رواية منقذي الجزء الثاني2من زواج في الحرب الفصل الرابع عشر14والاخيربقلم اماني الروح

عارفة التفاعل ما حيكون كتير كالعادة بس عايزاكم تدعو لينا لانو في ضرب شديد في المنطقة القاعدة فيهااا .. وشاركتها ليكم في ظروف جدا سيئا وان شاء الله تنال اعجابكم 

ريل ما عارفة انتي عملتي فيني شنو حرفيا بدلتي حياتي كلهااا انا كنت مدمر نفسيا ما كان عندي امل اني ارجع انسان طبيعي في البص ونحن مسافرين على بورسودان وانتي قاعدة جمبي ما كنت مصدق نفسي انو انا اتجرأتا واتزوجتا تاني كان في الف فكرة في راسي لي درجة مرات ما كنت حاسي بي وجود أي زول جمبي لمن تعبتي واستفرقتي وختيتي راسك في كتفي يادوب بديت احس بي وجودك حسيت بي مسئولية اتجاهك حسيت انو في زول انا مسئول منو ومكتوب على اسمي حسيت انو انتي حاجة بتخصيني انا و منسوبة لي لازم اوفر ليك الأمان لازم اسعدك لانو انتي وثقتي فيني ووافقتي تكوني مرتي بدون ماتعرفي عني حاجة وحاليا مستسلمة ونايمة ومسنودة علي ماكنت عارف حا اتعامل معاك كيف او حا اقدر احبك واتقبلك في حياتي بي ياتو طريقة كنت مشتت وبحاول استوعبك وكل شويا كنت بتأملك وخصوصا لما تتعاملي مع تالا قدرتي في فترة قصيرة تكسبي ثقتها في حين اهلي طوال السنة الفاتت كانو بحاولو يتعاملو معاها وهي رافضة تتقبل اي زول  وانا كنت السبب في دا لاني ما احتويتها بي العكس خليتها تكرهني وتخاف مني .. انتي كنتي حاجة مخيفة بالنسبة لي لأنك انسانة بسيطة وتلقائة وحنونة بس في نفس الوقت عنيدة ولسانك طويل وما بتتنازلي عن حاجة بتخصك .. في الباخرة لما كنتي بتتكلمي مع المصري بتاع الكافتريا انتي والتومات كنت عارف ومتاكد انكم مابتعملو في حاجة غلط بس ما قدرتا استحمل اني اشوفك بتتكلمي مع راجل تاني وخصوصا انك كنتي في اليوم داك بتجنني اول مرة اشوفك فاكة شعرك ولابسة فستان .. بدون ما أشعر سمعتك كلام كعب وما بتبلع علشان اداري على غيرتي اتجاهك وأثبت ليك انو انتي ولا حاجة بالنسبة لي اتعمدتا اني استفزك واجرحك بي الكلام بس اتفاجاتا لما مديتي ايدك واديتيني كف ما كنت متوقعك تعملي كدة وقفتا لحظات علشان استوعب انتي عملتي شنو بس ساعتها ما شفتك قدامي لحقتك في الغرفة وجواي احساس اني لازم اتملكك الليلة وتكوني حاجة بتخصيني لما فتحتا الباب وشفتك بي البجامة سرحتا في تفاصيلك لي لحظات وختيت في راسي اني لازم ارعبك واخد حقي منك واتصرفتا معاك بي طريقة تخوفك قربتا منك لي درجة ما في حاجة كانت فاصلة بينا حسيت لي لحظة الدنيا وقفت واتمنيت انو تكون دي لحظة حقيقة بينا بس خوفك وصريخك فوقني وما حسيت بيك الا وانتي سايحة بين يديني اترعبتا عليك كنت حا اجن عليك كرهتا نفسي اتمنيت اني ما عملتا فيك كدة كان همي كلو انك تفوقي وتكوني بخير لما بديتي تفتحي عيونك ضميتك علي وكانت ضمى حقيقية من جوة قلبي بس اتوجعتا لما لقيتك خايفة مني وبتبعديني منك بدون وعي مني طلعتا من غرفتك طلعتا سطح الباخرة وبقيت بأنب والوم في نفسي حاولتا مية مرة ارجع واعتزر منك بس ماقدرتا لاني كنت خجلان من نفسي ولما وصلنا مكة وانتي صممتي انك ما تكوني معاي في العمرة حسيت قلبي طلع من مكانو وعرفتا قدر شنو انتي كارهاني وما طايقاني بس قررتا اني ما استسلم واحاول بي أي طريقة اصالحك واعتزر ليك وفعلا قدرتا احنن قلبك علي ورضيتي تفتحي معاي صفحة جديدة وبعد وصلنا الإمارات وامي أصرت انها تعمل ليك عرس وبعدوني عنك اسبوعين كنت بصبر نفسي واقول كلها يومين وتبقي معاي وعمري ما حازعلها بس قبل العرس بي يوم جاني اتصال من رقم غريب وقال لي تالا بتموت والسبب في دا ريل ساعتها بقيت ماشايف قدامي واتهمتك بي الإهمال ورميت عليك كل اللوم وبعد تالا بقت كويسة يادوب وعيت لي العملتو معاك وحسيت اني خسرتك نهائيا وخصوصا بعد اختفيتي كنت بفتش فيك زي المجنون رميت كل حاجة وراي البيت بقيت ما برجع ليهو الا علشان اشوف في زول عرف عنك حاجة كنت حاسي انو محمد عارف عنك حاجة بس ما راضي يقول لقايت ما تالا حالتا ادهورت مشيت لي محمد وقلتا لي انا و تالا بنموت وانت السبب لانك عارف مكان ريل وما عايز تتكلم في نفس اليوم نقلنا تالا المستشفى لانهو حالاتا بقت صعبة شديد امتنعت عن الأكل والكلام في اليوم دا بس حسيت انك حتظهري وتنقذي تالا وفعلا ظهرتي وكالعادة الوحيدة المن شافتك تالا ادت رد فعل وبقت تبكي الدكتور نصحنا نسكن في بيت برانا وانتي كان عندك شروط كنت مستعد اعمل اي حاجة واقبل بي كل شروط الدنيا المهم اكون معاك في بيت واحد وجمعنا بيت واحد بس ما كنتي بتتجاوبي معاي وما اديتني اي امل انو ممكن ترجعي لي تاني جاتني حالة من الاحباط ودخلتا في طور اكتئاب شديد بقي مافارق معاي حاجة لقايت مافي يوم انفجرت وانهرتا قدامك ساعتها بس رجعتي لي ما كنت مصدق انو خلاص ريل رجعت لي كنت زي الطفل بين يديك كلمة منك بتنهي حياتي وكلمة منك بترجع الروح لي كنتي منقذتي بي رجوعك لي رجعت لي الحياة من جديد وكان لازم أوافق على شروطك الجديدة لاني ما مستعد اخسرك مرة ثالثة رحلنا لي بيت بعيد عن كل الناس ونقلتا شغلي وحتى عملتا جلسات علاج نفسي دا كلو بس علشان تبقي معاي وما تتخلي عني ومرت الايام وعلاقتنا رجعت زي الاول واحسن .. واحلى يوم في حياتنا لما ولدتي التؤام وخليتك تختاري الاسامي علشان من يوم ظهر ليك الحمل وانتي بتتمني انهم يكونو تؤام اولاد وكنتي بتقولي لي قول لي يا ام جود وجواد  اكيد ساعتها كان في ملك حايم لانو كل الاتمنيتي حصل .. اليوم الكنتي حتولدي فيهو كان أصعب يوم في حياتي كنت على اعصابي لأنك كنتي خايفة شديد وبتبكي وماسكة في يدي لقايت غرفة العمليات وبتقولي لي ما تسيبني يا مصطفي كنت بدعي وانا ببكي وبقول يارب ما تحرمني منها اللهم ريل وما دون ذلك هين مستعد استحمل اي حاجة الا اني افقدك بقيتي عبارة عن نفسي الطالع والنازل بعد دقايق الدكتورة جات وطمنتي عليك وقالت لي جابت احلى تؤام في الدنيا مبروك .. ساعتها سجدتا في الأرض كنت مبسوط وتالا جات جارية على وحضنتني وهي بتبكي قلتا ليها ماما كويسة ماتبكي كان احلى يوم لينا كلنا وحاليا انا حكيت ليك كل الحصل في حياتي وبي التفصيل وعارف انك زعلانة علشان مديت يدي عليك بس والله غصبا عني انتي كمان وجهتي لي كلام قاااسي شديد ما قدرتا استحمل وانا مستعد لي اي عقاب منك .. 

كنت بسمع في مصطفي بي تركيز شديد وقلتا لي ما بي السهولة دي انسي كل العرفتو عنك او اتجاهل اني شفتك في حضن وحدة تانية والادهى من كدة انك مديت يدك علي وبعد في حاجات كتيير حابة اعرفها كيف الصورة قدرت توصلني والكلام دا حصل قبل كم سنة ومنو العندو مصلحة يوصل لي حاجة زي دي عنك وكية المكالمات البتجيني واختك هالة اكيد ملاحظ كمية الكره والحقد منها اتجاهي لازم تفسر لي كل حاجة .. 

طيب ياستي انا مستعد افهمك كل شي طبعا ام وليد بعد ولدها الوحيد اتحكم مؤبد ما استحملت وجاتا جلطة واتسببت ليها في غيبوبة والحصل ليها دا كلو بي سبب ظلمها لي سامرين .. والصورة الصورنا ليها مازن عمل ليها نشر في كل وسائل التواصل الاجتماعي بي صعوبة شديدة قدرتا الم الموضع ولقيت زول عمل ليها حذف من كل المواقع وبالنسبة لي انها وصلتك كيف عن طريق صحبة هالة الحقيرة وهي الكانت بتتصل عليك من رقم غريب وبتحرضك علي وهالة ابدا ما بتكرهك هي بس كانت بتحاول تحافظ على نفسها لانو صحبتها كانت بتهدد فيها وماسكة عليها شيكات ممكن تحبسها بقيت عمرها صحبتها لي الأسف زولة مريضة جدا وعندها حب التملك لي درجة المرض وممكن تعمل اي حاجة مقابل توصل لي حاجة هي عايزاهااا وانا عرفتا الحاجات دي كلها من هالة امس اتصلت علي وهي منهارة واعترفت لي بي كل حاجة واول حاجة مفروض اعملها اخلص هالة من الشيكات دي ومن صحبتها المريضة واكيد لي تصرف تاني معاها بي سبب حاجات كتيرة عملتها وأولها كانت حتحرمني منك يوم قطعت لي تذاكر لي السودان .. هالة كان لازم تلجى لي اول حاجة لما صحبتها بقت تهدد فيها انها حتسجنا لو ما فرقتني عنك ما عندها عزر في العملتو معاك لازم تتحاسب بس في الاول لازم اطلعها من الهي فيهو .. ريل انتي كل حاجة بالنسبة لي وما بقدر استغني عنك ابدا واكيد دي ما اول مشكلة تقابلنا ولا اخر مشكلة حنواجها ما عايزك في كل حاجة تحصل بينا تكوني مستعدة تخسريني وتبعدي عني ما يكون خيار الطلاق عندك بي السهولة دي .. 

مصطفي انا ابدا مااخترتا اني ابعد عنك بي مذاجي في كل مرة بعدتا عنك كنت بحس اني حاجة هينة عندك بحس انك ممكن تبيعني في اي لحظة .. سبب اني طلبتا الطلاق منك كترت المفاجأت الحكيتا لي عنك اول مرة اسمعها كان في الف فرصة تحكي لي فيها عن نفسك نحن حاليا لينا ٣ سنة متزوجين ولا مرة حكيت لي فيها بي الجد اتلخبطتا وبقيت حاسة اني ما بعرفك في حاجات كتير حكيتا لي بتخوف ولما شفتا الصورة تفكيري اتشلي وحاليا لازم تديني فرصة استوعب فيها السمعتو عنك .. 

ريل لي عايزة تخليني اندم اني حكيت ليك عني وبعدين دي كلها حاجات حصلت في الماضي ما مفروض تأثر في علاقتنا لأنها ما بتمسك في شي ودي ظروف اتفرضت علي يعني انا ما اخترتا اكون كدة .. 

مصطفي ما عارفة اقول ليك شنو بس لازم افكر وابعد عنك مدة علشان اقدر استوعب واحسم قراري اتجاهك .. هنا مصطفي زعل مني شديد وطلع بدون ما يقول ولا كلمة حسيت بي خاطرو اتكسر وخصوصا هو الاختار انو يحكي لي عن نفسو حسيت اني حا اخسرو لي الأبد لو خليتو يمشي بي الطريقة دي  بسرعة وقبل ما يطلع من البيت لحقتو وقلتا لي انتظر دقيقة انا راجعة معاك بس ما حتضغط علي وتخليني بي راحتي هنا يادوب الضحكة رجعت ليهو وقال لي جدا الانتي عايزاها حيكون .. وفعلا رجعنا بيتنا واخدتا وقتي في التفكير صح مصطفي غلط انو كان داسي عني حاجات كتيرة مهمة حصلت في حياتو بس حبو لي كان كفيل انو يغفر ليهو اي حاجة اوقات كتير الحب ما بكون كافي لي استمرار العلاقات محتاجين تفاهم واحترام .. الاحترام في نظري  اهم من الحب ومصطفي عمرو ما قلل من احترامي في حاجة بالعكس كان بحترمني ويقدرني وبراعي لي كل تصرفاتو وبكون حريص جدا انو ما يجرحني او يصغر مني قدام نفسو او قدام الناس ودي الحاجة الخلتني اتغافل عن حاجات كتير حصلت منو اكيد كلنا بنغلط بس لازم نعترف بي اغلاطنا وما نكابر .. مصطفي حل مشكلة هالة مع صحبتها وخلاها تقطع علاقتا معاها وصفي كل الشغل الما بينهم .. وقرر يقطع علاقتو معاها وحزرها انو تتصل عليهو او تتكلم معاهو .. بس هالة ماقدرت انو تقطع علاقتها مع اخوها وجات اعتزرت مني وطلبت مني اساعدها علشان تصالح مصطفي قبلتا اعتزارها وحاولتا كتير ارجع علاقتهم مع بعض بس مصطفي عنيد بس اكيد ما حا استسلم لازم يرجعو مهما كان ديل اخوان وما عندهم غير بعض 

علاقتي رجعت مع مصطفي طبيعية بس اشترطتا عليهو اني انزل شغل في البداية كان رافض تماما بس انا اصريت لازم ابني حياتي ولازم اكون معتمدة على نفسي لازم يكون عندي حياة خاصة بي .. وحاليا قدمتا شهاداتي لي كم شركة ومنتظرة اتصال منهم دعواتكم لي .. القصة بدأها مصطفي ونهيتا انااا بحبكم كتييير وربي يسعدكم جميعا كونو بخير 

الحلقة دي لو ما قريت الجزء الأول ما حتفهم فيها شي 

                      تمت