رواية توأم روحك انا الفصل العاشر10بقلم ياسمين شاكر
فتحتا عيوني فتيحة زول كان نايم بعمق وطبعاً غريزياً حاولت اتحرك ماقدرتا وحسيت بي ألم في كل جسمي، شوية شوية استوعبتا اني راقدة وجسمي اغلبو مربط ومركبين لي درب وحاجات كده في صدري وجمبي جهاز بعمل توت توت توت، مافهمتا شي صراحة وداهمتني ليك دموع كده غريبة وبقيت اقول بصوت طلعتو بي العافية ماما ياماما عايزة ماما
ودقات قلبي ارتفعت وجاتني حالة بتاعت بانيك اتاك (panic attack) والجهاز طوالي صفر بي صوت مزعج والتوت توت زادت بعد مده بسيطة لقيت ممرضة جاية علي ولمن لقتني مفتحة رجعت نادت الدكتور وطوالي لقيت لي دكتور شاب في راسي وبقو يفحصوني وجا معاهم تاني ممرضة وانا شغالة بقول ليهم انا وييين انتو منو هييي أنا وين عايزة أمي نادو لي ماما
طوالي الدكتور ابتسم وقال لي حمدلله على السلامة ماتخافي يانورهان انتي بخير وامك موجودة ومستنياك اهدي وروقي عشان اخليك تشوفيها.. طوالي جريت واطي وسكتا زي الشافعة الصغيرة، لكن دموعي ماوقفو حاولت اتزكر وحسيت راسي وجعني.. بعد مدة طويييلة كانت بالنسبة لي الدكتور سمح لي ماما تخش، كانت دي العناية المركزة وممنوع الدخول لكن بس عشان انا اطمن دخلو لي ماما زي ماطلبتا، ماعرفتها والله كان وشها أسود من الهم وعيونا دبلانات من البكا دخلت وحاولت تبين فرحا عشان ماتزعجني وبي صوت كان احن صوت اسمعو في حياتي قالت لي الحمد والشكر ليك ياالله الف الحمدلله على السلامة ياحبيبتي، الحمد ليك يا الله انت كريم وانت رحيم، ووطت باستني في راسي وانا دموعي جارية قلتا ليها ماما انا مالي، انا تعبانة
قالت لي الله نجاك وكتب ليك عمر جديد الحمدلله ماتخافي بالعكس قولي الحمد لله مليون مرة الحمدلله انتي رجعتي للحياة من تاني..
الممرضة جات وطلعتا وقالت لي قبال تطلع كلنا منتظرينك برا نهال مشتاقة ليك وحبوبة كمان وابوك روحو مارقة عليك كلهم برا حنان وعناية وعلي ورامي واخواتك البنات حتى اعمامك قاعدين عمك ياسر جاك راجع مخصوص هو ومهرة مهيرة، يلا خفي وشدي حيلك عشان تشوفيهم.. والله حسيتا زي الادتني حقنة فيها شي منعش حسيت بي راحة وبطلتا بكا، والدكتور بعد مرور ساعتين حس مؤشراتي الحيوية ممتاذة قامو طلعوني غرفة عادية وسمحو ليهم يخشو لي لكن عشان هم كتار اتقسمو، اول دخل بابا وحبوبة وماما ونهال حبيبتي، شوفتهم تعبت نفسياتي، كانو شايلين هم الدنيا كلو في راسهم ووشوشهم ماياها نهائي الحزن كاسيهم رغم فرحتهم بي شوفتي، كلهم حمدو لي السلامة وحبوبة بي فرحة قالت لي هي يا نورهان ياحليييلك يمة شفقتيني عليك وانا مرا عجوز مابتحمل لكن الله ده مارحيم بي عبادو
ياخ مامصدقة حبوبة نادتني نورهان هههه،ونهال عاصرة يدي عليها وبتقول لي الله استجاب لي دعاي ورجعك لي
انا ماكنت فاهمة شي، اي خلال الساعتين الفاتو اتزكرتا انو كنت مع إسلام وتاني الحصل شنو ماقادرة اركز، إسلام! وين إسلام صحي و الحصل شنو
قلتا ليهم انا الجابني هنا شنو، بابا براحة كده قال لي مامتزكرة الحادث؟ قلتا ليهو حادث؟ انا حصل لي حادث؟ وفجأة بقيت ابكي اتزكرت صوت صريخي والعربية بتتقلب واتزكرتا الخوف الاتملكني لحظتا وبقيت ابكي بي صوت عالي واقول ليهم وين إسلام وينو إسلام حصل ليهو شنو
طوالي بقيت برجف وببكي زي المجنونة اظن دي الصدمة ولا شنو ماعارفة، المهم حاولو يهدوني وجات الممرضة عشان تطلعهم قلتا ليهم: لأ ماتمشو لازم اعرف الحصل شنو، لكن كلهم طلعو والممرضة ادتني مهدئ بعد فترة تانية فقتا و بابا دخل لي وجا مسكني من يدي وبي نفس اللهجة الهادية قال لي نورهان انتي جاتك صدمة مابعد الحدث يعني انتي كنتي في حالة نسيان واتزكرتي، انا بحكي ليك الحصل بس اوعديني تفضلي هادية
هزيت بي راسي طيب
قال لي انتي كنتي مع إسلام وحصل ليكم حادث لكن إسلام مرق منها سليم بس جروح في الراس بسيطة خيتوها ليهو وجسمو اترضرض لكن عشان رابط الحزام مااتأذى جامد، لكن انتي الاضررتي شديد رجلينك اتكسرو شديد الاتنين وراسك انفتح وفي كسور في ضلوعك وخلع في الكتف، دخلوك في غيبوبة اجبارية لكن بعد العمليات الاتعملت ليك مافقتي وفضلتي في غيبوبة اسبوعين كاملين، كنتي في حالة خطيرة وطول الوقت كنا خايفين ومترقبين ودعينا كتير لي ربنا يردك لينا سالمة والحمدلله استجاب، اهدي وروقي وان شاءالله حاتبقي كويسة، بعدها مشا نادى الباقين وخشو لي كلهم وعمت الفرحة المكان وعملو دوشة عجيبة بس كنت فرحانة بيهم شديد، بجد الله مايحرمني من لمة العيلة بعد طلعو كلهم جاتني ماما وقعدت معاي وقالت حاتكون المرافقة هي.. رجعتا نمتا كتير ماعارفة قدر شنو لكن لما صحيت لقيت ماما شايلة المصحف وبتقرا فيهو، بعد زمن كده الباب دقا، ماما قالت اتفضل وانفتح الباب ودخل منو دكتور قصي وزلفى وخالتو يسرية ،ماما قامت رحبت بيهم والمرا بي فرحة قالت ليها : الحمدلله على سلامتا ماتشوف شر ان شاءالله
ماما قالت ليها الله يسلمك نشكر الله الحمدلله
د. قصي: من ياسر كلمني ماقدرنا مانجي نطمن عليها
ماما: مابتقصرو كفاية وقفتكم معانا طول الايام الفاتت دي، تعالو اتفضلو خشو
زلفى جاتني وقعدت جمبي وقالت لي : نوووور قسما بالله مشتاقين وحمدلله على سلامتك ياقلب قلتا ليها بصوت تعبان الله يسلمك ياعسل
خالتو يسرية: نورهان بركة الفتحتي يابتي حمدلله على السلامة حبيبتي
قلتا ليها: الله يسلمك ياخالتو تسلمي لي
بعدهم قرب قصي او د. قصي، صراحة أول مرة اتأملو، ماكان لابس النضارة ولاحظتا نفس الملامح الكانت في اهلي فيهو نظرة الحزن والهم، معقول كان خايف علي؟ لا لا عادي ياخ في حالتي دي اي زول بعرفني ولو طفيف حايقلق، سلم علي بي صوت رزيين وهادي ويبعث على الراحة قال لي : الف سلامة عليك يانورهان شدة وزالت الحمدلله
قلتا ليهو:الله يسلمك شكراً
حتى وانا مريضة لساني ده داير قصو، شكراََ دي شنو القلتها دي، كل الناس دي ومافي زول قلتا ليهو شكراً الا هو ماعارفة نظام اقفلو ولا نظام شنو انا زاتي ماعارفة، زول يلطشني كف يااخوانا..
قال لي: ليه بتشكريني؟ ماعملتا شي يستحق
قلتا ليهو سمعتا ماما قالت انو وقفتو معاهم في مصابي ده مابستحق الشكر؟
طبعا ياجماعة ماما وخالتو كانو بتونسو واظن زلفى راخية اضانا معانا مامتأكده لكن الحوار ده كان بيناتنا برانا..
قال لي : لا مابستحق لأنو نحن بقينا اهل وده واجبنا ولا مابتعرفي الواجب
قلتا ليهو خلاص ماشكراََ
بقى يضحك برااحة وقبل مايذيد حرف خالتو يسرية قطعت الكلام وقالت لي شدي حيلك يابتي عشان تخفي بسرعة
قلتا ليها: ان شاءالله
زلفى تاني قربت قريب ومسكتني من يدي قالت لي براحة قومي سريع عشان في زول قلبو حايتخلع من مكانو بسبب رقدتك دي، قلتا ليها زول؟ زول منو ، ماردت بس بقت تضحك ماعارفة اظن قصي حدر ليها ولا انا بتخيل لي ماعارفة والله.. ودعونا وفاتو..
عدا اول يوم علي متعب شديد وماكنت قادره انوم من الالم الجسدي والنفسي كمان.. اتزكرتا إسلام وكواريكو فيني والنقاش الحاد الكان داير قبل مايحصل الحصل.. وينو طيب ليه ماجاني لحد الان طال ما تمو اسبوعين على الحادث واكيد بقا كويس، اسأل ماما ولا اسأل نهال.. ياترى خاف علي واتراجع عن قرارو في انو يسيبني؟ جايز الحادث ده يصلح بيناتنا، الافكار صرعت راسي وجابت لي الصداع وبقيت ببكي بدون صوت ماكنت قادرة ابكي بصوت لأني ضعيفة حاليا وتعبانة ماقادرة اتكلم حتى
تاني يوم الصباح جات نهال وبابا وحبوبة والباقين قالو ليهم تعالو الضهر،طبعا مامحتاجة اقول ليكم منو الاصدر القرار هههه ماخلاص دخلتو فينا وعرفتونا.. بابا قال لي الدوري الانجليزي بدا الاسبوع الفات لكن ماكان عندي نفس احضر اي مبارة من دونك، والله لمن دمعتا لأني جد عارفة بابا وحبو لي الكورة وعارفة انو بحب اكون معاهو عشان بشاغلو وبكاويهو وبعمل ليهو جو اتألمتا لأني اتسببتا ليهم في الخوف والحزن والتوتر ده كلو لكن ماكان بيدي امر الله فوق كل شي..
حبوبة قالت لي جبتا ليك خبر يفرحك مهرة مرت عمك حامل
قلتا ليها بي فرح صحي؟مبرووك حاتبقى جده تاني وتفرحي بي اخر العنقود بتاعك.. كنت عايزه اتحرك لاشعورياََ وحسيت بي الم لمن قلت اخ.. قالت لي هي المهجوجة دي قايمة وين، وبقو يضحكو كلهم.. تاني لقيت لي فرصة انفرد بي نهال لمن الضهر اذن وقامو يصلو.. سألتها من إسلام
قالت لي ماعايزة ازعلك وياريت تتماسكي عشان مااندم اني كلمتك
قلتا ليها اتكلمي بسرعة قالت لي إسلام ده شخص ماعندو زرة الرجولة ولا النخوة، بعد اتسبب ليك في رقدتك دي ولا حتى سأل منك ولا ورانا وشو، بس جا ابوهو يطمن بعد الحادث بي يومين وتاني ولا ورونا وشهم، ابوهو راجل طيب لكن كان خجلان يجي تاني و بابا قال لي انو بسأل منك طوالي بي التلفون، اما إسلام ولا اتكرم بي سؤال واحد مع انو ابوهو قال لي ابوي انو كويس وقام اتحرك عادي ونزل الشغل، ولا امو جات ولا اخواتو ماعارفة لييه، انا الغايظني انو الحال كان بستدعي انو يجي ويسأل خصوصا انو هو الكان سايق واتسبب ليك في الانتي فيهو ده حتي لو خجلان او خايف يسمع مننا كلام شين مالو يتحمل، وبعد يطمن عليك مايجي تاني واصلو البيناتكم انتهى، وعلى فكرة ماما ادت الشبكة والدبلة لي علي اخوي وداهم ليهم في البيت لقا اختو الكبيرة اداهم ليها..
نهال كانت بتتكلم وانا مع كل كلمة بذيد ضيقي وبحس انو زول ماسك قلبي وعاصرو شديد، لييه ياحبيب الروح عملتا كده ليه ماجيت، صدقني كنت حاسة بي وجودك كنت حاسة بيك ماسك يدي ولمستك حركت قلبي حتى وانا غايبة عن الوعى متأكدة اني سمعتا همساتك، طيب لو ماانت ده منو يعني منو الجا ومسك يدي وطبطب علي ، مازعلانة منك ولا لايماك في الحصل لأنو ده قدر من رب العالمين لكن انك تبعد بعيد ولاحتى تحاول تشوف البقيت فيهو ده كتير علي ليه يا إسلام ماجييت لييه..
نهال عرفتني زعلتا طوالي غيرت الموضوع وقالت لي صورك مالية مواقع التواصل الاجتماعي كلها والناس عرفت الحادث وبتدعي ليك ومنهم المابعرفوك لكن دعو ليك تقومي بي السلامة
شهرتك زادت اكتر يامذيعتنا المغمورة.. ابتسمتا ليها بحب وفي اللحظة دي ماما جات وهجمتنا ذي عوايدا ونهرت نهال يابت قومي صلي خلي القطيعة في خلق الله ماتتعبي اختك قومي .. ههههه
بعد قامت نهال حبوبة جات وطردت ماما قالت ليها ترجعي البيت مع هاشم والتومة التانية وانا بحرس التومة دي، خلاص رجعوني التومة تاني بعد فرحتا.. بعد هم فاتو جو خالتو حنان وخالتو عناية واخواتي الصغار معاهم جو بي هدوم المدرسة.. اتونسو حبه وكرشوهم طوالي وجو فيهم ناس علي ورامي قعدو حبه وفاتو كلهم..
خلاص بعد انا فقتا بابا منعهم يتكسرو في المستشفى يجو يطلوني ويمشو والعرسان جوني المسا وبرضو قالو ليهم تاني ماتجو الا خطفات خطفات..
بالليل جاني اخصائي العظام وشرح لي حالتي وعرفتا انو تاني محتاجة عمليتين على الاقل فرقتهم شهر والأولى حاتكون خلال اسبوع😩 وانو ماحاطلع من المستشفى الا بعد اعمل الاتنين.. مرق خلاني في هم جديد، غير حالتي الوصلتا ليها مافات علي انى كلفتا اهلي فوق طاقتهم، نحن ماناس مروقيين ولا عندنا ملايين نحن ناس مستورين والحمدلله لكن انتو عارفين المستشفيات والصرف والعمليات بتكلف كم، بابا ماحمل ده كلو حايجيب من ويين، حبوبة كانت مراقباني وحاسة بي الصراع الجواي، فجأة قالت لي يابتي ماتهمي عارفاك حاتفكري في حالنا وحانسوي شنو، اطمني ياجناي ابوك عندو قريشات في السوق لماهم وامك باعت دهبا وانا عندي قروش لاماهم لي يومي الأسود وهدا جا وقتا وحتى خالاتك حنان وعناية باعن دهباتن، صحي بنات اصول ماقصرن، خالك رسل مبلغ كبير وهو جاي بعد شهر ماقدر يجي ابدر من كده، والباقي بدبر إن شاء الله الله كريم انتي اهم شي صحتك ياحبيبتي..
بكيييييت وهي تسكت فيني تقول لي يابتي الله حكم مابنعترض على حكمو، قلتا ليها شيلتكم الهم وكلفتكم فوق طاقتكم قالت لي هس ولا كلمة واوعي تبكي، اي واحد فينا لو حصلت ليهو حاجة كلنا مفروض نتساعد ولا ماكنتي حاتساعدينا..
علي اخوي جانا عشان يسوق حبوبة يرجعا البيت وقطع حديثنا ولقاني ببكي حبوبة قالت ليهو موجوعة ياحليلا، وقعد اتونس معاي مسافة وقال لي حااودي حبوبة واجيب خالتو فريدة تمام؟، ودعتهم وطلعو فاتو ، بقيت براي ورجعتا ابكي بكيت حالتي الوصلتا ليها وبكيت على اهلي وزرتهم الوقعو فيها بسببي، بكيت فقدي لي إسلام ولي احلامي البنيتا معاهو واتاريني براي الكنت ببني في سراب، مابقدر الومو لأني انا الأملتا فيهو وكان شعوري من جانب واحد.. وانا في عز بكاي الباب دقا وبدون ماامسح دموعي قلتا ادخل، كنت مكتأبة لي درجة اني ماوازنة تصرفاتي ومااتزكرتا اقش دموعي ولا اخبي مشاعري تقريباً كنت في حاله من اللا وعي، وفي اللحظة دي دخل د. قصي..
ماعاينت عشان اشوف منو دخل وماكنت حااشوف كويس لأنو دموعي ماليه عيوني وحاجبة الرؤية، بس جاني صوتو وهو بقول لي بي لهفة نورهان ليه بتبكي مالك في شي واجعك؟ انادي الممرضة تشوفك؟
رديت بعد مسافة قلتا ليهو كل شي واجعني كل شي ورجعتا ابكي ازيد وبي صوت كمان قال لي طيب لييه بتبكي كده حسي لازم تبقي شجاعة شوية، رفعتا راسي عاينت ليهو ووشي كان مضحك وعلي حالة شاش في راسي وخدوش في وشي والدموع راسمة مجرى وحالتي صعبة، قلتا ليهو الجابك شنو؟ ابتسم وقال لي جيت عشان اطلك واطمن عليك ثم اني دكتور برضو يعني، قلتا ليهو انا محتاجة دكتور عظام وانت مادكتور عظام، قال لي العصفورة قالت لي انك محتاجة دكتور قلب برضو لأنو قلبك تعبان ودموعك أكبر دليل، قلتا ليهو بي طريقة هبلة زي غضب الشفع داك، انت ماشايفني ببكي؟ عايز مني شنو مفروض تخليني براي ماتحرجني بي الطريقة دي،ومواصلة بكا ودموعي ماراضية تقيف، ابتسم وقال لي آسف ماقصدي ازعجك بس حالتك مامطمنة ولازم تهدي شوية بمشي اذا حسيتك ايزي ومرتاحة وقشيتي دموعك دي، لاشعورياََ حاولت اتحرك تاني لمن صرخت آآآي، قال لي يابت انتي ناسية انك مابتتحركي؟ نورهان اهدي عليك الله ليه عايزة تخوفيني عليك اكتر
قشيت دموعي واتنفست بي صوت مسموع وحاولتا اضبط اعصابي وقلت ليهو ممكن تمشي؟ قال لي انتي لي ماطايقاني انا حصل ضايقتك؟ ليه مامعتبراني دكتور زي باقي الدكاترة
حسيت اني جد ماعايزة اسمع تأنيبو لي اصلا ماناقصة أنا وقلتا ليهو بترجا فيهو ممكن تمشي ماعايزة اتكلم انا تعبانة وعايزه ارتاح، قال لي طيب ياستي حاضرين حاأمشي بس حاأرجع مرة تانيه عشان اطمن عليك، وقام عشان يمشي.....