رواية غرام السلطان الجزء الثاني2 الفصل الخامس5 والسادس6 بقلم عادل عبد الله
غرام " تضحك " : علشان انا السبب انكم عرفتوا بعض .
يضحك باسل ويقول : لأ يا غرام ، الحقيقة ان السبب انهم يعرفوا بعض اخويا بسام !!!!!
يصمتوا جميعا في آن واحد من هول صد.متهم اثر كلمته !!!!!
غرام " تحاول تغيير الموضوع " : ايه يا جماعة عايزين ناخد صور للذكري ، انا اول واحدة هتتصور مع العرسان .
ثم يلتقط المصور عدة صور لغرام وباسل وباقي الاسرتين مع العروسين .
ينتهي الحفل ويستقل نور سيارته ومعه عروسه الي الفيلا .
باسل وغرام اثناء عودتهم الي منزلهم ...
غرام : ايه اللي انت قولته ده يا باسل ؟!!
باسل : انا مقصدش حاجة !! وبعدين انا مش كدبت !! اللي حصل فعلا ان لولا معاكسة بسام لمنار يوم الكافيه كانوا عمرهم ما هيعرفوا بعض ، ولا حتي انا وانتي كنا هنعرف بعض !!!
غرام : ايوه دي الحقيقة ، لكن انت كده فكرت نور ان بسام اخوك كانت عينه من منار من البداية ، وده ممكن يكون سبب ان نور يغير من بسام !!!!!
باسل " يضحك " : لااا ، انتي متعرفيش العلاقة بين نور وبسام ، ده اللي يعرفهم يفكر ان نور اخو بسام مش انا !!!
غرام : وليكن يا سيدي ، لكن بردو كلمتك كانت مش لطيفة ابدا في الموقف ده ، قولي صحيح بسام اخوك مسافر فين وهيرجع امتي ؟
باسل : الصراحة يا غرام بسام مش مسافر .
غرام : مش مسافر !!! اومال هو فين ؟؟ انا مش شوفته في ولا مناسبة !!!
باسل : بسام في السجن .
غرام : سجن !!! ليه ؟
باسل : بسام دخل السجن بسبب مشكلة بينه وبين جوز ماما ومسكوا في بعض وبسام قت.له .
غرام : اييييه !!! معقول !!!
باسل : ايوه ، انا اتحرجت اني اقولك انه في السجن ، هو مكنش يقصد يعمل كده لكن لحظة شيط.ان .
غرام : وهيتسجن كام سنة ؟؟
باسل : المفروض ان الحكم عليه سبع سنين ، لكن احنا عملنا نقض علشان يخفف الحكم عليه ، ده حتي اخوكي نور بنفسه هو اللي دفع اتعاب المحاميين علشان النقض .
غرام : انت مش شايف انك المفروض كنت صارحتني بحاجة زي كده بدل ما تكدب عليا ؟!! ويا تري كدبت عليا يا باسل في ايه تاني ؟؟
باسل : لا يا حبيبتي ، انا مكنتش اقصد اكدب عليكي لكن موضوع السجن ده شئ مش مشرف علشان اقوله .
غرام : ماشي يا باسل ، يا ريت بعد كده مش نخبي حاجة علي بعض .
في فيلا سلطان
يدخل نور من باب الفيلا و في يده عروسته وخلفهم سلطان وشهد .
يحمل نور عروسته ثم يبتسم لوالداه ويقول : تصبحوا علي خير ، مش عايز حد يصحيني لحد بكره المغرب !!!
يحمر وجه منار خجلا علي ذراعيه بينما تبتسم شهد : ربنا يسعدكم يا حبيبي .
يضحك سلطان : اجمد كده يا عريس ، هطلعلك بكره المغرب الاقي معاك ولي العهد .
يضحك نور : وعلي ايه يا بابا تستني لبكره المغرب !! انا كمان نص ساعة ابعتهولك علي الواتساب .
يضحك الجميع ثم يقول سلطان : اطلعوا يا حبايبي ربنا يسعدكم .
يجري نور حاملا عروسه حتي يصعد الي جناحه الخاص في الفيلا الذي اعده للزواج .
يدخل نور غرفته ضاحكا ثم يقول لعروسته : انتي سمعتي اهو بنفسك ، بابا عايز ولد بكره المغرب .
منار " تضحك " : طيب ساعدني في فك الطرحة علشان مش هعرف افكها لوحدي .
نور " يضحك " : حاضر يا قلبي واسمحيلي بقي انتي صحيح دكتورة لكن انا اللي هكشف عليكي الليلادي .
بعد الفرح بيومين .....
نور يأخذ عروسته في رحلة اوروبية لقضاء شهر العسل .
بينما يذهب سلطان الي الشركة لمتابعة اعمالها .
يجد سلطان ان كل مقاليد اتخاذ القرار في الشركة اصبحت في يد ابنه نور .
يحاول سلطان ممارسة دوره كصاحب للشركة فلا يستطيع !!!!!
يطلب سلطان الاستاذ شريف المدير المالي للشركة في مكتبه .
يفاجئ سلطان بدخول أمرأة اربعينية تخبره بأنها المدير المالي الجديد للشركة بدلا عن الاستاذ شريف !!!!!!
يطلب منها سلطان التقارير المالية الخاصة بالشركة ولكنها لا تتجاوب مع طلبه بحجة عدم وجود الاستاذ نور !!!
يشعر سلطان انه قد اصبح غريبا في شركته التي بناها طوال حياته !!!
استشاط سلطان غضبا وصاح في وجهها بالانصراف واتصل علي الفور بابنه نور الذي كان مشغولا مع عروسه في شهر العسل !!!
يرسل له سلطان رسالة عبر الواتساب يطلب منه الاتصال به فورا بمجرد رؤية الرسالة ، ثم يقوم بطلب المستشار القانوني ومحامي الشركة ، والذي يفاجئ ايضا بأنه قد قام نور بتغييره !!!
يتصل سلطان بشهد ويطلب منها الحضور فورا في الشركة .
وبمجرد وصولها يصيح في وجهها ...
سلطان : شوفتي يا ست هانم اللي ابنك عمله ؟؟
شهد : اهدا يا سلطان فيه ايه ؟ ايه اللي حصل لكل ده ؟!!
سلطان : ابنك غير المدير المالي للشركة والمستشار القانوني كمان !!! وبطلب من المديرة المالي الجديدة التقارير المالية للشركة رفضت !!! بقيت غريب في شركتي يا هانم !!!!
شهد : طيب اهدا بس علشان الغضب ده غلط عليك علشان قلبك .
سلطان : ابنك في اقل من سنة استغل مرضي والاوراق اللي انتي كتبتيها له و سلب مني كل صلاحياتي في شركتي !!! دلوقتي هو في شهر العسل وانا قاعد زي الكرسي اللي انا قاعد عليه !!!
سلطان : متقولش كده يا سلطان انت الكل في الكل .
ثم تطلب شهد المديرة المالية الجديدة للشركة والتي تأتي ولا تعرف ما يحدث !!!
شهد : انتي المدير المالي الجديد للشركة ؟؟
: ايوه يا فندم ، مين حضرتك ؟
شهد : انا شهد هانم ام الاستاذ نور وده سلطان بيه صاحب الشركة ، انتي ازاي سلطان بيه يطلب منك شغل وترفضي ؟!!!
: انا اسفة يا هانم ، لكن استاذ نور قالي ان ممنوع اي حد يطلع علي شغل الشركة غيره .
شهد : اللي سلطان بيه يؤمر به تنفذيه فورا بدون تفكير وبدون رجوع لأي حد والا هيكون اخر يوم ليكي في الشركة .
: اسفة يا هانم ، اوامر سعادتك سلطان بيه ؟
سلطان : كل التقارير المالية عن اعمال الشركة وميزانية الشركة تكون قدامي بعد دقايق .
: حالا يا سلطان بيه .
بعد حوالي ساعة
يتصل به ابنه نور ...
نور : خير يا بابا ، انا لسه شايف الرسالة حالا ، فيه ايه ؟؟
سلطان : انت ازاي تغير المدير المالي وكمان المستشار القانوني للشركة ؟!! انت خلاص لغيت وجودي نهائي ؟؟!
نور : لا طبعا يا بابا حضرتك مكانتك محفوظة .
سلطان : مكانة صورية بس ، انا دلوقتي قاعد في الشركة مش فاهم حاجة !! المدير المالي الجديد طلبت منها التقارير المالية رفضت تطلعني عليها !!!
نور : ازاي تعمل كده !!! هي اتجننت !!
سلطان : ولما اتصلت بيك يا نور بيه ومش رديت عليا اتصلت بشهد و لما جات عرفت الهانم الجديدة انا مين ، لولا كده كنت فضلت قاعد زي الكرسي اللي انا قاعد عليه بالظبط !!
نور : العفو يا بابا ، انا اسف انا هخصم اسبوع كامل منها ولو عايزني افصلها نهائي من الشركة هعمل كده ، المهم عندي متزعلش نفسك .
سلطان : اسمع يا نور ، السنة المالية خلصت ، اول لما ترجع هنرجع كل حاجة زي ما كانت باسمي ، ولما امو.ت اعملوا اللي انتوا عايزينه .
نور : اهدا بس يا بابا علشان صحتك ، اول لما ارجع هعمل كل اللي انت عايزه .
بعد اسبوعين
يعود نور من شهر العسل ويجد والده مازال غاضبا !!!
نور : فيه ايه بس يا بابا ، معقول لسه زعلان ؟!!
سلطان : طبعا لازم ازعل ، لما اكون في شركتي زي الغريب لازم ازعل .
نور : خلاص يا بابا ، حقك عليا .
سلطان : المهم دلوقتي عايزك ترجع كل حاجة باسمي تاني علشان اعرف الشغل ماشي ازاي .
نور : اسمحلي بس نأجل الموضوع ده شهرين تلاتة علي ما اخلص الكام مشروع اللي الشركة داخلاهم وبعدها اعمل كل اللي حضرتك عايزه .
سلطان : يا ابني انت فاكر انك بتكلم حد مش فاهم في التجارة ؟!!! ايه اللي دخل مشاريع الشركة في تغيير الملكية ؟!! ابوك تاجر طول عمره .
نور : يا بابا لأن في علاقات شخصية بيني وبين العملاء اللي شغالين معاهم وشوية مسائل معقدة شوية ، الموضوع كله مش هياخد اكتر من شهرين وبعدها اكون تحت امرك واعملك كل اللي تؤمر به .
سلطان : وافضل قاعد في الشركة مليش لزمة كده ؟!
نور : لأ طبعا العفو يا سيد الكل ، انا هعمل لحضرتك تفويض علشان تتصرف زي ما تحب سواء انا موجود او مش موجود ، انا مبهمنيش غير راحتك يا بابا يا حبيبي .
سلطان : ماشي يا نور ، المهم طمني العروسة عاملة معاك ايه ؟
نور : زي الفل يا بابا الحمد لله .
سلطان : طيب اتجدعن بقي عايز اشوف خلفتك يا نور .
نور : ان شاء الله يا بابا ، المهم ترضي عني .
بعد ثلاثة شهور من زواج نور
في منزل غرام وباسل
غرام : عندي مفاجأة ليك يا باسل هتطير من الفرح لما تعرفها .
باسل : خير يا حبيبتي ، انا سعيد طول ما انتي معايا .
غرام " تضحك " : مش انا بس اللي هكون معاك ، ابننا كمان هيكون معانا .
باسل : انتي ...
غرام : انا حامل يا حبيبي .
باسل : الف مليون مبروك يا حبيبتي ، ده احلي خبر سمعته في حياتي ، انا مش مصدق نفسي !! هبقي اب !!
غرام : هتبقي احلي واحن اب في الدنيا .
باسل : وانتي هتكوني اجمل أم في الدنيا ، قوليلي فيه حد عرف ولا لسه ؟
غرام : انا لسه مش قولت غير لماما بس .
باسل : لازم كلهم يعرفوا ، انا هتصل بماما واتصلي انتي بباباكي علشان كلهم يفرحوا معانا .
في فيلا سلطان
ينزل نور ومنار لتناول العشاء مع سلطان وشهد .
وبمجرد نزولهما يبتسم سلطان ويقول : عندي خبر هيفرحك قوي يا نور .
نور " يبتسم " : خير يا بابا ؟
سلطان : اختك غرام حامل .
تتغير ملامح نور فجأة و يحاول اخفائها ويبتسم : الف مبروك يا بابا ، انا هتصل بغرام وباسل بعد العشا اباركلهم .
منار : الف مبروك يا عمي ، يتربي في عزك ، الف مبروك يا طنط .
شهد : الله يبارك فيكي يا حبيبتي ، عقبالك لما نفرح بيكي انتي كمان .
نور : قوليلها يا ماما ، انا كمان نفسي يبقي عندي ابن .
منار : وانا في ايدي ايه اعمله ومش عملته يا نور ؟!!
شهد : نور ميقصدش يا حبيبتي ، ان شاء الله ربنا يرزقكم قريب .
نور : اعملي حسابك يا منار نروح بكره نعمل تحليلات علشان نطمن .
شهد : لسه بدري يا نور علي الكلام ده !!
نور : بدري من عمرك يا ماما ، احنا عايزين نطمن بس مش اكتر .
منار : ماشي يا نور زي ما تحب ، نروح نعمل تحليلات .
بعد ايام
في معمل التحاليل
نور ومنار ينتظران نتيجة التحليلات ...
يخرج الطبيب فيسأله نور : خير يا دكتور ، طمنا اخبار التحليلات ايه ؟
الطبيب : مدام منار تحليلاتها ممتازة لكن المشكلة ....
نور : ايه المشكلة يا دكتور ؟؟؟
الطبيب : المشكلة بالنسبالك انت يا نور بيه ، مش هخبي عليك فرصة الانجاب عندك ضعيفة للغاية !!!!!
نور : أناااااا .
الطبيب : احنا هنعمل اللي علينا ونمشي علي العلاج اللي هكتبهولك و ربنا قادر تخف وتخلف ، لكن ياريت متحطش امل كبير علي الموضوع ده .
الحلقة ٦
يخرج نور ومنار من عيادة الطبيب يملأ الحزن وجهه !!!
يركبا سيارتهما فتقول له منار : انت زعلان ليه بالشكل ده ؟!! ده كل شيئ بأمر الله يا حبيبي ، والدكتور قالك ان فيه أمل .
يظل نور صامتا شارد الذهن وهو يقود سيارته !!!
منار : انا عن نفسي مش مستعجلة علي الخلفة دلوقتي ، وحتي لو مخلفناش خالص مش مهم ، مش كل حاجة في الحياة الاولاد .
نور : انتي بتضحكي علي نفسك ولا بتضحكي عليا ؟ مفيش واحدة مش نفسها تكون ام !!
منار : لأ مش بضحك عليا ولا علي نفسي ، وفعلا كل واحدة نفسها تكون أم لكن افرض ربنا مش اراد هنعمل ايه ؟ لازم نرضي ونصبر .
نور : خلاص يا منار اقفلي علي الموضوع ده .
منار : مش هسكت الا لما احس انك متقبل الوضع بشكل عادي .
نور : انا هعمل اي حاجة علشان اخلف ، ولو حتي اسافر بره .
منار : متكبرش المواضيع كده يا نور ، احنا نمشي علي العلاج الاول وبعدين نشوف النتيجة ايه .
في فيلا سلطان
بمجرد دخول نور ومنار تلاحظ شهد الحزن عليهم فتسألهم بشغف : عملتوا ايه يا ولاد ؟؟ نتيجة التحاليل ظهرت ؟
تنظر لها منار في صمت بينما يقول نور " والدموع في عينيه " : انا اللي مبخلفش يا ماما .
نهضت شهد من مكانها وتهرول اليه وتحت.ضنه قائلة : يا حبيبي يا ابني متقولش كده ، ان شاء الله هتخلف .
سلطان : فيه ايه يا نور ؟ بتقول كده ليه ؟
نور : الدكتور اللي قالي كده .
سلطان : لو ربنا اراد تخلف يبقي اكيد هتخلف ، ما انت عارف يا نور ان انا ومامتك قعدنا مش بنخلف اكتر من ١٦ سنة وبعدها خلفناك ، كله بأمر الله يا ابني .
شهد وجهها يمتلأ بالدموع : متخافش يا حبيبي ، ان شاء الله هتخلف بدل الولد عشرة .
سلطان : ومتنساش ان مراتك دكتورة واكيد هتقدر تساعدك .
منار : اكيد يا عمي ، انا قولتله اننا هنمشي علي العلاج اللي كتبه الدكتور ، وممكن كمان نروح لأكبر دكتور امراض عقم في البلد ، انا معارفي في المجال الطبي كتير جدا .
شهد : خلاص بقي يا نور ، مش عايزة اشوف دموعك دي تاني .
نور : حاضر .
بعد ساعة
في غرفة سلطان
تصعد شهد لتفاجئ بسلطان يجلس حزين وبمجرد دخولها يمسح سلطان دموعه سريعا ويحاول اخفائها !!!
جميلة : انت بتبكي يا سلطان ؟؟
سلطان " بابتسامة مصطنعة " : لا ابدا ده عيني تقريبا دخلها حاجة .
شهد " بدموع " : لأ انت كنت بتبكي يا سلطان .
تنساب الدموع من عينيه : لازم ابكي !!! ابني الوحيد لما مش هيخلف علرفة ده معناه ايه ؟؟ معني ان اسم سلطان ابو المجد هينتهي بعد مو.تي وبعده !!! كان نفسي نور يخلف عيال كتير ويكونوا كلهم صبيان وشجرة عيلتنا تكبر ، لكن ..... الحمد لله علي كل حال .
شهد : معلش يا سلطان ، انا .....ثم تبكي بحرارة !!!
سلطان : خلاص يا شهد ارجوكي ، انا اعصابي مش متحملة .
شهد : الظاهر اني مكتوب عليا كل ما افرح لازم فرحتي تكون ناقصة ومكسورة !!!
سلطان : شهد ، بلاش نستسلم لمشاعر اليأس دي خصوصا قدام ابنك ومراته .
شهد : انا خايفة منار تكسر قلبه وتطلب منه الطلاق ، ساعتها ممكن نور ينهار !!!
في منزل جميلة
غرام في استضافة جميلة لمراعاتها في بداية ايام الحمل .....
تجلس جميلة وغرام وتبدو علي جميلة السعادة .
غرام : ما شاء الله انا شايفاكي النهاردة فرحانه ووشك منور ، بارب دايما يا ماما .
جميلة : طبعا فرحانة علشان انتي موجودة ومالية عليا البيت يا حبيبتي .
غرام : ربنا يخليكي ليا يا ماما .
جميلة : ويخليكي ليا يا قلب ماما ، قوليلي باباكي عرف انك حامل .
غرام : ايوه يا ماما اتصلت به وبلغته .
جميلة : اكيد فرح قوي .
غرام : ايوه ده كان واضح من صوته انه فرحان قوي .
جميلة : والحرباية ام جوزك عرفت ؟
غرام : ايوه عرفت ، باسل بلغها بالتليفون .
جميلة : وهي كلمتك وباركتلك ؟
غرام : لا الحمد لله ابنها بس اللي كلمها ، انا مش عايزة اشوفها ولا اسمع صوتها .
جميلة : ليه ؟ هي عملتلك حاجة ؟؟؟
غرام : بتتكلم معايا بطريقة مستفزة !!!
جميلة : اوعي تسكتلها ، لو ضايقتك في اي وقت قولي لابوكي ، ولو حسيتي انه معملش حاجة قوليلي وانا اتصرف معها واطلع عليها القديم والجديد .
فجأة يعلو صوت رنة هاتف جميلة ، تنظر جميلة في هاتفها فتجد فارس هو من يتصل بها فترتبك قليلا !!!!
تتعجب غرام وتسألها : مين يا ماما اللي بيتصل ؟!
جميلة : ده واحد كان بيكلمني علي معرض جديد اشترك فيه .
غرام : وحضرتك مش رديتي عليه ليه ؟!!!
يزيد ارتباك جميلة : انا لسه مش قررت اذا كنت اشترك في المعرض ولا لأ ، المهم خلينا في المهم لو شيماء ضايقتك اوعي تخبي علي ابوكي وعليا .
غرام : حاضر يا ماما .
جميلة : ياريت تقولي لباباكي يبعت ورقة الطلاق الرسمي ، انا طلبتها كتير وهو بيماطل ، لو هيستمر في المماطلة بالشكل ده هتضطر ارفع قضية خلع .
غرام : يعني خلاص مفيش اي فرصة انك تفكري ترجعي له تاني ؟
جميلة : لا يا غرام ، مش هفكر ارجع له تاني .
غرام : حاضر يا ماما هكلمه ، وبلاش ارجوكي موضوع قضية الخلع .
جميلة : لو اضطريت هيكون ده الحل الاخير بالنسبالي .
جميلة : انا هسيبك واروح انام يلا تصبحي علي خير يا قلب ماما .
غرام : وانتي من اهله يا حبيبتي .
تدخل جميلة غرفتها وتستلقي علي فراشها وتمسك بهاتفها وتتصل به ...
جميلة :انت اتصلت بيا في وقت مش مناسب خالص .
فارس : انا اسف ، ليه ايه اللي حصل ؟
جميلة : كنت بتكلم مع بنتي ولما انت اتصلت مكنتش عارفة اعمل ايه .
فارس : اسف يا جميلة مكنتش اعرف ان بنتك عندك .
جميلة " تبتسم " : ماشي خلاص مفيش مشكلة ، المهم كنت عايز ايه ؟
فارس : وحشتيني كنت عايز اسمع صوتك .
جميلة " تبتسم " : ما انا قولتلك بطل الكلام ده احنا مش صغيرين .
فارس " يضحك " : لكن انا شايفة لسه صغيرة .
جميلة " تضحك " : واضح ان نظرك ضعيف قوي .
فارس " يضحك " : يعني كلمة وحشتيني مش عجباكي ؟
جميلة : اممم ، المهم انا بنتي قاعدة عندي يومين بلاش اتصالات بقي .
فارس : لأ طبعا مقدرش .
جميلة : ليه ان شاء الله ؟ انت كل ده مش زهقت من الكلام معايا ؟؟ من ساعة ما وافقت اننا نكون اصدقاء وانت بتكلمني كل يوم مرتين او تلاتة !!
فارس : و لولا خايف تزهقي مني كنت كلمتك طول النهار والليل .
جميلة : طيب كفاية كده علشان البنت لسه صاحية في الاوضة التانية .
فارس : هتقفلي بدري كده ؟!!!
جميلة : ما انا بقولك البنت لسه صاحية .
فارس : لما تحسي انها نامت اتصلي عليا .
جميلة : بطل شغل المراهقة ده وروح نام يا فارس .
فارس " يبتسم " : هتوحشيني قوي .
جميلة " تبتسم " : و......
وفجأة ينفتح باب غرفتها وتدخل غرام فترتبك جميلة : طيب سلام سلام .
تتعجب غرام وتسألها : كنتي بتكلمي مين يا ماما ؟
جميلة : ازاي تدخلي فجأة كده بدون استأذان ؟!!
غرام : اسفة يا ماما ، بعد اذنك جاوبيني مين اللي كان بيكلمك في التليفون ؟
جميلة : وانتي مالك ؟ انتي هتحاسبيني ولا ايه يا غرام ؟!!!
غرام : مش قصدي يا ماما ، لكن انتي طول عمرك مش بتخبي عني حاجة .
جميلة : علشان طول عمري بعتبرك اختي وصحبتي .
غرام : وبما اني اختك وصحبتك علشان كده بسألك .
جميلة : ده صديق .
غرام : صديق !!! اول مرة اعرف انك ليكي صديق راجل بتكلميه وبيكلمك !!
جميلة : غرام ، قبل جوازك انتي كنتي مالية عليا حياتي مكنتش احتاج لاصدقاء غيرك ، انما دلوقتي انا حياتي فاضية .
غرام : ممكن اعرف مين الصديق ده ؟
جميلة : ده من باب الفضول ولا عايزة تحاسبيني يا غرام ؟؟
غرام : لأ علشان احنا اصحاب يا ماما .
جميلة : ده الفنان فارس المصري .
غرام : فارس المصري الفنان المعروف ؟؟
جميلة : ايوه .
غرام : وممكن تقوليلي الصداقة بينكم من امتي ولأي درجة ؟؟
جميلة : وبردو السؤال ده علشان انا وانتي اصحاب ؟!
غرام : ايوه .
جميلة : اصدقاء من بعد جوازك باسبوعين .
غرام : كلميني بصراحة يا ماما ، اللي بينك وبينه صداقة بس ولا فيه مشاعر ؟
جميلة : هتفرق بالنسبالك
غرام : علشان افهم بس .
جميلة : عايزة تفهمي ايه يا غرام ؟
غرام : عايزة افهم طلبك للطلاق الرسمي من بابا له علاقة بالاستاذ فارس ولا لأ ؟؟
جميلة : طيب كفاية استجواب بقي يا غرام علشان بجد كده ازعل منك !!!!
غرام : انا اسفة يا ماما .
جميلة : طيب روحي اوضتك ، واوعي تكرري انك تفتحي الباب بالشكل ده تاني .
تنصرف غرام وهي لأول مرة تشعر بمزيج من المشاعر المختلفة تجاه والدتها !!!!!