رواية زواج في زواج الفصل السابع بقلم جمانه السعيدي
ميار...وصلت بيت اهلي بقيت ادك بلباب
هواي محد يسمعني نايمين
رجعت ادك المشكله اسمع صوت جلاب واخاف يطلعلي واحد
بعدين امي من ورا الباب صاحت منو
ميار...اني يمه افتحي الباب
امي...ياا ميار ياا يمه شجابج هيج وكت فتحت الباب
دخلت جنطتي وحضنتها وكمت ابجي
خواتي اجن على صوتي
امي...ياا يمه ليش اجبتي هيج وكت
ميار...طردني الكلب الماعنده اصل اكو واحد يعوف مره تطلع هيج وكت
امي...تعاي ادخلي على كيفج لا تصيرين عصبيه
ميار..دخلت جوا تمددت بغرفة خواتي
امي...ارتاحي وبعدين نحجي
رحمه جابتلي مي وغصن تفرك برجليه شويه هديت
اذن الفجر وهنا بعدهن كاعدات وياي
صلينا ونمنا كلنا
كعدت الصبح لكيت الساعه بلعشره راح عليه الدوام
رفعت التليفون واتصلت باياد
ميار...صباح الخير استاذ
اياد..صباح الخير اليوم وين
ميار...اعرف اني طوختها وجاي اتغيب عن الدوام بس البارحه صارت مشكله بيني وبين اكرم وطردني من البيت
الساعه بتلاثه
اياد...لا صدك هيج وقت بليل لا يااغبي
ميار...اجيت بيت اهلي من القهر الصبح يله نمت
ومااجيت للدوام اخذتني نومه
آياد...ميخالف اليوم مصطفى اخذ مكانج
تردين احجي ويااا
ميار... لا ما يحتاج اني قررت بعد ماارجع وياا بيت اهله
لو اسكن وحدي لو ماارجع ابد
ولله لو احجيلك شلون يعاملني هو وامه
تكول شلون متحملتهم بس كافي لهنا وبس بعد مااتحمل اكثر
اياد...ارتاحي اليوم ونحجي غير وقت
ميار...شكرا استاذ لان جاي تقدر وضعي
اياد...ماكو داعي للشكر
جمانه السعيدي
اجت امي للغرفه
امي ...سمعتج تحجين
ميار...ليش ماكعدتيني راح عليه الدوام جنت احجي وياا اياد اعتذرت علمود الدوام
امي...ليش عفتي بيتج واجيتي
ميار...هذا مو بيتي هذا بيت عمتي تخيلي البارحه اكوللها اني مابيه شي الدكتور اكدتلي هذا الكلام
تكول لا اجذبين علينا زين تعاي وياي وتاكدي خل ابنج يحلل
ماتقبل
كافي اني هذا حدي بعد مااكدر استمر اكثر
امي...يااا تطلكين
ميار...لو بيت وحدي لو يطلكني اني مااكدر استمر وياا بعد اكثر
امي...لا يمه شنو تطلكين
ميار...يمه فدوه اني بسببج صار هذا حالي انتي كله اسكتي اسكتي إلى متى اسكت مو جاي يدوسون عليه
هلمره اني اتصرف اريد اخلي النقط على الحروف
اني ما ناقصني شي ليش اتنازل عن كرامتي
ترا حتى معامله حلوه مجاي يعاملني حتى اصبر واتحمل علموده
اريد اعرف اني شنووو بلنسبه اله
يريدني نسكن وحدنا حتلو خيمه اني قابله
مايريدني كافي كلمن يشوف طريقه
امي...ياا يمه شلون يعوف امه خطيه هو الجبير
ميار...ماتكول امه هيج وتعاملني بما يرضي الله
ما تخلي الله بين عيونها ليش محاربتني حرب
امي...ارتاحي ويصير خير انشاء الله
ميار...رجعت نمت راسي يوجعني من البجي البارحه
مااتصل أكرم لا هو ولا امه تسئل تطمن عليه
ثاني يوم رحت للدوام
اول ماشافني اياد ابتسم
اياد...توه نور المكتب شلون صرتي اهم شي لا اضوجين
ميار...لا مااضوج هلمره اني حددت شنو اريد
بعد مااتنازل عن كرامتي وحقوقي
آياد...يالله جرعة نشاط قويه اليوم انتي شخصية مختلفه
ميار...اكيد اصير مختلفه اريد اوكف هاي الناس عد حدها
كملت يومي عادي شغل ومعاملات
من طلعنا اني واياد صمم يوصلني للبيت
رغم اني مااريد اصعد وياا اخاف من الحجي بس هو صمم
صعدت ويااا
ميار..ماكتلي شلون الوضع بعد مارجعت مروه
اياد...صار يومين تمشي مثل الساعه ارجع الكها طابخه ومنظفه وحايره شلابسه
اكلج عود ليش النسوان لمن تخاف يله تنعدل
ميار...لا ولله اكو هي عدله من كاعها محترمه وتقدس الحياة الزوجيه
واكو مرعبله لو تخليها بقصر هم تمشي اعوج
امي دوم تسولف النا قصه
تكول قبل كان جيرانه ابيض وحلو وزوجته سوده عبده
بس يموت عليها حتى من يطلع ياخذها وياا
يكول مااكدر افاركها اموت عليها
رغم الناس كلها تحجي علي شلون انت ابيض هيج وحلو وهاي زوجتك
يرد عليهم انتم ما شايفنها شلون مداريتني
اذا اضوج لازم تخفف عني وجيب نكته وضحكني
اذا اوكع بازمه توكف وياي احسن من خواني
مرافكتني مثل ضلي من تشوفني ضايج تركصلي
لو تلبس ملابس رجال و وتخط شوارب بقلم الكحل
وتمثل كدامي الحد مااتمدد من الضحك
وتكولوم ليش تحبها
اني مو بس احبها اني اموت عليها انشاء الله يومي قبل يومها اذا تموت قبلي اتخبل
مرات الزوجه زينه وصبوره وتبتلي برجال مايعرف قيمتها
والعكس مرات يصير
بس المره اذا حست نفسها بدائرة الخطر خاف منها
تتحول إلى وحش
هسه مروه جاي اطلع كل طاقتها لان خايفه تعوفها
اياد...اني متأكد مروه فترة وقت وراح ترجع الوضعها القديم
زوجتي وعشرت عمر واعرفها زين
مراح تتحمل كل هاي المسؤليه مروه انتكاليه
تحب الناس تخدمها تحب الراحه
وكون اذا رادت شي تحصله كبل
جمانه السعيدي
ميار...نفس طبع عمتي بلضبط
اياد...اني هسه ماامنطيها وجها اريد اشوفها شكد راح تتحمل
ميار...يله الله كريم
اياد...نتحمل ونكول الله كربم
نزلت باب بيتنا ودخلت اياد راح
دخلت للبيت امي واكفه ورا الباب وضايجه
امي...منو هذا
ميار..اياد وصلني
امي...اعرف اياد اني مو عميه ليش وصلح الباب البيت
ميار...صمم يوصلني
امي...ممنوع فهمتي لو لا مانريد حجايه من اليسوه والي مايسوه
ميار...ترا اياد مو غريب
امي...ابن عمج ابن خالج اخوج شنو مو غريب تردين تجيبلنا حجايه تالي وقت
ممنوع هاي اول واخر مره سمعتي لو لا
واذا ما يعجبج كلامي روحي بيت زوجج وخلي يوصلج
اني عندي بنات اخاف عليهمن
ميار..حاضر بعد اكو أوامر ثانيه
امي...صيري حبابه ولا اجيبين النفسج الكلام
ميار...حاضر
امي...اتصل عليج اكرم
ميار...لا مااتصل
امي...اذا يتصل اني اريد احجي ويااا
ميار...مراح يتصل زوجي واعرفه زين
واحد نرجسي متكبر شايف نفسه نسخه وحيده وماكو منه
امي...لازم يتصل
ميار...اني جوعانه شنو الاكل
امي...خير من الله الحمد لله على هاي النعمه
بليل.دزلي اياد هاا شلونج
ميار...امي تعاركت ويااا 😤😤😤
اياد...ليش
ميار...لان وصلتني الباب البيت
اياد...هي ما تعرفني شنو
ميار...لا تعرفك بس ما تقبل
اياد...اني اسف بس حبيت اساعدج مو اكثر
ميار...اعرف انت انسان محترم وما يطلع منك شي عيب ابد
آياد... شكرا مراح تكرر هاي المساعده مره ثانيه ابد
ميار..خوما زعلت
اياد...بلعكس احترمتج انتي وامج اكثر
ميار...شكرا
اياد...العفو
جمانه السعيدي
من هاي المحطه اني بديت اتعلق باياد اعرف هذا الشي غلط بس مو بيدي احس هو اكثر واحد يفهمني
ويحاول يراعي مشاعري
جنت اتمنى هذا الاهتمام يجي من اكرم
جان عفت كلشي وكابلته وكعدت
ولله مستعده حتى اترك وضيفتي علمود راحته
بس أكرم ما يستاهل التعب
اني واياد علاقتنا حلوه بلضاهر صداقه
بس اني مااعتبر نفسي صديقه اله اعتبر نفسي
لكيت الإنسان القريب من روحي
توأم روحي قبل لا احجي يفهمني
كل يوم نسولف بلدائره وبليل نحجي شويه قبل لا انام
بس كلام بشغلات عامه
مو حب ورومانسيات هذا الشي خلاني اتعلق بي
شايفين الطالبه من تتعلق باستاذها تعرف هو ابد ما ممكن
يحبها بس هي تعتبره ملهم الها يكملها
هذا بلضبط كان احساسي اتجاه اياد
رجعت ام حسن واني رجعت المكاني القديم
حسيت اياد ضاج من اخذت اوراقي وطلعت من غرفته
نفس احساسي بس هذا عمل مابي مجاملات ابد
بعد مانكدر نتريك سوا ولا نحجي ولا نضحك
وامي ما تقبل يوصلني للبيت
بس بليل اكو رسائل بينا هيج مجرد فضفضه مو اكثر
فات شهر وأكرم لا اجا ولا سئل ولا عبرني حتى
اعرف هاي أوامر من امه تعتقد هيج اني راح اموت اذا ما سئل عني
ماتعرف اني خلصت منها ومن ابنها
ولله صرت حلوه ورجع الدم بخدودي كمت انام براحتي واكعد براحتي
واطبخ الاشياء الي احبها
هم ونزاح من على كلبي
ميار...يمه شنو رائيج اني اريد اطلك من اكرم
امي...يااا اسم الله ليش تكولين هيج
ميار...مبين هو هم مايريدني خلاص كلمن يشوف نفسه
امي...لا اصبري بلكت يجي يصالحج
ميار...اني مااريده يصالحني
اريده يحبني اريده يفهمني اريده يقدرني
يحس بيه
مو مجرد خدامه بيت اهله
اني مو جاي استنكف من الشغل
بس احتاج معامله حلوه احتاج واحد يجبر خاطري
واني اشتغل ليل نهار بدون كلل ولا ملل
مو شغل وتعب واهانه
اني قررت اطلك اني استاهل واحد احسن من اكرم
اني ما ناقصني شي
ليش اعيش حياة ناقصه