتي وشها رفع.. ملامحها اتغيرت بقت حاده وجامده وغريبة عليا وكأني اول مره اشوفها
**أميره
انا اي اللي رجعني بس.. لما عديت على الطريق وانا راجعه قلت لنفسي انا منستوش بس حبي قل... لكن حاليا اكتشفت
اني كنت هبله... انا منستوش ولا حبي قل... أول ما شفته قدامي بصيت للباب وحسيت نفسي كأني لسه خارجه من الباب ده قبل سنه
مش داخله منه بعد سنه... كل اللي حاولت اعمله السنه دي اتبخر.... وحشني اووووي... شكله ماتغيرش كتير.... طبيعي... مانا اصلي كنت بتابع صوره اللي بتنزل علي السوشيال ميديا اول بأول.. واخرهم كانت صورة منزلها الأسبوع اللي فات... بس دقنه محلوقه!!حلقها امتى .. الغبي ده عارف اني بحب شكله بيها... نزلت عيني من غير قصد وكأنها عارفه طريقها وقعت عالدبله ف ايده... زي صاعقة كهربا ضربت جسمي فوقتني من اللي انا فيه
_ازيك يا أسر!!؟ بدأت انفذ اللي قررته.. حطيت كل قوتي أن صوتي يطلع عادي كأني بكلم شخص غريب ونجحت
أسر بهمس مصدوم: أميرتي!
_يادي النيله... لسه مصمم يقولها... بس انا هعرف ازاي اخليه يبطلها
_اي يا بن عمي هتسبيني واقفه عالباب كتير؟
وطبعا اول مره اقوله ابن عمي دي والموضوع معدش عليه بالساهل بس اتنحي من قدام الباب ومد ايده يسلم عليا
_ازيك يا أميرتي
مديت ايدي سلمت عليه ولسه هنطق.. لاقيته بيسحبني لحضنه وبيحضني جامد كأنه بيعبر عن كل اشتياقه ليا الفتره اللي فاتت وهمس جنب ودني : وحشتيني ياغبيه
انا بقيت مصدومه وقلبي بيتنفض... انا فاهمه انه بالنسبه له عادي لأن ده اللي كان بيحصل زمان هو مش بيعمل حاجة جديده أو شاذة.. بس.. انا اللي مبقتش زي زمان ولا هقدر انه يعاملني بتلقائيه زي زمان
*أسر
كانت وحشاني بغباء.. لما مديت ايدي اسلم عليها كنت قاصد اعاملها بفتور عشان تحس بغلطتها لما مشيت من غير اذني وغابت سنه كامله مفكرتش تسأل مره فيها عليا...
بس مقدرتش ماخدهاش في حضني.. ماهي بنتي... ممكن البنت تغلط اه وابوها يقسى عليها شويه لكن في الاخر لما هتقف قدامه بعد غياب مش هيقدر مياخدهاش في حضنه ويحس برجوعها
ويسد اشتياقه... هي حته مني.. بس غبيه زي ماقولتلها.. فكرت اني كنت ضد مصلحتها لما رفضت سفرها.. بس الحقيقه انه مش بالساهل أقبل بعدها عني
*أميره
اتنفضت وبعدته عني مهو مش هينفع اللي بيعمله ده سحبت نفسي من حضنه وزقيته بطريقه وعنف استغربه....
أسر: أميرتي في اي
*أميره
بس لحد هنا وكفاية فاض بيا حقيقي.. صرخت فيه لدرجه ان كل اللي في البيت خرجوا
_متقوليش كده.. بطل تقولي كده... خدت نفس عميق وهديت نفسي وكملت بصوت هادي.. أسر ده مينفعش دلوقتي.. مينفعش انك تحضني ولا انك تقولي أميرتي ولا اي حاجه من اللي كانت بتحصل بينا زمان
ليلي :صح يا أسر... كلام أميره صح مبقاش ينفع
*أسر
هو في اي اللي بيحصل.. هي لي اتغيرت كده.. ولي الكل بقي موافقها.. أي اللي تغير هي لسه اميره الي ربيتها.. وانا لسه اسر اللي كانت بتجري علية اول حد... أي اللي حصل
أسر : وده لي بقي أن شاء الله... أي الجديد
والد أسر : انك بقيت خاطب وكلها سنه وتتجوز... من حق الانسانه الي ارتبط بيها انها متشوفش طريقتك دي احترام ليها... أميره مش اختك ولا بنتك يا أسر... أميرة زي ساره تحل لك ومينفعش طريقتك دي.. هي كمان نصيبها هيجلها قريب ومفيش راجل هيرضي أن مراته يكون في حد بيتعامل معاها كده
أسر بعصبيه :محدش له حق يحدد علاقتي بيها يولعوا كلهم
والدة أميره : أسر فوق بقي من جنانك ده انتوا كبرتوا مبقتوش صغيرين لازم فى حدود في التعامل
أسر بسخريه : والحدود دي اتحطت في سنه.. فجأة كلكوا اكتشفتوا ده
أميره : عمي قالك ان الوضع اتغير دلوقتي ساره عمرها ما هتقبل على نفسها انها تشوف طريقتك دي معايا وتسكت... حقها.. وانا مش عاوزاها حرب يا أسر ومش عاوزه ساره تكرهني أو تحطني في دماغها....
سيبته واتجهت ليهم سلمت عليهم ودخلت أوضتي وكل واحد راح يعمل اللي كان بيعمله وأسر فضل واقف في مكانه مصدوم
______________________
أميره*
دخلت أوضتي وانا بجاهد اني اتنفس بصورة طبيعية بعد المواجهه الصعبة والمرهقه دي.. فتحت الباب واستغربت
اوي حسيت كان الاوضه كانت مسكونه.. الطبيعي أن ميكنش حد قعد فيها لأن كل واحد ليه اوضته ده انا حتى اتوقعت هتلاقي الشباك مقفول والاوضه ضلمه وشبه مهجورة... لكن العكس
تماما اللي شيفاه... بصيت عالسرير اتاكدت ظنوني السرير مش مرتب اوي وباين أن كان في حد نايم عليه... دخلت الاوضه اكتر.... أي ده.. قابلني ريحة برفانه اللي عمرى ما هغلط فيها أبدا.. لدرجه اني أتلفت فكرته ورايا لكن ملقتش حد... دخلت ماما وهي بتقول
:حمد الله بالسلامة يا حبيبتي نورتي بيتك من تاني.... سألتها وانا بحاول افهم :ماما هو حد كان بينام هنا؟
البيت عندنا زي فيلا صغيره في دور أرضي فيه الرسيبشن ومطبخ وحمام والسفره واوضتين واحده منهم فاضيه والتانيه مكتب أسر ودور علوي فيه ٥ اوض.. منهم أوضتي واخر الطرقه أوضه أسر..
: ايوه يا أميره...
_ مين؟ حضرتك؟
_لا أسر
وقفت مصدومه ومش فاهمه.. يبقى انا كنت صح لما شميت ريحته في الاوضه...
_لي؟
_محدش عارف... أسر من يوم انتي ممشيتي غصب عنه واحنا ساعدناكي ووقفنا في وشه.. وهو مش بيتكلم معانا زي الاول.. ومش مدي حد فرصه يسأله عن حاجه... هو فجأه بقي ينام هنا
_طيب... ال
مكملتش كلامي لاقيته داخل الاوضه من غير حرف واحد واتجه للكومود وواضح انه بياخد موبايله
وقفت في وشه قبل ما يطلع..
_ماما لو سمحتي سبينا شويه
بصلي وعينه مرمشتش وكأنه منتظر كلامي
_اي يا أسر لي بتنام هنا؟
_وانتي مالك... رد ببرود وطريقة مستفزه ونظرة سخرية
_دي اوضتي
_وانتي مكنتيش فيها... عادي أوضه فاضيه زيها زي اي أوضه... مفيش مانع اني انام فيها.. وملكيش تسالي عن أذنك
خرج من الاوضه وهو باين علي وشه كل غضب الدنيا
*أسر
قال كنت بتنام هنا لي!.. علي اساس اني مضطر ابرر.... سكت ووقفت فجأة وجه في بالي سؤال... هو انا لو حبيت اجاوب هقولها اي؟.. انا نفسي معرفش ليه..
كل الحكايه اني محستش اني مرتاح شويه غير لما نمت مكانها حسيت بوجودها اللي كان آلمني.. حسيت وكان جزء صغير اوي من الفراغ
اللي سابته اتملي بوجودي مكانها واحساسي بأنها حواليا كنت بحس بروحها في الاوضه.... اقولها اي.. اني كنت بقعد عالسرير واتخيلها قدامي واحكيلها يومي.. لا وبعدها اشتيكلها منها... ومن بعدها..... "دي تقول عليا مجنون" قولتها بصوت وكان بنهي بيها كلامي مع نفسي
_________________________
تاني يوم ومن حظي النحس طبعا.. كان عمي عازم عمتي وجوزها وولادها عالغدا.... لما عرفت حسيت اني بتخنق مبقتش واثقه هل هقدر اتعامل عادي فس
الوقت الي هيبقي هم الاتنين متجمعين قدام عيني... مش عارفه ياريتني اقدر اهرب... ربنا يقويني حقيقي
أسر*
مقدرتش اني انام ابدا حاولت ومقدرتش كلامهم ورغبتهم اني ابعد عنها
مجنني.. مهو اصل مش هيحصل الهبل ده حتي لو قفت على اني افسخ خطوبتي... فداهيه
لكن الجنان ده مش هيحصل ابدا.. قال نتعامل بحدود قال.. والغبيه التانيه تقولي مينفعش
تح ضني ولا تتعامل معايا زي الاول... تمام يا أميرتي هنشوف....