رواية اغتصاب ازهار الفصل الخامس5بقلم جمانه السعيدي
بدينا نحضر للمهر وشتريت فستان فضي وحذاء فضي وحجزت بلصالون وامي اشترتلي محبس وكلاده ذهب
اتكول انتي تعبانه ويانه وتستاهلين
واجت كماله وام العريس جابولي فلوس وكالو اشتري انتي الذهب الي يعجبج
رحت واشتريت سوار وكلاده زغيره وحلقه وتراجي
وحجزت كيك وعصير وحضرنا كولشي
رحنا للصالون اني ونهى وهيفاء ماكدرت تتنسى وتعبانه
ام الصالون تعجبت بشعري
هلكد ما طويل وحلو من كعدت على الكرسي بعد شويه ويوصل للكاع
اني كتله لاتكصي ولاتصبغي اريد هيج ولمن اشوف العريس شنو رائيه
واذا يحب تغيير اغيره بلعرس
اول سرحته وبعدين برمت الاطراف
ويه المكياج طلعت شكل ثاني رجعنا للبيت طبعا ماكو رجال يستقبلهم زوج كماله كال اني استقبلهم
حتى مهدي ماحصلنا بيومها عدا كروه قبلها بيوم بلبصره وبايت هناك
دخلو وبدو يقرون الفاتحه وعقدووو للولد الي فهمته اسمه رياض
وشويه واجه الشيخ يعقدلي طبعا النسوان خالاتي موجودات وكم وحده من الجيران وكماله ونهى وهيفاء
وام العريس وخواته واجن اثنيين نسوان وياهن
عقدلي الشيخ وبقيت منتضره العريس يجي حتى اشوفه ويلبسني الذهب
شويه واجت هيفاء كالت طلعو الزلم كلهم
امي...يااا حتى العريس غير يجي يلبسها الذهب
ام رياض...يااا يستحي هو مناك كال لاتورطوني لبسها ومدري شنو اني استحي ترا
يله ماصار شي اني البسها الذهب
كماله...يله لاحكه تشوفه ويشوفها وتشبع منه
فدوه الكلبه يستحي واخلاقه عاليه
لبستني الذهب ام العريس وبدات الهلاهل والركص
شويه وطلعن
رادن العرس بعد يومين بس اني ماقبلت مالحك اجهز نفسي
كوه اليومين صارن اسبوع
طلعن النسوان كلهن
ورجعت اباوع النفسي بلمرايه طالعه حلوووه
صدك ليش جاي اقلل من نفسي
باوعت الشعري ياترى راح يعجبه هيج لو يطلب يغيره
يله عليمن مدوخه نفسي
بعد صرت زوجته وخلص
بهذا الاسبوع اركض ليل نهار واحضر ورحت للسوك اربع مرات اجهز نفسي
وعندي فرشات ردت افرغ واخيطهن مالحكت
وقطع قماش يله لحكت خيطت اثنيين
واجا يوم العرس ورحنا للصالون اني وهيفاء ونهى
وام الصالون من شافتني تخبلت
يمعوده شعرج يتعب خل اكصه واني ماقبلت ابد بقيت نفس الشي
خلصنا وتصلنا عليهم وكالت ام رياض جاينكم
تقريبا ربع ساعه واجت السياره
طلعنا جان اكو شاب واكف يخبل لابس قاط رصاصي وشكله كلش حلوووو اني كدرت اباوع علي زين من ورا البركع
نزلت ام رياض وكادتني اني كيفت كلت هذا العريس
بس هو رجع دخل السياره
وكعد مكان السايق وام رياض كعدت ليكدام
واني والبنات كعدنا ورا اني استغربت اذا هذا العريس ليش ماكعد بصفي
ام رياض يله يمه احمد امشينا
من كالت احمد كلت يجوز اقاربهم لان اني سمعت اسم العريس رياض يعني مو هذا
رجعنا البيتنا امي شافتني وكامت تبجي
تهلهل وتبجي وباستني وكالت
...روحي الله يهنيج مايوم قصرتي ويانه الله يرضا عليك
اني حضنته وبجيت
بعدين كالن لاتبجين يخرب مكياجج حتى هيفاء ونهى يبجن عليه
شويه وخابرو كالو اجت الزفه عدلت نفسي وكعدت منتضره العريس شويه دخلن ام رياض وخواته يركص ويهلهلن
بعدين ام رياض تقدمت تريد تكومني
امي كالت وين العريس
ام رياض...اجتنا ناس هواي مامتوقعينها ولتهى ويه الولد
يله خاله كومي وياي
وفعلا كمت بس مكسورت الخاطر ومشينا
امي كعدت يمي بلسياره وام رياض كعدت ليكدام
وصلنا البيتهم بيت حلو ومرتب ومبين مسوين بي بعض
التعديلات للعرس
كعدنا بلبدايه بلصاله وخواته يركصن ويهلهلن يمهم نسوان هواي
هيفاء تعبت حيل وراسي كام يوجعني اجيت ولكيت كرسي فارغ كعدت جان اسمع النسوان يسولفن
ولله حلوه حرامات هذا رجلها شلون قبلت بي
اني استغربت قصدهن على ازهار
ليش رجلها شبي خاف مريض زين اسل منو علي
ردت اكوم اسئلهن جان كالن يلله صعدن العروس الغرفتها
ضليت بحيره
احجي لو اسكت شكوووول
زين احنا بهذا وضعنا اكدر احجي
مااعرف ليش هيج يكووولن
خاف شغله بسيطه واضيع فرحت اختي
صعدنا للغرفه فوك وجابولنا عشى اني ماكدرت اكل
كتلهم نفسي تلعب
خفت احجي وتطلع شغله بسيطه والنسوان كبرنها
بقينا منتضرين يزفون العريس لكن تاخرو
وكلما نسئل يكولون عدنا زلم لمن يرحون انزفه
امي تعبت وكالت خل انروح تعبت اريد اخذ علاج السكر والصغط وجهال نهى ناموووو
ومهدي كلساع يخابر على نهى
امي كالت خل نروح وباجر الصبح نجيها
نجيب ريوك ونجيهم الصبح
سلمنا على ازهار وطلعنا هي تبجي واحنا نبجي
واني ماكدرت احجي او افتهم شنو جان قصد النسوان من كلامهن الي سمعته
ازهار بقيت كاعده وحدي وانتضر اشوف رجلي للمره الاولى
اكثر من ساعه كاعده وحدي
اجت اخته جابت فواكه وعصير ومي خلتهن على الميز وطلعت
وكالت انزعي البدله واخذي راحتج
اني حيل استغربت من كلامها