رواية اول مره احب الفصل الثالث3 والرابع4 بقلم شيماء صبحي
كنت لسا بقلع التيشرت علشان البس الفستان مكانه فجاه سمعت صوت خبط على الباب وصوت طفل بيقول:افتحي يا ماما،انا خايف اكون لوحدي؟
استغربت اوي هو الطفل دا يقصد مين فقربت من الباب علشان اسمع الصوت كويس لقيت الصوت اختفي فجأة ومفيش اي دوشه برا ..فرجعت تاني اغير هدومي وفعلا لبست الفستان؟
وفي شقة رحمة وعصام كانوا اهل اروي متجمعين وبيبصوا علي عصام بشك'
اتكلم عصام وهو بيخفي توتره :انا معرفش هيا فين صدقوني ،مش انا قولتلكوا دوروا عليها كويس؟
ردت والدة اروي بغضب:وهيا اروي صغيرة علشان تتوه من وسطينا،اخر حاجه رحمة قالتها انها خرجت علشان تدور عليك ،يبق اكيد حصلها حاجه ما انت مبيجيش من وراك غير المصايب؟
اتوتر عصام وبص لرحمة واللي كانت قاعده وبصاله وساكته فقام عصام وقف واتكلم بعصبيه:يعني ايه ،يعني انتو شايفين ان انا السبب في اختفائها مش ممكن تكون هربت ؟
والدة اروي بشك كبير :ايوا انت ،انت السبب اروي مش ممكن تعمل اي تصرف زي دا وهتهرب تروح فين وليه دي كانت قاعده في الفرح زي الفل واخر مره شوفتها لما كانت حاضنة رحمة وبعدها مشيت ومرجعتش تاني وانت اللي ظهرت وكان شكلك غريب ومش طبيعي؟
والدة رحمة واللي هيا خالة اروي اتكلمت علشان تدافع عن اروي:انت شكلك اتجننت يا عصام تقدر تقولي انت اختارت الشقه دي ليه وبالذات في القريه الغريبه دي وكمان جاررنا وراك من الاسكندريه لهنا علشان ايه.
بص عصام لرحمه علشان ترد علي والدتها وبالفعل رحمة اتكلمت وقالت وهيا بتدافع عن جوزها عصام:ايه يا ماما هو انتوا كلكوا عليه انا عارفه ان اروي بنت خالتي عاقلة ومش بتاعت الحركات دي بس ليه مش قدامكوا غير عصام،
عصام قالي انه مقابلهاش يبق دا معناه انها تاهت او حاجه انا اوعدك انه هينزل ويدور عليها بنفسه وان شاء الله هيلاقيها؟
عصام اتصدم من كلام رحمه وبصلها بتحذير وقال:مينفعش يا رحمه هنزل فين انا عريس والنهاردة صباحيتي؟
وقفت والدة اروي واتكلمت بغضب :اسمع بق انا ميهمنيش كل الكلام دا انا بنتي لو مرجعتش لحضني النهارده انا هبلغ ابوها وانت بق عارف هو هيعمل فيك ايه؟
اتوتر عصام اكتر لان والد اروي جزار كبير وعصبي وممكن يطير رقابته فقال بموافقه:حاضر هنزل ادور عليها بنفسي بس بالليل مش علي الصبح كده ؟
رحمة قربت من عصام ووقفت قدامه وقالت بابتسامه متوتره:ماما انتي وخالتي واقفين كده من امبارح ارتاحوا في اوضة الاطفال وعصام خلاص قالكم انه هينزل ويدور عليها بالليل!
والدة اروي واختها بصوا لبعض وحركوا راسهم بالموافقه وقاموا علشان يرتاحوا واول ما دخلوا الاوضة رحمة قربت من عصام وقالت بخضه:عصام هيا اروي حصلها ايه بجد؟
اتكلم عصام بعصبيه:برضوا يا رحمة انتي كمان شاكه فيا!
رحمة مسكت ايديه وقالت بحزن:تعالي ندخل اوضتنا علشان نتكلم وتشرحلي كل حاجه وانا هساعدك!
بصلها عصام للحظة وهيا حركت راسها بثقه علشان تطمنة وقالت :ثق فيا دانا بير اسرارك يا عصام؟
عصام حرك راسه بالموافقه ودخل معاها لغرفتهم وبدأ يحكيلها كل حاجه وقال بقلق:انا متاكد انهم مسكوها واكيد دلوقت عملوا فيها حاجه!
رحمة شهقت بخضة وحطت ايديها علي صدرها:يا لهوي يا عصام وانت ازاي تسيبها في وضع زي دا لوحدها وتهرب؟
عصام بخوف علي نفسه:يعني كنت هعمل ايه يا رحمة ما انا فكرت في نفسي برضوا دول كانوا هيصفوني وكنت هخسر كل حاجه عملتها وانتي اكتر واحدة عارفه قد ايه انا تعبت لحدما جمعت كل الفلوس دي عشان نتجوز ؟
رحمه ضربت كف بكف ووقفت وهيا هتتجن فقربت منه وقالت:امي وخالتي مش لازم يعرفوا حاجه عن الكلام دا وانت تنزل زي ماتفقنا تدور عليها،ويارب تكون عايشه انا برضوا مش هستحمل ان يكون حصلها حاجه دي مهما كانت بنت خالتي ؟
عصام حرك راسه بخوف:بس انا كده ممكن ما ارجعش يا رحمه اصل هما لو شافوني تاني هيخلصوا عليا انا كمان؟
رحمه بخوف علي جوزها واروي:طيب يا عصام والحل ايه خالتي لو عرفت الكلام اللي انت قولته دا هتخلي جوزها يخلص عليك ،وانا مش عايزه اخسرك وفي نفس الوقت مش عايزه اخسر بنت خالتي انت برضوا عارف اننا متربيين مع بعض وانا بعتبرها زي اختي !
عصام حرك راسه وقال:خلاص يا رحمة انا هنزل وهحاول اعرف اي معلومات عنها وادعيلي بق ميصفونيش علشان انا متهنتش حتي باي حاجه لسا،يارب علي النحس اللي انا فيه؟
رحمه قربت منه وقالت:وهتخليها نحس ليه قوم احنا لسا بدري والليل لسا قدامه كتير؟
عصام بصلها بدهشه وقال:اقوم ايه ياعني انتي موافقه ندخل دلوقت يا رحمه؟
رحمه بخجل:ايوا وماله يا عصام دي مهما كان ليله دخلتنا برضوا ودا حقنا وحلالنا ؟
عصام حرك راسه بالموافقه وقرب منها بتوتر وقال:طيب اقفلي الباب كويس علينا علشان انا مش ضامن امك او خالتك المجنونه دي يدخلوا علينا فجاه زي ما عملوا امبارح ويخربوا الليلة علينا!
ضحكت رحمه وحركت راسها وقربت من الباب وقفلته ورجعتله تاني وقالت:استناني هنا هدخل اغير هدومي بسرعه واجيلك!
عصام هز راسه بالموافقه وهيا دخلت للحمام تجهز فيه وهو كان قاعد علي السرير وبيفكر في كل اللي حصله واتدبس فيه ‘
عند اروي كانت قاعده علي السرير وهيا مش عارفه هيا بتعمل ايه هنا ومين اللي انقذها وجابها للمكان الغريب دا ؟
فـ عدي وقت كبير عليها وهيا لسا قاعده مكانها وفجأة لقت الباب بيتفتح عليها وبتدخل الست الأنيقة المبتسمه ومعاها طاولة صغيرة متحركه وحاطه عليها أكل شكله شيك و لذيذ وبتقرب من اروي اللي قاعده علي السرير وبتقول بابتسامه:ازيك يا هانم دا فطار حضرتك ؟
اروي قامت بسرعه لما لقت ان الباب اتفتح وجريت منه من غير ما تقول اي كلمة واول ما شافتها الخادمه اتصدمت وخرجت بسرعه من الاوضة ودخلت لمكتب صاحب القصر بسرعه وقالت:البنت هربت من الاوضة اول ما فتحت الباب يا فندم ؟
اول ما سمع كلامها قام من علي الكرسي وقال بجديه:طيب بلغي كل الحراس يأمنوا القصر كويس وبلغي الخدم محدش يقرب منها وسيبوها تلف في القصر براحتها؟
حركت الخادمة راسها وقالت بفضول:حضرتك مش هتقابلها بنفسك !! اصلها بتسأل عليك ؟
وقف وحرك راسه بالرفض وقال:هقابلها بس لما الاقي الوقت المناسب ،اتفضلي انتي ارجعي لشغلك واعملي اللي قولتلك عليه!
حركت كبيرة الخدم راسها ومشيت من قدامه والشخص دا عدل هدومه بطريقة راقيه وخرج من غرفة مكتبه واتجه لنفس الطريق اللي جريت منه أروي؟
كنت بجري في القصر بكل سرعه علشان اهرب من المكان دا لإني مش مرتاحه فيه لأنه هادي جدا والمعامله فيه غريبه فـ كنت خايفه اوي ومش مطمنه وبصراحه لقيتها فرصه اول ما الباب اتفتح وقررت اهرب ..
فكنت بجري والخدم دول بيبصولي وساكتين اتفجأت انهم هاديين برغم انهم شايفيني بعدي من قدامهم ومش بيمسكوني زي ما عملوا قبل كده فقربت من البوابه ووقتها حسيت ان دي فرصتي للهروب ولسا بفتح الباب لقيته مقفول فبصيت حواليا بإحباط شديد وبصتلهم وعرفت ليه كانوا هاديين كده وهما شايفني بهرب ، فصرخت في وشهم بغضب وقولت:مين اللي حابسني هنا ..سكتوا ومحدش رد عليا فاتحولت صرختي لبكاء وقولت:انا عاوزه اخرج من المكان دا وارجع بيتنا؟
قولت كلامي وقعدت علي الارض وبدأت ابكي بكل قهر علي حالتي ومكنتش قادره استوعب اني لحد دلوقت مختفيه عن ماما وزمانها منهارة دلوقت علشاني..
وفي وسط ما انا قاعده علي الارض وببكي فجاه سمعت صوت خطوات هاديه ورجوليه بتقرب مني فرفعت عيني وببص حواليا لقيت الخدم بيبصوا في الاتجاه اليمين وواضح عليهم الدهشه من رؤية الشخص دا فبصيت عليه بفضول ولقيت انه شاب شكله راقي جدا ولابس هدوم هاديه وباين عليه كده انه صاحب القصر فقمت بسرعه من مكاني وانا بقرب منه وبقول بلهفه:انت صاحب القصر دا صح ،، سكت ومردش عليا فقربت منه ومسكت دراعه وهزيته وانا بقول بضيق:انت ساكت ليه رد عليا؟
اول ما عملت كده سمعت صوت شهقات حواليا من الخدم والحراس اللي موجودين وكله كان بيبصلي بصدمه وكأنهم مش مستوعبين اني لمسته اصلا فبصيت لملامحه بتركيز وحسيت اني شوفته قبل كده فكان لابس نظاره باللون الاسود مخبية عيونه فضميت حاجبي وانا بقرب من وشه وبقول:هو احنا اتقابلنا قبل كده!
بعد عني وشاور لكبيرة الخدم تقرب مني وانا اول ما لقيتها بتقرب مني ومعاها الفريق بتاعها دا خوفت من شكلهم وقربت منه مسكت جامد فيه وقولت برفض:لا والنبي متخليهمش يكتفوني كده تاني،كملت بوجع:ايديهم تقيله وبيوجعوني؟
انا قولت كلامي وكنت ماسكه في هدومه من ورا ووقتها الخدم كلهم وقفوا لما شافوني وهوا كمان كان مصدوم ومش مصدق ايه اللي انا بعمله دا وازاي تجيلي الجرأة إني المسه او حتي أقرب منه ..
انا اول ما استوعبت اني حضناه بعدت عنه وانا بعتذر منه وبقول:انا اسفه مش قصدي احضنك انا بس من الخوف ..كملت بكل توتر وقولت:دا كان رد فعل سريع مني يعني ومش قصدي خالص احضنك بالشكل دا !
مكانش بيرد عليا ودي الكارثه انه مش بيرد لان تجاهله وصمته دا كان بيجنني فاتعصبت تاني عليه وقولت:هو انت اخرس بق ولا ملكش لسان ترد عليا بدل ما انا واقفه زي الهبله كده وبكلمك وانت مش بترد عليا!! ايه فاكر نفسك مين علشان تتغر عليا دا انت ..سكت للحظة وانا بفكر اقوله ايه يخليه ينطق وكملت:انت مجرد واحد زيك زي اي حد عادي يعني وحتي شبه حمام النيكوبار كده؟
اول ما قولت كلامي بصلي بدهشه كبيره وللحظة حسيت انه هينفجر بسبب ضغط الدم اللي اتكون في راسه.
فـ بدأ يقرب مني بخطوات بطيئة وانا كنت برجع لورا لحدما كنت هقع فمد ايديه مسكني من ضهري قبل ما اقع ووقتها الخدم كانوا باصين علينا ومزهولين فقربت من ودنه وقولتله وانا بخطف نظرة علي الخدم بسرعه :يرضيك الفراخ البيضة المبتسمة دي يتفرجوا علينا واحنا في الوضع دا؟
اول ما قولتله كلامي حرك راسه وبصلهم ووقتها اتعدلوا وبصوا في الأرض فرجع بصلي وانا كنت بدقق في النظارة بتاعته علشان استكشف هو مين من شكل عينيه .
اتكلم وقال بصوته الرجولي اللي مليان بالجديه: انتي اسمك ايه؟
اول ما سمعت صوته كان نفسي ازغرد او اصدر اي علامة من علامات الفرحه لاني بجد بقالي كتير مستنيه حد عاقل اكلمه فرديت عليه وقولت:اسمي اروي ؟
حرك راسه وقال:انتي كنتي بتهربي من ايه امبارح خلاكي منتبهتيش لطريقك ووقعتي في النيل زي شكارة الرز؟
اول ما قال كلامه بصتله بصدمه وعرفت خلاص ان هو اللي انقذني فقولت بتوتر:هو انا لازم اجاوب علي سؤالك دا؟
قربني منه شويه وحرك رأسه وقال بجديه:جوابك هو اللي هيحدد ردي عليك ولو عاوزه اجابه علي كل أسألتك يبق لازم تقولي الحقيقه
الفصل الرابع
قربني منه شويه وحرك رأسه وقال بجديه:جوابك هو اللي هيحدد ردي عليكي ولو عاوزه اجابه علي كل أسألتك يبق لازم تقولي الحقيقه!
بلعت ريقي بتوتر وقولت:مينفعش اقولك الحقيقه علشان دا سر ومينفعش اقوله لحد؟
ضم حاجبه واتكلم بضيق:يعني مجموعة رجالة مسلحة بتطاردك في نص الليل وتقوليلي الموضوع سر!!ايه السر في كده؟
اتوترت اكتر وقولت بضيق:متضغطش عليا لو سمحت انا مش هينفع اقولك اي حاجه وبعدين انت مين وازاي تمسكني كده؟
بصيت لايديه اللي ورا ضهري وهو اول ما انتبه لنفسه ساب ايديه وانا لحقت نفسي بسرعه قبل ما اقع تاني !
بص علي كل الخدم واتكلم بصوت واضح:كله يرجع لشغله ومش عاوز اشوف حد واقف هنا؟
اول ما قال كلامه كل الخدم بالحراس اللي كانوا واقفين اختفوا في لحظة وفضلت أنا وهو نبص لبعض وكانت نظراته ليا مش مفهومه..
مشي من قدامي من غير ما يقول اي حاجه تاني وانا اتضايقت منه برضوا لانه مجاوبش علي سؤالي لما سألته هو مين وانا فين ..فـ جريت وراه ومسكته من دراعه وقولت بضيق:استني انت مردتش عليا؟
بصلي بضيق وقال :وانتي مقولتيش الحقيقه؟
بعدت عنه ورفعت حاجبي بغيظ:انا قولتلك ان دا سر خاص بحد تاني يعني مينفعش اقوله لحد غريب زيك انا معرفوش؟
سابني ومشي تاني لما سمع كلامي فقررت مروحش وراه لحدما عرفت هو دخل فين فاخدت نفسي وبدأت استجمع قوتي وروحت بعدها وراه .
"كانت غرفه واضح انها كبيرة لان الباب بتاعها كبير فقربت من الباب دا وخبطت عليه بس حسيت ان صوت الخبط مش واضح اصلا فقررت ادخل واشوفه بيعمل ايه في الغرفه دي واول ما فتحت الباب ودخلت..الباب اتقفل ورايا بقوه وفضلت واقفه ابصله وهوا خارج من الحمام ولافف الفوطة بس علي نص جسمه السفلي وبقيت جسمه العلوي باين وعضلات جسمه كانت شكلها مثير؟
اول ماشافني رفع حاجبه باستغراب وانا فتحت بوقي من الصدمه لانه مكانش لابس النظارة ووقتها عرفت انه نفس الشاب اللي كان في الغرفة الثانيه اللي شوفته الصبح!
اتكلم بغضب وقال:انتي اتجننتي ازاي تدخلي الاوضه دي انتي مش عارفه ان ممنوع اي حد يدخلها؟
رديت عليه بتساؤل وقولت:اي حد مين ..قصدك الخدم؟
حرك راسه وانا ابتسمت ورديت:بس انا مش من الخدم يبق مسموح ليا ادخلها عادي؟
اتعصب جدا من كلامي وبدا يقرب مني وانا وشي كان بق باللون الاحمر فرجعت كام خطوة لورا وسندت علي الباب وهوا كان بيبصلي بنظرات كلها تحذير وضيق بسبب اني دخلت الغرفه بدون اذنه، فقرب جدا مني لدرجه انه مفيش بينا فاصل غير حوالي عشرة سنتي فغمضت عيني بخجل وهو بصلي جامد في وشي وضغط علي زرار فتح الباب وانا خرجت برا وبعدها قفل الباب تاني بكل نرفزه!
انا كنت واقفة مصدومه ومش مصدقه اللي حصل معقوله الدنيا اتطورت اوي كده ،خبطت علي الباب تاني وفضلت ازعق وانا بطلب منه يفتح الباب علشان يكلمني ويشرحلي انا فين وبعمل ايه هنا .
وبعد وقت من الخبط بدأت ايدي توجعني جدا فصرخت فيه جامد وغلطت فيه وقولت:اااه يا حيوان يا نيكوبرا؟
الباب اتفتح وظهر وهو واقف قدامي وانا من الصدمة حطيت ايدي علي وشي ومكنتش قادره اواجهه لاني غلط فيه فقرب مني وعلامات الغضب باينه عليه جدا وانا من التوتر رجعت لورا وهو اتكلم وقال بجديه:انتي مش فارق معاكي حد ولا حتي انا!! بق بتغلطي فيا ومش همك انا ممكن اعمل فيكي ايه؟
رفعت ايدي قدامه وانا بعتذر منه وبقول برجاء :اعتبرني اختك الصغيرة وغلطت في حقك وسامحني’
رد عليا بنفي لكلامي :معنديش اخوات لسانهم طويل بالشكل دا؟
رديت بتلقائية:اعتبرني بنت خالتك طيب ،بصلي بتحذير فقولت علشان احل الموضوع،طيب بنت عمك،نظرات الغضب بتزيد في عينيه فانا اتكلمت تاني،اعتبرني مامتك طيب او اي حاجه ؟
وقف وبصلي بصمت وانا وقتها اتسحبت من قدامه علشان اجري او اعمل اي حاجه بدل الرعب اللي انا فيه .
فـ قبل ما امشي مسكني من دراعي ورجعني تاني قدامه واتكلم بغضب:مين دول وليه كانوا عايزين يموتوكي وبسببهم وقعتي في البحر!
بلعت ريقي وقولت بكل توتر:متشغلش بالك انت داحنا كنا بنلعب عسكر وحرامية!
رفع ايديه وحاوطني من عند راسي في الحيطة وقال وهو بيركز في عيوني جامد:ويا تري بق مين اللي كسب فيكوا ؟
اتكلمت بتوتر وانا ببص في عيونه اللي شكلها غريب اول مره اشوف زيها :مش انا وقعت في النيل يبق انا اللي خسرت وهما كسبوا!
رد عليا بكل هدوء:وانتي بق مبسوطة انك خسرتي وهما كسبوكي؟
قولت بتوهان وانا مركزه مع جمال عيونه:خسرت في ايه؟
رد عليا بكل بسخريه وقال :في اللعبه..العسكر وحراميه يا انسه؟
انتبهت لنفسي وبعدت عيني من علي عينه وقولت:وانا لو قولتلك الحقيقه هتعمل ايه ،يعني انا بكدب وانت محسسني بالرعب اتخيل بق انا لو حكيتلك الحقيقه رد فعلك هيبق ايه!
بعد ايديه اللي محواطني بيها وقال بجديه:مش هعمل اي حاجه وقتها هرجعك لبيتك معززه مكرمة؟
ابتسمت وقولت بفرحه:بجد يا ..هو انت اسمك ايه؟
بصلي وسكت فانا حركت راسي لان دي عادته انه يسكت فقولت برفض:مش مهم ..كملت بفضول:يعني بجد هتنفذ كلامك دا وترجعني بيتنا؟
رد عليا وقالي:هيكون علي حسب صراحتك وصدقك يا اروي يعني انا لو حسيت للحظة انك مش بتقولي الحقيقه وبتكدبي عليا هتشرفينا هنا كمان شويه’
حركت راسي وقولت:خلاص هحكيلك كل حاجه بس الاول ممكن نقعد في مكان مريح علشان رجلي وجعتني من الوقفه هنا؟
حرك راسه بالموافقه وضغط علي زرار ورايا ووقتها الحيطة اللي ورايا اتفتحت وظهر صالون راقي وشيك جدا فشاورلي عليه وقال:خلينا نقعد هناك احسن!!
حركت راسي ودخلت وهو دخل ورايا ووقتها الحيطة رجعت مكانها من تاني فاتوترت وقولت :كنت سيب الباب ..قصدي الحيطة مفتوحه علشان التهويه؟
ابتسم علي كلامي ومد ايديه وكان معاه ريموت ضغط علي زرار واتفتح الشباك اللي في الاتجاه التاني ووقتها ظهرت الجنينه وقدامها حمام السباحة الضخم وكل دا وانا ببص عليه ومبهوره.. قالي وهو بيشاورلي علي الكنبه:اقعدي يا اروي وارتاحي ؟
حركت راسي وقعدت بسرعه وكانت الكنبه مريحه بطريقه متتوصفش بصيتله لقيته قعد قدامي وبصلي بانتباه وقال:اتفضلي اتكلمي انا سامعك!
حركت راسي بالموافقه وبدأت احكيله من البدايه من وقت ما ظهر عصام في حياة رحمة بنت خالتي لحدما اتجوزوا ؟
سألني باستغراب وكان واضح عليه انه متضايق:ازاي خالتك توافق تجوز بنتها واحد مالوش اهل زي دا،معقوله لهفتها علي جواز بنتها يخليها متنتبهش لحاجة مهمة زي دي؟
بصيتله وانا بقول علشان ادافع عن خالتي:لا طبعا مش كده ،مين قال ان عصام مالوش اهل هوا ليه اهل بس متوفيين ..وبعدين رحمة بتحبه جدا ودا لوحده سبب كافي يخلي خالتي توافق عليه!
رد عليا بضيق وقال:حب ايه اللي بتتكلمي عنه ،فين الحب في انه يحط حياته وحياتها في خطر علشان بس يتجوزوا !! يعني لو العصابه دي كانت اقتحمت القاعه واذته واذتها كان هيبق مرتاح ؟
رديت بتوتر وقولت:في الحقيقه هيا العصابة ظهرت وخطفوه وانا روحت علشان ادور عليه ولقيته وكان واحد منهم هيضربه علي راسه بخشبه ضخمه فانا اتدخلت ومنعتهم ولما شافوني خوفت علي نفسي لان شكلهم كان مرعب وانا قررت اهرب وهما جريوا ورايا لحدما وقعت في النيل علي رئيك زي شكارة الرز وانت انقذتني؟
اول ما سمع كلامي اتعصب جدا وعروق وشه ظهرت واتكلم وقال بعصبيه زايدة:وانتي ازاي تضحي بحياتك علشان واحد مستهتر زي دا!!
تقدري تقوليلي لو مكنتش انا وقتها موجود ولحقتك كنتي هتعملي ايه..انتي كنتي بتغرقي وحياتك كانت هتنتهي في لحظة بسبب إستهتارك؟
كل كلمه قالها كانت صح ..حسيت وقتها قد ايه انا كنت غبيه لما قررت اتحرك من مكاني وابلغ رحمه اني هدور علي عصام وحتي لما اتدخلت قبل ما يأذوه فاتكلمت وقولت:انا كل اللي همني وقتها ان رحمه فرحتها متتكسرش ومتتفضحش قدام الناس؟
اتضايق من كلامي وقالي:وانتي بق مش مهم حياتك،اهم حاجه رحمه دي تبق مبسوطة!
اتعصبت لانه بيتكلم علي رحمه بالاسلوب دا فرديت وانا بدافع عنها:انت متعرفهاش علشان توصفها بالشكل دا ،رحمه دي بنت جدعه ويتيمه ونفسها تفرح زي باقي البنات؟
بصلي وكأنه فقد فيا الامل وقال:للاسف الطيبه اللي انتي فيها دي هتدمرك ،زمانها دلوقت كملت فرحها ومش منتبهه ليكي اصلا ولا لاختفائك؟
رديت بضيق:وانت تعرفها علشان تحكم عليها دي اكيد زعلانه عليا وقالبه الدنيا عليا انت مش فاهم دي بتحبني قد ايه!
بصلي وانا من نظرته قلقت وقولت في نفسي”معقوله رحمه تكون تجاهلت اختفائي وكملت الفرح فعلا وحتي تممت جوازها؟
كان بيبصلي وكأنه فاهم انا بفكر في ايه فاتكلم وقال:انا وعدتك لو قولتي الحقيقه هرد علي اسالتك ها عاوزة تعرفي ايه؟
اتكلمت بحزن وقولت:انا فين؟
رد عليا بهدوء:انتي في الِمنيا؟
حركت راسي وقولت بتساؤل: الِمنيا!! انا وصلت هنا ازاي انا كنت فاكره اني كنت في قريه في أسيوط!
رد عليا وقال بهدوء :ما انا لما انقذتك كنت وقتها جاي أسيوط اخلص شغل ولما شوفتك وانتي في ناس بتطاردك ووقعتي في النيل انقذتك واخدتك معايا وجبتك هنا في القصر بتاعي!
رديت بصدمه وزهول وسالته: يعني انت صاحب المكان دا بجد؟
جاوبني بالموافقه:ايوا انا صاحب القصر؟
سألته اخر مره وقولت: يعني انت بجد هترجعني لـ بيتنا زي ما وعدتني؟
بصلي للحظة بتفكير وحرك راسه وقال:انا وعدتك اني هرجعك لـ بيتك يبق انا عند وعدي ليكي ومستحيل اخلف وعدي ابدا!
حركت راسي بالموافقة وسألته بفضول:امتي..؟ هترجعني امتي لبيتنا؟
قرر يسألني انا وقالي:شوفي لو حابه دلوقت انا موافق قرري براحتك؟
بصيت في عنيه وحسيت وقتها احساس غريب اوي ومن دون وعي مني قولتله:ممكن استكشف المكان دا كله الاول قبل ما امشي ،كملت باندهاش:اصل انا ملاحظة ان تصميمه غريب وبصراحه عجبني اوي حساه زي لغز كده مش مفهوم ؟
حرك راسه وقال:غريبه انك مسألتيش علي إسمي يعني؟
جاوبته بابتسامه:حسيت انك مش هتجاوب بس عادي لو هتجاوب عليا قولي انت اسمك ايه!
رد بكل بساطة:اسمي ماجد العربي’
ابتسمت وقولت:اسمك مميز بس انت ليه كنت غريب اول ما شوفتك؟
رجع لصمته تاني وانا وقتها قمت وقفت وقولت:لا كده كتير بصراحه القصر دا اكيد فيه حاجه غلط؟
وقف قدامي بالظبط وقال:انتي اول بنت غريبه تدخل للقصر هنا وتكلمني بالطريقه دي وتلمسني كمان؟
استغربت كلامه وقولت بسخريه :ليه هو حضرتك ممنوع لـ اللمس؟
بصلي وسكت ومردش عليا وانا بصيت في الارض بخجل وبعدها رفعت عيني تاني وقولت:خلاص يا استاذ ماجد انا مش هضايق حضرتك اكتر من كده ممكن امشي دلوقت ؟
حرك راسه بالموافقه وقالي:في لبس عندك في الدولاب لو حابه تغيري هدومك؟
رديت بشكر:متشكره انا مرتاحه اكتر في هدومي؟
حرك راسه وقالي:خلاص استنيني هنا لحد ما اجهز العربية بتاعتي وهبعت كبيرة الخدم ليكي هتوصلك لعربيتي علشان نتحرك !
حركت راسي بالموافقه وهوا خرج وقفل وراه الباب وفضلت انا قاعده مكاني وفجاه اشتغلت موسيقى هاديه في المكان حسستني بالراحه فرجعت بضهري شويه لورا وقولت استمتع بسماع الموسيقي المميزة دي لحدما كبيرة الخدم دي تيجي وغمضت عيني فعلا وبدات أحس بتقل في دماغي و محستش بنفسي ونمت نوم عميق بسبب الإسترخاء اللي كنت حاسه بيه؟
________________________
الساعه بقت ٨ بالليل فقامت رحمة وصحت عصام اللي نايم جمبها وقالت بهدوء:عصام الساعه بقت ٨ قوم علشان تدور علي اروي؟
عصام قام بضيق وقال وهو متعصب:يادي موضوع اروي اللي بق كبوس حياتي .. كمل بضيق :ماشي يا رحمه انا قايم اهو!
رحمه خبطت علي ضهره وقالت بلطف:خلي بالك علي نفسك يا عصام انا ممكن اموت لو جرالك اي حاجه وحشه!
عصام بصلها وحرك راسه بتعب:ماشي يا رحمه هاخد بالي حاضر..قال كلامه وقام وبدا يغير هدومه وبعدما خلص خرج علشان يغسل وشه ورحمه قامت وخرجت وراه؟
والدة اروي اول ماشافته ضمت ايديها الاتنين لصدرها وقالت بعصبية :اتاخرت كده ليه يا عصام ولا بق يكون عجبك نوم الهنا جمب المحروسه مراتك ؟
رحمت اتكلمت :خلاص بق يا خالتي كفايه كده علي عصام مهوا قايم اهو يدور علي اروي يعني مش مطنشها؟
ردت والدة اروي بعصبيه أكتر:وهو كمان عاوز يطنشها دا يحمد ربنا اني ساكته لحد دلوقت ومعرفتش ابوها ..دا لو عرف ممكن يقلب الدنيا واول رقبه هيطريها هتبق رقبة جوزك المحروس يابنت اختي!
عصام اتوتر من كلامها ورد علي كلامها وقال بتعلثم:خلاص بق يا خالتي.. منا قولتلك اني نازل اهو شوفتيني اعترضت يعني ،خليني بس اغسل وشي علشان انزل بسرعه؟
والدة اروي بعدت عن الطريق وقالت:اتفضل يا اخويا اما اشوف اخرتها معاك ايه!
عصام دخل للحمام وهو بيدعي عليها وعلي حظة النحس واما رحمه كانت خايفه عليه ليحصله حاجه وام اروي كانت قلقانه علي بنتها،وبرغم انها واثقه فيها وفي تربيتها ليها بس اختفائها بالطريقه دي كان مرعب ومخليها هتتجنن عليها !!
_______________________
عند اروي اول ما وصلت كبيرة الخدم علشان تبلغها ان ماجد بيه مستنيها قدام باب القصر في عربيته لقت انها نايمه بعمق، كانت لسا هتصحيها ولاكن مقدرتش تقرب منها قبل ما تستأذن ماجد بيه الأول، فاتحركت لخارج الغرفه بسرعه وفضلت ماشيه لحدما وصلت عند البوابه وبلغت ماجد ان اروي نايمه نوم عميق وانها مردتش تصحيها قدل ما تاخد اذنه!
ماجد اتصدم من كلامها فحرك راسه وقال:يعني حاولتي تصحيها وهيا مفاقتش؟
كبيرة الخدم برفض:لا يا فندم انا مقربتش منها اصلا انا قولت ابلغ حضرتك الاول!
بان علي ملامحه شبح ابتسامه فحرك راسه وقال:خلاص اتفضلي انتي ارجعي لشغلك وانا هروحلها،،بس بقولك ايه ..عاوز فساتين يناسبوها بدل الهدوم اللي انتي جبتيها دي !
حركت كبيرة الخدم راسها بالموافقه وهو خرج من عربيته واتجه للغرفه اللي فيها اروي ولما لقاها نايمه ومش حاسه باللي بيحصل حواليها شالها ماجد واتجه بيها لغرفته الخاصه!