رواية اغتصاب ازهار
الفصل الثاني2
بقلم جمانه السعيدي
بيبيتي ابد ماقبلت بلي صار جانت تكول هل واحد وخلفته بس بنات اريد وليد الابني يرفع اسمه بين الناس
امي من تسمع هذا الكلام حيل اضوج وتنقهر بس مابيدها شي هذا الي صار امر رب العالمين
بابا يكله اسمعي وغلسي انتي وبناتي عندي بلدنيا كلها
الحد مافديوم امي طك كلبها حيل وكالتله ازوج بلكت يصير عندك ولد بيومها ابوي زعل منها وبقى يوم كامل مايحجي وياها
ايكله انتي ماتحبيني لوتحبيني ماتكولين ازوج
امي....موكلبي خلص من الحجي اني شنو بيدي اكدر اسوي
لو بلفلوس جان اشتريته
بابا...اسكتي وبعد لاتعيدين هذا الموضوع ابد اني ما اريد ولد وامي اني احجي وياها
فاتت الايام وبيبيتي بين فتره وفتره اذبلها حجايه
الحد ما اني وصلت صف ثالث ابتدائي وهيفاء اسجلت صف اول
اذكر هذا اليوم كلش زين بكل تفاصيله
رجعنا من المدرسه ولكينا الناس ملتمه باب بيتنا والعياط واصل الراس الشارع
دفعنا النسوان ودخلنا لكيت ماما املخه نفسها تملخ وتصرخ
عرفت ساعته ان بابا مات بلبستان
اكو باب حديد ضخم مخلينه قريب المحصار مال المواشي الي يربونها والحيوانات من طالعات دافعات الباب وواكع على بابا ومضروب براسه
ولمن سامعين الصوت عشر زلم يله رافعين الباب وراس بابا ممرود وميت بساعته
امي انهارت تخبلت تصرخ وتلطم والنسوان يردون يلزمونها مايكدرون وبيبي تنعى وتبجي
اني وهيفاء كعدنا يم ماما وكمنا نبجي
التفتت علينا ماما وكامت تصرخ راح ابوجن راح الغالي
بعد منو النا ومنو يسئل علينا
صرتن يتامه الله واكبر هم بنات وهم يتيمات
كانت ايام الفاتحه ابشع ايام
امي خدودها عباره عن دم وصوتها راح وماتكدر تحجي
وبيبيتي حاله اتعس منها
خلصت الفاتحه وكلشي رجع مثل ماكان اله مكان ابوي بقا خالي
بيت ابو عماد اهل البستان دزو علينا وكالو راح ندفع الكم تعويض....صحيح دفعونا مبلغ زين
بس فلوس الدنيا كلها ماتعوض فقدان ابوي
وصوته بلبيت
بيتنا صار كائيب كلش وبيبيتي تكضي النهار بلنعاوي والحزن وامي حاله مايسر لاحبيب ولاعدوو
رجعت امي تخيط تشتغل ليل نهار حتى تكدر دبر عيشتنا
اكعد بليل الكاها تخيط وتبقى للصبح كاعده على المكينه
صادفت فترت الحصار تقريبا سنة ٩٥
والناس بهاي الفتره كامت تركع الملابس
وتحول القديم جانت تفتك القماش وتكوي وترجع تخيطه من جديد لو مال كبار وتحوله للزغار
الخياط بهاي الفتره حيل متعب لان القماش مو جديد
بدت صحت بيبي تتدهور وامي تسحب من فلوس التعويض وتركض بيها للدكاتره
ماكو شهر يمر بدون ماتروح للطبيب
،العلاج يريد اكل زين وضروف الحياة حيل صعبه
وخاصة بلنسبه الامي وحدها شايله المسوليه
اما جدي ابو امي زوج اثنيين من بناته ورا امي
وكبر ومايكدر يشتغل يعني وضعه مو احسن من وضعنا ابد
بديت انتبه الامي واقلدها بلخياط
واساعدها اذا ملابس قديمه احضرهن الها حتى تخيطهن بسرعه
ومرات اخذ القماش الي يبقى وافصلهن اني واخيطهن بايدي
لان كلش احب الخياط
من وصلت صف خامس حيل تعبت بيبي وماتقبل تروح للطبيب
تكول اني ثقلت عليكم هواي واني بعد مابقا شي بعمري
لكن امي ابد ماتركتها
وجانت مداريتها كلش
بس الله ماراد تكمل ويانه واخذ امانته
وفرغ بيتنا من صوته ومكانه خالي جنت احن الصوت نعيها واكعد بمكانه واذكر سوالفها علينا
وصلت للمتوسطه وبدت ملامحي تبرز وبديت اصير شابه
بس اني الصراحه شكلي عادي جدا
موقبيحه ولاجميله بس وسط شعري جوزي طويل وبشرتي بيضه وطولي ١٥٥ يعني قزمه
هيفاء جانت احلى مني واطول
بديت اساعد ماما بلخياط لان تعبت حيل موحيله قبل
وكامت تتعب بسرعه وماتكدر وتشكي من مفاصلها دائما
جانت من اضوج اتعاتب بابا وتكول
ليش عفتني ورحت عفت المسوليه كلها عليه
اني احب الرسم كلش بديت ارسم ورد على القماش واكصه واثبته على الثياب بايدي
وملابس الاطفال شخصيه كارتونيه واثبته عليهن
بديت اسوي شي مميز بلخياط وكثرت زباينه والناس تتعجب من شغلي
صار عدي هوس بلخياط ومايصعب عليه شي ابد
الزم الفصال واددق بي لمن احفضه واقلده
جان عندي اخطاء بس كدرت اجاوزها
امي حالته حيل تعبت ونضرها ضعف بسبب الخياط
اني لحيت عليه تروح للطبيب
وتفاجئنا طلع عدها سكر وضغط
جنت احاول اخفف عنها التعب واشتغل بمكانها لان الخياط مسوليه وتعب
خلصت ثالث متوسط وقررت اترك المدرسه
واخيط بمكان امي واساعدها لان خفت لانخسرها
وماعدنا احد يعوض مكانه
امي ماقبلت بس اني صممت وبديت اخيط واتفنن بلخياط
حتى نمنم اشتغل
وشتريت مكينة تطريز وبديت اطرز على الملابس الي اخيطهن
وبدا يزود عدد الزبائن وناس تجيني على الوصف
وصديقات هيفاء بلمدرسه كلهن يخيطن عندي
صار عندي هوس موطبيعي بلخياط واطلع افكار جديده
ومديلات حلوه
اخيط النفسي والبنات يشوفن الفصالات ويطلبنهن مني
الحد ما اكو وحده اقارب بابا من بعيد بدت تتردد علينا وتخيط عندي
لكن تحاجينا بتكبر ومن تكعد اني واني وتجي كاشخه
على اخر حبايه
وتبدي تستعرض حياته كدامنا حتى تبين ان مستواها اعلى منا واحنا فكر وهي شبعانه
تجينا بين فتره وفتره تخيط عدنا
كم مره حاولت اطردها وماما ماقبلت تكول عيب شعليج بيها مادام تخيط وتدفع اجرته خليها تحجي وتسكت