رواية اول مره احب الفصل التاسع9 والعاشر10 بقلم شيماء صبحي
بق كل دا يحصل لبنتي من وراكي انتي وجوزك اللي محدش يعرفله لا اصل ولا فصل هو فين جوزك الواطي اتصلي عليه خليه يجيلي هنا علشان اطين عيشته!
رحمه بألم من ضرب خالتها ليها:اهدي يا خالتي والنبي متعمليش كده!
قربت اروي من والدتها وبعدتها عن رحمه وبصت لرحمه وقالت:خلاص يا ماما رحمة اصلا ملهاش علاقه بكل اللي حصل ،وعصام احنا عارفين انه بتاع مشاكل واهم حاجه يقدر يحميها هيا ولاكن انا الحمدلله بخير!
والدة اروي بصت لبنتها بزعل وبعدت عنها ولاكن اروي قررت تهدي علشان ميرجعوش يتخنقوا تاني فسالتها رحمة وهيا بتتالم من ضرب خالتها ليها وقالت :الناس اللي انقذوكي مطلعوش معاكي ليه علشان نشكرهم علي كل اللي عملوه معاكي؟
أروي بصتلها بتوتر وقالت:كانوا مستعجلين وكتر خيرهم علي كل اللي عملوه معايا وانا محبتش أضغط عليهم وسيبتهم براحتهم!
رحمة حركت راسها بالموافقه وبصت لخالتها وقالت:خلاص بق يا خالتي اروي رجعت بالسلامه اهي وانا كلمت عصام وبلغته يرجع ،علشان خاطري بلاش تقولي اي حاجه تاني علشان احنا متهنناش بفرحنا بسبب اللي حصل لاروي..
كانت هدى هتتكلم وترد علي رحمة بعصبيه وتقوم تتخانق معاها بسبب برودة اعصابها ولاكن والدة رحمة اتدخلت وقاطعت كلام اختها وبصت ل أروي وقالت:قوليلي يا حبيبتي انتي جعانه اجبلك تاكلي!
اروي حركت راسها بالرفض وقالت بتعب:انا بس عايز ارتاح يا خالتي لاني تعبانه!
رحمة بصتلها وحركت راسها وقالت وهيا بتقرب منها:تعالي يا اروي ارتاحي في اوضتنا انا وعصام!
اروي بصتلها وحركت راسها بالموافقه واستأذنت والدتها وخالتها ودخلت مع رحمة لاوضة النوم واول ما رحمة قفلت الباب بصت لاروي وقالت:قوليلي يا اروي اللي انتي قولتيه دا حقيقي ولا حصل معاكي حاجه تانيه ومخبياها علينا!
اروي بصتلها واتكلمت بجديه:وانا هكدب ليه يا رحمه انا قولت كل اللي حصلي .
رحمت حركت راسها وبان علي وشها التوتر فسألتها اروي وقالت:قوليلي يا رحمة هو ايه اللي حصل بعدما انا اختفيت يوم الفرح!
اتوترت رحمه جدا وقالت:ايه اللي حصل ازاي ياعني يا اروي مش فاهمة؟
اروي بصتلها وقربت منها اكتر وحطت ايديها علي كتفها وقالت:يعني قصدي كملتي الفرح ولا روحتوا لما انا مظهرتش تاني بعدما خرجت ادور علي جوزك!
رحمه بلعت ريقها بقلق وقالت بتردد:بصراحه لما عصام رجع كملنا الفرح وفي الاخر انتبهنا انك مختفيه!
اتصدمت اروي من كلامها ورفعت حاجبها بدهشه وقالت:يعني ايه ..،ازاي ياعني يا رحمه هو عصام مقالكيش علي اللي حصلي بسببه !
رحمة حركت راسها بخوف من رد فعلها وقالت:لا قالي كل حاجه بس لما روحنا البيت!
اروي اتضايقت جدا من كلامها وسألتها بقلق وقالت:قوليلي يارحمه ومتكدبيش عليا هو انتي وعصام تممتوا جوازكم؟
رحمه حركت راسها واروي وقتها اتصدمت صدمة كبيره وقالت:وانا مختفيه بسببه مفكرتيش فيا ومكملين عادي ومفكرتيش حتي انا حصلي ايه ولا جرالي ايه بسبب مشاكل جوزك؟
رحمة قربت من اروي وحضنتها وقالت ببكاء:انا أسفه يا رحمه بس والله انتي عارفه اني بحب عصام قد ايه والله هو كان مقرر هيدور عليكي يومها بس الوقت اتاخر وأجل انه هينزل في نفس اليوم بالليل .
اروي قاطعت كلامها وبعدتها عنها وقالت بحزن:خلاص يا رحمه متبرريش حاجه عموما انا خلاص فهمت كل حاجه انا هاخد ماما وهنرجع اسكندريه والف مبروك يا بنت خالتي!
رحمه مسكت ايد اروي وهيا لسا بتبكي ولاكن اروي كانت زعلانه جدا منها ومن اللي عملته في اختفائها وعدم تقديرها بانها ضحت بحياتها علشان خاطرها هيا وجوزها.
خرجت اروي من الاوضة وقربت من والدتها وقالت:ماما انا مش عايزه افضل هنا لو سمحتي خلينا نرجع اسكندريه!
هدى بصت لبنتها ومكانتش عارفه تبلغها بان ابوها عرف وجاي في الطريق فبصتلها وقالت:خلينا نمشي بكره علشان انتي تعبانه ،بقولك ايه ادخلي ارتاحي دلوقت وانا اوعدك اننا هنرجع النهارده بس لما ترتاحي شويه علشان متتعبيش من السفر!
اروي حركت راسها بالموافقه وقالت:طيب انا مش عايزه انام في اوضة رحمه انا هنام هنا علي الكنبه!
هدى بصت لرحمه بضيق وقالت:ليه مش هتنامي في اوضة رحمة ما الاوضه زي الفل ولا تكون رحمه اعترضت ولا حاجه؟
رحمه بدهشه:ابدا والله يا خالتي دي اروي اللي رفضت تنام جوا !
هدى بصت لبنتها وحركت راسها ليها وقالت:ادخلي يا بنتي نامي في اوضة الاطفال مكان مانا وخالتك بننام واحنا هنقعد كلنا هنا!
اروي حركت راسها ودخلت للاوضه ومن التعب بسبب السفر نامت بعمق.
وبعد مرور ٦ ساعات كاملين صحت اروي وكانت الساعه١٠ بالليل فخرجت علشان تشوف والدتها ووقتها لقت ان والدتها واقفه وابوها جمبها وخالتها ورحمه وجمبهم جعفر.
اتصدمت اروي من شكل جعفر ووالدها وحست بقبضة في قلبها وهي بتفتكر كل اللي هيحصل معاها لما ترجع اسكندريه فبدأت تتوتر جدا وقربت من والدها وهيا بتدمع وبتقول باشتياق:بابا!
والدها قرب منها وحضنها بخوف عليها وهيا بدأت تبكي وهوا حاضنها وبيطبطب عليها وبيحاول يهديها علشان يتكلم معاها ويفهم منها كل حاجه حصلت بالتفاصيل علشان يعاقب اللي كان السبب .
وبعدما اروي هديت والدها بصلها وقال بتساؤل:ايه اللي حصل يا اروي ازاي اختفيتي ثلاث ايام ومحدش كان قادر يوصلك!
رحمة قربت من والدتها وفضلت تبص في عيون اروي وكانت بتترجاها متحكيش عن اي حاجه وتخلي والدها يأذي عصام فاروي فضلت بصه علي والدها وبتفكر وكان والدها مستني ردها بفارغ الصبر فاتكلمت اروي وقالت:انا ..اللي حصل دا كان سوء تفاهم يابابا ..
والدها ضم حاجبه بضيق وقال بتساؤل:سوء تفاهم ازاي يعني،اتكلمي يا اروي !
بلعت اروي ريقها وبصت علي بنت خالتها اللي بتبصلها برجاء هيا ووالدتها وبعدها بصت لوالدها وقالت:انا خرجت اشتري حاجه وتوهت بالغلط ولحدما عرفت ارجع كان عدي ثلاث ايام لاني مكنتش عارفه اوصف العنوان لحد وكمان كنت ناسيه شنطتي مع ماما يعني مكنتش عارفة اتواصل معاهم وانا للاسف مكنتش حافظة اي ارقام من بتوعنا!
اتضايق والدها من كلامها لانه غير منطقي ووالدتها اتصدمت من كلامها ولما بصت علي اختها وبنتها وشافت شكلهم فهمت ليه بنتها كدبت علي ابوها ،فقربت هدى من بنتها اروي وحضنتها وبصت لجوزها وقالت:الحمدلله انك رجعتي بالسلامه يا حبيبة قلبي .
بصت هدى لجوزها وقالت برجاء:خلينا نرجع بيتنا يا رزق كويس ان البنت بخير ومحصلهاش حاجه.
جعفر مكانش عاجبه كل اللي قالته اروي وكان شايف ان كلامها مش مقنع فلما بص في عين معلمه عطاه نظرة عدم تصديق ورزق حرك راسه ليه وبص لبنته وقال:خلاص يا بنتي اهم حاجة فعلا انك بخير ،بس انا عاوز ابغلك حاجه مهمة قبل ما نرجع اسكندريه علشان تكوني علي علم بيها.
اروي بصت لوالدها وهيا حاسة باختناق شديد من اللي هتسمعه فحركت راسها باهتمام ووالدها بص لجعفر ومراته وقال:جعفر طلب ايدك للجواز وانا وافقت وفرحكم الاسبوع الجاي وان شاء الله كل اللي ناقصك هتنزلي انتي وامك وتجيبوه!
اروي اتصدمت وبصت لوالدها بدهشه وقالت:بابا حضرتك بتقول ايه .. انا مش موافقه!
زعل جعفر من كلامها وبصلها بحزن شديد وهيا تجاهلت تبصله وبصت لوالدتها بدهشه وقالت:ماما قولي اي حاجه انا مش موافقه!
رزق اتضايق من كلام بنته اللي دلعها كتير وقال:انتهي النقاش يا اروي انا اديت للراجل كلمه واتفقنا انا وهو وزي مقولتلك كده الفرح هيبق بعد اسبوع!
كانت أروى هتعلي صوتها وتعترض بس والدها حذرها بعيونه وهيا هابته وخافت منه وبصت لوالدتها والدموع في عيونها وقبل ما تتحرك خطوه اتكلم رزق وقال بجديه :انا هسبقكم انا وجعفر تحت في العربيه وانتو اجهزوا بسرعه وحصلونا تحت.
حركت هدي راسها بالموافقه وجعفر سبق معلمه ونزل والمعلم وراه وفضلت اروي الغضب متملكها واول ما والدتها قربت منها صرخت ببكاء وقالت:ياماما انا مش هتجوز جعفر لااا مستحيل.
هدى بصت لبنتها ومكنتش عارفه تقول ايه فاكتفت انها تتحرك لغرفه الاطفال بتاع رحمه وتعدل هدومها وبعدها خرجت وبصت لبنتها اللي ضامة ايديها لصدرها والغضب مالي قلبها ،
اتكلمت هدي وقالت :يلا يا اروي ننزل علشان منتأخرش علي ابوكي!
اروي حركت راسها بزعل وبصت لرحمه وخالتها بزعل ونزلت ووالدتها سلمت علي اختها ورحمه وقالت بهمس:عصام فلت منها بس يلا كله علشان خاطرك يا رحمه!
رحمه بصت في الارض وقالت بخجل:تشكري يا خالتي انتي واروي علي اللي عملتوه معايا!
هدى حركت راسها وبصت لاختها وقالت:معلش بق يا صفاء انا متضره امشي من غير ما اخدك معايا لان العربيه مش هتكفينا بما ان جعفر معانا!
صفاء حركت راسها بالموافقه وقالت:مش مهم انا يا هدى اهم حاجه خلي بالك من نفسك ومن اروي وانا هبق ارجع لوحدي.
هدى حركت راسها بالموافقه وخرجت من باب الشقه ونزلت ورا بنتها ورحمه وامها قفلوا وراهم الباب وبصوا لبعض براحه كبيره ووقتها رحمه حست وكأن حمل تقيل واتشال من علي قلبها فجريت علي اوضتها بكل فرحه وحماس علشان تتصل بعصام وتعرفه كل اللي حصل .
____________________
اروي ومامتها ركبوا العربيه بتاع والدها،
وجعفر اتحرك بيهم وفى الوقت دا كان وصل عصام ومرزوق قدام البيت واول ما اتلقي عصام مكالمة من رحمة رد عليها وقال:خير يا رحمة حصل ايه تاني!
رحمة بابتسامه:خلاص يا عصام الموضوع خلص جوز خالتي كان هنا واروي لغوشت علي الموضوع وهو صدقها ودلوقت مشيوا وراجعين اسكندريه .. كملت رحمه كلامها وقالت باشتياق لعصام:تعالى بق يا حبيبي خلاص ملوش لازمة انك تفضل عندك !
ابتسم عصام بفرحه وبص علي مرزوق اللي ماشي جمبه وكان باين عليه التعب فقال بفرحه:ماشي يا رحمه جايلك يا قلبي!
ابتسمت رحمه وعصام قفل المكالمه وبص لمرزوق وقال:البيت قدام شويه ايه مالك تعبت!
مرزوق حرك راسه بالموافقه وقال:ايوا تعبت المشوار كبير انت ايه متعبتش!
حرك عصام راسه بالرفض وقال:لا متعبتش بقولك ايه لو تعبان اقعد ريحلك شويه ولا هتقدر تكمل !
اتكلم مرزوق بقطع نفس:لا هقعد ارتاح انا مش قادر اخد نفسي!
عصام بصله بسخريه وقال:اقعد ارتاح وماله بس اقولك حاجه العروسه زمانها هتمشي اصل ابوها وصل علشان ياخدها ويرجعوا بلدهم !
وقف مرزوق بسرعه بعدما كان قعد يرتاح وبص لعصام بزعل وقال:انت بتقول ايه يلا بينا بسرعه مفيش وقت!
ضحك عصام علي شكله ووقتها فكر في خطه يخلص بيها من مرزوق ، فاتحرك عصام بسرعه ومرزوق وراه وفضل عصام يجري ومرزوق كان تعب من الجري وراه فاول ما دخلوا لمنطقه صغيره مليانه بالبلطجيه اختفي عصام في لحظة وفضل مرزوق واقف لواحده و بيدور علي عصام.
كان عصام عارف المكان وقدر يدخل من شارع مختصر علشان يرجع لبيته بأمان وساب مرزوق واقف يدور عليه زي المجنون لحدما ظهر له مجموعة بلطجيه وسأله واحد منهم :انت مين يا جدع انت وبتعمل ايه هنا في الوقت المتأخر دا ؟
استغرب مرزوق الشباب دي وقال وهو بيبص حواليه:أنا بدور علي عصام صاحبي؟
الشاب قرب منه وقال بسخريه:وعصام صاحبك دا فين ان شاء الله ،مفيش حد في منطقتنا اسمه عصام!
مرزوق وهوا بيتراجع لورا ببطئ:يبق حصل خير يا ابن عمي وانا غلط في العنوان!
الشاب مسكه من هدومه واتكلم بتحذير:تعالي هنا انت فاكر دخول الحمام زي خروجه ولا ايه انت مش عارف دي منطقة مين ولا ايه!
مرزوق اتعصب وبعد ايد الشاب وقال بضيق:انت متعرفش انا مين وابن مين ولا ايه ،نزل ايدك دي عاد بدل ما اقطعهالك انت اتخبلت في عقلك يا جدع انت؟
الشاب بص لمرزوق وضحك علي كلامه ووقتها طلع سلاح ابيض ووجهه في وش مرزوق وقال بغضب:انت اللي شكلك متعرفش انا مين علشان تكلمني اكده،انا كبير المنطقه هنا واي حد يدخل من غير اذن نقطع رقب"ته؟
مرزوق خاف من السلاح وبص حواليه بسرعه علشان يشوف عصام راح فين بس كان الشاب رفع السلاح علشان يضربه ولاكن بحركه سريعه من مرزوق كان مسك خشبه وخبط بيها الشاب خلاه يقع علي الأرض وطلع يجري بكل قوه !
صرخ الشاب وهو بيقول لرجالته يجروا وراه ويخلصوا عليه ولاكن مرزوق كان دخل في شارع ضلمه وقدر يستخبي فيه لحدما الشباب دي اختفوا من وراه ووقتها شاف شارع بيطلع علي الطريق فاتسحب ببطئ لحدما دخل الشارع واطمن ان الشباب دي مش شايفينه وقرر يهرب بكل سرعه لحدما طلع علي الطريق ووقتها وقف توكتوك وركب فيه بلغ السواق بالعنوان بتاعه والتوكتوك اتحرك بيه لخارج المنطقه؟
________________________
في بيت رحمة وصل عصام بسرعه وهو بياخد نفسه بصعوبه فخبط علي الباب واول ما رحمة فتحتله قبلها عصام بكل قوة واشتياق وفضلت رحمه حضناه بكل حب ..
بعد وقت بعد عصام عن رحمه ووقتها انتبهوا ان والدة رحمه واقفه وشيفاهم فاعتذر عصام منها وصفاء قامت وقالت لبنتها:خدي راحتك انتي وجوزك انا داخله انام في اوضة الاطفال وهرجع بكرا اسكندريه!
رحمه حركت راسها بخجل شديد وبصت لعصام وابتسمت وبعدما والدتها دخلت الاوضه وقفلت الباب عصام شال رحمة وهيا ابتسمت بخجل ودخلوا اوضة النوم.
عصام وهو بيحط رحمة علي السرير بصلها وابتسم وهيا قالت :عصام انا اترجيت اروي ما تقولش حاجه لجوز خالتي وهيا برغم زعلها مني فعلا كدبت علي ابوها علشان متأذيناش بس انا عندي ليك سؤال واحد!
عصام حرك راسه باهتمام وهيا قالت:هيا العصابه دي هتفضل ورانا ورانا كده ومش هنخلص منها؟
عصام بصلها بتفكير وحرك راسه بالموافقه وقال:بصي يا رحمة هما مختفيين من وقت ما كانو بيجروا ورا اروي وانا مش عارف بصراحه هما واحوا فين دلوقت بس اقدر اقولك ان انا هحميكي بروحي يا رحمه ومتخافيش من حاجه طول مانا جمبك!
ابتسمت رحمه لما سمعت كلام عصام وحضنته بقوهوهو ضمها باشتياق وبدأ يقبلها لانه متهناش بليلة فرحه ورحمه كانت مبسوطه برجوع عصام ليها وبتتجاوب معاه بكل اشتياق وحب .
________________
عند اروى ووالدتها كانوا قاعدين في العربيه ساكتين مش عارفين يتكلموا حتي فافتكرت اروي ماجد وبدأت تفتكر كل اللي حصل معاها وبتراجع شخصيته ووقتها سرحت اروى جامد وفضلت مركزة مع الطريق وهيا مبتسمه وبتفكر في ماجد وماخدتش بالها من والدها اللي بيكلمها وبيسألها:قوليلي يا اروى هو انتي ناقصك ايه علشان نجيبه اول ما نوصل؟
اروي كانت مبتسمه وهيا بتفتكر موقف بينها وبين ماجد ولما ابوها لاحظ ابتسامتها بص لمراته في المرايه وقال:بنتك مالها يا هدى بتضحك لوحدها ليه!
هدى بصت لبنتها ولاحظت انها سرحانه وبتضحك فقربت منها وقالت:اروى يا بنتي انتي مش سامعه ابوكي دا بيكلمك من ساعتها .
انتبهت اروى لكلام والدتها وبصت لوالدها بانتباه وقالت:خير يا بابا معلش ماسمعتش حضرتك!
والدها حرك رأسه وعاد كلامه من تاني وهيا حركت راسها وقالت:لو سمحت يابابا خلينا نأجل كلامنا دا لما نروح البيت!
والدها بص لجعفر وقال:وليه بق اوعي تكوني مكسوفه علشان جعفر معانا،دا هيبق جوزك يا قلب ابوكي متتكسفيش!
اتضايقت اروي ولفت وشها ومردتش علي والدها وجعفر وقتها بصلها من المرايه وابتسم بحزن لانه عارف انها مش بتحبه ولاكن هوا مش عارف يِفَهم قلبه كل دا، فاكتفي بانه يناظرها لثواني وبعدها رجع ركز في الطريق ووالدها وجع جسمه لورا وهو بيفكر في طريقه يقنع بيها اروي بجوازها من جعفر.
________________________
بعد مرور ٧ ساعات كان اليوم الجديد بدأ وكانت الساعه ٦صباحا..واخيرا كانوا وصلوا اسكندريه و كانت اروي ووالدتها نايمين بعمق لان مسافة الطريق كانت طويله عليهم.
واما المعلم رزق وجعفر فكانوا بيتناقشوا في الشغل طول الطريق وبعدما وصلوا قدام البيت نده رزق علي مراته وصحاها وقال:قومي يا هدي خلاص وصلنا.
هدى فاقت وبصت علي بنتها اللي نايمه في حضنها وصحتها واول ما اروى فاقت وبصت حواليها وشافت انهم قدام البيت خرجت بسرعه من العربيه ودخلت البيت!
هدى بصت لجوزها وبصت علي جعفر وقالت:معلش يا جعفر سيبنا انا والمعلم لوحدنا!
جعفر بص علي المعلم ياخد اذنه والمعلم حرك راسه ليه انه ينزل وبعدها بص لمراته وقال:بصي يا هدى انا دلعت بنتك كتير بس خلاص هيا كبرت ولازم اعاملها بجديه شويه لان الدلع دا اخرته وحشه!
هدى بصت لجوزها وقالت بزعل:يعني علشان تلغي دلعك ليها وتعاملها بجد تقوم تجوزها لواحد هيا مبتحبوش؟
رزق بجديه واضحه:هتحبه يا هدى بعدما تتجوزه وتعاشره هتحبه لان جعفر شاب محترم وانا اللي مربيه بايدي وعارفه علي ايه ومتأكد انه هيشيلها في عيونه لانه بيحبها بجد !
هدى حركت راسها باعتراض وقالت:مش كده يا رزق الحياه مش كده انت اكتر واحد عارف دماغ بنتك وبعدين انت ناسي انها مصدومه من وقت ما عمتها ماتت يعني لو ضغط عليها البنت هتروح مننا؟
رزق بزعل من كلامها:انتي بتفكريني ليه يا هدى مش كنا قفلنا الموضوع دا؟
هدى ببكاء:لا يا رزق الموضوع ماتقفلش هو مش انت اللي غصبت علي أختك تتجوز واحد من اختيارك انت وجوزتها غصب عنها وشوفت حصلها ايه بسبب جوزها اللي طلع خسع وبهدلها لحدما خلصت علي نفسها ،بق عاوز تعيد نفس اللي حصل مع اختك مع بنتك تاني!
رزق بص لمراته بضيق وقال:ما خلصنا بق يا هدي وبعدين مانا سيبتها علي مزاجها كتير واديكي شوفتي بنفسك حصلها اي دي مستهتره ومش عارفه هيا عايزه ايه..بصي يا هدي خلاصة الكلام اروي هتتجوز جعفر وانا مستحيل ارجع في كلامي؟
هدى بصت لجوزها بزعل وقالت:برضوا يا رزق مصمم تعمل اللي في دماغك!
رزق لف وشه وهيا حركت راسها بزعل منه وخرجت من العربيه وسابته قاعد يبص عليها ومتضايق من اعتراضها هيا وبنتها.
______________________
في مخزن خاص بماجد العربي في اسيوط
دخل ماجد بعربيته الفخمه واول ما شافوه رجالته رحبوا بيه بكل احترام.
فتح الحارس باب العربيه لماجد ونزل ماجد بجديه وقرب من واحد من مساعدينه وقال:هما فين ؟
المساعد وهو بيشاور علي العصابه اللي كانت بتطارد اروى وقال:هما اللي هناك دول يا ماجد بيه.
بصلهم ماجد ولقي انهم خمس رجاله وراجل كبير وفهم من شكلة انه الزعيم ، فقرب منهم وبصلهم بثقه وقال بجديه:انتوا بق مجموعه مع بعض!
بصله الكبير بتاعهم وقال:ايوا مجموعه انت مين بق علشان تحبسنا كده ؟
ماجد قرب منهم اكتر وقال:كنتوا بتجروا وراها ليه؟
المعلم چينرال اتكلم قال:انت قصدك علي المزه اللي دافعت عن عصام.
شعر ماجد بالغضب والغيرة الشديدة لما چينرال وصف اروي بالاسلوب دا فحرك ماجد راسه للكبير بتاعهم وچينرال قال بتسليه: كنا بنجري وراها علشان عجبتنا ،أصلحها جامدة أوي يا باشا الصراحة !
ماجد مقدرش يتحكم في اعصابه وصفع المعلم چينرال بقوه علي وجهه وقال بجديه:كلمة زيادة وهكون مخلص عليك يا حيوان انت!
مساعدين ماجد قربوا منه بلهفة وچينرال اتصدم من صفعة ماجد فكان هيتكلم ويرد عليه بس اتصدم لما شاف ماجد وعدد الرجالة اللي معاه فخاف منهم وقال بتراجع واستسلام:انتعاوز الحقيقه يا بيه !
ماجد بصله بغضب وچينرال قال:احنا كنا خاطفين عصام علشان مدفعش الفلوس اللي اخدها مني وهيا دخلت تدافع عنه فجأة ولما لقت انها مش قدنا هربت واحنا قررنا نجري وراها وبعدها هيا وقعت في النيل ومعرفناش نعمل اي حاجة تاني لان الرجاله دي كتفونا وجابونا هنا؟
ماجد فضل يبص في عين چينرال علشان يتأكد انه بيقول الحقيقه ، وبعد ما اتأكد ماجد ان چينرال بيقول الحقيقه سأله ماجد وقال:الفلوس اللي اخدها منك عصام دي كانوا كام!
چينرال بص علي ماجد وقال بلهفه:١٥٠ الف جنيه يا بيه!
ماجد شاور لواحد من رجالته وقال:هات ٢٠٠ الف يا هشام من الخزنه وتعالي!
الشاب حرك رأسه وخرج بسرعه من المخزن واتجه للخزنه اللي في المزرعه اللي بعيده عن المخزن بمسافه صغيره ورجع بعد ربع ساعه وهو معاه شنطة بالفلوس اللي طلبها ماجد وقرب منهم.
قرب المساعد من ماجد واداله الشنطة وماجد قرب من چينرال وقال وهو بيديله الفلوس :الفلوس دي اعتبر انك اخدتهم من عصام وعليهم ٥٠ الف جنيه زياده مني ويبق كده حقك رجعلك وانا بق لو عرفت انك قربت منه او من اي حد يخصه هجيبك ووقتها مش هخرجك من هنا عايش انت فاهم!
چينرال اخد الفلوس بلهفه وحرك راسه بالايجاب وقال:خلاص كده يا بيه والله ما هعمل ايه حاجه تاني ،اقولك علي حاجه.. انا معرفش حد اسمه عصام من الاساس؟
ماجد حرك راسه وقال لمساعدينه:فكوهم ووصلهم لمحطة القطر خلوهم يروحوا مكان ما هما عايزين!
رجالة چينرال فرحوا ومساعدين ماجد فكوهم واخدوهم ومعاهم چينرال وخرجوا من المخزن وركبوهم عربية من عربيات ماجد واتحركوا بيهم لمحطة القطار.
وعند ماجد كان واقف وبيفكر فيها وازاي خطفت قلبه بالسرعه دي فافتكر كل كلامها لما حكتله عن رحمة وعصام وشرحتله انهم غلابه وان عصام بيعمل كده علشان يفرح رحمه لانها كانت طالبه فرحها يتعمل باغلي سعر وعصام لانه غلبان وبيحبها وافق واستلف من العصابه دي علشان يعملها كل اللي هيا عايزاه وبعدما اتاخر في دفع اول عربون للعصابه قرروا يخطفوه وهيا علشان عارفه ان رحمه غلبانه وفرحتها هتتكسر قررت تروح تدور عليه بنفسها وتساعده.
ابتسم ماجد علي برائتها وبعدما اتاكد انه عمل الصح مع عصام ورحمة علشان خاطر اروي خرج من المخزن وركب عربيته واتحرك بيها .
الفصل العاشر10
دخلت والدة أروى بيتها وقربت من غرفة بنتها وفتحت الباب وشافت اروى قاعده وماسكة صورة لعمتها المتوفيه وبتبكي .
قربت هدى منها وقالت بحزن علي شكل بنتها:بتعملي ايه يا اروي ومالك يابنتي؟
اروي رفعت الصوره قدام وش والدتها وقالت ببكاء:بابا عايز يعيد اللي حصل مع عمتي تاني ،عاوز يجوزني جعفر برغم انه عارف ومتأكد اني مبحبوش وبخاف منه،عاوز يجوزني غصب عني يا ماما عاوز يخليني اعمل فنفسي زي ما عمتي الله يرحمها عملت في نفسها.
هدى بكت لما سمعت كلام بنتها فقربت منها أكتر وبكت بكل قهر علي اللي حصل لاخت جوزها واللي كانت في يوم من الايام زي بنتها ،
اتكلمت هدى وقالت برفض:لا يا اروى انا مش هسمح ان دا يحصل انا مش عارفه ابوكي مصمم ليه علي جعفر بس ورحمة ليلي عمتك مش هيحصل اللي هو عاوزة ،انا مخلفتكيش علشان تروحي مني انا مش هسيبه يجوزك متخافيش!
اروي بصت لوالدتها بفرحه وحضنتها برغم بكاءها اللي مش بيقف فطبطبت عليها وقالت:انا والله مش بحبه ياماما انا نفسي اتجوز فعلا بس شخص اكون بحبه انما جعفر لا !! جعفر دا مش مناسب ليا ،لا هو شبهي ولا انا شبهه هو بالنسبالي ارض وانا سماء يا ماما مستحيل نتجمع!
والدتها حركت راسها بتوافقها علي كلامها وفضلت تطبطب علي ضهرها بحنيه وبتهديها لحدما هديت اروى ومسحت هدى دموعها وقالت:اوعدك اني هتكلم مع ابوكي وهحل معاه الموضوع بس انتي اهدي ومتحطيش في دماغك اي حاجه لان جوازك من جعفر مستحيل يتم !
اروى حركت راسها بالموافقه واطمنت اكتر من كلام والدتها فبصت حواليها وقالت:انا هقوم اغسل وشي واغير هدومي علشان ارتاح من الطريق وانتي يا ماما قومي ارتاحي انتي كمان تعبتي!
هدى حركت راسها وقامت وخرجت من غرفة بنتها واروي قامت دخلت للحمام تغسل وشها وخرجت بعد دقايق واول ما بصت لنفسها في المرايه وشافت نفسها بالفستان اللي جابهولها ماجد افتكرت لما لبسته وهو كان مبهور من شكلها فرجعت اروى شعرها ورا ضهرها وابتسمت وغمضت عينها واتمنت من كل قلبها انه يظهر من تاني وينقذها من جوازها من جعفر زي ما عمل قبل كده لما كانت هتغرق ولما الكلاب كانوا بيطاردوها.
فبعدت اروى من قدام المرايه وغيرت الفستان ولبست بيچاما مريحه وقربت من سريرها ونامت عليه وقبل ما تغمض عينها اتمنت تاني من كل اعماق قلبها انها تقابل ماجد من جديد!
__________________
بعد مرور ساعه كان المعلم رزق قاعد علي القهوه وشرب أكتر من خمس فناجين قهوه فقام علشان يرتاح واول ما دخل للبيت افتكر كل اللي حصل لأخته الصغيره بسببه .
بعد تذكر رزق لكل اللي حصل مع أخته الصغيره خاف للحظة ان بنته يحصلها نفس اللي حصل لعمتها! بس رجع قال لنفسه:بس جعفر مش زي معتز جعفر دا انا مربيه علي ايدي وعارف اصله وفصله ،انا فعلا غلط لما جوزت اختي لواحد معرفش اصله وفصله بس جعفر مستحيل يبق زي معتز وحتي اروي مستحيل تبقي زي ليلي في فرق كبير بينهم، ليلي كانت طيبه ومسالمة ولاكن اروي عنيده وقويه ومستحيل تعمل زيها.
قال رزق كل الكلام دا لنفسه واقنع نفسه من تاني ان قراره سليم وان بنته ومراته لازم يتقبلوا قراره وميعترضوش.
بعد دقايق دخل رزق لبيته وقرب من غرفة بنته ودخل لقاها نايمه بعمق والغطا واقع من عليها ، فقرب منها غطاها وبعدها خرج من الغرفه ودخل غرفته هو وزوجته ولقاها نايمه وواضح علي ملامح وشها التعب فقرب منها وبص عليها ولما لقاها نايمه فعلا بعد عنها وبدأ يغير هدومه وبعدها نام جمبها ولف جسمه علشان لما تصحي تفهم انه لسا عند قراره ومغيروش .
___________
في المزرعة الخاصة بماجد اتفتح باب سكن العمال وبدأوا يخرجوا بالترتيب ويبدأوا شغل .
كانت نتاشا قاعده علي مكتبها وبتتصل بماجد علشان تبلغه بالاوراق اللي محتاجه تتمضي ضروري، واول ما ماجد رد عليها اتكلمت نتاشا بنبرة دلع وقالت:صباح الخير يا مستر ماجد حضرتك هتيجي المزرعه النهاردة؟
ماجد رد عليها بجديه وقال:لا يانتاشا انا واخد اجازة يومين وعاوزك تأجلي اي حاجه تخص الشغل لحدما ارجع'
نتاشا ضمت حاجبها بتساؤل وقالت:هو حصل حاجه مع حضرتك يا فندم ولا ايه ؟
ماجد بجديه:لا يا نتاشا كل حاجه تمام بس اهم حاجة اعملي زي ما قولتلك وانا مش عاوز ازعاج بسبب الشغل عاوزك تأجلي كل حاجه اتفقنا؟
حركت نتاشا راسها بالموافقه وردت علي ماجد وقالت:حاضر يا مستر ماجد انا هعمل اللي حضرتك تطلبه بس ممكن اعرف حضرتك فين دلوقت!
ماجد رد عليها بهدوء وقال:انا في اسيوط يا نتاشا محتاجه حاجه من عندي؟
حركت نتاشا راسها بالرفض وقالت:لا يا فندم متشكرة انا بس حبيت اطمن علي حضرتك!
بعد ماجد الهاتف عنه ورد عليها علشان ينهي المكالمه:طيب يا نتاشا انا هقفل ؟
نتاشا:تمام يا فندم.
فصل ماجد المكالمه وقفل تيلفونه علشان يرتاح من ضغط الشغل ويقدر يستجم شويه مع جمال الطبيعه فخرج برا الغرفه اللي قاعد فيها وبدأ يبص علي جمال الطبيعه اللي حواليه وغمض عينيه علشان يفصل دماغه من دوشة العمل والعالم .
وفي المزرعه في المنيا خرجت نتاشا من مكتبها بعدما قفلت المكالمه مع ماجد وقربت من مرجان اللي بينظف عنبر الفراخ وقالت بجديه:مرجان تعالي هنا هقولك!
مرجان اتخض اول ما سمع صوتها فرمي كل حاجه في ايديه وقرب منها بسرعه وقال بفضول:خير يا انسة نتاشا !
نتاشا اتكلمت وهيا بتبصلة بغموض:انت اتعرفت علي البنت اللي كانت مع مستر ماجد صح؟
مرجان ابتسم وحط ايديه ورا ضهره وحرك راسه بالموافقه وقال:ايوا اتعرفت عليها دي بنت لذيذه جدا!
رفعت نتاشا حاجبها بضيق وقالت:قولي يا مرجان عرفت ايه عنها بما انك اتعرفت عليها يعني!
مرجان ضحك وقال بسخريه:ولا ايه يا حاجه يا انسه كل اللي قالته انها صديقة ماجد بيه وخلاص !
نتاشا بسخريه كبيره علي كلامه:بق كل الكلام اللي حصل بينكوا دا ومعرفتش حتي اسمها اوتقرب ايه لمستر ماجد.
مرجان حس بنبرة سخريه كبيره في كلامها فقرب منها وقال قدام وشها:انتي عاوزه تعرفي ايه وانا اقولك،بلاش الدخله دي يا انسه داحنا عشرة وفاهمين دماغ بعض كويس اوي!
نتاشا رجعت خطوه لورا وبعدته عنها وقالت باحتقار:ابعد بس عني كده الاول ومتقربش مني كده تاني انت فاهم!
مرجان رفع حاجبه بضيق وكان بيلف جسمه علشان يمشي بس نتاشا منعته بايديها وقالت:خلاص استني متزعلش،قولي بس هيا في حاجه بينها وبين مستر ماجد غير انهم اصدقاء!
مرجان لف بجسمه وحرك راسه بجديه وقال:معرفش روحي إسأليها!
نتاشا بزعيق علشان تخليه يتكلم ويحكيلها: ما خلاص بق يا مرجان دي مش اول مرة اتكلم معاك كده يعني ما انت عارف اني اسلوبي كده،قولي تعرف ايه عنها وخلصني!
مرجان ضم ايديه الاتنين لصدره وقال:ماشي يا نتاشا هقولك علشان اريحك،هو مفيش علاقه بين الانسه اروي وماجد بيه بس انا حابب اطمنك واقولك ان قريب هيبق فيه لان في نظرات وغيره من الطرفين!
اتصدمت نتاشا وبصتله بخضه وقالت:انت بتتكلم بجد يا مرجان،مين دا اللي بيغير وبيبص على التاني!
مرجان وهو بيبعدها عنه وبيقول:ابعدي عني بس كده الاول ،بصي يا انسه البنت واضح انها معجبه بماجد بيه انما ماجد بيه بق.. سكت مرجان فاتكلمت نتاشا بزعيق:انما ايه يا مرجان ما تتكلم'
مرجان ضحك وقال:شكل ماجد بيه معجب بيهاهو كمان!
حست نتاشا بقلبها هيقف عن العمل وبصت علي مرجان اللي بيضحك وقالت بزعيق:خلاص يا مرجان امشي دلوقت من قدامي وكمل شغلك'
مرجان مشي من قدامها لانه عارف انها مجنونه وممكن تطلع غضبها عليه فقرر يسيبها تتغاظ لوحدها وفضل يكمل تنظيف وهو بيضحك لانه عارف انها زمانها بتغلي من اللي سمعته ولانه عارفها وفاهم دماغها كويس فضل يبص عليها من بعيد وهو متأكد انها مش هتهدي النهاردة وهتنكد علي كل عمال المزرعه ،فابتسم تاني وهو راضي عنها وبعدها بص للفراخ اللي قدامه وضحك وبدأ يكمل تنظيف.
وفعلا نتاشا كانت متضايقه جدا من اللي عرفته وبدا الكره اللي في قلبها لأروي يكبر ويزيد اكتر وبدأت تحس انها عاوزه تنتقم منها لانها قربت من ماجد ودا مش من حقها…
وعلشان تعرف تفكر وتاخد قرار قررت ترجع بسرعة لمكتبها علشان تحط خطه تبعد اروي عن ماجد قبل ما تاخده منها!
____________________
في مساء نفس اليوم صحيت اروي من نومها وبصت في الساعه لقت انها ٨ مساءً،فقامت علشان تشوف اهلها وتاكل لانها جعانه .
واول ما دخلت للمطبخ شافت اللي خلاها تصرخ بكل رعب..
كان جعفر واقف وبيشوح لحمه وكان جسمه ضخم لدرجه انها فكرته عفريت فبعدت كام خطوه وهيا بتصرخ من شكله ومستغربه هو بيعمل ايه في بيتهم في الوقت دا.
لما انتبه جعفر ليها ساب اللي في ايديه وقرب منها علشان يطمنها وقال:اهدي يا انسه اروي متخافيش دا انا جعفر!
اروي بهمس:ماهو دا اللي مخوفني انك جعفر يا جعفر!
اتصدم جعفر وقبل ما ينطق بأي كلمه كان دخل المعلم رزق وقال بخضه:في ايه يا جعفر ،في ايه يا اروي يا بنتي بتصرخي ليه!
اروي بصت لوالدها وقالت بتساؤل مليان بالغضب الشديد:بابا هو جعفر بيعمل ايه هنا ،هو مش حضرتك مانع اي حد غريب يدخل هنا؟
ابتسم رزق وقال وهو بيبص علي جعفر بحي:بس جعفر مش غريب يا أروي جعفر بق من العيله دي خلاص وكلها اسبوع وهيبق جوزك ومن حقه يدخل دا البيت بيته!
اروي اتكلمت بصدمة وهيا بتبص لجعفر بكره:بيته ايه وجوزي ايه انا مش هتجوزه يابابا ارجوك متضغطش عليا انا مبحبوش ومش عاوزه اتجوزه ؟
جعفر بصلها بزعل ووقتها والدها رد عليها بضيق:انا مش قلت ان ممنوع اي اعترض وبعدين عيب اللي بتقوليه دا ..جعفر دا هيبق جوزك في يوم من الايام؟
صرخت اروي بعصبيه وقالت :مش هيبق ومستحيل يبق يابابا ارجوك متعملش فيا كده ..بصت اروى لجعفر وقالت بضيق :جعفر انت عارف اني بخاف منك ومش بحبك ليه بق مصمم تتجوزني غصب عني !
جعفر بصلها وعيونه مغرمه بيها وقال:بس انا بحبك يا اروي واوعدك اني هشيلك في عيوني ومش هخليكي محتاجه اي حاجه نهائي!
بصتله اروي بعصبيه شديدة وقالت وهيا بتضرب رجليها الاتنين في الارض وبتتحرك من قدامهم :يووه بق دا انا مش هخلص،انا داخله اوضتي يابابا وبرضوا مش موافقه '
قالت كلامها ومشيت من قدامهم بسرعه وفضل رزق يخبط علي كتف جعفر وبيقول علشان يواسيه :متزعلش منها يا جعفر دي لسا صغيره ومتعرفش حاجه ،بكره تعقل وتفهم انك بتحبها بجد وان اختياري ليها كان احسن اختيار!
جعفر حرك راسه بحزن وقال:بس انا مش شايف كده يا معلم ،دي مش طيقاني حتي ولا طايقه تسمع صوتي!
المعلم رزق بص علي باب اوضة بنته ورد علي جعفر وقال:مش بقولك لسا صغيره ومش فاهمه حاجه،بص لجعفر وكمل كلامه:انت الانسب ليها يا جعفر وبحُبك ليها هتخليها تحبك غصب عنها!
ابتسم جعفر علي كلام معلمه وحرك راسه بالموافقه ودخل للمطبخ تاني وبدا يكمل اللي كان بعمله .
________________
في غرفة اروى كانت قاعده وهيا متعصبه لانها مش عايزه مصيرها يبق زي مصير عمتها اللي اتغصبت علي الجواز من شخص هيا مبتحبوش ولاكن بسبب ضغط اخوها حاولت تتعايش وتحب جوزها لحدما اكتشفت انه مريض نفسي وبيعذبها لحدما من قهرتها علي حالها انهت حياتها بايديها.
ففكرت اروي وخافت ليحصلها زي ما حصل ما عمتها فقالت بحزن : نفسي اتجوزالشخص اللي قلبي يحبه ويكون مناسب ليا مش جعفر اللي انا مش بحبه ولا عمري تخيلت اني هتعامل معاه من قريب.
انكرت اروى كل كلام والدها ومسكت هاتفها علشان تبحث عن ماجد علي الانترنت ،واول ما كتبت في البحث مزارع العربي للمواشي،ظهر ليها صور لكل المزارع اللي بيمتلكها ماجد ولقت صور ليه كتير وهو لابس بدله رسميه ولاكن ملامحه مش باينه اوي بسبب النظارة السوداء اللي بيكون لابسها .
ابتسمت اروى بتلقائيه أول ماشافت صور ماجد الكثيرة وفضلت تقلب فيها لحدما شافت صورة ليه مع نتاشا فضمت حاجبها بضيق شديد وقفلت الموبايل وبدات تشعر بالغيرة الشديده ،وبرغم انها متعرفش ماجد غير من ايام بسيطة الا انها بدات تحس بمشاعر جديدة عليها من بعد ما قابلته.
دقايق وكانت اروى هديت واخدت هاتفها من تاني وبدأت تقرأ كل الكلام الي مكتوب عن ماجد وانبهرت بكمية التقديرات اللي اخدها وعرفت انه فعلا مش شخص عادي ،فابتسمت لانها فخوره بيه وبعد ما اتفرجت علي كل صوره قفلت موبايلها وبصت في الساعه ولقت انها ٨ ونصف.
فقامت اروى غيرت هدومها بسرعه علشان تنزل تشتري شوية مستلزمات ليها من السوبر ماركت وبعدما جهزت وخرجت من غرفتها لقت والدها وجعفر قاعدين علي السفره بياكلوا ،فتجاهلت اروي انها تبصلهم واتجهت عند الباب وقبل ما تفتحه والدها سألها بفصول:رايحه فين يا اروى!
جعفر بص عليها بلهفه وهيا ضمت عينيها واتكلمت بهدوء وقالت:هشتري حاجه من السوبر ماركت يابابا!
والدها حرك راسه وقال باعتراض:لا خليكي وانا هجبلك اللي انتي عاوزاه متتعبيش نفسك!
ردت اروي باعتراض هيا الأخرى وقالت:لا يابابا لو سمحت دي حجات بنات وعاوزه اجيبها بنفسي!
بصلها جعفر بحب كبير ووالدها حرك راسه ليها وقال لجعفر:روح مع خطيبتك يا جعفر متسيبهاش تروح لوحدها!
زفرت اروي بضيق وقالت باعتراض:يابابا بق مش كل حاجه كده !
ابتسم جعفر وحرك راسه بالموافقه وقام وقرب بسرعه من اروى وكان فرق الطول بينهم كبير جدا ،فهمس ليها وقال:يلا بينا يا اروي اتحركي!
حركت اروي راسها بغيظ وخرجت من البيت وجعفر وراها واول ما مشيوا في الشارع وشافوهم زمايل جعفر في الشغل بدأوا يباركوله لانه بلغهم انه هيتجوز اروى بنت المعلم وكانوا كلهم فرحانين ليه .
جعفر كان ماشي وبيرد علي المباركه من زمايله وهو مبسوط ولاكن اروي مكانتش طيقاه ولا طايقه تسمع إسمه فاستغلت انه بيحضن واحد زميله وقررت تتحرك من قدامهم بسرعه وتروح تجيب طلباتها من غير ما يروح معاها ، وبالفعل جريت اروي بسرعه وسابت جعفر اللي اول ما انتبه ليها وشافها بتجري علشان تستخبي منه بصلها بحزن وقرر يسيبها علي راحتها ويفضل مكانه وميروحش وراها .
وعند اروي كانت وصلت للسوبر ماركت واول ما دخلت بدات تجيب كل طلباتها بسرعه علشان ترجع البيت من غير ما جعفر يشوفها ويتلزق فيها .
واول ما قربت من الكاشير علشان تحاسب سمعت صوت من وراها بيتكلم مع الشاب الي قاعد علي مقعد الكاشير وبيقول:لو سمحت المربي دي في منها كميه ولا دي اخر علبه!
الشاب حرك راسه بالرفض:لا والله يا فندم دي اخر علبه.
استغربت اروي نبرة الصوت اللي كانت مميزه جدا وكأنها عارفاها فقررت تتجاهل الفكرة اللي جت في دماغها ولاكن الشخص دا اتكلم تاني وقال:طيب متعرفش لو سمحت فين بيت المعلم رزق الجندي.
فتحت اروي عيونها من الصدمة ولفت علشان تشوف مين دا اللي بيسأل عن والدها واول ما شافته استغربت.
كان شاب لابس بدلة رسميه ونظارة طبيه فرفعت اروي حاجبها وكانت هتسأله هو مين وبيسأل عن بيتهم ليه ولاكن الشاب اللي في السوبر ماركت شاور علي اروي وقال:الانسه اروى تبق بنت المعلم رزق تقدر تتكلم معاها!
الشخص دا بص لأروى وحرك راسه ليها وقال بدهشه:بجد والله ازيك يا انسه اروي!
حطت اروي كل الحجات اللي كانت ماسكاها علي طاولة الكاشير وبصت للشخص دا بتركيز وقالت بهدوء:الله يسلمك،مين حضرتك !
الشخص ابتسم وقال:انا رامي ابن الحاج تيسير الله يرحمه !
اتصدمت اروي وهيا بتبص لصديق طفولتها رامي اللي كان جارها في بيتهم القديم فابتسمت وهيا بتشاور عليه وبتقول بصدمه:انت رامي..رامي شقاوة صح!
أبتسم الشاب وحرك راسه وقال باعجاب شديد:متغيرتيش يا اروي انتي لسا زي زمان!
خجلت اروي وبصتله باهتمام وقالت:انا كنت عرفت من بابا انك سافرت مع والدتك من زمان انت لسا راجع من بره ولا اي!
حرك رامي راسه ووقتها الكاشير حسب حجات اروي وقالها علي السعر فقبل ما تحاسب كان طلع رامي الفلوس وحطهم علي مكتب الكاشير واخد الكيس اللي فيه الطلبات وقال:خلي الباقي علشانك'
ابتسم الشاب واروي اتصدمت وقالت:ايه اللي بتعمله دا بس يا رامي مينفعش.
خرج رامي وشاورلها تخرج وراه وفي خلال ثواني كانت خرجت اروي فلقت رامي واقف قدام عربيه فخمة جدا ومستنيها وهو مبتسم ،فقربت اروي منه وهيا مستغربة كل اللي هيا شايفاه فقالت:اي دا يا رامي انت بقيت مليونير ولا ايه؟
ضحك رامي على كلامها وحرك راسه بالرفض وقال:تعالي اركبي بس علشان توصليني لبيتكم لاني جاي مخصوص لعمي رزق..ويا ستي انا هحكيلك كل حاجه في الطريق!
حركت اروى راسها بالموافقه وقربت من العربيه وركبت وهيا مزهوله ورامي ركب بعدها واول ما شغل رامي العربيه كانت اروى مركزه معاه جدا وهو اول ماشافها بصاله بنظراتها البريئة دي ضحك وقال بهمس:زي القمر!
انتبهت اروى لكلامه وهو ابتسم وقال:همشي من اي اتجاه!
رفعت اروي دراعها توصفله الطريق وهيا حزينه وهو حرك راسه بالموافقه واتحرك بالعربيه وبصلها لما لاحظ الحزن اللي علي وشها سألها وقال:انتي كويسه يا اروي ؟
حركت اروي راسها وقالت: انا كويسه بس انت هتلحق تحكيلي عنك حاجه قبل ما نوصل ،اصل المسافه مش كبيره!
حرك رامي راسه بالموافقة وبصلها وقال:والله يا اروى انا قصتي بسيطة ،كل الحكايه اني ماسك ادارة مزارع مواشي ودواجن في دبي وبسبب مهارتي قدرت اوصل للثراء دا بسرعه!
ضحكت اروي علي كلامه وسألته باهتمام:وياتري بق مزارع ايه اللي تخليك تبقي بالثراء الفاحش دا .. اسمها اي!
ابتسم رامي وقال: مزرعة M,A,E !
استغربت اروى من اسم المزرعه وقالت:بس كده ،هو دا اسمها!
ضحك رامي وهو بيحرك راسه وهيا عدلت نفسها وقالت بانبهار من اللي وصله رامي:هايل يا رامي والله شاطر انك قدرت تنجح في حياتك!
ابتسم رامي وسألها بفضول:قوليلي بق يا اروى انتي حساتك عامله ايه ،اتخرجتي من كلية ايه ولا بتشتغلي ايه!
كانت اروى هترد عليه ولاكنهم كانوا وصلوا قدام بيت اروي وكان جعفر واقف قدام البوابه ومستني اروي ترجع واول ما اروي شافته اتخضت ورامي سالها بفضول لما شافها مركزه علي البيت : هو دا البيت!
اروي حركت راسها ورامي دقق في تفاصيل البيت باعجاب واول ما عينيه جت علي جعفر سألها تاني وقال باستغراب:دا مين الجته دا يا اروي اللي واقف قدام البيت بتاعكم بالشكل دا!
بصت اروي علي جعفر بضيق ورجعت بصت لرامي وقالت:دا بق يا سيدي الدراع اليمين بتاع بابا ، وبابا ومصمم يجوزني ليه وعلشان كده انا حزينه علي حالتي ومليش نفس اواجه الحياه؟
اتصدم رامي وبص علي جعفر وهو مزهول من شكله لان شكله في الطبيعي يخوف فعلا فرجع بص لاروي وقال:بصراحه دا شكله مرعب بس انتي هتعملي ايه !! معقول هتتجوزيه'
عيون اروي دمعت وحركت راسها بالرفض وقالت بزعل:لا طبعا انا مش موافقه انا بتمني حد يخلصني من اللي انا فيه دا لان بجد لو الجوازه دي تمت انا هيحصلي حاجه وهروح فيها!
بص رامي عليها بتفكير وقال:طيب بقولك ايه انزلي وانا هنزل وراكي علشان اقابل والدك ونبق نشوف حل للموضوع دا مع والدك انا هتكلم معاه.
اروي حركت راسها بفرحه ونزلت ووقتها جعفر انتبه ليها ولما شاف انها كانت راكبه عربيه مع شاب غريب ،بدأ الدم يغلي في عروقه والغيره الشديدة تظهر علي ملامح وشه ومن غير وعي جعفر قرب منها وصفعها علي وشها وهو بيقول بكل غضب :ازاي يا قليلة الربايه انتي تركبي عربيه مع واحد غريب ومش محترمه حتي انك قريب اوي هتبقي علي ذمة راجل!
القلم كان قوي لدرجة انه خلي اروي تتخبط في العربيه ولما رامي شاف اللي حصل هجم علي جعفر وهو بيتخانق معاه بكل غضب لانه مد ايديه علي اروي بقوه .
وفي الوقت دا بدأت اروي تفوق وتنتبه للي حصلها ولما استوعبت ان جعفر ضربها بالغباء دا وهو ملوش الحق انه يعمل كده فضلت تصرخ بجنون ولما والدتها سمعتها من داخل البيت قامت تشوف اللي بيحصل واتصدمت لما شافت بنتها من البلكونه بتصرخ بهستريا فجريت بسرعه ندهت علي جوزها بخضة ولما شاف المعلم رزق حالة مراته سألها بخضه :ايه اللي حصل!
هدى بغضب:بنتك بتصرخ تحت يارزق مش عارفه حصلها ايه .
قالت هدى كلامها وجريت علشان تخرج من البيت والمعلم رزق خرج بسرعه وراها ونزلوا الاتنين بسرعه يشوفوا حصل اي مع بنتهم تحت.