الفصل الخامس عشر15
بقلم اسرار جمعة
دعاء: إنتِ بي جاي شغالة تاكلي وأمك متوترة وما أكلت حاجة كانو هي الليلة نتيجتها
أمل: عايزاني أصوم يعني ؟!
_كيف قاعدة تاكلي عليك الله
=عادي جداً بشيل اللقمة بي يدي وبدخلها في خشمي بس كدا وبي كل بساطة☺️
_ عدم إحساس ومعاها ظرافة كمان
=ظرافة ولا غزالة وهيهي
_غايتو أنا وقت كنت مكانك أكل ما قادرة، ما أكلت الا بليل
=بري بطني ذنبها شنو ؟!
ما عندك موضوع بس
سلمي: واعية يا امل
أنا: مش كدا
بعد أكلت زين، قمت أتجهزت ...
فتحنا التلفزيون وبقينا نحضر المؤتمر وطبعا عارفين العباطة حقت البداية🙂..
وياداب أنا بقيت أتوتر ودعاء تشيل وتكاويني ...
_قبيل ما عاملة فوقك ولا البت الخطيرة ديك هسه مالك متوترة ؟!
=دعاء ده ما وقتك أختيني
بقت تعمل فيديو وتصور وتشمت فيني
وأخيراً بدوا يزيعوا الاسماء🔥...
بعد فترة سمعنا السادسة نور عادل محمد النسبة 97.5
بقيت أبكي ياخ فرحت ليها فرح ♡
كلهم اتخلعوا قالوا لي مالك ؟!
قلت ليهم دي نور صحبتي
وبعدو سمعنا أسم يقين عصام ناجي 97 يا الله ♡
بعد 3 أنفار قالوا ...
أمل عبد الرحمن أحمد 96.4
بقينا نصرخ وأنا بقيت أبكي بس وحاسة نفسي أتجمدت في مكاني و ما قادرة إتحرك!
بقوا يحضنوني ويباركوا لي♡.
بعد المباركات والأحضان والدموع والمكالمات الكتيرة من الاهل لمن فترت😹
قلت لي ناس أمي حياة الشُهرة صعبة، تاني ما عايزة إستقبل مكالمات اليوم ألغوها كلها لي بكرة
دعاء: عاين دي عايزة تفتري
سلمي: خليها تعيش الدور شوية
أنا: هيي ما تتكلموا معي وتزعجوني
دعاء: يا سلمى فكيني من البت دي
شوف دي عليك الله قال ما تزعجوني قال
ما تخليني أدق الصفائح وأطلع الفضائح وأوريكِ الفيديو حقك قبل المؤتمر
أنا: لالا خلاص سكت
دعاء: أي أحسن، ناس ما بتجي الا بالعين الحمرا
سلمى: ايواا برافو يا دعاء👏
دعاء: شفتِ أختك خطيرة كيف؟ 😌
سلمى: خطيرة بالفطيرة عديل خوفتيني انا زاتي
أنا: ربنا يحفظك لي الزي ده، أصلك ما بتفوتِ فرصة ودائماً صور الذلة معاكِ
دعاء: لازم ولا كيف يا سلمى ؟!
سلمى: أي أي
أنا: كويس إنتِ اقيفي لي مع اختك لالا سمح
زاتو ماشة أضرب لي ناس نور ...
قمت منهم😹
ضربت ليهم باركت ليهم، وهم باركوا لي كمان
ونور ادتني أتكلمت مع إيمان وخالتو سوسن باركوا لي وأديتها أتكلمت مع أمي
وإتفقنا أنو بعدين نطلع ومعانا أمهاتنا ...
طبعاً ناس المدرسة جونا زفة في البيت
وعملوا جو حِلو شديد
كل سنة بمشوا للمُتفوقين في بيوتهم كدا، وجابوا لي هدايا
دعاء جابت لي طقم كامل، وسلمى مجموعة ميكب وشوكلاتات، وأمي وأبوي طقم دهب🔥♡
وريت أمي بي خصوص الطلعة، وكلمت ناس دعاء وقلت ليهم يوروا أمهم قالوا ما عندهم مشكلة، كلمت أبوي أنو بعدين عايزين نطلع وافق وقال ح يوصلنا ...
بعد العشاء طلعنا ...
وصلنا الحديقة طبعاً المكان من أختياري وأتفقنا عليهو
لقيناهم وصلوا سلمت عليهم وتاني أشتغلت المباركات♡
سابقاً أمي وخالتو سوسن بعرفوا بعض " النسابة وكدا يعني🙈" ، إتعرفوا الأمهات على بعضهم، وبرضو في أخوات يقين التوام "سمر وسحر" بشبهوا بعض شديدد أنا بقيت أعاين محتارة وأذكر اسم ربنا، يعني ما بتقدري تفرقيهم عديل اللهم باااارك
قلت ليهم أرح السفينة
سمر وسحر: ياسلام
أنا: اللهم بارك حتى الكلام جابوا ذي بعض! لالا أنا ح أجن بعد ده
طبعاً أبينا نخليهم قلنا ليهم إنتوا صغار وبتاع، أمشوا شوفوا عربات التصادم بي وين
ركبنا السفينة ...
وقبل تتحرك ذي الناس حسيت يقين دي عايزة تبكي😹
الساعة الأشتغلت شديد شايفة دعاء ما عرفت تمسك النقاب؛ عشان وشها ما يتكشف ولا تمسك الحديدة؛ عشان ما تقع ف بقت يد ماسكة بيها النقاب والتانية الحديدة منظرها كان مُضحك شديدد 😹
والمرة دي أنا صورت، صورتهم صور كتيرة وعملت فيديوهات ليهم كلهم خاصة دعاء، لازم الإنتقام
بعد نزلنا ...
نور: كدي جيبوا لي كرسي أقعد
سلمى: هيي ألحقوا البت قبل تدوخ
كان جمبنا في طاولة قعدنا فيها
في مطعم جوا الحديقة طلبنا بيتزا وبارد وشيبس... الخ
طبعاً قالوا لي كلو بي سببك وكان في داعي تركبينا السفينة غايتو ردحوا لي لمن قالوا بس
=خلوكم من السفينة إنتوا ما شفتوا مناظركم كانت كيف ؟! وشغلت ليهم الفيديو
إيمان: عاد بالغتِ في حقنا يا أمل
سلمى:بالغت وبس
دعاء: ديل منو الناس ديل ؟! أنتوا بتعرفوهم ؟!
كلهم قالوا لالا😹
أنا: أي ليكم حق تنكروا نفسكم و وريت دعاء الصور حقتها والفيديوهات وقلت ليها كدا إتعادلنا
بقينا نتونس وأكلنا ...
يقين قالت لينا أنا ونور : أها عايزين تعملوا شنو في الفترة الي ح نكون فيها فاضيين دي ؟!
أنا: أكل، شرب ، نوم، تلفون لمن الجامعات تفتح هو ما صدقنا خلصنا
نور: ما خططت لي شي لكن تعالوا نخطط هسه
فكرنا كدا ...
إيمان قالت لينا رايكم شنو تفتحوا مركز تحفيظ ؟!
عجبتنا الفكرة جداً ♡
نور خاتمة و أنا ويقين حافظين 28 جزء يعني ح نقدر نمسك حلقات، فـ أتفقنا على الفكرة دي وقلنا لمن نكلم أهلنا ...
بعده إجتمعنا مع الأمهات والتؤام
وأتونسنا كلنا ...
بعده كل زول رجع على بيته
كانت طلعة لطيفة جداً♡♡.
*في درُوبِ الحياة لطفٌ مِن اللّٰه*
*فـ اللهُم ربَ القوة آتِ الروحَ قُوة♡♡.*
*#حوقلوا🌻💛..*