رواية غرام السلطان الجزء الثاني2 الفصل الحادي عشر11 والثاني عشر12 بقلم عادل عبد الله
باسل : طيب بعد اذنكم انا ، استأذن .
سلطان : لأ خليك قاعد يا باسل ، انت دلوقتي مش غريب ومفيش حاجة تتخبي عنك .
غرام : اتفضل يا بابا .
سلطان : خدي الشيك ده .
غرام : ايه ده يا بابا ؟؟
سلطان : ده شيك بستة مليون جنية .
غرام : ليه ؟
سلطان : ده جزء من حقك .
غرام : حقي في ايه ؟ انا مش فاهمة حاجة !!
سلطان : انتي هيكون ليكي نصيب وورث في ثروتي بعد وفاتي .
غرام : بعد عمر طويل .
سلطان : وانا للأسف كنت كتبت كل حاجة باسم شهد لما تعبت وهي كتبتهم باسم نور ، كل ده حصل قبل ما نعرف انك موجودة ، وللأسف حاليا بكلم نور انه يرجع كل حاجة باسمي لكنه رافض ، علشان كده ده جزء من حقك علي ما اقدر اجيبلك باقي حقك من اخوكي .
غرام : يا بابا لكن ....
سلطان : مفيش لكن ، اللي اقولك عليه نفذيه ، امسكي الشيك وافتحي حساب باسمك في البنك حطي فيه الفلوس .
غرام : حاضر يا بابا .
سلطان : تاني حاجة عايز اعرف ايه علاقة امك بالراجل اللي اسمه فارس ؟؟
ترتبك غرام ثم تقول : هي تعرفه عن طريق المعارض اللي بتشترك فيها .
سلطان : و ده يستدعي انه يروحلها المستشفي يوم الولادة ؟؟
غرام : معرفش يا بابا ، وعموما دي حياتها الشخصية انا مش من حقي اتدخل واقولها تعمل ايه ومتعملش ايه .
سلطان : ازاي مش من حقك !! دي امك وسمعتك من سمعتها !!
غرام : ايه اللي انت بتقوله ده يا بابا ؟!! بعد اذنك يا بابا متتكلمش عن ماما بالشكل ده .
سلطان : انا مقولتش حاجة غلط ، انا بتكلم في الاصول .
غرام : لأ يا بعد اذنك ، اولا انا مسمحش لأي حد مهما كان هو مين انه يتكلم عن ماما بطريقة مش كويسة ثانيا اتفضل خد الشيك انا مش عايزة فلوس .
سلطان : دي فلوسك ملهاش علاقة بموضوعنا .
غرام : يا بابا بعد اذنك متتكلمش عن ماما بالشكل ده تاني ، انت متعرفش ماما دي عملت ايه !! ماما دي عمرها ما تعمل حاجة غلط ، ماما لو كانت ممكن تغلط كانت غلطت زمان لما كانت لوحدها ومعاها بنتها الصغيرة وملهاش اي مورد رزق تعيش منه ، او علي الاقل اتجوزت !! انما هي ضيعت عمرها علشان تربي بنتها اللي هي انا !!!
سلطان : انا مقصدش حاجة غلط يا غرام ، انا بتكلم عن كلام الناس .
غرام : ماعاش اللي يجيب سيرتها ، اللي يجيب سيرة ماما اقطع لسانه ، و من الاخر يا بابا استاذ فارس متقدم لماما علشان يتجوزها وهما في حكم المخطوبين ومنتظرين قسيمة الطلاق علشان يتجوزوا .
سلطان : انتي بتقولي ايه ؟ جميلة هتتجوز ؟!!
غرام : ايوه يا بابا حقها ، كفاية عمرها اللي ضاع علشان تربيني ، من حقها تعيش باقي حياتها زي ما تحب .
سلطان : طيب ما انا عرضت عليها نرجع لبعض و رفضت !!!
غرام : اسفة يا بابا ، هي رفضت ترجعلك انت تحديدا !!!
سلطان : رفضتني انا تحديدا ؟!!
غرام : الحقيقة ايوه يا بابا .
سلطان : انا مش مصدق اللي بسمعه .
غرام : لازم تصدق علشان دي الحقيقة ، اللي حصل لماما كتير ومتزعلش مني يا بابا ، حضرتك كنت السبب سواء بطريقة مباشرة او غير مباشرة .
سلطان : ياااه !!! كمان !!!
غرام : بعد اذنك يا بابا ماما عايزة قسيمة الطلاق .
سلطان : خلصتي كل اللي عندك ؟؟
غرام : ايوه .
سلطان : خرجي نفسك انتي من الموضوع ده ، ومتدخليش فيه تاني .
غرام : زي ما تحب ، لكن يكون في علمك يا بابا ، ماما قالتلي لو حضرتك مش طلقتها رسمي في اقرب وقت هترفع قضية خلع .
سلطان : كمان ؟!!! طيب يا غرام ، مش عايزك تفتحي موضوع امك ده معايا تاني ، وانا وهي هنتصرف مع بعض ، خليكي علي الحياد زي ما هي مامتك انا باباكي .
خرج سلطان تملؤه مشاعر الغضب ذاهبا الي الشركة .
حاول سلطان ممارسة مهام العمل في الشركة ولكنه فوجئ بأنه لا يستطيع التوقيع علي اي اوراق رسمية خاصة بالشركة !!! لا يستطيع الا متابعة سير العمل واعطاء اوردرات العمل للموظفين !!
الان قد تأكد ان نور قد احكم سيطرته علي الشركة بالكامل حتي في حال عدم وجوده !!!
ظل سلطان جالسا يفكر في الواقع الذي يعيشه الان ولم يكن ليتخيله يوما !!!
بعد ايام .....
منار : وبعدين يا نور ناوي تعمل ايه ؟
نور : مش هعمل حاجة ، بابا مش هيقدر يعمل حاجة في الشركة ولازم هيحتاج لوجودي .
منار : وتفتكر هيتصل بيك ؟؟
نور : لازم يتصل بيا والا الشركة هتقف .
منار : معتقدش ان عمي سلطان ممكن يتراجع عن موقفه .
نور : لازم هيتراجع عن موقفه ويطلب مني اني ارجع ووقتها احط انا شروطي واولها انه ميتدخلش في اي حاجة بخصوص الشركة تاني .
منار : ولو باباك عاند معاك ومتصلتش والشركة وقفت ؟!!!
نور : بردو انا مش هتراجع ، مستحيل افرط في تعبي يروح لحد تاني .
منار : انا معاك ، لكن عنادكم ممكن يخسركم انتوا الاتنين !! حاول مع باباك تلاقوا حل يرضي باباك وفي نفس الوقت يحفظ حقوقك .
نور : انا مش هتنازل عن موقفي ابدا يا منار وعارف ومتأكد اني هكون كسبان في النهاية .
في فيلا سلطان
مازالت شهد غاضبة من سلطان !!!
بينما ظل سلطان حبيس احزانه لا يتكلم !!!
تتصل شهد بنور لأطمئنان عليه ...
شهد : بردو مش ناوي ترجع يا نور ؟؟
نور : مش هرجع يا ماما الا لما بابا يوافق انه ينسي الموضوع ده وميتكلمش فيه تاني .
شهد : عيب يا نور ، ده باباك ، مينفعش تفرض عليه شروطك بالشكل ده !!!
نور : وانتي شوفتي عمل معايا ايه ؟؟ بيقولي هيخلي امن الشركة يطردني من شركتي !!!
شهد : قولتلك باباك كان متعصب ولازم تتحمله .
نور : طول عمري بتحمله ، وانا دلوقتي مش صغير يا ماما علشان بابا يكلمني بالطريقة دي !! افرضي كلمني كده قدام موظفين الشركة او قدام مراتي .
شهد : عادي يا نور ده باباك ومهما عمل معاك مش عيب ، خلاص بقي يا نور هستناك ترجع النهاردة .
نور : مش هرجع ولا النهاردة ولا حتي بعد سنة الا لما هو يوعدني انه ميكلمنيش في موضوع الشركة والفلوس مرة تانية .
شهد : بردو يا نور !!! انت بردو مش عايز تسمع الكلام ؟!!
نور : ماما بعد اذنك انا بعمل الصح ليا وليكي ولنا كلنا ، مش هتيجي البنت دي وتاخد تعبنا طول السنين دي علي الجاهز .
تنزل شهد وتجلس في حديقة الفيلا وفجاة تجد رجلا غريبا يقف مع بواب الفيلا !!! ثم يأتي ويسألها : شهد هانم ، فيه محضر من المحكمة بيقول عايز سلطان بيه !!!
شهد : محضر !!!
البواب : ايوه يا هانم .
شهد : عايز سلطان بيه ليه ؟
البواب : بيقول ان سلطان ببه له جلسة في محكمة الاسرة .
شهد " تضحك " : محكمة الاسرة !!! ده اكيد فيه غلط في الاسم او العنوان .
تنادي شهد علي محضر المحكمة وتسأله : انت عايز مين بالظبط ؟؟
المحضر : مش دي فيلا سلطان ابو المجد ؟؟
شهد : ايوه .
المحضر : هو فين يا هانم ؟؟
شهد : سلطان بيه نايم فوق ، عايزه ليه ؟
المحضر : فيه اعلان من محكمة الأسرة بجلسة قضية خلع .
شهد : خلع ازاي ؟!! اذا كنت انا مراته وواقفة قدامك اهو !!!
المحضر : حضرتك مدام جميلة ؟؟
شهد " بدهشة شديدة " : جميلة !!!!!!!!!
المحضر : ايوه يا هانم ، زوجته مدام جميلة رفعت عليه قضية خلع .
شهد : طيب هات الاعلان انا هستلمه .
شهد تقرأت الاعلان والدموع تملأ عينيها !!!!! ثم تصعد الي غرفة سلطان لتجده جالسا شارد الذهن !!!
تمد يدها بورقة الاعلان وتقول " بسخرية " : اتفضل يا سلطان بيه استلم .
سلطان : ايه ده ؟
شهد : طالبينك في محكمة الاسرة علشان مراتك رافعة عليك قضية خلع !!
سلطان : مراتي !!!!!
يسحب منها الاعلان ويقرأه ويرتبك !!!
شهد " بدموع " : اتكلم ، دافع عن نفسك !! انا عايزة اعرف انت رجعتلها امتي وازاي ؟؟؟
سلطان : اناااا.....
شهد " بسخرية " : انت كداب وغشاش لكن ممثل قدير ، قدرت تمثل عليا الدور تمام .
سلطان : اناااا...
شهد : انت هتدافع عن نفسك تقول ايه ؟!! انا نفسي اعرف رجعتلها امتي ؟؟ وام الدكتورة كمان مش استحملتك وعايزة تطلق !!!
سلطان : اسمعي يا شهد .
شهد : مش عايزة اسمع منك حاجة !!!
سلطان : انا مطلقتش جميلة رسمي لحد دلوقتي .
شهد : يعني كنت بتضحك عليا وتستغفلني لما قولتلي انك طلقتها رسمي ؟؟!!
سلطان : مكنتش عايزك تزعلي .
شهد : مطلقتهاش علشان بتحبها !! مش كده ؟؟؟؟
سلطان : لأ مش بحبها ، انا كنت عايز اعوضها عن البهدلة اللي شافتها في حياتها بسببنا .
شهد : طلقني يا سلطان .
الحلقة ١٢
سلطان : لأ مش بحبها ، انا كنت عايز اعوضها عن البهدلة اللي شافتها في حياتها بسببنا .
شهد : طلقني يا سلطان .
سلطان : انتي اتجننتي يا شهد !!! ايه اللي بتقوليه ده ؟!
شهد : انت مصمم تكدب عليا و تخدعني ومادام عايز تعوضها اتفضل روحلها وعوضها براحتك لكن لازم تطلقني !!
سلطان : يا شهد انتي حب عمري ومستحيل استغني عنك ابدا ، احنا بنحب بعض من اكتر من اربعين سنة !! مش ممكن ابعد عنك دلوقتي !!!
شهد : انا ماشية وهروح اعيش مع ابني و هستني منك ورقة الطلاق .
غادرت شهد الفيلا الي الفندق ...
نور : ايه اللي حصل يا ماما ؟؟
شهد " بدموع " : ابوك ضحك عليا ولسه مطلقش جميلة لحد دلوقتي .
نور : معقول !!! يعني عايز يرجعلها ؟!!
شهد : معرفش عمل كده ليه !!! بقي بعد العمر ده كله ابوك بيخدعني ؟!!!
نور : طيب اهدي يا ماما ، وانتي سيبتي الفيلا ليه ؟؟ ده ممكن يجيبها ويعيشوا فيها !!!
شهد : يعمل اللي يعمله انا خلاص مش عايزاه ومش هرجعله تاني .
نور : لأ يا ماما ، انتي اديتي للانسانة دي فرصة زمان تكون حاجة لما جوزتيها جوزك ، اوعي تديها فرصة دلوقتي تبقي هانم علي حسابك !!
شهد : هي اساسا عايزة تطلق من ابوك !!
نور : دي بتمثل كده علشان فاكره ان بابا ممكن يكتبلها حاجة من املاكه ، انا عارف الاشكال دي ، لكن طول ما انا موجود عمرهم ما هياخدوا منه حاجة .
هنا تدخلت منار : الحقيقة يا نور انت واخد فكرة غلط عن غرام ومامتها .
نور " بسخط " : قصدك ايه ؟؟ قصدك انهم محترمين ومش يهمهم الفلوس ؟!!
منار : غرام طول عمرها محترمة وعمرها ما اهتمت بالامور المادية ، ومامتها الشهادة لله ست محترمة .
نور : انت معايا ولا معاهم ؟؟؟
منار : انا معاك طبعا يا حبيبي ، لكن بقول الحقيقة .
نور : الحقيقة انا اعرفها كويس .
شهد : انت ناوي تعمل ايه دلوقتي ؟؟
نور : اولا انتي لازم ترجعي بيتك .
شهد : دلوقتي مستحيل .
نور : مادام كده يبقي انا اشتري فيلا صغيرة نعيش فيها انا وانتي ومنار لغاية لما ترجعي لبابا .
في منزل جميلة
تجلس جميلة ترسم احدي اللوحات بينما ذهنها شارد تماما !!!
يدق جرس هاتفها .....
جميلة : ايوه يا فارس .
فارس : بتعملي ايه يا عيون فارس .
جميلة " تضحك " : برسم .
فارس : ما تيجي نتعشي مع بعض ؟
جميلة : تؤ تؤ ، النهاردة هنام بدري .
فارس : ليه ؟ مالك ؟
جميلة : عادي ، مفيش حاجة .
فارس : يبقي نتعشي مع بعض ، انتي وحشتيني قوي .
جميلة : وحشتك ازاي وانت طول اليوم معايا علي التليفون ؟!!!
فارس : مش كفاية .
جميلة : وكنا مع بعض مع تلات ايام !!!
فارس : تلات ايام كاملة ، يعني اتنين وسبعين ساعة يعني اربع الاف وتلتماية وعشرين دقيقة كتيييير قوي !!!
جميلة : امري لله ، هجهز نفسي وانزل .
فارس : هعدي عليكي بالعربية بعد نص ساعة .
في احد المطاعم الفاخرة
يدخل فارس ومعه جميلة وتجلس ويجلس امامها فارس .
جميلة " تبتسم " : انت هتفضل قاعد باصص لي كده ؟!!!!
فارس : علشان افتح نفسي علي الاكل .
جميلة : انت كده علطول يا فارس ؟؟
فارس : يعني ايه ؟؟
جميلة : يعني اسلوبك حلو كده علطول ولا دي حلاوة البدايات ؟؟
فارس : لا يا حبيبتي انا اسلوبي كده مع الناس اللي بحبهم علطول .
جميلة : هتفضل تحبني لحد امتي ؟؟
فارس : لأخر يوم من عمري .
جميلة : بالراحة عليا يا فارس من كلامك الحلو ده !! انا مش متعودة علي كده !!! اخاف اتعود علي الكلام الحلو ده .
فارس : اتعودي يا حبيبتي ، انا هفضل معاكي كده علطول .
بعد تناول العشاء
تجلس جميلة وامامها عصير البرتقال بينما يحتسي فارس قهوته يرمقها بنظراته المبتسمة .
جميلة : نظراتك دي !!!
فارس : مالها ؟
جميلة : بتكسفني !!!
فارس يمسك يدها بين يديه : غصب عني مش بارادتي .
للكاتب عادل عبد الله
جميلة : انت بتحبني قوي كده ؟؟
فارس : اكتر مما تتخيلي .
جميلة : انا نفسي اعرف حبيتني كده امتي وازاي ؟؟
فارس : من اول مرة شوفتك فيها اعجبت بيكي وكان نفسي اكلمك ، ولما سألت عنك وعرفت انك مطلقة وعايشة لوحدك مع بنتك بدأت افكر فيكي اكتر ، ولما كلمتك وقربت منك حبيتك .
جميلة " تضحك " : انت كلامك كلام شاب عنده عشرين سنة .
فارس : علشان قلبي من يوم ما شوفتك رجع وكأنه شاب صغير .
جميلة : طيب اجل شوية كلام من الحلو ده لبعد الجواز .
فارس : قوليلي عملتي ايه مع ابو غرام في موضوع الطلاق ؟
جميلة : انا خلاص رفعت قضية خلع عليه .
فارس : والجلسة امتي ؟
جميلة : بعد عشر ايام .
فارس : وبعدها نتجوز علطول ؟
جميلة : بعد شهور العدة .
فارس : يعني لسه هستني تلات شهور ؟!!!
جميلة : معلش فات الكتير ما بقي الا القليل .
فارس : ولو ابو غرام طلب منك قدام القاضي ترجعيله ؟؟
جميلة : هرفض طبعا .
فارس : اوعي تبعدي عني يا جميلة .
جميلة : اوعي انت تتغير بعد كده يا فارس ، نفسي تفضل كده علطول .
فارس : ولما نتجوز هتشوفي معايا اجمل ايام حياتك .
جميلة : بجد يا فارس ؟؟
فارس : بجد يا قلب فارس .
جميلة : انا تعبت قوي في حياتي !! نفسي الايام الجاية تكون فعلا احلي .
فارس : هتشوفي معايا اجمل ايام حياتك .
جميلة : كفاية بقي كده ، الساعة عشرة ونص ومش عايزة اتأخر اكتر من كده .
فارس : خلينا قاعدين شوية .
جميلة : معلش يا فارس ، مش عايزة ارجع متأخرة علشان كلام الناس .
فارس : طيب يا حبيبتي زي ما تحبي .
خرج فارس و جميلة وركبا سيارته وقام بتوصيلها حتي منزلها .
فارس : جميلة .
جميلة : نعم .
فارس : مش عايز اسيبك وامشي .
جميلة " تضحك " : يعني نفضل قاعدين في العربية ؟!!
فارس : لأ ، ممكن نطلع نكمل كلامنا فوق !!!!!!
في الفندق
نور يتصل بأحد موظفي شركته ...
نور : اخبار الشركة ايه ؟
الموظف : الشركة مضلمة من غيرك يا نور بيه .
نور : سلطان بيه بيروح الشركة كل يوم ؟؟
الموظف : ايوه ، كل يوم .
نور : و الشغل ماشي ولا وقف ؟؟
الموظف : الشغل ماشي لكن علي وشك انه يقف خلاص ، انا زعلان قوي علي الشركة يا نور بيه .
نور : متزعلش ، فترة وتعدي واول ما ارجع الشركة كل حاجة هترجع لوضعها .
الموظف : وحضرتك هترجع الشركة امتي ؟
نور : مش دلوقتي ، لكن قريب .
الموظف : انا خايف شغل الشركة يقف !!
نور : شغل الشركة فعلا هيقف ، وبالنسبالك انت متخافش ، لو الشغل وقف هبعتلك مرتبك .
الموظف : متشكر قوي يا نور بيه ، لكن انا مش بتكلم عن المرتب ، انا بتكلم عن الشركة نفسها مش عايزها تقف .
نور : معلش كبوة وهتعدي وكل خاجة هترجع زي الاول واحسن .
بعد اسبوعين ...
يجلس سلطان حزين في ذهول مما وصل اليه حاله !!!
يفكر ..... ماذا فعلت ليصل حالي الي ما وصلت اليه !!!
الان وقد قاربت علي السبعين من العمر اصبحت وحيدا !!!
كان لدي زوجتين و ابن وابنه ، اين هم الان !!! لقد انفضوا جميعا من حولي وتركوني وحيدا !!!
حتي المال الذي اضعت عمري كاملا في جمعه لا استطيع التمتع به الان وقد يذهب ادراج الرياح !!!
شركتي توقفت عن العمل وقد لا تعمل مرة اخري الا اذا خنعت لأبني وهو ما لن يحدث ابدا !!!
حتي شهد حب عمري تركتني وذهبت !!!
وحتي جميلة لم يتبقي علي موعد جلسة الخلع الا ايام !!!
لابد ان اتخذ القرار السليم قبل هذا الموعد بالتأكيد !!!!!!!
جمل قرائتك بالصلاة علي خاتم المرسلين